ဝမ်းတေဘယ်လ်

ည (၁၁) နာရီကျော်မှ ကျွန်တော်တို့လင်မယား ပြန်ရောက်ကြတယ်။
      အဲ့ဒီညက ကျွန်တော်နည်းနည်းမူးလာတယ်။
        သုငယ်ချင်းတစ်ယောက်က သူ့ရဲ့  စီးပွားရေးလုပ်ငန်းတစ်ခု  အောင်မြင်တဲ့အတွက်    သူ့ သူငယ်ချင်းတွေဖြစ်တဲ့
ကျွန်တော်တို့လင်မယားကို ကန်တော်ကြီးစောင်းမှာရှိတဲ့ အကောင်းဆုံးဆိုတဲ့  စားသောက်ဆိုင်မှာ     ညစာကျွေးတယ်။ ကြက်ကောက်ရိုးမီးကင်လည်း ပါတယ်။ ဘဲကင်လည်းပါတယ်။    ယိုးဒယားပုံစံ   ချက်ပြုတ်ထားတဲ့     အစားအစာတွေ
အကုန်ပါတယ်။  Black Label, Green Label  လို့ခေါ်ကြတဲ့  နိုင်ငံခြားဖြစ်      အရက်အကောင်းစားတွေလည်းပါတယ်။
သူငယ်ချင်းတွေတွေ့ကြတော့ ပြောကြဆိုကြ သောက်ကြစားကြနဲ့အလွန်ပျော်စရာကောင်းပါတယ်။
စားသောက်ဆိုင်ကလည်း စင်တင်တေးဂီတပါပါတော့လှတပတကောင်မလေးတွေရဲ့  မပီမသသီချင်းသံကြားမှာ ရီဝေေ၀ရစ်မူးနေတဲ့ ဦးနှောက်နဲ့
ဝိုးတ၀ါးအလှကို ခံစားရင်း ည (၁၁) ထိုးသွားပါတော့တယ်။ကားကို ဖြည်းဖြည်းလေးမောင်းပြီး ပြန်လာခဲ့တယ်။ အိမ်ရောက်တော့ အဖေမအိပ်သေးဘူး။ အဖေကကျွန်တော်တို့လင်မယားကို မျှော်နေတယ်။ညဥ့်နက်လေ စိတ်မချလေဖြစ်ပြီး ကျွန်တော်တို့ကို စောင့်နေတာဖြစ်မယ်။ ကျွန်တော်တို့ကလည်း အိမ်ကိုရောက်ရောက်ချင်း ၀င်အိပ်လိုက်ကြတယ်။
....................................................................................................................
ကျွန်တော်တို့အိမ်မှာ ထုံးစံတစ်ခုရှိုတယ်။ နံနက် (၆) နာရီဆိုရင် ထမင်းစားခန်းထဲမှာ အတူဝိုင်းဖွဲ့ပြီး ကော်ဖီသောက်ကြရတယ်။ စကားပြောကြရတယ်။ ပြီးမှ အလုပ်သွားကြရတယ်။ အဲ့ဒီနေ့မနက်မှာ မနေ့ညက အကြောင်းပြောဖြစ်တယ်။
                        '' အဖေရေ...သိလား။ ကျော်နိုင်ကြီးလေ...ရေနံမှော်အောင်တယ်။ ဒါကြောင့် မနေ့ညက ကျွန်တော်တို့ကို
' ၀မ်းတေဘယ်လ်' ပေးတယ်အဖေရ။ ကောင်းလိုက်တဲ့ အစားအစာတွေ။ အရက်ဆိုင်ကလည်း အပျံစား။အ၀သောက်လို့ရတယ် ''
                         အဲဒီအချိန်မှာ ကျွန်တော့်မိန်းမက ၀င်ပြောတယ်။
       '' ကြက်ကောက်ရိုးမီးကင်ဆိုတာလဲ ကောင်းတာပဲ။ ယိုးဒယား စားအစာတွေကလည်း 'ရှယ်' ပဲ၊ ကောင်းလိုက်တာလွန်ရော ''
        '' ဟုတ်တယ် အဖေရ ကျော်နိုင်ကြီးရဲ့  ' ၀မ်းတေဘယ်လ်' ကတော့ တစ်သက်မမေ့စရာပါပဲ...အဖေရာ''
                       အဖေ ကျွန်တော့်ကို  ပြုံးပြုံးကြီးကြည့်ပြီး ကျွန်တော့်စကားကို ခေါင်းတစ်ညိတ်ညိတ်နဲ့ နားထောင်နေပါတယ်။ံ
   '' Green Label ဆိုတာ အရက်လို့သာ ပြောတာပါ။ တအားကြီးမမူးဘူးဗျ။ နိုင်ငံခြားဖြစ်အရက်မို့လားမသိဘူး။ ယဉ်ယဉ်လေးနဲ့ ရစ်တစ်တစ်ကလေး။ မနက်အိပ်ရာထတော့လည်း ဘာမှမဖြစ်ဘူးဗျ...အဖေရ သိလား ''
                      ဒီအချိန်မှာ အဖေက ကျွန်တော့်ကို စကားစ,ပြောပါတယ်။
                      '' ကျော်နိုင်ဆိ်ုတာ (၂၂) လမ်းက ကျော်နိုင်ကိုပြောတာလား။ ၀မ်းသာပါတယ်ကွာ။ မင်းတို့တစ်တွေ အဲ့ဒီလို ကြီးပွားကြတာ၊ ပျော်နိုင်ကြတာ၊ စားနိုင်သောက်နိုင်ကြတာ။ ဒါပေမယ့်တစ်ခုတော့ သတိပေးစရာရှိတယ် ''
                 အဖေဟာ...ကော်ဖီကို သောက်လိုက်တယ်။ သားသမီးတွေနဲ့ မြေးတွေကို တစ်ယောက်ချင်းလိုက်ပြီး ကြည့်တယ်။
စိုက်ကြည့်တယ်။
                      '' အားလုံးသေချာနားထောင်ကြ။    ငါ့သားကြီးက  ပြောတယ်။    သူ့သူငယ်ချင်းကျွေးတဲ့     ' ၀မ်းတေဘယ်လ် ' ဘယ်လိုကောင်းကြောင်း၊ ဘယ်လို ကျေးဇူးတင်ကြောင်း၊ ဘယ်လိုပျော်စရာကောင်းကြောင်း အားလုံးကြားကြတယ်နော် ''
                      '' ဟုတ်ကဲ့...အဖေ ''
                     '' ကျော်နိုင်ရဲ့   ' ၀မ်းတေဘယ်လ်' ကိုတော့ ကျေးဇူးတင်ရကောင်းမှန်းသိတယ်။ တစ်သက်မမေ့နိုင်ဘူးလို့လည်း
ပြောတယ်။ တကယ်ကို ၀မ်းပန်းတသာကြီး အူလှိုက်သဲလှိုက် ခံစားပြီးပြောတယ်။ ဟုတ်ရဲ့ လား...ငါ့သားကြီး ''
                     '' ဟုတ်ပါတယ်...အဖေ ''
                '' ဒါဆိုရင် မင်းတို့အားလုံးကို ငါမေးမယ်။ မင်းတို့တစ်တွေကို ငါတို့မိဘ နှစ်ပါးက နေ့စဉ်နေ့တိုင်း ' ၀မ်းတေဘယ်လ်'
မကဘူး။ ' သရီးတေဘယ်လ် ' ကျွေးနေတယ်၊ ကျွေးခဲ့တယ်၊ ကျွေးနေဦးမှာ၊ မင်းတို့ပျော်ပျော်ပါးပါး စားသောက်နေတာတွေ့ရင် ငါတို့အရမ်းပျော်တယ်။ မင်းတို့ အဲဒီလို နေ့တိုင်းတစ်နေ့ကို ' သရီးတေဘယ်လ် ' စားနေကြတာကိုတော့ အခုလိုဝမ်းပန်းတသာကြီး
ပြောဖို့ သတိမရကြဘူးနော် ''
               ကျွန်တော် တော်တော်လန့်သွားတယ်။ အဖေ့ရဲ့  မျက်လုံးမှာ အဓိပ္ပါယ်တွေ ရှိနေတယ်။ အဖေက ဆက်ပြောတယ်။
               '' တစ်သက်မှာ     တစ်ခါလောက်သာ     ကျွေးတဲ့    သူငယ်ချင်းတစ်ယောက်ရဲ့           ' ၀မ်းတေဘယ်လ် ' ကိုတော့ ကျေးဇူးတင်လိုက်ကြတာ ပြောလို့ကိုမ၀ကြဘူး။ တစ်သက်လုံး နေ့စဉ်နေ့တိုင်း ဒီစားပွဲခုံပေါ်မှာ မရေမတွက်နိုင်အောင်
ကျွေးခဲ့တဲ့ အဖေတို့ အမေတို့ရဲ့   ' တေဘယ်လ် ' တွေကို မင်းတို့တန်ဖိုးမထားကြဘူးနော် ''
                     အဖေပြောမှ ကျွန်တော်စဉ်းစားမိတော့တယ်။ ဟုတ်ပါတယ်။ အဖေနဲ့ အမေ ကျွေးခဲ့တဲ့ ထမင်းတွေနည်းမှ
မနည်းဘဲ။ ' တေဘယ်လ် ' ပေါင်းများစွာကို  ကျွန်တော်တို့  စားခဲ့ကြပြီးပြီ။    နောင်လည်း    စားနေဦးမှာပဲ။      ဒါပေမယ့်  ဘာကြောင့်များ ကျေးဇူးတင်ပါတယ်လို့ မတွေးမိကြတာလဲ။ မစဉ်းစားမိကြတာလဲ။ မပြောမိကြတာလဲ။ မြန်မာစကားပုံမှာ
'' တစ်လုပ်စားဖူး သူ့ကျေးဇူး '' ဆိုတာ ကျွန်တော်တို့ သိကြပါတယ်။ ထမင်းအလုပ်ပေါင်းများစွာ ကျွေးခဲ့တဲ့၊ ကျွေးနေဦးမယ့်
အဖေတို့ အမေတို့ရဲ့   ကျေးဇူးကို ကျွန်တော်တို့ မတွေးမိကြဘူးနော်။ သူငယ်ချင်းတစ်ယောက်ကကျွေးတဲ့ ' ၀မ်းတေဘယ်လ် '
ကိုတော့ရင်ထဲမှာ မှတ်တမ်းတင်မိတယ်။ အဖေနဲ့ အမေကျွေးတဲ့ ' တေဘယ်လ် ' များစွာကိုတော့ ရင်ထဲမှာမှတ်တမ်းမတင်မိခဲ့ဘူး။
တွေးကြည့်ကြရအောင်ဗျာ...။
                                                                                                                                 သားငယ်လေး
                      
                              

                                      ကိုတင့်