တောင်မင်းနှင့် မြောက်မင်း

by မင်းလူ၏ ၀တ္တုတိုများ on Wednesday, September 12, 2012 at 1:04am ·

    ငွေသည် အချိန်ကဲ့သို့ ကုန်လွယ်၏။ ထို့အတူ အချိန်သည်လည်း ငွေကဲ့သို့ပင် ကုန်လွယ်၏။ တစ်ခုကွာခြားသည်က အချိန်သည် အလကားရသည်။ ကုန်ဆုံးသွားသော ကာလများအတွက် အလိုအလျောက် အစားထိုးဝင်ရောက်လာနိုင်သည်။

ငွေကျတော့ ဒီလိုမဟုတ်။ အလိုအလျောက် ဖြည့်ဆည်းမပေးနိုင်ချေ။

    မည်သို့ပင်ဖြစ်စေ အချိန်နှင့်ငွေသည် လူကို မစောင့်တတ်တာချင်းတော့ အတူတူပင်ဖြစ်၏။

    ဤသို့ဖြင့် အချိန်နှင့်အမျှ ငွေကကုန်နေပြီ။ အချိန်နှင့်အမြန်နှုန်းကို ငွေကမီအောင် မလိုက်နိုင်သောအခါ သူ့တွင်

အကျပ်အတည်းပေါ်လာလေတော့သည်။

    တကယ်တော့ သူ့အလုပ်သည်လည်း ပုံမှန်အလုပ်မဟုတ်ချေ။ ပုံနှိပ်လောကအတွင်း လှည့်လည်ကျင်လည်နေရသူသာဖြစ်သည်။

    သူသည် စက်နောက်ကြည့်ခေါ် စက်ဆရာ၏တပည့်လည်း လုပ်ဖူးသည်။ စာလည်းဝင်စီကြည့်ဖူးသည်။ စာပြင်ဆရာလည်း

လုပ်ဖူးသည်။ စက္ကရုံး၊ စာပေစိစစ်ရေး စသည်တို့ကို ထုတ်ဝေသူ၊ ပုံနှိပ်သူတို့၏ကိုယ်စား သွားပေးရသည့်အလုပ်ကလည်း လုပ်ဖူးသည်။

    တစ်ကိုယ်ရေတစ်ကာယနေခဲ့တုန်းက သိပ်အရေးမကြီး။ ဖြစ်သလိုနေ၊ ဖြစ်သလိုစားလို့ရသည်။ ပိုက်ဆံမရှိလည်း ပူစရာမလို။

သူငယ်ချင်းအပေါင်းအသင်းတစ်ယောက်ယောက်ဆီက ဆွဲလိုက်ရုံပင်။ ကျောချစရာတစ်နေရာတောင်မှ သူ့အတွက် ပြဿနာမရှိ။ ပုံနှိပ်တိုက်စက္ကူပုံးများသည် သူ့အတွက် အကောင်းဆုံး၊ ဇိမ်အရှိဆုံးမွေ့ရာများ။

    ထိုသို့လုပ်ရင်းပင် အိမ်ထောင်ကျခဲ့သည်။ ခုဆိုလျှင် ကလေးနှစ်ယောက်တောင်ရနေပြီ။ သားနှင့်မယားနှင့်ဖြစ်လာသဖြင့်

အရင်လိုနေလို့မရတော့။ အိမ်ထောင်တစ်ခုကို ထူထောင်မိပြီ ဆိုသောအခါ ထိုအိမ်ထောင်၏ စားဝတ်နေရေးတာဝန်ကို မပျက်မကွက်

ထမ်းဆောင်နေရလေတော့သတည်း။

    စားဝတ်နေရေးဆိုသည်မှာလည်း နေ့စဉ်နှင့်အမျှရှိနေသော ဖြစ်စဉ်တစ်ရပ်ဖြစ်သည်။ တစ်ရက်လောက်မစားဘဲ၊ မ၀တ်ဘဲ၊ မနေဘဲမရနိုင်။ စားခြင်း၊ ၀တ်ခြင်း၊ နေခြင်းမှရှောင်လွှဲ၍ တစ်ရက်လောက်ခွင့်ယူမည်ဆိုလို့ မဖြစ်ချေ။

    ထို့ကြောင့် သူသည် အလုပ်ကို ကြိုးကြိုးစားစားလုပ်ရသည်။ အိမ်ထောင်ဦးကာလတုန်းကတော့ အဆင်ပြေသယောင်ယောင်

ရှိ၏။ သားတစ်ယောက်ရလာတော့ နည်းနည်းကသီလာ၏။ သမီးတစ်ယောက် ထပ်မံဖွားမြင်ခဲ့ပြန်သောအခါ အများကြီး ကသီလာလေသည်။ မကြာခဏဆိုသလို ငွေကြေးပြတ်လပ်မှုနှင့်ကြုံရတတ်သည်။

    ခုလည်း သူ့မှာ အခက်အခဲတွေ့နေသည်။ သူသည် ပုံနှိပ်တိုက်တစ်တိုက်မှာ ဖောင်းစားစာပြင်တစ်ယောက်အဖြစ် ၀င်ရောက်

လုပ်ကိုင်နေခြင်းဖြစ်၏။ ဖောင်စားဖြစ်သဖြင့် အလုပ်များလျှင် များသလို၊ နည်းလျှင် နည်းသလို လုပ်နေရသည်။

    ဒီလရက်ပိုင်းအတွင်း စက္ကူအခက်အခဲကြောင့် ပုံနှိပ်တိုက်မှာ အလုပ်ပါးလာသည်။ ထို့ကြောင့် သူ့ဝင်ငွေလည်း လျော့လာ၏။ မနေ့က စက်မောင်းတံတစ်ခုကျိုးသွားသည်။ လေးငါးရက်လောက်ပြင်ရမည်။ ထိုရက်များအတွင်း သူ အလုပ်လက်မဲ့ဖြစ်သွားသည်ဆိုသည့်သဘော။

    သူတို့ပုံနှိပ်တိုက်က စနေနေ့တိုင်း ငွေရှင်းပေးသည်။ ဒီနေ့မှ အင်္ဂါနေ့ရှိသေးသည်။ စနေနေ့ရောက်သည့်တိုင် သူ့အတွက် မျှော်လင့်ချက်မရှိချေ။ တနင်္ဂနွေနေ့က စက်ပိတ်သဖြင့် အလုပ်မလုပ်ဖြစ်ခဲ့။ မနေ့က တနင်္လာ၊ ညနေပိုင်း စက်ကျိုးသွားသည်။ ဒီတစ်ပတ်အတွင်း တစ်ရက်စာသာ ရစရာရှိ၏။ ကြိုတင်ငွေကလေး ဘာလေးတောင်းလို့ရချင်ရမည်။ သိပ်တော့ မကျိန်းသေ။ ပုံနှိပ်တိုက်ပိုင်ရှင်ကလည်း စက်ပြင်ရတာနှင့် အလုပ်ပါးတာနှင့်ဆိုလျှင် ငွေရှိချင်မှရှိမည်။ ရှိလို့ ကြိုတင်ငွေ ထုတ်ပေးသည်ပင်ထားဦး။ ထိုငွေက အကြွေးအဖြစ်တင်ရှိသွားပြီ။

    သည်ကြားထဲ သီတင်းက ကျွတ်လိုက်သေးသည်။ မကင်းရာမကင်းကြောင်း မင်္ဂလာဆောင်တွေ လာတော့မည်။ နှစ်ဘက်မိဘများအနက်က တစ်ယောက်တည်းသာကျန်ရစ်ခဲ့သော အဖေအိုကြီးကို ကန်တော့ချင်သည်။ ကလေးနှစ်ယောက်ကိုလည်း အင်္ကျီလေးတစ်ထည်စီလောက် ၀ယ်ပေးသင့်သည်။

    ဒါတွေထားဦး။ လောလောဆယ်စားဖို့သောက်ဖို့က အရေးကြီးသည်။ လက်ထဲမှာ ငွေနှစ်ဆယ်လျော့လျော့သာ ရှိတော့သည်။ ဘယ်လိုပဲ

စိစိစစ်စစ်သုံးသုံး၊ နှစ်ရက်သုံးရက်လောက်ထက်ပိုပြီးခံမည်မဟုတ်။ မကုန်မဖြစ် အကုန်ခံရမည့်ကိစ္စက ရှိသေးသည်။

    လမ်းစရိတ်။

    သူ မြို့ထဲထွက်ရမည်။ ပိုက်ဆံရှာရမည်။ ချေးတန်ချေးရမည်။ သူတို့စက်ပိတ်ထားသည့်အချိန်အတွင်း အခြားစက်တစ်ခုခုမှာ အလုပ်ကလေး၊ ဘာလေးရလိုရငြား စုံစမ်းရမည်။

    ပိုက်ဆံ လေးငါးကျပ်နှင့် အကြွေပြားလေးဆယ်ယူပြီး မြို့ထဲဘက်ထွက်ခဲ့သည်။ အိမ်ကအထွက်တွင် သားအကြီးကောင်က "ဖေဖေ ဟယ်လီကော်ပတာဝယ်ခဲ့ပါ"ဟု မှာသည်။ သူ့အဖေကိုများ မီလျံနာမှတ်နေသလားဟု တွေးမိသည်။ လမ်းထိပ်ရောက်မှ သဘောပေါက်လာသည်။ မီးပုံးတွန်းသည့်လှည်းကလေး မှာခြင်းဖြစ်သည်။ ဟယ်လီကော်ပတာ၊ မော်တော်ကား၊ လေယာဉ်ပျံ၊ သင်္ဘော စသည်ဖြင့် မီးပုံးစက္ကူဖြင့်ပြုလုပ်ထားသောကစားစရာအရုပ်များရောင်းသောဆိုင်ကို တွေ့ရသောကြောင့်ပင်။

    သားတို့သမီးတို့သည်လည်း သီတင်းကျွတ်မှာ တခြားကလေးတွေလို ကစားချင်ရှာပေလိမ့်မည်။ အ၀တ်အစားအသစ်တွေ မပူဆာသည်ကိုပင် ကျေးဇူးတင်ရဦးမည်။

    သူအလုပ်လုပ်နေသောပုံနှိပ်တိုက်ကိုရောက်တော့ ရှေ့ခန်းကစားပွဲမှာ ခပ်ငိုင်ငိုင်ထိုင်နေသော တိုက်ရှင်မိန်းမကို တွေ့လိုက်ရသည်။

ဒီမိန်းမဆီကတော့ ငွေချေးလို့ရနိုင်စရာ အကြောင်းမရှိ။

    ထို့ကြောင့် "စက်ကောင်းသွားပြီလားလို့ လာကြည့်တာပါ"ဟု အကြောင်းပြလိုက်ရလေသည်။ "ဒီအပတ်ထဲပြီးရင် ကံကောင်းပဲလို့

ပြောသံကြားတာပဲ။ ခုလည်း တွင်ခုံသွားကြတယ်..."

    သူ့တိုက်မှာ ခဏထိုင်ပြီးနောက် ထွက်လာခဲ့သည်။ သူအရင် အလုပ်လုပ်ဖူးသော ပုံနှိပ်တိုက်တစ်တိုက်ကို သွားသည်။ တစ်ခါတစ်ရံ

ပုံနှိပ်တိုက်တွေမှာ စာပြင်ဆရာမလာသဖြင့် ပိုင်ရှင်ကိုယ်တိုင်ပြင်ရသည့်အခါမျိုးရှိသည်။ ဒါမျိုးကြုံလျှင် တစ်နေ့တွက်လောက်တော့ အလုပ်ရနိုင်သည်။

    သို့ရာတွင် သူထင်သလိုမဖြစ်။ ထိုပုံနှိပ်တိုက်သို့ ၀င်ဝင်ချင်း စားပွဲမှာ အခန့်သားထိုင်နေသော စာပြင်ဆရာ တစ်ယောက်ကို တွေ့လိုက်ရ၏။ တခြားတိုက်တွေမှာလည်း ထို့အတူပင်။ တိုက်တစ်တိုက်ကတော့ စာပြင်ဆရာမရှိဟုဆိုသဖြင့် ၀မ်းသာသွားမည်ကြံကာရှိသေး...

    "အဲဒါဗျာ ကျွန်တော့်ခယ်မလေးကိုပဲ ခေါ်ပြင်ခိုင်းထားရတယ်။ ဆယ်တန်းဆိုတော့ တော်ရုံတန်ရုံစာလုံးပေါင်း မှားတာလောက်တော့ ပြင်တတ်တာပေါ့လေ။ အလုပ်ကလည်း ပါးနေတော့ စာပြင်ဆရာရယ်လို့ ခေါ်မထားတော့ပါဘူးဗျာ"ဟု ထိုတိုက်ရှင်က အလိမ္မာဖက်၍ ပြောလိုက်သဖြင့် တပ်လန်ခဲ့ရပြန်သည်။

    သုံးဆယ့်သုံးလမ်းထိပ်က ရွှေကြည်အေးလက်ဖက်ရည်ဆိုင်သို့သွားသည်။ ထိုဆိုင်မှာ စာပေလောကသားများ ဆုံလေ့ရှိ၏။ အလုပ်ကလေးဘာလေး ခလုတ်တိုက်မိလို တိုက်မိငြား။

    ဆိုင်ထဲဝင်ပြီး လူရှင်းသောစားပွဲမှာထိုင်၏။ စားပွဲထိုးက ဘာသောက်မလဲမေးသည်။

    "မသောက်သေးဘူး။ ပြီးမှ"ဟု ပြောလိုက်သည်။ သူ့လိုပင် လက်ဖက်ရည်တိုက်မည့်ဒါယကာကို ထိုင်စောင့်နေတတ်သူမျိုး ကြုံဖူးနေပြီဖြစ်သဖြင့် ဘာမှထွေထွေထူးထူး မပြောတော့ဘဲ ပြန်လှည့်ထွက်သွားသည်။ ဆိုင်ထဲမှာ သူနှင့်သိသူတစ်ယောက်မျှမရှိ။

    အတန်ကြာမှ သူနှင့်မျက်မှန်းတန်းမိနေသော စာရေးဆရာတစ်ယောက်ဝင်လာသည်။ တခြားစားပွဲလွတ်မရှိသဖြင့် သူ့စားပွဲမှာ လာထိုင်သည်။

    "တစ်ယောက်တည်းလား။ ဘယ်သူ့စောင့်နေတာလဲ"ဟု နှုတ်ဆက်ရင်း မေးသည်။

    "ကျွန်တော်တို့တိုက်က စက်ကျိုးနေလို့ ဆရာရဲ့။ အဲဒါ တခြားစက်တစ်ခုခုများ ခဏတဖြုတ်ဝင်လိုက်လို့ရမလားလို့ ထွက်လာခဲ့တာ"

    "ကျွန်တော်လည်း ထုတ်ဝေသူဆီ ငွေလေးဘာလေးထပ်တောင်းမလားလို့ လာစောင့်တာပဲ။ သောက်ပြီးပြီလား"ဟု တစ်ဆက်တည်းမေးသဖြင့် "သောက်မလို့ပဲ၊ ခုပဲရောက်တာ"။ စာရေးဆရာက လက်ဖက်ရည်နှစ်ခွက်မှာသည်။ သူသည် မျှော်လင့်ချက်ကလေးတစ်ခု စဉ်းစားမိသည်။ စာဆရးဆရာငွေရလျှင် ရှေ့မျက်နှာ နောက်ထားပြီး

ငွေအစိတ်လောက်ချေးမည်။ ထိုစာရေးဆရာက သဘောကောင်းသည်။ ထိုအတွေးကလေးဖြင့် ထုတ်ဝေသူအလာကို ကူညီ၍ စောင့်ပေးနေလိုက်သည်။

    ထုတ်ဝေသူက အကြာကြီးကြာအောင်စောင့်ပြီးမှ ရောက်လာသည်။

    ရောက်ရောက်ချင်း ထိုင်တောင် မထိုင်ရသေးခင်..

    "ဆောရီးပဲ ဆရာရေ။ စာတိုက်ကြီးသွားတာ နည်းနည်းနောက်ကျသွားလို့ ငွေမထုတ်ခဲ့ရဘူး။ ဟိုဟာ မနက်ဖြန်ကျမှ ယူပါဆရာ။ ဖြစ်တယ်မဟုတ်လား"ဟု ပြောလေ၏။

                    ************

    ညနေစောင်းပြီး လမ်းစရိတ်ပြားရှစ်ဆယ်နှင့် ဆေးလိပ်ဖိုး ပြားသုံးဆယ်သာကုန်သွားသည်။ ဘာမျှအလုပ်မဖြစ်။ ပြန်ဖို့သာရှိသည်။ ဆူးလေဘုရားလမ်း ကားမှတ်တိုင်သို့ လျှောက်ခဲ့သည်။

    ထိုစဉ် တစ်စုံတစ်ယောက်ကို ဖြတ်ကနဲ သတိရလိုက်သည်။ ကိုဂျော်ကီ။

    ကိုဂျော်ကီသည် အစက စက္ကူပွဲစားတစ်ယောက်ဖြစ်သည်။ အချီကြီးတစ်ချီ ပွပေါက်တိုးပြီးနောက် ပုံနှိပ်စက်ပိုင်ရှင်ဖြစ်သွားသည်။ စက်ကို ဈေးကောင်းရသည့်အချိန်မှာ ရောင်းထုတ်ပြီး မော်တော်ကားဝယ်ရောင်းလုပ်သည်။ ဈေးအချောင်ရသည့်ကားခပ်စုတ်စုတ်တွေ ၀ယ်ပြီး ပြန်ပြင်၊ ပေါက်ဈေးဖြင့် ပြန်ရောင်းခြင်းဖြစ်သည်။ လည်လည်ဝယ်ဝယ် ရှိသဖြင့် အတော်အကျိုးဖြစ်သည်ဟု သိရ၏။

    သူသည် ကိုဂျော်ကီစက္ကူပွဲစားဘ၀ကတည်းက ခင်မင်နေခဲ့ခြင်းဖြစ်သည်။ ကိုဂျော်ကီ ပုံနှိပ်စက်ထောင်တုန်းကလည်း သူ ကူခဲ့ဖူးသည်။ ကိုဂျော်ကီနှင့်တွေ့လျှင် ငွေငါးဆယ်လောက်တော့ ချေးလို့ရနိုင်သည်။ ပြန်မပေးပါနဲ့တော့ဗျာဟူ၍ပင် ပြောချင်ပြောပေလိမ့်မည်။

    ဒီအချိန် ကိုဂျော်ကီ ဘယ်မှာရှိနိုင်သည်ကို သူသိ၏။ ဒဂုံဟိုတယ်အပေါ်ထပ် ဘားခန်းမှာ။

    အလယ်မကျတကျစားပွဲမှာ ကိုဂျော်ကိုတွေ့ရသည်။ ကံအားလျော်စွာ သူ့စားပွဲမှာ သူတစ်ယောက်တည်းပင် ထိုင်နေသည်။ စားပွဲနားလျှောက်သွားပြီး နှုတ်ဆက်လိုက်သည်။ ကိုဂျော်ကီက "လာဗျာ ထိုင်"ဟု ခရီးဦးကြိုပြုသည်။ သူ ၀င်ထိုင်သည်။ ကိုဂျော်ကီရှေ့မှာ ဖန်ခွက်တစ်ခွက်နှင့်ထည့်ထားသော ရမ်အရက်ကို တွေ့သည်။ ဖန်ခွက်ကအပြည့်။ ထပ်မှာထားသည်ဖြစ်မည်။ ကိုဂျော်ကီ ပုံစံက တော်တော်နှင့်မှန်ထားပြီးသားအခြေအနေ။

    ကိုဂျော်ကီက စားပွဲထိုးကို ဖန်ခွက်တစ်လုံးမှာလိုက်သည်။ သူ အရက်သောက်ဖို့ငြင်းမည်ဟု စိတ်ကူးသေးသည်။ မသောက်ဘဲနှင့် ဒီကိုလာသည်ဆိုလျှင် ယုတ္တိမရှိမည်စိုး၍ ဘာမျှမပြောပဲနေလိုက်သည်။

    "ဘယ်ကလာလဲ..."

    ကိုဂျော်ကီကမေးသည်။

    "သုံးဆယ်သုံးလမ်းဘက်ကဗျာ"

    ကိုဂျော်ကီက ခေါင်းညိတ်သည်။ ဘာမျှထပ်မပြော။ ဒူးယားဗူးကို သူ့ဘက်တိုးပေးသည်။ သူ တစ်လိပ်ယူပြီး မီးညှိရှိုက်ဖွာနေသည်။ ဘားခန်းထဲတွင် မီးခိုးငွေ့များ၊ အရက်နံ့များဖြင့် မွှန်ထူနေသည်။

    စားပွဲထိုးက ဖန်ခွက်တစ်လုံးလာချပေးသည်။

    "ချဗျာ"

    ကိုဂျော်ကီကပြောသဖြင့် ဖန်ခွက်ထဲ လက်တစ်လုံးလောက်ထည့်ပြီး ရေခဲတစ်တုံး၊ ဆိုဒါများများရောစပ်လိုက်သည်။ အရက်ကို တစ်ငုံငုံသည်။

    တီးဝိုင်းအဖွဲ့က မြန်မာတီးလုံးဖြင့်စတင်ဧည့်ခံနေပြီ။ ကိုယ်လိုချင်တာမပြောခင် သူတစ်ပါးအကြောင်း အရင်မေးရသည့် လူမှုရေးထုံးစံအရ သူ စကားစသည်။

    "ကိုဂျော်ကီ လုပ်ငန်းကိုင်ငန်းကောင်းရဲ့လား..."

    "မကောင်းဘူး.."

    ကိုဂျော်ကီက ရှုံ့ရှုံ့မဲ့မဲ့ပြန်ပြောသည်။ မေးလိုက်တာ မှားသွားပြီဟု သိလိုက်၏။ ဘာမျှမတတ်နိုင်။ ကိုဂျော်ကီက သူ့ကို အရက်တိုက်ခြင်းမှာ ပြောသမျှ နားထောင်ဖို့အတွက်ဖြစ်သွားပြီ။

    "ဘယ်လိုဖြစ်လို့လဲဗျာ..."

    စကားထောက်ပေးလိုက်ရသည်။ ကိုဂျော်ကီက ဖန်ခွက်ထဲမှာ အရက်လက်ကျန်ကိုရှင်းလိုက်ပြီ။

    "အခြေအနေ တော်တော်ဆိုးနေတယ်ဗျာ။ သုံးဘီးကားနှစ်စင်းအချောင်ရလို့ဝယ်လိုက်တာ။ ခုတော့ သုံးဘီးတွေ နယ်သွားရမယ်ဆိုလို့ ဈေးတွေ ထိုးကျသွားပြီလေ.."

    အရက် ထပ်ထည့်သည်။ ဆိုဒါမထည့်တော့။ ရေခဲတစ်တုံးသာထည့်ပြီး တစ်ငုံငုံသည်။ ဆက်၍..

    "ဃ"နံပါတ်ကားတစ်စင်းလည်းရှိသေးတယ်။ ကားက တော်တော်စုတ်တယ်။ လက်ပူတိုက်ဖို့တောင် အချိန်ရမှာမဟုတ်ဘူး။ သေချာပါတယ်။ နယ်နှင်ခံရမှာပဲ"

    "ဒီလိုလဲ ဘယ်ဟုတ်ဦးမလဲလေ"

    ဟု သူက မရေမရာဝင်ပြော၏။ သူပြောသည်ကို ကိုဂျော်ကီ ကြားတောင်ကြားဟန်မတူ။ တီးဝိုင်းဆီသို့ ငေးကြည့်နေပြီးမှ

    "လူများ အဆင်မပြေချင်ဘူးဆို ဆက်တိုက်ပဲ။ ဒီကြားထဲ တယ်လီဖုန်းကြွေးက လာလိုက်သေးတယ်ဗျာ။ ပုံနှိပ်စက်ရောင်းထားတဲ့အတွက် အမြတ်ခွန်လည်း သွားသွင်းရဦးမယ်။ ကျွန်တော့်ဘ၀ပျက်တာပါပဲဗျာ"ဟု စိတ်ပျက်လက်ပျက်ပြောသည်။ အရက်ကို သောက်ချလိုက်ပြန်သည်။ ကိုဂျော်ကီသည် စကားအဖြစ်သာမဟုတ်ဘဲ တကယ်ဘ၀ပျက်နေသည့်ပုံစံမျိုး ဖြစ်နေသည်။

    "ခင်ဗျားရော အလုပ်အကိုင်ကောင်းရဲ့လား"ဟု ကိုဂျော်ကီက လူမှုရေးအရမေးသည့်ပုံစံမျိုးဖြင့် မေးသည်။

    "မဆိုးပါဘူးဗျာ။ ပုံမှန်ကလေးပေါ့"

    ဟု သူ ဖြေသည်။ ငွေငါးဆယ်ချေးဖို့ကိစ္စ မပြောတော့ဟု ဆုံးဖြတ်လိုက်သည်။ ကိုဂျော်ကီကို အားပေးစကား

အနည်းငယ်ပြောပြီး နှုတ်ဆက်ထွက်လာခဲ့သည်။

    ကိုဂျော်ကီ၏အဖြစ်နှင့်နှိုင်းဆာလိုက်သောအခါ သူ့စိတ်ထဲမှာ တော်တော်ပေါ့ပါးသွားသည်။ သူသည် သုံးဘီးကား ၀ယ်ထားသူမဟုတ်သဖြင့် ဆုံးရှုံးစရာမရှိ။ တယ်လီဖုန်းလည်းမရှိ။ အမြတ်ခွန်လည်း ဆောင်စရာမလို။

    ကိုဂျော်ကီ၏ သုံးဘီးကားတွေထက် သူ့ဆီမှာ လောလောဆယ်ရှိနေသော ငွေနှစ်ဆယ်လျော့လျော့က ပို၍တန်ဖိုးရှိနေပြီ။ သုံးရက်လောက်တော့ ထမင်းစားစရာ ရှိနေသေးသည်။ ကဲ..ဘာလိုသေးလဲဟု အားတက်သွားပြီးလျှင် ဒဂုံဟိုတယ်ပေါ်မှ ရင်ကော့၍ ဆင်းလာခဲ့လေသည်။

မင်းလူ (သဘင်မဂ္ဂဇင်း၊ ဒီဇင်ဘာ၊ ၁၉၈၅)