အမေရိကန်နိုင်ငံနဲ့ အရေပျားလှီးဖြတ် မင်္ဂလာပြုခြင်း (Circumcision) ဓလေ့

August 24, 2012   သုတ၊ရသ၊အထွေထွေ, အမေရိက

မကြာသေးမီက ဂျာမနီနိုင်ငံ မြို့တစ်မြို့ရဲ့ တရားရုံးက မွတ်စလင်နဲ့ ဂျူးများရဲ့ ဘာသာရေး ဓလေ့ ထုံးတမ်းတစ်ခုဖြစ်တဲ့ ယောက်ျားလေးများအား အရေပျားလှီးဖြတ် မင်္ဂလာပြုခြင်း (Circumcision)ကို တားမြစ်ပိတ်ပင်တဲ့အပေါ် ဂျာမနီနိုင်ငံ အပါအဝင် ဥရောပနိုင်ငံအများမှာ ဂယက်ရိုက်သွားခဲ့ပါတယ်။

ဥရောပတစ်ခွင် မွတ်စလင်များ၊ ဂျူးများ၊ မွတ်စလင်အဖွဲ့အစည်းများ၊ ဂျူး အဖွဲ့အစည်းများအားလုံးက အပြင်းအထန် ဝေဖန်ခဲ့ကြပါတယ်။ အစ္စရေးနဲ့ မွတ်စလင်နိုင်ငံ အမြောက်အများကလည်း မကျေနပ်ကြောင်း ထုတ်ဖော်ပြောဆိုကြပါတယ်။

ဒီတင်မကပါ။ အမေရိကန်နိုင်ငံရှိ သတင်းစာများ၊ မီဒီယာများကလည်း ပြင်းပြင်းထန်ထန် ဝေဖန်ကြပြီး ကွန်ဂရက်လွှတ်တော်မှ အမတ် ၂၀ က ဒီကိစ္စနဲ့ ပတ်သတ်ပြီး အလွန်စိုးရိမ်ကြောင်း ဝါရှင်တန်ရှိ ဂျာမနီ သံအမတ်ထံ စာရေးသား ပေးပို့ခဲ့ကြပါတယ်။

ထူးခြားတာက အမေရိကန်မှာတော့ မွတ်စလင်နဲ့ ဂျူးများသာမက အခြားသူများကပါ ဓလေ့ထုံးတမ်းအရ မဟုတ်ဘဲ အရေပျားလှီးဖြတ်ခြင်းကို ကျန်းမာရေးအရ ကျယ်ကျယ်ပြန့်ပြန့် ပြုလုပ်တာကို တွေ့ရပါတယ်။

အရွယ်ရောက်သူ အမေရိကန် အများစု (လေးပုံ သုံးပုံ) ဟာ Circumcision ပြုလုပ်ထားသူများ ဖြစ်ပါတယ်။ စစ်တမ်းအရ နှစ်စဉ်နှစ်တိုင်း Circumcision ပြုလုပ်သူ တစ်သန်းကျော်ရှိပြီး စက္ကန့် ၃၀ တိုင်းမှာ လူတစ်ယောက် Circumcision ပြုလုပ်ခြင်းပါ။

Centers for Disease Control and Prevention (CDC) ဌာနရဲ့ လေ့လာမှုအရ လက်ရှိ အမေရိကန် နိုင်ငံမှာ မွေးဖွားသူ ကလေးများရဲ့ ၅၅ မှ ၅၇ ရာခိုင်နှုန်းဟာ Circumcision ပြုလုပ်ထားပါတယ်။ အမေရိကန် နိုင်ငံမှာ Circumcision ဟာ Vaccination (ကာကွယ်ဆေးထိုးခြင်း) ကဲ့သို့ ပုံမှန် လုပ်ရိုးလုပ်စဉ် တစ်ခုဖြစ်ပါတယ်။

သို့သော် အမေရိကန်နိုင်ငံရှိ ဆေးပညာရှင်များက စိုးရိမ်နေကြတာကတော့ ကလေးငယ်များကို Circumcision ပြုလုပ်ပေးနှုန်းဟာ နှစ်စဉ်လိုလို တစ်ရာခိုင်နှုန်းခန့်စီ လျော့ကျလာခြင်းပါ။

၁၉၇၀ ခုနှစ်များ နှောင်းပိုင်းအထိ ဆရာဝန်များရဲ့ အလေ့ကျ မေးခွန်းက “ကလေးကို ဘယ်တော့ Circumcision လုပ်ချင်သလဲ” ဖြစ်ခဲ့ပြီး ယခု အချိန်များမှာတော့ “ကလေးကို Circumcision လုပ်မှာလား” ဖြစ်သွားပြီလို့ ဝါရှင်တန် တက္ကသိုလ် (University of Washington) ကလေးအထူးကု ပါမောက္ခ (professor of pediatrics) ဒေါက်တာ ဒေါက်ကလပ် ဒီကီမာ (Dr Douglas Diekema) က ပြောပါတယ်။

မက်ဆာချူးဆက် အထွေထွေဆေးရုံ (Massachusetts General Hospital)မှ ဒေါက်တာ မာဝင်ဝမ် (Dr Marvin Wang) က “ဒါဟာ ဆေးပညာထက် ဓလေ့ ပိုဆန်နေတဲ့အတွက် မိဘတွေရဲ့ ဆုံးဖြတ်ချက်ပါပဲ။ ကျနော့အနေနဲ့တော့ ကောင်းကျိုး၊ ဆိုးကျိုးကို အကြံပြုပါတယ်” လို့ ပြောပါတယ်။ သူ့ ခန့်မှန်းချက်အရ မက်ဆာချူးဆက်ရှိ ကလေး ၁၀ ယောက်မှာ ၆ ယောက်က Circumcision လုပ်ပြီး ယေဘုယျ တစ်နိုင်ငံလုံး အတိုင်းအတာနဲ့ အမြင့်ဆုံးနှုန်းဖြစ်ပြီး သူ့လုပ်သက် ၁၅ နှစ်အတွင်း ဒီနှုန်းအတိုင်းပဲဆိုတာ သိရှိရပါတယ်။

နီဘရာစကာ (Nebraska) ၊ အိုင်အိုဝါ (Iowa) ၊ ဝစ်စကွန်စင် (Wisconsin) ၊ ကန်တပ်ကီ (Kentucky) ပြည်နယ်များမှာ Circumcision ပြုလုပ်နှုန်းဟာ ၈၀ ရာခိုင်နှုန်းအထိကြောင်းလည်း သိရပါတယ်။

ဂျူးနိုင်ငံဖြစ်တဲ့ အစ္စရေး (Israel)နဲ့ မွတ်စလင်နိုင်ငံတွေအားလုံးမှာတော့ Circumcision ပြုလုပ်ခြင်းက ပုံမှန် ဓလေ့တစ်ခုပါပဲ။ တောင်အာဖရိက (South Africa)ကဲ့သို့ အချို့ မွတ်စလင် မဟုတ်တဲ့ အာဖရိကနိုင်ငံများမှာ အရွယ်ရောက်သူ ယောက်ျားလေးများကို အထိမ်းအမှတ် အဖြစ် Circumcision ပြုလုပ်ပါတယ်။

ဂျူးများက ကလေး ၈ ရက်သားမှာ မလုပ်မနေရ Circumcision ပြုလုပ်ရပြီး မွတ်စလင်များက ရက်၊ အသက် ကန့်သက်ချက် မရှိပါ။ ယေရှု ခရစ်တော် ကိုယ်တိုင် Circumcision ပြုလုပ်ခဲ့ပြီး ဒီအဓလေ့ကို ခရစ်ယာန်များ လိုက်နာဆောင်ရွက်ရေး အစောပိုင်းကာလမှာ အခြေအတင်ဖြစ်ခဲ့ပြီး ကျောင်းတော်က မလုပ်ဖို့ ဆုံးဖြတ်ခဲ့ပါတယ်။

လင်းယုန်နက် (ခြင်္သေ့မြို့တော်)