ခြူဆွဲကြသူများ

MgKaung Mḏẙ's photo.

တစ်ခါတုံးက အိမ်တစ်အိမ်မှာ ကြွက်တစ်သိုက် နဲ့ ကြောင်တစ်ကောင် ရှိသတဲ့ ..။
ကြွက် နဲ့ ကြောင် ဆိုတော့ သိကြတဲ့ အတိုင်းပဲ ကမ္ဘာ့ရန်ဖက်တွေ ..။
အားကြီးပြီး ဥာဏ်နီဥာဏ်နက် များတဲ့ ကြောင်ကြီးက ကြွက်တွေကို တတိတိ နဲ့ ချီပြီး စားပစ်ဝါးပစ်နေတော့
ကြွက်သိုက်မှာ တဖြည်းဖြည်းလုံးပါးပါး လာပါလေရောတဲ့ ..။
သွားရခက် လာရခက် စားဖို့ သောက်ဖို့ ရှာရခက် နဲ့ အနေအထိုင်ကြပ်လာရပါသတဲ့ ..။

အဲ့ဒီတော့ ကြွက်တွေက စဉ်းစားတယ် ဒါမျိုးရှေ့ဆက်သွားနေရင် သူတို့ ကြွက်မျိုးသုဉ်းရတော့မယ် ..။
ဒီကြောင်ကြီးပြသနာကို အားလုံးပူးပေါင်း အဖြေရှာမှ ရမယ်ဆိုပြီး ကြွက်တွေ စုဝေးကြတယ် ..။
ပြောရရင်တော့ ကြွက်ပေါင်းစုံညီလာခံကြီးပေါ့ဗျာ ..။
အဲ့ဒီမှာ ကြောင်ကြီးကို ရင်ဆိုင်ဖို့ အဆို အမျိုးမျိုးတင်သွင်းကြတယ်ပေါ့ဗျာ ..။
တစ်ကောင် တစ်ပေါက် နဲ့ ဆူညံနေကြတယ်ပေါ့ ..။
တစ်ချို့က အားလုံးစုပြီး တိုက်ခိုက်ဖို့ ..။
ဟာ .. အဲ့ဒါတော့ မဖြစ်နိုင်ဘူး .. ကြွက်တွေ ဘယ်လောက်များတယ်ပြောပြော .. ကြောင်ကို မယှဉ်နိုင်ဘူး ..
ယှဉ်ရတယ် ထားဦး .. အကျအဆုံးများမှာ ... မဖြစ်နိုင်ဘူး ..
တစ်ချို့က ဒီနေရာကနေ ထွက်ခွာသွားဖို့ ..
အဲ့ဒါဆို နောက်ပြောင်းသွားတဲ့နေရာမှာ ကြောင်နောက်တစ်ကောင် တွေ့ရင် ထပ်ပြောင်းကြဦးမှာလား ..
ပြီးတော့ ဒီအစုအဝေးကြီးနဲ့ ဘယ်လို လုပ် နေရာထပ်ပြောင်းလို့ အဆင်ပြေမလဲ ..။
အဲ့လိုနဲ့ပေါ့လေ ....
အချိန်သာ ကြာလာတယ် ..။
အဖြေက ရေရေရာရာ မရသေး ..။
နောက်တော့ ပညာရှိပုံရတဲ့ ကြွက်ကလေးက ထ အကြံပေးတယ် ..။

"ကျွန်တော်တို့ ကြောင်ကြီးရဲ့လည်ပင်းမှာ ခြူဆွဲထားမယ်ဆိုရင်ကောဗျာ" တဲ့ ..။

အလို ...
သိပ်ကောင်းတဲ့ အကြံဥာဏ်ပဲ ..။
အဲ့လို ကြောင်လည်ပင်းမှာ ခြူဆွဲပေးလိုက်ရင် .. သူသွားသမျှ လာသမျှမှာ ခြူသံကမြည်နေမှာ ..။
အဲ့တော့ ကြွက်တွေ အနေနဲ့ လွတ်ရာလွတ်ကြောင်း လှုပ်ရှားလို့လည်း ရနိုင်တယ် ..။
အကြံပေးတဲ့ ကြွက်ကလည်း ထောက်ခံချက်တွေ တတ်လာတော့ မြောက်ကြွမြောက်ကြွဖြစ်လာတယ်ပေါ့ ..။
ငါက ဒီဒုက္ခတွင်းကနေ ကယ်တင်မယ့် ကယ်တင်ရှင်ဖြစ်ပြီဆိုပြီးတော့များတွေလေသလား မပြောတတ်ဘူး ..။
အဲ့ဒီ အချိန်မှာ အသက်ကြီးကြီး ပညာရှိကြွက်ကြီးတစ်ကောင်က ထပြောတယ် ..

"ဟုတ်ပါပြီ .. ကြောင်လည်ပင်းမှာ ခြူဆွဲပေးထားမှာ.. သိပ်ကောင်းတာပေါ့ .. တစ်ခုပါပဲ ..
ကြောင်လည်ပင်းမှာ ဘယ်သူခြူသွားဆွဲပေးမှာလဲ .."

အဲ့ဒီမှာ ကြွက်တွေ အားလုံး .. ဟာခနဲတောင် မဖြစ်နိုင်တော့ဘူး .. တိတ်ဆိတ်သွားတယ် ..
အဲ့ဒီမှာ ပညာရှိကြွက်ကြီးက ပြုံးတယ် .. ဒီကောင်တွေ ဝေဖန်ဖို့ အကြံပေးဖို့ .. ပြောဆိုဖို့လောက်ပဲ သိတဲ့ ကောင်တွေ
တကယ် လက်တွေ့လုပ်တဲ့နေရာမှာ အခက်အခဲတွေ အများကြီးရှိနိုင်တယ်ဆိုတာ နားမလည်ကြသေးဘူး
ငါဆုံးမဦးမှပါ ဆိုပြီး ပြောမလို့ လည်ချောင်းရှင်းကာရှိသေးတယ် အသံ တစ်ခု ထွက်လာတယ်

"ကျွန်တော် ခြူသွားဆွဲပေးပါ့မယ် " တဲ့ ..

အားလုံး စိတ်ဝင်စားသွားကြတယ် ..။
ဒီကောင်က ခြူဘယ်လို သွားဆွဲပေးမှာလဲပေါ့ ..။
အဲ့ဒီမှာ အားလုံးကိုယ်စား ကြွက်ပညာရှိကြီးက လှမ်းမေးတယ် ..။
မင်း ဘယ်လိုနည်းနဲ့ ကြောင်ကို ခြူဆွဲပေးမှာလဲ ..ပေါ့ ..
အဲ့ဒီမှာ အသံရှင်ကြွက်ကလေးက ဂုဏ်ယူဝံ့ကြွားစွာနဲ့ ပြန်ဖြေတယ် ..။

"ဒီလိုဗျ ကျွန်တော်က ဒီတိုင်း ကြောင်ကို ခြူသွားဆွဲပေးရင် ဟိုက သတ်လွှတ်လိုက်မှာပေါ့ ..
ပြီးတော့ အဲ့ကောင်ကြီးက သတိမြဲတဲ့ကောင်ကြီးဆိုတော့ အငိုက်ဖမ်းပြီး လည်ပင်းခြူဆွဲပေးလို့လည်း ရမှာမဟုတ်ဘူး
ရခဲ့လည်း ဒီကောင်က ပြန်ချွတ်မှာ .. အဲ့တော့ ဒီကောင့်လည်ပင်းမှာ ခြူမြဲဖို့ဆိုတာက တစ်နည်းပဲရှိတယ်
အဲ့ဒါကတော့ အဲ့ကောင်ကြီးကိုယ်တိုင် သူ့လည်ပင်းမှာ ခြူကို ဆွဲမှရမှာ"

အဲ့မှာ ကြွက်အုပ်က ထပွက်ပြန်ရော ..
ဘယ်လိုလုပ် ကြောင်က သူ့ဘာသာသူ ခြူဆွဲမှာလဲ .. မဖြစ်နိုင်တာ .. ဘယ်သူက သူ့ပျော့ကွက် ကို သူကိုယ်တိုင်အသုံးခံမှာလဲ ..
အဲ့ဒီမှာပဲ အသံရှင်ကြွက်က ပြန်ပြီး အဖြေပေးရပြန်ပါတယ် ..

"သူ့ဘာသာသူ ခြူဆွဲဖို့ဆိုတာ မဖြစ်နိုင်ဘူး ထင်ရပေမယ့် ဖြစ်နိုင်တဲ့ တစ်နည်းတော့ ရှိပါတယ် .."

အဲ့ဒီမှာ ကြွက်အားလုံး စိတ်ဝင်စားပြီး ငြိမ်သွားကြပြန်တယ်

"အဲ့ဒါက ကြောင်ကို ခြူ လက်ဆောင်ပေးလိုက်ဖို့ပါပဲ"

အားလုံး မှင်သက် အံ့သြသွားကြတယ် ..
ဟုတ်တယ် .. ကြောင်ကို လက်ဆောင်ပေးရမယ် .. သပ်သပ်ရပ်ရပ် ထုတ်ပိုးပြီး
သူ့အတွက် သေချာပြင်ဆင်ပေးထားတဲ့သဘောမျိုးနဲ့လက်ဆောင်ပေးရမယ် ..
ကိုယ့်ဆီကို တခုတ်တရ နဲ့ အသေအချာ ပေးတဲ့ လက်ဆောင်ကို ဘယ်သူငြင်းမှာလဲ .. ဟုတ်တယ် ..
အဲ့ဒါအကောင်းဆုံးပဲ ..

ကြွက်တွေဟာ သူတို့ အကြံနဲ့ သူတို့မို့လို့ အနေအထိုင်သိုသိုသိပ်သိပ် ပိပိရိရိ နေကြပြီး အချိန်ကောင်းရောက်တဲ့အထိ စောင့်နေကြပါတယ် ..

ဒီလိုနဲ့ ခရစ်စမတ်နေ့ လည်း ရောက်လာတော့ ..
ခရစ်စမတ် လက်ဆောင်အနေနဲ့ ကြောင်ကြီးအနားမှာ မသိအောင်လက်ဆောင်ထုတ်ကလေးထားခဲ့ပါသတဲ့ ..
ပန်းနုရောင်ပါကင်ပေပါလေး နဲ့ထုတ်ပိုးပြီး လိမ္မော်ရောင်ဖဲကြိုးလေစည်းလို့ ..
ချစ်ခြင်းများဖြင့် .. ဆိုတဲ့ ပို့စ်ကတ်လေးနဲ့ ...
လက်ဆောင်ထုတ်ထဲက ခြူလေးကလည် ရွှေရောင်လေး ..
ဖဲကြိုးအနီလေးနဲ့ .. အသံလေးက လွင်နေတာပဲ .. သိပ်ပြီးချစ်စရာကောင်းတဲ့ခြူလေးပေါ့ ..
ကြောင်ကြီးကလည်း သိပ်သဘောကျတာပါပဲ တဲ့ .. အဲ့ဒါနဲ့ ဘယ်သူမှန်းမသိတဲ့ ပေးတဲ့သူကို ကျေးဇူးတွေတင်ပြီးတော့ ..
ခြူလေးကို လည်ပင်းမှာ တခုတ်တရ ဆွဲထားလိုက်ပါသတဲ့ ..။

သူ့လက်နဲ့သူ ချည်ပြီးတုပ်ပြီးသွားတဲ့ ပျော့ကွက်ဟာ ကြွက်တွေအတွက် နိုင်ကွက် ခုခံကွက်ဖြစ် ..
ကြောင်ကတော့ ခုတလော ဘာလို့ ကြွက်တွေ အတွေ့ရနည်းအဖမ်းရကျဲသွားသလဲ စဉ်းစားမရ ..
ကြွက်တွေကတော့ ခြူတစ်လုံးနှင့် အကြံတစ်ကွက် ရင်းပြီး အနေချောင် အစားချောင်သွား ...

ဤသို့ ဤနှယ်ဖြင့် ခြူဆွဲသူ တို့၏ ပုံပြင်သည် ကြွက်နှင့်ကြောင်လောကတွင် အဆုံးသတ်သွားခဲ့လေသည် ..။
သို့သော် ၄င်းသည်ကား လူ့လောကကတွင်မူ တစ်ခေတ်ဆန်းအခြေတည် အစပြုလာသောယဉ်ကျေးမှု ဖြစ်လာလေတော့သတည်း ..။

မောင်ကောင်း
(၁၅.၅.၂၀၁၄)