စာပေဗိမာန်ကစာကြည့်တိုက်မှူး

Zaw Naung Ling

ရန်ကုန်မြို့စာပေဗိမာန်စာကြည့်တိုက်ဆိုတာ နေ့စဉ် စာအုပ်ငှားရမ်းသူ၊ လာရောက်ဖတ်ရှုသူ ရာချီ ရှိနေတဲ့ ပြည်သူ့စာကြည့်တိုက်တစ်ခု။ ဒီလိုစာကြည့်တိုက်တစ်ခုမှာ လာရောက်ဖတ်ရှုသူတွေ အဆင်ပြေပြေဖတ်ရှုနိုင်ဖို့၊ လိုချင်တဲ့စာအုပ်ကို မြန်မြန်ဆန်ဆန်ရရှိနိုင်ဖို့ ၀န်ဆောင်မှုပေးရတာဟာ အမြင်အရရိုးရှင်းပေမယ့် လက်တွေ့မှာ သိပ်လွယ်ကူလွန်းလှတဲ့အလုပ်တစ်ခုတော့မဟုတ်။


အထူးသဖြင့် ခေတ်မီစက်ပစ္စည်းကိရိယာတွေ အားနည်းနေသေးတဲ့ မြန်မာနိုင်ငံလို ဖွံ့ဖြိုးဆဲနိုင်ငံမျိုးမှာ စာအုပ်ရေတစ်သိန်းကျော်ရှိတဲ့ စာကြည့်တိုက်တစ်ခုကို ၀န်ထမ်း (၂၈) ဦးနဲ့စီမံခန့်ခွဲရတဲ့ စာကြည့်တိုက်မှူးတစ်ယောက်ဟာ အခြားဖွံ့ဖြိုးပြီးနိုင်ငံတွေက စာကြည့်တိုက်မှူးတစ်ဦးနဲ့နှိုင်းယှဉ်ရင် အလုပ်ပိုပါတယ်။

“ User တွေကတော့အမျိုးမျိုးပဲ။ ဒီမှာ ဇာတ်လမ်းတွေကတော့ မျိုးစုံပါပဲ။ တစ်နေ့ တစ်နေ့ မရိုးရပါဘူး။ သူတို့ရဲ့လိုအပ်ချက်တွေကိုဖြည့်ဆည်းပေးနိုင်ရင် ၀မ်းသာတဲ့သူရှိသလို တချို့ကလည်း ဖြည့်ဆည်းပေးသော်လည်း သူတို့ရဲ့စိတ်ဆန္ဒအရ မတင်းတိမ်တဲ့ လူမျိုးတွေလည်းတွေ့ရ ပါတယ်။ ဒါပေမဲ့ ကိုယ်တွေကတော့ သည်းခံပြီးတော့ပဲ ၀န်ဆောင်မှုပေးခဲ့ပါတယ်” လို့ စာပေဗိမာန် စာကြည့်တိုက်ရဲ့ စာကြည့်တိုက်မှူး ဒေါ်ဥမ္မာထွေးက ပြောတယ်။

စာကြည့်တိုက်ကိုရောက်လာတဲ့စာအုပ်တွေကို မျိုးတူစုခွဲခြင်း၊ ပညာရပ်ခေါင်းစဉ်ခွဲခြင်း၊ တိုက်ပိုင်စာရင်းသွင်းခြင်း၊ ကက်တလောက်ရေးခြင်းစတဲ့အလုပ်တွေကို ၀န်ထမ်းတွေကိုကြီးကြပ်ပြီး စာဖတ်သူကိုအဆင်သင့်ငှားနိုင်တဲ့ စင်ပေါ်အထိရောက်အောင်လုပ်ဆောင်ရတာဟာ စာကြည့်တိုက်မှူးတစ်ယောက်ရဲ့ နိစ္စဓူဝ အလုပ်တွေပါ။
ဒါ့အပြင် စာဖတ်ခန်းရဲ့ အသွင်အပြင်ဒီဇိုင်းကအစ စာဖတ်သူတွေကို အကောင်းဆုံးဝန်ဆောင်မှုပေးနိုင်အောင်လည်း ကြိုးစားရပါသေးတယ်။ ဒီကြားထဲမှာပဲ စာဖတ်သူတွေ၊ စာအုပ်ငှားရမ်းသူတွေဆီကတက်လာတဲ့ Complain အမျိုးမျိုးကိုလည်း ဖြေရှင်းရသလို မသမာမှုတွေကိုလည်း တားဆီးနိုင်ဖို့ ကြိုးစားရပါသေးတယ်။

“ ဥပမာ ကြော်ငြာလုပ်ငန်းနဲ့ပတ်သက်ပြီး တချို့ အတုတွေထုတ်တာရှိတယ်။ သတင်းစာမှာ ဘယ်အချိန်တုန်းကကြော်ငြာခဲ့တယ် ဆိုတာရှိတယ်။ အဲလိုမျိုးကျတော့ တချို့မမှန်မကန်လုပ်တဲ့သူတွေက Library တိုင်းကိုလုပ်တာ။ Library တိုင်းမှာ သွားဖတ်တယ်။ ဖတ်ပြီးရင် ကုန်ပစ္စည်းအတုထုတ်တဲ့သူက မသမာတဲ့နည်းလမ်းနဲ့ Library က စာရွက်တွေကို ညှပ်ပြီးယူသွားတယ်။ ကျွန်မတို့Library မှာ ပထမဆုံးလုပ်တာတွေ့တော့ ဖမ်းတာပေါ့။ အဲဒီ အမှုဖြစ်တဲ့ ကာလအတွင်းမှာ လူတွေက အဲဒီသတင်းစာပဲ လာလာရှာကြတယ်။ ရှာကြည့်လိုက်ရင် မသမာသူက အရင်လာပြီး နောက်လူရှာမတွေ့အောင် ကြိုညှပ်ထားတော့ နောက်လူက ညှပ်ထားတာပဲတွေ့တာပေါ့။ User ကကျွန်မတို့ကို သတင်းပို့တယ်။ ရန်ကုန်တက္ကသိုလ်စာကြည့်တိုက်မှာလည်း သွားရှာတဲ့အခါ ဒီလိုပဲတွေ့တယ်ပေါ့။ အဲလို User တွေက ပညာပေးတာတွေကလည်းကြုံရတယ်” လို့ ဒေါ်ဥမ္မာထွေးကပြောတယ်။

အမှုအခင်းတွေဖြစ်တဲ့အခါ တရားခွင်မှာ သက်သေအဖြစ်တင်ပြဖို့ စာကြည့်တိုက်ကိုဖိအားပေးတာမျိုးတွေကလည်း စာကြည့်တိုက်မှူးတစ်ယောက်ရဲ့ ဘ၀မှာကြိုတင်မျှော်မှန်းမထားတဲ့ ပြသနာတွေအဖြစ် ကြုံရတတ်ပါသေးတယ်။ ဘယ်လိုပဲဖြစ်ဖြစ် စာကြည့်တိုက်မှူးတစ်ယောက်အဖြစ် ဒီလုပ်ငန်းနယ်ပယ်မှာရပ်တည်ခဲ့တာ ဆယ်စုနှစ်တစ်ခုရှိလာခဲ့ပြီဆိုတော့ အကောင်းဆုံးအတွေ့အကြုံတွေကို ပိုင်ဆိုင်ထားနိုင်ခဲ့ပြီဆိုတာကတော့ အသေအချာပါ။

ငယ်စဉ်က စာကြည့်တိုက်မှူးတစ်ယောက်အဖြစ် လုပ်ကိုင်ဖို့ တွေးတောင်မတွေးမိခဲ့တဲ့သူမ ဘ၀မှာ ကျောင်းဆရာမ တစ်ယောက်အဖြစ်လုပ်ကိုင်ဖို့ရည်ရွယ်ခဲ့ဖူးပေမယ့် ညီအစ်ကိုမောင်နှမနည်းပါးတဲ့ မိသားစုရဲ့ အဝေးမှာတာဝန်ကျခဲ့ရင်ဆိုတဲ့ စိုးရိမ်ပူပန်မှုတွေက ပြန်ကြားရေးနဲ့ပြည်သူ့ဆက်ဆံရေး ဦးစီးဌာနမှာ ၀င်ရောက်လုပ်ကိုင်ဖြစ်စေဖို့ တွန်းအားပေးခဲ့တယ်။

တပ်မတော်သားမိသားစုကနေ ၁၉၆၇ခုနှစ်မှာ မွေးဖွားလာတဲ့ သူမဟာ မွေးချင်းညီအစ်မ နှစ်ဦးထဲက အငယ်ဖြစ်ပါတယ်။ အ.မ.က ၁၁ (ဒဂုံ)၊ အ.မ.က ၂၆ (တောင်ဥက္ကလာပ)၊ အ.ထ.က ၃ (ဒဂုံ) တို့မှာ ပညာသင်ကြားခဲ့ပြီး ၁၉၈၁ ခုနှစ်မှာ တက္ကသိုလ်ဝင်တန်းအောင်မြင်ခဲ့ပါတယ်။ ရန်ကုန်တက္ကသိုလ် (လှိုင်နယ်မြေ) နဲ့ ရန်ကုန်တက္ကသိုလ်(ကမာရွတ်)မှာ သမိုင်းဘာသာအထူးပြုနဲ့ တက်ရောက်သင်ကြားခဲ့ပြီး ၁၉၉၃ ခုနှစ်မှာ ဘွဲ့ရရှိခဲ့ပါတယ်။

သူမရဲ့ ပထမဆုံးဝန်ထမ်းဘ၀ကို ပြန်ကြားရေးနဲ့ပြည်သူ့ဆက်ဆံရေးဦးစီးဌာနမှာ အငယ်တန်းစာရေး အဖြစ် ပြင်ဦးလွင်မြို့မှာစတင်တာဝန်ထမ်းဆောင်ခဲ့တာပါ ။ ဖောင်ကြီးဗဟိုဝန်ထမ်းတက္ကသိုလ်သင်တန်းနဲ့ စာကြည့်တိုက်ပညာဆင့်ပွားသင်တန်းကို ၁၉၉၈ ခုနှစ်မှာ တက်ရောက်ခဲ့ပြီး ပြင်ဦးလွင်မှာ နှစ်နှစ်လောက် တာဝန်ထမ်းဆောင်ပြီးနောက် ကျောက်တန်းမြို့ကို ပြောင်းရွှေ့တာဝန်ထမ်းဆောင်ခဲ့တယ်။ အဲဒီနောက် ပြန်ကြားရေးနဲ့ပြည်သူ့ဆက်ဆံရေးဦးစီးဌာနရုံးချုပ်မှာ အငယ်တန်းစာရေးအဖြစ်ပဲ ဆက်လက် တာဝန်ထမ်းဆောင်ခဲ့တယ်။

အဲဒီနောက် စာကြည့်တိုက်နဲ့သုတပညာဒီပလိုမာသင်တန်းကို ၂၀၀၂ ခုနှစ်မှာတက်ရောက်ခဲ့ပြီး ရန်ကင်းမြို့ နယ်မှာ ပြောင်းရွှေ့တာဝန်ထမ်းဆောင်ခဲ့တယ်။ အဲဒီအချိန်မှာတော့  ဒုတိယဦးစီးမှူးရာထူးဖြစ်လာပါပြီ။ ဒီပလိုမာယူခဲ့ရာမှာ တင်သွင်းတဲ့ကျမ်းက “မြန်စာဂုဏ်ကျော်မြင့်နှင့်ဒေါ်မာလေးစာစုစာရင်း”ဆိုတဲ့ ကျမ်းဖြစ်ပါတယ်။

“ စာကြည့်တိုက်ပညာနဲ့ပတ်သက်ပြီး ဒေါက်တာဘွဲ့အထိရှိတယ်။ ကျွန်မကတော့ မသင်နိုင်ဘူး။ ဘာဖြစ်လို့လဲဆိုတော့ အမေက လေဖြတ်ထားတော့ လောလောဆယ်စာလုံးဝမကျက်နိုင်ဘူး။ အမေ့ကိုလည်းပြုစုရတယ်၊ ရုံးကိုလည်း အချိန်မီလာရတယ်။ အဲဒီတော့စာလုံးဝမကျက်နိုင်တော့ နောက်ထပ် ဘွဲ့တွေထပ်မယူနိုင်ဘဲ ဒီပလိုမာနဲ့တင် ရပ်နေရတယ်” လို့ သူမကဆိုတယ်။

ဖခင်ဖြစ်သူကွယ်လွန်သွားတဲ့နောက် ကျန်ရစ်သူမိခင်ကို သူတို့ညီအစ်မနှစ်ဦးကပဲ ပြုစုစောင့်ရှောက်ခဲ့ ရတယ်။ အစ်မဖြစ်သူကလည်း အရင်က ပြန်ကြားရေးနဲ့ ပြည်သူ့ဆက်ဆံရေးဦးစီးဌာနမှာ ၀င်ရောက် လုပ်ကိုင်ခဲ့ပြီး ကျန်းမာရေးအခြေအနေကြောင့် ပြီးခဲ့တဲ့နှစ်ကမှ အလုပ်ကနုတ်ထွက်ခဲ့ရသူဖြစ်လေတော့ အိမ်ထောင်မပြုတဲ့သူမက  (၄၇) နှစ်အရွယ်ရှိပေမယ့် အငယ်ဆုံးအဖြစ်နဲ့  မိသားစုကိုပြန်လည်ကြည့်ရှုနေရ တာဖြစ်ပါတယ်။

၂၀၀၅ ခုနှစ်မှာတော့ ရန်ကုန်မြို့၊ ကုန်သည်လမ်းက စာပေဗိမာန်စာကြည့်တိုက်မှာ လက်ထောက် စာကြည့်တိုက်မှူး ရာထူးနဲ့ပြောင်းရွှေ့တာဝန်ထမ်းဆောင်ခဲ့ပြီး ၂၀၁၂ ခုနှစ်မှာ စာကြည့်တိုက်မှူးအဖြစ် ရာထူးတိုးမြှင့်ခံခဲ့ရတယ်။

“ ပြန်ကြားရေးနဲ့ပြည်သူ့ဆက်ဆံရေးရုံးမှာ တာဝန်ထမ်းဆောင်တော့ စာကြည့်တိုက်သင်တန်းကို တက်ရတယ်။ ဒါကတော့ လုပ်ငန်းနဲ့ပတ်သက်ပြီး မဖြစ်မနေတက်ရတာပေါ့။ တက်ရင်းနဲ့မှ စိတ်ဝင်စား လာပြီး ဒီပလိုမာဆက်တက်ဖြစ်ခဲ့တာ” လို့ လုပ်သက် နှစ်၂၀ ကျော်ပြီဖြစ်တဲ့ သူမကဆိုတယ်။

စာကြည့်တိုက်ပညာနဲ့ပတ်သက်လို့ ၂၀၀၂ ခုနှစ်မှာ စင်ကာပူနိုင်ငံမှာ ၂ ပတ်ကြာ သင်တန်းတက်ရောက် ခဲ့ပြီး စာကြည့်တိုက်တွေ၊ စာအုပ်ငှားရမ်းတဲ့စနစ်တွေ၊ အီးကတ်တလောက်တွေ၊ အီးဘုတ်ခ်တွေ ပြုလုပ် ပုံတွေကို လေ့လာခဲ့တယ်။ ၂၀၁၃ ခုနှစ်မှာလည်း စင်ကာပူနိုင်ငံမှာပြုလုပ်တဲ့ နိုင်ငံတကာ စာကြည့်တိုက် အသင်းကပြုလုပ်တဲ့ စာကြည့်တိုက်ညီလာခံကို မြန်မာနိုင်ငံစာကြည့်တိုက်အသင်းအနေနဲ့ တက်ရောက်ခဲ့ပြီး စာတမ်းဖတ်ကြားမှုတွေ၊ ဆွေးနွေးမှုတွေပြုလုပ်ခဲ့တယ်။

စာပေဗိမာန်စာကြည့်တိုက်မှာလည်း စာကြည့်တိုက်တည်ထောင်လိုတဲ့ဌာနတွေ၊ စာတမ်းပြုစု ဖို့လေ့လာနေ တဲ့ကျောင်းသားတွေ ကို အကြံပေးဆွေးနွေးမှုတွေပြုလုပ်ရတာကလည်း သူမရဲ့တာဝန်တွေထဲက တစ်ခုဖြစ်ပါတယ်။

စာပေဗိမာန်စာကြည့်တိုက်ကို တိုးတက်ပြောင်းလဲအောင် တတ်စွမ်းသမျှဆောင်ရွက်ခဲ့တာတွေအထဲမှာ သမားရိုးကျစာအုပ်အငှားစနစ်ကနေ E.Catalogued စနစ်နဲ့ ငှားရမ်းနိုင်အောင်ဆောင်ရွက်ခဲ့တာ၊ E.Book တွေကို ဖတ်ရှုနိုင်အောင်လုပ်ဆောင်ခဲ့တာ၊ အင်တာနက်အသုံးပြုပြီး စာအုပ်တွေ ရှာဖွေဖတ် ရှုနိုင်အောင်ဆောင်ရွက်ခဲ့တာတွေလည်း အပါအ၀င်ဖြစ်ခဲ့တယ်။

 သာမန်အသင်းသားနဲ့ အထူးအသင်းသားရယ်လို့ (၂) မျိုးခွဲခြားပြီး စာအုပ်တွေငှားရမ်းခဲ့တဲ့ စာပေဗိမာန် စာကြည့်တိုက်မှာ အရင်က သာမန်အသင်းသားကို ၀င်ကြေး (၄၅၀၀) ကျပ်၊ အထူးအသင်းသားကို ၀င်ကြေး (၈၀၀၀) ကျပ်ကောက်ခံခဲ့ရာကနေ သူမလက်ထက်မှာ သာမန်အသင်းသားကို ၀င်ကြေး (၁၀၀၀) ကျပ်၊ နှစ်စဉ်ကြေး (၅၀၀) ကျပ်နဲ့ အထူးအသင်းသားကို ၀င်ကြေး (၂၀၀၀) ကျပ်နဲ့ နှစ်စဉ်ကြေး (၁၀၀၀) ကျပ်အထိ လျှော့ချခဲ့တယ်။

သာမန်အသင်းသားနဲ့ အထူးအသင်းသားကွာခြားချက်ကတော့ သာမန်အသင်းသားက စာအုပ် (၁) အုပ်ကို (၇) ရက်အခမဲ့ ငှားရမ်းနိုင်ပြီး အထူးအသင်းသားကစာအုပ်( ၂ ) အုပ်ကို (၁၀)ရက်အခမဲ့ ငှားရမ်းနိုင် ပါတယ်။

ရက်လွန်ကြေးတွေကိုလည်း အရင်က တစ်ရက်ကျော်လွန်ရင် စာအုပ်တစ်အုပ်ကို (၁၀၀) ကျပ် ဒဏ်ရိုက်ခဲ့ ရာကနေ တစ်ရက်ကျော်လွန်ရင် စာအုပ်တစ်အုပ်ကို (၅၀) ကျပ်အထိ လျှော့ချခဲ့ပြီး စာကြည့်တိုက်ရဲ့ အတွင်းပိုင်း အပြင်အဆင်တွေကိုလည်း ပြုပြင်မွမ်းမံခဲ့တယ်။

ဒေါ်ဥမ္မာထွေးဟာ မြန်မာနိုင်ငံစာရေးဆရာများအသင်း (တောင်ဥက္ကလာပမြို့နယ်) မှာ အသင်းဝင်တစ်ဦး အဖြစ်ပါဝင်ပြီး မဥူနဲ့ ဥမ္မာငယ် ဆိုတဲ့ကလောင်နာမည်တွေနဲ့ ကလေးစာပေနဲ့ စာကြည့်တိုက်နဲ့ပတ်သက်တဲ့ စာပေတွေရေးသားခဲ့သူဖြစ်တယ်။

စာကြည့်တိုက်မှာလာပြီး လက်တွေ့ကွင်းဆင်းသူတွေ၊ ပြန်ကြားရေးနဲ့ပြည်သူ့ဆက်ဆံရေးရုံးက ၀န်ထမ်းတွေကိုလည်း စာကြည့်တိုက်ပညာနဲ့ပတ်သက်တာတွေအပြင် ပေစာ၊ ပုရပိုက်စာ၊ ထန်းဖူးစာ စတာတွေနဲ့ ပတ်သက်ပြီး သင်တန်းတွေပို့ချခဲ့သေးတယ်။

မြန်မာနိုင်ငံက စာကြည့်တိုက်တွေဟာ နိုင်ငံတကာက စာကြည့်တိုက်တွေနဲ့ နှိုင်းယှဉ်ကြည့်ရင် အစစ အရာရာ အားနည်းနေသေးတာကတော့ သူမကိုမချင့်မရဲဖြစ်စေပုံရတယ်။ သူမသွားရောက်ဖူးခဲ့တဲ့ စာကြည့်တိုက်ကြီးတွေရဲ့ဓာတ်ပုံတွေ၊ စာအုပ်ငှားရမ်းတဲ့စနစ်တွေအကြောင်းကို ရှင်းပြရင်း မြန်မာနိုင်ငံက စာကြည့်တိုက်တွေရဲ့ လက်ရှိတိုးတက်မှုလေးတွေကိုလည်း အကောင်းဘက်ကရှုမြင်ရှာတယ်။

“ ကျွန်မတို့နိုင်ငံမှာတော့ ရှိတဲ့ပစ္စည်းလေးတွေနဲ့ စာဖတ်သူကို အကောင်းဆုံးဝန်ဆောင်မှုပေးနေတာပဲ ရှိသေးတယ်။ ဖြစ်ချင်တာပေါ့ နိုင်ငံခြားလို။ အဓိကကတော့ ငွေကြေးပါပဲ။ ငွေကြေးထောက်ပံ့မှု လိုသေး တာပေါ့။ ကျွန်မတို့နိုင်ငံက ဆင်းရဲတဲ့နိုင်ငံကိုး” လို့ သူမက ဆိုတယ်။

စာကြည့်တိုက်မှူးအဖြစ်ရပ်တည်လိုတဲ့လူငယ်တွေအနေနဲ့ကတော့ ကိုယ့်ရဲ့လုပ်ငန်းအပေါ်စိတ်ဝင်စားမှုရှိဖို့နဲ့ စာများများဖတ်ဖို့ သူမက တိုက်တွန်းတယ်။

“ ကိုယ်ကခေါင်းဆောင်ကောင်းဖြစ်ပြီး တခြားသူတွေလည်း ကိုယ့် Library ကို အတုယူပြီး လုပ်နိုင်အောင် သွန်သင်ပြနိုင်ရမယ်။ ကိုယ့် Library ကိုရောက်လာတဲ့ User တွေရဲ့လိုအင်ဆန္ဒတွေကို လျင်လျင်မြန်မြန်ဖြေရှင်း တတ်ရမယ်။ ရှဥ့်လည်းလျှောက်သာ ပျားလည်းစွဲသာပေါ့။ ချိုသာပျူငှာစွာ ဆက်ဆံတတ်ရမယ်။ စာဖတ်သူကိုနားလည်အောင်ရှင်းပြဖို့ ကိုယ့်ရဲ့ခေါင်းထဲမှာ ပြေးနေရမယ်” လို့ သူမက ပြောတယ်။

လက်ရှိမှာတော့ ဒေါ်ဥမ္မာထွေးဟာ  ပြန်ကြားရေးနဲ့ပြည်သူ့ဆက်ဆံရေးဦးစီးဌာနရဲ့ လက်ထောက် ညွှန်ကြားရေးမှူး ရာထူး စာမေးပွဲကို ဖြေဆိုအောင်မြင်ထားပြီး နောက်ထပ် တာဝန်ပေးအပ်မှုတွေ ကို စောင့်ဆိုင်းနေဆဲကာလဖြစ်တာမို့ ၁၀ နှစ်နီးပါးလုပ်ကိုင်လာခဲ့တဲ့ စာကြည့်တိုက်မှူးဘ၀ကို သိပ်မကြာခင် ကျောခိုင်းရဖို့ရှိနေပါတယ်။

“ ဘေးကကြည့်ပြီးတော့ လိုအပ်တာကိုတော့ အကြံပေးနိုင်မယ်လို့ထင်ပါတယ်” လို့ သူမက ဆိုပါတယ်။

ဇော်နောင်လင်း