တာရာဖြူ ဒေ၀ီ သခင်မ အကြောင်း

တာရာဖြူ ဒေ၀ီ သခင်မ သည် တိဗက်ဗုဒ္ဓဘာသာဝင်တို့ အမြတ်တနိုး ကိုးစားယုံကြည် ကိုးကွယ်ကြသော ဈာနိဗုဒ္ဓ (ဈာန်ဘုရား) တစ်ဆူ ဖြစ်၏။ တိဗက်ဘာသာအားဖြင့် ဒိုလ်မ ကာပို (Dolma Karpo)= အဖြူရောင် တာရာဒေ၀ီ ဟု ခေါ်ပါသည်။

တာရာဒေ၀ီ ၏ အသွင်သဏ္ဍာန် (၂၁) မျိုး ကို ဆိုင်ရာ အရောင်အဆင်းများ ဖြင့် ခွဲခြားထားပြီး ၎င်းတို့ အနက်တွင် တာရာဖြူ ဒေ၀ီ နှင့် တာရာစိမ်း ဒေ၀ီတို့ မှာ အထူးထင်ရှားသော ဈာနိဗုဒ္ဓ များ ဖြစ်၏။

တာရာဒေ၀ီ ကိုးကွယ်မှု ဖြစ်ပေါ်လာပုံနှင့် ပတ်သက်၍ ပညာရှင်များ အကြားတိကျသော အဖြေတစ်ခု မရသေးပေ။ ဗုဒ္ဓဘာသာ နှင့် ဟိန္ဒူဘာသာ နှစ်ခု စလုံး က တာရာဒေ၀ီ ကို တူညီစွာ ကိုးကွယ်ဆည်းကပ်ကြေသောကြောင့် ဖြစ်၏။ မာလာ ဂို့ရှ် (Mallar Ghosh) က  တာရာဒေ၀ီ သည် ရှေးဟောင်း ဟိန္ဒူ ပူရာဏ် ကျမ်းများမှ ဒူဂ်ဂါဒေ၀ီ သခင်မ ၏ အသွင်တစ်ရပ် ဖြစ်ကြောင်း ရှက္တီ မယ်တော် ကိုးကွယ်မှု များ မှ ဆင်းသက်လာကြောင်း ဆို သည်။  တာရာဒေ၀ီ ကို မဟာဗိဓျာဒေ၀ီ ၁၀ ပါး တွင် တစ်ပါးအပါ အ၀င် အဖြစ် ကိုးကွယ် ကြသည်။ 

ဗုဒ္ဓဘာသာ ၏ ရှေးဦးမူလ သမိုင်းတွင် ဒေ၀ီ ကိုးကွယ်မှု မရှိ သေးပဲ အေဒီ ၂ ရာစု တွင် ပေါ်ထွန်းလာသော ပညာပါရမိတာ ဒေ၀ီ ကိုးကွယ်မှု သည် အစောဆုံး ဖြစ်ကြောင်းတွေ့ ရသည်။ ပညာပါရမိတာ ဒေ၀ီ ကို ဗုဒ္ဓမာတာ အဖြစ် ကိုးကွယ်ကြပြီး ဘုရားရှင် တို့ ကို မွေးဖွားပေးသော မဟာဗောဓိဥာဏ်ဓါတ် အဖြစ် ယုံကြည်ကြလေသည်။ နှောင်းကာလ၀ယ် မဟာဗောဓိဥာဏ်ဓါတ် ၏ ကရုဏာ သဘော ကို ပိုမို အလေးထားလာခဲ့ ကြပြီး တာရာဒေ၀ီ အသွင် ဖြင့် ကိုးကွယ်မှု ခေတ်စားလာခဲ့ ၏။ အေဒီ ၅ ရာစု ကျမ်းဂန် ဖြစ်သော မဉ္ဇူရှရီမူလကပ္ပ ကျမ်းတွင် တာရာဒေ၀ီ ကိုးကွယ်မှု ကို အစောဆုံးတွေ့ရ၏။

ရှေးအကျဆုံးသော တာရာဒေ၀ီ ဆင်းတုတော် ကို အိန္ဒိယနိုင်ငံ မဟာရဋ္ဌပြည်နယ်မှ အီလိုရာ လှိုဏ်ဂူ ( ၇ ရာစု) တွင် တွေ့ ရပြီး ပါလ မင်းဆက်များ လွှမ်းမိုးချိန် အေဒီ ၈ ရာစု မှ စတင်၍   တာရာဒေ၀ီ ကိုးကွယ်မှု အကြီးအကျယ် ပြန့်ပွားထွန်းကား သွားလေ သည်။ တိဗက်တွင် ဂျက်ဆန် ဒိုလ်မ တရုပ်တွင် တျူလျှိူ ဂျပန်တွင် တာရာနိ ဘိုဆတ်ဆု စသော အမည်များ ဖြင့် ကိုးကွယ် ကြ၏။

တာရာဖြူ ဒေ၀ီ သခင်မ သည် ကက်သလစ်ဘာသာမှာ မယ်တော်မာရီ ကဲ့သို့ ကျန်းမာခြင်း ၏ မယ်တော် ဖြစ်ပြီး ကိုးကွယ်ဆည်းကပ်သူ အပေါင်း ၏ ကိုယ်စိတ်နှလုံးမှ ရောဂါဝေဒနာ များ ဒဏ်ရာများ ကို အမြန်ဆုံးပျောက်ကင်းချမ်းသာအောင် စောင့်ရှောက်ကုသပေးသည်ဟု ယုံကြည်ကြ၏။ လူသားတို့၏ ရောဂါ အပေါင်းတွင် ဟဒယနှလုံးတွင် ကပ်ငြိနေသော ကိလေသာရောဂါ မှာ မူ ရောဂါဘယများ အနက် အဆိုးဝါးဆုံးနှိပ်စက်တတ်သော ရောဂါဆိုးကြီး ဖြစ်သောကြောင့် ထိုရောဂါဆိုးဘေး မှ ကယ်တင်နိုင်သော တာရာဖြူ ဒေ၀ီ သခင်မ ကို အမြင့်ဆုံး ဗောဓိဥာဏ်ပညာ ၏ သင်္ကေတ အဖြစ်လည်း မှတ်ယူလေးမြတ်ကြ၏။

တာရာဖြူ ဒေ၀ီ ဖြစ်ပေါ်လာပုံ ဒဏ္ဍာရီ များ အရ အ၀လောကိတေသွာရ ဗောဓိသတ္တ အရှင် သည် နောက်ဆုံး ပရိနိဗ္ဗာန်စံဝင်ချုပ်ငြိမ်းတော်မူကာနီး အချိန်တွင် သံသရာလောကဓါတ် အပေါင်း မှ တစ်ခဲနက် ငိုကြွေးငြီးတွားသံ ကို ကြားရ လေ၏။ ထိုသို့ ကြားရသော အ၀လောကိတေသွာရ ဗောဓိသတ္တ အရှင်မြတ်၏ နှလုံးသားဝယ် မဟာကရုဏာဓါတ်လှိုင်းတို့ က ရိုက်ခတ်သည် ဖြစ်၍ မျက်လုံးတော် နှစ်ဖက်မှ မျက်ရည်များ စီးကျ လာ လေသည်။ မိမိ တစ်ဦးတည်း ပရိနိဗ္ဗာန်စံဝင်ချုပ်ငြိမ်းတော်မူမည့် အခွင့်အရေး ကို လည်း ထာဝရစွန့်ပယ်လိုက် လေသည်ဟု ဆို၏။ အရှင်မြတ်၏ မျက်ရည်များမှ တာရာဖြူ နှင့် တာရာစိမ်း သခင်မ များ အသွင် ဖြစ်ထွန်းလာ သည်ဟု ဆိုရိုးရှိသောကြောင့် တာရာဒေ၀ီ တို့ သည် မဟာကရုဏာ ရှင် အ၀လောကိတေသွာရ ဗောဓိသတ္တ ၏ မဟာကရုဏာ အနှစ်အသား စစ်စစ် ဖြင့် သွန်းလုပ်ထုဆစ်အပ်သော မဟာကရုဏာ အရှင်မ များ သာ ဖြစ်ကြပါသည်။

တာရာဖြူ ဒေ၀ီ သခင်မ ၏ ရုပ်ပွားတော်များ ကို ရေးဆွဲထုလုပ် ရာ တွင် ဖြူဝင်းနုညက်လှပသော အသားအရေ ပိုင်ရှင် ကညာစင် အသွင် ဖြင့် ဖေါ်ပြကြလေသည်။ အဖြူရောင်သည် စင်ကြယ်မှု နှင့် မေတ္တာတရား ကို ကိုယ်စားပြု၏။ ပြည့်ဝသော သားမြတ်အစုံ နှင့်တကွ နုပျိုသစ်လွင်သော ပြကတေ့ သဘာဝ ရူပကာယတော် သည်ကား ဓမ္မ ၏ အစဉ်အမြဲ နုပျိုရှင်သန်နေသော သဘာဝ နှင့် အကန့်အသတ်အပိုင်းအခြားတို့ ကို လွန်သော အပ္ပမာဏ သဘာဝ ကို ညွှန်းဆို နေပါ၏။ 

လက်ဝဲဖက်လက်တော် တွင် ဥပ္ပလ၀ဏ် အပြာရောင်ကြာပန်း ကို သင်္ကေတ ပြု ထားခြင်း ကြောင့် တာရာဖြူ ဒေ၀ီ သခင်မ သည် ည ကာလ ကို စိုးမိုးသော ဒေ၀ီ ဖြစ်၏။ အနားယူခြင်း ငြိမ်သက်ခြင်း သက်ရှည်ရှင်သန်ခြင်း လ ပမာ အေးမြခြင်းတို့ ကို ကိုယ်စားပြု ပါ၏။ ဥပ္ပလ၀ဏ် အပြာရောင်ကြာပန်း သည်လည်း မျိုးစေ့ အဖူးအငုံ နှင်အပွင့် တို့ ၃ မျိုး ပါဝင် နေသော ကြောင့် အတိတ် ပစ္စုပ္ပန် အနာဂတ် ကာလ ၃ပါး မှာ ဗုဒ္ဓ အဆူဆူ ကို ကိုယ်စားပြု နေပါသည်။

လက်ယာဖက် လက်တော် သည် ကား ဆုပေးဟန် ၀ရဒမုဒြာ ဖြင့် ဆုတောင်းသူတို့ ၏ အလိုခပ်သိမ်း ပြည့်စုံအောင် ခွင့်ပြု သနားဟန် ကို ဖေါ်ပြနေပါ၏။ ပဒုမ္မာသန ဖြင့် ထက်ဝယ်ဖွဲ့ခွေ ထိုင်နေတော်မူသည့် ခြေတော်အစုံ သည်ကား အမြင့်ဆုံး သော မဟာသာဂရမုဒြာသမာဓိ ကို ၀င်စားနေခြင်း ၏ ပြယုဂ် ဖြစ်၏။ ကိုယ်တော်တွင် ဆင်မြန်းထားသော အဆင်တန်ဆာ တို့ မှာ မိမိ ၏ ဈာနိဗုဒ္ဓ (ဈာန်ဘုရား) ဗောဓိသတ္တ အဖြစ် ကို ဖေါ်ပြနေ၏။

တာရာဖြူ ဒေ၀ီ သခင်မ ၏ ထူးခြားချက် မှာ မျက်နှာတော် လက်ဖ၀ါးတော် ခြေဖ၀ါးတော် များဝယ် မျက်လုံးတော် များ ပါရှိခြင်း ဖြစ်ပြီး မျက်လုံးတော် (၇) ခု ရှိလေသည်။ ငရဲ-တိရစ္ဆာန်-ပြိတ္တာ-အသူရကာယ်-လူ-နတ်-ဗြဟ္မာ တည်း ဟူသော ဇာတိ ဂတိ ဘုံဘ၀ (၇) မှ ဝေနေယျသတ္တ၀ါ အပေါင်း ကို မမှိတ်သော မဟာကရုဏာ မျက်လုံးများ ဖြင့် အစဉ်သနားတော်မူလျှက် စောင့်ကြည့် နေသည်ဟု ယုံကြည်ကိုးကွယ်သူများ က လက်ခံထားကြပါသည်။   

တာရာဖြူ ဒေ၀ီ သခင်မ ကို ပူဇော်သက္ကာပြုရန် ပတ္တနာမန္တာန် တော် မြတ် သည်ကား (( ဥုမ် တာရေ တုတာရေ တုရေ မမ အာယု ဥာဏ ပုည ပုထိံ ကုရု ဆွာဟာ )) ဟူ၍ ဖြစ်လေသည်။ မိမိ ကိုယ်တိုင်လည်း သံသရာ ညွှန်ပျောင်းမှ ကူးမြောက်လျှက် ဝေနေယျသတ္တ၀ါ အပေါင်းအားလည်း မိမိ အတူ ကူးမြောက်စေသော တာရာဖြူ ဒေ၀ီ သခင်မ သည် တပည့်တော် ၏ အသက် ဥာဏ်ပညာ နှင် ကောင်းမှုကုသုတရားများ ပွားများတိုးတက် အောင် အစဉ်သဖြင့် သနားစောင့်ရှောက် စောင်မတော်မူပါ ဟူသော အနက် ကို ညွှန်း ပါသည်။ 

တာရာဖြူ ဒေ၀ီ ကျင့်စဉ် (တာရာသာဓန) ကို အားထုတ်သူ သည် ပတ္တနာမန္တာန် တော် ကို ကြိမ်ဖန်များစွာ ရွတ်ဆိုလျှက် မိမိ ၏ ရှေ့မှောက် တွင် တာရာဖြူ ဒေ၀ီ ၏ စိတ်ဖန်ရုပ်သွင် (Visualization) ပေါ်ထွန်းလာအောင် အာရုံပြု ရလေသည်။ ဘာဝနာ ထက်မြက်လာသည် နှင့် အမျှ ကသိုဏ်းဝန်း ကဲ့ သို့ တာရာဖြူ ဒေ၀ီ ၏ စိတ်ဖန်ရုပ်သွင် ထင်ပေါ်လာ သောအခါဝယ် ဖန်ဆင်းခြင်း ဥပ္ပန္န၀ဂ် အောင်မြင်ပြီ ဆိုနိုင်၏။ ဒုတိယ အဆင့် အနေဖြင့် မိမိ ၏ တည်ရှိမှု နှင့် တာရာဖြူ ဒေ၀ီ ၏ စိတ်ဖန်ရုပ်သွင် ကို နှစ်ခုမပြား တစ်သားတည်း အပ္ပနာဆိုက် အောင် ဘာဝနာ ပွားရပြန်လေသည်။ မိမိ ၏ တည်ရှိမှု နှင့် တာရာဖြူ ဒေ၀ီ ၏ စိတ်ဖန်ရုပ်သွင် တစ်သားတည်း ဖြစ်လေလျှင် ပြီးမြောက်ခြင်း သမ္ပန္န၀ဂ် အောင်မြင်ပြီ ဆိုနိုင်၏။ မိမိ နှင့် တကွ သတ္တလောက တစ်ခု လုံး၏ အနာရောဂါ ဟူသမျှ တာရာဖြူ ဒေ၀ီ ၏ တန်ခိုးရှိန်စော် အာနုဘော်အားဖြင့် ဝေးလွင့်ပျောက်ပျက်ငြိမ်းအေးစေကြောင်း စိတ်ကို ညွှတ်ထားရပါ၏။

နောက်ဆုံးတွင် စိတ်ဖန်ရုပ်သွင် ၏ အရှိ အနှစ်သား လည်း ဗလာနတ္ထိ ဟူသော သုညတဘာဝနာ (Meditation on Emptiness) ဖြင့် တာရာဖြူ ဒေ၀ီ ၏ အသွင် ကို မူလပကတိသုညတာဓမ္မ အတွင်း ပြန်လည် ပျော်ဝင် ပျောက်ကွယ်ချုပ်ငြိမ်းစေခြင်း အား ဖြင့် တာရာဖြူ ဒေ၀ီ ကျင့်စဉ် ပြီးဆုံးခြင်းသို့ ရောက်ကြောင်း တာရာ တန္တရ ကျမ်းများ က ဆိုထားပါ၏။

(လင်းထက်ဆွေ)