03.08.2012 နေ့ဖတ်ရန်သတင်းများ

by Myanmar Journal on Thursday, August 2, 2012 at 4:08pm 

ရုရှား သမ္မတ ဗြိတိန်ရောက်

ဗြိတိသျှ ဝန်ကြီးချုပ် ကင်မရွန်းနဲ့ ရုရှားသမ္မတ ပူတင်

ရုရှား သမ္မတ ဗလာဒီမီယာ ပူတင်ဟာ ဗြိတိန် နိုင်ငံကို ရောက်ရှိ နေပြီး ဗြိတိသျှ ဝန်ကြီးချုပ် ဒေးဗစ် ကင်မရွန်းနဲ့ ဆီးရီးယား အရေးကို ဆွေးနွေးသွားမှာ ဖြစ်ပါတယ်။

ဒါဟာ ၇ နှစ်အတွင်း မစ္စတာပူတင်အဖို့ ပထမဆုံး အကြိမ်အဖြစ် ဗြိတိန် နိုင်ငံကို ရောက်ရှိလာတာ ဖြစ်ပါတယ်။

ဗြိတိသျှ ဝန်ကြီးချုပ် ဒေးဗစ် ကင်မရွန်းကလည်း သူတို့ နှစ်ဦး တွေ့ဆုံ ကြတဲ့ အခါမှာ မစ္စတာ ပူတင်ကို ဆီးရီးယား နိုင်ငံမှာ ဖြစ်နေတဲ့ တိုက်ပွဲတွေနဲ့ ပတ်သက်လို့ တမျိုးတဖုံ ကိုင်တွယ် ဆောင်ရွက် သွားဖို့ အတွက် တိုက်တွန်း သွားမယ်လို့ မျှော်လင့် နေကြပါတယ်။

ဆီးရီးယား အရေး နဲ့ ပတ်သက်လို့ အနောက် အုပ်စုနဲ့ ရုရှားတို့ သဘောမတူနိုင် ဖြစ်နေကြပါတယ်။

ဗြိတိသျှ ဝန်ကြီးချုပ်ရဲ့ နံပါတ် ၁၀ ဒေါင်းနင်းလမ်း ရုံးမှာ တွေ့ဆုံကြပြီး ရင် နှစ်နိုင်ငံ ခေါင်းဆောင် နှစ်ဦးဟာ အိုလံပစ် ပြိုင်ပွဲတွေကို လည်း သွားရောက် အားပေးကြမှာ ဖြစ်ပြီး မစ္စတာပူတင် ဝါသနာ အပါဆုံး အားကစား ဖြစ်တဲ့ ဂျူဒို ပြိုင်ပွဲတွေကို သွားရောက် ကြည့်ရှုကြမှာ ဖြစ်ပါတယ်။

ကာကွယ်ရေး ဦးစီးချုပ်ရဲ့ အိန္ဒိယ ခရီးစဉ်

ကာကွယ်ရေး ဦးစီးချုပ် ဒုဗိုလ်ချုပ်မှူးကြီး မင်းအောင်လှိုင်

ကာကွယ်ရေးဦးစီးချုပ် ဒုတိယ ဗိုလ်ချုပ်မှူးကြီး မင်းအောင်လှိုင်ဟာ အိန္ဒိယ နိုင်ငံကို တပတ်တာ အလည် အပတ်ခရီးစဉ်အဖြစ် ရောက်ရှိနေပါတယ်။

ဒီခရီးစဉ်ကို အိန္ဒိယ ကာကွယ်ရေးဦးစီးချုပ်က ဖိတ်ကြားခဲ့တာဖြစ်ပြီး ကာကွယ်ရေး ဦးစီးချုပ် မင်းအောင်လှိုင်ရဲ့ ပထမဆုံး အိန္ဒိယ ခရီးစဉ်လည်း ဖြစ်ပါတယ်။

အိန္ဒိယ ကာကွယ်ရေးဝန်ကြီး၊ ကြည်း၊ ရေ၊ လေ စစ်ဦးစီးချုပ်တွေနဲ့ မြန်မာ ကာချုပ်တို့ တွေ့ဆုံခဲ့ကြပြီး မြန်မာစစ်တပ်ကို သင်တန်းပေး လေ့ကျင့်ရေး၊ စစ်ဘက်ဆိုင်ရာ အထောက်အကူ ပစ္စည်းတွေ ပေးရေးကို ဆွေးနွေးခဲ့တယ်လို့ ဆိုပါတယ်။

နှစ်နိုင်ငံ နယ်စပ် လုံခြုံရေးနဲ့ သူပုန်တိုက်ဖျက်ရေး တို့အတွက်လည်း ဆွေးနွေးခဲ့ကြပါတယ်။

မြန်မာအစိုးရသစ် တက်လာပြီးနောက် သမ္မတဦးသိန်းစိန်က ၂၀၁၁ အောက်တိုဘာလမှာ အိန္ဒိယကို သွားရောက်ခဲ့သလို၊ အိန္ဒိယ ဝန်ကြီးချုပ် မန်မိုဟန်ဆင်းကလည်း ၂၀၁၂ မေလမှာ မြန်မာနိုင်ငံကို သွားခဲ့ပါတယ်။

မြန်မာ ဂျူဒိုမယ် ပွဲဦးထွက်မှာ ရှုံးနိမ့်

ပွဲအစ အားမာန်အပြည့်သွင်းလို့ တွေ့ရတဲ့ အေးအေးအောင်

မအေးအေးအောင်ဟာ တရုတ်က ယန်ရွှီလီ နဲ့ ၇၈ ကီလိုတန်း သြဂုတ် ၂ရက် ကြာသပတေးနေ့မနက်က ကွာတားအကြိုပွဲစဉ်အဖြစ် ယှဉ်ပြိုင်ခဲ့ရာမှာ တရုတ် ပြိုင်ဖက်က အိပွန်း တချက်ကောင်းနည်းနဲ့ ကြမ်းပြင်ပေါ်ဆွဲလှဲပြီး အနိုင်ယူသွားခဲ့ပါတယ်။

ပွဲစဉ်အစမှာတော့ အပြန်အလှန် တိုက်စစ်ဆင်ခဲ့ပြီး မအေးအေးအောင်က ပြိုင်ဖက်ကို အကြိမ်ကြိမ် ဆွဲလှဲဖို့ ကြိုးစားခဲ့တာလဲ တွေ့ရပါတယ်။

တနေ့ထဲမှာ ဆက်ကျင်းပတဲ့ ကွာတားဖိုင်နယ်ပွဲစဉ်မှာတော့ မအေးအေးအောင်ကို အနိုင်ယူခဲတဲ့ တရုတ်ဂျူဒိုမယ်လဲ ပြင်သစ်က ပြိုင်ဖက်နဲ့ တွေ့ပြီး ရှုံးနိမ့်သွားခဲ့ပါတယ်။

ထိုင်းမှာ ကျင်းပခဲ့တဲ့ ၂၄ ကြိမ်မြောက် အရှေ့တောင်အာရှ အားကစားပြိုင်ပွဲမှာ ရွှေတံဆိပ်ဆု ရခဲ့တဲ့ အေးအေးအောင်ဟာ မြန်မာအားကစားအဖွဲ့အတွက် မျှော်လင့်ချက်အရှိဆုံး အားကစားမယ်တယောက်လဲ ဖြစ်ပါတယ်။

မြန်မာအသင်းဟာ အခု အိုလံပစ်မှာ အားကစားသမား ခြောက်ဦး နဲ့ အားကစားနည်း ခြောက်မျိုးမှာ ပါဝင်ယှဉ်ပြိုင်ခဲ့ပြီး အခုတော့ အမျိုးသား မီတာ ၄၀၀ အတွက် ကိုသက်ဇော်ဝင်းနဲ့ မာရသွန် ပြေးပွဲအတွက် မနီလာစန်းတို့ ယှဉ်ပြိုင်ကြမယ့် ပွဲတွေပဲ ကျန်ပါတော့တယ်။

အိုလံပစ်ပြိုင်ပွဲ ၆ ရက်မြောက် သြဂုတ်လ ၂ ရက် မနက် အထိတရုတ်အသင်းက ရွှေ ၁၇ ခု၊ ငွေ ၉ ခု၊ ကြေး ၄ ခု စုစုပေါင်း ဆုတံဆိပ် ၃၀ နဲ့ ထပ်က ဦးဆောင်နေပြီး၊ အမေရိကန် ကတော့ ရွှေ ၁၃ ငွေ ၈၊ ကြေး ၉ နဲ့ ဒုတိယနေရာက လိုက်နေပါတယ်။

ဘင်္ဂလားဒေ့ရ်ှဘက်မှာ အဲန်ဂျီအိုတွေကို အစိုးရတားဆီး

မြန်မာ နိုင်ငံကနေ ဘင်္ဂလားဒေ့ရှ် နိုင်ငံထဲကို ဝင်ရောက် လာကြတဲ့ ရိုဟင်ဂျာ ဒုက္ခသည် တွေကို ကူညီနေတဲ့ ပရိဟိတ အဲန်ဂျီအို အဖွဲ့တွေကို အကူအညီ ပေးနေတာတွေကို ရပ်ဖို့အတွက် ဘင်္ဂလားဒေ့ရှ် အစိုးရက ကြာသပတေးနေ့က အမိန့်ထုတ် လိုက်ပါတယ်။

ပြင်သစ် ဆရာဝန်တွေရဲ့ နယ်စည်းမခြား ဆရာဝန်များ အဖွဲ့(MSF)၊ ငတ်မွတ်မှု တိုက်ဖျက်ရေး အဖွဲ့ (ACF)နဲ့ ဗြိတိန်က မွတ်စလင် အကူအညီပေးရေး အဖွဲ့ (Muslim Aid UK) တွေကို မြန်မာ နိုင်ငံနဲ့ နယ်စပ် အနားက ကော့က်စ် ဘဇား နယ်မြေအတွင်း အကူပေး နေတာတွေကို ရပ်ခိုင်းလိုက်တာ ဖြစ်တယ်လို့ ဒေသတွင်း အုပ်ချုပ်ရေးမှုး ဂျိုင်းနူးလ် ဘာရီက ပြောပါတယ်။

သူက ဒီ ပရဟိတ အဖွဲ့တွေက အထောက်အထား ခိုင်လုံစွာ မရှိတဲ့ ရိုဟင်ဂျာ ထောင်ပေါင်းများစွာကို တရားမဝင် အကူအညီ တွေပေးနေတဲ့ အတွက် ကော့က်စ် ဘဇား နယ်အတွင်းက သူတို့ရဲ့ လုပ်ငန်းတွေကို ရပ်တန့်ဖို့ အဲန်ဂျီအို ဆိုင်ရာ ဗျူရိုက အမိန့်ထုတ်ခဲ့တာ ဖြစ်တယ်လို့ ဆိုပါတယ်။

ဆက်လက်ပြီး ဒီလို အကူအညီ တွေပေးနေတဲ့ အတွက် ရိုဟင်ဂျာ ဒုက္ခသည် တွေပိုပြီး ဝင်လာအောင် အားပေးသလို ဖြစ်နေတဲ့ အကြောင်းလည်း ပြောပါတယ်။

အဲဒီ အဲန်ဂျီအို တွေမှာ လုပ်ကိုင်နေတဲ့ ဝန်ထမ်း တဦးက ဘီဘီစီကို ပြောကြား ရာမှာ သူတို့ အဖွဲ့အစည်း တွေအနေနဲ့ နယ်စပ်မှာ ဒေသခံ တွေအတွက် ကျန်းမာရေး စောင့်ရှောက် မှုတွေ လုပ်နေကြကြောင်းနဲ့ ဒုက္ခသည် တွေနဲ့ ပတ်သက်တဲ့ လုပ်ငန်းတွေကို ရပ်နား ထားရတဲ့ အကြောင်း ပြောပါတယ်။

ဆက်လက်ပြီး ဒုက္ခသည် တွေရဲ့ အခြေအနေ တွေဟာ လက်ရှိ အခြေအနေမှာ အလွန် ဆိုးရွား နေတာကြောင့် ဒုက္ခသည် အရေးကို ဆက်လက် ဆောင်ရွက်ခွင့် ရဖို့ အတွက် သက်ဆိုင်ရာ အဲန်ဂျီအို အရာရှိ ကြီးတွေက အစိုးရ တာဝန် ရှိသူ တွေနဲ့ ညှိုနှိုင်း နေကြတယ်လို့ ပြောပါတယ်။

ဘင်္ဂလားဒေ့ရှ် အစိုးရရဲ့ အဆိုအရ ဘင်္ဂလားဒေ့ရှ် ဘက်မှာရှိတဲ့ ဒုက္ခသည် စခန်းမှာ ရိုဟင်ဂျာ ဦးရေ ၃၀၀၀၀ လောက်ရှိပြီး စခန်း အပြင်မှာ သိန်းနဲ့ ချီပြီး ရှိနေတယ်လို့ ဆိုပါတယ်။ ရခိုင်ပြည်နယ်ဘက်မှာ အဓိကရုန်း တွေဖြစ် ပြီးနောက်မှာ ပြေးလာ ကြတဲ့ ရိုဟင်ဂျာတွေ ကိုတော့ ဘင်္ဂလားဒေ့ရှ် ဘက်က လက်မခံဘဲ ပြန်လွှတ်ခဲ့ ပါတယ်။

မြန်မာ နိုင်ငံဘက် ရခိုင်ပြည်နယ် အတွင်းမှာဖြစ်ခဲ့တဲ့ အဓိကရုန်း တွေအတွင်းမှာ လူပေါင်း ၈၀ ထက်မနည်း အသက်ဆုံးရှုံး ခဲ့ရပါတယ်။

ဆီးရီးယားမှာ အစာရေစာ လိုအပ်နေ

ဆီးရီးယားမှာ တိုက်ပွဲတွေကြောင့် စားနပ်ရိက္ခာ လိုအပ်မှုတွေ ဖြစ်နေ

ဆီးရီးယား နိုင်ငံမှာ လူပေါင်း ၃ သန်းလောက် စားနပ် ရိက္ခာ အကူ အညီတွေ လိုအပ် နေတယ်လို့ ကုလသမဂ္ဂ စားနပ်ရိက္ခာနဲ့ စိုက်ပျိုးရေး အဖွဲ့ FAO က ပြောပါတယ်။

ဆီးရီးယား နိုင်ငံ အတွင်း အဆက်မပြတ် တိုက်ခိုက်နေကြတဲ့ အတွက် လူပေါင်း ၁ သန်းခွဲ ကျော်ကျော် လောက်ဟာ လာမယ့် ၃ လနဲ့ ၆ လလောက် ကာလ အတွက် အရေးပေါ် အကူအညီတွေ လိုအပ်နေတယ်လို့ ဆိုပါတယ်။

FAO ရဲ့ အစီရင်ခံစာ ထဲမှာ ကျေးလက် ဒေသတွေမှာ လူတော်တော် များများဟာ နဂို ဖြစ်နေပြီးသား ဒေသတွင်း မိုးခေါင် နေတဲ့ ပြဿနာ အပြင် နောက်ထပ်တိုးပြီး ဖြစ်လာတဲ့ တိုက်ပွဲ တွေကြောင့် စိုက်ပျိုးရေး လုပ်ငန်းတွေ လုပ်ကိုင်ဖို့ မဖြစ်နိုင်တော့တဲ့ အခြေအနေမှာ ရောက်နေတယ်လို့ ဖော်ပြထားပါတယ်။

ဆီးရီးယားအစိုးရက လူ ၇၀ ကော်ကို သတ္လို့အတိုက်အခံပြော

အလက်ပိုမြို့မှာလည်း တိုက်ပွဲတွေ ပြင်းထန်နေဆဲ

ဆီးရီးယား နိုင်ငံမှာတော့ ဒမတ်စကတ်စ် မြို့တော် အတွင်းက အတိုက်အခံတွေက အစိုးရတပ်တွေနဲ့ အစိုးရရဲ့ စစ်သွေးကြွတွေက လူပေါင်း ၇၀ ကျော်ကို အစုလိုက် အပြုံလိုက် သတ်ဖြတ်ခဲ့တယ်လို့ စွပ်စွဲ လိုက်ပါတယ်။

မြို့တော် ဒမတ်စကတ်စ် အတွင်းမှာရော အကြီးဆုံး မြို့ကြီး တမြို့ ဖြစ်တဲ့ အလက်ပိုမှာရော တိုက်ပွဲတွေ အပြင်းအထန် ဆက်လက် ဖြစ်ပွား နေဆဲ ဖြစ်ပါတယ်။

အလက်ပိုမြို့မှာ သူပုန်တွေ ဘက်က အစိုးရရဲ့ လေတပ် စခန်းကို တိုက်ခိုက်မှုတွေ ပြုလုပ် နေတယ်လို့လည်း သတင်းတွေ ရရှိပါတယ်။

တချိန်ထဲမှာပဲ ဆီးရီးယား အမျိုးသား ကောင်စီက အလက်ပို မြို့မှာ အစိုးရရဲ့ စစ်သွေးကြွ သုံ့ပန်းတွေကို သတ်ဖြတ်ခဲ့တဲ့ သူပုန်ဘက်က သေနတ် သမားတွေကို ပစ်တင် ရှုံ့ချ လိုက်ပါတယ်။ အင်တာနက် ပေါ်မှာ တင်ထားတဲ့ ဒီသတ်ဖြတ်မှု တွေလုပ်ခဲ့တဲ့ ဗီဒီယို သတင်းနဲ့ ပတ်သက်လို့လည်း ဒါဟာ ရက်စက် ကြမ်းကြုပ်တဲ့ သတ်ဖြတ်မှု ဖြစ်တယ်လို့ ဆိုပါတယ်။

အမျိုးသား ကောင်စီ က အိုဘီဒါ နာဟတ်စ်က ဆီးရီးယား အမျိုးသား ကောင်စီက ဒီလို ရက်စက်မှုတွေ နဲ့ ပတ်သက်လို့ ရှုံ့ချတဲ့ အကြောင်း၊ ဒါမျိုးလုပ်ရပ် တွေနဲ့ ပတ်သက်ရင် အရင်ထဲက ဆန့်ကျင် ခဲ့တဲ့ အကြောင်းနဲ့ ဒီနေရာမှာ တခု သတိပြုရမှာက အရင်က နှိပ်စက်ခံခဲ့ရသူ တွေက သူတို့ကို သတ်ဖြတ် နှိပ်စက်ခဲ့သူ တွေကို ပြန်ပြီး လက်စား ခြေတိုက်ခိုက် နေကြတာ ကို တွေ့ခဲ့ကြရတာ ဖြစ်ကြောင်း တွေကို ပြောသွား ခဲ့ပါတယ်။

ဒုက္ခသည်တွေကို မကူညီကြဖို့ ဘင်္ဂလားဒေ့ရှ် ညွန်ကြား

ရခိုင်ပြည်နယ်ထဲမှာ  ဖြစ်ပွားခဲ့တဲ့  အဓိကရုဏ်းတွေကြောင့်  အိမ်နီးချင်း ဘင်္ဂလားဒေ့ရှ် နိုင်ငံကို ထွက်ပြေး တိမ်းရှောင်လာတဲ့  ဒုက္ခသည်တွေကို ကူညီထောက်ပံ့မှုတွေ ရပ်ဆိုင်းပစ်ဖို့ ဘင်္ဂလားဒေ့ရှ် အစိုးရက နိုင်ငံတကာ လူသားချင်းစာနာမှုဆိုင်ရာ ကူညီရေးအဖွဲ့တွေကို ပိတ်ပင်လိုက်တယ်လို့ MSF  နယ်စည်းမခြား ဆေးပညာရှင် များအဖွဲ့ ပြောခွင့်ရ  ဒီဒဲရစ် ဗန် ဟယ်လ်စီမာ (Diderik Van Halsema) က VOA ကို ပြောပါတယ်။

ဘင်္ဂလားဒေ့ရှ် အစိုးရက တားမြစ်စာပေးပို့ခဲ့တဲ့ ဘင်္ဂလားဒေ့ရှ် - မြန်မာ နယ်စပ်တလျှောက်က ဒုက္ခသည်တွေကို အကူအညီတွေ ပေးနေတဲ့ အဖွဲ့အစည်းကြီး  ၃ ခုထဲမှာ MSF တဖွဲ့လည်း ပါဝင်ပါတယ်။

MSF အဖွဲ့ရဲ့ ဘင်္ဂလားဒေ့ရှ် နိုင်ငံ ကော့ဆက်ဘဇား (Cox’s Bazaar) မှာ ရှိတဲ့ ကူညီကယ်ဆယ်ရေး လုပ်ငန်းတွေ အားလုံးကို ရပ်ဆိုင်းပေးဖို့  ဘင်္ဂလားဒေ့ရှ် အာဏာပိုင်တွေက စာပေးပို့ခဲ့တာမို့  ဒီကိစ္စနဲ့ ပတ်သက်ပြီး  အာဏာပိုင်တွေနဲ့ ပြန်ပြီး ညှိနှိုင်းဆွေးနွေးမှုတွေ လုပ်နေတယ်လို့  MSF ကပြောပါတယ်။

နောက် အဖွဲ့တဖွဲ့ဖြစ်တဲ့ ဗြိတိန်အခြေစိုက် မူဆလင် ထောက်ပံ့ရေးအဖွဲ့ ( Muslim Aid UK ) ကို လည်း  ဘင်္ဂလားဒေ့ရှ် အာဏာပိုင်တွေက အခုလို အကူအညီမပေးဖို့ ပန်ကြားထားပြီး ဒီအဖွဲ့တွေရဲ့ အကူအညီပေးမှုတွေဟာ တဘက်နိုင်ငံက ရိုဟင်ဂျာ ဒုက္ခသည်တွေ ဘင်္ဂလားဒေ့ရှ် နိုင်ငံထဲ ပိုမို ၀င်ရောက်လာစေဖို့  ဖိတ်ခေါ်သလိုဖြစ်နေတယ်လို့ ဆိုပါတယ်။

မြန်မာနိုင်ငံဘက်က ထွက်ပြေးလာတဲ့ ဒုက္ခသည်တွေကို ပစ်မထားဖို့  အမေရိကန်နဲ့ လူ့အခွင့်အရေး အဖွဲ့တွေက ဖိအားတွေ ပေးနေတဲ့ကြားက  အခုလို ဘင်္ဂလားဒေ့ရ်ှအစိုးရက တားမြစ်ခဲ့တာဖြစ်ပါတယ်။

မြန်မာအားကစား သမားတွေ အိုလံပစ် အတွေ့အကြုံကောင်းရ

မြန်မာ့ အားကစားသမားတွေ နိုင်ငံတကာမှာ ယှဉ်ပြိုင်နိုင်ဖို့ ပံ့ပိုးမှုတွေ ဒီ့ထက် လိုအပ်တယ် လို့ မြန်မာ Olympic အသင်းခေါင်းဆောင်တယောက်ဖြစ်တဲ့ အားကစားနဲ့ ကာယပညာဦးစီးဌာန ဒုတိယ ညွှန်ကြားရေးမှူးချုပ် ဦးနော်ဒေါင်က ပြောပါတယ်။ လန်ဒန် Olympic ပြိုင်ပွဲမှာ ပါဝင် ယှဉ်ပြိုင်နေကြတဲ့ မြန်မာ Olympic အသင်းရဲ့ အခြေအနေ၊ မြန်မာနိုင်ငံမှာ ကျင်းပမယ့်  အရှေ့တောင် အာရှ အားကစားပြိုင်ပွဲ SEA Game ပြင်ဆင်မှု အခြေအနေတွေကို VOA က မေးမြန်းရာမှာ ဦးနော်ဒေါင်က ခုလို ပြောကြားခဲ့တာဖြစ်ပါတယ်။ အပြည့်အစုံကို ဆက်သွယ်မေးထားတဲ့ မစုမြတ်မွန်က တင်ပြပါမယ်။

ဗြိတိန်နိုင်ငံ လန်ဒန်မြို့မှာ ကျင်းပနေတဲ့ အကြိမ် ၃၀ မြောက် Olympic အားကစားပြိုင်ပွဲမှာ မြန်မာ နိုင်ငံ Olympic အသင်းလည်း ဝင်ရောက်ယှဉ်ပြိုင်နေပါတယ်။ ပြေးခုန်ပစ်၊ ဂျူဒို၊ သေနတ်ပစ်၊ မြားပစ်၊ အနောက်တိုင်း လှေလှော်စတဲ့ အားကစားနည်းတွေအတွက် မြန်မာ Olympic အားကစားသမားတွေ ဝင်ပြိုင်ကြတာမှာ သေနတ်ပစ်နဲ့ မြားပစ် ပြိုင်ပွဲတွေမှာတော့ ရှုံးနိမ့်သွားခဲ့ပါတယ်။ ကမ္ဘာတဝန်းက ထိပ်တန်း အားကစားသမား တွေနဲ့ ယှဉ်ပြိုင်ရတာဖြစ်လို့ ရှုံးရတာဖြစ်ပေမယ့် နောင်အတွက် အကျိုး အမြတ်တွေ ရခဲ့ပါတယ်လို့ မြန်မာ အသင်း ခေါင်းဆောင် တယောက်ဖြစ်တဲ့ အားကစားနဲ့ ကာယ ပညာ ဦးစီးဌာန ဒုတိယညွှန်ကြားရေးမှုးချုပ် ဦးနော်ဒေါင်က VOA မြန်မာပိုင်းကို ပြောပါတယ်

“ဒါက ကမ္ဘာ့အိုလံပစ်လည်းပဲ ဖြစ်တော့ ရှုံးမှာပဲလေ။ လာမယ့် ပြိုင်ပွဲအတွက်ကတော့ ကျနော်တို့ အတွက် အများကြီး အတွေ့အကြုံကောင်းတွေ၊ တခြားနိုင်ငံရဲ့ ပြိုင်ဘက်ကောင်းတွေနဲ့ တွေ့ကြုံရတဲ့ အတွက် သူတို့မှာ နောင်လာမယ့်ပွဲကျရင် ရွှေတံဆိပ်ရဖို့ မျှော်လင့်ချက်တွေ အများကြီး ရရှိခဲ့ပါတယ်။ အားတက်မိပါတယ်။ ရှုံးတယ်ဆိုတော့- ဒါက ယှဉ်လို့ မရဘူးလေ။ အာရှမှာတောင် တော်တော် ယှဉ်ရတာကိုး-နော်။”

ဟုတ်ကဲ့ပါ။ အဲဒီတော့ မြန်မာနိုင်ငံက အားကစားသမားတွေပေါ့လေ- နိုင်ငံတကာမှာ အောင်ပွဲတွေ ဒီထက် ရလာဖို့အတွက်ကော ဘယ်လို ပြင်ဆင်မှုတွေ လုပ်ထားဖို့လိုတယ်လို့ ပြောနိုင်ပါလဲရှင့်။

“အားကစားဆိုတာကတော့ ကျနော်တို့ The men, money, material and moral ပေါ့လေ။ medical or the medicine ဒီအပေါ်မူတည်ပြီး အဓိက အားကစားသမားတွေ အပိုင်းကတော့ သူ့ရဲ့ အားကစား နည်း အမျိုးအစား အလိုက် ယှဉ်ပြိုင်ရမယ့် body structure in the sickness ပေါ့လေ။ ဒါကို တည်ဆောက်ရပါမယ်။ ဒီဟာ တည်ဆောက်ပြီးမှသာလျှင် သူ့ရဲ့ လိုအပ်တဲ့ skills တို့၊ technique တို့ ဒါ သွားရမယ်။ နောက်တခုကလည်း အုပ်ချုပ် စီမံ ခန့်ခွဲမှု အပိုင်းတွေနဲ့လည်း ဝန်ကြီးဌာန၊ သူ့ရဲ့ အားကစား သမားတယောက် နိုင်ငံတကာ အိုလံပစ်ပြိုင်ပွဲအဆင့်မီမယ့် ပြိုင်ပွဲ အသုံးအဆောင် ပစ္စည်းတွေ၊ သူတို့ရဲ့ ဝတ်စားဆင်ယင်မှုတွေ၊ ဒါတွေကို ကျနော်တို့က ကိုက်ညီအောင် လိုအပ် မှာ ဖြစ်ပါတယ်။ ဒါတွေလည်း အတွေ့အကြုံကောင်းတွေ အဖြစ် ကျနော်တို့ ရရှိထားပြီး ဖြစ်ပါတယ်။”

ပြောချင်တာက မြန်မာနိုင်ငံက အားကစားသမားတွေ အတွက်ပေါ့လေ။ ပံ့ပိုး ထောက်ပံ့မှုတွေကို ဒိထက်ပိုပြီး တော့ ပေးဖို့ လိုအပ်တယ်လို့ ပြောချင်တဲ့ သဘောပါလား။

“လိုအပ်ပါတယ်။ ပိုပြီးတော့ ကမ္ဘာမှာဆိုတော့ တပိုင်းပေါ့လေ။ အာဆီယံမှာတော့ ကျနော်တို့ လာမယ့် တနှစ်ခွဲ လောက်ပဲ လိုတော့တာပေါ့။ ကစားသမားတွေအတွက်တော့ ဒါက သူ ယုံကြည်မှု အပိုင်း၊ အထူးသဖြင့် စိတ်ပိုင်း ဆိုင်ရာပေါ့- စိတ်တည်ငြိမ်မှုလေးတွေ၊ စိတ်လှုပ်ရှားမှုလေးတွေ ဒီအပိုင်းလည်း အများကြီး တွေ့ကြုံရပါတယ်။”

မြန်မာနိုင်ငံဟာ ရှေ့နှစ် ၂၀၁၃ ခုနှစ်မှာ အရှေ့တောင် အာရှ အားကစားပြိုင်ပွဲ SEA Game တွေကို အိမ်ရှင် အဖြစ် လက်ခံကျင်းပမှာ ဖြစ်ပါတယ်။ ဒီတော့ အခု လန်ဒန် Olympic အားကစားပြိုင်ပွဲတွေ ကနေ ဘယ်လို အတွေ့အကြုံတွေယူပြီး ပြင်ဆင်နိုင်ပါသလဲဆိုတာကိုလဲ ဦးနော်ဒေါင်ကို မေးပါတယ်။

“သူများ World level ရောက်အောင် အားကစားသမားတွေက ဘယ်လို အသုံးအဆောင် ပစ္စည်းတွေ ကိုင် တယ်၊ ဘယ်လို စိတ်နေသဘောထားတွေပေါ့လေ- လိုအပ်တယ်၊ ဘယ်လို training တွေ ယူရမယ်၊ ဘယ်လို နိုင်ငံကနည်းပြတွေ ပင့်ဖိတ်ပြီးတော့ တခြားနိုင်ငံတွေက လေ့ကျင့်နေတယ်၊ ဒါတွေ ကျနော်တို့ တွေ့ရပါတယ်။ ဒါလေးတွေ အသုံးချသွားမယ်၊ ဓနနဲ့ပေါင်းစည်းမယ် ဆိုလို့ရှိ ရင် အောင်မြင်မှုက အိမ်ရှင်ရဲ့ အားသာချက် အခွင့်အရေး ဆိုတာ ရှိပါတယ်။ ဒါနဲ့ ပေါင်းစပ်သွားရင် အခြေအနေ လက်ဝယ် ဖန်တီးခွင့်ကောင်းကောင်း ရမှာ ဖြစ်ပါတယ်။”

အား/ကာ ဒုညွှန်ချုပ် ဦးနော်ဒေါင်ဟာ 2008 ဘေဂျင်း Olympic အခု ၂၀၁၂ လန်ဒန် Olympic အားကစား ပြိုင်ပွဲတွေကို မြန်မာ Olympic အသင်းအနေနဲ့ ကိုယ်စားပြုရသူဖြစ်ပါတယ်။ ဒီလို နိုင်ငံစုံ အားကစားပြိုင်ပွဲကြီး တွေရဲ့ ပြင်ဆင်မှုကိုရော သူ့အနေနဲ့ ဘယ်လို မြင်ပါသလဲ။

“သွားခဲ့တဲ့ အတွေ့အကြုံအရဆိုရင် နေရေး၊ ထိုင်ရေး၊ စားရေး၊ သောက်ရေး၊ သွားရေး၊ လာရေးပေါ့၊ လုံခြုံရေးက အစ အားလုံး အတူတူနီးပါး ဖြစ်ပါတယ်။ သို့သော်လည်းပဲ ပင်မအားကစားရုံကြီး တည်ဆောက်တာကတော့ ကျနော့်အထင်ပေါ့လေ- တရုတ်က Bird’s Nest  ကတော့ အတွင်းပိုင်း မှာ ပိုပြီးတော့ တော်တော်လေး ကောင်းတယ်ခင်ဗျ။ နည်းနည်းထူးခြားတာက အားကစားရုံက လန်ဒန်က ဘာထူးခြားသွားလဲ ဆိုတော့ ကိုယ့်နိုင်ငံမှာလာ ကြည့်ရှုတဲ့ ပရိသတ်တွေ၊ အားကစား သမားတွေ၊ လာရောက် ကြည့်ရှုတဲ့သူတွေ၊ နည်းပြတွေ တနေရာတည်း စုစုစည်း စည်းဖြစ် အောင် ပေါ့လေ။ Extra Gym အားကစားနည်း ၇ နည်း ကစားနိုင်တယ်ခင်ဗျ။ ပြန့်ကျဲ မနေဘူး။ compact ဖြစ်တယ်။

ဥပမာ အဲဒီမှာပဲ အလေးမ၊ ဂျူဒို၊ ဘောက်ဆင်၊ table tennis၊ တိုက်ကွမ်ဒို၊ စသဖြင့်ပေါ့လေ။ တပြိုင်တည်း ကျင်းပနိုင်တယ်။ တော်တော်လေးကောင်းတယ်၊ အဲဒီ အဆောက်အဦးက။”

London Olympic ပြိုင်ပွဲမှာ ပါဝင်ယှဉ်ပြိုင်နေကြတဲ့ မြန်မာ Olympic အသင်းခေါင်းဆောင် တယောက်ဖြစ်တဲ့ ဦးနော်ဒေါင်ဖြစ်ပါတယ်။ အားကစား သမား ၆ ယောက် ပါဝင်ယှဉ်ပြိုင်ကြတဲ့ထဲမှာ ၇၈ ကီလိုဂရမ်အောက် ဂျူဒိုပွဲ အတွက် မအေးအေးအောင်၊ ပြေးခုန်ပစ် မီတာ ၄၀၀ ပြိုင်ပွဲအတွက် ကိုသက်ဇော်ဝင်း၊ မာရသွန်အပြေးပွဲအတွက် မနီလာစန်းတို့ ပြိုင်ပွဲဝင်ကြဖို့ကျန်ပါသေးတယ်။ ကမ္ဘာ့ Olympic ပြိုင်ပွဲအဆင့် ဖြစ်တဲ့အတွက် သူတို့အနေနဲ့ တော်တော်လေး ရုန်းကန် ကြိုးစားကြရ မှာဖြစ်တယ်လို့ ဦးနော်ဒေါင်က ပြောပါတယ်ရှင်။

ပူတာအို ဆန်ပြတ်

ကချင်ပြည်နယ် ပူတာအိုမြို့နယ်အတွင်းမှာ ဆန်စပါးပြတ်လပ်နေတာကြောင့် ဆန်တပြည်ကို ကျပ် ၄၀၀၀ နဲ့တောင် ၀ယ်ယူဖို့ မရှိ ဖြစ်နေပါတယ်။ ဒီလို ဆန်ပြတ်လပ်တာဟာ တလကျော်ရှိလာနေပြီး ပြီးခဲ့တဲ့ အပတ်တွေက အစိုးရက ဆန်ကို လေယာဉ်နဲ့ တင်ပို့ပေးနေပေမဲ့လည်း ဒေသခံတွေအတွက် ၀ယ်ယူဖို့ အခက်အခဲတွေ ရှိနေဆဲဖြစ်ပါတယ်။ ဆန်ပြတ်လပ်မှုကြောင့် အချို့ ဒေသခံတွေဟာ ဆန်ပြုတ်သောက်နေကြရ သလို သက်ကြီးရွယ်အို တချို့ အသက်ဆုံးရတာတွေလည်း ရှိနေတယ် လို့ ဒေသခံတယောက်က ပြောပါတယ်။ ဒီသတင်းကိုတော့ ထိုင်းအခြေစိုက် ဗွီအိုအေ သတင်းထောက် ကိုမိုးဇော်က တင်ပြထားပါတယ်။

ပူတာအိုမြို့နယ်အတွင်း ဆန်ပြတ်လပ်တာဟာ ပြီးခဲ့တဲ့နှစ်က စပါးအထွက် နည်းတာနဲ့ ဒီနှစ် မိုးတွင်းမှာ လမ်းပန်း ဆက်သွယ်ရေး ခက်ခဲတာကြောင့် အဓိက ဖြစ်ပါတယ်။ ဒီဆန်ပြတ်လပ်တာဟာ လွန်ခဲ့တဲ့ ဇွန်လ လောက်က စတင်ခဲ့ပြီး အခြေအနေပိုဆိုးလာတာ ဖြစ်ပါတယ်။

လောလောဆယ် ပူတာအိုမှာ ဆန်ပြတ်လပ်တာကြောင့် ဆန်ဈေး နှစ်ဆလောက် တက်သွားတဲ့ အခြေအနေကို မြို့ခံတယောက် အခုလို ပြောပါတယ်။

“ဒီနှစ်ကတော့ ဈေးကြီးတာပေါ့ဗျာ။ ၂ ခွက် တထောင်နှုန်းနဲ့ အခုချိန်ကတော့ ၀ယ်ကြတယ်။ နှစ်ခွက် ဆိုတာ နို့ဆီခွက်ပေါ့။ နို့ဆီခွက် ၂ ခွက်ကို တထောင်။ အရင်တုန်းကတော့ ၄ ခွက် တထောင်။ ၅ ခွက် တထောင် ဖြစ်နေတယ်။ ဒါပေမဲ့  ဒီလအတွင်းမှာတော့ ၂ ထောင်ဖိုးက ၅ ခွက်ပဲ ရတယ်။”

မြန်မာပြည်က အခြားဒေသတွေမှာတော့ သာမန် အလတ်စား ဆန်တပြည်ဟာ ကျပ်ငွေ တထောင် ၀န်းကျင် လောက်ပဲ ရှိတာဖြစ်ပါတယ်။

ပူတာအိုမြို့နယ်မှာ ဆန်စပါးပြတ်လပ်နေတာကြောင့် ပြီးခဲ့တဲ့လ ၂၃ ရက်နေ့က စပြီး အစိုးရ စစ်တပ် က ဒေသခံ ပြည်သူတွေနဲ့ ၀န်ထမ်းတွေအတွက် ဆန်အိတ် ၇၀၀ ကျော် စားသုံးဆီ ၄ ပေပါနဲ့ အခြား ထောက်ပံ့ရေး ပစည်း တွေကို ပို့ဆောင်ခဲ့ကြောင်း၊ ဒီလို ဆန်ပြတ်လပ်တာဟာ  ကချင် လွတ်လပ်ရေး တပ်မတော် KIA က ဖုန်အင်ခ တံတားကို မိုင်းခွဲဖျက်ဆီးလို့ ဆက်သွယ်ရေး လမ်းကြောင်း ပြတ်တောက်ခဲ့တာကြောင့် ဖြစ်ကြောင်း  နိုင်င်ငံပိုင် သတင်းစာတွေမှာ ဖော်ပြထားပါ တယ်။

ဒီရက်ပိုင်းတွေ အတွင်းမှာတော့ ပြည်ထောင်စုကြံ့ခိုင်ရေးနဲ့ ဖွံဖြိုးရေးပါတီက ဒေသခံ ပြည်သူတွေကို ဆန်ဖြန့်ဝေ ပေးနေတယ်လို့ မြို့ခံအမျိုးသမီးတယောက်က ပြောပါတယ်။

“ဒီမှာ ဆန်ဈေးတော့ အရမ်းBကီးတယ်။ ၀ယ်လို့တောင် မရဘူး။ အခုလောလောဆယ်က ကြံ့ခိုင်ရေးတွေ က ၄ ခွက်ကို ၅၀၀ နဲ့ ရောင်းပေးနေတာ ၂ ရက်လောက်ရှိပြီ၊ ၀ယ်လို့တောင် မရဘူး။”

ဒီလို ဆန်ပြတ်လပ်နေတာကြောင့် တချို့ ကျေးရွာတွေမှာ ဆန်ပြုတ်သောက်နေကြရသလို တချို့ သက်ကြီးရွယ်အိုတွေ သေဆုံးတာလည်း ရှိနေတယ်လို့ အခြား ဒေသခံတယောက်က ပြောပါတယ်။

“ပြည်သူတွေကတော့ ဆန် တခွက်၊ နှစ်ခွက်လေး ရတဲ့ဟာလေးနဲ့ အသီးအနှံတွေပေါ့။ ဟင်းသီး ဟင်းရွက်တွေနဲ့ ဆန်ပြုတ်စားတာရှိတယ်။ တချို့ နေရာတွေမှာဆိုရင် အဲလို စားဖို့ မရှိတာနဲ့ အသက်ကြီးတဲ့ အဖိုးကြီးတွေ၊ အဖွားကြီးတွေ ကျန်းမာရေးထိခိုက်ပြီးတော့ အသက်ဆုံးသွားတဲ့ လူတွေလည်း ရှိတယ်။ ကျေးရွာတွေမှာ ပေါ့နော။ တချို့ နေရာမှာဆိုရင် စားဖို့သောက်ဖို့ မရှိတာနဲ့ အရမ်းကို ခက်ခဲလို့ ရှိတဲ့နွားလေးတွေ၊ လယ်ယာတွေ ရောင်းပြီးမှ မှော်ထဲ တခါတည်း မိသားစုလုံး ပြောင်းသွားတဲ့ သူတွေ အများကြီးပါပဲ။”

ကျေးရွာတချို့မှာ သက်ကြီးရွယ်အိုတွေ သေဆုံးရတာ၊ မိသားစုလိုက်တခြားဒေသကို ပြောင်းရွှေ့ သွားတာနဲ့ ပတ်သက်ပြီး အတည်ပြုချက်ရယူဖို့  ပူတာအို အုပ်ချုပ်ရေးရုံးကို ဆက်သွယ်ခဲ့ပေမဲ့ ဆက်သွယ် မရခဲ့ပါဘူး။ ပူတာအိုမြို့မှာ ဆန်ပြတ်လပ်ပြီး ဈေးတက်နေသလို အခြား အခြေခံ စားသုံးကုန်ပစည်းတွေဖြစ်တဲ့ ဆီ၊ ဆား၊ ကြက်သွန် စတာတွေလည်း ဈေးတက်နေပါတယ်။