ရိုဟင်ဂျာ ပြဿနာ အပိုင်း (၃) Rohingyar Crisis Part (3)

by Nyein Chan Aye on Saturday, August 18, 2012 at 5:34am 

အခြား ဆက်စပ်နေသော အကြောင်းအရာ အခြေအနေများ (Other Related Matters) 

လူမျိုး၊ မျိုးရိုးဗီဇ နဲ့ ရာဇဝတ်မှု (Race, Genetic and Crime)

ဒီခေါင်းစဉ် ထည့် ရေး ရခြင်းဟာ လတ်တလော ရခိုင်ဒေသ မတည်ငြိမ်မှု ဖြစ်စဉ် အစဖြစ်တဲ့ ဒေသခံ အမျိုးသမီးငယ်တယောက်ကို သားမယားပြုကျင့်၊ လူသတ်၊ ပစ္စည်းယူ ခဲ့တဲ့ ရာဇဝတ်မှု ဖြစ်စဉ် ဖြစ်ပြီးစ အချိန်မှာ အဲဒီ ရာဇဝတ်မှု ကျူးလွန်ခဲ့တယ်လို့ စွပ်စွဲခံခဲ့ရတဲ့ လူမျိုးကွဲ/ဘာသာခြား လူတစု နဲ့ ပတ်သက်ပြီး စာရေးသူ အွန်လိုင်း မှာ ဖတ်ရှုလိုက်ရဖူးတဲ့ “ကိုယ့်အိမ်လည်း လာနေသေးတယ်၊

အိမ်ရှင်ကိုလည်း စော်ကား တဲ့ လူမျိုး နဲ့ ဒီလို အကျင့် စရိုက်ဆိုးတွေ ရှိတဲ့ လူမျိုးအနွယ် တွေကို ဘာအတွက်မှ လက်သင့်ခံစရာ မလိုဘူး” ဆိုတဲ့ မှတ်ချက် စကားကြောင့်ပါ။

မှတ်ချက်ပြုသူဟာ ဘယ်သူဆိုတာ အခု နာမည် မဖော်ဘဲနဲ့ သူရဲ့ ပင်ကိုယ်အရည်အသွေး၊ ဝါသနာ နဲ့ ဆက်စပ်တဲ့ အလုပ်အကိုင်ကို ဖော်ပြရင်ကို လူအများ ရိပ်မိနိုင်မှာ ဖြစ်တဲ့အတွက် မှတ်ချက်ပြုသူကို ပုဂ္ဂိုလ်ရေး ဝေဖန် ရှုံ့ချ အပြစ်တင်လိုစိတ်မရှိဘဲ သူထောက်ပြတဲ့ အချက်ကိုသာ ဒီမှာ ရှင်းလိုတဲ့ အတွက် ယေဘုယျ သဘောအနေနဲ့ သူဟာ ပင်ကိုယ်အရည်အချင်းကြောင့် လူအများအကြား တိုင်းသိပြည်သိ ထင်ရှားတဲ့ (အွန်လိုင်း ထင်ရှားတာ မဟုတ်ပါ) ခေတ်ပညာတတ် အမျိုးသမီးတဦး ဖြစ်ပါတယ်လို့ပဲ ဆိုပါရစေ။ အထက်ပါ မှတ်ချက်ပြုချိန်မှာ အဆိုပါ အမျိုးသမီးကြီးဟာ အမျိုးသမီးချင်းကိုယ်ချင်းစာ စိတ်နဲ့ ဒီလို မှတ်ချက်မျိုးပြုမိတယ်ဆိုတာ ယုံမှား သံသယလည်း မရှိပါ။ စာရေးသူကိုယ်တိုင်လည်း အထက်ပါ ရာဇဝတ်မှု သတင်းကို ကြားရတော့ ဝမ်းနည်းစိတ်ပျက် ယူကျုံးမရ ဖြစ်ခဲ့ရပါတယ်။

ဒါပေမယ့် ဒီလို အဖြစ်အပျက်ဟာ စိတ်ခံစားမှု တခုတည်းအရ လူသိရှင်ကြား ပြန်လည် မှတ်ချက်ပြုလို့ ရတဲ့ ကိစ္စမျိုးမဟုတ်ပါ။ ဦးနှောက်မှာ ရှိတဲ့ အသိဥာဏ်နဲ့ ဆင်ခြင်ပြီးမှ ဆုံးဖြတ် ဝေဖန် မှတ်ချက်ပြုမှ ဖြစ်မှာမို့ပါ။ အကြောင်းက ကမ္ဘာ မှာ နိုင်ငံတကာက လူမျိုးစု တွေ နဲ့ ရာဇဝတ်မှု ဆက်နွယ်မှုကို သိပ္ပံနည်းကျ သုတေသနလုပ် စာရင်း တွေ ထုတ်ပြန်လေ့လာကြပေမယ့် လူမျိုး နဲ့ ရာဇဝတ်မှု ရဲ့ ခိုင်မာတဲ့ ဆက်နွယ်မှုကို သက်သေ သာဓက ကောင်းကောင်းပြစရာ မရှိတဲ့ အတွက်ဖြစ်ပါတယ်။ ဘယ်လူမျိုး တမျိုးကတော့ဖြင့် ရာဇဝတ်မှု ကျူးလွန်နိုင်ခြေ ပိုရှိတယ်လို့ တသမတ်တည်း ဧကံ ကောက်ချက်စွဲလို့မရလို့ပါ။ ရာဇဝတ်မှု ကျူးလွန်သူ လူတဦးချင်း ကို လေ့လာရာမှာလည်း ဒီလူဟာ မျိုးရိုးဗီဇ ကြောင့် ဒီလိုရာဇဝတ်မှု ကျူးလွန်ခဲ့တာပါလို့ မုချ ပြောလို့ မရဘဲ သူ့ရဲ့ ပညာ အခြေခံ၊ ဘဝဖြတ်သန်းခဲ့မှု မိသားစု နောက်ခံ အခြေအနေ နဲ့ နေထိုင် ကြီးပြင်း ခဲ့ရာ ပတ်ဝန်းကျင် စတာတွေက ပို အဓိက ကျ တာ တွေ့ရလို့ဖြစ်ပါတယ်။ လူမျိုးစုတွေ လိုက်မှာလည်း ဒီလို တသဘောတည်းဖြစ်တဲ့ အဲဒီ လူမျိုးစု နေထိုင်တဲ့ လူ့အဖွဲ့အစည်းရဲ့ တရားဥပဒေ စိုးမိုးမှု၊ ပညာရည် မြင့်မားမှု၊ လူမှု စီးပွား အခြေအနေတွေကသာ ရာဇဝတ်ဖြစ်နှုန်းနဲ့ ပိုဆက်စပ် နှီးနွယ် အကျိုး၊ အကြောင်းရှာ လို့ ရလို့ဖြစ်ပါတယ်။

ဆိုတော့ကာ အထက်ပါ ရာဇဝတ်မှု ဖြစ်စဉ်မှာ ပါဝင်ခဲ့တဲ့ သူတွေဟာ ရိုဟင်ဂျာ ဖြစ်စေအုံးတော့ ဒါဟာ သူတို့ လူမျိုးအလိုက် သဘောလို့ ယူဆလို့ မရဘဲ လူတဦးချင်းသဘောနဲ့ လူ့အဖွဲ့အစည်းရဲ့ တရားဥပဒေ စိုးမိုးမှု အပါအဝင် အစစ အရာရာ အားနည်းချက်တွေကြောင်လို့သာ ဆိုနိုင်ပါတယ်။ အရင် တနှစ်က ကျောက်ပန်းတောင်း မှာ ဂျပန် ကမ္ဘာလှည့်ခရီးသည် အမျိုးသမီးငယ် ကို မုဒိမ်းကျင့် လူသတ်ခဲ့တဲ့ (ကို) မင်းသိုက် ဟာ မြန်မာ လူမျိုး နဲ့ ဗမာနိုင်ငံ တခုလုံးကို ကိုယ်စားမပြုတဲ့ သဘောပါပဲ။ စာရေးသူ တဦးတည်း အမြင် နဲ့ သက်သေ အထောက်အထား ထပ်ပြရရင်လည်း ဗမာပြည် က နှစ်စဉ် ရာဇဝတ်ဖြစ်ပွားတဲ့ နှုန်းနဲ့ ရိုဟင်ဂျာ တွေ နဲ့ မျိုးနွယ် တူ (သို့) ဘာသာတူ အခြား အိမ်နီးချင်း နဲ့ ကမ္ဘာ့ အနှံ့အပြား နိုင်ငံတွေက ရာဇဝတ် ဖြစ်ပွား နှုန်းတွေကိုသာ နှိုင်းယှဉ်ကြည့်ကြပါလို့ ဆိုချင်ပါတယ်။ အဲဒီလို လေ့လာကြည့်ရင် နိုင်ငံတွေရဲ့ တရားဥပဒေ စိုးမိုးမှု၊ တည်ငြိမ်အေးချမ်းမှု၊ ပညာအရည်အချင်း မြင့်မားမှု၊ လူမှု၊ စီးပွား အချက်တွေ ကြောင့်သာ ရာဇဝတ်ဖြစ်နှုန်း အနည်း/အများ က သက်ဆိုင်တယ်ဆိုတာ ထင်ထင်ရှားရှား တွေ့နိုင်မယ် ဖြစ်ပါတယ်။

နောက်ဆုံးတချက် ထောက်ပြ လိုတာကတော့ ရာဇဝတ်မှု သဘောတွေမှာ လူမျိုး၊ မျိုးရိုး၊ ဗီဇ နဲ့ တိုက်ရိုက် ပတ်သက်တဲ့ အမျိုးအစား သတ်သတ်မှတ်မှတ်ခွဲခြားလို့ မရပေမယ့် လူမျိုး၊ ဘာသာ၊ အသားအရောင် ကွဲပြားမှုကို အခြေခံ တဲ့ အစွဲတွေ၊ မုန်းတီးမူတွေကြောင့် ဖြစ်ပေါ်လေ့ရှိတဲ့ အမုန်းကြောင့်ဖြစ်တဲ့ ရာဇဝတ်မှု (Hate Crime) ကတော့ ဖြစ်လေ့ ဖြစ်ထရှိတဲ့ အကြောင်း၊ သိပ္ပံနည်းကျ ရှာဖွေ ဖော်ထုတ် သတ်မှတ်ထားနိုင်ကြောင်းပဲ ဖြစ်ပါတယ်။

ရခိုင် ဒေသ မွတ်ဆလင် အခြေချမှု(Muslim Settlement in Arakan State)

ဒီခေါင်းစဉ် ထည့်ရေးရခြင်းက (၈၈) မျိုးဆက် ကျောင်းသား  တယောက် သူရဲ့ လူမှုကွန်ရက် စာမျက်နှာ မှာ သူတို့ အဖွဲ့ရဲ့ ရခိုင်ဒေသ လေ့လာရေးခရီးစဉ် မှတ်တမ်းဓာတ်ပုံတွေ တင်ထားတဲ့ အထဲက တွေ့မိတယ် ဓာတ်ပုံ တပုံကြောင့်ပါ။ အဲဓာတ်ပုံမှာ စစ်တွေ ဒေသအတွင်း စားသောက်ဆိုင်တွေမှာ အရင် ကုလား မုန့် မျိုးစုံ လုပ်ပေးနေတဲ့ မွတ်ဆလင် တွေ ခု ဖြစ်ခဲ့တဲ့ အရေးအခင်းကြောင့် ထွက်ပြေးခဲ့ရလို့ မုန့်လုပ်မယ့်သူ မရှိတော့အတွက် ဒေသခံ ရခိုင် လူမှုရေးလုပ်ငန်း အဖွဲ့အစည်းတွေက ဒေသခံ ရခိုင်လူမျိုးတွေကို မုန့်မျိုးစုံ လုပ်နည်း သင်တန်း ပေးမယ် လို့ ကြော်ငြာထားတဲ့ ဆိုင်းဘုတ် ဓာတ်ပုံ ပါ။

ဒေသခံ ရခိုင် လူမျိုးတွေထဲက အခြေခံလူတန်းစားတွေ အလုပ်အကိုင် အခွင့်အရေးတွေ ရဖို့၊ အသက်မွေးဝမ်းကြောင်း ပညာတွေ တတ်ကျွမ်းဖို့ လိုပါတယ်။ နိုင်ငံရေး၊ လူမှုရေး အဖွဲ့အစည်းတွေ နဲ့ ဒေသခံ အစိုးရက ကြိုးစားဖော်ဆောင် ပေးရမှာ ဖြစ်ပါတယ်။ အလားတူပဲ အဲ့ဒေသတွေမှာ ရာစုနှစ်တွေချီ အခြေချနေထိုင်နေတဲ့ ဗမာနိုင်ငံသား မွတ်ဆလင် တွေမှာလည်း ဒီအခွင့်အရေးမျိုး ခံစား ရရှိရပါမယ်။ တဘက်ကို ထမင်းအိုးတည်ပေးဖို့ကြိုးစားချင်လို့ အခြားတဘက်ကို ထမင်းအိုးခွဲတာမျိုး မဖြစ်ရအောင် သတိပြု ရှောင်ကြဉ်ရပါမယ်။

ဆိုခဲ့တဲ့ ဓာတ်ပုံ က စာရေးသူ ကို အတွေးတွေ အများကြီး ဖြစ်ပေါ်စေခဲ့တဲ့အတွက် မွတ်ဆလင် တွေ ရခိုင် ဒေသ မှာ လာရောက် အခြေချဖြစ်ပုံ သမိုင်းအချက်အလက်တွေထဲက အားလုံးလက်ခံနိုင်မယ့် အငြင်းပွားဖွယ်ရာနည်း အချက်တချို့ကို ချပြပါမယ်။

ရခိုင်/မြန်မာ သမိုင်း ပညာရှင် များလည်း လက်ခံနိုင်တဲ့ သဘောအရဆိုရရင် ရခိုင်ဒေသမှ မွတ်ဆလင် တွေကို လေးမျိုး ခွဲနိုင်ပါတယ်။

(၁) အခု အငြင်းပွားဖွယ်ဖြစ်နေတဲ့ စစ်တကောင်း ဘင်္ဂါလီ အဆက် မေယူနယ်ခြားဒေသအခြေစိုက် ရိုဟင်ဂျာက မွတ်ဆလင် အုပ်စုတစု ဖြစ်ပါတယ်။

(စကားချပ် - စာရေးသူ လက်လှမ်းမီ နားလည် သလောက် အခု ရခိုင်/မြန်မာ သမိုင်း ပညာရှင် များ ရိုဟင်ဂျာ ကိစ္စ အငြင်းပွားနေတာဟာ လူမျိုးနာမည် နဲ့ ဌာနေတိုင်းရင်းသား မဟုတ်ဘူးဆိုတာသာ ဖြစ်ပါတယ်။ ဥပေဒ အရ တရားဝင် နိုင်ငံသားဖြစ်ခွင့် ရှိသူတွေ နိုင်ငံသား ဖြစ်ခြင်း၊ ပေးခြင်း၊ နိုင်ငံသား အခွင့်အရေး အပြည့်အဝ ရခြင်းကို ငြင်းနေကြတာ၊ ကန့်ကွက်နေကြ မဟုတ်ဘူးလို့ နားလည်ထားပါတယ်။)

 (၂) ရခိုင် ဘုရင် မင်းစောမွန် (King Narameikhla) (၁၄၀၄-၁၄၃၄ CE) က မြန်မာ (ဗမာ) ဘုရင်လက်အောင်ကျရောက်နေတဲ့ ရခိုင်နိုင်ငံကို  ဘင်ဂေါလ် နယ် ဘင်္ဂါလီ ဆူလတန် ဘုရင် (Sultanate of Bengal) အကူအညီ နဲ့ (၁၄၃၀ CE) မှာ ပြန်လည် သိမ်းပိုက်ပြီး ရခိုင်ဘုရင့်နိုင်ငံတော် မြောက်ဦး မင်းဆက် (၁၄၃၀-၁၇၈၄ CE) ကို စတင် တည်ထောင်ခဲ့ပါတယ်။ အဲ့လို ပြန်လည် မထူထောင်နိုင်သေးခင် (၂၄) နှစ်ကြာ ဘင်ဂေါလ် နယ် ဆူလတန် ဘုရင် ဆီမှာ အဝေးရောက် ခိုလှုံ (Exile) နေခဲ့ရပါတယ်။ ဆူလတန် အကူအညီ နဲ့ ရခိုင်နန်းဆက် ပြန်ထူထောင်ပြီးတဲ့ အချိန်မှာ ရခိုင်နိုင်ငံဟာ ဘင်ဂေါလ် နယ် ဆူလတန် ဘုရင် လက်အောင်ခံ မိတ်ဆွေ ပဏ္ဍာ နိုင်ငံ အဖြစ်ဆက်တည်ရှိနေခဲ့ရတဲ့အတွက် ရခိုင်ဘုရင်တွေဟာ ဗုဒ္ဓ ဘာသာကိုးကွယ်ပေမယ့် အစ္စလာမ်မစ် ဘွဲ့  တွေခံယူကြပြီး ဘင်ဂေါလ် နယ်သုံး အစ္စလာမ်မစ် ဒင်္ဂါးတွေကိုလည်း ငွေကြေးအနေနဲ့ တရားဝင် သုံးစွဲခဲ့ကြပါတယ်။ ဒီလို အနေအထားဟာ ဘင်ဂေါလ် နယ် ဆူလတန် သြဇာခံ လက်အောင်က လုံးဝလွတ်မြောက်တဲ့ (၁၅၃၁ CE) အထိလို့ ဆိုနိုင်ပါတယ်။ အဲ့နောက်ပိုင်းလည်း အစဉ်အလာအရ ဗုဒ္ဓ ဘာသာဝင် ရခိုင်ဘုရင်တွေဟာ  အစ္စလာမ်မစ် ဘွဲ့  နာမည် ခံယူတာတွေ ဆက်ရှိနေပါသေးတယ်။ မြောက်ဦးခေတ်မှာ မင်းစောမွန် ရခိုင်ကို ပြန်သိမ်းပိုက်နိုင်ခဲ့တဲ့ အချိန်ကစလို့ အတူပါလာခဲ့တဲ့ မွတ်ဆလင်တွေဟာ ဘုရင့်အုပ်ချုပ်ရေး အဖွဲ့အစည်းတွေမှာ အစဉ်အဆက် နေရာကောင်း အများအပြား ရလာခဲ့ကြပါတယ်။

ဆိုခဲ့တဲ့ မြောက်ဦးမင်းဆက် စတင်တည်ထောင်သူ မင်းစောမွန် ရခိုင် ကို ပြန်လည် သိမ်းပိုက်ရာမှာ ပါဝင် အမှုတော် ထမ်းခဲ့တဲ့ မွတ်ဆလင်စစ်သည်တွေရဲ့ အဆက် မွတ်ဆလင် အုပ်စု က ခု ရခိုင်ပြည်နယ်မှာ နေထိုင်နေတဲ့ ဒုတိယ အမျိုးအစား တမျိုးဖြစ်ပါတယ်။ သူတို့က လက်ရှိ ရမ်းဗြဲ ကျွန်း(Ramree Island) မှာ အဓိက နေထိုင်ကြပါတယ်။ သူတို့ဟာ ရခိုင် မျိုးနွယ် အုပ်စု ထဲမှာလည်း ထည့်သွင်းဖော်ပြခံရ ပြီး ဌာနေ တိုင်းရင်းသားလည်း အသိအမှတ်ပြုခံရပြီးဖြစ်တဲ့ ကမန်လူမျိုးတွေပါ။

[ စကားချပ် - အစ္စလာမ် ဘာသာဝင် ကမန်လူမျိုးတွေရဲ့ သမိုင်းကို (ညွှန်း-၈) တွင် ဆက်လေ့လာနိုင်ပါတယ်။]

(၃) ရခိုင်ဘုရင့်နိုင်ငံတော် မြောက်ဦး မင်းဆက် (၁၄၃၀-၁၇၈၄ CE) အတွင်းမှာပါ လာရောက် အခြေချနေထိုင်လာခဲ့တဲ့ မွတ်ဆလင် အုပ်စု -- သူတို့က လက်ရှိ မြောက်ဦး နဲ့ ကျောက်တော် မှာ အများစု နေထိုင်နေကြပါတယ်။

(၄) မြန်မာ (ဗမာ) ဘုရင် ရခိုင်နိုင်ငံကို နောက်ထပ် နယ်ချဲ့သိမ်းပိုက်ခဲ့တဲ့ (၁၇၈၅ CE) မှာ အတူပါလာတဲ့ ဗမာဘုရင် သစ္စာတော်ခံ စစ်သည်တွေ ဖြစ်တဲ့ အဲ့ခေတ် မြန်မာ (ဗမာ) နိုင်ငံအလယ်ပိုင်း မြေဒူး နယ်က မွတ်ဆလင် အုပ်စုတစု -- သူတို့က အခု စစ်တွေ ခရိုင် (Sandoway District) မှာ အခြေချနေထိုင်ကြပါတယ်။

တလင်တမယား စနစ် (Monogamy)

ရိုဟင်ဂျာ ပြဿနာကို အခု လူအများ ပြောကြရင် မယား အများကြီး ယူတဲ့ ကိစ္စ ပါလာတတ်တဲ့ အတွက် ဒီခေါင်းစဉ်ကို ထည့်ရေးခြင်းဖြစ်ပါတယ်။ Monogamy နဲ့ သူနဲ့ ဆက်စပ်တဲ့ Polygamy သဘောမှာ ဆွေးနွေးစရာ အချက်တွေ အများကြီး ဖြစ်တဲ့ အတွက် သီးသန့်ဆောင်းပါး အနေနဲ့ ရေးမှသာ ပြည့်စုံ နိုင်မှာပါ။ အောက်မှာ တင်ပြ ထားတာက အကျဉ်းချုံးပါ။

တလင်တမယားစနစ် မဟုတ်ကြတဲ့ (Polygamy) သဘောဟာ ရိုဟင်ဂျာတွေ၊ မွတ်စလင်တွေ ချည်းပဲ အစဉ်အဆက် ကျင့်သုံးခဲ့တာ မဟုတ်ပါ။ ကမ္ဘာ့ အဝှမ်းက ရှေးဟောင်း လူ့အဖွဲ့အစည်း (လူမျိုး/ဘာသာစုံ) အတော်တော်များများမှာ Polygamy ရဲ့ ပုံစံနှစ်မျိုး ဖြစ်တဲ့ Polygyny (မယားပြိုင်) နဲ့ Polyandry (လင်ပြိုင်) သဘော ရှိခဲ့ကြပါတယ်။ မွတ်ဆလင် ကမ္ဘာက လက်ရှိ ခေတ်သစ်မှာပါ ရှေးရိုးစွဲတဲ့ အလေ့အထတွေကို ကျင့်သုံးဆဲဖြစ်နေတော့ Polygamy ထဲက Polygyny (မယားပြိုင်) ကို လူမှု ထုံးတမ်း အရ နဲ့ တရားဥပဒေ အရ အများစု လက်ခံထားကြပါတယ်။ လက်ခံခြင်းသာ ဖြစ်ပါတယ်။ အိမ်ထောင်တိုင်း လိုက်ကျင့်သုံးတာ မဟုတ်ပါ။ ယေဘုယျ သဘောအနေနဲ့ မွတ်ဆလင် ကမ္ဘာမှာ အိမ်ထောင်ပြုမှုတွေရဲ့ (၁-၃ %) ရာခိုင်နှုန်း မျှကသာ မယားပြိုင်ယူထားတဲ့ အိမ်ထောင်ရေး (Polygamous Marriages) တွေ ဖြစ်ပါတယ်။ မွတ်ဆလင် အများစု ရှိတဲ့ တူရကီ၊ တူနီးရှား၊ အဇာဘိုင်ဂျန်၊ ဘော့စနီးယား-ဟာဇီဂိုးဗီးနား နိုင်ငံတွေမှာ ဆို တရားဥပဒေ အရ တလင်တမယား စနစ် သာ ကျင့်သုံးပြီး Polygamy ကို တားမြစ်ထားပါတယ်။ ဘာသာရေး ထုံးတမ်းစဉ်လာတွေ လွှမ်းမိုးမှုကင်းတဲ့ ဆီကူလာ အာရပ် တိုင်းပြည် တခု ဖြစ်တဲ့ လယ်ဘနွန် ဆိုလည်း အလားတူပါပဲ။

တလင်တမယား စနစ် (Monogamy) တရားဥပဒေ သဘော အရ မဖြစ်တာ၊ တနည်းအားဖြင့် Polygamy ကို ဥပဒေ အရ ခွင့်ပြုထားတာကလည်း မွတ်ဆလင် နိုင်ငံတွေ ချည်းပဲလည်း မဟုတ်ပါ။ ဥပမာ ဆို စာရေးသူ တို့ ဗမာပြည်မှာလည်း Polyandry (လင်ပြိုင်) ထားမှုကိုသာ တရားဥပဒေ အရ ကန့်သတ်ထားပြီး Polygyny (မယားပြိုင်) ထားမှုကို ဥပဒေ အရ ခွင့်ပြုထားပါတယ်။ (စကားချပ် - ဗမာ့ လူအဖွဲ့အစည်းမှာ လူမှုထုံးတမ်း အရတော့ Polygamy (မယားပြိုင်/လင်ပြိုင်) ကို ရှုံ့ချပါတယ်။)

ဒါကြောင့် ရိုဟင်ဂျာ နဲ့ Polygamy ကို တွဲစဉ်းစားဖို့ထက် တိုင်းပြည်မှာ အားလုံးတပြေးညီ ဖြစ်အောင်၊ အမျိုးသမီး အခွင့်အရေး အပြည့်အဝရအောင် Polygyny (မယားပြိုင်) တရားဥပဒေ အရ ယူထားနိုင်မှု ကို ပြင်ဖို့ ဥပဒေပြု လွှတ်တော် အမတ်တွေကို ထောက်ပြပြီး ဥပဒေပြဋ္ဌာန်းပေးဖို့ တောင်းဆိုရမှာ ဖြစ်ပါတယ်။ ဒီလို လုပ်နိုင်ရင် တပါတည်း နိုင်ငံအတွင်းရှိ ဘယ်ဘာသာဝင်မဆို နိုင်ငံမှာရှိတဲ့ တရား ဥပဒေ အတိုင်း လိုက်နာ ကျင့်ကြံ ရမှာ ဖြစ်တဲ့ အတွက် Polygyny (မယားပြိုင်) ယူထားနိုင်မှုက ပပျောက်သွားမှာ ဖြစ်ပါတယ်။ နိုင်ငံတကာ ဒီမိုကရက်တစ် နိုင်ငံတွေမှာလည်း ဒီလို ဥပဒေ သဘောနဲ့ တားမြစ်ထားတာပါပဲ။ တပါတည်း မိမိ လူ့အဖွဲ့အစည်းမှာ၊ အထူးသဖြင့် မွတ်ဆလင် အသိုင်းအဝန်းမှာ တလင်တမယား စနစ် (Monogamy) ရဲ့ ကောင်းကျိုး တွေ ကို ပညာပေး ရမှာ ဖြစ်ပါတယ်။

ဆက်စပ်တဲ့ ကိစ္စတခုဖြစ်တဲ့ အသက်အရွယ်မပြည့်သေးတဲ့ ကလေးသူငယ် လက်ထက်မှု (Child Marriage) ဟာလည်း Polygamy လိုပဲ ရှေးဟောင်းခေတ် လူ့အဖွဲ့အစည်းအားလုံး နဲ့ လက်ရှိခေတ် ရှေးရိုးစွဲ လူ့အသိုင်းအဝန်းတွေမှာ ရှင်သန်နေတဲ့ ဓလေ့ တခုပဲ ဖြစ်ပါတယ်။ ဒါဟာလည်း ကမ္ဘာနဲ့ အဝှမ်း မှာ လက်ထပ်နိုင်တဲ့ အသက် ကန့်သတ်ချက် တရားဥပဒေ ထုတ်ပြန်ပြီး ကန့်သတ် ထားပါတယ်။ ဒီလို တရားဝင် အိမ်ထောင်ပြုနိုင်တဲ့ အသက် (Legal Marriage Age) နဲ့ လိင် ဆက်ဆံ နိုင်တဲ့ အသက် (Legal Sex Age) ကို ဗမာပြည်မှာလည်း သတ်မှတ် ပြဋ္ဌာန်းပြီးဖြစ်တဲ့ အတွက် စိုးရိမ်စရာ မလိုတဲ့ အခြေအနေ ဖြစ်ပါတယ်။

ကလေးမွေးဖွားမှုနှုန်း (Birth Rate)

ရိုဟင်ဂျာ တွေ အကြား ကလေးမွေးဖွားနှုန်းမြင့်မားနေမှုကိုလည်း လူတွေပြောလေ့ရှိလို့ ဒီခေါင်းစဉ်ကို ထည့်ရေးခြင်းဖြစ်ပါတယ်။

မှန်ပါတယ်..။ ရိုဟင်ဂျာတွေဟာ ဘာသာရေး နဲ့ ဆက်နွယ်တဲ့ ရှေးရိုးစွဲ အယူအဆအရ ခေတ်မီ ပဋိသန္ဓေ တားဆီးရေး မှာ အားနည်းကြပါတယ်။ တကယ်တော့ အစ္စလာမ်ဘာသာဝင်တွေ ယုံကြည်တဲ့ ဘုရားသခင်ရဲ့ နှုတ်ကပါတ်တော် အရ စီရင် ရေးသားခဲ့တယ်လို့ဆိုတဲ့ ကုရ်အာန်ကျမ်းမှာ ပဋိသန္ဓေတားခြင်း (Contraception) ဟာ အပြစ် (Sin) ဖြစ်တယ်လို့ တိတိကျကျ ဆိုထားတာမရှိပါ။ အခြားဘာသာ အယူဝါဒတွေမှာလည်း ဖြစ်လေ့ ဖြစ်ထ ရှိတဲ့ ဘာသာတရား အဆုံးအမ ကို အဓိပ္ပာယ် ကောက်ယူ ကျင့်သုံးပုံတွေမှာ ရှေးရိုးစွဲ နဲ့ ခေတ်မီ သူတွေအကြား ဝိဝါဒကွဲနေတဲ့ သဘောသာဖြစ်ပါတယ်။

ယေဘုယျ သဘော အနေနဲ့ ကမ္ဘာ အနှံ့က မွတ်ဆလင် နိုင်ငံတွေဟာ သူတို့ အများစု အသိအမှတ်ပြု လက်ခံတဲ့ အစ္စလာမ် အယူအဆ ပညာရှင်ကြီးတွေ ဆွေးနွေးညှိနှိုင်း သဘောထားထုတ်ဖော် လမ်းညွှန်ချက်အရ ခေတ်မီ ပဋိသန္ဓေတားခြင်း နည်းလမ်းများကို အချက် (၃) ချက် ကန့်သတ်ပြီး ခွင့်ပြုထားပါတယ်။  ကန့်သတ်ချက်တွေဟာလည်း ဖြစ်သင့်တဲ့သဘောတွေဖြစ်တဲ့ (၁) ပဋိသန္ဓေတားခြင်းဟာ လင်မယား နှစ်ယောက်စလုံးရဲ့ သဘော ဆန္ဒ ဖြစ်ရမယ်။ (၂) ပဋိသန္ဓေတားတဲ့ နည်းလမ်းကြောင့် တသက်လုံး မျိုးမပွားနိုင် မြုံသွာတာမျိုး မဖြစ်စေရဘူး။ (၃) ပဋိသန္ဓေ တားဆီးခြင်းကြောင့် လူ့ ခန္ဓာကိုယ်ကို အသက် အန္တရာယ် ထိ ခိုက်မှု မရှိစေရဘူး၊.. ဆိုတဲ့ အချက်တွေဖြစ်ပါတယ်။

အရင် ခေတ် စစ်အစိုးရ အဆက်ဆက် တရားမဝင် ကျင့်သုံးခဲ့တဲ့ ရိုဟင်ဂျာ တွေကို တရားဝင် အိမ်ထောင်ပြုခွင့် မပေးဘဲ ထိန်းချုပ်တဲ့ နည်းဟာ လူသားရဲ့ မွေးရာပါ အခွင့်အရေးကို ပြင်းပြင်းထန်ထန် ဖိနှိပ်ချုပ်ခြယ်ရာ ရောက်ပြီ်လူသားဖြစ်တည်မှုကို ဆန့်ကျင်တဲ့ ရာဇဝတ်မှု သာ ဖြစ်ပါတယ်။ ဒီလို ရာဇဝတ်မှုပုဒ်မ အကြီးကြီးနဲ့ နာမည်ဆိုးတာသာ အဖတ်တင်ခဲ့ပြီး တကယ် သူတို့ရဲ့ ကလေးမွေးဖွားနှုန်းကို ထိန်းချုပ်နိုင်သလားဆိုတာလည်း ထိရောက်အောင် မထိန်းချုပ်နိုင်ခဲ့ပါ။ သူတို့ နေနေတဲ့ ဒေသ ဗမာပြည်ထဲမှာ အိမ်ထောင်ပြုခွင့်၊ မီးဖွားခွင့် မရတော့ ခိုးပြီး လက်ထပ်ပေါင်းသင်း၊ ကိုယ်ဝန်ရတဲ့အချိန် အာဏာပိုင်တွေသိတော့ ဘင်္ဂလားဒေ့ရှ် ဘက် ထွက်ပြေး၊ ဟိုက ဒုက္ခသည်စခန်းတွေ ဆက်နေထိုင်၊ ကလေးမွေးရင်းနဲ့ လူဦးရေ က များလာတာပဲ ဖြစ်ပါတယ်။ ဒီလူတွေဟာ မိမိနိုင်ငံသားတွေဖြစ်တဲ့ အတွက် တချိန်မဟုတ် တချိန် ပြန်လက်ခံရမှာသာ ဖြစ်တဲ့အတွက် နောက်ဆုံး မိမိ နိုင်ငံမှာပဲ လူဦးရေးမတန်တဆ တိုးပွားလာတာသာ အဖတ်တင်ကျန်ရစ်မှာ ဖြစ်ပါတယ်။

ဒါကြောင့် ရိုဟင်ဂျာတွေရဲ့ လူ့အဖွဲ့အစည်းမှာ အခြား ကမ္ဘာ့အနှံ့အပြားက ဆင်းရဲတဲ့ မွတ်ဆလင် တိုင်းပြည်တွေမှာ ကျင့်သုံးတဲ့ လူ့သိက္ခာ လူ့ကျင့်ဝတ်နဲ့အညီ ဆောင်ရွက်တဲ့ ကလေးမွေးဖွားနှုန်း လျှော့ချရေး အစီအစဉ်တွေဖြစ်တဲ့ ခေတ်မီတဲ့ သားဆက်ခြား ပညာပေးရေး၊ လိင် ပညာပေးရေး တွေကို ဖော်ဆာင်၊ ပဋိသန္ဓေတားဆီးရေး နည်းနာ တွေကို သင်ကြားပြသ ပညာပေးရင်းနဲ့ ဘာသာရေးအရလည်း တရားဝင် ခွင့်ပြုထားတဲ့ အကြောင်း ဟောပြောပွဲတွေ၊ ဆွေးနွေးပွဲ တွေ လုပ်ပေးခြင်းဖြင့် ကလေးမွေးဖွားနှုန်းကို ထိန်းနိုင်ပါတယ်။

ဗမာနိုင်ငံသား မွတ်ဆလင် များ (Burmese-Muslim)

ယခု ဗမာ့လူ့အဖွဲ့အစည်းမှာ ဖြစ်ပေါ်နေတဲ့ လူမျိုး/ဘာသာ မတူသူ အုပ်စုတွေ အကြား တိုးပွားနေတဲ့ သံသယ တွေ အမုန်းတွေကို ပပျောက်ဖို့က လက်ရှိ ဗမာပြည်မှာနေထိုင်နေတဲ့ ဗမာနိုင်ငံသား မွတ်ဆလင် များရဲ့ တုန့်ပြန်ဆောင်ရွက်ပုံ နဲ့ ခံယူချက် မှန်ဖို့လည်း လိုပါတယ်။ ရှေးဘိုးဘွားအဆက်က ဘယ်လူမျိုးက ဆင်းသက်လာခဲ့ပစေ လက်ရှိ ဗမာနိုင်ငံသား အနေနဲ့ နေထိုင်နေတဲ့ မွတ်ဆလင်များ (ရိုဟင်ဂျာ၊ အခြား ရိုဟင်ဂျာ မဟုတ်တဲ့ အိန္ဒိယ၊ အာဖဂန်၊ အာရပ်၊ ပါရှန် အနွယ်အားလုံး) ဟာ နိုင်ငံရဲ့  အမျိုးသားရေး စိတ်ဓာတ် ကို မိမိကိုယ်၊ စိတ်၊ နှလုံး မှာ တိုးပွားရှင်သန်အောင် ကျင့်ကြံအားထုတ်ဖို့ လိုပါတယ်။ ဒီ အမျိုးသားရေးဟာ  အမျိုး/ဘာသာ/သာသနာ ဆိုတဲ့ ကျဉ်းမြောင်းတဲ့ လူမျိုးစွဲ၊ ဘာသာစွဲ အပေါ်မှာ အခြေမခံဘဲ ကျယ်ပြန့်တဲ့ နိုင်ငံသား အားလုံး၊ လူမျိုး/ဘာသာ အားလုံး၊ တိုင်းရင်းသား အားလုံး သဘောဆောင်တဲ့ နိုင်ငံချစ်စိတ်၊ တိုင်းပြည် ချစ်စိတ် အပေါ် အခြေခံ မြင်နိုင်ဖို့ လိုပါတယ်။ ဒီလို မြင်နိုင်ဖို့၊ ဒီလို အားလုံးကို ကိုယ်စားပြုတဲ့ အမျိုးသားရေး၊ တနည်းအားဖြင့် နိုင်ငံ/တိုင်းပြည် ချစ်စိတ် ရေးသဘောကို မြန်မာ အပါအဝင် အခြား တိုင်းရင်းသားအားလုံးနဲ့ ဗမာနိုင်ငံသား၊ ဗမာနိုင်ငံဖွား တရုပ်တွေမှာလည်း မြင်နိုင်၊ ခံယူကျင့်ကြံနိုင်ဖို့ လိုပါတယ်။

နောက်တခုက ဗမာ-မွတ်ဆလင် အသိုင်းအဝန်းအနေနဲ့ အခြား မွတ်ဆလင် မဟုတ်သူတွေကြားမှာ ပေါ်ပေါက်နေတဲ့ အထင်မြင်လွဲမှား သံသယ ရှိနေမှုတွေ၊ မသိနားမလည်လို့ အကြမ်းဖက်ဝါဒ နဲ့ ငြိမ်းချမ်းတဲ့ အစ္စလာမ် ဝါဒ ကို ရောထွေး အထင်မှား၊ အမြင်မှားဖြစ်ကာ အစ္စလာမ် အကြောက် ရောဂါ (Islamophobia) ဝင်နေသူများကို အပြစ်လို့ တထစ်ချ မသတ်မှတ်၊ မမြင်ဘဲ အစ္စလာမ် ဘာသာ နဲ့ အကြမ်းဖက်မှု မပတ်သက်တဲ့ အကြောင်းကို ရှင်းပြတဲ့ ဟောပြောပွဲတွေ၊ ဘာသာပေါင်းစုံ ချစ်ကြည်ရင်းနှီးမှု အခြေခံ ဗဟုသုတ၊ အမြင် ဖလှယ်ပွဲတွေ၊ ကို အင်တိုက်အားတိုက် လုပ်ကိုင်ခွင့်ရဖို့ လူမှုရေး၊ နိုင်ငံရေး အဖွဲ့အစည်းတွေနဲ့ တိုင်ပင်ဆောင်ရွက်သင့်ပါတယ်။

နောက်တချက်က အစ္စလာမ် ဘာသာရေး သင်တန်းကျောင်းတွေမှာ ရှေးရိုးစွဲ လူတစု နဲ့ ဘာသာရေးခေါင်းဆောင် တချို့က  ပြင်းထန်တဲ့ ရှေးရိုးစွဲ အယူဝါဒ တွေ မသင်ကြားနိုင်စေဖို့၊ အကြမ်းဖက်ဝါဒ တိုးပွားစေတဲ့ သဘောတွေ မဟောပြောနိုင်စေဖို့ကိုလည်း ဗမာ-မွတ်ဆလင် အဖွဲ့အစည်းတွေနဲ့ ခေါင်းဆောင်တွေက ကြပ်ကြပ်မတ်မတ် ဆောင်ရွက်ရမှာ ဖြစ်ပါတယ်။ အစိုးရ ကိုယ်စားလှယ် အပါအဝင် ဘာသာပေါင်းစုံ ပါဝင်တဲ့ လူမှုရေး အဖွဲ့အစည်းတွေကို ဘာသာရေး သင်တန်းကျောင်းတွေကို လေ့လာဖို့ ဖိတ်ခေါ်ပြီး ခေတ်မီ လွတ်လပ်၊ မျှတ၊ ဒီမိုကရေစီ စံနှုန်းတွေနဲ့ အညီ စစ်မှန်တဲ့ ဘာသာရေး စာပေ သက်သက် သင်ကြားနေတာသာဖြစ်ကြောင်း၊ အစ္စလာမ် သာသနာ ကို အဓမ္မ သဘောနဲ့ ဖြန့်ဖြူးဖို့ (Islamisation) သင်ကြားပေနေတာ မဟုတ်ကြောင်း၊ ရှေးရိုးစွဲ ပြင်းထန်တဲ့ သဘောတွေ၊ အကြမ်းဖက်ဝါဒတရားတွေ လှုံ့ဆော်နေတာ မဟုတ်ကြောင်း သက်သက်ပြုနိုင်ဖို့လိုပါတယ်။ နိုင်ငံတကာက ဒီမိုကရေစီ နိုင်ငံကြီးတွေမှာလည်း စာရေးသူ ထောက်ပြသလို သက်ဆိုင်ရာ မွတ်ဆလင် အသိုင်းအဝန်း (Muslim Community) နဲ့ အစိုးရ၊ လူမှု အဖွဲ့အစည်းတွေ ပူပေါင်းဆောင်ရွက်ရင်းနဲ့ လူ့အဖွဲ့အစည်းမှာ ဘာသာစွဲပြင်းထန်မှုတွေနည်းအောင်၊ ဘာသာရေး အမည်ခံ အစွန်းရောက်၊ အကြမ်းဖက်သမားတွေ ဝင်ရောက် စိမ့်ဝင် လှုပ်ရှားခွင့်မရအောင် ကာကွယ်တာဆီး နေတာပဲ ဖြစ်ပါတယ်။

အထက်မှာ တင်ပြခဲ့တာတွေဟာ စာရေးသူ လေ့လာ သုံးသပ်မိတဲ့ လက်ရှိ ဖြစ်ပေါ်နေတဲ့ ရခိုင်ဒေသ မတည်မငြိမ်ဖြစ်မှုတွေရဲ့ အဓိက အကြောင်းရင်းတခုဖြစ်တဲ့ ရိုဟင်ဂျာ ပြဿနာ နဲ့ ဆက်စပ်တဲ့ အကြောင်းအရာတွေအပေါ် စာရေးသူ တဦးတည်းရဲ့ အမြင်၊ သဘောထား နဲ့ အကြံပြုချက်တွေ ဖြစ်ပါတယ်။

နိဂုံး (Conclusion)

နိဂုံးချုပ်ရရင် စာရေးသူတို့ရဲ့ ဗမာ့လူ့အဖွဲ့အစည်းဟာ ဆယ်စုနှစ်ပေါင်းများစွာ အမှောင်ထုဖုံးလွှမ်းနေတဲ့ အနေအထား အချိန်ကနေ အလင်းကို ခုမှ စ ဝင်လာတာနဲ့ သဘောတရားချင်း တူနေပါတယ်။ အလင်းကို ဝင်ခါစ အချိန်မှာ မျက်စိတွေ ကျိန်းနိုင်ပါတယ်။ အလင်းဒဏ်က လူအများစုရဲ့ အမြင်တွေကို စူးရှ ထိခိုက် စိတ်ကသိကအောင့် ဖြစ်စေနိုင်ပါတယ်။ အရာရာဟာ အရိုးစွဲ နေသားတကျ ဖြစ်နေတဲ့ သမာရိုးကျ စိတ်၊ စဉ်းစားပုံ၊ အတွေးအခေါ် တွေ နဲ့ အံမဝင်ခွင် မကျ ဖြစ်နေနိုင်ပါတယ်။ ဒီလို အခြေအနေကို မလိုလားအပ်တဲ့ သဘော အနေနဲ့ မရှုမြင်ဘဲ အကျိုးသင့်၊ အကြောင်းသင့် စဉ်းစားဆင်ခြင်တွေးခေါ်မျှော်မြင်ပြီး လက်ခံသင့်တဲ့ အရာတွေကို လိုက်လျောညီထွေ ပြုပြင် ပြောင်းလဲချင်တဲ့ စိတ်နဲ့အတူ လက်ခံနိုင်ဖို့ ကြိုးစားရမှာ ဖြစ်ပါတယ်။ “အမျိုးပျောက်မှာစိုးကြောက်လှ ပါတယ်” ဆိုတဲ့ ပုဂ္ဂိုလ်များရဲ့ ခံစားချက်ကိုလည်း နားလည်လက်ခံနိုင်ပေမယ့် ခေတ်သစ် ကမ္ဘာရဲ့ စဉ်ဆက်မပြတ် ဖြစ်ပေါ်တိုးတက်ပြောင်းလဲမှုနေတွေနဲ့ အလိုက်သင့် ပြုပြင်ပြောင်းလဲ နိုင်စွမ်း မရှိဘဲ ကြိုတင် ကောက်ချက်၊ အစွဲ၊ မယုံကြည်မှု၊ သံသယ၊ ရန်ငြိုး၊ အမုန်း၊ စစ်ပွဲ တွေ နဲ့သာ ဒီလို အခြေအနေသစ်နဲ့ သဘောတွေကို တုန့်ပြန်ခဲ့ကြရင် ဖြစ်လာနိုင်တဲ့ လူသားမျိုးနွယ်ပျောက်ဆုံးမှုက ပိုလို့ အရေးကြီးပါတယ် လို့ပဲ ဆိုပါရစေ ခင်ဗျာ။

လူရဲ့ အပေါ်ယံ အရေပြား အရောင် အသွေးနဲ့ သွင်ပြင် ကွဲပြား ခြားနားမှုတွေ နဲ့ နောက်ခံ အမျိုး၊ ဘာသာ၊ လူမှု့ အလွှာ ကို မကြည့်ဘဲ လူတဦးချင်းရဲ့ အကျင့်စာရိတ္တ နဲ့ အရည်အချင်းရှိမှုကိုသာ  အဓိက စဉ်းစားပြီး ရှုမြင်ဆင်ခြင်သုံးသပ် နေရာပေးတတ်တဲ့ လွတ်လပ်၊ မျှတ၊ ဝါဒဖြူစင်တဲ့ အနာဂတ် ဗမာပြည်ရဲ့ ရခိုင် ရိုးမ၊ ပဲခူး ရိုးမ၊ ရှမ်းရိုးမ တောင်တန်းကြီးတွေရဲ့ကြား ဧရာဝတီ မြစ်ကမ်းပါးမှာ လူအများစု မြန်မာများ၊ တိုင်းရင်းသား ရခိုင် အပါအဝင် အခြား လူနည်းစု တိုင်းရင်းသားများ နဲ့ လူမျိုးကွဲ နိုင်ငံသား တရုတ်၊ အိန္ဒိယ အနွယ်တွေရဲ့ သားသမီးတွေဟာ လူမျိုး/ဘာသာ မခွဲ သွေးစည်းချစ်ခင်ရင်းနှီးမှု ညီအကို၊ မောင်နှမ အရင်း စိတ်ဓာတ် ကောက်ပဲသီးနှံကို အရင်းတည်တဲ့ ငြိမ်းချမ်းရေးညစာကို အတူတကွ ချိုမြိန်စွာ သုံးဆောင်နိုင်ခွင့် အမြန်ဆုံး ရပါစေလို့ ဆန္ဒပြုလိုက်ပါတယ်။

ငြိမ်းချမ်းအေး

၁၈ ၊ သြဂုတ် ၊ ၂၀၁၂

ရည်ညွှန်း။         ။

1. ငြိမ်းချမ်းအေး၊ “ယဉ်ကျေးတဲ့ လူ့အဖွဲ့အစည်းအတွက် ဆင်ခြင်စရာ”http://moemaka.com/?p=24166
2. အောင်ထူး (ရှေ့နေ)၊ “ရိုဟင်ဂျာ ပြဿနာ၊ လူ့အခွင့်အရေး နှင့် အမျိုးသား ဂုဏ်သိက္ခာ”၊ ခေတ်မောင်း စာစောင်၊ အတွဲ (၁)၊ အမှတ် (၃)၊ ဇူလိုင်လ ၁၇ရက် ၂၀၁၂ ခုနှစ်။
3.့ ဘီဘီစီ မြန်မာ့အရေး ကမ္ဘာ့အရေးဆွေးနွေးခန်း၊ ဇူလိုင်လ ၂၀ ရက် ၂၀၁၂ ခုနှစ်။
4. The Universal Declaration of Human Rights: http://www.un.org/en/documents/udhr/
5. International Covenant on Civil and Political Rights: http://www2.ohchr.org/english/law/ccpr.htm
6. International Covenant on the Rights of the Child: http://www2.ohchr.org/english/law/crc.htm
7. Rohingya refugees return to Burma: http://news.bbc.co.uk/2/hi/south_asia/221775.stm
8. မောင်ဆန္ဒ(လယ်ဝေး)၊ ကမန်မျိုးနွယ်စု သမိုင်း၊ နိုင်ငံဂုဏ်ရည်စာပေတိုက်၊ ၂၀၀၅ ခုနှစ်၊ ဒီဇင်ဘာလ။

ကိုးကား။           ။

• Dr. Francis Buchanan-Hamilton, M.D., “A Comparative Vocabulary of Some of the Languages Spoken in the Burma Empire”, Asiatic Researches 5 (1799), Page 219-240.  Republished: University of London (UL), School of Oriental and African Studies (SOAS) Bulletin of Burma Research, Vol. 1, No., 1, Spring 2003.
• Leider, Jacques P: "Interview: History Behind Arakan State Conflict", by The Irrawaddy, July 9, 2012.
• Dr. Aye Kyaw: “An Historian Looks at Rohingya”, by The Irrawaddy, October 7, 2009.
• Yegar, Moshe, “Between integration and secession: The Muslim communities of the Southern Philippines, Southern Thailand, and Western Burma / Myanmar”, Lanham, MD: Lexington Books, p. 23-24, 2002, ISBN: 0739103563.
• Dr. Aye Chan, The Development of a Muslim Enclave in Arakan (Rakhine) State of Burma (Myanmar), University of London (UL), School of Oriental and African Studies (SOAS) Bulletin of Burma Research, Vol. 3, No., 2, Autumn 2005.
• The New Encyclopedia of Islam (2002), AltaMira Press, ISBN 0-7591-0189-2
• Burma Press Summary, 1996, May, From the Rangoon “The New Light of Myanmar”, Compiled for the Burma  Studies Group by Hugh C. MacDougall, Published by the Center for East Asian and Pacific Studdies, University of Illinois.
• Burma’ Citizenship Law, 1982: http://www.unhcr.org/refworld/docid/3ae6b4f71b.html
• မြန်မာ့စွဲစုံကျမ်း၊ အတွဲ (၉)၊ အပိုင်း (က)၊ စာပေဗိမာန်၊ ၁၉၆၄၊ ပဌမအကြိမ်၊ စာမျက်နှာ (၈၉)။

(ဘလော့များ ၊ ဖိုရမ်များတွင် ပြန်လည် ဖော်ပြလိုပါက အစ အဆုံး ဆောင်းပါး တပုဒ်လုံး အပိုင်း (၁+၂ + ၃) ဖော်ပြနိုင်မှသာ ခွင့်ပြုပါတယ်။ ခေါင်းစဉ် တချို့တည်းကွက် ဖော်ပြပါက စာရေးသူ ရဲ့ ဆိုလိုရင်း တင်ပြချက်ကို စာဖတ်သူ ပုံဖော်နိုင်မှာ မဟုတ်တဲ့ အတွက် ခေါင်းစဉ် တချို့တည်းကွက် ဖော်ပြခြင်းကို လုံးဝ ခွင့်မပြုပါ။)

ဓာတ်ပုံ - ကာတွန်းဆရာကြီး ဦးဖေသိန်း ရဲ့ “’ဒီက ဒို့ဘယ်သွားကြမလဲ” စာအုပ် မှ ယူသည်။ (အီးဘွတ်ခ် ကို Burmese Classic အွန်လိုင်းစာမျက်နှာက ပြန်လည် မျှဝေသည်။)

ဆွေးနွေးတင်ပြသူ - ငြိမ်းချမ်းအေး