ငွေဉာဏ်ရှိ မိသားစု ခင်မောင်ညို (ဘောဂဗေဒ)

by Khin Maung Nyo on Tuesday, November 29, 2011 at 4:54pm

ခင်မောင်ညို (ဘောဂဗေဒ)

        (၂၀၀၃) ခုနှစ်တုံးက၊ စင်္ကာပူအစိုးရက၊ နိုင်ငံတ၀ှမ်း ဘဏ္ဍာရေးပညာပေးအစီအစဉ်တခု၊ လုပ်ခဲ့တယ်။ စားသုံးသူဘဏ္ဍာရေး အသိပညာတိုးပွားစေဖို့၊ ဘဏ်လုပ်ငန်းနဲ့ ပြည်သူပိုင် လုပ်ငန်းတွေ၊ အဖွဲ့အစည်တွေ ၀ိုင်းဝန်းစီစဉ်ကြတယ်။ ဘဏ်တွေ(၈)ခုလောက် ပါတယ်။ (၂၀၀၄)ခုနှစ်မှာ မိသားစုတွေ ကြုံတွေ့နေရတတ် တဲ့ အမှား(၁၀)ခုကို၊ ကာတွန်းစာအုပ်ထုတ်ဝေပြီး၊ ပညာပေးခဲ့တယ်။
          စာအုပ်နာမည်က၊ ငွေဉာဏ်ရှိ မိသားစု (Money Sensible Family) တဲ့။ အဲဒီမိသားစုထဲမှာ အသက် (၆၅) နှစ်အရွယ်မှာ အငြိမ်းစားယူခဲ့တဲ့၊ ငွေကြေးနဲ့ ပတ်သက်လို့ သိပ်ပြီး စည်းကမ်းကြီး၊ ဉာဏ်ကြီးတဲ့ အဖိုးကြီးတစ်ယောက်။ နိုင်ငံစုံကော်ပိုရေးရှင်းကြီးတခုမှာ၊ ကြီးကြပ်ရေးမှူးလုပ်တဲ့ ဖခင်တစ်ယောက်။ သူက- သူ့မိသားစုရဲ့ လိုအင်တွေကို၊ ဘယ်လိုဖြည့်ဆည်းပေးနိုင်မလဲဆိုတာ အမြဲစဉ်းစားနေတတ်တယ်။ အမေက တော့၊ ဈေးသက်သာတာ၊ ဈေးလျှော့ရောင်းတာတွေကို လိုက်ရှာတတ်တဲ့သူဆိုပြီး၊ သူ့ကိုယ်သူ ဂုဏ်တယူ ယူနဲ့ပေါ့။ သူက ဒါပေမယ့် ငွေရေးကြေးရေးနဲ့ ပတ်သက်လို့ ဗဟုသုတသိပ်မရှိလှဘူး။

          သားဖြစ်တဲ့သူကတော့၊ လူငယ်ပီပီ စိတ်ကူးတွေယဉ်၊ အကြံတွေဉာဏ်တွေအပြည့်နဲ့ပေ့ါ။ ဒါပေမယ့် သူ့ရဲ့ ရည်မှန်းချက်တွေကတော့၊ လက်တွေ့သိပ်မဆန်ဘူး။ သမီးငယ်က၊ သူ့ထက်သာတယ်။ မိသားစုထဲမှာ၊ ပထမဆုံးသန်းကြွယ်သူဋ္ဌေးဖြစ်ရမယ်လို့ ရည်မှန်းတဲ့ ထက်မြက်တဲ့သူပေါ့။ မွေးကာစ သမီးငယ်လေးကတော့၊ တအိမ်လုံးရဲ့ အသည်းစွဲပါ။ အဲသလို အဖိုး၊ အဖေ-မေ-သားသမီး(၃)ယောက်၊ စုစုပေါင်း (၆)ယောက်ရှိတဲ့ မိသားစုလေးပေါ့။
          တရက်မှာ၊ သားဖြစ်တဲ့သူက၊ ဈေးကြီးတဲ့လက်ကိုင်ဖုန်းတလုံးဝယ်လာပြီး ကြွားတယ်။ ဘေးလူတွေကလဲ တအံ့တသြနဲ့ပေါ့။ ဒါပေမယ့် နေ့လည်စာစားချိန်ရောက်ပြီ၊ သွားစားကြရအောင်ဆိုတော့၊ သူက သွားစားကြ၊ ငါဗိုက်ပြည့်နေပြီတဲ့။ တယ်လီဖုန်းဝယ်လိုက်တော၊ စားစရာ ပိုက်ဆံမကျန်တော့လို့၊ ဘုံဘိုင်ခေါင်းကရေသောက်ပြီး၊ ဗိုက်ကားနေသတဲ့။

သင်ခန်းစာ - ၁ - တတ်နိုင်တာနဲ့ပဲနေပါ။ ကိုယ်ဘယ်လိုသုံးတယ်ဆိုတာ၊ သတိထားကြည့်ပါ။
          တစ်ရက်မှာ၊ အဖေက- သူတို့အရေးပေါ် ရံပုံငွေအဖြစ် (၆)လစာ ငွေတွေ စုဆောင်းထားတာ၊ ဘယ်ရောက်ကုန်လဲလို့။ အမေလုပ်သူကို မေးတော့၊ ဒီတော့ အမေလုပ်သူက၊ ငါတို့အရေးပေါ် အခြေအနေမျိုးနဲ့ ကြုံတွေ့ရမှာမဟုတ်ဘူး။ ဒါကြောင့် စုငွေတွေနဲ့၊ ဈေးဝယ်ပစ်လိုက်တယ်လို့ပြောတယ်။ မွေးကာစ သမီးလေးကျောက်ပေါက်တယ်။ ပြီးတော အိမ်သားတွေအားလုံးကို ကူးစက်တယ်။ ဆရာဝန်ခ မတတ်နိုင်ဘူး။

သင်ခန်းစာ-၂- လက်ကျန်ငွေကို သုံးမပစ်မိမီ၊ ၀င်ငွေ၏ အချိ့အ၀က်ကို ဦးစွာဖယ်ထားပါ။ အရေးပေါ်အခြေအနေအတွက် (၆)လစာ ၀င်ငွေကို ဖယ်ထားပါ။
          တစ်ရက်မှာ ဒေါ်လာ (၉၀၀)တန်တဲ့ ရုပ်သံပြစက်တစ်လုံးကို အကြွေးဝယ်ကဒ်တဲ့ ဒေါ်လာ (၈၅၀)ပေးပြီး ၀ယ်လာခဲ့တယ်၊ တန်တယ်ပေါ့လေ။ ပြီးတော့ တလချင်းပြန်ဆပ်ရမယ့်ငွေကလဲ နည်းနည်းလေးတဲ့။ ဒေါ်လာ (၅၀)တောင် သက်သာနေတယ်တဲ့၊ အမေအဲသလိုပြောတာကို၊ သမီးက ကောက်တွက်ကြည့်လိုက်တော့၊ အကြွေးဝယ်ကဒ်ကုမ္ပဏီကို ပေးရမယ့်အတိုးပါ ထည့်တွက်ရင်၊ ဒေါ်လာ (၁၂၀) ပိုကန်ုတာတွေ့ရတယ်။

သင်ခန်းစာ-၃- အကြွေးဝယ်ကဒ်ပြားကို၊ စဉ်းစဉ်းစားစားသုံးပါ။ အတိုးပေးရသက်သာစေရန်၊ အကြွေးကို မြန်မြန်ချေပါ။
          အိမ်ဝယ်ဖို့ငွေချေးတဲ့ဘဏ်တွေလဲရှိတယ်။ ဘဏ်ပေါက်စေ့လိုက်ကြည့်၊ လိုက်ယှဉ်နေရတာ အလုပ်ရှုပ်တယ်။ အလုပ်ရှုပ်သက်သာအောင်ဆိုပြီး၊ ပထမဆုံး တွေတဲ့ ဘဏ်ကပဲ ယူလိုက်တယ်။ အဲဒီအခါ၊ အတော်ဈေးကြီးတော့၊ ၀င်ငွေအားလုံးကို အိမ်ချေးငွေအတွက် ဆပ်လိုက်ရတော့၊ အိမ်အသစ်တွင် ပရိဘောဂတောင် မ၀ယ်နိုင်တော့ပဲ၊ အိမ်အသစ်ထဲမှာ ငုတ်တုတ်ထိုင်နေရတယ်။

သင်ခန်းစာ-၄- ဘဏ်ကငွေမချေးမီ၊ ဘဏ်၏၀န်ဆောင်မှုတစ်ခုကို မရယူမီ၊ သေသေချာချာ၊ နေရာအနှံ့၊ သတင်းအချက်အလက် လိုက်လံစုံစမ်းပါဦး။
        အဖိုးက(၃)လခံ၊ စာရင်းသေငွေစာရင်းဖွင့်ချင်တယ်။ (၃)လကြရင် သူသုံးစရာရှိတယ်။ ဘဏ်ကမမက၊ တခြားအပ်ငွေတမျိုးရှိသေးတယ်။ အဲဒါက အတိုးပိုရတယ်၊ ဒီစာရင်းဖွင့်ပါလားလို့ အကြံပေးတော့၊ လောဘနဲ့။ ဟုတ်ပြီဆို ယူလိုက်တယ်။ (၃)လကြာလို့ ငွေပြန်ထုတ်မယ်ကြတော့၊ အချိန်မစေ့မီပိုက်ဆံ ပြန်ထုတ်ချင်ရင်၊ ဒဏ်ငွေ ဒေါ်လာ (၂၀၀) ပေးရမယ်ဆိုပြီး ဖြစ်ကရော။

သင်ခန်းစာ-၅- ကိုယ်နားလည်တာကိုလုပ်ပါ။ ၀ယ်ပါ။ ဘဏ္ဍာရေးဝန်ဆောင်မှု၊ ထုတ်ကုန်တခုကို မရယူမီ၊ စည်းကမ်းသတ်မှတ်ချက်များကို သေသေချာချာဖတ်ပါ။
        ကျန်းမာရေးအာမခံလုပ်ထားတဲ့၊ အမေက သူဆေးရုံတက်ရရင်၊ အထူးခန်းမှာ တက်ဖို့ အကြံပေးကြတယ်တဲ့။ ဒါပေမယ့် ကျန်းမာရေးအာမခံကို ပြန်ဖတ်ကြည့်တော့၊ ဆေးဖိုးနဲ့ သာမန်ခန်းအတွက် စရိတ်ပဲပေးမယ်လို့ ရေထားသတဲ့။ ဒါကြောင့် အထူးခန်းတက်တဲ့စရိတ်ကို ကိုယ့်ဖာသာကိုယ်ပဲ ငွေချေလိုက်ရတယ်။ ဒဏ်ရာကလဲ၊ ကြီးကြီးမားမားပဲ၊ ရေနွေးနဲ့ရေချိုးဖို့ပြင်နေတုံး၊ လက်မလေးတချောင်း ခိုက်မိသွားတာပါ။

သင်ခန်းစာ-၆- အာမခံသတ်မှတ်ချက်များကို နားလည်အောင်၊ သေသေချာချာဖတ်ပါ။ အထူးသဖြင့် ချွင်းချက်များ၊ တာဝန်မယူသော သတ်မှတ်ချက်များနှင့် စာချုပ်တွင် ပါဝင်သော အခြားအရေးကြီးသည့် သတ်မှတ်ချက်များကို ဂရုတစိုက်ဖတ်ပါ။
        အဖိုးက၊ ပင်စင်ရံပုံငွေတခုထဲမှာ ငွေထည့်ထားတော့၊ အချိန်စေ့ရင် ရမယ့်ငွေနဲ့၊ သွားအတုတစုံ စိုက်မယ်လို့ မှန်ထားတယ်။ ဒါပေမယ့် ဘေးလူတစ်ယောက်က ယူဖတ်ကြည့်တော့၊ အချိန်စေ့ဖို့(၇)နှစ်စောင့်ရမယ်။ ဒီကြားထဲ အစာမာမာမစားနိုင်ဘဲ၊ ရေသောက်နေ၊ ဒါမှ မဟုတ်အစာပျော့ပျော့ပဲစားနေရတော့မယ်။

သင်ခန်းစာ-၇- စိတ်အလိုလိုက်ပြီး၊ ဘဏ္ဍာရေးဝန်ဆောင်မှု/ ထုတ်ကုန်တခုကို မရယူပါနှင့်။ မိမိ၏ လိုအပ်ချက်ကို သတ်မှတ်ပြီး၊ လိုအပ်ချက်နှင့် ကိုက်ညီသည်ကို ရွေးချယ်ဝယ်ယူပါ။
          ဇွဲကောင်းကောင်းနဲ့၊ တချိန်လုံးဖုန်းဆက်အရောင်းကောင်းတဲ့သူတစ်ယောက်အပြောကောင်းတာနဲ့၊ သူ့ဆီက အာမခံတခုဝယ်လိုက်တယ်။ တကယ်ကျတော့၊ အရင်တစ်ပတ်တုံးကလဲ၊ တခါဝယ်တာပြီးပြီ။ တယောက်ထဲဆီက၊ နှစ်ခါတောင် ၀ယ်လိုက်မိတယ်။

သင်ခန်းစာ-၈- ငြင်းရမှာအားမနာပါနှင့်၊ ဇွဲကောင်းကောင်းနှင့် ဇွတ်အတင်းရောင်းတတ်သူကို ငြင်းရမှာ အားနာစရာမရှိပါ။
          အဖိုးက၊ တကယ်လို့သာ၊ အသက်ကြီးတဲ့အချိန်အတွက် သူကြိုတင်ပြင်ဆင်မထားရင်၊ မိသားစုက သူ့ကိုထောက်ပံ့နေရမှာ။ အခုတော့သူဟာသူ့ရဲ့လူမှုဖူလုံရေးရံပုံငွေအပြင်၊ အပိုစုငွေတွေကို၊ ငယ်ငယ်ကတည်းက စုလာတယ်။ သူ့ပင်စင်ရံပုံငွေတွေက၊ အငြိမ်းစားယူချိန်မှာ လိုအပ်မယ့်၊ အခြေခံအသုံးအဆောင်တွေလောက်ပဲ ဖြည့်ဆည်းနိုင်မယ်ဆိုတာ သိတယ်။ ဒါကြောင့် သူ့အနေနဲ့ အငြိမ်းစားယူချိန်မှာ အမှီခိုမဲ့နေနိုင်တယ်။ ဒါပေမယ့် ချွေးမလို၊ သူဝယ်ချင်တာရှိရင်၊ ပိုက်ဆံတောင်းတတ်တဲ့ မှီခိုသူမျိုးရှိနေတာကျတော့၊ ကံဆိုးပြန်တာပဲပေါ့။

သင်ခန်းစာ-၉- အငြိမ်းစားယူချိန်အတွက်၊ စောစောစီးစီးက ပြင်ဆင်းပါ။ ပင်စင်လစာသည်၊ စရိတ်အားလုံးကို ကာမိမည်မဟုတ်၊ အခြေခံစရိတ်မျှသာ ကာမိပါသည်။
          တစ်ရက်မှာ အမေလုပ်သူက ကြက်ဥကုမ္ပဏီတစ်ခုရဲ့ စတော့ရှယ်ယာတွေက အမြတ်ကောင်းကောင်းရတာနဲ့၊ ငွေတွေပုံအောလိုက်တယ်။ နောက်ရက်အတော်လေးကြာတော့၊ အဲဒီကုမ္ပဏီနဲ့ ပတ်သက်တဲ့ သတင်းတွေ၊ သတင်းစာထဲမှာ ပါလာတယ်။ ရှယ်ယာဈေးတွေတက်တာတော့ မဟုတ်ဘူး။ ကြက်ငှက်တုတ်ကွေးဖြစ်တာဆိုတော့ ရှိသမျှ ငွေကုန်ပါလေရော။

သင်ခန်းစာ-၁၀- နေရာအမျိုးမျိုးဖြန့်ပြီး ရင်းနှီးမြှုပ်နှံပါ။ အကျိုးအမြတ်ကြီးမားသော ရင်းနှီးမြှုပ်နှံမှုတခုသည် အန္တရာယ်ကြီးကြီးမားမား တွဲပါလာတတ်ကြောင်း၊ မမေ့ပါနှင့်။