18.09.2012 နေ့ဖတ်ရန်သတင်းများ

by Myanmar Journal on Monday, September 17, 2012 at 8:25pm ·

အစ္စလာမ် ဆန့်ကျင်ရေး ဗီဒီယို ဂယက်

လူတွေရှေ့ ပေါ်ထွက်လာတဲ့ ဟစ်ဇဘိုလာ ခေါင်းဆောင်

လဘနွန်က ရှီးယား မွတ်ဆလင် လှုပ်ရှားမှု ဟစ်ဇဘိုလာ ခေါင်းဆောင် Hassan Nasrallah ဟာ အမေရိကန်မှာ ရိုက်ကူး ထုတ်လုပ်တဲ့ အစ္စလာမ် ဆန့်ကျင်ရေး ဗီဒီယို နဲ့ ပတ်သက်တဲ့ ဆန္ဒပြ လှုပ်ရှားမှုတွေမှာ လူမြင်ကွင်းရှေ့ ထွက်ပေါ်လာပါတယ်။

လူတွေကြား တွေ့ရခဲလေ့ရှိတဲ့ Sheikh Nasrallah က အဲဒီ ဗီဒီယို တကားလုံး ထွက်လာရင် ရင်ဆိုင်ရမယ့် နောက်ဆက်တွဲ အန္တရာယ်တွေကို အမေရိကန် အနေနဲ့ နားလည် ထားသင့်တယ်လို့ ဆိုပါတယ်။

တူနီးရှား မှာတော့ ပြီးခဲ့တဲ့ သီတင်းပတ် တုန်းက ဒီဗီဒီယိုကား အပေါ် ဆန့်ကျင် ဆန္ဒပြမှုတွေ ဖြစ်အောင် လှုံဆောင်ခဲ့တယ်လို့ စွပ်စွဲ ခံနေရတဲ့ ဗလီဆရာ ဟောပြောနေတဲ့ နေရာမှာ လုံခြုံရေး တပ်ဖွဲ့က ဝိုင်းထားတဲ့ ကြားက သူထွက်ပြေး လွတ်မြောက် သွားတယ်လို့ သိရပါတယ်။

တခါ အဲဒီ အမေရိကန် ထုတ် အစ္စလာမ် ဆန့်ကျင်ရေး ဗီဒီယိုကို ဖယ်ရှားပေးဖို့ YouTube က ငြင်းဆန်ခဲ့တာကြောင့် ပါကစ္စတန်မှာ YouTube အင်တာနက် စာမျက်နှာကို ကြည့်ခွင့်မရအောင် အစိုးရက ပိတ်ထား လိုက်ပါတယ်။

YouTube က ငြင်းဆန်မှု အတွက် ပါကစ္စတန် ၀န်ကြီးချုပ် Raja Pervez Ashraf က ပိတ်ခိုင်းလိုက်တာ ဖြစ်တယ်လို့ သိရပါတယ်။

လွန်ခဲ့တဲ့ နှစ်နှစ်လောက် တုန်းကလည်း မွတ်ဆလင် တော်တော်များများက လက်မခံနိုင်လောက်တဲ့ တမန်တော် မိုဟာမက်ကို သရော်ထားတဲ့ ပုံ ဖော်ပြခဲ့တဲ့ အတွက် Facebook နဲ့ YouTube တို့ကို အစိုးရက ပိတ်ထားခဲ့ ဖူးပါတယ်။

တရုတ်မြို့ကြီးတွေမှာ ဂျပန်ဆန့်ကျင်ရေးဆက်

မနက်ဖြန် စက်တင်ဘာ ၁၈ ဟာ နှစ်နိုင်ငံစလုံးအတွက် အရေးကြီးတဲ့ နေ့ဖြစ်သလို ဆန္ဒပြမှုတွေလည်း ရှိနေဆဲပါ။

တရုတ်နိုင်ငံက မြို့အတော်များများမှာ အခုရက်ပိုင်းအတွင်း စိတ်ဆိုးနေတဲ့ လူအုပ်ကြီးက ဂျပန် စီးပွားရေးလုပ်ငန်းတွေ သံတမန်အဆောက်အအုံတွေ၊ ရုံးတွေကို ဆက်လက် တိုက်ခိုက်နေပါတယ်။

ဘေဂျင်းရှိ ဂျပန်သံရုံးရှေ့မှာ ဆန္ဒပြသူတွေက အော်ဟစ်ပြီး ဂျပန် ကုန်ပစ္စည်းတွေ သပိတ်မှောက်ဖို့ တောင်းဆိုနေတာ ဖြစ်ပါတယ်။

မီးရှို့ဖျက်ဆီးမှု၊ လုယက်မှုတွေကြောင့် စက်ရုံးဝန်ထမ်းတွေ လုံခြုံမှုမရှိတဲ့အတွက် ဂျပန်ကုမ္ပဏီကြီးတွေ ဖြစ်ကြတဲ့ Panasonic နဲ့ Cannon တို့က ကုန်ထုတ်လုပ်မှု ရပ်ဆိုင်းလိုက်ပါတယ်။

ဂျပန်တို့က တရုတ်နိုင်ငံ အရှေ့ မြောက်ပိုင်းကို ၁၉၃၀တုန်းက ဝင်ရောက် သိမ်းပိုက်တဲ့ နှစ်ပတ်လည်နေ့ မနက်ဖန်မှာ လူထု ဆန္ဒပြမှုတွေ ပိုများလာနိုင်ပါတယ်။

တရုတ်အစိုးရပိုင် မီဒီယာကတော့ ဆန္ဒပြသူတွေကို ဆင်ခြင်တုံတရားရှိဖို့ တိုက်တွန်းလိုက်ပါတယ်။ တရုတ်အစိုးရဖက်ကတော့ ရေနယ်နိမိတ် အငြင်းပွားမှုကို ဂျပန်အစိုးရဖက်က သတိရှိရှိ ကိုင်တွယ်ဖြေရှင်းဖို့ သတိပေး လိုက်ပါတယ်။

ကွန်မြူနစ်ပါတီအာဘော် ပြည်သူ့နေ့စဉ် သတင်းစာမှာ တရုတ်ရဲ့ အဓိက ကုန်သွယ်ဖက်ဖြစ်တဲ့ ဂျပန်နိုင်ငံမှာ စီးပွားရေး ရိုက်ခတ်မှုတွေ ရှိနိုင်တယ်လို့ ပြောပါတယ်။ တဖက်ကလည်း စီးပွားရေး ပိတ်ဆို့မှုတွေ လုပ်မယ်ဆိုရင် နှစ်ဖက်စလုံး ထိခိုက်နိုင်ကြောင်း တရုတ်က ဝန်ခံသွားပါတယ်။

အခုလို ဂျပန်တွေကို တိုက်ခိုက်မှုကြောင့် တရုတ်နိုင်ငံမှာ ဂျပန်ရင်းနှီးမြုပ်နှံမှုကို ထိခိုက်မှာ စိုးရိမ်နေပါတယ်။ အကဲခတ်တွေကတော့ ဂျပန်ဟာ တရုတ်ကို ကျော်ပြီး ထိုင်းနဲ့ အခြားနိုင်ငံတွေမှာ ကုန်ပစ္စည်းထုတ်ဖို့ ရွှေ့ပြောင်းသွားနိုင်တယ်လို့ ခန့်မှန်းနေကြပါတယ်။

အခုအခါမှာ ပြဿနာ ဖြစ်နေတဲ့ ကျွန်းတွေဆီကို တရုတ်ငါးဖမ်းသင်္ဘောတွေ ဦးတည်နေပါတယ်။ ဒီကျွန်းတွေကို ဂျပန်က ထိန်းချုပ်ထားပါတယ်။ တကယ်လို့ တရုတ် ငါးဖမ်းသင်္ဘောတွေကို ဂျပန် ကမ်းခြေစောင့်တွေက တားမြစ်ရင် ပဋိပက္ခတွေ ဖြစ်မှာ စိုးရိမ်ရပါတယ်။

အခုလို ပြဿနာတွေ ဖြစ်လာတာဟာ ဂျပန်လူမျိုး တယောက်ပိုင်ဆိုင်တဲ့ အရှေ့တရုတ်ပင်လယ်က အငြင်းပွားနေတဲ့ ကျွန်းတွေကို ဂျပန်အစိုးရက ဝယ်မယ်လို့ ပြောပြီးတဲ့နောက် အခြေအနေတွေ ပိုတင်းမာလာတာ ဖြစ်ပါတယ်။

အငြင်းပွားနေတဲ့ ကျွန်းစုကို တရုတ်က ပိုင်ဆိုင်တယ်လို့ ပြောနေသလို ထိုင်ဝမ်ဘက်ကလည်း ပိုင်ကြောင်း ပြောဆိုနေတာ ဖြစ်ပါတယ်။ တရုတ်ဖက်က ဂျောင်ယူလို့ခေါ်ပြီး ဂျပန်ကတော့ ဆင်ကာကုလို့ ခေါ်တဲ့ ကျွန်းတွေဟာ လူမနေပေမယ့် သဘာဝအရင်းအမြစ် ကြွယ်ဝပါတယ်။ နှစ်နိုင်ငံကြား တင်းမာမှုတွေကတဆင့် ၂၀၁၀ ပြည့်နှစ်မှာတော့ ဒီကျွန်းစုတွေကိစ္စဟာ သံတမန်ရေးနဲ့ အကြီးအကျယ် အငြင်းပွားကြတာ ဖြစ်ပါတယ်။

တရုတ် ရဲချုပ် တဦးကို စတင်ရုံးထုတ်

မစ္စတာ ဝမ်ဟာ မတ်လထဲမှာ အာဏာပိုင်တွေထံ အညံ့ခံ လိုက်တာ ဖြစ်ပါတယ်

တရုတ်နိုင်ငံမှာ နှစ်ပေါင်းများစွာ ဖြစ်ပွား နေခဲ့တဲ့ အကြီးမားဆုံး နိုင်ငံရေး အရှုပ်တော်ပုံ ရဲ့ အဓိက ဇာတ်ဆောင် ဖြစ်သူ ပြည်နယ် ရဲချုပ် ဝမ်လီဂျွန် ကို နိုင်ငံအနောက် တောင်ဘက် ချန်ဒူး မြို့မှာ စတင် ရုံးထုတ် နေပြီ ဖြစ်တယ်လို့ သတင်းတွေက ဆိုပါတယ်။

ဟိတ်ဟန် အပြည့်နဲ့ နေထိုင် တတ်သူ အဲဒီ ရဲချုပ်ကို အာဏာ အလွဲသုံးစား လုပ်မှု၊ အဂတိ လိုက်စားမှု၊ အာခံမှု စတာ တွေနဲ့ စွဲချက် တင်ထားတာ ဖြစ်ပြီး အခုတော့ သူ့ကို တရက်တာ တခါးပိတ် ကြားနား နေတာ ဖြစ်ပါတယ်။

အဲဒီ နောက်ပိုင်းမှ သူ့ကို ရုံးထုတ်မှာ ဖြစ်တယ်လို့ သူ့ရှေ့နေက ပြောကြားကြောင်း သိရပါတယ်။

မစ္စတာ ဝမ်ဟာ ချန်ဒူးမြို့ အမေရိကန် ကောင်စစ်ဝန်ရုံးမှာ ခိုလှုံခွင့် တောင်းခံခဲ့တယ်လို့ ယူဆရပြီး၊ အဲဒီ နောက်မှာတော့ မတ်လထဲမှာ အာဏာပိုင်တွေထံ အညံ့ခံ လိုက်တာ ဖြစ်ပါ တယ်။

သူ့ရဲ့ လုပ်ရပ်တွေကြောင့် သူ့ရဲ့ အရာရှိ ဖြစ်သူ နာမည် ကြီးလာနေတဲ့ နိုင်ငံရေး သမား ဘိုရှီလိုင် ကို ရာထူးက ထုတ်ပယ်တဲ့ အထိ ဖြစ်ခဲ့ ပါတယ်။

ဘိုရှီလိုင်ရဲ့ ဇနီးဖြစ်သူ ဂူကိုင်လိုင် ဟာလည်း ဗြိတိသျှ စီးပွားရေး သမား တဦးကို သတ်ဖြတ်မှုနဲ့ မကြာသေးခင်က ဆိုင်းငံ့ သေဒဏ် ကျခံခဲ့ ရပါတယ်။

ကချင်မှာ အပစ်ရပ်ဖို့ ၈၈ ကျောင်းသားတွေ မေတ္တာရပ်

ကချင် ဒေသကို ရောက်သွားခဲ့တဲ့ ဂဂ မျိုးဆက် ကျောင်းသား အဖွဲ့ဝင် တယောက် ဖြစ်တဲ့ ကိုမင်းကိုနိုင်

၈၈ မျိုးဆက် ကျောင်းသားများ အဖွဲ့က ကိုမင်းကိုနိုင်နဲ့ အဖွဲ့ဝင် တချို့ဟာ ကချင်ပြည်နယ် ဖားကန့်က မြို့မိ မြို့ဖတွေ သံဃာတော်တွေနဲ့ တခြား ဘာသာရေး ခေါင်းဆောင်တွေ ၊ လူမှုရေး အဖွဲ့တွေနဲ့ တနင်္လာ နေ့က တွေ့ဆုံပြီး ကချင် ပြည်နယ် အတွင်းမှာ နှစ်ဖက် တပ်တွေဘက်က တိုက်ပွဲတွေ ရပ်စဲဖို့ ကြေညာချက် ထုတ်ပြန်ခဲ့ပါတယ်။

အဲဒီ ထုတ်ပြန်ချက်ထဲမှာ ကချင်ပြည်နယ်မှာ ဖြစ်နေတဲ့ စစ်ပွဲတွေကို ဘယ်လိုလုပ် အမြန်ဆုံး ရပ်ဆိုင်း ပေးနိုင်မလဲ ဆိုတာကို ဝိုင်းဝန်း အဖြေရှာဖို့ မေတ္တာ ရပ်ခံချက် ထုတ်ပြန်တာ ဖြစ်ကြောင်း အဖွဲ့ဝင် တယောက်ဖြစ်တဲ့ ကိုဌေးကြွယ်က ဘီဘီစီကို ပြောပါတယ်။

ဒါ့အပြင် ပြည်သူတွေ ၊ နှစ်ဖက် တပ်ဖွဲ့က ရဲဘော်တွေ ထိခိုက် နစ်နာ သေကြေ ပျက်စီး နေရသလို လူထုက စိုးရိမ် ကြောက်လန့်နေရတဲ့ အခြေအနေမှာ ရှိနေပြီး စစ်ပွဲတွေနဲ့ ဖြေရှင်းမယ့် အစား တွေ့ဆုံ ဆွေးနွေးခြင်းနဲ့ အဖြေရှာ ကြဖို့ ကိုလည်း တိုက်တွန်းလိုကြောင်း သူက ဆိုပါတယ်။

အဲဒီလို အဖြေရှာရာမှာ လူထုဆန္ဒက ငြိမ်းချမ်းတဲ့ နည်းနဲ့ ဖြေရှင်းလိုတဲ့ ဆန္ဒကိုလည်း လေးစား သင့်ကြောင်း သူက ပြောပါတယ်။

ဒါ့အပြင် လက်ရှိမှာ အပစ်ရပ်ပြီး ဖြေရှင်းသွားနိုင်ဖို့ နည်းလမ်း ရှာရမယ် လိုလည်း ကိုဌေးကြွယ်က ဆိုပါတယ်။

ငြိမ်းချမ်းရေး ဖော်ဆောင်ရာမှာ နိုင်ငံရေး ဆွေးနွေးပွဲ ဖြစ်အောင် စစ်ရေး အရ ဖိအားပေးလို့ မရဘဲ တကယ့် ယုံကြည်မှု နားလည်မှုကို တည်ဆောက်ရမယ် ၊ ဒါမှသာ နှစ်ဖက် ရန်ငြိုး အမုန်း ပိုပွားလာမှုတွေ ရပ်တန့် သွားနိုင်မယ်လို့ သူက ရှင်းပြခဲ့ပါတယ်။

သူတို့ အနေနဲ့ ဒီဒေသကို ရောက်လာရခြင်းက တကယ် ဖြစ်နေတဲ့ စစ်ပွဲ အခြေအနေကို ကြည့်ပြီး ဘာအကောင်းဆုံး လုပ်ပေးနိုင်မလဲ ဆိုတာ လာကြည့်တာ ဖြစ်ကြောင်း ၊ ပြည်သူတွေ အသံ နားထောင်ဖို့ ရောက်လာတာ ဖြစ်သလို နှစ်ဖက်ကြား မြေဇာပင် ဖြစ်နေတဲ့ ပြည်သူတွေရဲ့ အခြေအနေကို လာရောက် လေ့လာတာပါလို့ ဆိုပါတယ်။

ဒါ့အပြင် ဒီ ကချင် အရေးဟာ ပြည်ထောင်စု တခုလုံးနဲ့ သက်ဆိုင်တဲ့ ကိစ္စ ဖြစ်တာကြောင့် သူတို့ အနေနဲ့ အလေးထား လုပ်ဆောင်သွားဖို့ ခံယူထားကြောင်း ကိုဌေးကြွယ်က ပြောသွားခဲ့ပါတယ်။

မြန်မာအစိုးရက အကျဉ်းသား ၅၀၀ ကျော် ထပ်လွှတ်

တနင်္လာနေ့ အထိ သိရသမျှ နိုင်ငံရေး အကျဉ်းသား ၅၈ ဦး ပြန်လွတ်လာတယ်လို့ NLD ကပြောပါတယ်

မြန်မာနိုင်ငံ အကျဉ်းထောင် အသီးသီးက အကျဉ်းသား (၅၁၄) ဦးကို သမ္မတ ကနေ တနင်္လာနေ့က စလို့ လွတ်ငြိမ်းချမ်း သာခွင့်ပေး လိုက်ပြီ ဖြစ်ပါတယ်။

လွတ်ငြိမ်းချမ်းသာ ခွင့်ပေးလိုက်တဲ့ အထဲကနေ အခုအချိန် (တနင်္လာနေ့) အထိ ပြန်လွတ်လာသူ နိုင်ငံရေး အကျဉ်းသား ၅၈ ဦး ရှိတယ်လို့ အမျိုးသား ဒီမိုကရေစီ အဖွဲ့ချုပ် NLD ပြောခွင့်ရ ဦးနိုင်းနိုင်းက ပြောပါတယ်။ NLD စာရင်း အရ နိုင်ငံရေး အကျဉ်းသား ၂၈၀ ရှိတယ်လို့ သိရပါတယ်။ နိုင်ငံခြားသား အကျဉ်းသားတွေလည်း လွတ်ငြိမ်းချမ်းသာခွင့် ပေးတဲ့ အထဲမှာ ပါဝင်ပါတယ်။

၁၉၉၈ ခုနစ်မှာ ဖမ်းဆီးခံခဲ့ ရတဲ့ မန္တလေးက နိုင်ငံရေး အကျဉ်းသား တဦးဖြစ်သူ ဦးရွှေထူးလည်း တောင်ကြီးထောင် ကနေ ပြန်လွတ် လာပြီ ဖြစ်ပါတယ်။

ဖွဲ့စည်းပုံ အခြေခံ ဥပဒေပုဒ်မ ၂၀၄ (က)၊ ပြစ်မှုဆိုင်ရာ ကျင့်ထုံး ဥပဒေ ပုဒ်မ ၄၀၁ (၁)အရ သမ္မတက လွတ်ငြိမ်းချမ်းသာခွင့် ပေးလိုက်တာ ဖြစ်ပြီး၊ နိုင်ငံတော် တည်ငြိမ်ရေး နှင့် ထာဝရ ငြိမ်းချမ်းမှု ဖော်ဆောင်ရေး အတွက်နဲ့ လူသားချင်း စာနာထောက် ထားမှုကို အလေးပေးတဲ့ အနေနဲ့ အခုလို ပြန်လွှတ်ပေး လိုက်တာ ဖြစ်တယ်လို့ ကြေညာချက်ထဲမှာ ဖေါ်ပြထား ပါတယ်။

အစိုးရက ပြီးခဲ့တဲ့ တနှစ်အတွင်း နိုင်ငံရေး အကျဉ်းသားတွေ ထောင်နဲ့ ချီ ပြန်လွှတ် ပေးခဲ့ပြီး ဖြစ်ပေမဲ့ အခုအထိ အကျဉ်းကျခံနေရတဲ့ နိုင်ငံရေး အကျဉ်းသား အနည်းဆုံး ၃၀၀ ကျော် ရှိနေသေးတယ်လို့ နိုင်ငံရေး အကျဉ်းသားတွေ အကြောင်း မှတ်တမ်းပြုစုတဲ့ အဖွဲ့အစည်းတွေက ပြောကြပါတယ်။

စက်တင်ဘာလ ၁၇ ရက် တနင်္လာနေ့ မှာပဲ လူ့အခွင့်အရေး စောင့်ကြည့်ရေးအဖွဲ့ Human Rights Watch ကလည်း အစီရင်ခံစာ တစောင် ထုတ်ပြန်ပြီး နိုင်ငံရေး အကျဉ်းသားတွေ အားလုံး ပြန်လွှတ်ပေးဖို့နဲ့ နိုင်ငံတကာ စောင့်ကြည့် လေ့လာရေး အဖွဲ့တွေကို အကျဉ်းထောင်တွေထဲ သွားရောက် ကြည့်ရှုခွင့် ပေးဖို့ မြန်မာအစိုးရကို တောင်းဆိုခဲ့ ပါတယ်။

အကျဉ်းသား ၅၁၄ဦး ကို မြန်မာ အစိုးရ လွတ်ငြိမ်း ချမ်းသာခွင့် ပေး

နိုင်ငံခြားသား အကျဉ်းသားတွေ အပါအ၀င် အကျဉ်းသားစုစုပေါင်း ၅၁၄ ယောက်ကို သမ္မတ က လွတ်ငြိမ်းချမ်းသာခွင့်နဲ့ ပြန် လွှတ်ပေးလိုက်တဲ့အကြောင်း ကြားဖြတ်အထူးသတင်းတရပ် မကြာသေးခင်က အချိန်ပိုင်းကပဲ မြန်မာ့ရုပ်မြင်သံကြား ကနေ ကြေညာသွားပါတယ်။ ဒါဟာ ကုလသမဂ္ဂ အထွေထွေ ညီလာခံကို တက်ရောက်ဖို့အတွက် သမ္မတ ဦးသိန်းစိန် အမေရိကန် ပြည်ထောင်စုကို မကြာခင် ရက်ပိုင်းမှာပဲ ရောက်လာရှိဖို့ အချိန်နဲ့လည်း တိုက်ဆိုင်နေပါတယ်။ အကြောင်းစုံကို မခင်ဖြူထွေးက ပြောပြပေးပါမယ်။

နိုင်ငံခြားသား အကျဉ်းသားတွေ အပါအ၀င် အကျဉ်းသား စုစုပေါင်း ၅၁၄ ယောက်ကို နိုင်ငံတော် သမ္မတက လွတ်ငြိမ်းချမ်းသာခွင့်နဲ့ ပြန်လွှတ်ပေးလိုက်တဲ့ အကြောင်းကို ဒီကနေ့ ညနေ ၄ နာရီက ကြားဖြတ် သတင်းတရပ်နဲ့ မြန်မာ့ရုပ်မြင်သံကြားမှာ ကြေညာခဲ့တာပါ။ ဒါနဲ့ပတ်သက်လို့ အကျဉ်းဦးစီးဌာနကို ဆက်သွယ် မေးမြန်းကြည့်တော့ အကျဉ်းဦးစီးဌာန ဒုတိယ ညွှန်ကြားရေးမှူးချုပ် ဦးသန်းဌေးက အခုလို ပြောပြပါတယ်။

“ကျနော်တို့ လွှတ်တာတော့ လွှတ်တယ်ခင်ဗျ။ ဒါပေမဲ့ ခဏလေး စောင့်ပေးပါလား။ ၆ နာရီခွဲလောက်ကျမှ။ ကျနော်တို့ အခု စိစစ်နေတုန်း။ လွှတ်တော်တော့ လွှတ်ပါတယ်။ ကျနော်တို့ စာရင်းဇယားတွေ ပြုစုနေလို့ပါ။ စာရင်းတော့ ရပြီခင်ဗျ။ ကျနော်တို့အခုက စိစစ်တုန်းပဲ ရှိသေးတယ်။ ကျနော်တို့ အခုဟာက လွှတ်ဖို့လုပ်နေတဲ့အတွက် ကျနော်တို့ ပြန်စိစစ်ပြီး ထောင်တွေ ခွဲနေလို့ပါ။”

အခု သမ္မတက လွတ်ငြိမ်းချမ်းသာခွင့် ပေးလိုက်တဲ့အထဲမှာ နိုင်ငံရေးအကျဉ်းသားတချို့ ပါဝင်တယ်လို့ သိရပေမဲ့ ဘယ်သူတွေ ပါဝင်ပြီး အရေအတွက်အားဖြင့် ဘယ်လောက် ရှိတယ် ဆိုတာတော့ မသိရသေးပါဘူး။ အခုလွတ်တဲ့အထဲမှာ နိုင်ငံရေးအကျဉ်းသား ဆယ်ဂဏန်းလောက်ပဲ ပါနိုင်ဖွယ်ရှိတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအဖွဲ့ မြန်မာနိုင်ငံရဲ့ အတွင်းရေးမှူး ဦးတိတ်နိုင်ကပြောပါတယ်။

" အခု ပြန်လွတ်လာတဲ့သူတွေထဲမှာတော့ နိုင်ငံရေးအကျဉ်းသားက ဆယ်ဂဏန်းလောက်ပဲ ပါတယ်လို့ သိရပါတယ်။ အများစုကတော့ နိုင်ငံခြားသားတွေ ဖြစ်ပါတယ်။ ကျနော်တို့ ကြားတာက လေးရာနီးနီးတောင်မှ နိုင်ငံခြားသား အကျဉ်းသားတွေဖြစ်နေတယ်ဆိုတာမျိုး ရှိပါတယ်။

ဒီသာမာန် ရာဇဝတ်အကျဉ်းသားနဲ့ ပေါင်းလိုက်ရင်တော့ နိုင်ငံရေးအကျဉ်းသားကတော့ ဆယ်ဂဏန်းလောက်ပဲ လွတ်လာနိုင်ခြေရှိပါတယ်။ အခုကျနော်တို့ ကြားနေရတာက သာယာဝတီထောင်က သုံးယောက်လွတ်တယ်။ ဆိုတော့ နောက်တခါ တောင်ကြီးထောင်က တယောက်လွတ်မယ်။ အဲ့လောက်ပဲ သိရသေးပါတယ်။

သူတို့ ကြေညာတဲ့အချိန်နဲ့ ထောင်ပိတ်တဲ့အချိန်နဲ့က ကပ်နေတဲ့အတွက် ဒီနေ့တောင်မှ လွှတ်ဖို့မှာ နောက်ကျမှ လွှတ်နိုင်တဲ့ အနေအထားမျိုး ရှိပါတယ်။"

ဒီရက်ပိုင်း အတွင်းမှာပဲ နိုင်ငံတော်အကြီးအကဲ သမ္မတ ဦးသိန်းစိန် အမေရိကန်ပြည်ထောင်စု နယူးယောက်မြို့ကို လာရောက်ပြီး ကုလသမဂ္ဂ အထွေထွေ ညီလာခံ တက်ရောက်ဖို့ ရှိနေချိန်မှာပဲ အခုလို အကျဉ်းသားတွေကို သမ္မတက လွတ်ငြိ်မ်းချမ်းသာခွင့် အမိန့် ထွက်ပေါ်လာတာ ဖြစ်ပါတယ်။

မြန်မာအစိုးရအနေနဲ့ အရင်ကလည်း အခုလို ထူးခြားတဲ့ အချိန်မျိုးမှာ နိုင်ငံရေး အကျဉ်းသားတွေ အပါအ၀င် အကျဉ်းသားတွေ လွှတ်ပေးလေ့ ရှိတာကြောင့် ဒီတကြိမ် လွှတ်ပေးမှုကလည်း တကယ်ပဲ ပြုပြင် ပြောင်းလဲရေးကို ဦးတည်ဆောင်ရွက်တဲ့ လုပ်ရပ်လားဆိုပြီး သံသယ ဖြစ်နေသူတွေလည်း ရှိပါတယ်။ နိုင်ငံရေး အကျဉ်းသားများ ကူညီစောင့်ရှောက်ရေးအဖွဲ့ (မြန်မာနိုင်ငံ) ရဲ့ အတွင်းရေးမှူး ဦးတိတ်နိုင်ကတော့ အခုလို သုံးသပ်ပါတယ်။

“တော်တော်လေးကို ခက်တဲ့ကိစ္စပါ။ ဘာဖြစ်လို့လဲ ဆိုတော့ အဲဒီလိုမျိုး သွားတိုင်း၊ တခုခု ထူးခြားတိုင်း၊ ပြည်တွင်း ပြည်ပဖိအားတွေ ကြီးလာတိုင်းမှာ အဲ့လို နိုင်ငံရေး အကျဉ်းသားတွေ အပါအ၀င်ပေါ့လေ။ အကျဉ်းသားတွေ လွှတ်ပေးတယ်။ အဲဒီအထဲမှာ နိုင်ငံရေးအကျဉ်းသားတွေ နည်းနည်း နည်းနည်း ပါတယ်။ ဆိုတော့ ဒီကိစ္စမျိုးတွေကတော့ တော်တော်ကို ယုံကြည်ရခက်တဲ့ကိစ္စမျိုးလို့ ထင်ပါတယ်။

ဘာဖြစ်လို့လဲ ဆိုတော့ ဒီနှစ်ပိုင်းမှာ တကယ့် အထင်ကရ နိုင်ငံရေး အကျဉ်းသားတွေ အများအပြားကို လွှတ်ပေးလိုက်တယ်။ သို့ပေမဲ့လည်း ဘာကြောင့် အထင်ကရ မဟုတ်သေးတဲ့ နိုင်ငံရေးအကျဉ်းသားတွေကို မလွှတ်ပေးသေးဘူးလဲ ဆိုတာ တော်တော်ကို စဉ်းစားစရာ ဖြစ်ပါတယ်။ သံသယ ဖြစ်စရာ ဖြစ်ပါတယ်။

ဆိုတော့ ဒီလူတွေကို တခါ လွှတ်ပေးလိုက်၊ ချီးကျူးလိုက်၊ နိုင်ငံတကာကနေ ထောက်ခံလိုက် ဆိုတဲ့ဟာမျိုးတွေ လုပ်နေတဲ့ လုပ်နေတဲ့အခါ ကျတော့ ဒီနိုင်ငံရေးအကျဉ်းသားတွေကို ဓားစားခံအဖြစ် ထားပြီးတော့ အဲဒီလိုမျိုး တဖြည်းဖြည်းနဲ့ အပေးအယူ လုပ်နေတဲ့သဘောလားလို့ မေးခွန်း ထုတ်စရာ ရှိပါတယ်။ အဲဒါမျိုး ဆိုလို့ရှိရင်တော့ ကျနော်တို့ ဒီ သမ္မတ ဦးသိန်းစိန် အစိုးရရဲ့ ပြုပြင် ပြောင်းလဲရေး ဆိုတာ ဘာလဲ ဆိုတာကို သံသယ ဖြစ်စရာပါ။”

မြန်မာနိုင်ငံ အကျဉ်းထောင်တွေထဲမှာ နိုင်ငံရေးအကျဉ်းသား ရာနဲ့ချီ ဆက်လက် ရှိနေဆဲ ဖြစ်ပြီး မြန်မာအစိုးရ အနေနဲ့ တကယ်တမ်း စစ်မှန်တဲ့ ပြုပြင် ပြောင်းလဲရေးဆီကို ဦးတည် ဆောင်ရွက်နေတယ်ဆိုရင် ဒီလူတွေ အားလုံးကို ပြန်လွှတ်ပေးရမှာ ဖြစ်တယ်လို့ လူ့အခွင့်အရေး လှုပ်ရှားသူတွေက ထောက်ပြ ပြောဆိုနေကြတာဖြစ်ပါတယ်။

သမ္မတ ဦးသိန်းစိန် အစိုးရ တက်လာပြီးတဲ့ မတ်လ ကတည်းကစလို့ ခုလို လွတ်ငြိမ်းချမ်းသာခွင့် ပေးတာ ဒါနဲ့ဆိုရင် (၆) ကြိမ် ရှိသွားပြီ ဖြစ်သလို စုစုပေါင်း အကျဉ်းသား ၂ သောင်း ၉ ထောင် ၁၈ ယောက် လွတ်မြောက်ခဲ့တာ ဖြစ်ပါတယ်။

ဒီအထဲမှာ နိုင်ငံရေးအကျဉ်းသားကတော့ ၈၀၀ ကျော် ပါဝင်ခဲ့သလို ကိုမင်းကိုနိုင် ကိုကိုကြီး စတဲ့ အထင်ကရ ၈၈ မျိုးဆက် ကျောင်းသားခေါင်းဆောင်တွေ၊ တိုင်းရင်းသား နိုင်ငံရေးပါတီတွေက ခေါင်းဆောင်တွေနဲ့ နိုင်ငံရေး တက်ကြွလှုပ်ရှားသူတွေ ပါဝင်ခဲ့တာ ဖြစ်ပါတယ်။

ခုမတိုင်ခင် နောက်ဆုံးတကြိ်မ် လွတ်ငြိမ်းချမ်းသာခွင့် ပေးခဲ့တာကတော့  ပြီးခဲ့တဲ့ ဇူလိုင်လက ဖြစ်ပြီး နိုင်ငံခြားသား အကျဉ်းသား ၃၄ ယောက် အပါအ၀င် အကျဉ်းသား ၈၀ ကျော် ပြန်လည် လွတ်မြောက်ခဲ့တာ ဖြစ်ပါတယ်။

ဒုံးလက်နက်ကာကွယ်ရေး ရေဒါစနစ်သစ်ထားရှိဖို့ အမေရိကန်နဲ့ ဂျပန်သဘောတူ

မြောက်ကိုရီးယားရဲ့ ပဲ့ထိန်းတပ် ဒုံးကျည်ခြိမ်းခြောက်မူကို ကာကွယ်နိုင်ဖို့အတွက် အမေရိကန်ပြည်ထောင်စုနဲ့ ဂျပန်အစိုးရတို့ ပူးပေါင်းပြီး ဂျပန်နိုင်ငံ ပိုင်နက်ထဲမှာ ဒုံးကျည်ကာကွယ်ရေး ရေဒါစနစ်သစ် ထားရှိဖို့ သဘောတူလိုက်ကြပါပြီ။

ဂျပန်နိုင်ငံ၊ တိုကျိုမြို့တော်က အစည်းအဝေးပြီးတဲ့နောက် တနင်္လာနေ့မှာ အမေရိကန် ကာကွယ်ရေးဝန်ကြီး လီယွန် ပန်နက်တား (Leon Panetta) နဲ့ ဂျပန်ကာကွယ်ရေးဝန်ကြီး ဆတို့ရှိ မိုရိမို့တို့ (Satoshi Morimoto) တို့ရဲ့ သဘောတူညီချက်ကို ထုတ်ပြန်ကြေညာလိုက်တာပါ။

အဲဒီ ဒုံးကျည်ကာကွယ်ရေး ရေဒါစနစ်သစ် X band radar ဟာ ဂျပန်နိုင်ငံကို ကာကွယ်ဖို့ ဖြစ်သလို အမေရိကန်နိုင်ငံကို ကာကွယ်ဖို့လည်းဖြစ်တယ်လို့ ကာကွယ်ရေးဝန်ကြီး ပန်နက်တားက ပြောပါတယ်။ ဒီစနစ်ဟာ တရုတ်နိုင်ငံကို မရည်ရွယ်ထားဘူးဆိုတာကိုလည်း ပန်နက်တားက အလေးအနက်ပြောခဲ့ပါတယ်။

ရေဒါစနစ်ထားရှိမယ့် နေရာအတွက်တော့ မရွေးချယ်ရသေးဘူးလို့ ဂျပန်ကာကွယ်ရေးဝန်ကြီး မိုရိမို့တို့ကပြောပါတယ်။

အဲဒီဒေသမှာလွှတ်ထားတဲ့ စစ်သင်္ဘောတွေပေါ်မှာ ကြိုတင်သတိပေး ရေဒါစနစ်တွေကို အမေရိကန်ပြည်ထောင်စုက ချထားပြီးသားပါ။ အခုတော့ အဲဒီသင်္ဘောတွေဟာ ဒေသတွင်း မှာ ပိုပြီး လွတ်လွတ်လပ်လပ် လှုပ်ရှားသွားလာနိုင်တော့မှာဖြစ်ပါတယ်။

အရှေ့တရုတ်ပင်လယ်ထဲက ကျွန်းတွေကို ပိုင်ဆိုင်မှုနဲ့ပတ်သက်ပြီး တရုတ်နဲ့ဂျပန်တို့ အငြင်း ပွားနေတဲ့ကိစ္စပေါ်မှာ အမေရိကန်က စိုးရိမ်မကင်းဖြစ်တယ်လို့လည်း ဒီကနေ့ တနင်္လာနေ့ တရုတ်နိုင်ငံဆီ ခရီးမဆက်ခင် မစ္စတာပန်နက်တားက ပြောခဲ့ပါတယ်။

ကာချုပ်ရုံးရှေ့တွင်ပါ စစ်ရပ်စဲရေး ဆန္ဒပြမည်

သိင်္ဂီထွန်း | တနင်္လာနေ့၊ စက်တင်ဘာလ ၁၇ ရက် ၂၀၁၂ ခုနှစ် ၁၄ နာရီ ၂၄ မိနစ်

ရန်ကုန် (မဇ္ဈိမ) ။       ။ တနိုင်ငံလုံး အပစ်အခတ် ရပ်စဲရေးအတွက် စက်တင်ဘာလ ၂၁ ရက်နေ့တွင် ကျရောက်မည့် အပြည်ပြည်ဆိုင်ရာ ငြိမ်းချမ်းရေးနေ့တွင် ပြည်တွင်းရှိ လူမှုအဖွဲ့စည်း ၁၉ ဖွဲ့က နေပြည်တော်ရှိ သမ္မတရုံး၊ လွှတ်တော် များရှေ့နှင့် ကာကွယ်ရေး ဦးစီးချုပ်ရုံးရှေ့တို့တွင် ဆန္ဒပြုပွဲများ ပြုလုပ်သွားမည်ဟု ကချင်ငြိမ်းချမ်းရေးကွန်ယက်မှ ကိုဂျော်ဂွန်းက မဇ္ဈိမကို ပြောသည်။

“စာတင်ထားတယ်။ ခွင့်ပြုသည်ဖြစ်စေ ခွင့်မပြုသည်ဖြစ်စေ ကျနော်တို့လုပ်မှာ” ဟု ကိုဂျော်ဂွန်း ကပြောသည်။

ထိုနေရာများအား ရွေးချယ်ဆန္ဒပြရခြင်းနှင့်ပတ်သက်၍လည်း “ကချင်စစ်ရဲ့ နောက်ကွယ်မှာရှိတဲ့ ရပ်တန့်အောင် လုပ်နိုင်တဲ့ တာဝန်ရှိတဲ့သူတွေ၊ ပထမဆုံး နိုင်ငံတော် သမ္မတကို ရည်ရွယ်တယ်။ ပြီးလို့ရှိရင် ဒီမိုကရေစီ ကျင့်သုံးတဲ့နိုင်ငံမှာဆိုရင် စစ်ပွဲတပွဲဟာ လွှတ်တော်ကနေ ခွင့်ပြုချက်မရရင် တိုက်လို့မရဘူး ဆိုတဲ့အတွက် လွှတ်တော်ရှေ့ကို သွားဖို့ ရည်ရွယ်တာပါ။ ဒုတိယ တချက်ကတော့ ကာကွယ်ရေး ဦးစီးချုပ်ရုံးရှေ့ပါ။ ကျနော်တို့က ရန်တိုက်ပေးခြင်း လည်း မဟုတ်ပါဘူး။ စစ်ပွဲတပွဲအတွက် မြန်မာနိုင်ငံမှာ အခရာကျတာက ကာကွယ်ရေး ဦးစီးချုပ်ပါ” ဟု ကိုဂျော်ဂွန်း က ဆိုသည်။

ငြိမ်းချမ်းရေးနေ့တွင် ကချင်ငြိမ်းချမ်းရေးကွန်ယက် နှင့်အတူ အခြားလူမှုရေး အဖွဲ့များ၊ အသင်းဖွဲ့များ၊ ကျောင်းသားများနှင့် အခြားစိတ်ပါဝင်စားသူ ၂၅ဝ ခန့် ပါဝင်မည်ဟု ဆိုသည်။

ထိုနေ့ မနက်ပိုင်းတွင် ရန်ကုန်မှ ကား ငါးစီးဖြင့် နေပြည်တော်သို့ ထွက်ခွာမည်ဖြစ်ပြီး နေ့လည်ပိုင်းတွင် သတ်မှတ်နေရာများရှေ့၌ ဆန္ဒပြုကြမည်ဖြစ်သည်။ ညနေ ၄ နာရီတိတိတွင် ရောက်ရာနေရာမှ ငါးမိနစ် ငြိမ်သက်စွာ ဆုတောင်းကြမည်ဟု စီစဉ်ထားကြောင်း သိရသည်။

ဦးတည်ဆန္ဒပြရန် သတ်မှတ်ထားသည့် လွှတ်တော်ဝင်းသည် ဥတ္တရသီရိမြို့နယ်၊ ဇေယျာသိဒ္ဓိရပ်ကွက်တွင် တည်ရှိ သည်။ ရုံးအမှတ် ၂၄ ဖြစ်သည့် ကာကွယ်ရေးရုံးနှင့် ရုံးအမှတ် ၁၈ ဖြစ်သည့် သမ္မတရုံးတို့သည် ဥတ္တရသီရိမြို့နယ်တွင် တည်ရှိသည်။

ရန်ကုန်မြို့တွင်လည်း ငြိမ်းချမ်းရေးကွန်ယက်မှ ဦးဆောင်ကာ လမ်းလျှောက်ပွဲတခုကို လူ ၃ဝဝ ခန့်ဖြင့် နေပြည်တော်နှင့် တပြိုင်တည်း ပြုလုပ်မှာဖြစ်သည်။ ညနေ ၃ နာရီတွင် အင်ယားကန်ဘောင်တွင် ‘ပန်းရဲ့လမ်း’ လူမှုရေးအဖွဲ့မှတေးဂီတဖြင့် ဖျော်ဖြေမှာဖြစ်ပြီး ညနေပိုင်းတွင် အင်းယားကန်ဘောင်တွင် ငြိမ်းချမ်းရေးကျောက်တိုင် စိုက်ထူမှာဖြစ်သည်။

“စကျင်ကျောက်လေးတွေနဲ့ ငြိမ်းချမ်းရေး ကျောက်တိုင်ဆောက်ဖို့ရှိတယ်။ သူတို့က ခွင့်မပြုဘူးပြီး ဘူဒိုဇာနဲ့ ထိုးသွားရင်တော့ မတတ်နိုင်ဘူးပေါ့” ဟု ပန်းရဲ့လမ်းအဖွဲ့မှ မခင်စန္ဒာညွန့်ကြည်က ပြောသည်။

အဆိုပါ ငြိမ်းချမ်းရေးနေ့ နေပြည်တော်နှင့်ရန်ကုန်ဆန္ဒပြပွဲများတွင် ညနေ ၄ နာရီတိတိအချိန်၌ ရောက်ရာအရပ်မှနေ၍ ငါးမိနစ်ကြာ ငြိမ်သက်စွာ စစ်ရပ်စဲရေး ဆုတောင်းကြမည်လည်း ဖြစ်သည်။

အဆိုပါ အပြည်ပြည်ဆိုင်ရာ ငြိမ်းချမ်းရေးနေ့ လှုပ်ရှားမှုများကို ကချင်ငြိမ်ချမ်းရေးကွန်ရက်၊ ငြိမ်းချမ်းရေးကွန်ယက်၊ အဖြူရောင်တွဲလက်များ၊ ကရင်အမျိုးသမီးများ လှုပ်ရှားမှုအဖွဲ့၊ ပန်းရဲ့လမ်း လူမှုရေးအဖွဲ့၊ စိမ်းရောင်စို လူမှုကူညီရေး အဖွဲ့၊ Youth For Social Change Myanmar၊r ၊ နှောင်ကြိုးမဲ့ လူမှုဖွံ့ဖြိုးရေး ကွန်ယက် (မန္တလေး)၊ ရန်ကုန်အခြေစိုက် ပရဟိတ လူငယ်များ ကွန်ယက်၊ ကျောက်မဲ လူငယ်ကွန်ယက် (ရှမ်း-မြောက်)၊ Open Network – မွန်၊ ကာတွန်းဆရာ များ အဖွဲ့၊ ရန်ကုန် ဂီတလူငယ်များ၊ ကဗျာဆရာများ သမဂ္ဂ၊ Youth Art Network၊ New Zero Art Space၊ Myanmar Ink Gallery၊ ရန်ကုန် ပြည်သူ့အကျိုးဆောင်ကွန်ရက် စသည့် လူမှုရေးအဖွဲ့ ၁၉ ဖွဲ့က ဦးဆောင် လှုပ်ရှားကြမည်ဖြစ်သည်။

"Stop Civil War"၊ "တနိုင်ငံလုံး စစ်ပွဲရပ်" စာတန်းများသုံးပြီး လက်မောင်းစီး (သို့မဟုတ်) ခေါင်းစီးကို အပြာရောင် အသုံးပြုသွားမည် ဖြစ်သည်။

“ပြည်တွင်းစစ် ချက်ချင်းရပ်ဖို့ကို အဓိက ရည်ရွယ်ပါတယ်။ အခု ၂၁ ရက်နေ့မှာ လုပ်တဲ့အခါမှာ ထိုးစစ်တွေက ဆိုးရွားနေတယ်ဆိုရင် ထပ်ပြီး အရှိန်မြှင့်ဖို့ တနိုင်ငံလုံး ငြိမ်းချမ်းရေး အင်အားစုကြီးအနေနဲ့ ထပ်လုပ်ဖို့ ရှိပါတယ်။ ဒီဟာက သက်ရောက်မှု မရှိဘူးဆိုရင် ကျမတို့ နောက်ဆုတ်သွားမှာ မဟုတ်ဘူး” ဟု မခင်စန္ဒာညွန့်ကြည် က မဇ္ဈိမကို ပြောကြားသွားသည်။

တနိုင်ငံလုံး ထိုးစစ်များကို ရပ်တန့်ရန်အတွက် နိုင်ငံတော်သမ္မတမှ ကာကွယ်ရေးဦးစီးချုပ်ရုံးသို့ ၂ဝ၁၁ ခုနှစ်၊ ဒီဇင်္ဘာလ ၁ဝ ရက်နေ့က ညွှန်ကြားချက် ပေးပို့ထားသော်လည်း ကချင်ပြည်နယ်တွင် အစိုးရတပ်များနှင့် ကချင်လွတ်လပ်ရေးတပ် KIA တို့အကြား တိုက်ပွဲများ ဆက်လက်ဖြစ်ပွားနေဆဲဖြစ်သည်။ ထို တနှစ်ကျော်ကြာ စစ်ပွဲများကြောင့် အိုးအိမ်များကို စွန့်ခွါထွက်ပြေးနေကြရသည့် စစ်ပြေူဒုက္ခသည်ပေါင်း ၇ဝ,ဝဝဝ ကျော် ရှိနေသည်။

ရှမ်းပြည်နယ်တွင်လည်း အပစ်အခတ်ရပ်စဲပြီး ရှမ်းလက်နက်ကိုင်တပ်များနှင့် အစိုးရတပ်များအကြား တိုက်ပွဲငယ်များ ၃ဝ ကျော် ဖြစ်ပွားခဲ့ပြီးဖြစ်သည်။

ကုလအကြံပေး ပုဂ္ဂိုလ် မြန်မာ ခရီးစဉ် အဆုံးသတ်

မြန်မာနိုင်ငံကို စက်တင်ဘာလ ၁၂ ရက်နေ့ကနေ ၁၇ ရက်နေ့ အထိ ၅ ရက်ကြာ ရောက်ရှိနေတဲ့ ကုလသမဂ္ဂရဲ့ မြန်မာနိုင်ငံဆိုင်ရာ အထူးအကြံပေး ပုဂ္ဂိုလ် မစ္စတာ Vijay Nambiar ဟာ သူ့ရဲ့ ခရီးစဉ်ကို ဒီကနေ့ အဆုံးသတ်လိုက်ပါပြီ။

ခရီးစဉ် အတွင်း မစ္စတာ နမ်ဘီယား ဟာ နေပြည်တော်မှာ သမ္မတ ဦးသိန်းစိန်ရဲ့ အကြံပေး ပု၈္ဂိုလ် တွေ အပြင်၊ ပြည်သူ့လွှတ်တော် ဥက္ကဌ သူရ ဦးရွှေမန်း၊ နိုင်ငံခြားရေး ၀န်ကြီး ဦးဝဏ္ဏမောင်လွင်၊ နယ်စပ်ရေးရာ ၀န်ကြီး ဗိုလ်ချုပ် သိန်းဌေး၊ သမ္မတရုံး ၀န်ကြီး ဦးစိုးသိန်း၊ ဦးအောင်မင်း၊ ပထမဆုံး အမျိုးသမီး ၀န်ကြီးဖြစ်တဲ့ ဒေါ်မြတ်မြတ်အုန်းခင်နဲ့ ပြန်ကြားရေး ၀န်ကြီး ဦးအောင်ကြည်တို့နဲ့ တွေ့ဆုံဆွေးနွေးခဲ့ပါတယ်။

မစ္စတာ နမ်ဘီးယားဟာ တိုင်းရင်းသား အဖွဲ့အစည်းတွေ အပြင် လူမှု အဖွဲ့အစည်းတွေ နိုင်ငံရေးပါတီတွေနဲ့လည်း တွေ့ဆုံခဲ့ပါတယ်။ မစ္စတာ နမ်ဘီးယားနဲ့ တွေ့ဆုံခဲ့တဲ့ တိုင်းရင်းသား အုပ်စုတွေနဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ် လည်း ပါဝင်ပါတယ်။အခုလို တွေ့ဆုံမှုနဲ့ ပတ်သက်ပြီးတော့ SNLD ပြောခွင့်ရ ဦးစိုင်းညွန့်လွင် က အခုလို ပြောပါတယ်။

“ပါတီအနေနဲ့ကတော့ SNLD ပါတီ ပါတယ်။ ချင်းတိုးတက်ရေးပါတီက ဦးဒိုးဇန် ပါတယ်။ နောက် NGO ထဲက ဦးဇဘွဲဂျွန်က ပါတယ်။ နောက်ပုဂ္ဂုလိကထဲက ဟယ်လင်စောဦးဆိုတာ ကရင်ထဲက ပါတယ်။ ကယားလူငယ် တယောက်ပါတယ်။ နောက်ချင်းထဲက ချင်းခရစ်ယာန်အသင်း ဥက္ကဌ တယောက်ပါတယ်။ နောက် ဒေါ်ဂျာနယ်ပါတယ် သူက စရောဖောင်ဒေးရှင်းကပါတယ်။ သူက အစီအစဉ်လုပ်တယ်။ အဓိကကတော့ မြန်မာပြည် ငြိမ်းချမ်းရေးကိစ္စပေါ့။

အခုက ကချင်မှာ ပစ်တာခတ်တာတွေ အားလုံးကို အတက်နိုင်ဆုံး အမြန်ဆုံး တက်နိုင်သလောက် ရပ်စဲသွားအောင် အကူအညီပေးဖို့ ကိစ္စပဲ။ ဦးဇဘွဲဂျွန်က အဓိကပေါ့ဗျာ။ သူက ကချင်ကလာတယ်ဆိုတော့ ကချင်ပြည်နယ် ဖြစ်နေတဲ့ကိစ္စတွေက အစိုးရဘက်က ရပ်လိုက်လို့ရှိရင် ဖြစ်မယ်ပေါ့။ အဲ့လိုတော့ ပြောတယ်။ ဆိုတော့ နဗ်ဗီးယားကလည်း ပြန်ရှင်းပြတယ်ဗျ။ သူ့အပိုင်းကလည်း သိတယ်မ ဟုတ်လား။ ကုလသမဂ္ဂဆိုတော့ လုပ်ရ ကိုင်ရတာ တချို့အခက်အခဲတွေရှိတယ်ပေါ့။ ပြည်တွင်းရေးကိစ္စ ဝင်စွက်ဖက်တာတို့ ဘာတို့ မလွယ်ဘူးပေါ့။ ဒါပေမယ့် သူကတော့ ကြိုးစားပါ့မယ်ပေါ့။"

မစ္စတာ နမ်ဘီးယားရဲ့ လက်ရှိ ခရီးစဉ် အတွင်း ဆွေးနွေးမှုတွေမှာ သမ္မတ ဦးသိန်းစိန်ရဲ့  ၆၇ နှစ်မြောက် ကုလသမဂ္ဂ အထွေထွေညီလာခံ တက်ရောက်မယ့် အကြောင်းလည်း ပါဝင်ပါတယ်။ သမ္မတ ဦးသိန်းစိန်ဟာ နယူးယော့ခ် ကုလသမဂ္ဂ ဌာနချုပ်မှာ စက်တင်ဘာ ၂၇ ရက်နေ့ မိန့်ခွန်းပြောကြားဖို့ ရှိကြောင်း သိရပါတယ်။

အထူးအကြံပေး ပုဂ္ဂိုလ်ဟာ ၂၁ ရာစု မြန်မာနိုင်ငံမှာ နိုင်ငံသား ခံယူမှုနဲ့ ပတ်သက်တဲ့ ညီလာခံမှာလည်း မိန့်ခွန်းပြောကြားခဲ့တဲ့ အကြောင်း ရန်ကုန် အခြေစိုက် ကုလသမဂ္ဂ သတင်းထုတ်ပြန်မှုမှာ ဖော်ပြထားပါတယ်။ မစ္စတာ နဗ်ဗီးယားဟာ မကြာသေးမှီက ရခိုင်ပြည်နယ်မှာ အကြမ်းဖက် ပဋိပက္ခတွေ ဖြစ်ပြီးပြီးချင်း ရက်ပိုင်းအတွင်းမှာပဲ မြန်မာနိုင်ငံကို ရောက်ရှိလာပြီး ရခိုင်ပြည်နယ်ကိုလည်း သွားရောက်ခဲ့ပါတယ်။