Thursday, May 26, 2011

လူသား + အနုပညာ

by Han Thit Nyeim on Thursday, May 12, 2011 at 9:11am
လူသား။ ။ အနုပညာဆိုတာ ခင်ဗျားလား...

အနုပညာ။ ။ ဟုတ်တယ်။

လူသား။ ။ အင်း၊ ဒါဆို နည်းနည်းမေးချင်တယ်။ အနုပညာဆိုတာ ဘာလဲဗျ။

အနုပညာ။ ။ အနုပညာဆိုတာ... ဟုတ်လား၊

လူသား။ ။ အင်း...

အနုပညာ။ ။ သိဘူးဗျ။

လူသား။ ။ အာ... ခက်တော့တာပဲ၊ ခင်ဗျားသိသင့်တာပေါ့ဗျ။

အနုပညာ။ ။ ဒီမှာ... ခင်ဗျားက လူသားပါနော်။

လူသား။ ။ ဟုတ်တယ်လေ...။

အနုပညာ။ ။ ဒါဆိုရင် မေးချင်တယ်။ လူဆိုတာ ဘာလဲ။


လူသား။ ။ လူဆိုတာ... ဟုတ်လား... အင်း... အဲ... ဟာ... ခင်ဗျားဗျာ... ကျုပ်မေးတာကို ဖြေစမ်းပါဗျာ။

အနုပညာ။ ။ ခင်ဗျားလည်း ကျုပ်မေးတာကို ဖြေလေဗျာ...။

လူသား။ ။ တယ်ခက်တာပဲ။ ဒီမှာ... လူဆိုတာကို ဘယ်အမြင်မျိုးကနေ ကြည့်ချင်တာလဲ...။

အနုပညာ။ ။ ဘယ်သိမှာလဲဗျ။

လူသား။ ။ ဟ၊ ဒီလိုလေဗျာ... ဆရာဝန်ကိုသွားမေးရင် လူဆိုတာ တစ်မျိုး... ဘုန်းတော်ကြီးတွေ မေးပြန်တော့ တစ်မျိုး... စိတ်ပညာရှင်တွေကျတော့ လူကို မြင်ပုံက တစ်မျိုး... အတွေးအခေါ်သမားတွေ မြင်ပုံကျ တစ်မျိုး...။

အနုပညာ။ ။ အဲလောက်တောင်ပဲလား...

လူသား။ ။ ဟုတ်တာပေါ့... ဟို... ဂရိကျွန်းဆွယ်က ဆိုကရေးတီး၊ ပလေတိုစတဲ့ ပညာရှင်တွေက... “လူဆိုတာ အမွှေးအတောင် မရှိသော ခြေနှစ်ချောင်း သတ္တဝါ” လို့ ဆိုသတဲ့ဗျာ။

အနုပညာ။ ။ ဟုတ်လား။

လူသား။ ။ ဟုတ်တယ်၊ အဲသဟာကို ဒိုင်အောဂျီးနိစ်ဆိုတဲ့ လူကြီးက အမြင်ကတ်တာနဲ့ ကြက်တစ်ကောင်ကို အမွှေးနှုတ်လို့ ပလေတိုရဲ့ အကယ်ဒမီကျောင်းကြီးကိုသွားပြီး... “ကြည့်စမ်း... ကျုပ်ခေါ်လာတဲ့ လူ” ဆိုပြီး ပြဿနာ သွားရှာတယ်ဗျာ။

အနုပညာ။ ။ သြော်... လူ့အကြောင်း အဓိပ္ပာယ်ဖွင့်ဆိုချက်အပေါ် လူတွေ အချင်းချင်း ရန်ဖြစ်ကြတယ်ပေါ့...

လူသား။ ။ ထားဗျာ။ ခင်ဗျားမေးတာတော့ ဖြေရတယ်။ ကျုပ်မေးတာလည်း ဖြေလေဗျာ။ အနုပညာဆိုတာ ဘာလဲ။

အနုပညာ။ ။ အင်း... ခင်ဗျားရဲ့ လူသားသဘောလိုပဲလေ...။

လူသား။ ။ ဘာဗျ။

အနုပညာ။ ။ လူသားကို လူသားအကြောင်း ပြောခိုင်းသလိုပဲ။ အနုပညာကို အနုပညာအကြောင်း ပြောခိုင်းနေတယ်။ ခက်တာပဲဗျာ...။

လူသား။ ။ ဒါဆိုရင် အနုပညာဆိုတာကို ကျွန်တော်တို့လူသားတွေက ဘယ်လို နားလည်ရမှာလဲဗျ။

အနုပညာ။ ။ အနုပညာကို လူသားတွေက နားလည်ဖို့... ဟုတ်လား။

လူသား။ ။ ဟုတ်တယ်

အနုပညာ။ ။ နေဦး... တကယ်က အနုပညာကရော လူသားတွေကို နားလည်မလည် ဆိုတာ အရင် သုံးသပ်သင့်တယ်။

လူသား။ ။ ထားဗျာ... ခင်ဗျားနဲ့ အတိုက်ခံ မလုပ်ချင်ဘူး။ ဒီတော့ လူသားနဲ့ အနုပညာနဲ့ ပေါင်းစည်းရေးကို အရင်ဆုံး ဆွေးနွေးမယ်။

အနုပညာ။ ။ လုပ်ပါဦး... ဘယ်လိုပေါင်းစည်းမှာလဲ။

လူသား။ ။ ဒီလိုလေဗျာ... လူသားရှိတယ်။ အနုပညာ ရှိတယ်။ အဲသဟာကို စဉ်းစားကြမယ်။


အနုပညာ။ ။ အဲဒီတော့...

လူသား။ ။ အဲဒီတော့ကာ... ဖြစ်နိုင်ခြေ (၃) မျိုး ထွက်လာတယ်။

  • အနုပညာနဲ့လူသား (Man with Art)
  • လူသားရဲ့အနုပညာ (Art of Man)
  • လူသားနှင့်အနုပညာ (Man and Art)

အနုပညာ။ ။ အင်း၊ အဲဒီတော့...

လူသား။ ။ အနုပညာနဲ့ လူသားဆိုတဲ့ နေရာမှာ... အနုပညာဟာ လူသားရဲ့ အထက်မှာ ရှိနေတယ်။

အနုပညာ။ ။ အင်း...

လူသား။ ။ လူသားရဲ့အနုပညာလို့ ယူဆရင် အနုပညာဟာ လူသားတွေရဲ့ ဖန်တီးမှုအောက်ကို ရောက်သွားပြီ။

အနုပညာ။ ။ သြော်..

လူသား။ ။ လူသားနှင့် အနုပညာဆိုတဲ့ နေရာမှာတော့ တန်းတူယူဆတာပေါ့ဗျာ။

အနုပညာ။ ။ အင်း၊ ငါ့အမြင်ကတော့ တစ်မျိုးကွ။

လူသား။ ။ ပြောပါဦး။

အနုပညာ။ ။ မြတ်နိုးတတ်တဲ့လူရဲ့ လက်ထဲမှာမှ ပစ္စည်းတစ်ခုဟာ တန်ဖိုးရှိသလိုပဲ ခံစားတတ်တဲ့ လူသားဆီမှာမှ အနုပညာဟာ ရသမြောက်တာကွ...။

လူသား။ ။ သြော်

အနုပညာ။ ။ ပြီးတော့... မင်းသိချင်တဲ့ အနုပညာဆိုတာ ဘာလဲ၊ ရုပ်လား၊ နာမ်လား၊ အကာလား၊ အနှစ်လား၊ စည်းစနစ်လား၊ သဘောတရားလား... ဘာလဲ...။

လူသား။ ။ သိဘူးလေ...

အနုပညာ။ ။ ဒီမှာ၊ ဒါဘာလဲ မင်းကြည့်...

လူသား။ ။ အဝတ်စလေ...

အနုပညာ။ ။ အေး၊ ဟုတ်တယ်။ အဝတ်စလေး တစ်ခုပဲ။ ဒါပေမဲ့ မင်းစဉ်းစားကြည့်။ ဒါလေးကို ခု ဒီစားပွဲပေါ် တင်လိုက်တယ်ကွာ။ ဘာဖြစ်သွားမလဲ

လူသား။ ။ စားပွဲခင်းပေါ့။

အနုပညာ။ ။ ခေါင်းအုံးမှာ တပ်လိုက်ရင်

လူသား။ ။ ခေါင်းအုံးစွပ်ပေါ့။

အနုပညာ။ ။ ဟိုပြူတင်းပေါက်တွေမှာ ချိတ်မယ်ဆိုရင်...

လူသား။ ။ လိုက်ကာပေါ့ဗျာ။

အနုပညာ။ ။ ဒီလို ကြမ်းပြင်ပေါ် ပစ်ချလိုက်တော့...

လူသား။ ။ ခြေသုတ်ဝတ် ဖြစ်ပြီပေါ့ဗျ။

အနုပညာ။ ။ အဲဒါပဲ... အနုပညာ ကွဲပြားတယ်ဆိုတာ။ မင်းကြည့်လေ... ထည့်သွင်းထားတဲ့ ပစ္စည်း တူပါလျက်နဲ့ Time and Space ဆိုတဲ့ အချိန်နဲ့ နေရာကို လိုက်ပြီး အနုပညာဆိုတာ ပြောင်းလဲနိုင်တယ်ကွ။

လူသား။ ။ အင်း...

အနုပညာ။ ။ နောက်တစ်မျိုးပြောမယ်... ဒီအဝတ်စကိုပဲ စဉ်းစားကြမယ်။

လူသား။ ။ အင်း...

အနုပညာ။ ။ ဒီဥစ္စာ ပြည့်တန်ဆာမတစ်ယောက်ရဲ့ အတွင်းခံ အဝတ်ဖြစ်နိုင်တယ်။

လူသား။ ။ အင်း... ဟုတ်တယ်။

အနုပညာ။ ။ သူတော်စင်မလေး တစ်ပါးက ပုခုံးထက်မှာ လွှားတင်ထားတဲ့ ပိတ်စပိုင်းလေးလည်း ဖြစ်နိုင်တယ်။

လူသား။ ။ အင်း...

အနုပညာ။ ။ ဆံရှည် မော်ဒယ်လ်ဂဲမလေး လည်ပင်းမှာ ပတ်ထားတဲ့ လည်စီးလေးလည်း ဖြစ်နိုင်တယ်။

လူသား။ ။ အင်း...

အနုပညာ။ ။ မူကြိုကလေးမလေး ရေခဲမုန့်စားပြီးရင် သုတ်တဲ့ ပဝါစလေးလည်း ဖြစ်နိုင်တယ်။

လူသား။ ။ အင်း...

အနုပညာ။ ။ အမေအိုကြီး ဆောင်းတွင်း ချမ်းလို့ ခေါင်းမြီးခြုံတဲ့ ဝတ်ရုံစလည်း ဖြစ်နိုင်တယ်။

လူသား။ ။ အင်း...

အနုပညာ။ ။ အားလုံးဟာ အဝတ်စပဲ... ဒါပေမဲ့ အသုံးပြုသူအပေါ် လိုက်ပြီး တည်ရှိပုံက ပြောင်းလဲတယ်။

လူသား။ ။ အင်း... ဟုတ်တယ်။

အနုပညာ။ ။ ဘာပဲဆိုဆို ကိစ္စရပ်တိုင်းမှာ ပိတ်စလေးဟာ အနုပညာမြောက်စွာ ပါဝင်နေတယ်။ အချိန်၊ နေရာနဲ့ အသုံးပြုသူပေါ်လိုက်ပြီး အနုပညာဟာ ကွဲပြားသွားတယ်။ မင်းပြောတာထက်၊ ထင်ထားတာထက် အဆပေါင်းများစွာ ကွဲပြားနိုင်တယ်။ ဒါပဲ... အနုပညာဆိုတာ။

လူသား။ ။ အင်း...

အနုပညာ။ ။ စည်းစနစ်ကျခြင်းဟာ အနုပညာ ဖြစ်နိုင်သလို၊ ပရမ်းပတာဖြစ်ခြင်းကလည်း အနုပညာဖြစ်နိုင်တယ်။

လူသား။ ။ အင်း...

အနုပညာ။ ။ လှပခြင်းကို အနုပညာလို့ ခေါ်ဆိုနိုင်သလို၊ ကြမ်းတမ်းခြင်းကိုလည်း အနုပညာလို့ ခေါ်ဆိုနိုင်တယ်။

လူသား။ ။ အင်း...

အနုပညာ။ ။ ဝလုံးကို ဝိုင်းအောင်ရေးတာဟာ အနုပညာဖြစ်သလို၊ ဝလုံးကို မဝိုင်းအောင်ရေးတာဟာလည်း အနုပညာဖြစ်နိုင်တယ်။ အဲလိုပဲ... အနုပညာမှာ အနုပညာ ပါနိုင်သလို၊ အနုပညာ ပါချင်မှလည်း ပါမယ်။ ကုန်ကုန်ပြောမယ်ကွာ... အနုပညာဟာ မင်းထင်ထားသလို လူသားနဲ့ ပတ်ဝန်းကျင် သဟဇာတ ဖြစ်သလိုမျိုးထက် ပိုတယ်။

လူသား။ ။ ဒီတော့ အရာအားလုံးကို အနုပညာလို့ သတ်မှတ်ရမှာပေါ့...

အနုပညာ။ ။ ဒါကတော့ မင်းသဘောပါလေ...။  အဓိပ္ပာယ်သတ်မှတ်ချက်တွေ ရှိလို့ စံတွေ၊ စနစ်တွေ၊ သဘောတရားတွေ ဖြစ်လာတယ်။

လူသား။ ။ အင်း...

အနုပညာ။ ။ တကယ်တော့... အနုပညာဟာ အနုပညာဆန်စွာ ရှိတယ်။ ခံစားတတ်တဲ့ လူသားရှိသည်ဖြစ်စေ၊ မရှိသည်ဖြစ်စေ အနုပညာဟာ ရှိနေတယ်။ စနစ်တွေ သဘောတရားတွေ ရှိရှိမရှိရှိ ဒီအနုပညာကြီး ရှိနေတယ်။ ဒီတော့ မင်းကို တစ်ခုမေးချင်တာ...

လူသား။ ။ အင်း... မေးဗျာ။

အနုပညာ။ ။ လူသားတွေ ဖန်တီးလို့ အနုပညာ ဖြစ်လာတာလား။ လူသားတွေရဲ့ ဖန်တီးမှုက အနုပညာ ဖြစ်သွားတာလား။

လူသား။ ။ ဗျာ...


မေတ္တာဖြင့်
ဟန်သစ်ငြိမ်

..................................................................................

“အနုပညာအကြောင်း အနုပညာ” အီးဘွတ်ခ်တွင် ဖော်ပြပြီး ဖြစ်ပါသည်။ အီးဘွတ်ခ်အလိုရှိလျှင်...
http://www.mediafire.com/file/5nf7tqlk85mezzg/The%20Art%20On%20The%20Art%20%28Jpeg%29.pdf%EF%BB%BF

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...