14.09.2012 နေ့ဖတ်ရန်သတင်းများ

by Myanmar Journal on Thursday, September 13, 2012 at 6:24pm ·

အာရပ်ကမ္ဘာတဝန်း ဆန္ဒပြမှုတွေ ပြန့်

အာရပ်ကမ္ဘာတဝှမ်း ဆန္ဒပြမှုတွေ ပြန့်နေ

အစ္စလာမ် ဘာသာဝင်တို့ အလေးအမြတ်ထားရာ တမန်တော် မိုဟာမက်ကို လှောင်ပြောင်ထားတယ်ဆိုတဲ့ ရုပ်ရှင်နဲ့ ပတ်သက်လို့ အာရပ် ကမ္ဘာ တဝန်းမှာ ဒေါသတကြီး ဆန္ဒပြမှုတွေ ပြုလုပ်နေကြပါတယ်။

ယီမင်နိုင်ငံက ဆာနာ မြို့တော်မှာ ဆန္ဒပြသူတွေက အမေရိကန် သံရုံးဝင်းထဲကို အတင်းဝင်ရောက်ခဲ့ကြပြီး ကားတွေကို မီးရှို့ခဲ့ကြလို့ လုံခြုံရေးတွေက သံရုံးဝင်းထဲက ထွက်သွားအောင် ကျည်ဆန်အစစ်တွေနဲ့ ပစ်ခတ် မောင်းထုတ်ခဲ့ရပါတယ်။

အီဂျစ် နိုင်ငံက ကိုင်ရို မြို့တော်မှာလည်း အမေရိကန် သံရုံး အပြင်ဘက်မှာ အကြမ်းဖက်မှုတွေ ပိုမို ဖြစ်ပွားနေပါတယ်။

ဆန္ဒပြသူ တချို့က အမေရိကန် သံအမတ်ကြီးကို နှင်ထုတ်ပစ်ဖို့ အထိကိုပါ တောင်းဆို ခဲ့ကြပါတယ်။

ရဲတွေက ခဲတွေနဲ့ပစ်ပေါက်နေကြတဲ့ ဆန္ဒပြသူတွေကို မျက်ရည်ယို ဗုံးတွေသုံးပြီး ထိန်းခဲ့ရပါတယ်။

တူနီးရှား၊မော်ရိုကို၊ ဆူဒန်၊မော်ရီတေးနီးယားနဲ့ အီရန်နိုင်ငံတွေမှာလည်း ဆန္ဒပြမှုတွေ ဖြစ်နေပါတယ်။

နေတိုးအဖွဲ့က အာဖဂန် နစ္စတန် နိုင်ငံထဲမှာ ရှိနေတဲ့ သူတို့ရဲ့ တပ်ဖွဲ့တွေကို အကြမ်းဖက် တိုက်ခိုက်မှုတွေ ဖြစ်လာနိုင်တဲ့ အတွက် တပ်လှန့် ထားပါတယ်။

 သံတမန်တွေကိုကာကွယ်သွားမယ်လို့ အီဂျစ် သမတပြော

သံတမန်တွေကို ကာကွယ်ပေးမယ့် အီဂျစ်သမ္မတ မော်ဆီ

အီဂျစ် သမ္မတ မိုဟာမက် မော်ဆီကအစ္စလာမ် ဘာသာကို စော်ကားတဲ့ ရုပ်ရှင် အတွက် အာရပ်ကမ္ဘာ တလွှားမှာ စိတ်ဆိုး ဒေါသထွက် နေကြတယ်လို့ ဆိုပါတယ်။

ဒါပေမယ့် သူက နိုင်ငံခြား သံရုံးတွေနဲ့ နိုင်ငံခြားသား တွေကို တိုက်ခိုက် ခံရမှု တွေကနေ ကာကွယ် သွားမယ်လို့လည်း ဆိုလိုက်ပါတယ်။

မစ္စတာ မော်ဆီက အသက်တချောင်းရဲ့ တန်ဘိုးရှိပုံနဲ့ အပစ်မဲ့သူတွေကို သတ်ဖြတ်တာကို အစ္စလာမ်မှာ လက်မခံတဲ့ အကြောင်း၊ လွတ်လပ်စွာ ဆန္ဒပြခွင့် တွေရှိတာ မှန်ပေမယ့် အများပိုင် အဆောက်အဦတွေ နဲ့ နိုင်ငံခြား သံရုံးတွေကို တိုက်ခိုက်တာတွေ လုပ်ဖို့ မလိုကြောင်းတွေကို ပြောကြား သွားပါတယ်။

ပြီးခဲ့တဲ့ အင်္ဂါနေ့က လစ်ဗျား နိုင်ငံဆိုင်ရာ အမေရိကန် သံအမတ်ကြီး ခရစ္စတိုဖာ စတီဗင်းစ် သေဆုံး ခဲ့ရတဲ့ နောက်မှာ အမေရိကန် သမ္မတ အိုဘားမားကလည်း သမ္မတ မော်ဆီနဲ့ လစ်ဗျား သမ္မတ တို့ကို ဖုန်းနဲ့ ဆက်သွယ်ပြီး အမေရိကန် သံတမန် တွေကို ကာကွယ်ပေးသွားဖို့ အတွက် အမေရိကန်နဲ့ လက်တွဲ ဆောင်ရွက်သွားဖို့ကို ပြောကြား ခဲ့ပါတယ်။

အဲဒီနေ့က အမေရိကန် သံရုံးကို တိုက်ခိုက် ခဲ့တာ တွေကလည်း နောက်မှာ ဂျစ်ဟဒ် အဖွဲ့တွေ ပါဝင်ကောင်း ပါဝင် နေနိုင် သလို စနစ်တကျ တိုက်ခိုက်ခဲ့တာ ဖြစ်တဲ့ အတွက် ဒီကိစ္စဟာ ရှုပ်ထွေး နက်နဲတယ်လို့ အမေရိကန် အရာရှိ တွေက ပြောပါတယ်။

ကုလအထူးကိုယ်စားလှယ် သမ္မတဦးသိန်းစိန်နဲ့တွေ့

ကုလသမဂ္ဂ အထူးကိုယ်စားလှယ် ဗီဂျေး နမ်ဘီးယား

ကုလသမဂ္ဂ အတွင်းရေးမှူးချုပ်ရဲ့ အထူး ကိုယ်စားလှယ် ဗီဂျေး နမ်ဘီးယား ဟာ မြန်မာနိုင်ငံမှာ ရောက်ရှိ နေပါတယ်။

ကြာသပတေးနေ့က မစ္စတာ နမ်ဘီးယားဟာ နေပြည်တော်မှာ မြန်မာ သမ္မတ ဦးသိန်းစိန်နဲ့ တွေ့ဆုံ ဆွေးနွေးခဲ့ ပါတယ်။

အဲဒီလို တွေ့ဆုံ ဆွေးနွေး ခဲ့ကြ ရာမှာ သမ္မတ ဦးသိန်းစိန်ရဲ့ မကြာခင် စတင် တော့မယ့် ကုလသမဂ္ဂ ခရီးစဉ် နဲ့ ကုလသမဂ္ဂ ရဲ့ ထောင်စုနှစ် ရည်မှန်းချက် များကို ဆွေးနွေးခဲ့ပါတယ်။

နောက်ပြီး ရခိုင် ပြည်နယ်မှာ ဖြစ်ခဲ့တဲ့ အခြေ အနေ တွေကို လွတ်လပ်စွာ စုံစမ်း ဖော်ထုတ် ရေး ကိစ္စ များလည်း ပါဝင်တယ်လို့ သိရပါတယ်။

အီရန်နျူအေရး IAEA ဆြေးနွေး

အီရန်နျူအရေးကို ပူပန်နေတဲ့ IAEA

ကုလသမဂ္ဂရဲ့ နျူကလီးယား စောင့်ကြည့် လေ့လာ ရေး အဖွဲ့ IAEA ဟာ စည်းဝေးပွဲ ကျင်းပ နေပါတယ်။

အဲဒီ အစည်းအဝေးကနေ အီရန် နိုင်ငံရဲ့ နျူကလီးယား အစီအစဉ် တွေနဲ့ ပတ်သက်လို့ ပြစ်တင် ရှုံ့ချ မှုတွေ လုပ်သွား မယ်လို့ ခန့်မှန်း လို့ရပါတယ်။

ဘီဘီစီက တွေ့မြင်ခဲ့ရတဲ့ ဆုံးဖြတ်ချက် မူကြမ်းထဲမှာ အမေရိကန်၊ ဗြိတိန်၊ တရုတ်၊ ပြင်သစ် ၊ ဂျာမနီ နဲ့ ရုရှား တို့က အီရန်ရဲ့ ယူရေနီယံ သန့်စင်မှု တွေနဲ့ ပတ်သက်လို့ အင်မတန် စိုးရိမ်မကင်း ဖြစ်နေကြပါတယ်။

ဒါဟာ အစ္စရေး နိုင်ငံက အီရန်ကို စစ်ရေးနဲ့ အရေးယူဖို့ ခြေတလှမ်း တိုးတော့ မယ်လို့ အရိပ်အယောင်တွေ ပြလာချိန်မှာ အင်အားကြီး ၆ နိုင်ငံက သူတို့ရဲ့ စုစည်း ညီညွတ်မှုကို ပြသ နိုင်တာ ဖြစ်တယ်လို့ ဘီဘီစီ သတင်းထောက်က သုံးသတ်ထား ပါတယ်။

ကြေးနီ စီမံကိန်း ဆန္ဒပြသူတွေ ထပ်မဖမ်း ဘူးလို့ ကတိပေး

လက်ပံတောင်းတောင် ကြေးနီ စီမံကိန်း နေရာ

လက်ပံတောင်း တောင် ကြေးနီ စီမံကိန်းနဲ့ ပတ်သက်ပြီး ဆန္ဒပြသူ တွေနဲ့ တိုင်း အစိုးရ အဖွဲ့ကြားမှာ ၈၈ မျိုးဆက် ကျောင်းသား ခေါင်းဆောင်တွေ စေ့စပ် ညှိနှိုင်း နေရာမှာ လိုက်လျောမှု တချို့ ရခဲ့ ပါတယ်။

ဗုဒ္ဓဟူးနေ့ ညနေပိုင်းက မုံရွာမြို့ မြို့မ ကပ်ကျောင်း ဘုန်ကြီးကျောင်းမှာ ရှိနေတဲ့ လက်ပံတောင်း တောင် ကျေးရွာ ဒေသခံ တွေကို ၈၈ မျိုးဆက် ကျောင်းသား ခေါင်းဆောင် ကိုဂျင်မီနဲ့ အဖွဲ့က တွေ့ဆုံခဲ့ ပြီးတဲ့နောက် စစ်ကိုင်းတိုင်း ဝန်ကြီးချုပ် ဦးသာအေး အပါအဝင် တိုင်း အစိုးရ အဖွဲ့ကို တင်ပြ ဆွေးနွေး ခဲ့ကြ ပါတယ်။

ဖမ်းဆီးခံထားကြရတဲ့ လယ်သမား အရေး ကူညီသူ ရန်ကုန် ပြည်သူ့ အကျိုးဆောင် ကွန်ယက်က ကိုဝေဠုနဲ့ လက်ပံတောင်းတောင် ရွာသူ သုံးယောက်ကို ပြန်လွှတ် ပေးဖို့၊ ဆန္ဒပြသူ တွေကို အရေး မယူဖို့နဲ့ ကြေးနီ စီမံကိန်းကို လောလောဆယ် ရပ်ဆိုင်း ထားဖို့ စတဲ့ အချက် သုံးချက်ကို တောင်းဆိုခဲ့ ရာမှာ ဒုတိယ အချက် ကို လိုက်လျော ခဲ့တယ်လို့ ကိုဂျင်မီက ပြောပါတယ်။

ဖမ်းဆီး ထားသူ တွေကို ပြန်လွှတ် ပေးဖို့ ဆိုတဲ့ ကိစ္စမှာ ဥပဒေ ကြောင်း အရ ဖမ်းဆီး ခဲ့တာ ဖြစ်လို့ ဥပဒေကြောင်း အရ ပဲ ပြန်လွှတ် ပေးဖို့ ရှိတဲ့ အတွက် နောက်တစ်နေ့ အထိ အချိန် စောင့်ဖို့ တိုင်း ဝန်ကြီးချုပ်က ပြောတယ်လို့ ဆိုပါတယ်။

ကြေးနီ စီမံကိန်း ရပ်ဆိုင်း ထားဖို့ ဆိုတဲ့ ကိစ္စ ကတော့ တိုင်း ဒေသကြီး အစိုးရ အနေနဲ့ ဖြေရှင်းဖို့ မလုံလောက်ဘဲ ပြည်ထောင်စု အစိုးရ အဆင့်၊ နိုင်ငံတော် သမ္မတ အဆင့်က ဖြေရှင်းမှသာ ရနိုင်မယ်လို့ ပြောကြောင်းလည်း ကိုဂျင်မီက ပြောပါတယ်။

တိုင်း အစိုးရ ဘက်က ၈၈ မျိုးဆက် ကျောင်းသား တွေရဲ့ သီးခြား တောင်းဆိုမှု တချို့ကို လိုက်လျော ခဲ့တာလည်း ရှိတယ်လို့ သူက ပြောပါတယ်။

အဲဒါတွေ ကတော့ ဆန္ဒပြမှုတွေ မလုပ်အောင် ကာရံ ထားတဲ့ သံဆူးကြိုးတွေ ဖယ်ရှားပေး ဖို့ နဲ့ လုံခြုံရေး တွေ ဖယ်ရှားဖို့ တောင်းဆို တာကို ကြာသပတေးနေ့ ကပဲ ဖယ်ရှား ပေးမှု၊ မုံရွာ မြို့ မြို့မ ကပ်ကျောင်း မှာ ရှိ နေတဲ့ လက်ပံတောင်း တောင် ကျေးရွာ ဒေသခံ တွေကို ဘုန်းကြီးကျောင်း ကနေ ထွက်ခွါ သွားဖို့ သာသနာရေး ဦစီး ဌာနက အမိန့်ပေး ထားတာကို ဆက်လက် နေခွင့် ရအောင် ညှိနှိုင်း ပေးမှုတို့ ဖြစ်ပါတယ်။

လက်ပံတောင်းတောင် ကြေးနီ စီမံ ကိန်းကြီးကြောင့် ပတ်ဝန်းကျင် ထိခိုက် ပျက်စီး နိုင်တဲ့ နောက်ဆက်တွဲ ဆိုးကျိုးတွေ အများကြီးရှိ နိုင်တယ် ဆိုတာ လေ့လာ သုတေသန ပြုမှုတွေ အရ သိရှိရ တယ်လို့ ဒေသခံ တွေက ပြောကြပါတယ်။

ဒါပေမဲ့ ဒီစီမံကိန်းရဲ့ အကျိုး သက်ရောက်မှုတွေနဲ့ ပတ်သက်ပြီး ပညာရှင်တွေရဲ့ လေ့လာမှု ပါဝင်မှု တွေက လုံလောက်မှု မရှိသေးဘဲ အစိုးရရဲ့ ဧရာမ စီမံကိန်း ကြီးကို ဒေသခံ ပြည်သူ တွေကသာ ခုခံ ကာကွယ် နေရတာ ဖြစ်တဲ့ အတွက် လုံလောက်တဲ့ အဖြေ ထွက်လာဖို့က မလွယ်လှ ဘူးလို့ ၈၈ မျိုးဆက် ကျောင်းသား ကိုဂျင်မီက ပြောပါတယ်။

KIO နဲ့ နေပြည်တော်မှာ ဆွေးနွေးဖို့ သမ္မတဖိတ်ခေါ်

သမ္မတဦးသိန်းစိန်က ကေအိုင်အို ကချင်လွတ်လပ်ရေးအဖွဲ့ အနေနဲ့နေပြည်တော်မှာ လာပြီးတော့ဆွေးနွေးဖို့ ဖိတ်ခေါ်ခဲ့ ပေမဲ့လို့ ကေအိုင်အိုဖက်က လုံးဝ အကြောင်းမပြန်သေးဘူး လို့ သမ္မတရုံးက ပြောပါတယ်။ အခုလိုမျိုးဖြစ်ရတာက ကေအိုင်အိုအနေနဲ့ မြန်မာအစိုးရ ထိန်းချုပ်ထားတဲ့ နယ်မြေထဲမှာ မဆွေးနွေးချင်တာ ဖြစ်တဲ့အပြင် မြန်မာအစိုးရဘက်က နိုင်ငံရေးအရ မဆွေးနွေးဘဲနဲ့စစ်ရေး အရ ဆက်လက် တိုက်ခိုက်နေလို့ ဖြစ်တယ်လို့ ကချင်အရေး သုံးသပ်သူတစ်ဦး ကတော့ ပြောပါတယ်။ ဒီအကြောင်းကို ဦးဝင်းမင်းက ဆက်လက် တင်ပြထားပါတယ်။

မြန်မာသမ္မတဦးသိန်းစိန်အနေနဲ့ကချင်နဲ့ စေ့စပ်ရေးအတွက် ဆွေးနွေးမဲ့နေရာ သတ်မှတ်ဖို့ အခက်အခဲရှိနေရင် နေပြည်တော်မှာ လာဆွေးနွေးဖို့ သူကိုယ်တိုင်လည်း တာဝန်ခံတွေ့မယ်လို့ ကေအိုင်အိုကို ဂျူလိုင်လကတည်းက ဖိတ်ခေါ်ခဲ့ပေမဲ့ အခုအချိန်အထိ အကြောင်းမပြန်သေးဘူးလို့ မြန်မာသမ္မတရုံး ညွန်ကြားရေးမှူး ဦးဇော်ဌေးက ဆိုပါတယ်။

"မဟုတ်ဘူး။ ကျနော်တို့ကခေါ်တယ်။ ဟိုဖက်ရွှေ့ ဒီဖက်ရွှေ့ အဆင်မပြေဘူး။ အဲ့ဒီတော့ နောက်ဆုံးသမ္မတကြီးက ပြောလိုက်တယ်။ အဲဒီလိုဆိုရင် နေပြည်တော်လာခဲ့ အားလုံးတာဝန်ယူတယ်။ နေပြည်တော်မှာ သူနဲ့တွေ့မယ် ဆိုပြီးတော့ခေါ်တယ် ဟိုဖက်က အကြောင်းမပြန်သေးဘူး။"

ဦးဇော်ဌေးကပဲ ကေအိုင်အိုကို အခုလို ဆက်သွယ်တာကို ပြည်ထောင်စု အဆင့်ငြိမ်းချမ်းရေး ဖော်ဆောင်ရေး ကော်မတီ ဒုဥက္ကဌနဲ့ လက်ရှိသမ္မတရုံးဝန်ကြီးဦးအောင်မင်း ကိုယ်တိုင်ပို့ ခဲ့ပြီး ဆက်သွယ်ရေး လမ်းကြောင်းလည်း ကောင်းကောင်းရှိနေပေမဲ့ အခုအချိန်အထိ ကေအိုင်အိုဖက်က အကြောင်းမပြန်သေးဘူးလို့ ဦးဇော်ဌေးက ဆက်ပြောပါတယ်။

"ပြောရရင်တော့ ဦးအောင်မင်းက အဲ့ဒီ့မက်ဆေ့စ်ခ်ျကို ကေအိုင်အို ကေအိုင်အေကို ပို့တယ်။ ပို့တော့ အကြောင်းမပြန်သေးဘူးလို့သိရတယ်။"

တကယ်တော့ ကေအိုင်အိုခေါင်းဆောင်တွေနဲ့ ဝန်ကြီးဦးအောင်မင်းအကြားမှာ အရင်ထိုင်းနဲ့ တရုတ်နယ်စပ်တွေမှာ ဆွေးနွေးခဲ့ရာမှာ ကေအိုင်အိုဘက်က နိုင်ငံရေးဆွေးနွေးဖို့နဲ့ မြန်မာစစ်တပ်ဖက်က ပြန်ဆုတ်ရေးတွေကို တောင်းဆိုခဲ့ပေမဲ့ အကြောင်းမထူးသေးတာက ဒီကိစ္စမှာ ကေအိုင်အိုဘက်က အကြောင်းမပြန်ရတဲ့ အဓိကကိစ္စဖြစ်နိုင်တယ်။ ကချင်ဖက်က မြန်မာအစိုးရထိန်းချုပ်တဲ့ နယ်မြေထဲမှာ မဆွေးနွေးချင်တာ တစ်ခုတင်မဟုတ်ဘူးလို့ ကချင်အရေးသုံးသပ်သူ ကချင်သတင်းစဉ်က အယ်ဒီတာကိုနော်ဒင်းက ဆိုပါတယ်။

"အကြိမ်ကြိမ်နိုင်ငံရေးကိစ္စဆွေးနွေးဖို့အတွက် အစိုးရကို သမ္မတသိန်းစိန်ဆီကို သူတို့က ရှင်းရှင်းလင်းလင်း သူတို့ တင်ပြခဲ့တယ်။ အရင်က ဦးအောင်သောင်း ဦးဆောင်တဲ့ငြိမ်းချမ်းရေး အဖွဲ့နဲ့ ရွှေလီမှာ တွေ့ဆုံတဲ့ အချိန်မှာလည်း သူတို့ပြောတဲ့ ဒီလမ်းပြမြေပုံပေါ့။ နိုင်ငံရေးပြဿနာကို ဘယ်လိုဖြေရှင်းမယ်ဆိုတဲ့ အဲဒီဟာမျိုးကိုလည်း သူတို့ရှင်းရှင်းလင်းလင်း တန်ဖိုးထားခဲ့တယ်။

ဒါပေမဲ့ ဦးအောင်မင်းနဲ့ သုံးကြိမ် တွေ့ဆုံတဲ့အချိန်အထိ အစိုးရကငြိမ်းချမ်းရေးကို မလိုလားဘူး။ နိုင်ငံရေး ဆွေးနွေးဖို့ကိုလည်း အပေါ်ယံပဲ သူတို့လုပ်တယ်။ တကယ်လိုတဲ့ အချက်မပြောဘူး။ ကေအိုင်အိုဘက် ကတော့ အဲဒီလိုမျိုး သုံးသပ်ထားတော့ နိုင်ငံရေးဆွေးနွေးမယ်ဆိုလို့ရှိရင်တော့ ကေအိုင်အိုက လိုလားနေတာကို ကျနော်တို့သိရတယ်။

ဒါပေမယ့် ကေအိုင်အို ကတော့ ရှင်းရှင်းလင်းလင်းပဲ ပြောထားတယ်။ ဆွေးနွေးမယ်ဆိုရင်လည်းပဲ တိုင်းရင်းသားတွေ ပေါင်းစုံ ပါဝင်ပြီးမှပဲ နိုင်ငံရေးပြဿနာကို ဆွေးနွေးပြီးမှ ဖြေရှင်းရမယ်။ ကေအိုင်အို တစ်ဖွဲ့ နဲ့ ဒီနှစ်ဘက်ထဲ ဆွေးနွေးတဲ့ပုံစံနဲ့ မရဘူးဆိုတဲ့ အပိုင်းတွေကို ကေအိုင်အိုဘက်က ရှင်းရှင်းလင်းလင်း ပြောထားတာ ရှိတယ်။ သို့သော်လည်း ပထမအဆင့်အနေနဲ့က ဒီစစ်တပ်ပေါ့၊ စစ်တပ်ကို နောက်ဆုတ်ပေးဖို့ က ကေအိုင်အိုက ပထမတောင်းဆိုထားတယ်။"

ဒါပေမယ့်အမည်မဖော်လိုတဲ့ ကချင်ကိစ္စငြိမ်းချမ်းရေးအကျိုးဆောင်တစ်ဦးက ပြောတာကတော့ နိုင်ငံရေးဆွေးနွေးဖို့က နောက်တစ်ဆင့်ဖြစ်တယ်။ အခုလောလောဆယ်က အပစ်အခပ်ရပ်စဲရေး သဘောတူဖို့လိုတယ်။ ဦးအောင်မင်းအနေနဲ့ စစ်ရေးကိစ္စတွေကို အာမခံဖို့ခက်တာကြောင့် ဒုကာကွယ်ရေးဦးစီးချုပ်နဲ့ ငြိမ်းချမ်းရေးဖော်ဆောင်ရေးအဖွဲ့ ဒုဥက္ကဌဗိုလ်ချုပ်ကြီးစိုးဝင်းအနေနဲ့ တရုပ်ပြည်ဘက် ခရီးသွားလာဖို့ အခက်အခဲဖြစ်နေလို့ အခုလိုနေပြည်တော်အထိ ဖိတ်ခေါ်အောင် သမ္မတကို ပြောခဲ့တာဖြစ်တယ်လို့ ဆိုပါတယ်။

တကယ်တော့ ကေအိုင်အို ကချင်လွတ်လပ်ရေးအဖွဲ့အနေနဲ့ မြန်မာအစိုးရနဲ့ ၁၉၉၄ကစပြီး အပစ်အခတ် ရပ်စဲရေး သဘောတူညီခဲ့ပေမဲ့ ၂၀၁၀ရွေးကောက်ပွဲမတိုင်ခင်မှာ မြန်မာအစိုးရဘက်က နယ်ခြားစောင့် တပ်ဖွဲ့ တွေကို လက်မခံခဲ့အပြီးမှာ ဒီအပစ်အခပ်ရပ်စဲရေး သဘောတူညီချက် ပျက်ပြယ်ခဲ့ အပြီး ၂၀၁၁- ဦးသိန်းစိန် အစိုးရအသစ် တက်လာချိန်မှာတော့ စစ်ပွဲတွေပြန်ဖြစ် လာခဲ့တာဖြစ်ပါတယ်။

ဒါကြောင့်မို့ ကေအိုင်အိုဘက်က အခုတစ်ခေါက်မှာ အပစ်အခပ်ရပ်စဲရေး သာမကဘဲ နိုင်ငံရေး သဘောတူညီချက် ပါရနိုင်ဖို့ ကြိုးစားနေကြတာ ဖြစ်တယ်လို့ ကချင်သုံးသပ်သူတွေက ဆိုနေကြပါတယ်။

သံရုံးတိုက်ခိုက်ခံရမှု စုံစမ်းဖော်ထုတ်ရေး လစ်ဗျား အမေရိကန် ပူးပေါင်းဆောင်ရွက်မည်

အမေရိကန်ပြည်ထောင်စု၊ ကယ်လီဖိုးနီးယားပြည်နယ်က ဂျူးအနွယ်ဖွား ဆောက်လုပ်ရေး လုပ်ငန်းရှင်တစ်ဦးက အပျော်တမ်းရိုက်ကူးပြီး Youtube website မှာ တင်ထားတဲ့၊ အစ္စလမ်ဘာသာရဲ့ အထွဋ်အမြတ်ဖြစ်တဲ့ တမန်တော် မိုဟာမက်ကို လှောင်ပြောင်စော်ကား ထားတယ်လို့ စွတ်စွဲခံထားရတဲ့ The Innocence of Muslims ဆိုတဲ့ ဗီဒီယိုရုပ်ရှင် ဟာ၊ စက်ဆုပ်ရွံရှာဖွယ်ဖြစ်ပြီးတော့ တာဝန်မဲ့စွာ ရိုက်ကူးထားတာကြောင့် အပြင်းအထန် ပြစ်တင်ရှုံ့ချတယ်လို့ အမေရိကန်နိုင်ငံခြားရေးဝန်ကြီး ဟီလာရီကလင်တန်က ရုပ်သံလွှင့်ပြီး ကြေညာနေတာကို အခုကျနော်တို့ သတင်းကြေငြာနေစဉ်မှာ တွေ့ရပါတယ်။ 

ဒါပေမယ့် အကြမ်းဖက်တိုက်ခိုက်မှုတွေကိုတော့ အမေရိကန်အစိုးရက လက်မခံဘူးလို့ လည်း ဝန်ကြီးကလင်တန်က ပြောဆိုလိုက်ပါတယ်။ အစ္စလမ်မစ် စစ်သွေးကြွတွေလို့ မသင်္ကာရသူတွေက၊ လစ်ဗျားနိုင်ငံ ဘင်ဂါဇီ (Bengazi) မြို့က အမေရိကန်ကောင်စစ်ဝန်ချုပ်ရုံးမှာ ဒီဗီဒီယိုရုပ်ရှင်ကို အကြောင်းပြုပြီးတော့ အမေရိကန်သံအမတ်ကြီး နဲ့ ၀န်ထမ်းသုံးဦးတို့ သေဆုံးသွားရတဲ့အထိ တိုက်ခိုက်ခဲ့မှုကို စုံစမ်းစစ်ဆေးရေး အတွက်၊ အမေရိကန်နဲ့ လစ်ဗျားအစိုးရတို့ အနီးကပ်ပူးပေါင်းဆောင်ရွက်သွားကြ ဖို့ သဘောတူညီခဲ့ကြပါတယ်။

စက်တင်ဘာ (၁၂)နေ့ညပိုင်းက အမေရိကန်သမ္မတ ဘရက်(ခ်)အိုဘားမား (Barack Obama) က၊ လစ်ဗျား အမျိုးသားလွှတ် တော်ရဲ့ ဥက္ကဋ္ဌ မိုဟာမက် မာဂါရီရက်ဖ် (Mohamed Magarief) ဆီကို ဖုံးဆက်ပြီးတော့ ခုလို သဘောတူညီခဲ့ကြတာလို့၊ သမ္မတအိမ်ဖြူတော်က ကြေညာခဲ့ ပါတယ်။ လစ်ဗျားဆိုင်ရာ အမေရိကန်သံအမတ်ကြီး သေဆုံးခဲ့တာနဲ့ ဘင်ဂါဇီမြို့ အမေရိကန်ကောင်စစ်ဝန်ချုပ်ရုံး တိုက်ခိုက်ခံခဲ့ရတာတွေအတွက်၊ လစ်ဗျား အမျိုးသားလွှတ်တော် ဥက္ကဋ္ဌက သမ္မတ အိုဘားမားကို တောင်းပန်စကားပြောကြားခဲ့ပါတယ်။

အီဂျစ်နိုင်ငံ ကိုင်ရိုမြို့တော်က အမေရိကန်သံရုံးရှေ့မှာ ဆက်ပြီး ဖြစ်ပေါ်နေတဲ့ အမေရိကန်ဆန့်ကျင်ရေး ဆန္ဒပြပွဲတွေနဲ့ ပတ်သက်ပြီးတော့လည်း၊ အီဂျစ်က အမေရိကန်သံရုံးနဲ့ အမေရိကန်ဝန်ထမ်းတွေရဲ့ လုံခြုံရေးအတွက် အီဂျစ်အစိုးရဟာ အမေရိကန်ပြည်ထောင်စုနဲ့ မလွဲမသွေ ပူးပေါင်းဆောင်ရွက်ရမယ်လို့၊ သမ္မတ အိုဘားမားက အီဂျစ်သမ္မတ မိုဟာမက် မော်စီ (Mohamed Morsi) ဆီကိုလည်း ဖုံးဆက်ပြီးပြောကြားခဲ့ပါတယ်။ ဒီကနေ့ စက်တင်ဘာ (၁၃)ရက်နေ့မှာ၊ ကိုင်ရိုမြို့က အမေရိကန်သံရုံးရှေ့မှာ ဆန္ဒပြနေကြတဲ့ လူငယ် (၂၀၀) လောက်ကို အီဂျစ်ရဲတပ်ဖွဲ့က မျက်ရည်ယိုဗုံးတွေသုံးပြီး လူစုခွဲခံကြပါတယ်။

လစ်ဗျားနိုင်ငံ ဘင်ဂါဇီ မြို့က အမေရိကန်ကောင်စစ်ဝန်ချုပ်ရုံး တိုက်ခိုက်ခံ-ခဲ့ရတာကြောင့် လစ်ဗျားက အမေရိကန်နိုင်ငံ သားတွေကို ကာကွယ်စောင့်ရှောက်ဖို့ အမေရိကန်ရေတပ် Destroyer  အမျိုးအစား ဖျက်သင်္ဘောနှစ်စီး၊ အကြမ်းဘက်မှုတိုက်ဖျက်ရေး တပ်ဖွဲ့တစ်ဖွဲ့နဲ့ FBI က စုံစမ်းစစ်ဆေးရေး အရာရှိတွေပါဝင်တဲ့ အဖွဲ့တစ်ဖွဲ့ကို အမေရိကန်အစိုးရက လစ်ဗျားနိုင်ငံကို စေလွှတ်ထားပါတယ်။

ဒုက္ခသည်တွေနဲ့ပတ်သက်တဲ့ ထိုင်းနိုင်ငံမူဝါဒ HRW ဝေဖန်

ထိုင်းနိုင်ငံရဲ့ အစိုးရရဲ့ တဖက်သက် ဆုံးဖြတ်ချက်ချခဲ့တဲ့ မူဝါဒတွေကြောင့် ထိုင်းနိုင်ငံထဲက မြန်မာနိုင်ငံသား ဒုက္ခသည် ထောင်ပေါင်းများစွာဟာ ဖမ်းဆီးခံကြရတာနဲ့  နေရင်းနိုင်ငံကို ပြန်ပို့ခံရတဲ့ ဒုက္ခတွေကို ရင်ဆိုင်နေကြရတယ်လို့ နယူးယောက်အခြေစိုက် လူ့အခွင့်အရေးစောင့်ကြည့်လေ့လာရေး Human Rights Watch အဖွဲ့ကပြောဆိုလိုက်ပါတယ်။

စက်တင်ဘာ ၁၃ရက်နေ့ နေ့စွဲနဲ့ ထုတ်ပြန်လိုက်တဲ့ HRW အဖွဲ့ရဲ့ ဒီအစီရင်ခံစာမှာ ထိုင်းမြန်မာနယ်စပ်တလျောက် ဒုက္ခသည်စခန်းတွေက ဒုက္ခသည်ပေါင်း တစ်သိန်းလေးသောင်းအပေါ်မှာ ထိုင်းအစိုးရရဲ့ ပြုမူဆောင်ရွက်ချက်တွေကို မှတ်တမ်း တင်ထားပါတယ်။

လူသူအရောက်အပေါက်နည်းတဲ့နေရာတွေမှာ ဒီဒုက္ခသည်စခန်းတွေမှာ ကျပ်ကျပ်သိပ်သိပ်နေထိုင်နေကြရတဲ့ ဒုက္ခသည်တွေ လွတ်လပ်စွာ ရွှေ့ပြောင်းသွားလာခွင့် ဝင်ငွေရတဲ့အလုပ် လုပ်ကိုင်ခွင့်နဲ့ သူတို့ရဲ့ ကလေးတွေ တန်းတူပညာသင်ကြားခွင့်တွေ မရရှိကြဘူးလို့ ဒီအစီရင်ခံစာက ဆိုပါတယ်။

ဒုက္ခသည်တွေဟာ ငွေကြေးများစွာပေးရတဲ့ လာဘ်ပေးမူတွေ လုပ်ပြီးတော့ ရွှေ့ပြောင်းအလုပ်သမားအဖြစ် မခံယူနိုင်ကြဘူးဆိုရင် သူတို့ဟာ ဒုက္ခသည်စခန်းတွေမှာ ဖမ်းဆီးခံကြရတာ နေရင်းနိုင်ငံကို ပြန်ပို့ခံကြရတာတွေနဲ့ မကြာခဏ ကြုံနေရတယ်လို့လည်း ဒီအစီရင်ခံစာမှာ ဖော်ပြထားပါတယ်။

ဒုက္ခသည်အားလုံးရဲ့ လေးဆယ်ရာခိုင်နှုန်းလောက်ဟာ ဒုက္ခသည်အဖြစ် တရားဝင်မှတ်ပုံတင်ခွင့်မရရှိသေးတာကြောင့် တရားမျှတပြီးတော့ ထင်သာမြင်သာရှိစေမယ့်  မြန်မာနိုင်ငံက ရောက်ရှိလာသူ ဒုက္ခသည်တွေကို စောင့်ကြည့်ရေး စနစ်တရပ်ကို ထူထောင်ဖို့ ထိုင်းအစိုးရအနေနဲ့ ကုလသမဂ္ဂနဲ့ ပူးပေါင်းဆောင်ရွက်ဖို့ကိုလည်း HRW က တိုက်တွန်းထားပါတယ်။