21.03.2012 နေ့ဖတ်ရန်သတင်းများ

by Myanmar Journal on Tuesday, March 20, 2012 at 6:08pm ·

 
IAEA အဖွဲ့ညွှန်ကြားရေးမှူးနိုင်ငံတကာ အဏုမြူအေဂျင်စီကို မြောက်ကိုရီးယားကဖိတ်ကြား
မြောက်ကိုရီးယားနိုင်ငံကနေ IAEA အဖွဲ့ကြီးကိုဖိတ်ကြားတဲ့စာကို မတ်လ ၁၆ရက်နေ့က ရရှိခဲ့တယ်လို့ အဖွဲ့ရဲ့ ပြောခွင့်ရအမျိုးသမီးက ပြောပါတယ်။ ဒါပေမယ့် အသေးစိပ်အချက်အလက်တွေကို ဆွေးနွေးနေဆဲဖြစ်ပြီး ဘာမှ မဆုံးဖြတ်ရသေးဘူးလို့ သူကဆိုပါတယ်။ အမေရိကန်တို့နဲ့ သဘောတူညီမှုတွေ ပြိုကွဲသွား တဲ့အခါ IAEAအဖွဲ့မှ စစ်ဆေးရေးမှူးတွေကို မြောက်ကိုရီးယားက လွန်ခဲ့တဲ့၁၀နှစ်က နှင်ထုတ်ခဲ့ပါတယ်။

ပြီးတော့ ၂၀၀၃ ခုနှစ်ရောက်တဲ့အခါ မြောက်ကိုရီးယားက နျူကလီးယား မပြန့်ပွားရေးစာချုပ်ကနေ နှုတ်ထွက်ခဲ့ပါတယ်။နှစ်အတန်ကြာတော့ စစ်ဆေးရေးမှူးတွေ ပြန်ဝင်ခွင့်ပြုခဲ့ပြီး ၂၀၀၉ ခုနှစ်မှာ နှင်ထုတ်ခဲ့ပြန်ပါတယ်။ ဒါကြောင့် ဒီတခေါက် IAEAကိုဘယ်လောက်ကျယ်ကျယ်ပြန့်ပြန့် လေ့လာခွင့်ပြုမယ်ဆိုတာ မရှင်းလင်းသေးသလို အရင်အခေါက်တွေကလည်း အရေးကြီးတဲ့နေရာတွေဝင်ဖို့ ကန့်သတ်ခံရတယ်လို့ ဗီယင်နာမြို့ကနေ ဘီဘီစီသတင်းထောက် Bethany Bellကသတင်းပေးပို့ပါတယ်။

SSA နဲ့ အစိုးရ ငြိမ်းချမ်းရေး ကိုယ်စားလှယ် အဖွဲ့တို့ အပစ်ရပ်ရေး သဘောတူခဲ့ကြRCSS/SSA ရဲ့ မိုင်းယောင်းစခန်းကို အစိုးရတပ် ဝင်သိမ်း
မြန်မာ အစိုးရနဲ့ အပစ်အခတ် ရပ်စဲရေး သဘောတူ လက်မှတ်ရေးထိုးထားတဲ့ ရှမ်းပြည် ပြန်လည်ထူထောင်ရေး ကောင်စီ/ ရှမ်းပြည် တပ်မတော် တောင်ပိုင်း (RCSS/SSA) ရဲ့ ရှမ်းပြည် အရှေ့ပိုင်း မိုင်းယောင်းမြို့နယ်က တပ်စခန်း တခုကို မြန်မာ အစိုးရ စစ်တပ်က တနင်္ဂနွေနေ့က ၀င်ရောက်တိုက်ခိုက်ပြီး သိမ်းပိုက်လိုက်တယ်လို့သိရပါတယ်။
ရှမ်းပြည် အရှေ့ပိုင်း မိုင်းယောင်းမြို့နယ်မှာ အခြေစိုက်နေတဲ့ ရှမ်းပြည် တပ်မတော် တောင်ပိုင်းရဲ့ တပ်ရင်းအမှတ် ၁၀၈ နဲ့ မြန်မာအစိုးရ စစ်တပ် ခြေမြန် တပ်ရင်း (ခမရ) ၅၇၃ တို့ဟာ တနင်္ဂနွေနေ့ မနက်ပိုင်း ၇ နာရီ ကျော်ကျော်လောက်မှာ မိုင်းယောင်းမြို့နယ်နဲ့ တာချီလိတ်မြို့နယ်ကြားက လွယ်လန့်ဖှာ့ဟင်ချိုတောင် အနီးမှာ ပစ်ခတ်မှုဖြစ်ပွားခဲ့ပါတယ်။
မြန်မာအစိုးရ စစ်တပ်က သူတို့ရဲ့ တပ်စခန်းကို အင်အား အလုံးအရင်းနဲ့ ၀င်ရောက် တိုက်ခိုက်လာရာကနေ အပြန်အလှန်ပစ်ခတ်မှု ဖြစ်ခဲ့ကြောင်း၊ ပစ်ခတ်မှု နာရီဝက်ကျော် ကြာလာတဲ့အချိန်မှာ SSAဘက်က အရင် နောက်ဆုတ်ပေးလိုက်ရကြောင်း အဲဒီဒေသမှာ လှုပ်ရှားနေတဲ့ SSA တပ်မှူးကြီးတစ်ယောက်က ဘီဘီစီကို ပြောပြပါတယ်။
ဒါပေမယ့် ဒီအတိုင်း ဆက်ဖြစ်သွားမယ်ဆိုရင် ရှမ်းပြည်တခုလုံးမှာ လှုပ်ရှားနေတဲ့ SSA အနေနဲ့ တခြားနေရာမှာ ထိထိ ရောက် ပြန်လည်တုန့်ပြန်သွားမှာ ဖြစ်တယ်လို့လည်း သူက ပြောသွားပါတယ်။
ပြီးခဲ့တဲ့အပတ် စနေနေ့တုန်းကလဲ မြန်မာအစိုးရစစ်တပ် ခမရ ၅၇၃ နဲ့ပဲ တစ်ကြိမ် ပစ်ခတ်မှု ဖြစ်ခဲ့ပြီးပြီလို့ အဲဒီ တပ်မှူးကြီးက ပြောပါတယ်။
ရှမ်းပြည် တပ်မတော် တောင်ပိုင်းဟာ မြန်မာအစိုးရရဲ့ ငြိမ်းချမ်းရေးကိုယ်စားလှယ်နဲ့ ပြီးခဲ့တဲ့နှစ် ဒီဇင်ဘာလမှာ ပဏာမအဆင့် တွေ့ဆုံခဲ့ပြီး အပစ်အခတ်ရပ်စဲရေး သဘောတူစာချုပ် ရေးထိုးခဲ့ကြပါတယ်။
ဒါပေမဲ့ သူတို့ကြားမှာ အပစ်အခတ်ရပ်စဲရေး လက်မှတ်ထိုးပြီးတဲ့အချိန်ကနေ အခုချိန်ထိ ၃ လတာ ကာလအတွင်း တိုက်ပွဲငယ်ပေါင်း ၁၃ ကြိမ်ထက်မနည်း ဖြစ်ပွားခဲ့တယ်လို့ သိရပါတယ်။
အပစ်အခတ်ရပ်စဲရေး သဘောတူစာချုပ် ချုပ်ဆိုထားတဲ့ကြားကပဲ အခုလို တိုက်ပွဲတွေ ဆက်ဖြစ်နေသေးဟာ မြန်မာအစိုးရ စစ်တပ်က စစ်အင်အားတွေ ဖြည့်တင်းတယ်၊ SSA တပ်စခန်းရှိတဲ့နေရာတွေမှာ ကျူးကျော် ၀င်ရောက် လှုပ်ရှားပြီး တိုက်ခိုက်လို့ ဖြစ်တာလို့ SSA တောင်ပိုင်း ပြောရေးဆိုခွင့်ရှိသူ ဗိုလ်မှူး စိုင်းလောဝ်ဆိုင်က ဘီဘီစီကို ပြောပြပါတယ်။
ဒီလုပ်ရပ်တွေကို ကြည့်ခြင်းအားဖြင့် အစိုးရက တပ်မတော်အပေါ် ထိရောက်စွာ မကြီးကြပ် နိုင်တာကြောင့်လား ဆိုပြီး SSA ဘက်က သံသယ ရှိလာတယ်လို့ ဗိုလ်မှူးစိုင်းလောဝ်ဆိုင်က ပြောပါတယ်။
အစိုးရကသာ အမှန်တကယ် ငြိမ်းချမ်းရေးကို လိုလားတယ်ဆိုရင် နှစ်ဦးနှစ်ဘက် လုပ်ထားတဲ့ သဘောတူချက်အတိုင်း ကြိုးစား လုပ်ဆောင်သွားစေချင်ကြောင်း၊ အဲဒီလို မဟုတ်ပဲ သူတို့ တပ်ဖွဲ့တွေကို ၀င်ရောက် တိုက်ခိုက်နေမယ်၊ သူတို့တပ်ဖွဲ့ လှုပ်ရှားတဲ့ နယ်မြေတွေမှာ ချုပ်ချယ် ကန့်သတ်နေအုံးမယ် ဆိုရင်တော့ အပစ်အခတ်ရပ်စဲရေး စာချုပ်ဟာ အလဟဿ ဖြစ်သွားမှာ ဖြစ်တယ်လို့ ဗိုလ်မှူးစိုင်းလောဝ်ဆိုင်က ပြောပါတယ်။

ဟောင်ကောင်လေဆိပ် ပြေးလမ်းသစ် ဆောက်မယ်
ဟောင်ကောင် လေဆိပ်ဟာ ကမ္ဘာမှာ အလုပ် အများဆုံး လေဆိပ် တွေထဲက တခုပါ
ဟောင်ကောင် လေဆိပ် မှာ ကြီးမား လှတဲ့ လေယာဉ် ပြေးလမ်း သစ်ကြီး တခု တည်ဆောက်ရေး စီမံကိန်း အတွက် ဟောင်ကောင် အစိုးရက ထောက်ခံ အတည်ပြု လိုက်ပြီ ဖြစ်ပါတယ်။
အငြင်း ပွားဖွယ် ဖြစ်နေတဲ့ ဒီလေယာဉ် ပြေးလမ်း တည်ဆောက်ရေး စီမံကိန်း အတွက် ဒေါ်လာ ၁၇ ဘီလီယံ အကုန်အကျခံ တည်ဆောက်မှာ ဖြစ်ပြီး၊ ဒါဟာ ဟောင်ကောင်မှာ ပြုလုပ်ခဲ့ ဘူးသမျှ တည်ဆောက်ရေး လုပ်ငန်း တွေထဲမှာ ကုန်ကျမှု အများဆုံးသော စီမံကိန်း ဖြစ်လာ ပါလိမ့်မယ်။
အကြောင်း ကတော့ ဒီပြေးလမ်း နေရာ အများစုဟာ ပင်လယ် ဖက်မှာ တည်ရှိ နေမှာ ဖြစ်ပါတယ်။
ဒီစီမံကိန်း ကို အကောင်အထည်ဖေါ် တည်ဆောက် နိုင်ဖို့ အချိန် ၁၀ နှစ် ယူရ ပါလိမ့်မယ်။
သဘာဝ ပတ်ဝန်းကျင် ထိန်းသိမ်းရေး အဖွဲ့တွေ ကတော့ ပင်လယ် ကြမ်းပြင် ပျက်စီးမှာနဲ့ ဒေသတွင်း က တရုတ် လင်းပိုင်ဖြူ တွေ သေဆုံး ကုန်မှာကို စိုးရိမ် နေကြ ပါတယ်။
ဟောင်ကောင် လေဆိပ် ကနေ တနှစ်ကို ခရီးသည် သန်း ၅၀ ကျော် သွားလာ နေတာ ဖြစ်ပြီး၊ ကုန်တင် လေယာဉ်တွေ ဆိုက်ရောက် ပျံသန်းမှု ကလည်း တမ္ဘာ့ တခြား နေရာ တွေထက် ဟောင်ကောင် လေဆိပ်မှာ ပိုများ ပါတယ်။                    

သမ္မတ ဆာကိုးဇီးက မဲဆွယ်စည်းရုံးမှုတွေ ဆိုင်းငံ့ထားလိုက်သမ္မတဉီးသိန်းစိန်ရဲ့ ပထမဆုံးဗီယက်နမ်ခရီး
သမ္မတဉီးသိန်းစိန် ၃နိုင်ငံ ခရီးစထွက်
သမ္မတ ဦးသိန်းစိန်ဟာ ဒီကနေ့မှာ ဗီယက်နမ်နိုင်ငံကို အလည်အပတ် ရောက်ရှိမှာ ဖြစ်ပါတယ်။ နှစ်နိုင်ငံခြား ဆက်ဆံရေးကတော့ အစိုးရချင်းရော ပြည်သူတွေချင်းကြားမှာပါ အလွန် ကောင်းမွန်တဲ့ အခြေအနေတရပ် လွန်ခဲ့တဲ့ နှစ်ပေါင်းများစွာ ကထဲက ရှိခဲ့တယ်လို့ ဟနွိုင်း အမျိုးသား တက္ကသိုလ် စီးပွားရေး ကောလိပ်က အကြီးတန်း သုတေသီ ဒေါက်တာ လီ ဒန် ဒန်းန်ကပြောပါတယ်။
မြန်မာတွေက ဗီယက်နမ်တွေရဲ့ စီးပွားရေးဖွံ့ဖြိုးတိုးတက်မှုကို အားကျတယ်။ ဒါကြောင့် မြန်မာအနေနဲ့ ဗီယက်နမ်ဆီကနေ ဘာအတွေ့အကြုံတွေ သင်ခန်းစာတွေ ရယူနိုင်မလဲ။ ဒေါက်တာလီကတော့ အကောင်းအဆိုး နှစ်မျိုးလုံး မြင်အောင်ကြည့်လို့ ယူနိုင်ပါတယ်လို့ ဆိုပါတယ်။
ကမ္ဘာ့စီးပွားရေးလမ်းကြောင်းထဲကို ထိုးဝင်တာ ဗီယက်နမ်က မြန်မာထက် စောခဲ့တယ်၊ ၂၀၀၇ ခုနှစ်မှာ ကမ္ဘာ့ကုန်သွယ်ရေး WTO အဖွဲ့ဝင် ဖြစ်လာတယ်။ ဗီယက်နမ်ရဲ့ စိုက်ပျိုးရေး နည်းပညာ ဖွံ့ဖြိုးမှု၊ အင်တာနက်နဲ့ သတင်းအချက်အလက် ဆက်သွယ်ရေး နည်းပညာ ဖွံ့ဖြိုးမှု၊ ပုဂ္ဂလိကစီးပွားရေး ချဲ့ထွင်မှုနဲ့ နိုင်ငံခြားရင်းနှီးမြှုပ်နှံမှုတွေ တိုးရ လာအောင် စွဲဆောင်နိုင်မှု စတဲ့ အတွေ့အကြုံတွေ ဖလှယ်ပေးနိုင်ပါတယ်။ နောက်တခု ကတော့ ဗီယက်နမ် စီးပွားရေး အသိုင်းအဝိုင်းက မြန်မာနိုင်ငံမှာ ရင်းနှီးမြှုပ်နှံမှုတွေ လုပ်ဖို့ကို အလွန်စိတ်ဝင်စားပါတယ်။ မြန်မာနဲ့ ဗီယက်နမ် နှစ်နိုင်ငံ အကျိုးရှိစေဖို့ ကုန်သွယ်ရေးတိုးမြှင့်ပြီး အပြန်အလှန် ကုန်စည်တွေ တင်ပို့ကြဖို့လည်း ရှိပါတယ်။ နောက်ပြီး မြန်မာက သဘာဝရင်းမြစ်တွေ အလွန်ပေါကြွယ်ဝတဲ့နိုင်ငံ ဖြစ်တာမို့ နှစ်ဘက်စလုံး အကျိုးရှိအောင် ကုမ္ပဏီတွေပူးပေါင်းဆောင်ရွက်နိုင်ကြဖို့ ကိုလည်း ဗီယက်နမ်ကုမ္ပဏီတွေက စိတ်ဝင်စားကြတယ်လို့ သူကဘီဘီစီကိုပြောပါတယ်။
မြန်မာသမ္မတ တယောက်အနေနဲ့ ဗီယက်နမ်ကို ပထမဆုံးလာရောက်တဲ့ ဒီချစ်ကြည်ရေး ခရီးဟာ နှစ်နိုင်ငံလုံးအတွက် အကျိုးရှိစေမယ့် ပိုမို ခိုင်မာကောင်းမွန်တဲ့ ဆက်ဆံရေး အတွက် စာမျက်နှာသစ် ဖွင့်လိုက်တာပဲလို့ သူ နှစ်နှစ်ကာကာ မျှော်လင့် ယုံကြည် ပါတယ်။ ဒီခရီးစဉ်ကနေ နှစ်နိုင်ငံကြား ပိုနီးကပ်တဲ့ ဆက်ဆံရေးနဲ့ ပူးပေါင်းဆောင်ရွက် ရေးကို ဖြစ်စေလိမ့်မယ့်လို့ ဒီကနေ့ စတင်မယ့် သမ္မတဦးသိန်းစိန်ရဲ့ ခရီးစဉ်အပေါ် ဟနွိုင်း အမျိုသား တက္ကသိုလ် စီးပွားရေး ကောလိပ်က ဒေါက်တာ လီ ဒန် ဒန်းန်က သုံးသပ် မှတ်ချက်ပြုခဲ့ပါတယ်။

ပြင်သစ်မှာ တိုက်ခိုက်မှု ၃ခု ဆက်နွယ်နေ
ပြင်သစ်နိုင်ငံ Toulouse မြို့က ဂျူးစာသင် ကျောင်း တခုမှာ ဆရာတဦးနဲ့ ကလေး၃ဦးကို သေနတ်နဲ့ ပစ်သတ်ခဲ့သူ သေနတ်သမားကို ရဲတွေက အကြီးအကျယ် ခြေရာခံ ရှာဖွေနေ ကြပါတယ်။
ဒီတိုက်ခိုက်မှုဟာ ပြီးခဲ့တဲ့ သီတင်းပတ်တုန်းက အဲဒီ ဒေသမှာ ဖြစ်ပွားခဲ့တဲ့ တိုက်ခိုက်မှု နှစ်ခုနဲ့ ဆက်နွယ် နေတယ်လို့ ရဲတွေက ယူဆနေပါတယ်။
အဲဒီ တိုက်ခိုက်မှုတွေအတွင်း မြောက်အာဖရိကနွယ်ဖွား စစ်သား ၃ဦး သေဆုံးခဲ့ပါတယ်။
သမ္မတ ဆာကိုးဇီးက ပြင်သစ်နိုင်ငံ အနောက်တောင်ပိုင်း ဒေသမှာ အဆင့်အမြင့်ဆုံး အကြမ်းဖက်မှု အန္တရာယ် သတိပေးချက် ထုတ်ပြန်လိုက်ပြီး သမ္မတ ရွေးကောက်ပွဲ မဲဆွယ် စည်းရုံးမှုတွေကို ယာယီ ဆိုင်းငံ့ထားလိုက်ကြောင်း ကြေညာလိုက်ပါတယ်။
သေနတ်သမားရဲ့လက်ချက်နဲ့ သေဆုံးသွားသူတွေအတွက် ဝမ်းနည်း ပူဆွေးနေကြသူတွေ အဲဒီ စာသင်ကျောင်းမှာ မနေ့ညက တညလုံး ဖယောင်းတိုင်ထွန်း ဝတ်ပြုခဲ့ကြပါတယ်။
အခု သေဆုံးသွားတဲ့ သူတွေ အားလုံးဟာ အစ္စရေးနဲ့ ပြင်သစ် ပူးတွဲ နိုင်ငံသား ခံယူထားသူတွေ ဖြစ်ပြီး သူတို့ရဲ့ ရုပ်အလောင်းတွေကို အစ္စရေးနိုင်ငံမှာ မြှုပ်နှံမှာ ဖြစ်တယ်လို့ အစ္စရေး နိုင်ငံခြားရေး ဝန်ကြီး ဌာနက ပြောပါတယ်။
ဒီသတ်ဖြတ် တိုက်ခိုက်မှုအပေါ် အစ္စရေးနဲ့ အမေရိကန် ပြည်ထောင်စုတို့က ပြင်းပြင်းထန်ထန် ရှုတ်ချ ပြောဆိုလိုက်ပါတယ်။
ဒီတိုက်ခိုက်မှုဟာ စက်ဆုပ်ရွံရှာဖွယ် ကောင်းလှအောင် ဂျူးလူမျိုးတွေကို သတ်ဖြတ်မှုကြီး တခု ဖြစ်တယ်လို့ အစ္စရေး ဝန်ကြီးချုပ် ဘန်ညာမင် နက်တာညာဟု က ပြောပါတယ်။
အမေရိကန် အစိုးရကလည်း ဒီသတ်ဖြတ်မှုဟာ လက်ခံနိုင်ဖွယ် မရှိတဲ့ အကြောင်းမဲ့သက်သက် အကြမ်းဖက်မှု လုပ်ရပ် ဖြစ်တယ် ဆိုပြီး အပြင်းထန်ဆုံး အသုံးအနှုန်းတွေနဲ့ ရှုတ်ချ ပြောဆိုလိုက်ပါတယ်။
ကမ္ဘာ့ ဂျူးလူမျိုးများ ကွန်ဂရက်စ် အဖွဲ့ ဥက္ကဌ ကလည်း ဒီဖြစ်ရပ်ဟာ ကျိုးကြောင်း မပြနိုင်တဲ့ အော့နှလုံးနာစရာကောင်းလောက်အောင် ဆိုးရွားတဲ့လုပ်ရပ် ဖြစ်တယ်လို့ ဖေါ်ညွှန်း ပြောဆိုသွားပါတယ်။

ကာဘလာမြို့ ပေါက်ကွဲမှုကတော့ အပြင်းထန် ဆုံး ဖြစ်ပြီး လူ ၁၃ ဦးသေအီရတ်နိုင်ငံတလွှား ဗုံးပေါက်ကွဲမှုတွေ ဆက်တိုက်ဖြစ်
အီရတ်နိုင်ငံတလွှား ဗုံးပေါက်ကွဲမှုတွေ ဆက်တိုက်ဆိုသလို ဖြစ်ပွားခဲ့တာ ကြောင့် လူပေါင်း ၄၅ ကျော်သေဆုံးသွားပြီး ရာနဲ့ချီ ဒဏ်ရာရရှိသွား ပါတယ်။
ရှီယာ မွတ်ဆလင်တို့ အထွဋ်အမြတ်ထားရာ ကာဘလာမြို့က ပေါက်ကွဲမှုကတော့ အပြင်းထန်ဆုံးသော တိုက်ခိုက်မှု ဖြစ်တယ်လို့ ဆိုပါတယ်။ အဲဒီမြို့မှာ ကားဗုံးနှစ်လုံး ပေါက်ကွဲခဲ့တာဖြစ်ပြီး လူပေါင်း ၁၃ ဦး သေဆုံးသွားတယ်လို့ အရာရှိတွေက ပြော ပါတယ်။
နိုင်ငံမြောက်ဘက် ကီကွက် မြို့ကိုလည်း ပစ်မှတ်ထားတိုက်ခိုက်ခဲ့ပြီး၊ မြို့တော် ဘဂ္ဂဒက် မှာတော့ နိုင်ငံခြားရေး ဝန်ကြီးဌာန အနီးမှာ ပေါက်ကွဲမှု တခု ဖြစ်ပွားခဲ့ပါတယ်။
ကီကွတ်မြို့ ဈေးဆိုင် ပိုင်ရှင်တဦးကတော့ လုံခြုံရေး တပ်ဖွဲ့တွေမှာ လိုအပ်မှုတွေ ရှိတယ်လို့ ပြောပါတယ်။
ဒီတိုက်ခိုက်မှုတွေအတွက် ဘယ်သူ့မှာ တာဝန်ရှိတယ် ဆိုတာကိုတော့ မသိရသေးပါဘူး။
ဒါပေမယ့် ဘီဘီစီ သတင်းထောက် ပြောတာကတော့ ရှေ့အပတ်ထဲမှာ အာရတ်နိုင်ငံများ အဖွဲ့ချုပ် ထိပ်သီး အစည်းအဝေးကို အီရတ်အစိုးရက လက်ခံကျင်းပဖို့ ပြင်ဆင်နေတာ ဖြစ်လို့ အစိုးရအပေါ် ယုံကြည်မှု ပျက်ပြား စေအောင် ရည်ရွယ် လုပ်ဆောင်တာ ဖြစ်တယ်ဆိုတဲ့ ထင်မြင်ချက်တွေ ကျယ်ကျယ် ပြန့်ပြန့် ထွက်ပေါ်တယ်လို့ ဆိုပါတယ်။

ပုသိမ်သူရှပ်ပြေးရေယာဉ် ငပုတောမှာ နှစ်မြုပ်
 ဧရာဝတီဒေသဟာ ရေလုပ်ငန်းတွေနဲ့ ရေကြောင်း ခရီးသွားလာမှုကို အဓိကထား
ပုသိမ်နဲ့ သရက်တောပြေးဆွဲနေတဲ့ ပုသိမ်သူ အမည်ရှိတဲ့ ရှပ်ပြေးရေယာဉ်ဟာ ငပုတော တဘက်ကမ်းမှာ အင်္ဂါနေ့ ညနေပိုင်းက နစ်မြုပ်ခဲ့တာကြောင့် ခရီးသည် ၄၀ နီးပါးကို ကယ်တင်နိုင်ခဲ့ပြီး ၃၀ ကျော် ကတော့ ပျောက်ဆုံးနေတယ်လို့ သိရပါတယ်။
အင်္ဂါနေ့ ညနေ ၃ နာရီ ဝန်းကျင်က ပုသိမ်သူ သင်္ဘောလိုင်းက သင်္ဘောတစီးဟာ ငပုတောမြို့ တဘက်ကမ်း ကန်ဆိပ်ရွာမှာ ကုန်တင်ကုန်ချ လုပ်ပြီးအထွက် တိမ်းမှောက်ပြီး နစ်မြုပ်ခဲ့တာ ဖြစ်ပါတယ်။
ခရီးသည်လက်မှတ်တွေကို ရောင်း ချရာမှာလည်း စာရင်းအတိအကျ မရှိတဲ့အတွက် သင်္ဘောပေါ်မှာ ခရီးသည်ဘယ်နှစ်ဦး ပါတယ်ဆိုတာကိုတော့ အတိအကျ မသိနိုင်ကြောင်း ငပုတော ဒေသခံ တယောက်က ရှင်းပြပါတယ်။
အခုတော့ သင်္ဘောနစ်တဲ့ နေရာကို မြို့ခံ ကယ်ဆယ်ရေးအဖွဲ့တွေနဲ့ ဒေသဆိုင်ရာ အာဏာပိုင် တွေ သွားရောက်ကူညီနေတယ်လို့ သိရပါတယ်။
သင်္ဘောနစ်ရတဲ့ ဖြစ်စဉ်အသေးစိပ်ကို သိနိုင်ဖို့ ဘီဘီစီက ငပုတော ရဲစခန်းကို ဆက်သွယ် ကြည့်ရာမှာ အမျိုးသမီးလေးယောက်နဲ့ အမျိုးသား ၁ ယောက် ဆေးရုံ ရောက်လာကြောင်းနဲ့ အသေးစိပ် အချက် အလက် မသိရသေးကြောင်း ငပုတော ရဲစခန်းက တာဝန်ကျ ရဲအရာရှိက ဖြေကြားပါတယ်။
၂၀၁၀ ခုနှစ်ကလည်း အခုလို ရှပ်ပြေး သင်္ဘောတစီးနစ်ခဲ့လို့ လူ ၆၀ ကျော် သေဆုံးခဲ့သေး တယ်လို့ ဒေသခံတွေအပြောအရ သိရပါတယ်။

ကချင် ဒုက္ခသည်များကချင်ပြည်နယ်မှာ လူ့အခွင့်အရေး ချိုးဖောက်ကြောင်း စွပ်စွဲ
စစ်မက်ဖြစ်ပွားနေတဲ့ ကချင်ပြည်နယ်မှာ ကချင်လူမျိုး ပြည်သူတွေဟာ လူ့အခွင့်အရေး ချိုးဖောက်မှု မျိုးစုံနဲ့ ကပ်ဒုက္ခတွေခံစားနေရတယ်လို့ လူ့အခွင့်အရေး စောင့်ကြည့်လေ့လာရေး အဖွဲ့ Human Right Watch က ရေးသားတဲ့ အစီရင်ခံစာမှာ ဖော်ပြထားပါတယ်။
ဒီအစီရင်ခံစာမှာ ဖော်ပြထားတာတွေကတော့ ကချင်ပြည်နယ်မှာ စစ်မက်ဖြစ်ပွား နေတဲ့ကာလ တလျောက်မှာ သာမန်ကချင်ပြည်သူတွေဟာ လူ့အခွင့်အရေး ချိုးဖောက် ကျူးလွန်မှု အမျိုးမျိုးကိုခံစားကြရတဲ့ အကြောင်းတွေ ဖြစ်ပါတယ်။
အစီရင်ခံစာမှာ သူတို့ ဖော်ပြထားတဲ့ အထဲမှာ ဉပဒေမဲ့ သတ်ဖြတ်မှုတွေ အမျိုးသမီးကြီးငယ်တွေကို အဓမ္မပြုကျင့်မှုတွေ ပါဝင်သလို ဒုက္ခသည်တွေ အတွက် အခက်အခဲတွေလည်း ပါဝင်ပါတယ်။
ဒီအစီရင်ခံစာထဲမှာ အလွန်ဆိုးဝါးတဲ့ ပြစ်မှုတွေကျူးလွန်ခဲ့ကြောင်း စွပ်စွဲမှု မျိုးစုံပါဝင် နေတဲ့ အတွက် အဲဒီစွပ်စွဲချက်တွေ အတွက် လူ့အခွင့်အရေး အဖွဲ့မှာ ဘယ်လို သက်သေ အ ထောက်အထားတွေရှိသလဲ။ သူတို့ ဒီအစီရင်ခံစာကို ဘယ်လို ပြုစုခဲ့သလဲလို့ မေးတဲ့အခါမှာတော့ သူတို့အဖွဲ့အနေနဲ့ ကချင်ပြည်နယ်ထဲကို ၂၀၁၁ ခုနှစ် ဇူလိုင်လမှာတခေါက် ၂၀၁၂ ခုနှစ် ဖေဖော်ဝါရီလ မှာ တခေါက် နှစ်ခေါက်သွားရောက်ခဲ့ပြီး လူပေါင်း ၁၁၂ ယောက်ကို တွေ့ဆုံမေးမြန်းပြီးမှာ ဒီအစီရင်ခံစာကို ပြုစုခဲ့တာပါလို့ HRW ဘန်ကောက်ရုံးက Phill Robertson က ပြောပါတယ်။
သူတို့အဖွဲ့အနေနဲ့ စစ်တပ်ရဲ့ လူ့အခွင့်အရေးချိုးဖောက်မှုတွေကို ကိုယ်တိုင် ကြုံတွေ့ခံစားခဲ့ရသူတွေ ယုံကြည်အားထားလောက်တဲ့ မျက်မြင်သက်သေတွေကို မေးမြန်းခဲ့တယ်လို့ ဆိုပါတယ်။ အဲဒီသက်သေတွေထဲမှာ သေနတ်နဲ့ ပစ်သတ်တာ ကို ကိုယ်တိုင် မျက်မြင် ကြုံတွေ့သူလည်း ပါသလို ကိုယ်တိုင် အဓမ္မ အပြုကျင့်ခံရတဲ့ အမျိုးသမီး နှစ်ယောက်လည်း ပါဝင်တယ်လို့ သူက ဆိုပါတယ်။

အစီရင်ခံစာထဲမှာ ဖော်ပြတဲ့ ဖြစ်စဉ်တခုမှာတော့ စစ်တပ်ကဖမ်းဆီးပြီး အမျိုးသမီးတွေကို အဓမ္မပြုကျင့်တာကို အတူအဖမ်းခံရပြီး ကိုယ်တိုင်မြင်တွေ့ရတဲ့ ကချင်လူငယ်တယောက်က ပြန်ပြောပြတာလည်း ပါဝင်ပါတယ်။
သူ့အပြောအရ ဖမ်းမိတဲ့ အမျိုးသမီးတွေကို အဝတ်အစားချွတ်ပြီးသူတို့ရှေ့မှာ မတ်တပ်ရပ်ခိုင်းတယ်။ အမျိုးသမီးတွေရဲ့ ရင်သားလည်ပင်းစတဲ့နေရာတွေကို စစ်သားတွေက ကိုင်တွယ်ပြီးနောက် ဒါးနဲ့ထောက်ပြီးသူတို့ရှေ့မှာတင် အဓမ္မ ပြုကျင့်တယ်လို့ ဆိုပါတယ်။ ကြယ်သုံးပွင့်တပ် အရာရှိ ဗိုလ်ကြီးတယောက်လည်း ပါဝင်တယ်လို့ ဆိုပါတယ်။
မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် မစ္စတာ ကင်တားနားရဲ့ အစီရင်ခံစာမှာ အ မျိုးသမီး ၁၈ ယောက် အဓမ္မပြုကျင့်ခံရကြောင်းစွပ်စွဲချက်ရှိပြီး အဲဒီအထဲက လေးယောက်က အသတ်ခံရကြောင်း ရေးသားထားတဲ့ အချက်ရယ် ကချင်အမျိုးသမီးအဖွဲ့ကထုတ်တဲ့ အစီရင်ခံစာမှာ အမျိုးသမီး ၃၇ ယောက် အဓမ္မ ပြုကျင့်ခံရပြီး အဲဒီအထဲက ၁၃ ယောက် အသတ်ခံရကြောင်းရေးသားထားတာကိုလည်း ဖော်ပြထားပါတယ်။
ဒီအစီရင်ခံစာမှာ ရေးသားထားတဲ့ အထဲမှာ အစိုးစစ်တပ်တွင်မက ကချင် စစ်တပ်ဘက်ကလည်း လူ့အခွင့်အရေး ချိုးဖောက်မှုတွေရှိတယ်လို့ စွပ်စွဲထားပါတယ်။
အထူးသဖြင့်တော့ အစိုးရစစ်တပ်ရော ကချင်စစ်တပ်ရော နှစ်ဘက်စလုံးဟာ ကလေးစစ်သား အသုံးပြုနေသလို အရပ်သား စစ်သားမခွဲခြားဘဲ ထိခိုက်နိုင်တဲ့ နေရာမှာ မိုင်းအမျိုးမျိုး အသုံးပြုတယ်လို့ ဆိုပါတယ်။ ဒါတွေဟာ နိုင်ငံတကာ လူ့အခွင့်အရေး ဥပဒေကို ချိုးဖောက်နေတယ်လို့ သူကဆိုပြီး စုံစမ်းစစ်ဆေးခွင့် ပြုဖို့ ကို စစ်တပ်ဖက်ကိုရော ကေအိုင်အေကိုပါ တိုက်တွန်းထားပါတယ်။
ဒါ့အပြင် ကချင်လူမျိုးဒုက္ခသည်တွေရှိရာကို အစိုးရက သွားရောက်ကူညီခွင့် မပေးတာကိုလည်း သူက ထောက်ပြပါတယ်။ ကုလသမဂ္ဂရဲ့ အဖွဲ့တဖွဲ့ကို ဒီဇင်ဘာလတုန်းက တခါဝင်ရောက်ခွင့်ပြုတာက လွဲပြီး ကျန်တဲ့ အဖွဲ့တွေအားလုံးကို ကချင်ထိန်းချုပ်ဒေသမှာရှိတဲ့ ဒုက္ခသည်တွေရှိရာသွားရောက်ခွင့်မပေးဘူးလို့ သူကဆိုပါတယ်။
ဒုက္ခသည်အားလုံးပေါင်း ၇ သောင်းခွဲလောက်ရှိတယ်လို့ သူခန့်မှန်းပါတယ်တဲ့။ အဲဒီ အထဲမှာ တသောင်းကျော်ဟာ တရုတ်နယ်စပ်က ဒုက္ခသည် စခန်းတွေမှာ ရှိပြီး ၄ သောင်းခွဲလောက်က ကချင်ထိန်းချုပ်ဒေသအတွင်းမှာ ရှိနေပါတယ်။ အဲဒီ ကချင် ထိန်းချုပ်ဒေသ ထဲမှာ ရှိတဲ့ ဒုက္ခသည်တွေရဲ့ အခြေအနေဟာ အဆိုးဝါးဆုံးဖြစ်ပြီး အစားအစာ အ မိုးအကာ စောင်နဲ့ အနွေးထည် အပါအဝင် အသက်ရှင်ရပ်တည်နိုင်ရေး အတွက် မရှိမဖြစ်လိုအပ်တဲ့ အခြေခံ အကူအညီတွေလိုအပ်နေတယ်လို့ ဆိုပါတယ်။
အဲဒီ အကူအညီတွေ အရေးတကြီးလိုအပ်နေတဲ့ အတွက် နိုင်ငံတကာ ကယ်ဆယ်ကူညီရေး အဖွဲ့ အစည်းတွေကို ဝင်ရောက်ခွင့် ပြုဖို့ လည်း အဲဒီ အစီရင်ခံစာမှာ တိုက်တွန်းထားပါတယ်။

ကြားဖြတ်ရွေးကောက်ပွဲ စောင့်ကြည့်ဖို့ အာဆီယံကို ဖိတ်ခေါ်
အာဆီယံတနိုင်ငံချင်း ဆီကနေ ပါလီမန်အမတ် နှစ်ဦးနဲ့ သတင်းသမား ၃ ဦး လာခွင့်ရမယ်
မြန်မာနိုင်ငံမှာ ဧပြီလ ၁ ရက် ကျင်းပမယ့် ကြားဖြတ် ရွေးကောက်ပွဲကို နိုင်ငံခြားကနေ လာရောက် လေ့လာ စောင့်ကြည့်ဖို့ အတွက် မြန်မာ အစိုးရက ပထမဆုံး အကြိမ် အဖြစ် ဖိတ်ခေါ်လိုက်ပါတယ်။
အရှေ့တောင် အာရှနိုင်ငံများ အသင်း အာဆီယံ အဖွဲ့ဝင်နိုင်ငံ တခုချင်းဆီကနေ ပါလီမန် အမတ် နှစ်ဦးကျဆီနဲ့ အတူ သတင်းသမား ၃ ဦး တို့ကို မြန်မာနိုင်ငံကို လာရောက်ပြီး ရွေးကောက်ပွဲ ကို လေ့လာစောင့်ကြည်ဖို့ အတွက် မြန်မာအစိုးရက ဖိတ်ခေါ်လိုက်တာ ဖြစ်တယ်လို့ အာဆီယံအဖွဲ့က ပြောပါတယ်။
ကြားဖြတ်ရွေးကောက်ပွဲ အတွက် လေ့လာစောင့်ကြည့်ဖို့က အခုလို ဖိတ်တာဟာ ကောင်းမွန် ကြောင်း၊ ဒါပေမဲ့လည်း အခုလောက်နဲ့ လုံလောက်မှု မရှိသေးဘူးလို့ မဲဆန္ဒနယ် အကုန်လုံးမှာ ဝင်ပြိုင်မယ့် အမျိုးသားဒီမိုကရေစီအဖွဲ့ချုပ် NLD ပါတီရဲ့ နာယက ဦးတင်ဦးက ဘီဘီစီကို ပြောပါတယ်။
နယ်တွေဆင်းပြီး မဲဆန္ဒရှင်တွေ အသိပညာပေးရေးနဲ့ ရွေးကောက်ပွဲ စောင့်ကြည့်ရေး အသိ ပညာတွေ ပေးနေတဲ့ HRDB လူ့အခွင့်အရေး ကာကွယ်မြှင့်တင်ရေး ကွန်ရက်က ဦးမောင်မောင်လေးကလည်း အာဆီယံတင်မကပဲ တခြားနိုင်ငံတွေကိုပါ ကျယ်ကျယ်ပြန့်ပြန့် ဖိတ်ကြားသင့်တယ်လို့ သုံးသပ်ပါတယ်။
ဒါပေမယ့်လည်း အစိုးရ သစ်အနေနဲ့ ဒီမိုကရေစီရေး ပြုပြင် ပြောင်းလဲမှုတွေကို သတိထား လုပ်ဆောင်နေရာမှာ အခုလို ဖိတ်ကြားမှုဟာ ထူးခြား ထင်ရှားလှတဲ့ ခြေလှမ်းတရပ် ဖြစ်တယ် လို့ အကဲခတ် တွေက ဆိုပါတယ်။
ကြားဖြတ်ရွေးကောက်ပွဲမှာ လစ်လပ် နေတဲ့ အမတ် နေရာ ၄၈ နေရာအတွက် NLD အပါအဝင် တခြားပါတီ အများအပြား ဝင်ရောက် ယှဉ်ပြိုင်ကြမှာ ဖြစ်ပါတယ်။

အမေရိကန် မောင်းသူမဲ့ယာဉ်နဲ့ တိုက်ခိုက်မှုရပ်ပစ်ဖို့ ပါကစ္စတန်တောင်းဆို
By ဗွီအိုအေ (မြန်မာဌာန)

• အမေရိကန် ပြည်ထောင်စု၊ မြောက်အတ္တလန်တိတ် စာချုပ်အဖွဲ့ (NATO) တို့နဲ့ ထိတွေ့ ဆက်ဆံတဲ့ လုပ်ငန်းတွေအတွက် တာဝန်ယူထားတဲ့ ပါကစ္စတန် လွှတ်တော်ရေးရာ ကော်မီတီ တရပ်က အမေရိကန်ရဲ့ မောင်းသူမဲ့ အဝေးထိန်း ဒုံးလေယာဉ်တွေနဲ့ တိုက်ခိုက်မှုတွေ အဆုံးသတ်ဖို့နဲ့ (NATO) က နယ်စပ်ဖြတ်ကျော် တိုက်ခိုက်မှုကြောင့် ပါကစ္စတန် တပ်ဖွဲ့ဝင် ၂၄ ယောက် မနှစ်က သေဆုံးခဲ့ရတဲ့ အဖြစ်အတွက် အမေရိကန်က တောင်းပန်ဖို့ တောင်းဆိုလိုက်ပါတယ်။

ပါကစ္စတန် လွှတ်တော် ၂ ရပ် ပူးတွဲအစည်းအဝေးပွဲ အင်္ဂါနေ့က ကျင်းပချိန်မှာ ကော်မီတီ ဥက္ကဋ္ဌ Mian  Raza Rabbani က ကြေညာချက်ကို ဖတ်ပြခဲ့တာပါ။ အမေရိကန် ပြည်ထောင်စုအနေနဲ့ သူ့ရဲ့ လုပ်ရပ်တွေကို ပြန်လည် သုံးသပ်သွားဖို့နဲ့ ပါကစ္စတန် နိုင်ငံထဲမှာ မောင်းသူမဲ့ လေယာဉ်တွေနဲ့ တိုက်ခိုက်မှုတွေကို ရပ်တန့်ဖို့လည်း ကြေညာချက်မှာ တောင်းဆိုသွားပါတယ်။
အဝေးထိန်း ဒုံးလေယာဉ်တွေနဲ့ တိုက်ခိုက်မှုတွေကြောင့် တန်ဘိုးရှိတဲ့ အသက်၊ အိုးအိမ်တွေ ဆုံးရှုံးရသလို ဒေသခံလူထုကို အစွန်းရောက် စိတ်ဓာတ်တွေ ဖြစ်စေပြီး အကြမ်းဖက်ဝါဒနဲ့ အမေရိကန် ဆန့်ကျင်ရေး စိတ်ဓာတ်တွေ ကြီးထွားစေတာကြောင့် အကျိုးမရှိဘူးလို့လည်း ကော်မီတီဥက္ကဋ္ဌက ပြောသွားခဲ့တာပါ။
အမေရိကန် အထက်လွှတ်တော်အမတ် Joe Lieberman ကတော့ ဒုံးလေယာဉ်တွေနဲ့ တိုက်ခိုက်မှုဟာ အမေရိကန် လုံခြုံရေးအတွက် အရေးကြီးတာမို့ ရပ်တန့်ဖို့ မသင့်ဘူးလို့ ပြောဆိုလိုက်သလို အထက်လွှတ်တော် ထောက်လှမ်းရေး ကော်မီတီဥက္ကဋ္ဌ ဒီမိုကရက်ပါတီ အထက်လွှတ်တော်အမတ် Dianne Feinstein ကလည်း အကြမ်းဖက်ဝါဒီတွေနဲ့ အစွန်းရောက် သမားတွေကို အမြစ်ဖြုတ်ဖို့ ပါကစ္စတန်က အပြင်းအထန် ကြိုးပမ်းတာမျိုး မရှိတဲ့အတွက် အသုံးပြုဖို့ လိုအပ်နေတုန်းပဲလို့ တုံ့ပြန်ပြောဆိုခဲ့ကြပါတယ်။

ကချင်ပြည်နယ်မှာ မြန်မာအစိုးရတပ် လူ့အခွင့်အရေး ဆက်ချိုးဖောက်
By ကျော်ကျော်သိန်း

ဓာတ်ပုံ Reuters
မြန်မာအစိုးရစစ်တပ်တွေဟာ ကချင်ပြည်နယ်ဘက်မှာ လူ့အခွင့်အရေးချိုးဖောက်မှုတွေကို ဆက်ကျူးလွန်နေပြီး လူသားချင်းစာနာမှုဆိုင်ရာ အထောက်အပံ့တွေ မရောက်နိုင်အောင်လည်း ပိတ်ဆို့ တားဆီးနေတယ်လို့ Human Rights Watch လို့ ခေါ်တဲ့ လူ့အခွင့်အရေး စောင့်ကြည့်ရေးအဖွဲ့က ပြောလိုက်ပါတယ်။ ထိုင်းနိုင်ငံ၊ ဘန်ကောက်မြိုက FCCT နိုင်ငံခြား သတင်းထောက်များအသင်းမှာ အင်္ဂါနေ့ လုပ်တဲ့ သတင်းစာရှင်းလင်းပွဲအတွင်း HRW တာဝန်ရှိသူတွေက အဲဒီလို ပြောလိုက်တာပါ။ အပြည့်အစုံကို သတင်းစာရှင်းလင်းပွဲ ကိုယ်တိုင်တက်ရောက် သတင်းယူခဲ့တဲ့ ကိုကျော်ကျော်သိန်းက ဘန်ကောက်ကနေ သတင်းပို့ထားပါတယ်။
လူမသိသေးတဲ့ ဘေးဒုက္ခများလို့ ဆိုရမယ့် Untold Miseries လို့ အမည်ပေးထားတဲ့ စာမျက်နှာ ၈၃ မျက်နှာပါ အစီရင်ခံစာ အသစ်တခုကို HRW အဖွဲ့က အင်္ဂါနေ့မှာ ထုတ်ပြန်လိုက်ပြီး ကချင်ပြည်နယ်ဘက်မှာဖြစ်ပျက်နေတဲ့ အခြေအတွေကို အသေးစိတ် ဖော်ပြထားတာပါ။
မြန်မာအစိုးရက ဖော်ဆောင်နေတယ်ဆိုတဲ့ ပြုပြင်ပြောင်းလဲရေးတွေဟာ ကချင်ပြည်နယ်ဘက်ဆီတော့ မရောက်သေးဘူးလို့ HRW က ဆိုပြီး ကချင်လူမျိုးစုလက်နက်ကိုင်အဖွဲ့ဖြစ်တဲ့ KIA နဲ့ တိုက်ခိုက်နေတဲ့ မြန်မာအစိုးရစစ်တပ်တွေဟာ လူ့အခွင့်အရေး ချိုးဖောက်မှုတွေကို ကျူးလွန်နေဆဲဖြစ်တယ်လို့ HRW က ဝေဖန် ပြစ်တင်လိုက်တာလည်းဖြစ်ပါတယ်။
မြန်မာနိုင်ငံမှာ တစုံတရာ အပြောင်းအလဲတွေ ဖြစ်ကောင်းဖြစ်နေနိုင်ပေမဲ့ မြန်မာအစိုးရစစ်တပ်က မတရားပြုမူလုပ်ဆောင်နေတာ တွေဟာ ကချင်ပြည်လို လူမျိုးစုတိုင်းရင်းသားဒေသတွေမှာ ကိုလိုနီခေတ်လွန် နောက်ပိုင်းကတည်းက ဖြစ်နေခဲ့တာတွေနဲ့ အတူတူ ဆက်ဖြစ်နေဆဲပါပဲလို့ HRW အဖွဲ့ရဲ့ အာရှဒေသဆိုင်ရာ ဒုတိယညွှန်ကြားရေးမှူး Phil Robertson က ပြောပါတယ်။
“ဒီကနေ့အစီရင်ခံစာမှာ ရှင်းရှင်းလင်းလင်း ပြောထားတဲ့ အချက်တခုကတော့ မြန်မာအစိုးရစစ်တပ်ဟာ ပဋိပက္ခဖြစ်နေတဲ့ ဒေသတွေမှာ အရပ်သားတွေအပေါ် ဆိုးရွားတဲ့ လူ့အခွင့်အရေးချိုးဖောက်မှုတွေ ဆက် ကျူးလွန်နေတုန်းပဲ ဆိုတာပါ။ သူတို့ရဲ့ ထိန်းချုပ်မှုအောက်မှာမရှိဘဲ ပြည်တွင်းမှာ အိုးအိမ်စွန့်ခွာ ထွက်ပြေးနေရသူတွေအတွက် လူသားချင်းစာနာမှုဆိုင်ရာ အထောက် အပံ့တွေကို မြန်မာအစိုးရစစ်တပ်က ဆက်ပြီး ထိန်းချုပ်ထားဆဲ၊ တားဆီး ပိတ်ဆို့ထားဆဲပါပဲ။” လို့ Phil Robertson က ပြောပါတယ်။
အခုလို လူ့အခွင့်အရေးချိုးဖောက်မှုတွေ ဆက်ဖြစ်နေတဲ့ကြားကပဲ မြန်မာအစိုးရက လုပ်နေတယ်ဆိုတဲ့ ပြုပြင်ပြောင်းလဲရေးတွေ ကို အလွယ်တကူပဲ ခပ်မြန်မြန် အသိအမှတ်ပြုခဲ့ကြတဲ့ အရှေ့တောင်အာရှနိုင်ငံတွေအပါအ၀င် နိုင်ငံတကာကိုလည်း HRW က ဝေဖန် ပြောဆိုခဲ့ပါသေးတယ်။
HRW အဖွဲ့ရဲ့ အခုအစီရင်ခံစာကို ကချင်အရေးလုပ်ဆောင်နေကြတဲ့ တခြားအဖွဲ့အစည်းတွေနဲ့ ပူးတွဲ လုပ်ဆောင် ပြုစုခဲ့တာဖြစ်ပြီး အဲဒီဒေသမှာ ဘေးဒုက္ခအမျိုးမျိုး ကိုယ်တိုင်ကြုံတွေ့ခဲ့ကြရတဲ့ ကာယကံရှင်တွေနဲ့ တွေ့ဆုံမေးမြန်းထားတာတွေကို လူပုဂ္ဂိုလ်တွေရဲ့ နာမည်တွေ၊ အခင်းဖြစ်ခဲ့တဲ့နေရာတွေအပါအ၀င် အသေးစိတ် ဖော်ပြထားပါတယ်။
မြန်မာအစိုးရစစ်တပ်ဟာ ကလေးငယ်တွေအပါအ၀င် အပြစ်မဲ့ ရွာသူရွာသားတွေကို ပစ်ခတ် သတ်ဖြတ်တာ၊ တရားလက်လွတ် ဖမ်းဆီးပြီး နှိပ်စက်ညှဉ်းပန်းတာ၊ အမျိုးသမီးတွေကို လိင်ပိုင်းဆိုင်ရာ မတော်မတရားပြုကျင့်တာ၊ မုဒိန်းကျင့်တာ၊ ဒေသခံတွေကို အထမ်းသမား ပေါ်တာတွေအဖြစ် အတင်းအကျပ်စုဆောင်းပြီး စစ်တပ်ပစ္စည်းတွေကို သယ်ယူခိုင်းတာ၊ ရွာတွေကို မီးရှို့ ဖျက်ဆီးတာ စတဲ့ လူ့အခွင့်အရေး ချိုးဖောက်မှုတွေကို ဖော်ပြထားပါတယ်။ အဲဒီဒေသမှာ တိုက်ပွဲတွေစဖြစ်ကတည်းကဆိုရင် သူတို့သိထားသလောက် အရပ်သား ၇၅,၀၀၀ လောက်ဟာ အိုးအိမ်စွန့်ခွာ ထွက်ပြေးနေကြရပြီလို့ ဆိုပါတယ်။
ဒါ့အပြင် မြန်မာအစိုးရစစ်တပ်ရော၊ KIA အဖွဲ့ရောဟာ ကလေးစစ်သားတွေကို စုဆောင်း အသုံးပြုနေဆဲ၊ လူတွေ သေကျေ ဒဏ်ရာရစေတဲ့ မြေမြှုပ်မိုင်းဗုံးတွေကို အသုံးပြုနေဆဲပဲလို့လည်း HRW အဖွဲ့ရဲ့ လေ့ကျင့်ရေး၊ သုတေသနနဲ့ လှုံ့ဆော်စည်းရုံးရေး ဆိုင်ရာ တာဝန်ရှိသူ Matthew Smith က ပြောပါတယ်။
“ပဋိပက္ခမှာ ပါဝင်နေတဲ့ နှစ်ဘက်စလုံးဟာ လူကို အန္တရာယ်ဖြစ်စေတဲ့ မိုင်းဗုံးတွေကို အမြောက်အများ အသုံးပြုနေကြသလို ကလေးစစ်သားတွေကိုလည်း နှစ်ဘက်စလုံးက အသုံးပြုနေပါတယ်။ မြန်မာစစ်တပ်ဟာ အသက် ၁၄ နှစ်လောက်ထိငယ်တဲ့ ကလေးငယ်တွေကို စစ်သားအဖြစ် အတင်းအကျပ် စုဆောင်းအသုံးပြုနေပြီး KIA အဖွဲ့က အဲဒီလို အတင်းအကျပ်စုဆောင်းနေတုန်းပဲလားဆိုတာ အတည်မပြုနိုင်ပေမဲ့ အသက် ၁၈ နှစ်အောက် လူငယ်တွေကို စစ်သားအဖြစ်လက်ခံနေတုန်းပဲ ဆိုတာကတော့ အထောက်အထားတွေရှိပါတယ်။” လို့ Matthew Smith က ပြောပါတယ်။
ကချင်လွတ်မြောက်ရေးအဖွဲ့ KIO ရဲ့ နိုင်ငံခြားရေး ဒုတိယတာဝန်ခံ ဗိုလ်မှူးကြီး ဂျိမ်းမ်စ်လွန်းဒေါင်ကတော့ အသက် ၁၈ နှစ် အောက်ကလေးတွေကို စစ်သားအဖြစ် စုဆောင်းတာမရှိဘဲ အသက် ၁၈ နှစ်အထက်တွေကိုသာ စစ်သင်တန်းပေးနေတယ်လို့ ဗွီအိုအေကို ပြောပါတယ်။
"လက်နက်ကိုင်နေတဲ့သူတွေက ၄၅နှစ်အထက်ဆိုလို့ရှိရင် သူတို့က တိုက်ရည်ခိုက်ရည်ရှိတဲ့ လူငယ်တွေဖြစ်တယ်။ ဒီတော့ကာ လွန်ခဲ့တဲ့ အချိန်တွေတုန်းကတော့ ရှိရင် ရှိမှာပေါ့နော်။ ကျနော်တို့ တော်လှန်ရေးအဖွဲ့တိုင်းမှာ အဲဒါတွေကတော့ အခြေအနေအရ သုံးတဲ့နေရာ ရှိရင်ရှိမယ်။ ပြောနေကြတယ်၊ ဗမာ့တပ်မတော်မှာလည်းပဲ ဒီနေ့ ၇သောင်းကျော် ရှိနေတယ်လို့ ပြောတယ်။ ဒါတွေကတော့ ပြောတာပေါ့။ လက်တွေ့ဆိုရင်တော့ ဒါတွေက သွားကြည့်ပြီးတော့မှ အဲဒါ သက်သေသာဓက ပြနိုင်မယ်၊ မှန်ကန်တယ်၊ ဒီနေ့ထက်ထိလည်း ရှိပါသေးတယ်ဆိုာ ရှိရမှာပေါ့နော်။ လက်တွေ့မှာတော့ ကျနော်တို့က အသက် ၁၈နှစ်အပေါ်မှာသာ သင်တန်းပေးနေပါတယ်။”
ပဋိပက္ခမှာ ပါဝင်ပတ်သက်နေတဲ့ ဘက်နှစ်ဘက်စလုံးအနေနဲ့ အရပ်သားတွေနဲ့ အရပ်သားပိုင်ပစ္စည်းတွေ ထိခိုက်ပျက်စီးမှု အနည်းဆုံးဖြစ်အောင် လုပ်ဆောင်ခြင်းအားဖြင့် အပြည်ပြည်ဆိုင်ရာ ဥပဒေတွေကို လေးစားလိုက်နာပါလို့ မြန်မာအစိုးရကိုရော KIO အဖွဲ့ကိုပါ HRW က အကြံပေး တိုက်တွန်းထားပါတယ်ခင်ဗျား။

ဖဒိုမန်းငြိမ်းမောင် အထူးဧည့်သည်အဖြစ် နေပြည်တော် ရောက်
By အေးအေးမာ

• ကရင်အမျိုးသားအစည်းအရုံးရဲ့ ဗဟိုကော်မီတီဝင်ဦးမန်းငြိမ်းမောင်ကို နေပြည်တော်ကို ခေါ်ဆောင်ပြိး မီးရထားဝန်ကြီးဦးအောင်မင်းနဲ့ တွေဆုံနေပြီဖြစ်ကြောင်း၊ မကြာခင်မှာ နယ်စပ်ကို ပြန်ပို့ဆောင်ပေးမှာဖြစ်တယ်လို့ မြန်မာအစိုးရဘက်က ဆက်သွယ်ရေး ကိုယ်စားလှယ်ကတဆင့် အကြောင်းကြားခဲ့တယ်လို့ ကရင်အမျိုးသားအစည်းအရုံးက VOA ကို ပြောပါတယ်။ ထိုင်းအခြေစိုက် ဗီအိုအေ သတင်းထောက် မအေးအေးမာက သတင်း ပေးပို့ထားပါတယ်။

ထောင်ဒဏ် တသက်တကျွန်းကျပြီး၊ တပတ်မကြာခင်မှာပဲ သမတဦးသိန်းစိန်ရဲ့ အမိန့်နဲ့ ပြန်လည် လွတ်မြောက်လာတဲ့ ကေအန်ယူခေါင်းဆောင် ဦးမန်းငြိမ်းမောင်ကို မတ်လ၁၉ရက်နေ့ကပဲ မြန်မာအစိုးရတာဝန်ရှိသူတွေက နေပြည်တော်ကို ခေါ်ဆောင်သွားခဲ့ကြောင်း ကေအန်ယူရဲ့ ဦးဆောင်ကော်မတီဝင် ဦးစောဒေးဗစ်ထောက ပြောပါတယ်။
“ကျနော်တို့ဆီ တိုက်ရိုက်အကြောင်းကြားတာကို ပြောမယ်ဆိုရင်တော့ သူ့ကို လွှတ်လိုက်ပြီ ဆိုတဲ့အကြောင်းနဲ့ ခုလောလောဆယ် နေပြည်တော်မှာ အထူးဧည့်သည် အနေနဲ့ ၀န်ကြီး ဦးအောင်မင်းဆီကို ရောက်နေပါတယ်။ ၀န်ကြီးဦးအောင်မင်းက ပြန်လာပို့ပေးမယ်ဆိုတဲ့အကြောင်း ပြောပြတယ်။ တခြား ဘာမှထွေထွေထူးထူး မသိရသေးဘူး။ သိသလောက်ဆိုရင် မနေ့က မနက်က သူ့အမှုကိစ္စအကူအညီပေးခဲ့တဲ့ ဦးချစ်ကိုကို ဖုန်းနဲ့ ဖဒိုမန်းငြိမ်းမောင်နဲ့ တိုက်ရိုက်စကားပြောခွင့်ရတယ်။”
ဦးမန်းငြိမ်းမောင်နဲ့ စကားပြောဆိုခွင့်ရတဲ့အချိန်မှာ သူ့အနေနဲ့ သူလွတ်မြောက်ရေး အတွက် ၀ိုင်းဝန်းကြိုးပမ်းတဲ့မိတ်ဆွေတွေကို သတိရကြောင်းတွေ ပြောပြခဲ့တယ်လို့ ဆိုပါတယ်။
သူကတော့ အခြေနေကောင်းတယ်၊ သူ့ကျန်းမာရေးလည်း ကောင်းတယ်၊ နောက်ပြီးတော့ အားလုံးအဆင်ပြေတယ်၊ ဒီက မိသားစုတွေရယ်၊ လုပ်ဖော်ကိုင်ဖက် မိတ်ဆွေတွေရယ်ကို သတိရကြောင်း တဆင့်စကားပါးပေးဖို့ ပြောပါတယ်။
ဦးမန်းငြိမ်းမောင်ကို အခုလို ပြန်လွှတ်ပေးခြင်းဟာ ကေအန်ယူ နဲ့ မြန်မာအစိုးရကြား အပစ်အခတ် ရပ်စဲနိုင်ရေးအတွက် ယုံကြည်မူတည်ဆောက်တဲ့ အစိတ်အပိုင်းတခုသာ ဖြစ်ကြောင်းတွေကိုလည်း ပြောသွားပါတယ်။