27.09.2012 နေ့ဖတ်ရန်သတင်းများ

by Myanmar Journal on Wednesday, September 26, 2012 at 7:40pm ·

ရှင်ဇိုအာဘေး ဂျပန် အတိုက်အခံ ပါတီ ခေါင်းဆောင် ဖြစ်လာ

မစ္စတာ အာဘေးက သူ့ကိုထောက်ခံ သူတွေကို မိန့်ခွန်း ပြောခဲ့စဉ်

ဂျပန်နိုင်ငံမှာ မကြာခင် ရွေးကောက်ပွဲတွေ ကျင်းပဖို့ ရှိနေချိန်မှာပဲ အတိုက်အခံ လစ်ဘရယ်လ် ဒီမိုကရက်တစ် ပါတီ က တရုတ်နိုင်ငံအပေါ် တင်းမာတဲ့ သဘောထား ရှိသူလို့ လူသိများတဲ့ ဝန်ကြီးချုပ်ဟောင်း ရှင်ဇို အာဘေး ကို ပါတီ ခေါင်းဆောင်သစ်အဖြစ် ရွေးချယ်လိုက်ပါတယ်။

သူဟာ ဂျပန် အမျိုးသားရေးနဲ့ ဂျပန်နိုင်ငံရဲ့ အခန်းကဏ္ဍကို ပိုမိုကြီးမားအောင်လုပ်ဆောင်ဖို့ကို ဆော်သြခဲ့သူလည်း ဖြစ်ပါတယ်။

၂၀၀၆ ခုနှစ် စက်တင်ဘာလတုန်းက ဂျူနီချီရို ကိုအိဇုမိ ကို အနိုင်ရပြီး ဝန်ကြီးချုပ်ဖြစ်လာခဲ့တဲ့နောက် ၁ နှစ်အကြာမှာပဲ ကျန်းမာရေး အခြေအနေ မကောင်း တာရယ် နောက်ပြီး ဂျပန် အထက်လွှတ်တော်မှာ အရှုံးကြီး ရှုံးခဲ့တာ တွေကြောင့် ရာထူး ကနေ နုတ်ထွက် ခဲ့သူလည်း ဖြစ်ပါတယ်။

သူစတက်တဲ့ အချိန်တုန်းက လူထုထောက်ခံမှုတွေရခဲ့ပေမယ့် ပါတီအတွင်း မငြိမ်မသက်ဖြစ်မှုတွေနဲ့ အရှုပ်တော်ပုံတွေကြောင့် လူထုထောက်ခံမှုတွေ ထိခိုက်ခဲ့ရပါတယ်။

ဂျပန် ပင်လယ်ပြင် နဲ့ ပိုင်နက် နယ်မြေ တွေဟာ စိုးရိမ်စရာ အခြေအနေ ရှိနေကြောင်းနဲ့ ဒီနယ်မြေကို ကာကွယ် စောင့်ရှောက်ဖို့ သူ့အနေနဲ့ အစွမ်းကုန် လုပ်သွားမယ်လို့ ရှင်ဇို အာဘေးက မဲဆွယ် စည်းရုံး ပွဲတွေမှာ ပြောသွား ပါတယ်။

အရှေ့တရုတ် ပင်လယ်မှာ ရှိတဲ့ ကျွန်းစုတွေနဲ့ ပတ်သက်လို့ တရုတ် နိုင်ငံနဲ့ အကြီးအကျယ် အငြင်းပွား နေမှုမှာ နောက်ဆုတ် ပေးဖို့ တရုတ် အစိုးရက ငြင်းဆန် နေတာပါ။

လာမယ့် ရွေးကောက်ပွဲမှာ သူသာ အနိုင်ရ ခဲ့မယ် ဆိုရင် Liberal Democratic Party ကို အင်အားကြီး သြဇာရှိတဲ့ ပါတီ အဖြစ် ပြန်လည် လုပ်ဆောင် သွားမယ်လို့ ပြောနေ ပါတယ်။

လစ်ဘရယ် ဒီမိုကရက်တစ် ပါတီဟာ ဂျပန်နိုင်ငံကို ၂၀၀၉ ခုနှစ်အထိ နှစ်ပေါင်း ၅၀ကျော် အုပ်ချုပ်ခဲ့တာ ဖြစ်ပြီး လာမယ့် သီတင်းပတ်တွေ အတွင်း ရွေးကောက်ပွဲ ကျင်းပဖို့ ရှိရာမှာ စစ်တမ်းတွေ အရ ထိပ်က ပြေးနေ ပါတယ်။

ဆီးရီးယား စစ်ဌာနချုပ် တိုက်ခိုက်ခံရ

စစ်ဌာနချုပ်ထဲ သူပုန်တွေ အတင်းဝင်စီးဖို့ ကြိုးစားတဲ့အတွက် ပစ်ခတ်မှုတွေ ရှိခဲ့

ဆီးရီးယားနိုင်ငံ ဒမာ့စကပ်စ်မြို့က လုံခြုံရေး ထူထူထပ်ထပ် ချထားတဲ့ စစ်ဌာနချုပ်တခုကို သူပုန်တွေ တိုက်ခိုက်ခဲ့တဲ့အတွက် အကြီးအကျယ် ထိခိုက်ပျက်စီးသွားပါတယ်။

ဗုံးနှစ်လုံး ပေါက်ကွဲခဲ့ရာမှာ တလုံးက စစ်ဌာနချုပ် ပရဝဏ် အတွင်းမှာ ပေါက်ကွဲခဲ့တာ ဖြစ်ပြီး ဌာနချုပ် အဆောက်အအုံ မီးစွဲလောင်ခဲ့ပါတယ်။

အဆောက်အအုံထဲ သူပုန်တွေ အတင်းဝင်စီးဖို့ ကြိုးစားခဲ့ရာမှာ ပစ်ခတ်မှုတွေ ဖြစ်ပွားခဲ့ပါတယ်။

တိုက်ခိုက်မှုအတွင်း စစ်အရာရှိ တဦးတလေမှ သေဆုံးတာမျိုး မရှိပေမယ့် အဆောက်အအုံ စောင့်တဲ့ အစောင့် တချို့တော့ ဒဏ်ရာရသွားတယ်လို့ ဆီးရီးယား အစိုးရ တာဝန်ရှိပုဂ္ဂိုလ်တွေက ပြောပါတယ်။

အစိုးရ ဆန့်ကျင်တဲ့ လှုပ်ရှား တက်ကြွသူတွေကတော့ နှစ်ဘက်စလုံးမှာ အသေအပျောက်တွေ ရှိတယ်လို့ ပြောပါတယ်။

အီရန်နိုင်ငံရဲ့ Press TV ရုပ်မြင်သံကြား ဌာနကတော့ တိုက်ခိုက်မှုတွေအတွင်း သူတို့ရဲ့ သတင်းထောက် မာယာ နက်ဆာ လက်ဖြောင့် သေနတ်သမားတဦးရဲ့ လက်ချက်နဲ့ သေဆုံးသွားခဲ့ကြောင်းနဲ့ Press TV နဲ့ AL Alam ဗြူရို အကြီးအကဲ ဟူစိန် မောတက်ဇာလည်း ဒဏ်ရာရခဲ့ကြောင်း ထုတ်ဖေါ် ကြေညာသွားပါတယ်။

အခုအခါ အဲဒီ တိုက်ခိုက်သူတွေကို အမြစ်ဖြုတ် ချေမှုန်းဖို့ ဆီးရီးယား လုံခြုံရေး တပ်ဖွဲ့တွေက တအိမ်ဝင် တအိမ်ထွက် လိုက်ရှာနေတယ်လို့ သံတမန်တွေက ပြောပါတယ်။

ဧရာဝတီတိုင်း ဝန်ကြီးချုပ်ကို စွပ်စွဲ ပြစ်တင်ဖို့ ပြင်နေ

ရေဘေးသင့်မှု အပါအဝင် ဧရာဝတီတိုင်း အတွင်း ပြည်သူတွေ အခက်အခဲ မျိုးစုံ ကြုံနေရ

ဧရာဝတီ တိုင်း ဒေသကြီး လွှတ်တော် ကိုယ်စားလှယ်တွေက သူတို့ ရဲ့ လုပ်ပိုင်ခွင့်၊ တာဝန်နဲ့ ဝတ္တရား တွေကို ထိပါး ခံလာရတယ် ဆိုပြီး တိုင်း ဝန်ကြီးချုပ် ဦးသိန်းအောင် အပေါ် စွပ်စွဲ ပြစ်တင်ဖို့ ပြင်ဆင် နေကြပါတယ်။

လာမယ့် တိုင်း ဒေသကြီး လွှတ်တော်မှာ တိုင်း ဝန်ကြီးချုပ်ကို စွပ်စွဲ ပြစ်တင်ဖို့ ဒေသကြီး လွှတ်တော် ကိုယ်စားလှယ် လေးပုံ တစ်ပုံထက် မနည်းက လက်မှတ် ရေးထိုး ထားကြ ပြီးပြီလို့ ဧရာဝတီတိုင်း လွှတ်တော် ဥက္ကဌ ဦးဆန်းဆင့်က ဘီဘီစီကို ပြောပါတယ်။

လွှတ်တော် အမတ် စုစုပေါင်း ၇၀ ကျော် ရှိတဲ့ အထဲက ၂၀ ကျော်က လက်မှတ်ရေးထိုးပြီး ဖြစ်လို့ သတ်မှတ်ချက် လေးပုံ တစ်ပုံထက် ကျော်လွန် နေပြီလို့ ဆိုပါတယ်။

ပြည်သူတွေရဲ့ ဆန္ဒတွေ၊ အခက် အခဲတွေကို လွှတ်တော် အမတ်တွေက လွှတ်တော်မှာ မေးခွန်း မေးတာ အဆိုတင်သွင်း တာတွေ လုပ်ရာမှာလည်း အစိုးရပိုင်းက တချို့ကိစ္စတွေ အပေါ် ကန့်သတ် တာတွေ ရှိခဲ့တယ်လို့ သူက ပြော ပါတယ်။

ကန့်သတ် ချုပ်ချယ် ခံနေရတဲ့ ကိစ္စတွေ အများကြီး ရှိပြီး ဌာန ဆိုင်ရာ တွေနဲ့ ပတ်သက်တဲ့ မလျော်ကန်မှု တွေ၊ ငွေကြေး ကိစ္စတွေကို ပြောဆိုတဲ့ မေးခွန်းတွေ အဆိုတွေ ဆိုရင် လွှတ်တော် ထဲမှာ မမေး စေချင်ဘူးလို့ ဧရာဝတီတိုင်း လွှတ်တော် ဥက္ကဌ ဆိုပါတယ်။

ပြီးခဲ့တဲ့ လွှတ်တော် အစည်း အဝေးတွေတုန်းက လွှတ်တော် ကိုယ်စားလှယ်တွေ အပေါ် ဖိအား ပေးရာ ရောက်တာမျိုး၊ လွှတ်တော် ကိုယ်စားလှယ်တွေ အပေါ် ဌာန ဆိုင်ရာ တွေက အတင်း အကျပ် သက်သေ ထွက်ဆိုချက် ရယူတာတွေ ရှိခဲ့တဲ့ အတွက် လူဝင်မှု ကြီးကြပ်ရေး ဌာန အပေါ် လွှတ်တော် ဥပဒေ ၇၃ အရ တရားစွဲဆို ခဲ့တယ်လို့ လည်း သူက ပြောပါတယ်။

အဲဒီ ကိစ္စရပ်တွေ ကိုလည်း ထိထိ ရောက်ရောက် ဖြေရှင်း ပေးတာတွေ မရှိခဲ့တဲ့ အတွက် လွှတ်တော် ကိုယ်စားလှယ် တွေနဲ့ တိုင်း အစိုးရကြားမှာ အဆင် မပြေ တာတွေ ရှိလာ တယ် လို့ ပုသိမ်မြို့ လွှတ်တော်ရုံး မှာ စက်တင်ဘာလ ၂၄ ရက်နေ့က သတင်းစာရှင်းလင်းပွဲမှာ ပြောခဲ့တဲ့ အကြောင်း ဧရာဝတီတိုင်း လွှတ်တော် ဥက္ကဌ ဦးဆန်းဆင့်က ပြောပါတယ်။

အာရှဓနနဲ့ မေဖလားဝါး ဘဏ်တွေပေါ်ပိတ်ပင်မှု အမေရိကန်ပယ်ဖျက်

ငွေကြေးခ၀ါချမှုတွေနဲ့ ဆက်နွယ်ပြီး မြန်မာနိုင်ငံက ပုဂ္ဂလိက ဘဏ်နှစ်ခုအပေါ် ကန့်သတ် ပိတ်ပင်ထားတာတွေကို အခုနောက်ဆုံး အမေရိကန် ပြည်ထောင်စုက ပယ်ဖျက်ပေးလိုက်ပါတယ်။

မြန်မာနိုင်ငံမှာ တချိန်က အကြီးဆုံးပုဂ္ဂလိကဘဏ် နှစ်ခုဖြစ်တဲ့ မေဖလားဝါးဘဏ်နဲ့ အာရှဓန ဘဏ်တွေကို အမေရိကန် ဘဏ္ဍာရေး လုပ်ငန်းတွေက ၀န်ဆောင်ခွင့် လုပ်ကိုင်ခွင့်မပေးဘဲ တားမြစ်ထားတာတွေကို ပယ်ဖျက်လိုက်တဲ့အကြောင်း အမေရိကန် ဘဏ္ဍာရေးဝန်ကြီးဌာနရဲ့ ရာဇ၀တ်မှု တိုက်ဖျက်ရေးအဖွဲ့က ဗုဒ္ဓဟူးနေ့မှာ ကြေညာချက် ထုတ်ပြန်လိုက်တာပါ။

ငွေကြေး ခ၀ါချတဲ့ အရင်းအမြစ် လုပ်ငန်းတွေ အဖြစ်နဲ့ရော ဒီဘဏ်နှစ်ခုရဲ့ လုပ်ငန်း ရှင်တွေဟာ တရားမ၀င် ဘဏ္ဍာရေး လုပ်ငန်းတွေနဲ့ ဆက်နွယ်တဲ့ လုပ်ရပ်တွေ ရှိနေတယ် ဆိုပြီး ၂၀၀၄ ခုနှစ် ဧပြီလ ၁၂ ရက်နေ့ ကတည်းက ဥပဒေအဖြစ် ထုတ်ပြန် တားမြစ်ထားတာ ဖြစ်ပါတယ်။

ဒါပေမဲ့လည်း မြန်မာ အစိုးရက မေဖလားဝါးနဲ့ အာရှဓန ဘဏ်တွေရဲ့လုပ်ငန်း လိုင်စင်တွေကို ပြန် လည် ရုပ်သိမ်းလိုက်တဲ့အတွက် ဒီလုပ်ငန်းတွေဟာ ခြိမ်းခြောက်မှုအဖြစ် မသတ်မှတ်နိုင်တော့တဲ့ အတွက် တားမြစ်ချက်ကို ရုပ်သိမ်းဖို့ ဆုံးဖြတ်ခဲ့တာလို့ အမေရိကန် ဘဏ္ဍာရေး ၀န်ကြီးဌာနရဲ့ကြေညာချက်က ဖော်ပြခဲ့တာပါ။

ဒီကြေညာချက် မတိုင်မီမှာဘဲ အမေရိကန် ပြည်ထောင်စုမှာ စီးပွားရေးလုပ်ငန်း လုပ်ကိုင်ခွင့်နဲ့ ဥစ္စာပစ္စည်း ပိုင်ဆိုင်ခွင့် တားမြစ်ခံရသူတွေအဖြစ် သမ္မတ ဦးသိန်းစိန်အပေါ် ကန့်သတ် တားမြစ်ထားတာကိုလည်း ဘဏ္ဍာရေး ၀န်ကြီးဌာနက ပယ်ဖျက်ပေးခဲ့ပါတယ်။ ကုလသမဂ္ဂ အထွေထွေ ညီလာခံကို တက်ရောက်ရင်း အမေရိကန် ပြည်ထောင်စုကို ရောက်လာမယ့် ခရီးစဉ် မတိုင်မီမှာဘဲ သမ္မတဦးသိန်းစိန် အပေါ် အမေရိကန်နိုင်ငံတွင်း ခရီးသွားလာခွင့် တားမြစ်ချက်ကို သမ္မတ ဘရက်ခ် အိုဘားမားက ရုပ်သိမ်းပေးခဲ့တာပါ။

မြန်မာနိုင်ငံမှာ အပြောင်းအလဲတွေ ထွက်ပေါ်လာတာနဲ့ အမျှ ဆက်ဆံရေးတွေ တိုးမြှင့်လာနေတဲ့ အမေရိကန် ပြည်ထောင်စုက အရေးယူ ဒဏ်ခတ်မှုတွေကို တဖြည်းဖြည်း လျှော့ပေါ့ပေးနေရာမှာ သမ္မတဦးသိန်းစိန်ရော မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ပါ ရောက်ရှိနေတဲ့အချိန်မှာ နောက်ထပ် ဖြေလျှော့မှုတွေ တွေ့မြင်ရနိုင်တယ်လို့လည်း မျှော်လင့်ချက်တွေ ထွက်ပေါ်နေတာ ဖြစ်ပါတယ်။

သမ္မတဦးသိန်းစိန် အမေရိကန်ခရီးစဉ် သမ္မတရုံးဝန်ကြီး ဦးစိုးသိန်းနဲ့ VOA မေးမြန်းခန်း

မြန်မာသမ္မတ ဦးသိန်းစိန်အနေနဲ့ ၆၇ ကြိမ်မြောက် ကုလသမဂ္ဂ အထွေထွေ ညီလာခံကြီးမှာ စက်တင် ဘာလ ၂၇ ရက် ကြာသာပတေးနေ့ကျရင် မိန့်ခွန်းပြောကြားဖို့ရှိပါတယ်။ သမ္မတဦးသိန်းစိန်ဟာ အမေ ရိကန်ပြည်ထောင်စု နယူးယောက်မြို့ကို ရောက်ရှိလာတဲ့ မနေ့ အင်္ဂါနေ့မှာပဲ မြန်မာ့ ဒီမိုကရေ စီခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံခဲ့သလို ဒီကနေ့ ဗုဒ္ဓဟူးနေ့မှာတော့ အမေရိကန် နိုင်ငံခြားရေးဝန်ကြီး ကလင်တန်နဲ့ တခြား သြဇာကြီးတဲ့ အမေရိကန်ထိပ်တန်း အရာရှိ ဟောင်းတွေနဲ့လည်း တွေ့ဆုံဖို့ ရှိပါတယ်။ အသေးစိတ်ကိုတော့ သမ္မတဦးသိန်းစိန်နဲ့အတူ လိုက်ပါလာတဲ့ သမ္မတရုံးဝန်ကြီး ဦးစိုးသိန်းကို မေးမြန်းပြီး ကိုဝင်းမင်း က တင်ပြထားပါတယ်။

မေး။ ။ မနေ့က ဒေါ်အောင်ဆန်းစုကြည် ဆွေးနွေးပွဲနဲ့ ပတ်သက်ပြီး နည်းနည်းပြောပြလို့ရမလား။ဖြေ။  ။ နယူးယောက်မှာ အတူတူရောက်နေကြတဲ့ ကျနော်တို့ဘက်ကလည်း နိုင်ငံတော် သမ္မတကြီး၊ ဟိုဘက်ကလည်း အမျိုးသား ဒီမိုကရေစီအဖွဲ့ချုပ် ဥက္ကဋ္ဌ၊ မြန်မာ့ဒီမိုကရေစီ ခေါင်းဆောင် အမကြီးနဲ့ အတူတူ ရှိနေတော့ အမကြီးက လာပြီးတော့  နှုတ်ဆက်တာပေါ့ဗျာ။ တွေ့တယ်၊ စကားလေး ဘာလေး ပြောတယ်။ ရန်ကုန်မှာလိုပဲ၊ နေပြည်တော်မှာလိုပဲ တယောက်တယောက် ရင်းနှီးကြ တယ်လေ။ တွေ့ဆုံတယ်၊ ဒီသဘောပါ။

မေး။ ။ ဟုတ်ကဲ့။ ဒီတွေ့ဆုံပွဲမှာ အရေးပါတဲ့ တခြားကိစ္စတွေ ဆွေးနွေးဖြစ်ခဲ့တာ ရှိလား။

ဖြေ။ ။ အဲဒီကိစ္စတွေ နည်းနည်းပါးပါး ရှိပါတယ်။ သို့သော်လည်းပဲ ဒါကတော့ ထုတ်ပြန်တာ မဟုတ်တဲ့ အတွက်ကြောင့် - ကိုဝင်းမင်းရာ- ကောင်းတဲ့ တွေ့ဆုံမှုလေးလို့ လောက်ပဲ ကျနော်က ပြောချင်ပါတယ်။

မေး။ ။ ဟုတ်ကဲ့။ အဲဒီတော့ ဘယ်လို အနေအထားကောင်းတဲ့ တွေ့ဆုံမှုလေးလို့ သုံးသပ်လို့ရလဲ ခင်ဗျ။ဖြေ။ ။ အော်- လူကြီးတွေ တွေ့တာကောင်းတာပေါ့ဗျာ။ (ရယ်သံ) အရင်တုန်းက တယောက်နဲ့ တယောက် မျက်နှာချင်းဆိုင်လို့မှ မရတာ။ အခုဟာကတော့ အတူတကွ လုပ်ဖော်ကိုင်ဘက်တွေအဖြစ် တိုင်းပြည် တိုးတက်ဖို့၊ သန်းခြောက်ဆယ်ခန့်သော ပြည်သူတွေ တိုးတက်ဖို့၊ ပညာရေး၊ ကျန်းမာရေး၊ လူမှု- စီးပွားရေး အကုန်ပေါ့ဗျာ။ ဒီအတွက် နှစ်ယောက်ရဲ့အားက နည်းတဲ့အားလားဗျာ။

မေး။ ။ ဟုတ်ကဲ့ ဝန်ကြီး၊ နောက်တခုက ဒီနေ့ တကယ့် အဆင့်မြင့် အရာရှိကြီးတဦးဖြစ်တဲ့ အမေရိကန် နိုင်ငံခြားရေးဝန်ကြီးနဲ့တွေ့ဆုံပွဲကရော ဘယ်လို ရည်ရွယ်ချက်တွေ ထားပြီးတော့ ဘာတွေ အဓိက ဆွေးနွေးဖို့ ရှိလဲမသိဘူးခင်ဗျာ။

ဖြေ။ ။ ဟီလာရီကလင်တန်နဲ့ မကြာခဏတွေ့ပါတယ်။ မကြာခဏဆိုတာ ခဏ ခဏတော့ မဟုတ် ဘူးပေါ့လေ။ ဟိုး ယခင်နှစ် ကာလတွေကတည်းကစလို့ ပြီးခဲ့တဲ့ နိုဝင်ဘာ ပထမ- ဒီလာပြီးတဲ့ နောက် ပိုင်းကတည်းက တွေ့တာပဲလေ။ တလောလေးကပဲ  ကမ္ဘောဒီးယားနိုင်ငံ၊ Siem Reap မှာ ထပ်တွေ့ တယ်လေ။ အခုလည်း တွေ့တာပေါ့။ တွေ့တဲ့အခါ ကောင်းတဲ့ရလဒ်တွေချည့်ပဲ ပေါ်ပေါ် လာတာပါပဲ။ ကျနော်တို့ကလည်း ကျနော်တို့ လုပ်တာတွေနဲ့ ဆွေးနွေးကြတယ်။ သူကလည်း သူမြင်တာတွေ ဆွေးနွေးလေ့ ရှိတယ်။ ပြီးရင် အမေရိကန်အစိုးရ လုပ်သင့်လုပ်ထိုက်တာတွေလည်း သူက အမြန် အကောင်အထည် ဖော်ပေးတယ်လေ။ ဒါ- အလွန်ကောင်းတဲ့ တွေ့ဆုံမှုပေါ့။

မေး။ ။ ဟုတ်ကဲ့။ ဒီတွေ့ဆုံပွဲကနေ ဝန်ကြီးတို့ မျှော်လင့်ထားတာတွေရော ရှိပါလား။

ဖြေ။ ။ မျှော်လင့်ထားတာတွေ ပြောရမယ်ဆိုရင် ရှိတာပေါ့ဗျာ။ သို့သော်လည်း မျှော်လင့်ကောင်းတဲ့ အရာ မဟုတ်တော့ ကိုယ်က- ဒါက သူတို့အစိုးရရဲ့ကိစ္စလေ။ ကျနော်တို့ကလည်း ကျနော်တို့ ပြည်သူ လူထုအကျိုးအတွက် ပြုပြင်ပြောင်းလဲရတာကိုး။ သူတို့အပိုင်းကလည်း သူတို့ လုပ်သင့်လုပ်ထိုက်တာ လုပ်ဖို့ သူတို့ မူဝါဒတွေ ချထားတာပဲ။ သူတို့က ကျနော်တို့နဲ့ ဟန်ချက်ညီညီ လိုက်ပြီး move လုပ်မယ် ဆိုရင်တော့ အလွန်လှပတဲ့ အကျိုးကျေးဇူးကို နှစ်ဘက်လုံးရမှာပေါ့။

မေး။ ။ ဟုတ်ကဲ့ဝန်ကြီး၊ နောက်တခုက အခုခရီးစဉ်မှာ ဝန်ကြီးလေးပါးပေါ့နော်၊ နိုင်ငံခြားရေး ဝန်ကြီး ရယ်၊ ပြည်ထဲရေးနဲ့လူဝင်မှုကြိကြပ်ရေးရယ်၊ နောက် နယ်စပ်ရေးရာပေါ့နော်-ပါလာတာအပြင် လွှတ်တော် အမတ်နှစ်ဦးလည်းပါတဲ့အတွက် ဒီခရီးစဉ်မှာ နောက်ထပ်ပေါ့နော် နောက်နေ့ တွေမှာ လုပ်မယ့် အစီအစဉ်တွေမှာရော ဘယ်လိုအနေအထားတွေရှိမလဲ ဝန်ကြီးရေ။

ဖြေ။ ။ အားလုံးစုံအောင်ပေါ့ဗျာ၊ ဒီ Foreign Minister (နိုင်ငံခြားရေးဝန်ကြီး) ကတော့ သူ့ အလုပ် ကတော့ ဒီမူလအလုပ်ပေါ့။ ကျနော်တို့ ပါလာတာကတော့ Investment (ရင်းနှီးမြှုပ်နှံ မှု) နဲ့ ပတ်သက် လို့ အခြားဟာတွေမေးမယ်ဆိုရင်လည်း စီးပွားရေးလုပ်ငန်းနဲ့ နိုင်ငံရေး လုပ်ငန်းတွေ မေးရင်လည်း ကျနော်တို့က နည်းနည်းပြောမယ်။ ဝန်ကြီး ဦးခင်ရီကလည်း သူနဲ့ ပတ်သက်တဲ့ Black List (အမည် မည်းစာရင်း) ကိစ္စတွေ၊ ဗီဇာတွေ၊ တခြားမှတ်ပုံတင် ကိစ္စ တွေ၊ မှတ်ပုံတင် ဥပဒေတွေမေးရင် သူဖြေ မယ်။ အဲ့လိုပဲ ဦးသိန်းဌေးက ရခိုင်ပြည်နယ် အရေးအခင်းကို သူက နယ်စပ်ဝန်ကြီးအနေနဲ့ သွားနေတဲ့ အတွက် သိချင်တဲ့ကိစ္စတွေ In-depth (နက်နက်ရှိုင်းရှိုင်း) ပေါ့လေ၊ သူတို့က ဖြေနိုင်ဖို့ အတွက် ခေါ် လာခြင်းဖြစ်ပါတယ်။

အလားတူပဲ လွှတ်တော်ကိုယ်စားလှယ် နှစ်ဦးဖြစ်တဲ့ ကယားပြည်နယ်က ဦးစုရယ်၊ ကရင်ပြည် နယ်က ဦးထွန်းမြတ်အောင်၊ သူတို့ကလည်း UN (ကုလသမဂ္ဂ) မှာ တက်ရောက် နားထောင်ပြီးတော့ exposure (ထိတွေ့မှု) တွေရပြီးတော့ ဗဟုသုတတွေ ပိုရလာစေဖို့ ကျနော်တို့က ဒီလို ဖွဲ့စည်းဆောင်ရွက်လာခြင်းဖြစ်တယ်လို့ ပြောလိုပါတယ်။

မေး။ ။ ဝန်ကြီးအနေနဲ့လည်း မြန်မာ community (အသိုင်းအဝိုင်း) နဲ့လည်းတွေ့မယ်ပေါ့ နော်၊ သမ္မကြီး က မတွေ့နိုင်သော်လည်းပဲ အဲ့လို ကြားထားတာ ရှိပါတယ်။ စနေနေ့မှာလို့ ကြားထားပါတယ်။ အဲ့ဒီတော့ ဒီခရီးစဉ်တခုလုံးကနေပေါ့နော်၊ ဝန်ကြီးတို့အနေနဲ့ ဘယ်လို အကျိုးကျေးဇူးတွေ ရဖို့ မျှော်လင့်ထားပါလဲ။

ဖြေ။ ။ ကျနော်တို့ကတော့ သမ္မတကြီးလုပ်နေတဲ့ Message (သတင်းစကား) တွေကို UN မှာ officially (တရားဝင်) ပေးလိုက်မှာပေါ့။ ဒါက တကမ္ဘလုံးက ဒီ Message အပေါ်မှာ သုံးသပ် ကြမယ်၊ အကဲဖြတ်ကြမယ်၊ ဒါက လုပ်ငန်းကြီးတခုပေါ့။ ကျနော်တို့ ရောက်တဲ့အခါမှာ မီဒီယာအဆင့်ဆင့်က ကျနော်တို့ကို မေးနေတာတွေ ကျနော်တို့က ပိုပြီးတော့ Transparency ဖြစ်ဖြစ်၊ ပွင့်ပွင့်လင်း လင်း မြင်မြင် သာသာ သူတို့မေးတာတွေကို ကျနော်တို့ ရှင်းပြလျှက် ရှိတယ်။ အခု ခင်ဗျားမေး သလိုပေါ့။ မေးတော့ ကျနော်တို့ ပြောတာပေါ့။ အလားတူပဲ သက်ဆိုင် တဲ့ community ပေါ့။ US မှာရှိတဲ့ မြန်မာအသိုင်းအဝိုင်းနဲ့ ကြုံရင်ကြုံသလို ကျနော်တို့ မေးမြန်း ဖြေကြားတာတွေ ဆောင်ရွက် မယ်၊ တခြား US က Civil Society တွေဖြစ်တဲ့ တခြားဟာတွေ ပေါ့။ Asian Society တို့လို၊ US Asean Business Council တို့လို၊ US Chambers Commerce တို့လို စသဖြင့် ဒါတွေလည်း ကျနော်တို့ ထိတွေ့သွားမယ်လေ။ ဒါလေးတွေကို ကျနော်တို့ အလျဉ်းသင့်သလို ဆောင်ရွက်သွားဖို့ ရှိပါတယ်လို့ ပြောချင်ပါတယ်။ ဒီကိုလာတဲ့ ရည်ရွယ်ချက်ကတော့ UN မှာ နိုင်ငံတော် သမ္မတအနေ နဲ့ ပြောသင့်ပြောထိုက်တာတွေ၊ တင်ပြသင့် တင်ပြထိုက်တာတွေ တင်ပြခွင့်ရဖို့အတွက် လာတဲ့ ခရီးစဉ်ပဲဖြစ်ကြောင်း ပြောကြားလိုပါတယ်။

မေး။ ။ ဟုတ်ကဲ့၊ ကျေးဇူးအများကြီးတင်ပါတယ် ဝန်ကြီးခင်ဗျား။

ဖြေ။ ။ ကောင်းပါပြီ ခင်ဗျ။

လူကုန်ကူးမှုတိုက်ဖျက်ရေး အမေရိကန် ဦးစားပေးဆောင်ရွက်မည်

အမေရိကန်ပြည်ထောင်စု နယူးယောက်မြို့မှာ ကျင်းပနေတဲ့ ၆၇ ကြိမ်မြောက် ကုလအထွေထွေ ညီလာခံမှာ မနေ့ အင်္ဂါနေ့က မိန့်ခွန်းပြောကြားအပြီး ကုလသမဂ္ဂဌာနချုပ်မှာပဲ ကျင်းပတဲ့ Clinton Global Initiative ဆွေးနွေးပွဲမှာ အမေရိကန်သမ္မတ ဘရက်ခ် အိုဘားမားက လူမှောင်ခိုကူးမှု တိုက်ဖျက်ရေး ကြိုးပမ်းမယ့် အစီအစဉ်သစ်တွေကို ချပြခဲ့ပါတယ်။ အဲ့ဒီဆွေးနွေးပွဲမှာပဲ မြန်မာနိုင်ငံ က ပြောင်းလဲတိုးတက်လာနေတဲ့ အခြေအနေတွေနဲ့ပတ်သက်ပြီးတော့လည်း ချီးကျူးပြောခဲ့သလို အဓမ္မ လုပ်အားပေးစေခိုင်းမှုနဲ့ ကလေးစစ်သားပြဿနာ ကိစ္စရပ်တွေကိုလည်း မြန်မာ့ဒီမိုကရေ စီခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံစဉ် သူ ဆွေးနွေး ဖြစ်ခဲ့တဲ့အကြောင်းကိုလည်း ပြော ဆိုခဲ့ပါတယ်။ အပြည့်အစုံကိုတော့ ဗွီအိုအေရဲ့ အိမ်ဖြူတော် သတင်းထောက် Dan Robinson ပေးပို့ ထားတဲ့ ဆောင်းပါးကို အခြေခံပြီး မနန္ဒာချမ်းက တင်ပြပေးထားပါတယ်။

သမ္မတ ဘရက်ခ် အိုဘားမားက ကုလသမဂ္ဂဌာနချုပ်မှာ ကျင်းပနေတဲ့ Clinton Global Initiative ဆွေးနွေးပွဲမှာ လူမှောင်ခိုမှု တိုက်ဖျက်ရေး ကြိုးပမ်းမယ့် အစီအစဉ်သစ်တွေကို ကြေညာခဲ့ပြီး လူမှောင်ခိုကူးမှု တိုက်ဖျက်ရေးဟာ ဒီနေ့ခေတ် ကမ္ဘာကြီးမှာ ကြီးမားတဲ့ လူ့အခွင့်အရေးကိစ္စရပ် တခု အဖြစ် ရည်ညွှန်းပြီး ဒီလိုလူမဆန်တဲ့ လုပ်ရပ်မျိုးဟာ ယဉ်ကျေးတဲ့ လူ့အသိုင်းအ၀ိုင်းမှာ မရှိသင့်ဘူးလို့ ပြောဆိုခဲ့ပါတယ်။

“လူသားမျိုးနွယ်အတွက် ဒီကိစ္စဟာ ဂုဏ်သိက္ခာညှိုးနွမ်းစေတဲ့ လုပ်ရပ်ပါ။ လူမှုအသိုင်းအ၀ိုင်းတိုင်းက စိုးရိမ်ရမယ့်ကိစ္စလည်း ဖြစ်ပါတယ်။ ဘာကြောင့်လဲဆိုတော့ ဒါဟာ ကျနော်တို့ လူမှုအသိုင်းအ၀ိုင်းဆိုတဲ့ ဇာပုဝါကို ဆုတ်ဖြဲနေလို့ပဲ ဖြစ်ပါတယ်။ စီးပွားရေး လုပ်ငန်းတိုင်းမှာလည်း စိုးရိမ်စရာပါ။ ဘာကြောင့်လဲ ဆိုတော့ ဒါက ဈေးကွက်မှာ အနှောင့်အယှက် ဖြစ်တတ်လို့ပါ။ တိုင်းပြည်တိုင်းက စိုးရိမ်ရမယ့် ကိစ္စလည်း ဖြစ်ပါတယ်။ ဘာကြောင့်လဲဆိုတော့ အများပြည်သူတွေရဲ့ ကျန်းမာရေးကို အန္တရာယ်ပြု နေသလို အကြမ်းဖက် မှုတွေ ရာဇ၀တ်ဂိုဏ်းတွေကိုလည်း အားပေးရာ ရောက်နေပါတယ်။ ကျနော်ပြောနေတာဟာ တရားမျှတမှု ကင်းမဲ့နေတဲ့အကြောင်းနဲ့ လူမှောင်ခိုကူးမှုဟာ ဒီကနေ့ခေတ် ကမ္ဘာကြီးရဲ့ ကျေးကျွန်လုပ်ငန်းလို့တောင် တကယ်တမ်း ခေါ်ရမယ့် ကိစ္စကို ပြောနေတာပါ။”

သမ္မတအိုဘားမားကတော့ အမေရိကန်အစိုးရရဲ့ ကန်ထရိုက် ငှားရမ်းခိုင်းစေတဲ့ ၀န်ထမ်းတွေဟာ အဓမ္မ လုပ်အားပေးစေခိုင်းမှု တွေနဲ့ ဆက်နွယ်မှု မရှိရလေအောင် ပိုမိုတင်းကြပ်တဲ့ မူဝါဒတွေ ချမှတ်ဖို့ သမ္မတရဲ့ အာဏာနဲ့ အမိန့်ထုတ်ပြန်ခဲ့ပါတယ်။

လူမှောင်ခိုကူးမှုတွေကို ထောက်လှမ်းနိုင်ဖို့နဲ့ သားကောင်ဖြစ်ကြရသူတွေကို ကူညီဖို့ အစိုးရတွေ၊ ဒေသဆိုင်ရာ အာဏာပိုင်တွေကို လေ့ကျင့် သင်ကြားပေးဖို့ ကိစ္စတွေကိုလည်း သမ္မတက သူ့ရဲ့ အစီအစဉ်သစ်မှာ ထည့်သွင်းထားတာပါ။ ဒါ့အပြင် သားကောင် ဖြစ်ကြရသူတွေဟာ ရာဇ၀တ်သားတွေ မဟုတ်ကြဘူးလို့လည်း သမ္မတက အလေးထားပြောသွားပါတယ်။

လူမှောင်ခိုမှုရဲ့ သားကောင်ဖြစ်ကြရသူတွေကို အကူအညီပေးနိုင်ဖို့အတွက် ၀န်ဆောင်မှုလုပ်ငန်းတွေ တိုးမြှင့်ရေးနဲ့ အမေရိကန် ပြည်ထောင်စုက လူမှောင်ခိုမှုလုပ်ငန်းတွေရဲ့ လှုပ်ရှားမှုတွေ ကို စောင့်ကြည့်နိုင်မယ့် မဟာဗျူဟာတရပ်ကို အကောင်အထည် ဖော်မယ့် အစီအစဉ်ကိုတော့ သမ္မတက အထူးတာဝန်ပေးထားတဲ့ အဖွဲ့ကနေ ကြီးကြပ်ဆောင်ရွက်သွားမှာဖြစ်ပါတယ်။ ဒါ့အပြင် အစီအစဉ်သစ်တွေနဲ့ပတ်သက်လို့ ပြောဆိုရာမှာလည်း အဓမ္မလုပ်အားပေး ခိုင်းစေမှုနဲ့ ကလေးစစ်သားကိစ္စတွေကို ပြင်းပြင်းထန်ထန် ဆန့်ကျင်သူတဦးအဖြစ် မကြာသေးခင်တုန်းကမှ အိမ်ဖြူတော်မှာ တွေ့ဆုံခဲ့တဲ့ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်ကိုလည်း သမ္မတအိုဘားမား က ရည်ညွှန်းပြောဆိုသွားပါတယ်။

“မြန်မာနိုင်ငံနဲ့ ထိတွေ့ဆက်ဆံမှုတွေရဲ့ တစိတ်တပိုင်း အဖြစ်နဲ့ ပြုပြင်ပြောင်းလဲမှုတွေ ရှေ့ ဆက်နိုင်အောင် ကျနော်တို့ အားပေးသွား မှာပါ။ ဒါဟာ ဘာကြောင့်လဲဆိုတော့ တိုင်းပြည်ဆိုတာဟာ တသံတည်း တညီတညွတ်တည်း ရှိဖို့လိုနေလို့ပါ။ ကျနော်တို့ သားသမီး တွေဟာ ရောင်းကုန်တွေ မဟုတ်ကြပါဘူး”

မဲခေါင်မြစ်ဝှမ်း လူကုန်ကူးမှု တိုက်ဖျက်ရေး ကုလသမဂ္ဂ စီမံချက် UNIAP ရဲ့ စီမံချက်ညှိနှိုင်းရေးမှူး မဥမ္မာ အိအိချော ကတော့ ဒီနှစ် ၂၀၁၂ ခုနှစ်မှာ မြန်မာနိုင်ငံသားတွေအနေနဲ့ လူကုန်ကူးမှု အခြေအနေနဲ့ပတ်သက်ပြီး ဗဟုသုတတွေ ပိုများလာတာဟာ တိုးတက်မှု လက္ခဏာတရပ်ဖြစ်ပြီး အစိုးရအနေနဲ့လည်း လူကုန်ကူးမှုတိုက်ဖျက်ရေးလုပ်ငန်းတွေကို အရင်ကထက် ပိုပြီး ဖိဖိစီးစီး လုပ်ဆောင် နေတာ တွေ့ရပေမဲ့ လိုအပ်ချက်တွေတော့ ရှိနေဆဲလို့ အခုလို ပြောဆိုခဲ့ပါတယ်။

“လူကုန်ကူးမှုရဲ့ သဘောသဘာဝအရပေါ့နော် လျော့သွားလား၊ တိုးသွားလား ဆိုတာကတော့ ပြောရ ခက်တာပေါ့။ မနှစ်ကကျတော့ တနှစ်လုံးမှာ ၁၃၆ မှု ရှိတယ်။ ဒီနှစ်မှာကျတော့ အခုအချိန်ထိကတော့ ၈၂ မှု ရှိတယ်ဆိုတော့လေ အမှု အရေအတွက်နဲ့ကတော့ တိုးသွားခြင်း၊ လျော့သွားခြင်း က သိပ်ပြီး မကွာတာကို တွေ့ရပါတယ်။ ဒါတွေကို ထိထိရောက်ရောက် ကိုင်တွယ်ဖြေရှင်းနိုင်ဖို့ ဆိုရင်တော့ ကျမ ထင်ပါတယ် အထူးသဖြင့်တော့ တရားဥပဒေ စိုးမိုးရေးအပိုင်း၊ ပြီးတော့ ဒီလိုမျိုးကိစ္စတွေမှာ ၀န်ထမ်းတွေရဲ့ အသိအမြင်တွေ ပိုရှိလာဖို့ ကိုယ်လုပ်ဆောင်ရမယ့် အရာတွေနဲ့ ကိုယ့်ရဲ့ တာဝန်ယူမှုတွေကို ဒီ့ထက် ပိုပြီးတော့မှ တိုးမြှင့်လာဖို့က အဓိက လိုအပ်မယ်လို့ ထင်ပါတယ်။”

အမေရိကန်ပြည်ထောင်စုအနေနဲ့ကတော့ လူမှောင်ခိုမှုတိုက်ဖျက်ရေးလုပ်ငန်းကို ဆက်လက် ဦးဆောင်သွားမှာဖြစ်တယ်လုိ့ ကတိပြုရင်း သမ္မတအိုဘားမားက ကွန်ဂို၊ အင်ဒိုနီးရှားနဲ့ အမေရိကန်က လူမှောင်ခိုမှု တိုက်ဖျက်ရေး လှုပ်ရှားမှုမှာ တက်တက် ကြွကြွ ပါဝင်သူ အမျိုးသမီး ၃ ဦးကိုလည်း အသိအမှတ်ပြု ချီးကျူးစကားပြောဆိုသွားပါတယ်။

သန်းနဲ့ချီရှိနေကြတဲ့ လူမှောင်ခို ကူးခံရသူတွေအတွက် သတင်းစကား အဖြစ်နဲ့လည်း ဒီလူတွေကို ရှာဖွေ ကူညီရင်း လူ့ဂုဏ်သိက္ခာနဲ့အညီ ဖြစ်အောင် ကူညီမယ်လို့လည်း ကတိပြု ပြောဆို သွားခဲ့ပါတယ် ရှင်။

အီရန်သမ္မတမိန့်ခွန်း အထွေထွေညီလာခံမှာ အမေရိကန်သပိတ်မှောက်

မစ္စတာ မာမွတ် အမာဒီနီဂျက်ဟာ ဆက်လက်ကျင်းပနေတဲ့ ကုလသမဂ္ဂ အထွေထွေ ညီလာခံကြီးမှာ အီရန်သမ္မတ အနေနဲ့ မိန့်ခွန်းပြောဆိုနေပါတယ်။ အမေရိကန်အစိုးရ ကိုယ်စားလှယ်တွေကတော့ သမ္မတ အမာဒီနီဂျက်ရဲ့ မိန့်ခွန်းကို သပိတ်မှောက်တဲ့ အနေနဲ့ ညီလာခံ ခန်းမကနေ ထွက်ခွာသွားခဲ့ပါတယ်။

အီရန်နိုင်ငံအနေနဲ့ နျူကလီးယား လက်နက်ထုတ်လုပ်ဖို့ ကြိုးပမ်းနေမှုအပေါ် အမေရိကန်နဲ့ သူ့ရဲ့ မဟာမိတ်နိုင်ငံတွေက ခွင့်ပြုမှာမဟုတ်တဲ့အကြောင်း အမေရိကန် သမ္မတဘရက်အိုဘားမားက သတိပေးစကားပြောဆိုခဲ့အပြီး နောက်တနေ့မှာ မစ္စတာ အမာဒီနီဂျက် မိန့်ခွန်းပြောခဲ့ပါတယ်။

အီရန်နျူကလီးယားကိစ္စအပေါ် သံတမန်ရေးအရ အဖြေရှာနေမှုဟာ တစထက်တစ အချိန်ကုန်လာနေပြီ လို့လည်း သမ္မတ အိုဘားမားက ပြောဆိုခဲ့ပါတယ်။

ဒါပေမဲ့ မစ္စတာ အမာဒီနီဂျက် က AP သတင်းဌာနနဲ့ ပြုလုပ်တဲ့ တွေ့ဆုံဆွေးနွေးခန်းမှာ အမေရိကန် သမ္မတရဲ့ သတိပေး ပြောဆိုချက်ကို ပယ်ချလိုက်ပြီး၊ ကမ္ဘာ့ရေးရာကိစ္စတွေမှာ အမေရိကန်ရဲ့ စိုးမိုးနေမှု ဟာ ဆုံးခန်းတိုင်တော့မှာ ဖြစ်တယ်လို့ ပြောလိုက်ပါတယ်။

အမာဒီနီဂျက်ရဲ့ ဒုတိယမြောက် သမ္မတ သက်တမ်းဟာ လာမဲ့ ဇွန်လမှာ ကုန်ဆုံးတော့မှာ ဖြစ်ပါတယ်။ အီရန်နိုင်ငံ ဥပဒေ အရ သူဟာ တတိယ သက်တမ်းဆက်လက်တာဝန်ယူခွင့် ရမှာဟုတ်ပါဘူး။

အရှေ့အလယ်ပိုင်းမှာ မကြာခင်က ဖြစ်ပွားခဲ့တဲ့ အထိကရုန်းတွေအကြောင်းဟာ ဗုဒ္ဓဟူးနေ့ ကုလသမဂ္ဂ ညီလာခံမှာ ဆက်လက် အာရုံစိုက်ဆွေးနွေးပြောဆိုဖို့ ရှိနေပါတယ်။ အီဂျစ်နိုင်ငံရဲ့ သမ္မတသစ် မိုဟာ မက် မော်စီကလည်း နိုင်ငံတကာ ခေါင်းဆောင်တွေကို ပထမဆုံးအကြိမ် မိန့်ခွန်းပြော မှာ ဖြစ်ပါတယ်။

မြန်မာ့ပို့ကုန်ပိတ်ပင်မှု အမေရိကန် ရုပ်သိမ်းမည်

ကုလသမဂ္ဂအထွေထွေညီလာခံမှာ မိန့်ခွန်းပြောဖို့အတွက် နယူးယောက်မြို့မှာ ရောက်ရှိနေတဲ့ သမ္မတ ဦးသိန်းစိန်ဟာ မကြာခင်အချိန်ပိုင်းကပဲ အမေရိကန်နိုင်ငံခြားရေးဝန်ကြီး ဟီလာရီကလင်တန်နဲ့ တွေ့ ဆုံခဲ့ပါတယ်။ ဗုဒ္ဓဟူးနေ့ အစောပိုင်းတုန်းကလည်း သမ္မတဦးသိန်းစိန်ဟာ ကမ္ဘာတဝှမ်း ပရဟိတ လုပ်ငန်းတွေလုပ်နေတဲ့ Clinton Global Initaitive အဖွဲ့ဥက္ကဋ္ဌ အမေရိကန် သမ္မတဟောင်း ဘီလ်၊ ကလင်တန်၊ အမေရိကန် နိုင်ငံခြားရေးဝန်ကြီးဟောင်း ဟင်နရီ ကစ်ဆင်ဂျာ၊ ထိုင်းဝန်ကြီးချုပ် ယင်းလပ် ရှင်နာဝပ်တို့နဲ့ တွေ့ဆုံဆွေးနွေးခဲ့ပါတယ်။ အခုလို တွေ့ဆုံခဲ့ရာ သမ္မတဦးသိန်းစိန် တည်းခိုတဲ့ ဟိုတယ်လ်မှာပဲ ဗွီအိုအေ မြန်မာပိုင်းက သွားရောက်ပြီးတော့ သတင်းယူနေတဲ့ ဦးရော်နီညိမ်းကို မေးမြန်းတင်ပြထားပါတယ်။

မေး။ ။ ဦးရော်နီရေ့- သမ္မတဦးသိန်းစိန်နဲ့ တွေ့ဆုံမှုကို ဦးရော်နီမြင်ရ သိရတာတွေ ပြောပြပေးပါ အုံးရှင်။

ဖြေ။ ။ ဟုတ်ကဲ့။ အခု နောက်ဆုံးတွေ့ဆုံမှုကတော့ အရေးအကြီးဆုံးပဲပေါ့နော်။ အဲဒီကနေပဲ စပြော လိုက်ပါမယ်။ အခု မိနစ်ပိုင်းကလေးကပဲ နိုင်ငံခြားရေးဝန်ကြီး ဟီလာရီကလင်တန် ပြန်လည် ထွက်ခွာ သွားခဲ့ပါပြီ။ သူက ဝန်ကြီးလေးဦးပါဝင်တဲ့ သမ္မတဦးသိန်းစိန်အဖွဲ့နဲ့ မိနစ် လေးဆယ်လောက် ဆွေးနွေး သွားပါတယ်။ အဲဒီတော့ ပြီးလို့ရှိရင် ဘာတွေ ပြောလဲဆိုတာ အကျဉ်းချုပ်ပြောပြမယ်ဆိုပြီး သံ အမတ်ကြီး ဦးသန်းဆွေက ပြောခဲ့တဲ့အတိုင်းပဲ ပြန်ပြောပြပါတယ်။

သူ ပြောတဲ့ အဓိက နှစ်ချက်က မြန်မာနိုင်ငံမှာ ပြုပြင်ပြောင်းလဲရေးတွေ လုပ်နေတာတွေကို အသိ အမှတ်ပြု ချီးကျူးတယ်၊ နောက်တခုက လူ့အခွင့်အရေးတိုးတက်မှု ရှိလာတာတွေလည်း အသိ အမှတ်ပြု ချီးကျူးတယ်။ ပြီးတော့ လူ့အခွင့်အရေးနဲ့ ပတ်သက်တဲ့ Workshop ကြီးတခုကို အမေရိကန် အစိုးရကနေပြီးတော့မှ ကမကထပြုပြီး မြန်မာနိုင်ငံမှာ လာကျင်းပပေးချင်တယ် ဆိုတာကို ပြောတယ် ဆိုပြီးတော့ သံအမတ်ကြီး ဦးသန်းဆွေက ကျနော်တို့ကို ပြန်ရှင်းပြခဲ့ပါတယ်။

ဒါပေမဲ့လည်း ဝန်ကြီးဟီလာရီကလင်တန်နဲ့အတူ လိုက်ပါလာတဲ့ နိုင်ငံခြားသတင်း ဌာ နတွေ ပြန် ပြောပြတာကတော့ အရေးအကြီးဆုံးအချက်ပေါ့နော်။ မြန်မာနိုင်ငံကနေပြီးတော့ အမေရိ ကန် ပြည်ထောင်စုကို ရောင်းချဖို့ ပိတ်ပင်ထားတဲ့ ပို့ကုန်တွေ ပိတ်ပင်ထားမှုကို ရုပ်သိမ်း လိုက်တော့ မယ် ဆိုတာကို နိုင်ငံခြားသတင်းထောက်တွေဆီကနေ တဆင့် ပြန်သိရပါတယ်။ အဲဒါ ကတော့ ကျနော်တို့ မြန်မာအစိုးရအဖွဲ့ ဝန်ကြီးတွေနဲ့ သံအမတ်ကြီးတို့ကတော့ ကျနော်တို့ကို မပြော သွားပါဘူး။ အဲဒါကတော့ အကြောင်းရှိပါလိမ့်မယ်။ ဒါပေမဲ့ ရိုက်တာအပါအဝင် တခြားသတင်းဌာနတွေ ကတော့ ပြောသွားပါပြီ။

မေး။ ။ ဟုတ်ပါပြီ။ ဦးရော်နီ-

ဖြေ။ ။ အဲဒါကတော့ ဟီလာရီကလင်တန်နဲ့ပတ်သက်ပြီး သိရတဲ့ ကိစ္စပါ။

မေး။ ။ ဟုတ်ပါပြီ၊ ဦးရော်နီ။ အဲဒီတော့ ဟီလာရီကလင်တန်နဲ့တွေ့တဲ့အခါမှာ ဒီလိုမျိုး တိုးတက်မှုတွေ ကိုတော့ သိရပြီပေါ့လေ။ ဒီကနေ့ကတော့ အမေရိကန်မှာ အခုလောလောဆယ်က ဗုဒ္ဓဟူးနေ့ပဲ ရှိသေး တယ်။ ဒီနေ့ ဗုဒ္ဓဟူးနေ့မှာ သမ္မတဦးသိန်းစိန်နဲ့ တွေ့တဲ့သူတွေထဲမှာ အခုနက ဦးရော်နီညိမ်း ပြောသွား သလိုပဲ အမေရိကန်နိုင်ငံခြားရေးဝန်ကြီး ဟီလာရီကလင်တန်ပါတယ်၊ တခါ ထိုင်းဝန်ကြီးချုပ်တို့နဲ့ လည်း တွေ့တယ်…..

ဖြေ။ ။ အဲဒီမတိုင်ခင်မှာ ပထမဆုံးပေါ့နော်- နေ့လည်နှစ်နာရီမှာ သမ္မတဟောင်း ဘီလ် ကလင် တန် ရောက်လာပါတယ်။ သမ္မတဟောင်း ဘီလ်ကလင်တန်ဟာ ဦးသိန်းစိန်နဲ့ တနာရီ နီးပါး တွေ့ ဆုံဆွေးနွေး သွားပါတယ်။ ဘာတွေ ဆွေးနွေးသွားတယ်ဆိုတာတော့  ကျနော်တို့ မသိရပါဘူး၊ နောက် တခါ နေ့လည် သုံးနာရီလောက်မှာ နိုင်ငံခြားရေး ဝန်ကြီးဟောင်း…

မေး။ ။ ဟင်နရီ ကစ်ဆင်းဂျားနဲ့….

ဖြေ။ ။ ဟင်နရီကစ်ဆင်ဂျာ မလာခင်မှာ ထိုင်းဝန်ကြီးချုပ် ယင်းလပ် ရှင်နာဝပ် အရင်လာပါတယ်။ ထိုင်းဝန်ကြီးချုပ် ယင်းလပ် ရှင်နာဝပ်လာတဲ့အခါမှာ သူကလည်း သမ္မတဦးသိန်းစိန်နဲ့ မိနစ် သုံး ဆယ် လောက် ဆွေးနွေးသွားပါတယ်။ နောက်ပြီးတော့မှ တတိယမြောက် ရောက်လာတဲ့ ပုဂ္ဂိုလ် ကတော့ ဟီလာရီကလင်တန်မတိုင်ခင် ရောက်လာတဲ့ ပုဂ္ဂိုလ်ကတော့ နိုင်ငံခြားရေး ဝန်ကြီးဟောင်း ဟင်နရီ ကစ်ဆင်ဂျာပါ။ သူကတော့ အသက်အရွယ် ထောက်နေပြီဆိုတော့ တုတ်ကောက်လေး တချောင်းနဲ့ ရောက်လာပါတယ်။ အဲဒီတော့ ဒီကနေ့မှာ သမိုင်းဝင် ပုဂ္ဂိုလ်တွေပေါ့နော်- အပါအဝင် လက်ရှိ တာဝန် ထမ်းဆောင်နေတဲ့ နိုင်ငံ့ခေါင်းဆောင် နှစ်ယောက် လို့ ပြောရမယ့် မစ္စ်ရှင်နာဝပ်နဲ့ မစ္စက် ကလင်တန် အပါအဝင် ဟင်နရီကစ်ဆင်ဂျာတို့၊ ဘီလ်ကလင်တန် တို့နဲ့ သမ္မတဦးသိန်းစိန် အစိုးရအဖွဲ့နဲ့ တွေ့ဆုံပြီးတော့ ဒီဟိုတယ်လ်က အစည်းအဝေး ခန်းမထဲမှာ ဆွေးနွေးကြပါတယ်။

မေး။ ။ ဟုတ်ပါပြီ ဦးရော်နီ။ အဲဒီတော့ တွေ့ဆုံတာက နည်းနည်း စိတ်ဝင်စားဖို့ ကောင်းတာက ဟီလာရီ ကလင်တန်တို့၊ ယင်းလပ်တို့ဆိုတာကတော့ လက်ရှိ တာဝန်ယူထားတဲ့ နိုင်ငံခြားရေး ဝန်ကြီးတွေ၊ ဝန်ကြီးချုပ်တွေပေါ့လေ။ ဒါပေမဲ့ ဘီလ် ကလင်တန်တို့၊ ဟင်နရီကစ်ဆင်းဂျာတို့ကတော့ လက်ရှိ တာဝန်ယူသူတွေ မဟုတ်တော့ သူတို့နဲ့တွေ့တာကရော ဘယ်လိုကြောင့်လို့ ဦးရော်နီ အနေနဲ့ သိရပါလဲရှင့်။

ဖြေ။ ။ ဘီလ် ကလင်တန်တို့၊ ဟင်နရီကစ်ဆင်ဂျာတို့ကျတော့ သူတို့လက်ရှိ အစိုးရတာဝန်တွေ ထမ်းဆောင်နေသူတွေ မဟုတ်ပေမဲ့လည်း အမေရိကန်အစိုးရရဲ့ မူဝါဒတွေကို အထောက်အကူပြုတဲ့ လုပ်ငန်းတွေဖြစ်တဲ့ ဖောင်ဒေးရှင်းတွေ ရှိတယ်။ ကလင်တန်ဆိုလည်း ကလင်တန်ဖောင်ဒေးရှင်း၊ ကစ်ဆင်ဂျာရဲ့ Think Tank လို အဖွဲ့တွေ ရှိတယ်။ အဲဒီကိစ္စတွေနဲ့ ပတ်သက်ပြီးတော့ ဆွေးနွေးကြ ဖွယ်ရှိတယ် လို့ မှန်းဆရပါတယ်။ အဲလိုလည်း ဖြစ်နိုင်တယ်လို့ အရိပ်အမြွတ် သိရပါတယ်။

မေး။ ။ ဟုတ်ပါပြီ ဦးရော်နီ။ နောက်ဆုံးသိချင်တာကတော့ မနက်ဖြန် အမေရိကန်ရဲ့ ကြာသာ ပတေးနေ့မှာ သမ္မတဦးသိန်းစိန်ရဲ့ ခရီးစဉ်အကြောင်း ဦးရော်နီသိထားတာ ပြောပြပေးပါအုံးရှင့်။

ဖြေ။ ။ ဟုတ်ကဲ့။ မနက်ရှစ်နာရီခွဲရင် ကုလသမဂ္ဂ အထွေထွေညီလာခံကြီးမှာ သမ္မတဦးသိန်းစိန် က မြန်မာနိုင်ငံခေါင်းဆောင်အနေနဲ့ မိန့်ခွန်းစကား ပြောကြားမှာ ဖြစ်ပါတယ်။ ညနေ လေး နာရီ ကျရင်တော့ Asia Society က ကျင်းပတဲ့ ဟောပြောပွဲမှာ သမ္မတဦးသိန်းစိန် မြန်မာနိုင်ငံဆိုင်ရာ အကြောင်းတွေကို တက်ရောက် ဟောပြောပြီးတော့ သူ့ကိုလည်း တက်ရောက်လာတဲ့ ပရိသတ် က မေးခွန်းမေးတာ၊ သူက ပြန်လည်ဖြေကြားမှာဖြစ်ပါတယ်။

မေး။ ။ ဟုတ်ပါပြီ ဦးရော်နီရေ၊ အခုလိုမျိုး ဟိုတယ်လ်မှာတင် စောင့်ကြည့်နေပြီး သတင်းပေးပို့တဲ့ အတွက် ကျေးဇူးတင်ပါတယ်။