တရုတ်-ဗီယက်နမ် ဆက်ဆံရေးမှ ခေတ်သစ်မြန်မာ့ ပထ၀ီနိုင်ငံရေးကို လှစ်ကြည့်ခြင်း

Published on Saturday, 10 March 2012 01:24

Written by လှရွှေ

ဒီမိုကရေစီ ခေါင်းဆောင် ဒေါ်အောင်ဆန်းစုကြည် မန္တလေး ခရီးစဉ်အတွင်း ဟောပြောမည့်စင် တွင် ခြယ်မှုန်းထားသည့် ပန်းချီကားသည် မန္တလာသူ မန္တလာသားတို့၏ ရင်ထဲ၌ ဖြစ်ပေါ်နေသော ခံစားချက်ကို ပီပြင်စေသည်။ နဂါးကြီးက အန္တရာယ်ကို စိုးရိမ်ထိပ်လန့်သည့် အခြေအနေကို ထင်ဟပ်နေသည့် ပန်းချီကားချပ်ဖြစ်သည်ဟု သုံးသပ်မိသည်။

အာရှ-ပစိဖိတ်၏ အင်အားကြီး နိုင်ငံအဖြစ် ထွက်ပေါ် လာနေသည့် တရုတ်နိုင်ငံသည် စီးပွားရေးတဟုန်ထိုး တိုးတက်လာသည့်အမျှ အိမ်နီးချင်းများနှင့် ဆက်ဆံရေးတွင်လည်း စီးပွားရေးကို ဇောင်းပေးလာသည်။
အစဉ်အလာအရ တရုတ်ယဉ်ကျေးမှု လွှမ်းမိုးသော ဗီယက်နမ်-တရုတ် တို့၏ ဆက်ဆံရေးသည် အခြားသော အိမ်နီချင်း နိုင်ငံငယ်လေးများ ဖြစ်သည့် လာအို၊ မြန်မာ၊ ကာဂျစ်စတန် တို့ အနေဖြင့် လေ့လာသင့်သော အချက်ပင်ဖြစ်သည်။

တရုတ်-ဗီယက်နမ် ဆက်ဆံရေး
အမေရိကန်တို့၏ ကျူးကျော်စစ်ကို အောင်မြင်ခဲ့သော ဗီယက်နမ်သည် အိမ်နီးချင်း တရုတ်နိုင်ငံက သင်ခန်းစာပေးတဲ့ စစ်ဆင်မှုကို ၁၉၇၉ ဖေဖေါ်ဝါရီလ ၁၇ ရက်နေ့တွင် ရင်ဆိုင်ရသည်။ ခေတ်သစ် တရုတ် နိုင်ငံထူထောင်ရေး ခေါင်းဆောင်ကြီး တိန်ရှော့ပင်၏ စကားအရ ဆိုပါက Teach Vietnam a lesson သင်ခန်းစာပေး စစ်ဆင်ရေးဟု အမည်တတ်ထားခြင်းပင် ဖြစ်သည်။
ဗီယက်နမ် စစ်ပွဲကာလတွင် ကွန်မြူနစ်တရုတ်သည် မြောက်ဗီယက်နမ်ကို စစ်လက်နက်၊ စစ်သင်တန်းနှင့် အခြားသော အကူအညီ အများအပြားကို ပေးအပ်ခဲ့သည်။ သို့ရာတွင် မြောက်ဗီယက်နမ် ကွန်မြူနစ်အစိုးရသည် နှစ်ပေါင်း ထောင်ချီ ကြာညောင်းခဲ့သော သမိုင်း အထောက်အထားများကို အခြေပြုကာ တရုတ်နိုင်ငံနှင့် ဆက်ဆံရေးတွင် သံသယကြီးစွာ ထားရှိခဲ့သည်။
ဗီယက်နမ်စစ်ပွဲ အပြီးကာလ ၁၉၇၆ ခုနှစ်တွင် ဗီယက်နမ်သည် ခမာကွန်မြူနစ် အုပ်ချုပ်သည့် ကမ္ဘောဒီးယား နိုင်ငံကို ကျူးကျော်ခဲ့သည်။ ခေတ်ဟောင်း သမိုင်းတွင် အင်ဒိုချိုင်းနား သုံးနိုင်ငံဖြစ်သည့် လာအို၊ ကမ္ဘောဒီးယားနှင့် ဗီယက်နမ်တို့သည် ရှုပ်ထွေးသော ဆက်ဆံရေး ရှိခဲ့သည်။ ၁၉၇၆ ခုနှစ်တွင် ကမ္ဘောဒီးယား ပြည်တွင်းရေးကို ၀င်ရောက်စွပ်ဖက်လာသည့် ဗီယက်နမ်သည် တရုတ်နိုင်ငံ၏ ဒေါသကို နှိုးဆွပေးခဲ့သည်။
၁၉၇၀ ကျော်ခုနှစ်များ အတွင်း ဗီယက်နမ်ရှိ တရုတ် Hoa မျိုးနွယ်စု အပေါ် ဗီယက်နမ် အစိုးရ၏ ဖိနှိပ်မှုကို တရုတ်အစိုးရမှ အခဲမကျေ ဖြစ်ခဲ့သည်။ ၁၉၇၆ ခုနှစ်တွင် တရုတ်၏ မဟာမိတ် ကမ္ဘောဒီးယားကို ကျူးကျော်ခြင်းသည် တရုတ်နိုင်ငံအဖို့ လက်မခံနိုင်စရာ ဖြစ်လာကာ ၁၉၇၉ ခုနှစ်တွင် တရုတ်ကျူးကျော်မှု ပေါ်ပေါက်လာရခြင်း ဖြစ်သည်။
တရုတ်အစိုးရ၏ သုံးပတ်ကြာ ကျူးကျော်ရေး စစ်ပွဲတွင် တရုတ်တပ်သား ၂၅၀၀၀ ကျော် သေဆုံးခဲ့ပြီး၊ ၅၀၀၀၀ ကျော် ဒဏ်ရာရရှိခဲ့သည်။ ဗီယက်နမ်နိုင်ငံ အပေါ်သင်ခန်းစာ ပေးလိုသော တရုတ်နိုင်ငံသည် ဗီယက်နမ်၏ သင်ခန်းစာပေးခြင်းကို လှလှကြီး ခံလိုက်ရပေသည်။ ၂၀ ရာစုအတွင်း ရရှိခဲ့သော ဗီယက်နမ်တို့၏ အမျိုးသား လွတ်မြောက်ရေးတိုက်ပွဲ အတွေ့အကြုံများသည် တရုတ်ကျူးကျော်မှုကို တွန်းလှန်နိုင်ခဲ့သည်။
နှစ်ပေါင်း တထောင်ကျော် တရုတ် လက်အောက် ကျရောက်ခဲ့သည် ဗီယက်နမ်အဖို့ ၁၉၇၉ စစ်ပွဲ အောင်မြင်မှုသည် ဗီယက်တို့၏ သမိုင်းကြောင်းဆိုင်ရာ မဟာအောင်မြင်မှု ဖြစ်သည်။ တရုတ်-ဗီယက်နမ် ဆက်ဆံရေး၏ အပိုင်းအခြားကို ကြည့်မည်ဆိုပါက ၁၉၄၇ ခုနှစ်မှ ၁၉၇၈ ခုနှစ်ထိ ကာလကို ၀ါဒရေးရာ မိတ်ဆွေများ အဖြစ်တွေ့မြင်နိုင်သည်။
ဒုတိယပိုင်းတွင် ဗီယက်နမ်မှ တရုတ်ကျောထောက် နောက်ခံပြုထားသည့် ကမ္ဘောဒီးယားကို ကျူးကျော်ခြင်းနှင့် ဗီယက်နမ်-တရုတ်တို့၏ ထိပ်တိုက် တွေ့မှုများကို တွေ့ရသည်။ တရုတ်နှင့် ဗီယက်နမ်တို့၏ ထိပ်တိုက် တွေ့ဆုံမှုသည် ၁၉၉၀ ခုနှစ်တွင် အဆုံးသတ်ပြီး ခေတ်သစ် စီးပွားရေး အကျိုးတူ ပူးပေါင်း ဆောင်ရွက်မှုဆီသို့ ဦးတည်စေခဲ့သည်။ 

ထိပ်တိုက်တွေ့မှု၊ ပူးပေါင်းဆောင်ရွက်မှုနှင့် ထိမ်းညှိမှုများ
ပထ၀ီ အနေအထားအရ ဗီယက်နမ်နိုင်ငံသည် သေးငယ်ပြီး လူဦးရေ အဆမတန်များပြားသော အင်အားကြီးနိုင်ငံနှင့် ယှဉ်တွဲ နေထိုင်ရသည့်အတွက် အင်အားကြီးနိုင်ငံတို့ နိုင်ငံငယ်များအပေါ် လွှမ်းမိုးရန်ကြိုးပမ်းမှုကို အမြဲ ရင်ဆိုင်ရသော နိုင်ငံဖြစ်သည်။ နှစ်ပေါင်း တစ်ထောင်ကျော် တရုတ်လက်အောက် (သို့) လက်ဆောင် ပဏ္ဏာဆက် နိုင်ငံအဖြစ်ဖြင့် နေခဲ့ရသည့် နိုင်ငံဖြစ်သည်။ စစ်အေးခေတ် ကုန်ဆုံးမှုနှင်အတူ ဥရောပရှိ ကွန်မြူနစ်ဝါဒ ပြိုကွဲပြီး ဈေးကွက်စီးပွားရေးခေတ် ရောက်ရှိလာမှုနှင့်အတူ ကမ္ဘာတ၀ှမ်း အကျိုးတူ ပူးပေါင်းဆောင်ရွက်မှုများ ဖြစ်ပေါ်လာခဲ့သည်။
၁၉၉၀ နှောင်းပိုင်း ကာလများတွင် ဗီယက်နမ်၏ နိုင်ငံခြားရေး မူဝါဒ သိသိသာသာ ပြောင်းလဲလာခဲ့သည်။ ဗီယက်နမ် နိုင်ငံ၏ နိုင်ငံခြားရေး မူဝါဒ အပြောင်းအလဲသည် အမေရိကန်နှင့် ဆက်ဆံရေး ပုံစံသစ်ကို ဖြစ်ပေါ်စေခဲ့ပြီး၊ အာဆီယံ တွင်လည်း အဓိက ကျသော အခန်းကဏ္ဍမှ ပါဝင်လာခဲ့သည်။
၂၀၁၀ ခုနှစ် အာဆီယံအလှည့်ကျ ဥက္ကဌ တာဝန်ကို ထမ်းဆောင်ခဲ့သည်။ မကြာခဏ ဖြစ်ပေါ်ခဲ့သည့် တောင်တရုတ် ပင်လယ်ရှိ စပရစ်တလီကျွန်းစု အရေးအခင်းကြောင့် တရုတ်-ဗီယက်နမ် ဆက်ဆံရေးကို တင်းမာစေခဲ့သည့်အပြင် ပြည်သူများ အကြားတွင်လည်း တရုတ်ဆန့်ကျင်ရေး စိတ်ဓါတ် ပိုမိုကြီးထွားလာခဲ့သည်။
အစိုးရမှ ဗီယက်နမ်ပြည်သူ ငါးဖမ်းသမားများအား အငြင်းပွားမှု ဖြစ်နေသည့် ရေပိုင်နက် အတွင်း ဆက်လက်ငါးဖမ်းရန် တိုက်တွန်းခဲ့ပြီး၊ စစ်ရေး တည်ဆောက်မှုကိုပါ ပြုလုပ်ခဲ့သည်။ တရုတ်နိုင်ငံနှင့် ဖြစ်ပေါ်နေသည့် တောင်တရုတ်ပင်လယ် အငြင်းပွားမှုသည် အမေရိကန်-ဗီယက်နမ် တို့၏ ဆက်ဆံရေးကို ပိုမိုကောင်းမွန်စေသော အကြောင်းအရင်း ဖြစ်သည်။
မကြာခဏ ထိပ်တိုက်တွေ့မှုများမှ အခြားတဘက်တွင်လည်း တရုတ်နိုင်ငံ၏ စီးပွားရေးအရ အရေးပါမှုကို ဗီယက်နမ် အမိအရ ဖမ်းဆုတ်နိုင်ခဲ့သည်။ ၁၉၉၁ ခုနှစ်တွင် ဗီယက်နမ်၏ ပြောင်းလဲလာသော နိုင်ငံခြားရေး မူဝါဒအရ တရုတ်နိုင်ငံနှင့် ကုန်သွယ်ရေးကို စတင်ဖွင့်လှစ်ခဲ့သည်။ ကမ္ဘာ့ ကုန်သွယ်ရေး အဖွဲ့တွင် အဖွဲ့ဝင်ဖြစ်လာရေး အတွက် တရုတ်-ဗီယက်နမ် အပြန်အလှန် ထောက်ခံခဲ့ကြသည်။
၁၉၉၉ ခုနှစ်တွင် တရုတ်ကွန်မြူနစ်ပါတီ အထွေထွေ အတွင်းရေးမှူး ကျန်ဇီမင်းနှင့် ဗီယက်နမ် ကွန်မြူနစ်ပါတီ အထွေထွေ အတွင်းရေးမှူးတို့သည် နှစ်နိုင်ငံဆက်ဆံမှု ကောင်းမွန်ရေးအတွက် စကားလုံး (၁၆) လုံးပါ လမ်းညွန်မှုသဘောတူညီချက်ကို ရရှိခဲ့သည်။ ၁၉၉၁ ခုနှစ်တွင် နှစ်နိုင်ငံ အပြန်အလှန် ကုန်သွယ်မှု တန်ဘိုး အမေရိကန်ဒေါ်လာ ၃၂ သန်းရှိခဲ့ရာမှ ၂၀၁၁ ခုနှစ်အရောက်တွင် နှစ်နိုင်ငံ ကုန်သွယ်မှု တန်ဘိုး ဒေါ်လာ ၂၅ ဘီလီယံထိ ရောက်ရှိခဲ့သည်။
ကုန်သွယ်မှု မြင့်တက်လာနေသော်လည်း တဖက်တွင် တရုတ်နိုင်ငံ၏ အင်အားကြီးထွားမှုကို ထိန်းညှိနိုင်ရန် ၂၀၁၁ ခုနှစ် ဇွန်လတွင် အငြင်းပွားနေသည့် တောင်တရုတ် ပင်လယ် စပရစ်တလီကျွန်းစုအနီးတွင် ဗီယက်နမ်မှ စစ်ရေး လေ့ကျင့်မှုပြု လုပ်ခဲ့သည်။ ဗီယက်နမ် ခေါင်းဆောင်တို့၏ နိုင်ငံရေး လိမ္မာပါးနပ်မှုနှင့် အမျှော်အမြင် ကြီးမားမှုကို ကမ္ဘာ့အင်အားကြီး နိုင်ငံနှင့် ထိစပ်နေသည့် နိုင်ငံများ အဖို့ လေ့လာသင့်သည့် သင်ခန်းစာ တရပ်ဖြစ်သည်။

ဗီယက်နမ်၏ ပထ၀ီနိုင်ငံရေး၊ မြန်မာအတွက် သင်ခန်းစာ ဖြစ်နိုင်သလား
နိုင်ငံအဖြစ် ပေါ်ပေါက်လာခြင်း၊ ပျက်သုန်းခြင်းတို့သည် (Geopolitical resources) ပေါ်တွင် အများကြီး တည်မှီနေပြီး၊ ၄င်းနိုင်ငံအနေဖြင့် ယင်း၏ပထ၀ီဝင် နိုင်ငံရေးသယံဇာတကို မည်ကဲ့သို့ ထုတ်ယူသုံးစွဲသည် ဆိုသောအချက်သည် ထိုနိုင်ငံ၏ ကံကြမ္မာပင် ဖြစ်သည်ဟု အမေရိကန် နိုင်ငံခြားရေး ၀န်ကြီးဟောင်း ကင်ဆင်ဂျားမှ ပြောဆိုခဲ့ဖူးသည်။
နိုင်ငံတခု၏ ပထ၀ီနိုင်ငံရေး သယံဇာတ အရေးပါမှုကို ထင်ဟပ်သည့် တွေးခေါ်မှု သီအိုရီ တခုဖြစ်သည်။ ယနေ့အချိန်တွင် ဗီယက်နမ်၏ ပထ၀ီနိုင်ငံရေးသည် အမေရိကန်၊ ဂျပန်နှင့် အိန္ဒိယ တို့၏ တရုတ်အင်အား ထိန်းညှိရေးတွင် အချက်အချာ ကျသောနေရာ ဖြစ်လာခဲ့သည်။
အတိတ် သမိုင်းကြောင်းအရ ဗီယက်နမ်နိုင်ငံသည် တရုတ်နှင့်ခါးသီးသော အတွေ့အကြုံရှိသည့် နိုင်ငံဖြစ်သည်။ ယခင်က တရုတ်နိုင်ငံအဖို့ ဗီယက်နမ်သည် တောင်တရုတ်ပင်လယ် ထွက်ပေါက် အဖြစ်တည်ရှိခဲ့သည်။ ၁၉၇၄ ခုနှစ်တွင် ဗီယက်နမ်ပိုင်နက် အဖြစ်ကြေငြာထားသည့် တောင်တရုတ် ပင်လယ်ရှိ Paracel ကျွန်းများကို တရုတ်က သိမ်းပိုက်ခဲ့သည်။ စပရစ်တလီ ကျွန်းစု ပိုင်ဆိုင်ရေး အငြင်းပွားမှုသည် တရုတ်၏ မဟာဗျူဟာ အပြောင်းအလဲကို ဖြစ်ပေါ်စေခဲ့သည်။
တရုတ်နိုင်ငံသည် မြန်မာနိုင်ငံကို ဖြတ်ပြီး ဖေါက်လုပ်မည့် ရေနံပိုက်လိုင်းနှင့် ကျောက်ဖြူ ရေနက် ဆိပ်ကမ်းတို့သည် ဗီယက်နမ် နှင့် အခြားသော အရှေ့တောင်အာရှ နိုင်ငံတို့၏ အရေးပါမှုကို လျှော့ချလိုက်သည့် မဟာဗျူဟာ ပထ၀ီနိုင်ငံရေး ပြောင်းလဲမှု အဖြစ်တွေ့မြင်နိုင်သည်။
ဂျပန်နှင့် တရုတ်နိုင်ငံတို့သည် စက်မှုလုပ်ငန်း အတွက်လိုအပ်သည့် လောင်စာကို တောင်တရုတ် ပင်လယ်ကို ဖြတ်ကာ တင်သွင်းနေရသည့် နိုင်ငံဖြစ်သည်။ တောင်တရုတ်ပင်လယ်သည် ပစိဖိတ်-အိန္ဒိယ သမုဒ္ဒရာ ဆက်သွယ်ရေးအတွက် အရေးပါလှသည့် အပြင် အရှေ့အာရှနိုင်ငံများ၏ အဓိက စီးပွားရေးလမ်းကြာင်း ဖြစ်သည့်အတွက် အမေရိကန်နိုင်ငံ၏ မဟာဗျူဟာကျသော နေရာ ဖြစ်လာ ခဲ့သည်။ ထို့ကြောင့် တောင်တရုတ်ပင်လယ်နှင့် အနီးဆုံးတည်ရှိနေသည့် ဗီယက်နမ်သည် အမေရိကန်၏ အဓိက မဟာမိတ် ဖြစ်လာခဲ့သည်။ အမေရိကန်၊ ဂျပန်နှင့် အရှေ့အာရှ နိုင်ငံများ၏ ကွင်းလယ် ဖန်တီးရှင်သည် ဗီယက်နမ် ဖြစ်လာခဲ့သည့်နည်းတူ တရုတ်နိုင်ငံ၏ ကြီးမားသော စီးပွားရေး အခွင့်အလမ်းကို ဆုတ်ကိုင်နိုင်သော နိုင်ငံအတခု အဖြစ်တွေ့မြင်နိုင်သည်။
မြန်မာနိုင်ငံသည် အိန္ဒိယနှင့် တရုတ် အင်အားကြီးနိုင်ငံနှစ်ခုကြားတွင် ကျရောက်နေပြီး တရုတ်နိုင်ငံ၏ အိန္ဒိယသမုဒ္ဒရာ ထွက်ပေါက်အဖြစ် ဆယ်စုနှစ် တခုအတွင်း ဖန်တီးခဲ့သည်။ သမိုင်းကြောင်းအရ ဗီယက်နမ်နှင့် နှိုင်းယှဉ်ပါက မြန်မာနိုင်ငံအပေါ်တွင် တရုတ်၏ အနိုင်ကျင့်ဗိုလ်ကျခြင်း အနည်း အကျဉ်းမျှသာ တွေ့နိုင်ပေသည်။
တရုတ်နိုင်ငံသည် Yuan မင်းဆက်(၁၂၇၁-၁၃၆၈) မွန်ဂိုလက်အောက် ကျရောက်ခဲ့စဉ်က ပုဂံကို ၁၂၈၇ တွင် ကျူးကျော်ခဲ့သည်။ မွန်ဂိုကျူးကျော်မှုကြောင့် ပုဂံပျက်ကာ နိုင်ငံငယ်လေးများ ပေါ်ပေါက်ခဲ့သည်။ ၁၉၆၀ ကျော်ခုနှစ်များအတွင်း တရုတ်ဖြူ ကျူးကျော်မှုနှင်အတူ မြန်မာနိုင်ငံအတွင်း တရုတ်ဆန့်ကျင်ရေး လှုပ်ရှားမှုများ ပေါ်ပေါက်ခဲ့သည်။
၂၀၁၀-၂၀၁၁ ဘဏ္ဍာရေးနှစ်တွင် တရုတ်-မြန်မာ အပြန်အလှန် ကုန်သွယ်ရေး ပမာဏသည် ဒေါ်လာ (၄.၇) ဘီလီယံကျော်ရှိခဲ့သည်။ ၁၉၈၈-၈၉ ခုနှစ်များအတွင်း ဒေါ်လာသန်း ဆယ်ဂဏန်းသာ ရှိခဲ့သော တရုတ်နဲ့ မြန်မာတို့၏ အပြန်အလှန် ကုန်သွယ်ရေးသည် ခေတ်သစ် တခုကိုရောက်ရှိလာခဲ့သည်။ မြန်မာနိုင်ငံအတွင်း ထုထည်ကြီးမားသော ရင်းနှီးမြုပ်နှံမှုများနှင့် အရှေ့အလယ်ပိုင်းနိုင်ငံများနှင့် ဆက်သွယ်ရေး ပိုးလမ်းမသစ်၏ အခြေစိုက် စခန်းတခုကို အောင်မြင်စွာ အကောင်အထည် ဖေါ်နိုင်ခဲ့ပြီး ဖြစ်သည်။
လွန်ခဲ့သည့် ရက်ပိုင်းအတွင်း မြန်မာ့ လွတ်တော် ဆွေးနွေးပွဲတွင် တရုတ်အထောက် အပံ့ဖြင့် အကောင်အထည် ဖေါ်နေသော စီမံကိန်းများ အားလုံး ရပ်ဆိုင်းရေး အဆို တင်သွင်းမှုများကို တွေ့မြင်နိုင်ပေသည်။ ၂၁ ရာစုသည် အမေရိကန်၏ ပစိဖိတ် စိုးမိုးရေး ဖြစ်ကြောင်း ကြေငြာထားသကဲ့သို့ လက်တွေ့ အကောင်အထည် ဖေါ်မှုများရှိလာခဲ့သည်။ မြန်မာနိုင်ငံ၏ ပထ၀ီနိုင်ငံရေးသည် (၂၁) ရာစု အမေရိကန်၊ အိန္ဒိယနှင့် တရုတ်တို့၏ ကစားကွင်းတခု ဖြစ်လာခဲ့သည်။
မြန်မာခေါင်းဆောင်တို့ အနေဖြင့် မိမိနိုင်ငံ၏ (Geopolitical Resources) ကိုမည်ကဲ့သို့ ထုတ်ယူ သုံးစွဲမည်ကို လက်တွေ့ အကောင်အထည်ဖေါ် ဆောင်ရွက်ရမည့် အခြေအနေကို ရောက်ရှိနေပြီ ဖြစ်သည်။ ကမ္ဘာ့လူဦးရေ အများဆုံး နိုင်ငံကြီး နှစ်ခုကြားတွင် ကျရောက်နေသည့် မြန်မာနိုင်ငံအဖို့ ကွင်းလယ် ဖန်တီးရှင်အဖြစ် မည်ကဲ့သို့ ကစားမည်ကို မဟာဗျူဟာ၊ နည်းဗျူဟာများ ချမှတ်ထားပြီးပြီဟု ယုံကြည်ရသည်။
ဗီယက်နမ် နိုင်ငံသည် မိမိနိုင်ငံ၏ အမျိုးသားလုံခြုံရေးနှင့် ဖွံ့ဖြိုးမှုကို ခြိမ်းခြောက်နိုင်သည့် အချက်များကို စနစ်တကျ လေ့လာပြီး အမျိုးသား အကျိုးစီးပွားကို ကာကွယ်နိုင်သကဲ့သို့ တရုတ်အင်အား ထိန်းညှိထားနိုင်ရေးကို အမေရိကန်၊ ဂျပန်၊ အိန္ဒိယတို့နှင့် ပူးပေါင်းဆောင်ရွက်နေဆဲ ဖြစ်သည်။
အမေရိကန် နိုင်ငံခြားရေး ၀န်ကြီးဟောင်း ကင်ဆင်ဂျားမှ နိုင်ငံအဖြစ် ပေါ်ပေါက်လာခြင်း၊ ပျက်သုန်းခြင်းတို့သည် (Geopolitical resources) ပေါ်တွင် အများကြီး တည်မှီနေပြီး၊ ၄င်းနိုင်ငံအနေဖြင့် ပထ၀ီဝင် နိုင်ငံရေးသယံဇာတကို မည်ကဲ့သို့ ထုတ်ယူ သုံးစွဲသည် ဆိုသောအချက်သည် ထိုနိုင်ငံ၏ ကံကြမ္မာပင် ဖြစ်သည်ပြောဆိုခဲ့သည်။ (၂၁) မြန်မာနိုင်ငံ ရင်ဆိုင်ကြုံတွေ့နေရသော New order of Geopolitical resources သည် အနာဂါတ် မြန်မာနိုင်ငံ၏ ကံကြမ္မာပင် ဖြစ်သည်ဟု ထင်မြင်ယူဆမိပါသည်။

လှရွှေ
References;

http://www.maukkha.org/index.php/feature-article/1933-maukkha-sino-vietnam-relations-in-the-21th-century#.T1q5qQOCADQ.facebook  မှ