ဒီမိုကရေစီ ရွေးကောက်ပုံ စနစ်များ အကြောင်း (၂)

by Ko Htike on Monday, August 6, 2012 at 3:17am 

ပြီးခဲ့တဲ့ ရက်ပိုင်းလောက်က ဒီမိုကရေစီ ရွေးကောက်ပွဲ စနစ်တွေထဲက မြန်မာနိုင်ငံမှာ လက်ရှိ ကျင့်သုံးနေတဲ့ "မဲအများဆုံးရသူ နိုင်တဲ့ စနစ် FPTP (သို့) SMDP" အကြောင်း၏ ရွေးကောက်တင်မြှောက်ပုံ၊ ၄င်းနောက် အားနည်းချက်၊ အားသာချက် စတာတွေကို အကြမ်းဖျင်းဆွေးနွေး တင်ပြခဲ့ပါတယ်။ အပြည့်အစုံကိုအခုလင့်http://tinyurl.com/cxp7pdv မှာ ဖတ်ရှုနိုင်ပါတယ်။

ဒီနေရာမှာ အခြား ရွေးကောက်ပုံ စနစ်တွေအကြောင်း ဆက်လက် မပြောခင် ကြိုတင်ပြီး စကားပလ္လင်ခံပါရစေ။ ကျွန်တော် ယခု ရေးသားသည့် အကြောင်းအရာများမှာ စာတမ်းပြုစုသလို အကြောင်းအရာများကို နက်နက်နဲနဲ ရေးသားခြင်းမဟုတ်ပါ။

ဒီမိုကရေစီ စနစ်နှင့် သူ၏ ရွေကောက်ပုံများအကြောင်းကို လုံးဝ မသိသေးသူများနှင့် မရှင်းလင်းသူများကို တီးမိ၊ ခေါက်မိအောင်နှင့် ဒီမိုကရေစီ အခြေခံသဘောတရားများကို နားလည်စေလိုခြင်းသာ ဖြစ်ပါသည်။

ထို့အတူ ဒီမိုကရေစီ ရွေးကောက်ပုံဆိုင်ရာ စနစ်များ၏ အခြေခံ တွေးခေါ်ပုံနှင့် သဘောတရားများကို ရေးသားခြင်း သက်သက်သာ ဖြစ်ပြီး မည်သည့် စနစ်ကို မြန်မာပြည်တွင် ကျင့်သုံးသင့်သည် ဆိုသော အကြံပြုချက်အဖြစ် ရေးသားခြင်းလည်း မဟုတ်ပါ။ (နောက်ပိုင်း ကြုံလျှင်တော့ အကြံပြုချက် သက်သက် ရေးပါမည်။) ယခုရေးသားခြင်းမှာ .. ဒီမိုကရေစီ စနစ်၏ အခြေခံ ရွေးကောက်ပုံ စနစ်များကို နိုင်ငံရေး "ကကြီး၊ ခခွေး" အဆင့် (သို့) ဒီမိုကရေစီနိုင်ငံရေး အခြေခံ လှေခါးထစ် အဆင့် အဖြစ်သာ မိတ်ဆက်ရေးသားခြင်းဖြစ်ကြောင်း ပြောလိုပါသည်။

"မဲအများဆုံးရသူ နိုင်တဲ့ စနစ် FPTP (သို့) SMDP" စနစ်အရ ရွေးကောက်ခံ ဒေသအတွင်းက မဲအများဆုံး ရသူ တစ်ယောက်က နိုင်သူ အကုန်ယူစတမ်း (The Winner Takes All) ပုံစံဖြင့် အနိုင်ယူသွားပြီး ကျန်သူများနှင့် လူနည်းစု၏ သဘောထားများ ပါလီမာန်ထဲတွင် ထင်ဟပ်ခြင်းမရှိနိုင်တော့သလို .. မဲအများဆုံးရသူက အနိုင်ယူသွားသော်လည်း တကယ်တမ်းမှာ အဆိုပါ အနိုင်ရသူမှာ ရွေးကောက်ခံနယ်မြေ တစ်ခုအတွင်းရှိ ပြည်သူ အများစု၏ ထောက်ခံမှုဖြင့် အနိုင်ရခြင်းမျိုး အမြဲဖြစ်မနေတတ်သဖြင့် ဒီမိုကရေစီ အခြေခံတန်ဖိုးများ ယုတ်လျော့လျက်ရှိနေသည်။

ဒီမိုကရေစီ၏ အဓိကအကျဆုံး တန်ဖိုး ဆိုသည်မှာ လူအများစု၏ သဘောထားကို လူနည်းစုက လိုက်နာရပြီး၊ .. လူနည်းစု၏ သဘောထားကို လူများစုက တန်ဖိုးထား နားထောင်ရခြင်း ..  ဖြစ်သည်။

နိုင်ငံရေးအရ တိုက်ရိုက် ရွေးချယ်သော ဒီမိုကရေစီ စနစ်မှာ ယနေ့ခေတ် နိုင်ငံများ၏ ပုံသဏ္ဍန်အရ လက်တွေ့မကျနိုင်တော့သဖြင့် ကိုယ်စားပြု ဒီမိုကရေစီ အုပ်ချုပ်ရေး စနစ် (Representative Democracy) ဖြင့် လူထု ကိုယ်စားလှယ်များကို ရွေးချယ်ပြီး ပြည်သူများ၏ ကိုယ်စား ကိုယ်စားလှယ်များက အလုပ်လုပ်ပေးရခြင်း ဖြစ်သည်။ ဆိုလိုသည်မှာ အာဏာသည် ပြည်သူ့ထံမှ ဆင်းသက်ပြီး ... ပြည်သူအများစုက ရွေးကောက်တင်မြှောက်သူများဖြင့် အစိုးရဖွဲ့ခြင်း၊ ဥပဒေပြုဖို့ ဖွဲ့စည်းခြင်း ဖြစ်သည်။

"မဲအများဆုံးရသူ နိုင်တဲ့ စနစ် FPTP (သို့) SMDP" စနစ်သည် အထက်ပါ တန်ဖိုးများနှင့် အပြည့်အဝ လိုက်လျောညီထွေမှု မရှိ ဖြစ်လာနေသဖြင့် အခြားသော မဲပေးရွေးချယ်သည့် စနစ်များကို စဉ်းစားလာကြခြင်း ဖြစ်သည်။ ပြီးပြည့်စုံအောင် ကောင်းသည့် စနစ်ဆိုတာ မရှိနိုင်သော်လည်း ဒီမိုကရေစီ၏ အဓိကအကျဆုံး တန်ဖိုးများကို အနီးကပ်ဆုံး အကောင်အထည်ဖေါ်နိုင်မည့် စနစ်ကို စဉ်းစားတီထွင်ကြခြင်းသာ ဖြစ်သည်။

အဆိုပါ နည်းများထဲမှာ တနည်းဖြစ်သော .. အချိုးကျ ကိုယ်စားလှယ် စနစ် (Proportional Representative) (PR) စနစ်ကို ယခု ဆွေးနွေးတင်ပြလိုပါသည်။

အချိုးကျ ကိုယ်စားလှယ် စနစ် (Proportional Representative)

ယခု ပြောလိုသည့် အချိုးကျ ကိုယ်စားလှယ် စနစ်သည် ... အချိုးကျ ကိုယ်စားလှယ် စနစ် - မူရင်း (Pure PR) အကြောင်း ဖြစ်ပါသည်။

"အချိုးကျ ကိုယ်စားလှယ်စနစ် - မူရင်း (Pure Proportional Representative)" ၏ တွေးခေါ်ပုံမှာ ရိုးရှင်း လွယ်ကူပြီး ပြည်သူလူထုအား တိကျစွာကိုယ်စားပြုသည့် စနစ် ဖြစ်သော်လည်း အားနည်းချက်များရှိသဖြင့် အဆိုပါ စနစ်အား နိုင်ငံမျိုးစုံက မိမိတို့ နိုင်ငံနှင့် ကိုက်ညီမည့် ပုံစံကို ပြုပြင် တီထွင် အသုံးပြုလာကြသဖြင့် လက်ရှိကျင့်သုံးနေသော "အချိုးကျ ကိုယ်စားလှယ်စနစ် (PR)" မှာ နိုင်ငံအလိုက် ပုံစံကွဲ၊ မူကွဲမျိုးစုံ ရှိနေ၏။ 

"အချိုးကျ ကိုယ်စားလှယ်စနစ် - မူရင်း (Pure PR)" ၏ အခြေခံ သဘောတရားမှာ ရှင်းလင်း၏။ လူပုဂ္ဂိုလ်များကို မဲပေးရခြင်း မဟုတ်။ ရွေးကောက်ပွဲတွင် ပါဝင်ယှဉ်ပြိုင်သည့် ပါတီများအားလုံးအား တနိုင်ငံလုံးရှိ ပြည်သူလူထုက မိမိ ကြိုက်သည့် ပါတီအား မဲပေး ရွေးချယ်ရခြင်း ဖြစ်သည်။ ထိုမှ တဆင့် မဲရရှိသော အရေအတွက်အလိုက် ပါတီများက ကိုယ်စားလှယ် အရေအတွက် ခွဲဝေယူ၍ ကိုယ်စားပြုရသော စနစ်ဖြစ်သည်။ ဥပမာ ပါတီ ၁၀ ခု ရှိပြီး .. လူ တသိန်းရှိသော နိုင်ငံတွင် .. ပါလီမာန်ကိုယ်စားလှယ် ၁၀၀ ရှိလျှင် ပါတီတစ်ခုလျှင် မဲအရေအတွက် ၁၀၀၀ ရရှိလျှင် ကိုယ်စားလှယ် ၁ ယောက်နှုန်းဖြင့် ရွေးကောက်ခံရခြင်း ဖြစ်သည်။ ရှင်းလင်းရလျှင် ..

လူဦးရေ   .......................... ၁၀၀ ၀၀၀။ (တစ်သိန်း)

ပါတီ အရေအတွက် ................ ၁၀။

ရွေးချယ်မည့် ကိုယ်စားလှယ် ...... ၁၀၀။

၁၀၀ ၀၀၀ ÷ ၁၀၀ = ၁၀၀၀

အထက်ပါ စာရင်းအရ ကိုယ်စားလှယ် တစ်ယောက်တိုင်းသည်လူ အယောက် ၁၀၀၀ အား ကိုယ်စားပြုသူ ဖြစ်သည်။ ထိုကြောင့် ပါတီ တစ်ခု အနေဖြင့် မဲ ၅၀၀၀ ရလျှင် ကိုယ်စားလှယ် ၅ ယောက် ပါလီမာန်သို့ ကိုယ်စားပြု တတ်ရောက်ရသော စနစ် ဖြစ်သည်။ ၄င်းကဲ့သို့ အချိုးကျ ကိုယ်စားလှယ်များကို ပါတီအလိုက် ရွေးကောက် တင်မြှောက်ခြင်း ဖြစ်သဖြင့် "အချိုးကျ ကိုယ်စားလှယ် စနစ် (RP)" ဟု သတ်မှတ် ခေါ်ဝေါ်ခြင်း ဖြစ်သည်။

"မဲအများဆုံးရသူ နိုင်တဲ့ စနစ် FPTP (သို့) SMDP" တွင် ပြည်သူတစ်ယောက်မှ ပေးလိုက်သော ကိုယ်စားလှယ်မှာ ရှုံးနိမ့်သွားလျှင် .. အဆိုပါ ပြည်သူ၏ ကိုယ်စားလှယ်မှာ ပါလီမာန်တွင်းသို့ ရောက်ရှိခြင်း မရှိတော့ပေ။ အကျိုးဆက်အဖြစ် အဆိုပါ ပြည်သူ၏ အသံကို ကိုယ်စားပြုနိုင်သူသည် ပါလီမာန်တွင်း ရှိမနေတော့ပေ။ သို့သော် အချိုးကျ ကိုယ်စားလှယ်စနစ် (PR) ၏ အားသာချက်မှာ ပြည်သူလူထု တစ်ဦးခြင်းဆီမှ ပေးလိုက်သော မဲတိုင်းအတွက် ကိုယ်စားလှယ်ရှိနေခြင်း ဖြစ်သည်။ လူတိုင်း၏ ဆန္ဒများဖြင့် ကိုယ်စားလှယ်များအား ရွေးခြယ်ခြင်း ဖြစ်သည်။ ပြည်သူများက ပေးလိုက်သော မဲများ အလကားဖြစ်သွားခြင်း မရှိပေ။ ထိုကြောင့် ဒီမိုကရေစီ၏ တန်ဖိုးများနှင့် ကိုက်ညီနေသည်။

အချိုးကျ ကိုယ်စားလှယ် စနစ် - မူရင်း (Pure PR) ကို အစောပိုင်း လက်တွေ့ ကျင့်သုံးသော နိုင်ငံများထဲတွင် ဒုတိယ ကမ္ဘာစစ် မဖြစ်မီကာလ ဂျာမနီနိုင်ငံ (Weimar Republic) လည်း ပါဝင်ခဲ့သည်။

အချိုးကျ ကိုယ်စားလှယ်စနစ် - မူရင်း (Pure PR) သည် ဒီမိုကရေစီ တန်ဖိုးအရ အင်မတန် အားသာသော်လည်း လက်တွေ့အရ အားနည်းချက် များစွာ ရှိနေ၏။ သူ၏ အားနည်းချက်များမှာ ..

၁။ ပါတီကို မဲပေးရခြင်း ဖြစ်ပြီး ကိုယ်စားလှယ်ကို မဲပေးရခြင်း မဟုတ်

၂။ ပါလီမန် စနစ်တွင် ပါတီများပြီး ကိုယ်စားလှယ်များပေါင်းစုံ ပါဝင်သဖြင့် အစိုးရဖွဲ့ရန် ခက်ခဲခြင်း

တို့ ဖြစ်သည်။

၁။ ပါတီကို မဲပေးရခြင်း ဖြစ်ပြီး ကိုယ်စားလှယ်ကို မဲပေးရခြင်း မဟုတ်။

အချိုးကျ ကိုယ်စားလှယ်စနစ်အရ ပါတီကို မဲပေးရခြင်းဖြစ်ပြီး ပါတီမှ ရရှိသော မဲအလိုက် အချိုးကျ ကိုယ်စားလှယ် စေလွှတ်ရသဖြင့် ပြည်သူလူထုသည် ပါတီမှ ရွေးချယ်သူကို မိမိ၏ ကိုယ်စားလှယ်အဖြစ် လက်ခံရခြင်း ဖြစ်သည်။

ဤစနစ်သည် လက်ရှိ မြန်မာနိုင်ငံပုံစံအတိုင်း (ခပ်တည်တည်ဖြင့်) ကာကွယ်ရေး ဦးစီးချုပ်က ကိုယ်စားလှယ် တမတ်သားကို ရွေးချယ်သလို ပုံစံနှင့် ဆင်တူ၏။ ပါတီခေါင်းဆောင်က ပါလီမာန် ကိုယ်စားလှယ်များကို ရွေးချယ်ရသော စနစ် ဖြစ်လာသည်။ ထိုအခါ စစ်သား တမတ်သားက ကာကွယ်ရေး ဦးစီးချုပ်၏ သဘောထားနှင့် ကာကွယ်ရေး ဦးစီးချုပ်၏ အကျိုးကျေးဇူးကို သစ္စာခံရပြီး .. ပြည်သူကို သစ္စာဖေါက်ဖို့ ဝန်မလေးသလို  ပြည်သူ့ အကျိုးထက် .. ကာကွယ်ရေး ဦးစီးချုပ်၏ အကျိုးကိုသာ ကြည့်သူများ ဖြစ်နေ၏။ ၄င်းအပြင် ပြည်သူငြိုငြင်တာကို မကြောက် .. ကာကွယ်ရေး ဦးစီးချုပ်က ငြိုငြင်မှာကို ကြောက်၏။

ထိုအတူပင် အချိုးကျ ကိုယ်စားလှယ် စနစ်တွင် ပါတီခေါင်းဆောင်ကို တာဝန်ခံရသလို ဖြစ်နေသဖြင့် လက်တွေ့သဘောတွင် ပြည်သူကို ကိုယ်စားပြုခြင်း မဖြစ်တော့ဘဲ .. ပါတီခေါင်းဆောင်ကိုသာ ကိုယ်စားပြုသလို ဖြစ်နေသဖြင့် အာဏာရှင် လက်သစ်ကို မွေးထုတ်ပေးသလို ဖြစ်နိုင်၏။

၂။ ပါလီမန် စနစ်တွင် ပါတီများပြီး ကိုယ်စားလှယ်များပေါင်းစုံ ပါဝင်သဖြင့် အစိုးရဖွဲ့ရန် ခက်ခဲခြင်း

ဒီနေရာတွင် ပါလီမာန်စနစ် နှင့် သမ္မတစနစ် ကွဲပြားဖို့ လို၏။

သမ္မတ စနစ်တွင် ပါလီမာန် ကိုယ်စားလှယ်ဆိုသည်မှာ ဥပဒေပြုသူများ၊ ဥပဒေရေဆွဲသူ (Legislature) များသာဖြစ်သည်။ အစိုးရ မဟုတ်ချေ။ အစိုးရအဖွဲ့ကို သမ္မတမှ ဖွဲ့ပြီး သမ္မတကို သီသန့် ရွေးကောက် တင်မြှောက်သည်။

(မြန်မာပြည်၏ လက်ရှိ သမ္မတ စနစ်သည် ခွတီး ခွကျ သမ္မတ စနစ်ဖြစ်သည်။ သမ္မတ ရွေးကောက်ပွဲ သီးခြား မရှိဘဲ ပါလီမာန်ကနေ သမ္မတကို ရွေးကောက်ပြီး ... သမ္မတက အစိုးရဖွဲ့၏။ .... ကြံဖွတ်ပါတီကသာ အစိုးရ ဖွဲ့နိုင်ရန် ရည်ရွယ်ရေးဆွဲထားသော ဖွဲ့စည်းပုံ ဖြစ်နေသည်ဆိုတာ ဤ အချက်သည် အင်မတန် သိသာလွန်းနေပြီး .. ကလိန်ကျသည့် စနစ်သက်သက်သာ ဖြစ်သည်။ တကယ့် သမ္မတ စနစ် စစ်စစ်တွင်  သမ္မတကို ပြည်သူက သီးခြား ရွေးကောက်ရသဖြင့် ကြံဖွတ်ကိုယ်စားလှယ် ..(ယခု ဦးသိန်းစိန်) သမ္မတ ဖြစ်ချင်မှ ဖြစ်လိမ့်မည်။ သမ္မတ ရာထူးကို ယခုလို ဦးသိန်းစိန်မှ မရလျှင် စစ်သားလူထွက်များ အစိုးရ ဝန်ကြီးများ ဖြစ်လာမှာ မဟုတ်တော့ချေ။)

ပါလီမာန်စနစ်တွင် ပါလီမာန် ကိုယ်စားလှယ်အများဆုံးရသည့် ပါတီက စုစုပေါင်း ကိုယ်စားလှယ် ၅၀ % ကျော်ဖြင့် အစိုးရဖွဲ့ပြီး ... အများဆုံးရသည့် ပါတီခေါင်းဆောင်က ဝန်ကြီးချုပ် ဖြစ်လာသည်။ အဆိုပါ ဝန်ကြီးချုပ်အား "တန်းတူများထဲမှ ထိပ်ဆုံး (First Among Equals)" အဖြစ် ရွေးချယ်လိုက်ကြခြင်း ဖြစ်သည်။ (မြန်မာပြည်တွင် ယခုပုံစံဖြင့် သမ္မတကို ရွေးကောက်ပြီး .. သမ္မတက အစိုးရအဖွဲ့ကို မိမိစိတ်ကြိုက် ဖွဲ့၏။ ၄င်း အစိုးရအဖွဲ့ကို ပါလီမာန်က တို့မရ၊ ထိမရ ဖြစ်၏။)

PR အကြောင်း ပြန်ဆက်ရလျှင် ... ပါတီမာန် စနစ်ဖြစ်ပါက ပါလီမာန်တွင် ပါတီတိုင်းမှ ကိုယ်စားလှယ်များပါနေပြီး .. အစိုးရဖွဲ့ရန် ကြီးမားသည့် အင်အားဖြင့် ပါတီကြီး တစ်ခုတည်း ရှိရန် အင်မတန် ခဲယဉ်း၏။ ထိုအခါ ညွန့်ပေါင်း အစိုးရ ဖွဲ့ရပြီး .. ပါတီအချင်းချင်း သဘောထား၊ မတူလျှင် အစိုးရက ကွဲပြီး ... နောက်အစိုးရ တစ်ခု ထပ်ဖွဲ့ ... ထပ်ညှိဖို့ ကြိုးစား ... ဤသို့ဖြင့် တည်ငြိမ်သော အစိုးရကို ဖွဲ့စည်းရန် ခက်ခဲသလို .. ဥပဒေတစ်ခု ပြုရာတွင်လည်း တူညီသော သဘောထားရနိုင်ရန် အင်မတန် ခက်ခဲ၏။ တိုင်းပြည် ရှေ့သွားဖို့ရာ အင်မတန် ခက်ခဲ၏။

အဆိုပါ အားနည်းချက်များသည် ဒုတိယ ကမ္ဘာစစ်မတိုင်မီ ဂျာမနီနိုင်ငံ၏ ပြဿနာ များထဲမှ .. ပြဿနာ ဖန်တီးခဲ့သော အရာ တစ်ခု အဖြစ် သုံးသပ်လို့ရပြီး .... ပါတီပေါင်းစုံမှ ကိုယ်စားလှယ်ပေါင်းစုံဖြင့် သဘောထား တစ်ခုထဲရနိုင်ရန် အင်မတန်ခက်ခဲသလို အစိုးရ အမျိုးမျိုး ပြောင်းပြီး နောက်ဆုံးတွင် .. နာဇီပါတီခေါင်းဆောင် ဟစ်တလာ အာဏာရခဲ့ပြီး နာဇီ အာဏာရှင်ခေတ် ဖြစ်လာခဲ့သည့် အကြောင်းအရင်းထဲတွေထဲက တစ်ခု ဖြစ်သွားခဲ့ရသည်။

ထိုသို့ ပြဿနာပေါင်းစုံ တတ်ခဲ့ရသော ဂျာမနီနိုင်ငံကိုယ်တိုင် ဒုတိယ ကမ္ဘာစစ်ပြီးနောက် မိမိတို့ကိုယ်တိုင် ကျင့်သုံးခဲ့သော အချိုးကျ ကိုယ်စားလှယ်စနစ် - မူရင်း (Pure PR) ကို ဒုတိယ ကမ္ဘာစစ်အပြီး အနောက်ဂျာမနီနိုင်ငံအဖြစ် ပြန်လည် တည်ထောင်သောအခါ ၄င်းစနစ်ကို ပြုပြင်ပြီး "ရောနှောထားသော အချိုးကျ ကိုယ်စားလှယ်စနစ် Mixed-Member proportional representation - MMP  ဖြင့် ယနေ့အထိ အသုံးပြုလျက်ရှိသည်။

နောက် note မှာ Mixed- Member Proportional Representative (MMP) စနစ်အကြောင်း ဆက်ပါ့မယ်။

လေးစားစွာဖြင့်

ကိုထိုက်