23.08.2012 နေ့ဖတ်ရန်သတင်းများ

by Myanmar Journal on Wednesday, August 22, 2012 at 7:09pm ·

အစိုးရ ဝန်ကြီးများ ပိုင်ဆိုင်မှု သမ္မတထံ တင်ပြရ

နိုင်ငံတော် သမ္မတက ဦးသိန်းစိန်က ပြည်ထောင်စု အဆင့် ဝန်ကြီးတွေ နဲ့ တိုင်းနဲ့ ပြည်နယ် အဆင့် ဝန်ကြီးတွေ အပါအဝင် ထိပ်တန်း အစိုးရ အရာရှိကြီးတွေရဲ့ ပိုင်ဆိုင်မှုတွေ အားလုံးကို စာရင်း ပြုစုပြီး ချိတ်ပိတ် တင်ပြဖို့ အမိန့် ထုတ်ပြန်ခဲ့ တယ်လို့ သမ္မတရုံးက ပြောပါတယ်။

အခု သမ္မတဆီ တင်သွင်း လိုက်တဲ့ ပိုင်ဆိုင်မှု စာရင်းကို အစိုးရရဲ့ အုပ်ချုပ်မှု ဆိုင်ရာ အခွင့် အာဏာနဲ့ လုပ်ဆောင်တာ ဖြစ်ပြီး လိုအပ်ရင် အများ ပြည်သူ သိအောင် ထုတ်ပြန်မှာ ဖြစ်တယ်၊ လောလောဆယ် မှာတော့ ထုတ်ပြန်ဖို့ အစီ အစဉ် မရှိသေးဘူးလို့ သမ္မတရုံး ညွှန်ကြား ရေးမှူး ဦးဇော်ဌေးက ဘီဘီစီကို ပြောပါတယ်။ဆက်စပ်သတင်းနဲ့ အစီအစဉ်များ

အစိုးရ ထိပ်တန်း အရာရှိကြီးတွေနဲ့ ပတ်သက်ပြီး တိုင်တန်းချက် ဒါမှ မဟုတ် ပြဿနာ တစုံ တရာ ပေါ်ထွက်လာပြီ ဆိုရင် သမ္မတဆီ ပေးပို့ ထားတဲ့ စာရင်းနဲ့ လက်ရှိ ပေါ်လာတဲ့ ပြဿနာ ကိုက်ညီမှု ရှိမရှိ ပြန်လည် သုံးသပ် မယ်လို့ သူက ပြောပါတယ်။သမ္မတနဲ့ ဒုတိယ သမ္မတ နှစ်ယောက်ရဲ့ ပိုင်ဆိုင်မှု တွေကို သူတို့ ရာထူး စတင် လက်ခံ ရယူပြီးချိန်က စလို့ အခြေခံ ဥပဒေပါ ပြဌာန်းချက်တွေနဲ့ အညီ ပြည်ထောင်စု လွှတ်တော် နာယက ကို တင်သွင်း ထားပြီး ဖြစ်တယ်လို့ ဦးဇော်ဌေးက ပြောပါတယ်။ကောင်းမွန်တဲ့ အုပ်ချုပ်ရေးနဲ့ သန့်ရှင်းတဲ့ အစိုးရ ဖြစ်ရေး အတွက် ပြည်ထောင်စု အဆင့်နဲ့ ပြည်နယ်နဲ့ တိုင်း အဆင့် အစိုးရ အဖွဲ့ဝင် ဝန်ကြီးတွေရဲ့ ပိုင်ဆိုင်မှု တွေကို ထုတ်ဖော် ကြေညာ ဖို့ ဆိုတဲ့ အဆိုကို ပြီးခဲ့တဲ့ ဇူလိုင်လ ၂၅ ရက်နေ့က ပုသိမ် မြို့နယ် အန်အယ်လ်ဒီ ပြည်သူ့လွှတ်တော် ကိုယ်စားလှယ် ဦးဝင်းမြင့်က တင်သွင်းခဲ့ ပေမဲ့ မအောင်မြင် ခဲ့ပါဘူး။လွှတ်တော်မှာ တင်သွင်းခဲ့တဲ့ သူ့ အဆိုဟာ အခြေခံ ဥပဒေပါ ပြဌာန်းချက်ကို ကျော်လွန် ဆောင်ရွက် ထားတယ် ဆိုတဲ့ အကြောင်း ပြချက်နဲ့ ကန့်ကွက် ခဲ့ကြတာ ဖြစ်ပါတယ်။ဦးဝင်းမြင့် ကတော့ လူထု သိအောင် ထုတ်ပြန်ဖို့ ဆိုတဲ့ အဆို ကို သူတင်သွင်းခဲ့တဲ့ ရည်မှန်းချက်က သန့်ရှင်း ကောင်းမွန်တဲ့ အစိုးရ ဖြစ်ရေးကို ရည်ရွယ်တာဖြစ်တဲ့ အတွက် သမ္မတ ဘက်က ဆက်လက် လုပ်ဆောင်မှု တွေကို ကြည့်ပြီး သူ့ရဲ့ မူလ အဆိုကို ထပ် တင်သင့် မတင်သင့် စဉ်းစားမယ်၊ ပြည်သူ လူထု အတွက် အကျိုး ရှိမယ့် အဆို တွေကို ဆက်တင် သွားမယ်လို့ ပြောပါတယ်။

ဂရိ ငွေကြေး အထောက်အပံ့ရဖို့ စဆွေးနွေး

ဂရိဝန်ကြီးချုပ်က စီးပွားရေး ပြန်နလံထူနိုင်အောင် အချိန်ပို ပေးဖို့ ပြော

ဂရိဝန်ကြီးချုပ် Antonis Samaras ဟာ ဂရိနိုင်ငံအတွက် အရစ်ကျ ထောက်ပံကူညီငွေ နောက်တရစ်ရရှိနိုင်ဖို့ ရည်ရွယ်ချက်နဲ့ သုံးရက်ကြာ ထိပ်သီးအဆင့် ပြောဆိုဆွေးနွေးမှုတွေကို စတင်နေပါတယ်။

ယူရိုဇုံဘဏ္ဍာရေးဝန်ကြီးများအဖွဲ့ရဲ့ အကြီးအကဲ Jean Claude Juncker နဲ့ တွေ့ဆုံရာမှာ ဂရိ စီးပွားရေးပြန်နလံထူဖို့အတွက် အချိန်ပိုပေးဖို့ ပြောမယ်လို့ မစ္စတာ ဆာမာရာစ်က ပြောပါတယ်။

ဒါအပြင် ဂရိအစိုးရအနေနဲ့ နောက်ထပ် ယူရို ၁၁ ဘီလီယျံကျော် ဘတ်ဂျကအသုံးစရိတ် ဖြတ်တောက်မယ်ဆို တာကိုလဲ အာမခံမယ်လို့ ပြောပါတယ်။

စောစောပိုင်းက ဂရိဝန်ကြီးချုပ် Antonis Samaras ဟာ ဂရိ စီးပွားရေးပြန်နလံထူဖို့အတွက် အချိန်လိုတယ်လို့လဲ ဂျာမန်သတင်းစာတစောင်ကို ပြောခဲ့ပါတယ်။

အခုသီတင်းပတ်ကုန်မှာ မစ္စတာ အန်တိုနီဟာ ပြင်သစ်နဲ့ ရျာမန် ခေါင်းဆောင်တွေနဲ့ တွေ့ဆုံဆွေးနွေးမှာ ဖြစ်ပါတယ်။

အိုဘားမားမှတ်ချက်ကို တရုတ်ဝေဖန်

ဆီးရီးယားဓါတုလက်နက်နဲ့ပတ်သက်လို့ သမ္မတအိုဘားမားမှတ်ချက် တရုတ်ဝေဖန်

အမေရိကန်သမ္မတ အိုဘားမားရဲ့ ဆီရီးယားက ဓါတုလက်နက်တွေနဲ့ ပတ်သက်တဲ့ မှတ်ချက်ကို အန္တရာယ်များတဲ့ တာဝန်မဲ့မှုအဖြစ် တရုတ် နိုင်ငံပိုင် သတင်းဌာန ဆင်ဝှာက ဝေဖန်လိုက်ပါတယ်။

အမေရိကန်ပြည်ထောင်စုဟာ ဆီရီးယားကို စစ်ရေးအရ ဝင်စွက်ဖက်နိုင်ဖို့အတွက် အကြောင်းရှာနေတာလို့ ဆင်ဝှာက ပြောပါတယ်။

ဆီရီးယားအစိုးရရဲ့ ဓါတုလက်နက်တွေ ရွေ့ပြောင်းသယ်ယူမှု ဒါမှမဟုတ် အသုံးပြုမှုတွေကို အအမေရိကန်တို့အနေနဲ့ သည်းခံမှာ မဟုတ်ဘူးလို့ သမ္မတအိုဘားမားက တနင်္လာနေ့က ပြောခဲ့တာ ဖြစ်ပါတယ်။

သမ္မတအိုဘားမားရဲ့ မှတ်ချက်ကို ရုရှကလည်း ဝေဖန်လိုက်ပြီး ဆီရီးယားအနေနဲ့ ဓါတုလက်နက်သုံးဖို့ ရည်ရွယ်ချက်မရှိဘူးလို့ သူတို့ စိတ်ချယုံကြည်ကြောင်းပြောပါတယ်။

အာဆတ် နှုတ်ထွက်ရေး ဆွေးနွေးမယ်

ဆွေးနွေးရေး စဖို့ သမ္မတ အာဆတ် ဖယ်ရှားရမယ် ဆိုတာ လက်မခံနိုင်

ဆီးရီးယား ပဋိပက္ခ ပြီးဆုံးရေး သမ္မတ ဘရှား အာဆတ် ထွက်ပေးသင့် မသင့် ဆွေးနွေးဖို့ ဆီးရီးယား အစိုးရ ပြင်နေတယ်လို့ ဒုဝန်ကြီးချုပ်က ပြောကြား ပါတယ်။

မော်စကိုက သတင်းစာ ရှင်းလင်းပွဲမှာ ဒုဝန်ကြီးချုပ် Qadri Jamil က ပြောကြား ခဲ့တာ ဖြစ်ပါတယ်။

စေ့စပ် ဆွေးနွေးရေး စဖို့ အတွက် သမ္မတ အာဆတ်ကို ဖယ်ရှားရမယ်လို့ တောင်းဆိုတာတော့ လက်မခံနိုင်ဘူးလို့ သူက ဆိုပါတယ်။

လူမှု ကူညီရေးတွေ ဝင်ခွင့်ရရေး ဆီးရီးယား အစိုးရနဲ့ သဘောတူချက် ယူဖို့ ကယ်ဆယ်ရေး အဖွဲ့တွေ ကလဲ လုံခြုံရေး ကောင်စီကို တိုက်တွန်း နေကြပါတယ်။

ဆီးရီးယားစစ်တပ် ဒမတ်စကပ်ဝန်းကျင် ထိုးစစ်ဆင်

ဆီးရီးယားစစ်တပ် ဒမတ်စကပ်က အတိုက်အခံတွေရဲ့ နေရာကို တိုက်

ဆီးရီးယားမြို့တော် ဒမတ်စကပ်မြို့က အတိုက်အခံတွေ ထိန်းချုပ်ရာ နေရာကို ဆီရီးယားစစ်တပ်ရဲ့ ထိုးစစ်ဆင်မှုတခုအတွင်း လူ ၈ ဦးထက်မနည်းသေဆုံးခဲ့တယ်လို့ အတိုက်အခံလှုပ်ရှားသူတွေက ပြောပါတယ်။

အစိုးရစစ်တပ်က ဒမတ်စကပ်မြို့မှာ သူတို့ရဲ့ ထိန်းချုပ်မှု ပြန်ရအောင် ပြီခဲ့တဲ့လက ထိုးစစ်တွေ စလုပ်လာပြီးနောက်ပိုင်း အခုတိုက်ခိုက်မှုဟာ အပြင်းထန်ဆုံးလို့ မြို့ခံတွေ ပြောပါတယ်။

Kfar Soussa ဆင်ခြေဖုံးမှာ လေကြောင်းက ဗုံးကြဲတိုက်ခိုက်မှုတွေနဲ့အတူ မြေပြင်မှာ တင့်ကားတွေနဲ့ ထိုးစစ်ဆင်ခဲ့တာဖြစ်ပါတယ်။

မြောက်ပိုင်းက Aleppo မြို့ကို လည်း ဆီရီးယားစစ်လေယဉ်တွေတိုက်ခိုက်ခဲ့တယ်လို့ လန်ဒန်အခြေစိုက် ဆီးရီးယား လူ့အခွင့်အရေး စောင့်ကြည့်အကဲခတ်တွေက ပြောကြားခဲ့ကြပါတယ်။

ရုရှကို WTOက ၁၅၆ဦးမြောက် အဖွဲ့ဝင်အဖြစ် လက်ခံ

ရုရှားစားသုံးသူတွေအနေနဲ့ ပိုဈေးသက်သာတဲ့ တင်သွင်းကုန်တွေကို ၀ယ်ယူပြီး ငွေပိုစုနိုင်ပြီးတော့ နိုင်ငံတွင်း စီးပွားရေးတွေမှာ ပြန်ပြီးရင်းနှီးမြှုပ်နှံနိုင်မှာကြောင့် အကျိုးဖြစ်စေလိမ့်မယ်လို့ သုံးသပ်သူတချို့က ခန့်မှန်းပါတယ်။

ရုရှားနိုင်ငံဟာ ကမ္ဘာ့ကုန်သွယ်ရေးအဖွဲ့ချုပ် WTO ရဲ့ ၁၅၆ နိုင်ငံမြောက် အဖွဲ့ဝင်နိုင်ငံဖြစ်သွားပါပြီ။ နှစ်၂၀ နီးပါး စေ့စပ် ဆွေးနွေး ညှိနှိုင်းခဲ့ပြီးတဲ့နောက်မှာမှ အဖွဲ့ဝင်နိုင်ငံဖြစ်သွားတာပါ။ ရုရှားနိုင်ငံဟာ ဂျီနီဗာမြို့အခြေစိုက် WTO အဖွဲ့မှာ နောက်ဆုံးအဖွဲ့ဝင်ဖြစ်လာတဲ့ အဓိက စီးပွားရေး အင်အားကြီးနိုင်ငံတခုပါ။ အရင်တုန်းကတော့ အနောက်နိုင်ငံတွေက ကုန်ပစ္စည်းတွေနဲ့ ၀န်ဆောင်မှုလုပ်ငန်းတွေ ရုရှားနိုင်ငံထဲ အလုံးအရင်းနဲ့ ၀င်လာမှာ ကို စိုးရိမ်တယ်ဆိုတာ ပြောခဲ့ဖူးပါတယ်။

WTO အဖွဲ့ဝင်ဖြစ်သွားတဲ့အတွက် တင်သွင်းကုန်တွေအပေါ် အခွန်စည်းကျပ်တာကို အခုလက်ရှိ ပျှမ်းမျှခြင်း ၁၀% ကနေ ၈% အောက်အထိ လျှော့ချဖို့ သဘောတူထားပါတယ်။ သဘောတူညီချက်ရဲ့ တစိတ်တပိုင်းအဖြစ် ဘဏ်လုပ်ငန်းကဏ္ဍ၊ မော်တော်ယာဉ်လုပ်ငန်းကဏ္ဍနဲ့ အာမခံလုပ်ငန်းကဏ္ဍတွေ အပါအ၀င် လုပ်ငန်းကဏ္ဍအများအပြားအတွက် ကုန်သွယ်ရေးတွေကို ဖွင့်ပေးဖို့ ကတိပေးထားရပါတယ်။ ဒါဟာ ရုရှားစားသုံးသူတွေအနေနဲ့ ပိုဈေးသက်သာတဲ့ တင်သွင်းကုန်တွေကို ၀ယ်ယူပြီး ငွေပိုစုနိုင်ပြီးတော့ နိုင်ငံတွင်း စီးပွားရေးတွေမှာ ပြန်ပြီးရင်းနှီးမြှုပ်နှံနိုင်မှာကြောင့် အကျိုးဖြစ်စေလိမ့်မယ်လို့ သုံးသပ်သူတချို့က ခန့်မှန်းပါတယ်။

တာင်ကိုရီးယားကို ဂျပန် သံအမတ် ပြန်ပို့

နယ်မြေပိုင်နက် အငြင်းပွားမှုတွေ ကြီးထွားလာရာက ပြန်လည်ခေါ်ယူထားတဲ့ သံအမတ်ကြီးကို သီတင်းတပတ်ကျော် ကြာလာတဲ့ အချိန်မှာတော့ ဂျပန်နိုင်ငံက တောင်ကိုရီးယားကို ပြည်လည် စေလွှတ်လိုက်ပါတယ်။ ဂျပန်နိုင်ငံက Takeshima လို့ခေါ်ပြီး တောင်ကိုရီးယားက Dokdo လို့ခေါ်တဲ့ ကျွန်းစုကို ပိုင်ဆိုင်မှု အငြင်းပွားနေတဲ့ ကိစ္စကို ဖြေရှင်းနိုင်ဖို့အတွက် သံအမတ်ကြီး Masatoshi Muto ကို ပြန်လည်စေလွှတ်မှာ ဖြစ်တဲ့အကြောင်း ဂျပန်နိုင်ငံခြားရေးဝန်ကြီး Koichiro Gemba က ဒီကနေ့ပဲ ပြောလိုက်တာပါ။

စွမ်းအင်သိုက်တွေ ရှိမယ်လို့ ယူဆနေကြတဲ့ မဟာဗျူဟာမြောက် ကျွန်းပေါ်ကို တောင်ကိုရီးယား သမ္မတ Lee Myung-Bak သွားရောက်လည်ပတ်ခဲ့တဲ့အပေါ် ကန့်ကွက်တဲ့ အနေနဲ့ ဂျပန်နိုင်ငံက သံအမတ်ကြီးကို ပြီးခဲ့တဲ့ တပတ်ထဲမှာပဲ ပြန်လည်ဆင့်ခေါ်ထားတာ ဖြစ်ပါတယ်။ ဆယ်စုနှစ်နဲ့ချီပြီး အငြင်းပွားနေတဲ့ ကိစ္စကို နိုင်ငံတကာ တရားရုံးမှာ တင်ပြဆုံးဖြတ်ဖို့ ဂျပန်နိုင်ငံက ကမ်းလှမ်းခဲ့တာကိုတော့ တောင်ကိုရီးယား နိုင်ငံက မနေ့တုန်းကပဲ ပယ်ချခဲ့တာပါ။ သဘောထား ကွဲလွဲမှုတွေကြောင့် ရှေ့လထဲ ကျင်းပမယ့် အာရှ-ပစိဖိတ်စီးပွားရေး နှီးနှောဖလှယ်ပွဲမှာ တွေ့ဆုံဖို့ ရှိနေတဲ့ ဂျပန်ဝန်ကြီးချုပ် Yoshihiko Noda နဲ့ တောင်ကိုရီးယား သမ္မတ Lee Myuang-Bak တို့ကြား ဆက်ဆံရေးမှာ ထိခိုက်စရာတွေလည်း ဖြစ်နေရပါတယ်။

အမေရိကန် လုပ်ငန်းရှင်များ နိုင်ငံခြားရင်းနှီးမြှုပ်နှံမှု ဥပဒေသစ်ကို စောင့်မျှော်

နေလင်းအောင် | ဗုဒ္ဓဟူးနေ့၊ သြဂုတ်လ ၂၂ ရက် ၂၀၁၂ ခုနှစ် ၂၀ နာရီ ၅၀ မိနစ်

ရန်ကုန် (မဇ္ဈိမ) ။       ။ မြန်မာနိုင်ငံတွင် စီးပွားရေး ရင်းနှီးမြှုပ်နှံမှုများ ပြုလုပ်နိုင်ရန်အတွက် နိုင်ငံခြားရင်းနှီးမြှုပ်နှံမှု ဥပဒေသစ်ကို စိတ်ဝင်စားစွာဖြင့် စောင့်ကြည့်နေကြေကြာင်း အမေရိကန် စီးပွားရေးလုပ်ငန်းရှင်များက သြဂုတ်လ တတိယအပတ်အတွင်း မြန်မာနိုင်ငံသို့ လာရောက်စဉ် ပြောကြားသွားသည်။

“နိုင်ငံခြား ရင်းနှီးမြှုပ်နှံမှု ဥပဒေကို စိတ်ဝင်စားစွာနဲ့ စောင့်ကြည့်နေပါတယ်။ ဘာလို့လဲ ဆိုတော့ ဒါက ကျနော်တို့ အတွက်လည်း အရမ်းအရေးကြီးပါတယ်။ ပြီးတော့ ရင်းနှီးမြှုပ်နှံလိုတဲ့ ကျနော်တို့ ကုမ္ပဏီတွေ အနေနဲ့လည်း ဘယ်လောက် အတိုင်းအတာထိ စီးပွားရေးဆိုင်ရာ လုပ်ငန်းတွေ လုပ်ကိုင်ခွင့်ပြုမယ်ဆိုတာ သိနိုင်မှာပါ” ဟု အမေရိကန် စီးပွားရေးလုပ်ငန်းရှင် မစ္စတာ စီအေမွန်ခမ် က ပြောသည်။

စင်္ကာပူနိုင်ငံဆိုင်ရာ အမေရိကန် သံအမတ်ကြီးနှင့်အတူ  စင်္ကာပူနိုင်ငံမှ ထိပ်တန်း အမေရိကန် စီးပွားရေးလုပ်ငန်းရှင် ၂ဝ ဦး မြန်မာနိုင်ငံသို့ လာရောက်စဉ် သြဂုတ်လ ၁၅ ရက်နေ့က ရန်ကုန်မြို့၌ ပြုလုပ်ခဲ့သည့် သတင်းစာရှင်းလင်းပွဲတွင် ထိုသို့ ပြောကြားသွားခြင်း ဖြစ်သည်။ သတင်းစာရှင်းလင်းပွဲသို့ မြန်မာနိုင်ငံဆိုင်ရာ အမေရိကန်သံအမတ်ကြီး မစ္စတာ ဒဲရစ်မစ်ချယ် လည်း တက်ရောက်ခဲ့သည်။

ထိုခရီးစဉ်တွင် Ford မော်တော်ကား ကုမ္ပဏီ၊ စက်ယန္တရားယားကြီးများ ထုတ်လုပ်သော Caterpillar ကုမ္ပဏီ၊ Hewlet Packard  ကော်ပိုရေးရှင်း၊ Citibank၊ Kraft Foods၊ GE Energy၊ Bell Helicopetr၊  Arrow Technologies Pte Ltd အစရှိသော ကုမ္ပဏီများမှ ကိုယ်စားလှယ်များ လိုက်ပါခဲ့ပြီး ဒုတိယ သမ္မတ ဒေါက်တာ စိုင်းမောက်ခမ်း အပါအဝင်အစိုးရအဖွဲ့ဝင်များနှင့် တွေ့ဆုံဆွေးနွေးသွားကြသည်။

၂ဝ၁၂ ခုနှစ်အတွင်း အမေရိကန်စီးပွားရေးလုပ်ငန်းရှင်များ မြန်မာနိုင်ငံသို့ နှစ်ကြိမ် လာရောက်ခဲ့ပြီး ဇွန်လအတွင်းက General Electric ကုမ္ပဏီက ပန်းလှိုင်ဆေးရုံသို့ ဒေါ်လာ နှစ်သန်း တန်ဖိုးရှိ ဆေးရုံသုံး ပစ္စည်းများ ရောင်းချရန် သဘောတူ စာချုပ် ချုပ်ဆိုခဲ့သည်။

“မြန်မာနိုင်ငံရဲ့ ပြုပြင်ပြောင်းလဲရေးတွေထဲမှာ စီးပွားရေးကဏ္ဍ ပြုပြင်ပြောင်းလဲမှုရဲ့ တိုးတက်ရေးအဆင့်တွေမှာ ပူးပေါင်းဆောင်ရွက်ချင်ပါတယ်။ မြန်မာနိုင်ငံမှာ စီးပွားရေးငန်း လုပ်ကိုင်ဖို့က ကောင်းမွန်တဲ့ အခွင့်အလမ်းတွေ ဖန်တီးပေးသလို စိန်ခေါ်မှုတွေလည်း ပါလာပါတယ်။ မြန်မာနိုင်ငံမှာ အပေါ်အမေရိကန်နိုင်ငံရဲ့ စီးပွားရေး ပိတ်ဆို့မှုတွေ လျှော့ချပေးလိုက်တဲ့အတွက် မြန်မာနိုင်ငံကို ရောက်ရှိလာတာဖြစ်တယ်။ ဒါပေမယ့် ရင်းနှီမြှုပ်နှံမှု ဥပဒေ ထွက်လာ ဖို့ကိုလည်း စောင့်ကြည့်နေပါတယ်” ဟု Capterpillar ကုမ္ပဏီ၏ အာရှဆိုင်ရာ ဥက္ကဋ္ဌ Mr Kevin Tienemen  က ပြောသည်။

ရင်းနှီးမြှုပ်နှံမှု ကော်မရှင် ဥက္ကဋ္ဌ၊ စက်မှုဝန်ကြီး ဦးစိုးသိမ်းကလည်း လာမည့် သီတင်းပတ်အတွင်း နိုင်ငံခြားရင်းနှီးမြှုပ်နှံမှု ဥပဒေသစ်သည် ထွက်ရှိလာဖွယ်ရှိကြောင်း ဗီအိုအေ ရုပ်မြင်သံကြား မြန်မာပိုင်းအစီအစဉ်သို့ ပြောကြားသွားသည်။

နိုင်ငံခြားရင်းနှီးမြှုပ်နှံမှု ဥပဒေသစ် ပြဋ္ဌာန်းနိုင်ခြင်း မရှိသေးသောလည်း နိုင်ငံရေး ပြုပြင်ပြောင်းလဲမှု လုပ်ငန်းစဉ်များကြောင့် မြန်မာနိုင်ငံသို့ လာရောက် ရင်နှီးမြှုပ်နှံလိုသည့် နိုင်ငံ အများအပြား ရှိနေသည်။

ထိုသို့ နိုင်ငံခြားရင်းနှီးမြှုပ်နှံမှုများ လာရောက်လုပ်ကိုင်ခြင်းသည် ယခုကဲ့သို့ ပြုပြင်ပြောင်လဲမှု ဖော်ဆောင်နေသည့် အချိန်တွင်  အကောင်းဆုံးဖြစ်ကြောင်း သံအမတ်ကြီး မစ္စတာ ဒဲရစ် မစ်ချယ် က ဆိုသည်။

တရုတ်အစိုးရ ဖိအားကြောင့် စစ်ပြေးဒုက္ခသည်များ စတင်ပြောင်းရွှေ့နေ

ဖနိဒါ | ဗုဒ္ဓဟူးနေ့၊ သြဂုတ်လ ၂၂ ရက် ၂၀၁၂ ခုနှစ် ၁၉ နာရီ ၅၇ မိနစ်

ချင်းမိုင်(မဇ္စျိမ) ။       ။ တရုတ်အာဏာပိုင်များ၏ စေခိုင်းချက်အရ တရုတ်နိုင်ငံ နောင်တောင်းခရိုင်၊ ရွှေလီမြို့နယ် အတွင်း ခိုလှုံနေသော ကချင်စစ်ပြေးဒုက္ခသည်များမှာ ကချင်လွတ်လပ်ရေးအဖွဲ့ KIO နယ်မြေအတွင်းသို့ စတင်၍ပြောင်းရွှေ့နေပြီ ဖြစ်ကြောင်း ဒုက္ခသည် စခန်းတာဝန်ခံများက ပြောသည်။

နောင်တောင်းခရိုင်အတွင်း ဒုက္ခသည်စခန်း ခြောက်ခုမှ လူဦးရေ ၄,ဝဝဝ ကျော် ရှိရာ ပထမဆုံး အသုတ်အဖြစ် အိမ်ထောင်စု ၁၅ဝ ကျော်မှ လူ ၆ဝဝ ကျော်မှာ KIO ၏ တပ်မဟာ ၃ နယ်မြေ လနာဇွပ် Lana Zup ဒုက္ခသည်စခန်းသို့ ဗုဒ္ဓဟူးနေ့တွင် စတင်ပြောင်းရွှေ့နေခြင်း ဖြစ်သည်။

ဒုက္ခသည်များ ပြောင်းရွှေ့သည့် မှတ်တမ်းရိုက်ကူးရန် ကင်မရာ ကိုင်ဆောင်ခွင့်ကို တရုတ်အာဏာပိုင်များက တားမြစ် ထားသလို ပြောင်းရွှေ့နေကြဆဲမှာပင် စခန်းများကို ဖျက်ဆီးခြင်းများ ပြုလုပ်နေသဖြင့် ဒုက္ခနှစ်ကြိမ် ခံရသလို ခံစားရ သည်ဟု စခန်းတာဝန်ခံ တဦးဖြစ်သူ ဒေါ်မရန်လုလု က ပြောသည်။

“တရုတ် စစ်သားရော၊ ရဲရော အရမ်းများတယ်။ လူတောင် မထွက်သေးခင် သွပ်မိုးတွေ အကုန် ခွာလိုက်ပြီ။ လမ်းဘေး က ငှားနေတဲ့ လူတွေတောင် ပေးမနေတော့ဘူး။ အကုန်လုံးကို မောင်းထုတ်နေတယ်။ စခန်းတွေ အကုန်လုံး လိုက်ဖျက်နေတယ်။ ဓါတ်ပုံ ကင်မရာလည်း ကိုင်လို့ မရဘူး။ ကားတော့ ငှားပေးတယ်” ဟု မဇ္စျိမကို ပြောသည်။

၎င်းက ဆက်လက်ပြီး “သူတို့ နိုင်ငံကနေ မောင်းထုတ်လို့ ပြန်တာကို ခုလို ကျမတို့ကို လူလို သူလို မဟုတ်ဘဲ မောင်းနေ တယ်ဆိုတော့ လူ့အခွင့်အရေး ချိုးဖောက်ခံရသလိုပဲ။ ကျမတို့လည်း နေချင်လို့ နေတာမှ မဟုတ်တာ။ ကျမတို့ကသေနတ် ကျည်ဆံကြောက်လို့ ကိုယ့်အိုးအိမ်တွေ ပစ်ထားပြီး ဒုက္ခသည်လို လာနေတာ။ နေခွင့် ရခဲ့တာကိုတော့ကျေးဇူးတင်ပါတယ်။ အစိုးရတခု ဖြစ်ပြီးတော့ အဲဒီလောက် လုပ်ရက်တယ်။ သူတို့ စိတ်ထဲမှာ လူသားချင်းစာနာ စိတ်တော့ ရှိကြရဲလား” ဟု ခံစားပြောဆိုသည်။

ထိုစခန်းအတွင်းရှိ ဒုက္ခသည်များအား မြန်မာနိုင်ငံအတွင်းသို့ ပြောင်းရွှေ့ကြရန် ဇူလိုင်လ ၂ဝ ရက်နေ့ကတည်းက တရုတ်အာဏာပိုင်များက ပြောဆိုထားပြီးဖြစ်သည်။

ထိုဒုက္ခသည်စခန်းတွင် မူလတန်းကျောင်း ဖွင့်လစ်ထားပြီး ကျောင်းသူကျောင်းသားပေါင်း ၈၆၈ ဦး ရှိနေကာ ကလေးများ ပညာရေး ထိခိုက်မည်စိုး၍ ဒုက္ခသည်များက လနာ့ဇွပ်သို့ မပြောင်းရွှေ့လိုကြခြင်း ဖြစ်သည်။

ယခု ပြောင်းရွှေ့လာသည့် နေရာသည် ယခင် တရုတ်လူမျိုးများ ဖဲဝိုင်းအဖြစ် အသုံးပြုရန် ဆောက်လုပ်ထားသည့် အဆောက်အအုံနှင့် ဟိုတယ်ဟောင်း တိုက်တန်းများတွင် နေထိုင်နေရမည် ဖြစ်ပြီး အဓိက မီးဖိုချောင်၊ အိမ်သာများကိုဆောက်လုပ်ရန် လိုအပ်နေကြောင်း သိရသည်။

ကလေးများ ပညာသင်ကြားရေးအတွက် ဖဲဝိုင်းအဆောက်အအုံနှင့် မီးဖိုချောင်အဖြစ် ဆောက်လုပ်ထားသော အဆောက်အအုံအား အကန့်လိုက် ပြုလုပ်ကာ မနက် တကြိမ်၊ ည တကြိမ် စာသင်ကြားပေးသွားမည် ဖြစ်ကြောင်း သိရသည်။

ဒုက္ခသည်များထဲမှ အိမ်ထောင်စု ၁ဝဝ ကျော်မှာ ဝေးလံလှသည့် ဤလနာ့ဇွပ်သို့ မပြောင်းရွှေ့လိုသဖြင့် မိမိဒေသ မန်ဝင်းကြီးသို့ အင်္ဂါနေ့က ပြောင်းရွှေ့သွားကြပြီဟု သိရသည်။

လက်ရှိ မိုးရာသီဖြစ်၍ ကလေးငယ်များ ဝမ်းသွားခြင်း၊ နာစေး၊ ချောင်းဆိုး အနည်းအကျဉ်းဖြစ်ပြီး သက်ကြီးများ အားနည်း၍ ဗီတာမင် အားဆေးများ သောက်သုံးရန် လိုအပ်နေသည်ဟု လနာ့ဇွပ် စခန်းတွင် ဆေးကုသ ပေးနေသည် ဆရာဝန်တဦးက ပြောသည်။

အစိုးရနှင့် KIO တို့ တိုက်ပွဲစတင်ဖြစ်ပွားချိန်မှစ၍ ၄င်းလနာ့ဇွပ် ဒုက္ခသည်စခန်းတွင် ဒုက္ခသည်ပေါင်း ၁,၄ဝဝ ရှိနေပြီး လက်ရှိ ၆ဝဝ ကျော် ထပ်မံ ရောက်ရှိလာခြင်းဖြစ်သည်။ နောက်နေ့တွင်လည်း ဒုက္ခသည်များ ထပ်မံ ပြောင်းရွှေ့ လာကြမည် ဖြစ်သည်။

သြဂုတ်လ ၁၉ ရက်နေ့ကလည်း ဖားကန့်မြို့နယ် KIA တပ်ရင်း ၆ လက်အောက်ခံ တပ်များနှင့် မြန်မာအစိုးရ နမခ လက်အောက်ခံ တပ်မ ၃၃ တပ်ဖွဲ့များအကြား တင်းမာမှုများ ရှိခဲ့သဖြင့် တိုက်ပွဲဖြစ်ပွားမည်ကို စိုးရိမ်ကာ မှော်မောင်း ဘွမ်၊ လမောင်ကုန်း၊ မှော်ဝမ်းကြီး၊ မှော်ဝမ်းကလေးနှင့် သူဌေးချောင်းများမှ ဒေသခံ ၁,ဝဝဝ နီးပါးမှာ ဖားကန့်မြို့ပေါ်ရှိ ကချင်ခရစ်ယာန် ဘုရားကျောင်းများသို့ လာရောက် ခိုလှုံနေရသည်ဟု အမျိုးသားဒီမိုကရေစီအဖွဲ့ချုပ် NLD ကိုယ်စားလှယ်လောင်း ဦးဒရှီလဆိုင်း က ပြောသည်။

“တင်္ဂနွေနေ့က KIO နဲ့ အစိုးရတို့ ထိပ်တိုက် ပစ်ခတ်တော့မလိုလို ပြည်သူတွေက ထိတ်လန့်ပြီးတော အစိုးရတပ် မူလရှိတာက ၄ဝ လောက် ရှိတယ်။ ဒါပေမယ့် စစ်ကိုင်း မုံရွာတပ်တွေက အင်အား နှစ်ထောင်လောက် ပြန်ရောက် တယ်လို့ လူတွေက ပြောနေကြလို့ တိုက်ပွဲဖြစ်မှာ ကြောက်လို့၊ KIO ကနေ ဒေသခံတွေ ဒုက္ခရောက်မှာစိုးလို့ ဖားကန့်ကို ခဏရှောင်ပေးဖို့ ပြောလို့ ကက်သလစ်၊ နှစ်ခြင်းဘုရားကျောင်းတွေမှာ ခိုလှုံနေတယ်” ဟု မဇ္စျိမကို ပြောသည်။

သို့သော် ယနေ့ထိ ပစ်ခတ် တိုက်ခိုက်ခြင်း မရှိသေးဘဲ တည်ငြိမ်လျက်ရှိသည်ဟုလည်း ၎င်းက ပြောသည်။

KIO နှင့် အစိုးရတို့ နှစ်ဖက်တိုက်ပွဲကြောင့် အိုးအိမ်စွန့်ခွာ ထွက်ပြေးတိမ်းရှောင်နေရသူ စစ်ပြေးဒုက္ခသည် စုစုပေါင်း ၈ဝ,ဝဝဝ ကျော် ရှိနေပြီ ဖြစ်သည်။ နှစ်ဖက် စစ်ရေးကိစ္စနှင့် ပတ်သက်၍ နှစ်ဖက် စစ်ပိုင်းဆိုင်ရာ ခေါင်းဆောင်များတွေ့ဆုံမည် ဖြစ်၍ ထပ်မံ တွေ့ဆုံမည့်နေရာ သဘောတူညီမှု မရသေးဘဲ ဖြစ်နေသည်။

ပြည်လုံးကျွတ် ပန်းချီ၊ ပန်းပု အနုပညာ ပြပွဲကြီး

လင်းကိုကိုထက် | ဗုဒ္ဓဟူးနေ့၊ သြဂုတ်လ ၂၂ ရက် ၂၀၁၂ ခုနှစ် ၁၈ နာရီ ၁၅ မိနစ်

ရန်ကုန် (မဇ္ဈိမ) ။      ။ မြန်မာ ပန်းချီ၊ ပန်းပု အနုပညာရှင် ၇၀၀ နီးပါးရဲ့ လက်ရာတွေကို တစုတစည်းနဲ့ ကြည့်ရှု ခံစားနိုင်မယ့် ပြည်လုံးကျွတ် ပန်းချီ၊ ပန်းပု အနုပညာ ပြပွဲကြီးကို လာမယ့် ဒီဇင်ဘာလအတွင်း ရန်ကုန်မြို့ တပ်မတော် ခန်းမ မှာ ကျင်းပမယ်လို့ သိရပါတယ်။

ပြပွဲရက် အတိအကျ မသတ်မှတ်ရသေးပေမယ့် ငါးရက်ကြာ ကျင်းပသွားဖို့ စီစဉ်ထားတဲ့ ဒီပြပွဲမှာ အနုပညာရှင်တွေ အနေနဲ့ ကိုယ်ဖန်တီးချင်တဲ့ လက်ရာတွေကို အရွယ်အစား ကန့်သတ်ချက် မရှိဘဲ ဖန်တီးခွင့်ရှိပြီး ဝယ်သူရှိရင် ရောင်းချနိုင်ပါတယ်လို့ မြန်မာနိုင်ငံ ရိုးရာ ပန်းပညာရှင်များအစည်းအရုံး အတွင်းရေးမှူး ဦးနီပိုဦး က ပြောပါတယ်။

ပြပွဲအတွက် ပေးပို့တဲ့ ပန်းချီ၊ ပန်းပုလက်ရာတွေကိုတော့ ထုံးစံအတိုင်း ဆင်ဆာအဖွဲ့က စီစစ်ရွေးချယ်သွားမှာပါ။ အရင်နှစ်တွေတုန်းကတော့ နိုင်ငံရေးဆိုင်ရာနဲ့ ယဉ်ကျေးမှုနဲ့ မအပ်စပ်တဲ့ လက်ရာတွေကို ပါဝင်ခွင့် မပြုခဲ့ပေမယ့် ဒီနှစ်မှာတော့ ဖြေလျော့မှုတွေ အတော်လေး ရှိလာမယ်လို့ ဦးနီပိုဦး က ဆိုပါတယ်။ ဒါပေမယ့် စည်းမျဉ်းစည်းကမ်းတွေ တိတိပပ သတ်မှတ်ထားတာမျိုးတော့ မရှိသေးပါဘူး။

‘မြန်မာနိုင်ငံ ရိုးရာ ပန်းပညာရှင်များ အစည်းအရုံး’ ဆိုတာကတော့ မြန်မာ့ရိုးရာ ပန်း ၁ဝ မျိုး ဖြစ်တဲ့ ပန်းချီ၊ ပန်းတိမ်၊ ပန်းတော့၊ ပန်းတဉ်း၊ ပန်းတမော့၊ ပန်းပဲ၊ ပန်းပု၊ ပန်းရံ၊ ပန်းပွတ်၊ ပန်းယွန်း ပညာရှင်တွေနဲ့ ဖွဲ့စည်းထားတဲ့ အဖွဲ့အစည်း ပါ။

ဒီအဖွဲ့ကနေ ပြပွဲရဲ့ ကုန်ကျစားရိတ်တွေကို ကျခံသွားမှာဖြစ်ပြီး ပါဝင်ပြသသူတွေအနေနဲ့ မိမိရဲ့ပန်းချီကား ရောင်းချရ မယ်ဆိုရင် ရောင်းချလို့ ရမယ့်တန်ဖိုးရဲ့ ၂ဝ ရာခိုင်နှုန်းကို အစည်းအရုံး ရန်ပုံငွေအဖြစ် ပေးရပမှာပါ။ ၂ဝဝ၆ ခုနှစ် တုန်းက ပြပွဲမှာ ပန်းချီ၊ ပန်းပု လက်ရာများ ရောင်းချရငွေဟာ ကျပ်သိန်း ၁၇ဝ ဖိုးခန့် ရှိခဲ့ပါတယ်။

ပြပွဲဝင်တွေအတွက် ကန့်သတ်ချက် တခုကတော့ အစည်းအရုံးဝင်ထားသူများသာ ပါဝင်ခွင့်ရမှာ ဖြစ်ပြီး လက်ရှိအချိန်မှာ အစည်းအရုံးဝင် ၄,ဝဝဝ လောက် ရှိနေတဲ့အတွက် ၂ဝ၁၂ ခုနှစ် အစည်းအရုံးဝင်ကတ် အသစ်လဲထားသူ ၇ဝဝ ခန့်ကိုပဲ ပါဝင်ပြသခွင့် ပေးမှာ ဖြစ်ပါတယ်။

၂ဝဝ၆ ခုနှစ်တုန်းက ပြည်လုံးကျွတ် ပန်းချီ၊ ပန်းပု အနုပညာ ပြပွဲကြီးကို လက်ရာပေါင်း ၁,၅ဝဝ ခန့်နဲ့ မန္တလေးမြို့မှာ ပထမဆုံး အကြိမ်အဖြစ် ကျင်းပနိုင်ခဲ့သလို ဒီနှစ်မှာလည်း လက်ရာပေါင်း ၁,၅ဝဝ ခန့် ကြည့်ရှု ခံစားနိုင်လိမ့်မယ်လို့ ဦးနီပိုဦး က ခန့်မှန်းထားပါတယ်။

ပြည်လုံးကျွတ် အနုပညာ ပြပွဲကြီးမှာ ပါဝင်ယှဉ်ပြိုင်မယ့် ရန်ကုန်မြို့က အသက် ၃၆ နှစ်အရွယ် ပန်းချီဆရာ ကိုတာယာ ကတော့ ပထမအကြိမ် ပြပွဲကြီးတုန်းက မပါဝင်နိုင်ခဲ့တဲ့အတွက် ဒီအကြိမ်မှာတော့ မှတ်တိုင်တခုအနေနဲ့ ပါဝင်ပြသမယ် လို့ ဆိုပါတယ်။

 “မြန်မာတနိုင်ငံလုံးမှာ ရှိတဲ့ လူငယ် ပန်းချီ ကျောင်းဆင်းတွေရော၊ နာမည်ကြီး ပန်းချီဆရာတွေပါ ပါဝင်မယ့်ပွဲ ဆိုတော့ လက်ရာပေါင်းစုံ တွေ့ရမှာပါ။ လူငယ်တွေအတွက် အခွင့်အရေး ပိုရလာနိုင်သလို အတွေ့အကြုံ ရှိပြီးသူတွေ အတွက် လည်း သူတို့ရဲ့ ဖန်တီးမှု အသစ်တွေကို ပြသနိုင်မှာပါ။ ဒီလိုပြိုင်ပွဲမျိုးကို နှစ်စဉ် ကျင်းပပေးနိုင်မယ်ဆိုရင်တော့ ပန်းချီလောကအတွက် အကောင်းဆုံးပါပဲ” လို့ ပြောပါတယ်။

ပါဝင်ပြသလိုသူများအနေနဲ့ သြဂုတ်က ၂၅ ရက်နေ့မှ စက်တင်္ဘာလ ၁ဝ ရက်နေ့အတွင်း မိမိရဲ့ ပန်းချီကား၊ ပန်းပု အနုပညာပစ္စည်းမှာ ရေးဆွဲထုလုပ်သူ အမည်၊ အနုပညာ ပစ္စည်းအမည်၊ အသုံးပြုသည့် အမျိုးအစား၊ အရွယ်အစား၊ လိပ်စာ နဲ့ ဖုန်းနံပါတ်တွေကို ရေးသားဖော်ပြပြီး အမှတ်(၁၃၁)၊ ကမ္ဘာအေးစေတီလမ်း၊ ဗဟန်းမြို့နယ်၊ ရန်ကုန်မြို့ အနုပညာ အထက်တန်းကျောင်း(ချင်းချောင်း)ကို ပေးပို့ရမှာ ဖြစ်ကြောင်း သိရှိရတယ်။

မိုဘိုင်းဖုန်းက ဆင်းရဲမွဲတေမှုကို တိုက်ဖျက်နိုင်မှာလား

အောင်ဝင်း | ဗုဒ္ဓဟူးနေ့၊ သြဂုတ်လ ၂၂ ရက် ၂၀၁၂ ခုနှစ် ၁၇ နာရီ ၃၆ မိနစ်

“ဆင်းရဲသားများကို မိုဘိုင်းဖုန်းများ အခမဲ့ပေးမည်” ဆိုတဲ့ သတင်းခေါင်းစဉ် တခုကို ဂျာနယ် တစောင်မှာ ခုတလော ဖတ်လိုက်ရပါတယ်။ ပေးမယ့် နေရာကတော့ “အိန္ဒိယ… အိန္ဒိယနိုင်ငံမှာပါ”

အိန္ဒိယ အစိုးရရဲ့ ရည်ရွယ်ချက်ကတော့ ဆင်းရဲမှု လျှော့ချဖို့အတွက် အရေးပါတဲ့ ဆက်သွယ်ရေး ကိရိယာဖြစ်တဲ့ မိုဘိုင်းဖုန်းတွေကို ဝင်ငွေနည်း မိသားစုတွေကို ပေးခြင်းအားဖြင့် အလုပ်အကိုင် အခွင့်အလမ်း ပိုမိုရရှိနိုင်ပြီးတော့ ဆင်းရဲမှုကနေ လွတ်မြောက်နိုင်စေဖို့ပါ။

မိုဘိုင်းဖုန်း ဆင်းမ်ကတ်၊ ဟန်းဆက်နဲ့ အတူ မိနစ် ၂ဝဝ ကြာ အခမဲ့ ဖုန်းပြောခွင့်ပါ ရရှိစေဖို့ လုပ်ဆောင် ပေးမယ်လို့ ဆိုပါတယ်။

အစိုးရရဲ့ အခုလို အစီအစဉ်ကို အတိုက်အခံပြော ဝေဖန်တဲ့ သူတွေလည်း ရှိပါတယ်။ ဆင်းရဲသားတွေကို မိုဘိုင်းဖုန်းပေးမယ့်အစား ကျန်းမာရေးနဲ့ အာဟာရဖွံ့ဖြိုးမှု အစီအစဉ်တွေမှာ သုံးစွဲဖို့ ဝေဖန်အကြံပြုတာတွေလည်း ဖတ်လိုက်ရပါ တယ်။

ဒီမိုကရေစီ ကျင့်သုံးတဲ့ နိုင်ငံဆိုတော့ အကောင်အထည် ဖော်မယ့် အစီအစဉ်တခုကို အဆိုးအကောင်း ဝိုင်းဝန်း ဝေဖန် တာတွေတော့ ရှိစမြဲပါ။

ကျနော်တို့နိုင်ငံမှာလည်း မိုဘိုင်းဖုန်း ဆင်းမ်ကတ် တွေကို တခု ငါးသိန်းနဲ့ အစိုးရ ဆက်သွယ်ရေး ဌာနကနေ ရောင်းနေ တဲ့အချိန်မှာ ဆင်းမ်ကတ် တခုကို ကျပ် ငါးထောင်နဲ့ ပုဂ္ဂလိက ကုမ္ပဏီတခုက ရောင်းချပေးဖို့ အစီအစဉ်ကိုတောင်မှ ဆက်သွယ်ရေးဌာနက ခွင့်ပြုဖို့ မဖြစ်နိုင်သေးပါဘူး၊ ကျနော်တို့လည်း ဆင်းမ်ကတ် ဈေးတွေကို တဖြည်းဖြည်းနဲ့ လျှော့ချပေးဖို့ အစီအစဉ် ရှိပါတယ်လို့ ဆိုခဲ့သေးပါတယ်။

အခုအချိန်အထိမှာတော့ GSM ဆင်းမ်ကတ်တခုကို ကျပ် နှစ်သိန်းနဲ့ ရောင်းနေချိန်မှာ ကျပ် တသိန်း ဒါမှမဟုတ် CDMA မိုဘိုင်းတွေ ကို ကျပ် ရှစ်သောင်းနဲ့ မကြာမီ ရောင်းချပေးတော့မယ် ဆိုတဲ့ သတင်းတွေ ထွက်ပေါ်နေချိန်အထိ မြန်မာ့ ဆက်သွယ်ရေးက တာဝန်ရှိသူတွေက မဖြစ်နိုင်သေးပါဘူးလို့ ငြင်းနေတုန်းပါ။

ဒါနဲ့ ခုန အိန္ဒိယ အစိုးရရဲ့ ရည်ရွယ်ချက်နဲ့ သဘောထားကို ပြန်ပြီး ကောက်ချက် ချကြည့်ရအောင်ပါ။

အိန္ဒိယ ဝန်ကြီးချုပ်ရုံးရဲ့ သဘောထားကတော့ “မိုဘိုင်းဖုန်း ဆိုတဲ့ အီလက်ထနောနစ် ဆက်သွယ်ရေး ကိရိယာဟာ အလုပ်လက်မဲ့တွေကို အလုပ်ရှာဖွေရာမှာ အထောက်အကူ ပြုစေဖို့ပါ” လို့ ဆိုပါတယ်။

အဓိပ္ပါယ်ကတော့ အလုပ်လက်မဲ့ တဦးဟာ ဆက်သွယ်ရေး ကိရိယာ ဖြစ်တဲ့ မိုဘိုင်းဖုန်း မရှိတဲ့အတွက် အလုပ်ရှာဖို့ အခက်အခဲတွေ့နေကြတာကို ဖြေရှင်းဖို့ မိုဘိုင်းဖုန်းကို အခမဲ့ပေးဖို့ စဉ်းစားရတာဖြစ်တယ်လို့ ဆိုပါတယ်။ ဖုန်းမရှိတဲ့အခါ အလုပ်ရှာဖို့ ခက်ခဲသလို၊ အလုပ်မရှိတဲ့အတွက် ဖုန်းမဝယ်နိုင်တဲ့ ဝိုင်းကြီးပတ်ပတ် အခက်အခဲကို ဖြေရှင်းဖို့ မိုဘိုင်းဖုန်း ရှိဖို့ အရင်းဦးဆုံး လိုအပ်တယ်လို့ ဆိုပါတယ်။

ဒီအယူအဆကို ကျနော်တို့နိုင်ငံမှာ ကြုံတွေ့နေရတဲ့ အခြေအနေနဲ့ နှိုင်းယှဉ် စဉ်းစားမယ်ဆိုရင် အတော်လေးပဲ နီးစပ်ပါတယ်။ အလုပ်ကြမ်း ဝင်ငွေနည်း အလုပ်တွေနဲ့ နီးစပ်ရာ အလုပ်အကိုင် ရှာကြတဲ့ အခြေအနေတွေက လွဲရင်ပေါ့လေ။

ကျနော်တို့ နိုင်ငံမှာလည်း အထူးသဖြင့် ဘွဲ့ရ အလုပ်လက်မဲ့တွေအတွက် အလုပ်ရှာတဲ့ အခါ ကိုယ်ရေးရာဇဝင်နဲ့ အလုပ်လျှောက်လွှာကို တင်ထားရတဲ့အခါ အလုပ်ရှင်က ပြန်ပြီးဆက်သွယ်နိုင်မယ့် ဖုန်းနံပါတ် တခုခုကို ပေးထားရ ပါတယ်။ ကိုယ်ပိုင်ဖုန်း မရှိရင်တောင်မှ အိမ်နီးနားချင်း တယောက်ယောက်ရဲ့ ဖုန်းနံပတ်တော့ အနည်းဆုံး ပေးထားရ ပါတယ်။

ကျနော်နေတဲ့ ရန်ကုန်မြို့ ဆင်ခြေဖုံး ရပ်ကွက်တခုမှာ ဖုန်းမရှိရင် အစားထိုးပေးဖို့ အိမ်နီးချင်း ဖုန်းနံပါတ် ပေးဖို့လည်း မလွယ်လှပါဘူး။ တချို့ရပ်ကွက်တွေမှာတော့ မုန့်ပဲ သွားရေစာ ရောင်းတဲ့ ဈေးဆိုင်ရှင် အိမ်တွေမှာ ဖုန်းတွေ ရှိတတ် ပါတယ်။ တချို့လည်း ဆိုင်ရှင်တွေကို တောင်းတောင်းပန်ပန်နဲ့ အလုပ်ကိစ္စ ဖုန်းလာရင် ခေါ်ပေးဖို့ မှာထားရတာတွေ လည်း ရှိပါတယ်။

သဘောကောင်းတဲ့ ဖုန်းပိုင်ရှင် ဈေးရောင်းသူတွေကလည်း အလုပ်များနေတဲ့ကြားထဲ ခပ်လှမ်းလှမ်းအိမ်က လူတယောက်ကို ခေါ်ပေးတာတွေလည်း ရှိပါတယ်။ ဒါတောင်မှ ဖုန်းလာတဲ့အချိန်မှာ ကိုယ်က ရှိမနေရင် အခက်တွေ့တတ်ပါတယ်။

ကျနော်တို့ ရန်ကုန်လို မြို့ကြီးပြကြီးမှာတောင် အခုလို အခြေအနေတွေ ရှိနေတာဆိုတော့ တခြား နယ်မြို့တွေက အခြေအနေကို ပိုပြီးတော့တောင် ကိုယ်ချင်းစာမိပါတယ်ဗျာ။

အလုပ်ရှင်တွေကလည်း အလုပ်တနေရာစာအတွက် အလုပ်လျှောက်သူတွေ များပြားနေတဲ့အထဲမှာ ဆက်သွယ်ရ ခက်တဲ့၊ ပေးစရာ ဖုန်းနံပါတ် တခုတောင် မရှိတဲ့ အလုပ်လျှောက်သူတွေကို ခက်ခက်ခဲခဲ ဆက်သွယ်ဖို့ စိတ်ဝင်စားကြတဲ့ ပုံ မပေါ်ကြပါဘူး။

အကြမ်းဖျင်း ပြောရရင်တော့ အလုပ်ရှင်တွေအနေနဲ့လည်း ဖုန်းမရှိတဲ့ အလုပ် လျှောက်ထားသူတွေကို ထည့်မစဉ်းစား ဘူးဆိုတဲ့ ပေါ်လစီ အယူအဆ တရားဝင် ချမှတ်ထားတာ မဟုတ်ရင်တောင်မှ လက်တွေ့မှာ တကယ် ကျင့်သုံးနေသလိုဖြစ်နေပါတယ်။ ဖုန်းတလုံးမှ မရှိရင် အလုပ်အကိုင် ကောင်းတခု ရဖို့ ဆိုတာ အိမ်မက် ဆန်တယ်လို့ပဲ ပြောရမလိုဖြစ်နေတာပါ။

အခု ကျနော်တို့ နိုင်ငံမှာ အိန္ဒိယနိုင်ငံ အစိုးရဝန်ကြီးဌာနက ပုဂ္ဂိုလ်တွေလို ဝင်ငွေနည်း မိသားစုတွေ အတွက် မိုဘိုင်းဖုန်း တလုံးစီ အခမဲ့ ပေးဖို့ အစီအစဉ် မရှိရင်တောင်မှ မိုဘိုင်း ဆင်းမ်ကတ်တွေကို အိမ်နီးချင်းနိုင်ငံတွေမှာလိုပဲ သင့်တင့်မျှတ တဲ့ ဈေးနဲ့ ရောင်းပေးမယ် ဆိုရင်တောင် အများကြီး ကျေးဇူးတင်ရမှာပါ။

“အခုလောလောဆယ် မဖြစ်နိုင်သေးပါဘူး” ဆိုတဲ့ စကားနဲ့ ကျနော်တို့ ဘယ်အချိန်ထိ စောင့်နေရဦးမှာလဲ။ အဲဒီအချိန် အထိ ပုံမှန်အလုပ်အကိုင်မရှိတဲ့ ဝင်ငွေနည်း မိသားစုတွေ အတွက်ရော ကျနော်တို့ အစိုးရ ဝန်ကြီးဌာနက ပညာရှင်ကြီးတွေ စဉ်းစားနေကြပြီလား။ ကျနော်တို့လည်း ဘယ်အချိန်ထိ အားတင်းပြီး စောင့်နေနိုင်ဦးမှာလဲ။ တခုခုတော့ လွဲနေတုန်းပဲလား လို့ပါ။

အခုအချိန်ထိ “မိုဘိုင်းဖုန်းက ဆင်းရဲမွဲတေမှုကို တိုက်ဖျက်နိုင်မှာလား” ဆိုတဲ့ မေးခွန်းအပေါ်မှာ အဖြေထုတ်ဖို့ ငြင်းခုံဆွေးနွေးနေသေးသလားဆိုတာ သိခွင့်လေးတော့ ရချင်တယ်ဗျာ။ ဆွေးနွေး စဉ်းစားနေတယ် ဆိုရင်တောင်မှ ဝမ်းသာရမှာပါ။   ။