ဆရာမင်းလူနှင့် တွေ့ဆုံခြင်း

by မင်းလူ၏ ၀တ္တုတိုများ on Saturday, September 15, 2012 at 3:25am ·

ဆရာမင်းလူ

ကျွန်တော်တို့ရဲ့ ပေ့ခ်ျလေးမှာ ဆရာမင်းလူရဲ့ စာတွေကို မြတ်နိုးနှစ်သက်စွာ ၀င်ရောက်ဖတ်ရှုနေကြတဲ့ သူငယ်ချင်းမိတ်ဆွေတွေကို ကိုယ်စားပြုပြီး ဆရာမင်းလူနဲ့ သွားရောက်တွေ့ဆုံနိုင်ခဲ့ပါတယ်။ ဒီလိုတွေ့ဆုံခြင်းဟာ ဆရာ့ပရိသတ်တွေ  သိချင်၊ မေးချင်၊ ပြောချင်တဲ့စကားတွေကို သူငယ်ချင်းတို့ကိုယ်စား သွားရောက်ပြောကြားပေးတာဖြစ်ပြီးဆရာ့ရဲ့ အတွေးအခေါ်..အသိအမြင်... နှုတ်ခွန်းဆက် စကားတွေကို မိတ်ဆွေများအတွက် ပြန်လည်ယူဆောင်လာနိုင်ခဲ့ပါတယ်။

ဒီအစီအစဉ်လေးက ဆရာနဲ့ ဆရာ့ကိုချစ်တဲ့ ပရိသတ်တွေအတွက် ကြည်နူးနှစ်သက်ဖွယ် မေတ္တာပေါင်းကူးလေးတစ်ခုဖြစ်မယ်လို့

ယုံကြည်မျှော်လင့်ရပါတယ်။

ဆရာ မင်းလူဆိုတာ သဘာဝကျကျ လွတ်လပ်စွာနေထိုင်တတ်တဲ့ သူ့ပင်ကိုပုံစံအတိုင်း မိတ်ဆက်ပွဲအစီအစဉ်တွေ၊ စာပေဟောပြောပွဲအခမ်းအနားတွေ၊ တွေ့ဆုံခြင်းကဏ္ဍတွေကို တတ်နိုင်သလောက် ရှောင်ရှားလေ့ရှိတယ်ဆိုတာ ကျွန်တော်တို့အနေနဲ့ သူ့စာတွေထဲကနေတစ်ဆင့် ကြားသိခဲ့ရပြီးဖြစ်ပါတယ်။

သို့ပေမယ့်လည်း သူ့ပရိသတ်ကိုတော့ ဘယ်တော့မှ ငြင်းပယ်လေ့မရှိဘူးဆိုတာ သိထားပါတယ်။

ဒါကြောင့်မို့ ရာသီဥတုသာယာတဲ့ တစ်ခုသော ညနေမှာ အချိန်နည်းနည်းရတာမို့ ကျွန်တော်တို့ဘက်က

ကြိုတင်ချိန်းဆိုထားတဲ့အတိုင်း ဆရာမင်းလူဆီရောက်သွားဖြစ်ခဲ့ပါတယ်။

ရောက်ရှိသွားချိန်မှာ တော်တော်လေးမှောင်သွားတာကြောင့် ဆရာက သူထိုင်နေကျ လက်ဖက်ရည်ဆိုင်ဆီ ထွက်သွားနှင့်ပြီမို့ အဲ့ဒီကို ဆက်လိုက်သွားခဲ့ပါတယ်။ ခပ်သေးသေးလက်ဖက်ရည်ဆိုင်ထဲမှာတော့ တစ်ယောက်တည်းထိုင်ရင်း ရေဒီယိုနားထောင်နေတဲ့ ဆရာ့ကို အဆင်သင့်တွေ့ရပါတယ်။

ခွေးခြေခုံပုလေးတွေခင်းထားတဲ့ ဆရာ့လက်ဖက်ရည်ဝိုင်းမှာ ၀င်ထိုင်ပြီး မိတ်ဆက်စကားနည်းနည်း ဆိုဖြစ်ပါတယ်။

နောက်တော့ ....

ကိုမင်းကိုနိုင်ရဲ့ Facebook wall မှာ တင်ထားတဲ့ 'ဆရာမင်းလူသို့ ကျေးဇူးတင်စကား'လေးကို အရင်ပြလိုက်ပါတယ်။

ဆရာက သေချာဖတ်ကြည့်ပြီး ကိုမင်းကိုနိုင်နဲ့ ပတ်သက်တာလေးတွေကို ပြောပြတာမို့ ဆရာ့ပြောစကားတွေကနေ

ဆရာနဲ့ကိုမင်းကိုနိုင်တို့ရဲ့ ရိုးသားတဲ့စိတ်ထားတွေနဲ့ လေးစားအားကျဖို့ကောင်းတဲ့ ရဲဘော်ရဲဘက်ဆက်ဆံရေးတွေကိုလည်း သိမှတ်ခဲ့ရပါတယ်။ အဲဒီနောက်မှာတော့ ကျွန်တော်တို့ မင်းလူ၏၀တ္ထုတိုများ Fan Pageအကြောင်းပြောပြပြီး Fan Page စာဖတ်ပရိသတ်မိတ်ဆွေတွေ ဆရာ့ကိုပြောချင်တဲ့စကား၊ နှုတ်ဆက်စကားတွေနဲ့ ကျွန်တော်တို့တင်ထားတဲ့ဝတ္ထုတိုခေါင်းစဉ်တွေပါဝင်တဲ့ Print Out စာရွက်တွေကို ဆရာ့ဆီ ပြသဖြစ်ပါတယ်။

အဲဒီနောက်မှာတော့ Fan Page မိတ်ဆွေတွေ သိလိုတဲ့အကြောင်းအရာ တော်တော်များကို ဦးတည်မေးဖြစ်တဲ့ ဆရာနဲ့ ကျွန်တော်တို့ရဲ့ တွေ့ဆုံခြင်းစကားဝိုင်းကို စတင်ဖြစ်ပါတယ်။ အခု တင်ဆက်ပေးလိုက်တာကတော့ ဆရာနဲ့တွေ့ဆုံခြင်းထဲက အဓိကအကြောင်းအရာတွေကို ရွေးချယ်စုစည်းဖော်ပြပေးလိုက်တာပဲဖြစ်ပါတယ်။ ဆရာနဲ့တွေ့ဆုံဖြစ်ခြင်းကနေ ဆရာ့ရဲ့စာပေခံယူချက်နဲ့ ရိုးသားအေးဆေးတဲ့ စေတနာစိတ်ထားကို မိတ်ဆွေများ မြင်တွေ့နိုင်ပါလိမ့်မယ်။

ကိုမင်းကိုနိုင်၏ ကျေးဇူးတင်စကား (ကိုမင်းကိုနိုင် facebook မှ)

---------------------------------------------------------------------------

Fan Page ။.....။ ဆရာ့အနေနဲ့ စာရေးကျဲလာတာနဲ့ပတ်သက်ပြီး ဆရာ့ပရိသတ်တွေက ဘယ်အကြောင်းကြောင့်လဲ ဆိုတာ သိချင်ကြတယ်ဗျ။

ဆရာမင်းလူ ။.....။  ပြောရမယ်ဆိုရင်တော့ အသက်အရွယ်အရ လက်ပန်းကျတယ်ပေါ့ဗျာ။ အရင်လို အရေးမသွက်တော့ဘူးပေါ့။ နောက်ပြီး 'TEEN' ဆိုတဲ့ ဆရာဦးဝင်းငြိမ်းတို့ရဲ့မဂ္ဂဇင်းမှာ ဖတ်ညွှန်းကဏ္ဍကို လစဉ်အနေနဲ့တာဝန်ယူထားပေးရတယ်ဗျ။ အဲ့ဒါအတွက် အချိန်ပေးရတယ်ပေါ့။ စာအုပ်ဖတ်ညွှန်းဆိုတော့ တာဝန်ကြီးတယ်ဗျ။ မသပ်မရပ်ရေးလို့လည်းမဖြစ်ဘူးလေ။ တချို့စာအုပ်တွေဆိုရင် တစ်ပတ် နှစ်ပတ်လောက် သေသေချာချာလေး အချိန်ယူပြီးဖတ်ရတယ်ဗျ။ တချို့စာအုပ်တွေဆိုရင် ရှားပါးစာအုပ်တွေမို့ ရှာဖွေ ၀ယ်သိမ်းထားရတာမျိုးလည်းရှိတယ်။ ဒါကြောင့်မို့ပါ။

Fan Page ။.....။ ဆရာ့ပရိသတ်ကတော့ ဆရာ့ကို စာတွေ ဆက်ရေးစေလိုတယ်ခင်ဗျ။ အဓိက,ကတော့ ၀တ္ထုတိုလေးတွေပေါ့နော်။

ဆရာမင်းလူ ။.....။ ဟုတ်ကဲ့။ ကျွန်တော် လောလောဆယ်တော့ အတိုလေးတွေ စုစည်းပြီး လုပ်နေပါတယ်။ အဲ့ဒီတစ်အုပ်ထွက်လာဖို့ရှိပါတယ်။ နောက်... ၀တ္ထုရှည်လုံးချင်းလည်း လာမှာပါ။ ၀တ္ထုတိုတွေကတော့ ဂျာနယ်တချို့မှာ ရံဖန်ရံခါဆိုသလိုတော့ ရေးဖြစ်ပါတယ်။ အထူးသဖြင့် စထွက်ခါစ တက်သစ်စဂျာနယ်တွေမှာ အားဖြည့်ပေးတဲ့အနေနဲ့ ရေးဖြစ်တယ်ပေါ့ဗျာ။ ဂျာနယ်အသစ်တွေဆိုတော့ လူသိပ်မသိသေးတော့ ပရိသတ် မဖတ်ဖြစ်လိုက်တာလည်း ဖြစ်ပါလိမ့်မယ်။ ဂျာနယ်တွေအကုန်လုံးမှာ ရေးဖို့ကလည်း မဖြစ်သင့်ဘူးထင်တယ်ဗျ။ ဟိုမှာလည်း ကိုယ့်စာ၊ ဒီမှာလည်း ကိုယ့်စာ ဆိုရင် ကြာရင် အများ အမြင်မကြည်လင်စရာဖြစ်တယ်လေ။

Fan Page ။.....။ ဆရာ့ပရိသတ်တွေကတော့ ဆရာဝတ္ထုဆိုရင် အကုန်လုံးနီးပါးလောက် သဘောကျကြတယ်ဆရာ။

ဆရာမင်းလူ - ဒီလိုဗျ။ တစ်ခါတလေကျတော့လည်း တက်သုတ်ရိုက်ရေးလိုက်ရတာလည်းရှိတယ်။

ဆိုလိုတာက မဂ္ဂဇင်း/ဂျာနယ်တိုက်က ဖောင်ပိတ်တော့မယ် စာမူအမြန်လိုနေပြီဆိုပါတော့၊ ကိုယ့်ခေါင်းထဲမှာကလည်း ရေးဖို့ရာ ဘာမှအဆင်သင့်မရှိဘူး။ အဲ့လိုမျိုးဆိုရင် မဖြစ်ဖြစ်အောင် ဖြစ်ညှစ်ရေးလိုက်ရတယ်ပေါ့။

အဲ့လိုမျိုးကျတော့လည်း ကိုယ့်ကိုယ်ကိုယ် အားမရဘူး။ ကြိုက်လည်းမကြိုက်ဘူး။ ပရိသတ်ကတော့ ကြိုက်ရင် ကြိုက်သွားတယ်ပေါ့ဗျာ။ တစ်ခါတလေ ရက်တော်တော်ကြာစဉ်းစားပြီး ရေးလိုက်တာမျိုးကို ပရိသတ်ဆီက ဘာမှတုံ့ပြန်မှုမျိုးမရှိတာလည်း ကြုံရတယ်ဗျ။ နောက်... နှစ်တော်တော်လေးကြာမှ အဲဒီဟာမျိုးလေးကို အားရကျေနပ်တဲ့အကြောင်းလေးစကားပြန်လာတာမျိုး ကြားရတယ်ဗျ။ ဆိုလိုတာက ကောင်းတယ်၊ မကောင်းဘူးဆိုတာက ပရိသတ် ဆုံးဖြတ်ပိုင်ခွင့်ရှိပါတယ်။ ဝေဖန်ရေးလည်း အားပေးပါတယ်။ ဝေဖန်ရေးရှိမှလည်း တိုးတက်မှာကိုး။ ကျွန်တော်တို့ဆီမှာက ဝေဖန်ရေးအားနည်းတယ်ဗျ။ အမှန်မှာ ဒါက ရှိသင့်တယ်။ ဝေဖန်ရေးဆိုတာက ရေးတဲ့လူကိုမကြိုက်လို့ ဘလိုင်းကြီးဆော်တာထက် စာမကြိုက်လို့ အကျိုးအကြောင်းနဲ့ ထောက်ပြဝေဖန်တာမျိုးပေါ့ဗျာ။

Fan Page ။.....။ အွန်လိုင်းမှာ စာအုပ်တွေတင်ထားကြတာနဲ့ပတ်သက်ပြီး ဆရာ့အနေနဲ့ ဘယ်လိုသဘောထားရှိပါသလဲခင်ဗျာ။

ဆရာမင်းလူ ။.....။ အဲ့ဒါတော့ ကျွန်တော် ကြားလူအနေနဲ့မို့ ပြောရခက်တယ်ဗျ။ ဒီပြဿနာက နည်းနည်းရှုပ်တယ်။ ခိုးကူးခွေတွေလိုပေါ့။ သက်သာတဲ့နည်းလမ်းနဲ့ရတယ် ဆိုရင်တော့ ဘယ်သူမဆို အလွယ်တကူယူကြမှာပဲလေ။ ဥပမာ၊ ကျွန်တော်ဆိုရင်လည်း ဆရာကြီးရွှေဥဒေါင်းရဲ့ စာအုပ်ကို အပြင်မှာရှာမရလို့ အင်တာနက်မှာတွေ့ရင် download ဆွဲယူမိမှာပဲလေ။ အင်တာနက်မှာ တင်တဲ့သူတော်တော်များကလည်း တစ်ပြားတစ်ချပ်မှ မရဘဲ စေတနာနဲ့တင်ပေးကြတာ။ တင်ပေးတဲ့အတွက် သူတို့အဖို့ အချိန်တောင်ကုန်သေးတယ်။ စာအုပ်ထုတ်ဝေသူတွေဘက် ပြန်ကြည့်ပြန်တော့လည်း သူထုတ်တဲ့စာအုပ်တစ်အုပ်လုံးကို တစ်ယောက်ယောက်က ချက်ချင်းလက်ငင်းကြီး အလကား ပြန်တင်ပေးထားတယ် ဆိုရင်တော့ မခံချိမခံသာဖြစ်မှာပဲလေ။

ဖြစ်နိုင်ရင်တော့ တစ်အုပ်လုံးမဟုတ်ဘဲ တစ်ပိုင်းတစ်စ အနည်းအကျဉ်းလောက်သာ တင်စေချင်တယ်။ ရှာလို့မရနိုင်တော့တဲ့ စာအုပ်ဆိုရင်တော့ တစ်မျိုးပေါ့လေ။ နောက်ပိုင်း မူပိုင်ခွင့်(Copy Right)တွေလာရင်တော့ ဘယ်လိုဖြစ်လာမလဲ မပြောတတ်ဘူး။

Fan Page ။.....။ Facebook မှာ ကိုမင်းကိုနိုင်က သူ့ကဗျာတွေကို ဆရာ သိမ်းပေးတာနဲ့ပတ်သက်ပြီး ဆရာ့ကို ကျေးဇူးတင်စကားဆိုထားတယ်ခင်ဗျ။ ကိုမင်းကိုနိုင်နဲ့ ဆရာ မကြာမကြာတွေ့ဖြစ်လားခင်ဗျ။

ဆရာမင်းလူ ။....။ သိပ်မတွေ့ဖြစ်ဘူး။ သူက အင်မတန်လည်း အလုပ်များတယ်ဗျ။ ဟိုသွားရ၊ ဒီသွားရနဲ့ကိုးနော်။ နောက်ပြီး ဒီလူက လူတော်ဗျ။ တစ်ရက်တည်းမှာ သူ တွေးရတာ၊ ပြောရတာတွေက အကြောင်းအရာပေါင်းစုံဗျ။ လူပေါင်းစုံနဲ့ ထိတွေ့ဆက်ဆံရတာကိုး။

သူ ထိန်းသိမ်းမခံရစဉ်က သူ့ကဗျာတွေကို ကျွန်တော် ယူပေးထားတာ။ တချို့ဟာတွေဆိုရင် သူ့ဆီမှာတောင် မူရင်းမရှိတော့ဘူး။ သူ လွတ်လာပြီးတဲ့နောက်ပိုင်း သူနဲ့တစ်ရက်တွေ့ဖြစ်တဲ့အခါမှ သူ့ကဗျာတွေ ကျွန်တော့်ဆီမှာ ရှိတဲ့အကြောင်းပြောပြတော့ သူ လာယူမယ်ပြောပြီး တစ်နေ့ကမှ လာယူသွားတာ။ ကျွန်တော်ကလည်း အိမ်ပြောင်းလာတာ ၁နှစ်လောက်ပဲရှိသေးတော့ စာတွေထားတဲ့ အထုပ်တွေက သေချာမရှင်းဖြစ်သေးဘဲ အိမ်မှာ ဟိုနေရာထား ဒီနေရာထားနဲ့ အစီအစဉ်မကျသေးဘူးဆိုတော့ တော်တော်လေးတော့ ပြန်ရှာလိုက်ရတယ်။

Fan Page ။.....။ ဆရာ့ဝတ္ထုတိုတွေထဲမှာ ဘောလုံးအကြောင်းလည်း ပါတယ်နော်။ ဆရာ ဘောလုံးပွဲတွေလည်း ကြိုက်မှာပေါ့နော်။ ဘယ်အသင်းကို အားပေးလဲဆရာ။ တစ်နေ့က ကန်သွားတဲ့ မြန်မာနဲ့စင်ကာပူပွဲကိုကော ဆရာကြည့်ဖြစ်သေးလားခင်ဗျ။

ဆရာမင်းလူ ။.....။  ကြည့်ဖြစ်ပါတယ်။ မန်ယူအသင်းကနေ စီရော်နယ်ဒိုပြောင်းသွားတုန်းကတောင် သတင်းတွေမှာ မဖော်ပြခင် ဖာဂူဆန်ကြီး အိုဝင်ကို ခေါ်လိမ့်မယ် ကြိုတင်ထင်မိသေးတယ်။ ဘာလို့လဲဆိုတော့ အိုဝင်ဆိုတာက အသက်ကြီးပေမယ့် အဲ့ဒီအချိန်မှာ အသင်းလက်မဲ့ဖြစ်နေတယ်၊ နောက်ပြီး ဒီကောင်လေးက ပုံရိပ်ကျန်သေးတယ် ပရိသတ်ကို ဖမ်းစားနိုင်လိမ့်မယ်ဆိုတဲ့အတွေးနဲ့လေ။ အဲ့ဒီအကြောင်းတောင် ရေးဖြစ်မလိုရှိပြီးမှ မရေးဖြစ်လိုက်ဘူး။ ရေးဖြစ်လိုက်ရင်တော့ ဟော့တ်သွားမှာသေချာတယ် (ပြုံးလျက်)။ ဘယ်အသင်းအားပေးတယ်တော့ မဟုတ်ဘူးဗျ။ ကျနော် လီဗာပူးတော့ကြိုက်တယ်။ လီဗာပူးက ဘာပဲဖြစ်ဖြစ် ကြိုးစားကန်တယ်။ လီဗာပူးကန်လို့ နိုင်မယ်/ရှုံးမယ်ဆိုတာ ကြိုမှန်းလို့မရဘူး။ မန်ယူဆိုရင် သူ့ကစားကွက်ကို သူ့ပြိုင်ဘက်တင်မကဘူး ပရိသတ်ကသိနေတယ်ဗျာ။ ဘယ်သူက ဘယ်သူ့ကိုပေးမယ်၊ ဘယ်သူက ဘယ်လိုကန်သွင်းမယ် စသဖြင့်ပေါ့။

သို့ပေမယ့် ကစားအားချင်း ကွာတော့ ပြိုင်ဘက်က ယှဉ်မရဘူး၊ အဲ့ဒါကွာသွားတယ်။ လီဗာပူးအားပေးရတာ မြန်မာအသင်း အားပေးရသလိုပါပဲ။ မြန်မာ-စင်ကာပူပွဲလည်း ကြည့်ဖြစ်ပါတယ်။ မြန်မာအသင်းကတော့ ဒီအတိုင်းပါပဲ။ ဒုံရင်းဒုံရင်းပေါ့။ (ပြုံးရယ်လျက်)

Fan Page ။.....။  ဆရာရေးတဲ့ "ပဲပြုတ်နှင့်နံပြား"၀တ္ထုလေးကိုလည်း ဆရာ့ပရိသတ်က အတော်လေးသဘောကျကြတယ်ဆရာ။ အဲ့ဒါလေး ရေးဖြစ်ပုံနဲ့ပတ်သက်ပြီး ပြောပြပေးပါဦးဆရာ။

ဆရာမင်းလူ ။......။ အဲ့ဒါကတော့ ဆရာမောင်စိမ်းနီစုစည်းတင်ဆက်တဲ့ "စာရေးဆရာကိုအောင်ဆန်း"စာအုပ်ထဲမှာပါတဲ့တစ်ပုဒ်ပေါ့။ နာမည်ကြီး စာရေးဆရာတွေ အမှတ်တရစကားလေးတွေရေးပေးပါဦးဆိုတော့။ အစ်ကို ကျွန်တော့်ကို ဒီတစ်ခုအတွက်တော့ နေရာလေးနည်းနည်းပေးပါ။ ကျွန်တော် တစ်ခုလုပ်စရာရှိလို့ပါဆိုပြီးတော့ ဒီဝတ္ထုတိုလေးရေးဖြစ်တာပါ။ ဗိုလ်ချုပ်အောင်ဆန်းအကြောင်းရေးရမယ်ဆိုတော့ သိထားတဲ့အကုန်လုံး ချရေးလိုက်ရင်လည်း ကောင်းတော့ ကောင်းပေမယ့် သူများနဲ့တူနေမယ်၊ နောက်ပြီး အတည်အခန့် စာ"လေး"မယ့်ပုံစံဖြစ်နေမှာစိုးတာနဲ့ ပေါ့ပေါ့ပါးပါးလေး ဖြစ်အောင် ရေးလိုက်တဲ့သဘောပါ။ တကယ်တော့ ဗိုလ်ချုပ်ဆိုတာလည်း ကိုယ်လိုသူလို လူပါပဲ။ ကောင်းတာလည်းရှိသလို အားနည်းတဲ့အပိုင်းတွေလည်းရှိတာပဲ။ သူ့ခေတ်သူ့အခါတုန်းကဆိုရင် ဘုကန့်လန့်သမားပေါ့။ အသံသွင်းနေတုန်း ကောက်ခါငင်ခါ ထထွက်သွားတာမျိုး အဲ့ဒါလေးတွေ ကြားဖူးမှာပေါ့။ ရည်းစားတောင်ထားချိန်မရခဲ့ဘူး။ ခေါင်းထဲမှာ တိုင်းပြည်အတွက်ဆိုတာပဲ တွေးနေခဲ့တယ်။ ဒါပေမဲ့ သူသည်လည်း သာမန်လူလိုပဲ ရှင်သန်နေထိုင်သွားခဲ့တယ်ဆိုတာ သိစေချင်တယ်။ အဲ့လိုမျိုးတွေကို ထိမ်ချန်ထားခဲ့ပြီး ကောင်းတာတွေချည်း ရေးနေရင် နောင်လာနောက်သားအဖို့ အမှန်မသိရဘဲ ဗိုလ်ချုပ်အောင်ဆန်းဆိုတာ ငါတို့နဲ့ အလွန်တရာအလှမ်းဝေးလွန်းပြီး ကြိုးစားရင်တောင် သူ့လိုမဖြစ်နိုင်ဘူးဆိုပြီး သိမ်ငယ်တဲ့အတွေးဝင်မှာစိုးလို့ပါ။

Fan Page ။.....။ လွတ်လပ်ရေးနေ့နဲ့ပတ်သက်တဲ့ ဆောင်းပါးတစ်ပုဒ်လည်း ဆရာရေးဖူးတယ်လို့ Fan Page က အစ်ကိုတစ်ယောက်က ကျွန်တော်တို့ကို အသိပေးထားတာလည်းရှိပါတယ်။ အဲ့ဒါနဲ့ပတ်သက်ပြီး ဆရာ ပြောပြပေးပါဦး။

ဆရာမင်းလူ ။.....။ လွတ်လပ်ရေးနေ့အထိမ်းအမှတ်အနေနဲ့ ဒီနှစ် ဇန်န၀ါရီလတုန်းက ပေါ်ပြူလာဂျာနယ်မှာ ရေးခဲ့တဲ့ သရော်စာလေးဖြစ်ပါလိမ့်မယ်။ လွတ်လပ်ရေးနေ့မှာ အစဉ်အလာအနေနဲ့၊ ပျော်ရွှင်ခြင်းအထိမ်းအမှတ်အနေနဲ့

ခေါင်းအုံးရိုက်ပြိုင်ပွဲတွေ၊ ချောတိုင်တက်ပြိုင်ပွဲတွေ ကျင်းပကြတယ်ပေါ့ဗျာ။ ကျွန်တော်တို့နိုင်ငံကြီးထဲမှာလည်း လွတ်လပ်ရေးသာရတယ်၊ ဘာမှမဟုတ်တဲ့ ကိစ္စရပ်လေးတွေအတွက် တစ်ယောက်နဲ့တစ်ယောက် ဆော်ပလော်တီးတာ၊ တစ်ယောက်ကိုတစ်ယောက် ကျော်ခွတက်နင်းတာတွေကတော့ ကျန်နေဆဲပဲလို့ သရော် ရေးလိုက်တာပါ။

ကျွန်တော် ရှာထားပေးပါ့မယ်။ နောက်တစ်ခေါက်လာတော့ယူပေါ့။

[အလျဉ်းသင့်သလို ကျွန်တော်တို့ တင်သွားပေးပါ့မယ်]

Fan Page ။.....။  ဆရာ့ပရိသတ်တွေအဓိက ဆန္ဒရှိ၊ တောင်းဆိုတာကတော့ ဆရာ့ကို ကျန်းမာစေချင်တယ်၊ ဆရာ့ကို စာတွေ ဆက်ရေးချင်တယ်ပေါ့ ခင်ဗျာ။ Fan Page က ဆရာ့ပရိသတ် ညီမတစ်ယောက်ကဆိုရင် "ဆရာ့ကို အပြင်မှာသာတွေ့ရင် အဖေလို နှုတ်ဆက်ပြီး ပြေးဖက်လိုက်ချင်တယ်" လို့ လှိုက်လှိုက်လှဲလှဲ ဆိုထားပါတယ်ဆရာ။

ဆရာမင်းလူ ။....။  (ပြုံးရွှင်ကျေနပ်လျက်) ၀မ်းသာပါတယ်ဗျာ။ ခုခေတ်က စာဖတ်နိုင်တဲ့သူက တော်တော်လေးနည်းသွားပြီဗျ။ အကြောင်းအမျိုးမျိုးပေါ့လေ။ စားဝတ်နေရေးရုန်းကန်ရတာက ပိုအရေးကြီးလာတာကိုး။ စာဖတ်ပရိသတ်ရှိသေးတယ်ဆိုတာနဲ့ ကျေနပ်နေရပါပြီ။ နောက်ပြီး ကျွန်တော့်ဆီလာတဲ့ ပရိသတ်ကို ဘာပစ္စည်းမှယူမလာစေချင်ဘူးဗျ။ အဲ့ဒီလိုတော့ ဖြစ်စေချင်တယ်ဗျ။ စည်းလို့ ပြောမလား။ ကိုယ့်စာတွေဖတ်တာနဲ့တင် စာဖတ်ပရိသတ်ကျေးဇူးက ကိုယ့်မှာရှိနေပြီလေ။

Fan Page ။.....။ ဆရာ ညပိုင်းတွေမှာ စာဖတ်/စာရေးဖြစ်တယ်လို့ကြားပါတယ်။ ဆရာ့ဆီလာတဲ့ မိတ်ဆွေအပေါင်းအသင်းတွေလည်း များမှာပေါ့နော်။

ဆရာမင်းလူ ။......။ ဟုတ်တယ်ဗျ။ ကျနော်နေတဲ့ အခုနေရာက တော်တော်တိတ်တယ်။ ဟိုဘက်တွေမှာဆိုရင် ဘာမှ မရှိတော့ဘူး။

၉နာရီ၊ ၁၀နာရီလောက်ဆို ဘာအသံမှ မကြားရဘူး။ တိတ်တိတ်ဆိတ်ဆိတ်နဲ့ တွေးလို့ကောင်းတဲ့အချိန်ဆိုတော့ အဲ့ဒီအချိန်ကျမှ စာတွေ ဖတ်၊ စာတွေ ရေးဖြစ်တယ်ပေါ့။ တခြားဘယ်သူနဲ့မှ သိပ်မတွေ့ဖြစ်ဘူးဗျ။ ဒါကလည်း တခြားကြောင့်မဟုတ်ပါဘူး။ နဂိုကတည်းက ကျွန်တော့်ဖာသာကျွန်တော် အေးအေးဆေးဆေးနေခဲ့တဲ့ အကျင့်ကြောင့်ပါ။

--------------------------------------------------------------------

ကျွန်တော်တို့စကားဝိုင်းရပ်နားချိန်မှာ အချိန်လည်း အတော်လင့်သွားခဲ့ပြီမို့ အချိန်ယူ ဖြေကြားပေးတဲ့ ဆရာ့ကို ကျေးဇူးတင်စကားဆိုပြီး Fan Page ပရိသတ်တွေအတွက် ဆရာရဲ့ထိုးမြဲလက်မှတ်လေးယူပြီး နှုတ်ဆက်ပြန်လာခဲ့ပါတယ်။

အပြန်မှာ ဆရာက နောက်တစ်ကြိမ် လာလိုတယ်ဆိုရင် နောက် သုံး လေးပတ်လောက်ကြာတဲ့အခါ လာနိုင်တဲ့အကြောင်း ကြိုဆိုစကား ထပ်ပြောလိုက်ပါသေးတယ်။

ဒီအစီအစဉ်လေးက ကျွန်တော်တို့ ပေ့ခ်ျလေးမှာ စာတွေဝင်ဖတ်နေတဲ့ သူငယ်ချင်းများအားလုံးအတွက်ဖြစ်ပါတယ်။

မန်ဘာတွေအားလုံးရဲ့ ကိုယ်စား ဆရာမင်းလူကို သွားရောက်တွေ့ဆုံခဲ့တာပါ။ အားလုံးပဲ ကျေနပ်ပျော်ရွှင်နိုင်လိမ့်မယ်လို့ မျှော်လင့်မိပါတယ်။

ဆရာ့ကို ပြောချင် မေးချင်တဲ့ စကားလေးတွေရှိရင်လဲ ပေ့ခ်ျရဲ့ ဝေါလ်မှာ စတေးတပ်များရေးသွားပေးစေချင်ပါတယ်။

နောက်တစ်ခေါက် ဆရာနဲ့တွေ့တဲ့အခါ အဲဒီစတေးတပ်လေးတွေကို ဆရာကိုယ်တိုင်ဖတ်ရှုနိုင်အောင် ကျွန်တော်တို့ ကြိုးစားပေးပါ့မယ်။