အရေးပေါ်အခြေအနေ

by မင်းလူ၏ ၀တ္တုတိုများ on Thursday, September 20, 2012 at 11:18pm ·

     'င 'နံပါတ် ' ကောင်ဆယ် ' ကားကလေးသည် အရှေ့မြင်းပြိုင်ကွင်းလမ်းအတိုင်း မြို့ထဲသို့ဦးတည်၍ သွားနေ၏။ ဒီဇင်ဘာ၏နှင်းတို့ မှုန်မှုန်ကျနေခြင်းသည် ချစ်သူတို့လက်တွဲ၍ လျှောက်ချင်စရာ ကောင်းလှ ပါသည်။ သို့ရာတွင် ကိုအေးသန်းကမူ ထိုနှင်းတို့ကို သိပ်သဘောမကျလှချေ။

သူ့ကားက မီးအားသိပ်မကောင်း၊ ပြီးတော့ သူ့ရှေ့ကမှန်သည် နည်းနည်းအက်နေ၏။ ထို့ကြောင့် ကားရှေ့မြင်ကွင်းကို ထင်းခနဲနေအောင် မမြင်သာ။ ရှေ့ကို အာရုံစိုက်၍ကြည့်နေရသောကြောင့် မျက်စိညောင်းလာသည်။ ဒီနေ့ရှာ၍ရသမျှသောငွေကို စိတ်ထဲကတွက်ကြည့်မိသည်။ ခုနောက်ဆုံးတစ်ခေါက် သင်္ဃန်းကျွန်းကိုလိုက်ပို့သဖြင့် ရရှိငွေ တစ်ဆယ့်ငါးကျပ်၊ စုစုပေါင်းရရှိငွေ ကိုးဆယ့်ငါးကျပ်။ ဓာတ်ဆီဖိုး၊ အင်ဂျင်ဝိုင်ဖိုး အစိတ်နုတ်လျှင် ခုနစ်ဆယ်ကျန်၊ စားသောက်စရိတ် တစ်ဆယ်ထား၊ ခြောက်ဆယ် ကျန်ငွေ၊ ဒီနေ့သိပ်မရဟု ထင်သည်။

    ပရိုက်ဗိတ်တက်စီခေါ် ကိုယ်ပိုင်အငှားယာဉ်အလုပ်။ ခေါ်နေကြမို့သာ နားယဉ်နေရသည်။ အမှန်အားဖြင့် ထိုအမည်သည် အတော်ရယ်စရာကောင်းလှ၏။ ကိုယ်ပိုင်ဖြင့်လည်း ကိုယ်ပိုင်။ အငှားယာဉ်ဖြင့်လည်း အငှားယာဉ်။ အခုတော့ ကပြားအမည်လို ဖြစ်နေလေသည်။ နံပါတ်ကတော့ အနက်၊ ကိုယ်ပိုင်ပေါ့။ သို့ရာတွင် အငှားလိုက်သည်။ တစ်နာရီသုံးလျှင် တစ်ဆယ့်ငါးကျပ် သို့တည်းမဟုတ် နှစ်ဆယ်။ ဟိုနား ဒီနား တစ်ခေါက်လောက်လိုက်ပို့ရုံဆိုလျှင် ရှစ်ကျပ်၊ တစ်ဆယ်။ မနေ့ကတော့ အချီကြီးရလိုက်သည်။ မိန်းကလေးနှစ်ယောက်ကို သုံးမိုင်ခရီးလောက် လိုက်ပို့ရုံ၊ ညနေကျတော့ သွားကြိုရုံမျှဖြင့် ငွေသုံးဆယ်ရလိုက်သည်။

    ရိပ်ခနဲဝင်လာသော မြင်ကွင်းသည် အတွေးအားလုံးကို ရပ်တန့်သွားစေ၏။ တာမွေခြောက်လမ်းထဲမှ ဖြတ်ထွက်လာသော စက်ဘီးတစ်စီးကားရှေ့တည့်တည့်သို့ ဘေးတိုက်ဝင်လာသည်။ နီးနီးကလေး။

    ဘရိတ်ဖမ်းရန်အချိန်မရ၊ ကားကိုဘယ်ဘက်ကိုကွေ့ချလိုက်သည်။ စက်ဘီးနှင့်ကား ဦးတည်ရာ လမ်းကြောင်းတို့ ပြောင်းပြန်ဖြစ်သွားသည်။ လွတ်သွားပြီဟုထင်၏။ သို့ရာတွင် စက်ဘီးစီးသမားက ကြောက်အားလန့်အားနှင့် ဘယ်ဘက်ကိုပင်ကွေ့သည်။ စက်ဘီးသည် လမ်းပေါ်တွင် စက်ဝိုင်းလိုလည်၍ ကားရှိရာသို့ပြန်လှည့်လာသည်။ ကားလက်ကိုင်ဘီးကို ဘယ်ဘက်သို့ ဆွဲလှည့်သည်။ မရတော့။

    ' လေဆိပ်၇၅ ' ဇာတ်ကားထဲမှ လေယာဉ်ပျံကြီးနှင့် လေယာဉ်ပျံကလေးတို့ တိုက်မိကြသလိုပင်။ ကားနှင့်စက်ဘီးတို့သည်  'ဂျိုင်း'ခနဲ ဘေးချင်းဝင်ဆောင့်ကြလေ၏။

    ကိုအေးသန်းသည် ကားပေါ်မှာ ခဏမျှငိုင်နေမိသည်။ 'ကားတော့တိုက်ပြီဟေ့'ဟူသော အော်သံကြားမှ ကားတံခါးကိုဖွင့်၍ လျင်မြန်စွာ ဆင်းလိုက်သည်။ လူတို့သည် ဘယ်ကဘယ်လို ထွက်လာကြမှန်းမသိ။ လူအုပ်တော်တော်များနေပြီ။ လူအုပ်ကြားထဲသို့ ကြည့်လိုက်သောအခါ လူတစ်ယောက်သည် ဆယ့်နှစ်နှစ် အရွယ်ခန့် ရှိသော ကောင်လေးတစ်ယောက်ကို ပွေ့ချီထားသည်။ ကလေးငယ်သည် ဦးခေါင်းငိုက်စိုက်ကျနေ၏။ သူ့ခေါင်းမှ သွေးတို့သည် ကတ္တရာလမ်းပေါ်သို့ တတောက်တောက်ကျနေသည်။ ဘုရား ဘုရား အသက်မသေပါစေနှင့်။

    ' ဘယ်လိုလုပ် မောင်းတာလဲ '

    ' စက်ဘီးတစ်စီးလုံးတောင် မမြင်ဘူး '

    ' သေပြီ ထင်တယ် '

    ' ကားသမားတွေ ရမ်းကိုရမ်းတယ် '

    ရန်ကုန်မြို့သားများမှာ အကျင့်တစ်ခုရှိသည်။ လူတစ်ယောက်ကို ကားတစ်စင်းက ဝင်တိုက်မိပြီဆိုလျှင် ကားမောင်းသူကိုသာ အပြစ်ဖွဲ့ချင်တတ်သောအကျင့်။ သူတို့သည် မကျေနပ်ချက်မှန်သမျှကို ကားမောင်းသူများ၊ သူခိုးများ၊ ခါးပိုက်နှိုက်များအပေါ်ပုံအောတတ်ကြလေသည်။ သို့ရာတွင် ကိုအေးသန်းကတော့ သက်သာရာရသွား၏။ သြဇာညောင်းပုံရသော လူကြီးတစ်ယောက်ရောက်ရှိလာသောကြောင့် ဖြစ်ပါသည်။

    ' ဟေ့ ဘာလို့ဝိုင်းအုံကြည့်နေကြတာလဲ၊ အသက်ရှိသေးတယ် မဟုတ်လား၊ ဆေးရုံပို့ပါလား၊ ခင်များကားမောင်းလို့ ရသေးတယ်မဟုတ်လား '

     'ဟုတ် ဟုတ်ကဲ့ပါခင်ဗျာ '

    'ဒါဆို ကားပေါ်တင်၊ မောင်ပိုင်၊ ကျော်မြင့်၊ သံချောင်း ကားနဲ့လိုက်ခဲ့၊ မြင့်လှိုင်က ကလေးအဖေကို အကြောင်းကြားပြီး ဆေးရုံကိုခေါ်ခဲ့၊ ကဲ မောင်း၊ မောင်းလေဗျာ '

    ကားကို 'ဝူးခနဲ' မောင်းထွက်လိုက်၏။ ကိုအေးသန်းကား ထူပူနေသောကြောင့် သွားနေကျလမ်းများကိုပင် မမှတ်မိသလိုဖြစ်နေလေသည်။ ခုနလူကြီးက လမ်းညွှန်နေရသည်။

    'မြေနီကုန်းဘက်ကိုမောင်း၊ အဲဒီက လမ်းရှင်းတယ်၊ ဦးဝိစာရလမ်းရောက်မှ ဖြတ်ချ '

    ကိုအေးသန်းသည်ရှေ့ကိုကြည့်နေသော်လည်း စိတ်က ကားနောက်ခုံရှိ ကလေးဆီသို့ ရောက်နေသည်။ မတော်တဆ ဖိတ်စင်၍ သွားခဲ့လျှင် ' ဖွဟဲ့၊ လွဲပါစေ ဖယ်ပါစေ '။

    'ဘယ်လိုနေသေးလဲ '

    သူ့စိုးရိမ်မှုသည် သူ့အသံတွင် ပေါ်လွင်နေသည်။ စိတ်မတည်ငြိမ်ဘဲ ကားမောင်းနေလျှင် နောက်ထပ်တိုက်မိနိုင်ကြောင်းကို နောက်ခန်းမှ လူကြီးကနားလည်သွားသည်။

    ' စိတ်အေးအေးထားပြီး မောင်းစမ်းပါဗျာ၊ ကလေးက အသက်ရှူနေတုန်းပါပဲ၊ နှလုံးလဲ မှန်မှန်ခုန်နေတယ် '

    ' ဟုတ်ပါတယ် အစ်ကို၊ စိတ်မပူပါနဲ့၊ ကျွန်တော်တို့အားလုံးမြင်ပါတယ်၊ အစ်ကို့အမှား မဟုတ်ပါဘူး သူ့စက်ဘီးက မှားဝင်လာတာပါ၊ ကလေးမိဘ လာရင်လဲ ဝိုင်းပြောပေးပါ့မယ် '

    လူကြီး၏ စကားကို လူငယ်တစ်ယောက်က ထောက်ခံလိုက်သည်။ ရွှေဂုံတိုင်အဝိုင်းတွင် မီးပွိုင့်က နီနေပြန်၏။

    ' မောင်းဗျာ ကားလဲ ရှင်းသားပဲ '

    မီးနီကိုဖြတ်၍ မောင်းသည်။ လမ်းဆုံ ပလက်ဖောင်းပေါ်မှ ယာဉ်ထိန်းရဲ၏ ခရာသံကို ' ရွှီခနဲ ' ကြားလိုက်ရသည်။ နောက်ခန်းမှ လူကြီးက  'လူနာပါလို့ဗျို့'ဟု လှမ်းအော်လိုက်သံကိုလည်း ကြားရသည်။

    ဦးဝိစာရလမ်းအတိုင်းဖြတ်၊ ထို့နောက် ဘုရားလမ်းအတိုင်းမောင်း၊ ဗိုလ်ချုပ်လမ်းနှင့်ဆုံရာသို့ ရောက်လာသည်။ ဆေးရုံကြီးသည် ညာဘက်မှာရှိ၏။ သို့ရာတွင် ဗိုလ်ချုပ်လမ်းသည် တစ်လမ်းမောင်း၊ ညာကွေ့လို့မရ။ အနော်ရထာလမ်းထိအောင် ဆက်မောင်း ညာကွေ့၊ လမ်းမတော်မှ အပေါ်သို့ဖြတ်တက်၊ ဗိုလ်ချုပ်လမ်းအတိုင်း ပြန်မောင်း တစ်ကွေ့တစ်ပတ်ကြီး။

    'အရေးပေါ်လူနာဌာနကို ဘယ်လမ်းကဖြစ်ဖြစ် အလွယ်တကူ ဝင်လို့ရအောင် စီစဉ်ထားဖို့ ကောင်းတယ်၊ ဒီကိစ္စမျိုးက စက္ကန့်နဲ့အမျှ အရေးကြီးတာကလား '

    လူကြီး၏စကားနှင့်အတူ အရေးပေါ်ဌာန၏ဆင်ဝင်ရှေ့မှာ ကားရပ်မိသည်။ တံခါးလေးခု တစ်ပြိုင်တည်းပွင့်သွား၏။ ကလေးကို ပွေ့ချီသွားသည်။ အသင့်တွေ့ရသော လူနာတင်တွန်းကုတင်ပေါ်သို့ တင်သည်။ ဆရာဝန်တစ်ဦး ရောက်လာသည်။ ကလေး၏ ဒဏ်ရာကို ကြည့်သည်။  'ဘာမှမဖြစ်ပါဘူး 'ဟု ပြော၍ သုတ်သုတ်ပျာပျာ ပြန်ထွက်သွားသည်။ 'ဟင် သွေးတွေကို မြင်နေရတာတောင် ဘာမှမဖြစ်ပါဘူး'တဲ့။ လူကြီးက ထွက်သွားသောဆရာဝန် နောက်သို့လိုက်မည့်ဟန်ပြု၏။ ဆေးရုံအမှုထမ်းတစ်ယောက်က လူကြီး၏ လက်မောင်းကို ကိုင်လိုက်သည်။

    'ခဏ စောင့်ပါဦးလေ၊ ဟိုမှာ သိပ်အရေးကြီးတဲ့ လူနာတစ်ယောက်ရောက်နေလို့ပါ၊ သေမလား ရှင်မလားမသိဘူး၊ အသက်ကိုလုယူနေရတယ်၊ ပြီးတော့ ဦးလေးတို့ လူနာက ဘာမှမဖြစ်ဘဲ၊ အဲ အခြေအနေကောင်းပါတယ်၊ ခေါင်းနည်းနည်းကွဲသွားတာရယ်၊ လက်မှာ ပွန်းပဲ့သွားတယ်ရယ်လောက်ပါပဲ '

    ခုမှပင် ကိုအေးသန်း စိတ်သက်သာရာရသွား၏။ ဟုတ်တော့လည်း ဟုတ်ပေသားပဲ၊ ခေါင်းကွဲသွားသော လူနာနှင့် စာလျှင် လူကောင်းပကတိသည် ဘာမှမဖြစ်။ အသက်လုနေရသော လူနာနှင့်စာလျှင်မူ ခေါင်းကွဲသွားရုံဖြစ်သော လူနာသည် ဘာမှမဖြစ်ဟု ဆိုနိုင်သည်။ အိုင်းစတိုင်း၏ ရီလေတီဗီတီ သီအိုရီပင်တည်း။

    ကလေးထံမှ ညည်းသံတစ်ချက် ထွက်လာသည်။ ကလေးသည် မေ့မျောနေခြင်းမဟုတ်။ ဒဏ်ရာအရှိန်ကြောင့် မှိန်းနေခြင်းသာဖြစ်ပါသည်။ မျက်နှာမှာလည်း သွေးဆုတ်နေသော လက္ခဏာမရှိ။ ဆေးရုံစကားနှင့်ပြောရလျှင် ဘာမှမဖြစ်။

    သုံးဘီးကားစက်သံနှင့်အတူ ပြေးလာနေသော ခြေသံများကိုကြားရသည်။ ကလေးအဖေလာပြီ။ ကလေးအဖေသည် ကလေးရှိရာသို့ ပြေးသွားသည်။

    ' သား သား သတိရရဲ့လား၊ ဖေဖေလေ '

    ကလေးက 'အင့်'ကနဲ ညည်းပြန်သည်။ လူကြီးက ကလေးအဖေ၏ ပခုံးပေါ် လက်တင်လိုက်ပြီး

    ' မောင်တင်ရွှေ ကလေးဘာမှ မဖြစ်ပါဘူး '

    ကလေးအဖေက လူကြီးကို မျက်လုံးအကြောင်သားဖြင့် စိုက်ကြည့်နေသည်။ လူကြီးကလည်း သူ့စကားသည် ကလေးအဖေအဖို့ နည်းနည်းစိမ်းနေသေးကြောင်း သိသွားပုံရသည်။

    ကလေးကို အတွင်းခန်းထဲသို့ခေါ်သွားသည်။ လူကြီးနှင့် ကလေးအဖေကိုတင်ရွှေတို့ လိုက်သွားကြသည်။ ခဏကြာသောအခါ ကလေး၏ စူးစူးဝါးဝါး အော်လိုက်သံကို ကြားရ၏။ ဘေးမှလူတစ်ယောက်က

    ' အစိမ်းချူပ်နေတာဗျ။ အဲဒါ ပိုကောင်းတယ်၊ ထုံဆေးနဲ့ချုပ်တာထက် အနာပိုပြီး အကျက်မြန်တယ် '

    ဟုတ် မဟုတ်တော့မသိ၊ နားမချမ်းသာသောကြောင့် အပြင်သို့ထွက်လာခဲ့သည်။ သူ့ကားနှင့်ပါလာသော လူငယ်တစ်ယောက်ကို ဆင်ဝင်အောက်မှာ တွေ့သဖြင့် စီးကရက်နှစ်လိပ်ဝယ်ပြီးတစ်လိပ်ကို ပေးလိုက်သည်။ ကားရှိရာသို့ လျှောက်သွားပြီး တိုက်မိသည့်နေရာကို ကြည့်သည်။ နဲနဲချိုင့်သွားရုံသာ။

    ခုမှပင် ကိုအေးသန်း သတိရလာသည်။ ကလေးအတွက် ဆေးဖိုးဝါးခကိစ္စ။ ဒီနေ့ညအဖို့ ငွေငါးဆယ်လောက်တော့ပေးထားခဲ့မှ ကောင်းမည်။ ကုန်ပြီ။ ဒီနေ့ရှာလို့ ရသမျှ နက်ဖြန်ဆိုလျှင်လည်း ရှာပေဦးတော့၊ ငါးဆယ်လောက်ထပ်ပေးရဦးမည်။

    ပြတ်တောင်း ပြတ်တောင်း ဥသြသံကို ကြားရ၏။ ရဲကားတစ်စင်းနှင့် လူနာတင်ကားတစ်စင်း ဆိုက်လာသည်။ လူနာတင်ကားပေါ်မှ ထမ်းစင်ကိုသယ်ယူလာကြသည်။ လူငယ်တစ်ယောက် အနောက်တိုင်းဝတ်စုံ အပြည့်အစုံဝတ်ဆင်ထားသည်။ လည်မျိုတည့်တည့်တွင် ဓားမြှောင်ကြီးတစ်ချောင်းစိုက်နေ၏။ သေနေပြီ။ ကပွဲတစ်ခုခု သို့တည်းမဟုတ် ဟိုတယ်တစ်ခုခုတွင် ရန်ဖြစ်လာခဲ့ဟန် တူသည်။

                    * * * *

အထဲက အချုပ်အလုပ်ကိစ္စများ ပြီးဆုံးသွားသည်။ ကလေးကို အပြင်သို့ ပွေ့ခေါ်လာကြသည်။ လက်မှာ ပတ်တီးတစ်ခု၊ ခေါင်းမှာတစ်ခု၊ ကလေးသည် သတိကောင်းစွာရနေပြီ။ သို့ရာတွင် အနာကိုချုပ်စဉ်က အော်ဟစ်ခဲ့ရသောကြောင့် မောပန်းနေဟန်တူ၏။ ပွေ့ချီထားသူ၏လက်မောင်းကိုမှီလျက် မှေးနေသည်။ ကိုအေးသန်းသည် ကလေး၏ ဆံပင်ကလေးကို ပွတ်သပ်လိုက်သည်။ သူသည်ကလေးကို မည်သို့ အားပေးစကားပြောရမှန်းမသိ ဖြစ်နေ၏။ ထိုအချိန်မှာပင် ဆရာဝန်ထွက်လာသောကြောင့် သူ့အခက်အခဲပြေလည်သွားသည်။

    'ကလေးကို ပြန်ခေါ်သွားနိုင်ပါပြီ၊ နီးစပ်ရာ ဆေးခန်းမှာပဲ ပြပေါ့၊ ယာဉ်မောင်းနဲ့ကလေးအဖေတော့ နေခဲ့ကြပါဦးဗျာ'

    ဆရာဝန်က ဆက်လက်ရှင်းပြသည်။ ကလေးသည် သာမန်ထိခိုက်ရုံမျှသာဖြစ်၍ အမှုအခင်းမဖြစ်နိုင်လောက်။ ရဲကိုတော့ အကြောင်းကြားရမည်။ ရဲ၏ရှေ့တွင် ကိုအေးသန်းနှင့် ကလေးဖခင်တို့က ကျေအေးကြောင်း လက်မှတ်ထိုးရမည်။ ကလေးအဖေက ယခုဖြစ်ပွားသောယာဉ်တိုက်မှုတွင် ကိုအေးသန်းက ကလေး၏ ကျန်းမာရေးအတွက်ဆုံးခန်းတိုင် တာဝန်ယူရမည်။ ယခုဒဏ်ရာနှင့်ပက်သက်၍ နောက်ပိုင်း ဖြစ်ပေါ်လာသမျှကိစ္စကို တာဝန်ယူရမည်။

    'ဖြစ်ပြီးမှတော့ ဘယ်လိုမှ မတတ်နိုင်တော့ဘူးပေါ့ဗျာ၊ ကျွန်တော့်ကလေးကိုသာ ဂရုတစိုက်လာကြည့်ရင် ကျေနပ်ပါပြီ '

    'ဟာ စိတ်ချပါ၊ ကျွန်တော် လုံးဝ တာဝန်ယူပါတယ်ဗျ '

    ဆရာဝန်က ကလေးအဖေနှင့် လူကြီးတို့ဘက်သို့လှည့်၍

    'စောစောတုန်းက အစ်ကိုကြီးတို့လူနာကို ချက်ချင်းမကူညီနိုင်တဲ့အတွက် တောင်းပန်ပါတယ်၊ အထဲမှာက သိပ်အရေးကြီးတဲ့ လူနာတစ်ယောက်ရှိနေလို့ပါ။ သူလည်း ကားတိုက်ခံရတာပါပဲ၊ လူတစ်ကိုယ်လုံး ကားရှေ့မှန်ထဲကို ကျွံဝင်သွားတာ သွေးလည်းသိပ်လွန်နေတယ်၊ သေမှာပါပဲဗျာ၊ အဲ အဲ ဟိုကားနဲ့တိုက်တာပေါ့ '

    ဆရာဝန်ညွှန်ပြရာသို့ ကြည့်လိုက်ရာ ချက်ဗလက်ဘစ်ကိန်း ကားကြီးတစ်စင်း ပြားပြားရှည်ရှည် လှလှပပကြီး။ ရှေ့မှန်ကား ရစရာမရှိအောင် ကြေမွနေ၏၊ မှန်အစွန်းအစများသည် ဘောင်အတွင်းမှ ထိုးထိုးထောင်ထောင် ထွက်နေသည်။ နှမြောစရာ။ ကိုအေးသန်းသည် ကားကြီးကိုငေးကြည့်နေမိ၏။ တရုတ်ကြီးတစ်ယောက်သည် ကားကိုမှီ၍ရပ်နေသည်။ ဆရာဝန်ကိုတွေ့သောကြောင့် သူတို့ဆီသို့ လျှောက်လာသည်။ ဆရာဝန်သည် တရုတ်ကြီးကို လည်ပင်းဖက်၍ ခေါ်သွားပြီး တစ်စုံတစ်ခုကိုပြောနေသည်။ ဆရာဝန်အသံကို တစ်စွန်းတစ်စကြားလိုက်ရ၏။

    'စိတ်မပူပါနဲ့ဗျာ၊ လူနာအခြေအနေကောင်းတယ်၊ အေးအေးဆေးဆေးပဲ'

    ဩော် မုသားပြောခြင်းဖြင့် လူတို့ကို စိတ်ချမ်းသာစေသူများတွင် ဆရာဝန်များလည်း ပါလေသည်တကား။

    ကလေးကို အိမ်ပြန်ပို့ဖို့ စီစဉ်ကြသည်။ ကိုအေးသန်းက လိုက်ပို့လိုသော်လည်း ရဲကိုစောင့်ရဦးမည်ဖြစ်၍ မပို့နိုင်။ ကလေးအဖေကလည်း ကလေးကို သူမပါဘဲ ပြန်မလွှတ်လို။ ကိုအေးသန်းကားပေါ်မှာ ခဏသိပ်ထားလိုသည်။ လူကြီးကမူ ကလေးအအေးမိမည်စိုး၍ အိမ်ကိုခေါ်သွားနှင့်ချင်သည်။ သူတို့နှစ်ယောက် အချီအချငြင်းခုံနေကြစဉ် ကိုအေးသန်းထွက်လာခဲ့သည်။ စောစောက ချက်ဗလက်ကားကြီးဆီသို့ ကြည့်လိုက်ရာ ကားရှင်တရုတ်ကြီးသည် ကားခေါင်းပေါ်မှာထိုင်၍မှိုင်နေလေသည်။ ထိုနေရာသို့ ကိုအေးသန်းလျှောက်လာခဲ့သည်။ သူအနားရောက်သောအခါ တရုတ်ကြီးကမော့ကြည့်၏။ ကိုအေးသန်းက

    ' ဒီမှာ ဆရာကြီး၊ ခင်ဗျားကားအတွက် ရှေ့မှန်ယူမလား '

    ' ခင်ဗျားမှာ ရှိလား '

    ' ရှိတယ် '

    ' ဒါဆို ခင်ဗျားလိပ်စာပေးထားလေ၊ နက်ဖြန်လာကြည့်မယ် '

    တရုတ်ကြီး၏မျက်လုံးများသည် တောက်ပလာ၏။ ကိုအေးသန်းကမူ ကားမှန်ဈေးကို ဘယ်လောက်ပြောရင်ကောင်းမလဲဟု စဉ်းစားနေလေသည်။

                                                       ရှုမဝ၊ ဇူလိုင် ၁၉၇၉။