ဦးဘသက်ရဲ့ မှတ်ပုံတင်

by Nyein Aye Eain on Wednesday, August 17, 2011 at 7:23am

အရေးတကြီး ကိစ္စတစ်ခုဖြင့် နက်ဖြန်မနက်တွင်သွားရမည့် ခရီးစဉ်တစ်ခုအားဖျက်လိုက်ရသည့်အချိန်ကျမှ မှတ်ပုံတင်တစ်ခု၏ အရေးပါမှုကို ကျွန်တော်အသိအမှတ်ပြုလိုက်ရပါသည်။
ခါးပိုက် အနှိုက်ခံရသည်လား၊ ကျပျောက်သည်လား အကြောင်းရှာမရသော်လည်း ကွှန်တော့်မှတ်ပုံတင်ပျောက်ဆုံးခဲ့ သည်မှာတော့ သေချာပါသည်။ ပြည်တွင်းခရီးစဉ်ပင်ဖြစ်သော်လည်း သွားရမည်က တစ်နံတစ်လျား။ ယဉ်ရထား လက်မှတ်ဝယ်ယူရေး၊ ရောက်ရာအရပ်တွင် တည်းခိုရေးအတွက် မှတ်ပုံတင်သည် အသက်ဖြစ်၏။ သူမရှိလျှင် ဘာမျှလုပ်မရတော့။
မည်မျှပင် အရေးကြီးသည့်ကိစ္စဖြစ်ပါစေ ခရီးစဉ်ဖျက်ပြီး လက်လျှော့လိုက်ရုံက လွဲ၍ ကျွန်တော့်မှာ အခြား ရွေးချယ်စရာမရှိတော့ပါ။
မှတ်ပုံတင်ဟူသည်မှာ လူ၏ခန္ဓာကိုယ်အစိတ်အပိုင်းတစ်ခု လိုပင် မရှိမဖြစ်အရာလား။
ဗင်းဆင့်ဗင်ဂိုးကို သတိရသည်။
သူ့မှာရောမှတ်ပုံတင်ရှိရဲ့လား။
ရှိမည့်ပုံမပေါ်ပါ။ ရှိမည်ဆိုလျှင် သူ့မှတ်ပုံတင်သည် အဝါရောင်ဆေးများသာဖြစ်နိုင်ပါသည်။
နေချင်သည့်အချိန်တွင်နေ၍ သေချင်သည့်အချိန်တွင် သေဆုံးသွားသူတစ်ယောက်အား မှတ်ပုံတင်နှင့်ဆက်စပ်စဉ်းစားမိ သည်မှာ အတော်ပင်ရုးမိုက်သော အတွေးဖြစ်၏။
သူ့စိတ်အဆာပြေစေဖို့ သူ့ကိုယ်ပိုင်နားရွက်ဖျား တစ်ဖက် ကိုဖြတ်ကာ ကောင်မလေးတစ်ယောက်ဆီ လက်ဆောင်ပို့ပေးခဲ့ဖူး သည်။ ရူးကြောင်ကြောင်လူတစ်ယောက်ဟု အများက သတ်မှတ်ထား သူတစ်ယောက်၏ စိတ်လွတ်လပ်မှုကို ယနေ့တိုင်ကျွန်တော်တို့ ပြောဆိုမပြီး နိုင်ကြသေးပါ။ ခန္ဓာကိုယ်မှ နားရွက်ဖျားတစ်ဖက် မရှိသော်လည်း အသက်ရှိသေး၏။ လုပ်ဆောင်ဖွယ်ရာများကို ပြေပြေပြစ်ပြစ်ဆောင်ရွက်နေသေး ၏။
မြန်မာပန်းချီကျော် ဦးဘသက်(မန္တလေး)ကို လွမ်းလာ သည်။
သူ့မှတ်ပုံတင်ကတော့ မပျောက်ပါ။ စုတ်ပြဲသွားခြင်းသာ ဖြစ်ပါသည်။
သူရှိရာ မန္တလေးမြို့မှ တိုက်ပုလေးတစ်လုံးဆီရောက်သွား တုန်းကဖြစ်သည်။
အုတ်နံရံတွင်မြေဖြူနှင့်ရေးထား၏။
“ ဆရာ့ထံ သူခိုးမလာပါနဲ့” . .တဲ့။
(ဘယ်သူတွေ ဆရာ့ဆီက ဘာတွေခိုးယူသွားခဲ့ဘူးကြောင်း ကျွန်တော်တို့မသိနိုင်တော့၊။ အခိုးခံပစ္စည်းများထဲ လူ့တန်ဖိုးမပါစေဖို့ ဆုတောင်းပေးရုံသာ တတ်နိုင်ခဲ့ပါသည်။)
ဗလပွကြဲ၊ ဗြဲလရမ်းရမ်းစုတ်တံများ၊ အနှံ့ပြန့်ကြဲနေသော ပစ္စည်းများ၊ ဟိုတစ်စုဒီတစ်စုနှင့်ကားချပ်များ၊ ဖုံအလိမ်းလိမ်း တက်နေသော ကားချပ်များ၊ တစ်ဒေါင့်တွင်ကားတရောတစ်လက် စသည်တို့ဖြင့် ပြည့်နှက်နေ၏။ ဆရာဘယ်လိုနေသည်၊ ဘယ်လို အိပ်သည်ကို ချင့်၍မရပါ။
“ဆရာ့အထ္ထုပ္ပတ္တိကိုလိုချင်လို့ ရန်ကုန်က ဒီမနက်ပဲရောက်တယ်..။”
၁၉၀၃ခုနှစ်က လူ့လောကသို့ဆရာရောက်ခဲ့သည်။ ငယ်စဉ်က ဘုန်းကြီးကျောင်းတွင်နေရ၏။ ဆွမ်းခံရင်းလည်း ပန်းချီပုံ လောင်းခဲ့၏။  ကျောင်းဘေးအုတ်နံရံတွင်လည်း သူ့အရုပ်ကို တွေ့နိုင်၏။ ရှိသမျှ စက္ကူစုတ်တွေလည်း သူ့လက်ချက်နှင့်ပြည့်နေ၏။ မြင်လျှင်ခြစ်၊ တွေ့လျှင်ရေး ၏။
လေဖြတ်ပြီးနောက်ဆေးကုရာ လက်နှင့်ခြေကား ကောင်းခဲ့ပြီ။ စကားပြောရာတွင်ကား လျှာလေးသေး၏။
““ဦးဘသက်ရဲ့ ဓာတ်ပုံရယ်၊ ရေးထားတဲ့ကားရဲ့ ဓာတ်ပုံရယ်လိုချင်တယ် ရမယ်မဟုတ်လား””
“ရပါတယ်၊ လာခဲ့လေ”
နောက်တစ်နေ့မနက်(၇)နာရီခွဲလောက်တွင် ကျွန်တော် ဦးဘသက်ထံရောက်ရာ သူ၏ကားများကို ထုတ်ပြသည်။
ကမ္ဘာ့ငြိမ်းချမ်းရေးကို ရှေ့ရှုသောကားဖြစ်၏။
လူပေါင်းများစွာလဲပြိုနေပုံ၊ အတုံးအရုံးဖြစ်နေပုံများအား၊ အနုမြူဗုံးသဏ္ဍာန်၏အလယ်တွင်ရေးထား၏။ ကောက်ကြောင်းသာ ပြီးသေးသော (၁၂)ပေခန့်ရှိကားကိုလည်းပြခဲ့၏။အခြားကားများကို လည်း ကြည့်ခိုင်း၏။
ကျွန်တော် သူ၏ကားများကို ကြည့်နေစဉ် သူ တရောထိုး နေ၏။
]ညနေညိုညို ရွှေကိုယ်ဖမ်းတဲ့ အရက်ကယ်} ဟူသော တေးကို နေ့စဉ်ညည်းခဲ့ဟန်တူ၏။ အရက်ကိုအဖေါ်လုပ် အဟုတ်ပဲပျော်မယ်ဟူ၍ အော်ဟစ်ကာ ပျော်ကြကုန်သောလူများတွင် ဦးဘသက်တစ်ယောက်လည်း ပါဝင်ဟန်ရှိသည် ဆိုရပေမည်။
ဦးဘသက်ကား အိမ်ထောင်(၂)ဆက်ကျဖူး၏။ သားသမီးမရရှိပေ။ မုဆိုးဖိုနှစ်ထပ်ကွမ်းဘဝနှင့် ယခုကား . . .
မç မနီးသော တစ်ကိုယ်တည်း အဖေါ်မရှာ ကြုံရာစား၊
ဖျားလျှင်ဆေးရုံ
ဆာလျှင်ထမင်းဆိုင်
မြေမှန်လျှင်သူ့အိပ်ရာ
အမိုးကားကောင်းကင်
နေပူလျှင်သစ်ပင်ရိပ်
လူ့လောကီမှာ ငါ၏ပျော်ပွဲ
သောကပူတယ်ဆိုတာ ကလေးများရဲ့အလုပ်ဟူ၍ပင် ပြောရလောက်အောင်ပင် . . .။ လူ့ဘဝဆိုတာ တစ်ခဏ၊ အသက်ဆိုတာ ရှင်တုန်းရက်ပိုင်းနှင့်တွက်က ရက်ပေါင်း (သုံးသောင်း) တောင်မနေရပေ။
စင်စစ်အားဖြင့်  နေ့အားဖြင့်တွက်ချင့်သော် (၃၆၅၀ဝ) နေရသူရှားပေသည်။ ဤသဏ္ဍာန်ကိုမြင်ခဲ့သော ရှုထောင့်အသွယ် သွယ်မှ ကြည့်ရှုခဲ့သော ဦးဘသက်သည် လူများ၏လှုပ်ရှားမှုကို ကြည့်၍ ရယ်မောခဲ့သည်။ ရိုးရိုးမဟုတ် သရော်၍ပြုံးခဲ့သည်။ လောကကြီးအား အမှုမထင် ပြက်ရယ်ပြုသူဟုသာ တင်စား၍ ခေါ် ပါရစေတော့။
“ ကျွန်တော့်ကို ခွင့်လွှတ်ပါ နောင်ကြီးရယ်”
ဆရာ၏စကားသည် ကျွန်တော့်အား ကြောင်အအ ဖြစ်၍ တွေဝေသွားစေသည်။
“ဆရာဦးဘသက် . .၊ ကျွန်တော်လေ . .၊ ဂျီလှမောင်လေ . .၊ ဆရာ့မိတ်ဆွေလေ . .”
ဦးဘသက်အား ကျွန်တော်သတိပေးလိုက်သည်။ ထိုအခါတွင်မှ ပြုံးပြီး . .။
“ဪသာ် . . သိပြီ၊ ခင်ဗျားကိုး”
လက်လှမ်း၍ ကျွန်တော့်အားဖက်လိုက်၏။
အချိန်ကား နေညိုချမ်းမှာ ပါစကရည် အရှိန်ဖြာ၍ ရေဆိုးဖြန်းချိန်တိုင်ခဲ့လေပြီ။
သို့သော် မရူးခဲ့ပါ။
“နို့ . . ခင်ဗျားရုပ်ပုံကော . .၊ ရမယ်ပေါ့”
ဦးဘသက်သည် သူ၏မှတ်ပုံတင်မှ ဓာတ်ပုံပါသည့်ဘက် ကို ဆုတ်ဖြဲ၍ ကျွန်တော့်ကိုပေးလိုက်သည်။
ရေဆေးရေးရာတွင် သူ၏ကားကို ဆရာဆောင်ပင် သိမ်းထားရလောက်အောင်ကောင်းလှ၏ ဟု မှတ်ချက်ပြုခံရသူ ထိုဆရာကြီးသည် မှတ်ပုံတင်ကိုဆုတ်ဖြဲပေးကမ်း လိုက်ပြီးသည့် နောက်ပိုင်း သူ ဘယ်ကိုမှခရီးမသွားတော့ဘူးလားဟု ကျွန်တော် တွေးနေမိပါသည်။ သို့သော် သူခရီးသွားမသွား အချက်အလက် အထောက်အထားကိုတော့ ကျွန်တော်မရှာဖွေနိုင်ခဲ့ပါ။ သူ့လက်ထဲ ကျန်ရစ်သော မှတ်ပုံတင်တစ်ခြမ်းနှင့် ဘဝ၏နောက်ပိုင်းခုနှစ်များကို မည်သို့မည်ပုံစခန်းသွားခဲ့သည်ကိုလည်း ကျွန်တော်မသိတော့ပါ။
နားရွက်ဖျားကိုလှီးဖြတ်ပေးခဲ့သော ဗင်းဆင့်နှင့် မှတ်ပုံတင် တစ်ခြမ်းကို ဆုတ်ဖြဲပေးခဲ့သော ဦးဘသက်တို့သည် ပါရမီရှင် ပန်းချီ ဆရာကြီးများဖြစ်ကြကြောင်းကိုတော့ ကျွန်တော်သိပါသည်။
ရှစ်ဆယ်လွန်နှစ်များဆီက ကျွန်တော်သည် မြန်မာပြည် မြောက်ဖျားရှိ  ]လဂွေ}ရွာကလေးတွင် ရက်ရှည်လများနေခဲ့ရဖူးသည်။ ထိုအရပ်၌ တောင်တို့သည် မတ်စောက်၏။ အအေးကဲ၏။ ဆီးနှင်းထူ၏။ တောင်ကျချောင်းကလေးများနှင့် တောင်နှာမောင်း များကြား မြေပါးပါးပြန့်ပြန့်လေးတွင် လယ်သေးသေးလေးများ ရှိ၏။ တောင်စောင်းများရှိ မီးရှို့ထားသော သစ်ငုတ်တိုများကြားတွင် တောင်ယာ စပါးများအနှံ့အပြားစိုက်ထား၏။ လေအေးနံ့၊ ရေငွေ့နံ့၊ မီးခိုးနံ့တို့သည် ထိုအရပ်၏ ဝတ်ရုံဖြစ်၏။
နယ်စပ်မျဉ်းသို့ နာရီအနည်းငယ်လျှောက်ရုံမျှဖြင့် ရောက်နိုင်သော ထိုရွာလေးဆီသို့ တစ်ဖက်နိုင်ငံမှ ဆွေမျိုးသားချင်း များ တစ်ခါတရံ အလည်လာ တတ်၏။ သူတို့ကလည်း မကြာခဏ သွားရောက်လည်ပတ်တတ်၏။
ထိုရွာသားများနှင့် လာလည်ပတ်သောဧည့်သည်များတွင် မှတ်ပုံတင်မရှိကြပါ။ သူတို့၏မှတ်ပုံတင်သည် သူတို့ကိုယ်တိုင်သာ ဖြစ်ကြပါသည်။
မထူးဆန်းစွာပင် ထိုအချိန်ထိုကာလများက ကျွန်တော့်တွင် လည်း မှတ်ပုံတင်မရှိပါ။ ကျွန်တော့်၏မှတ်ပုံတင်သည်လည်း ကျွန်တော်ကိုယ်တိုင်သာဖြစ်ခဲ့ပါသည်။
ထို့အတူ ထိုအရပ်၌ တည်းခိုးခန်းများ၊ ဘူတာရုံများ၊ သင်္ဘောဆိပ်နှင့် ကားဂိတ်များ မရှိခဲ့သည်မှာ သာ၍ပင်မထူးဆန်း သော ကိစ္စသာဖြစ်ပါသည်။
ကျွန်တော်တို့၏ ရင်းနှီးကျွမ်းဝင်သော မျက်နှာများသည် ဆုတ်ဖြဲဖျောက်ဖျက်မလွယ်သော မှတ်ပုံတင်များဖြစ်ကြပါသည်။ အချင်းချင်းကြား ထားကြသော နှုတ်ကတိများသည် စာချုပ်စာတမ်း များဖြစ်ကြပါသည်။
သစ္စာနီတွင် ဘဏ်စာအုပ် မရှိသလို သူတို့တွင်လည်း ဘဏ်စာအုပ်မရှိကြပါ။ ဘဏ်စာအုပ်တစ်အုပ်ရှိဖို့ မှတ်ပုံတင်ရှိရပါ မည်။ သစ္စာနီတွင် မှတ်ပုံတင်ရှိမရှိ ကျွန်တော်အသေအချာမသိပါ။
ကျွန်တော်တို့ရွာသားများတွင် စပါးရှိပါသည်။ အသားရှိပါသည်။ ဆားရှိပါ သည်။ ဓားရှိပါသည်။ မယားရှိပါသည်။ အားရှိပါသည်။ လက်လုပ် ကြိမ်ကြိုးတံတားနှင့် တောင်ပေါ် လူသွားလမ်းများရှိပါသည်။
ရှင့်နားရွက်ပါးပါးလေးတွေက ချစ်ဖို့ကောင်းလိုက်တာ ဟု မြူဆွယ်ကျီစယ်မည့် မာယာပါးစပ်မရှိပါ။
အထ္ထုပ္ပတ္တိနှင့် ဓာတ်ပုံတောင်းမည့်လူများမရှိပါ။
ဒဂုန်တာရာ တဟီတီသွားချင်ခြင်းသည် မှတ်ပုံတင်ကိစ္စနှင့် များပတ်သက်နေမလားဟု တွေးမိပါသည်။
မည်သို့ပင်ဖြစ်စေ ထိုနေ့မနက်က ကျွန်တော့်အတွက် အဝေးပြေးယာဉ် ကားရထားလေယာဉ်ပျံများရပ်တန့်နေခဲ့ပါသည်။
ကျွန်တော့်ခရီးဆောင်အိပ်ထဲတွင် ဆရာကြီးဦးဘသက်၏ မှတ်ပုံတင်တစ်ခြမ်းသည် ခရီးထွက်ရန်စောင့်ဆိုင်းနေပါသည်။
ကျွန်တော်နှင့် မိတ်ဆွေ ]လဂွေ} ရွာသားများကတော့ ဓား ကိုယ်စီလွယ်၍တောင်ယာဆီတက်ခဲ့ကြပါသည်။  ကျွန်တော်တို့နှင့် အတူ မှတ်ပုံတင်မရှိသော အမဲလိုက်ခွေးနှစ်ကောင်နှင့် တူမီးသေနတ် နှစ်လက်လည်းပါ ပါသည်။
ထိုခဏအတွက် တောင်ယာဆန်မွှေးမွှေးလေးနှင့် ခေါင်ရည်ချိုမြသည် ကျွန်တော်တို့အားလုံးစုပေါင်းပိုင်ဆိုင်သော မှတ်ပုံတင် အသစ်တစ်ခုဖြစ်ပါသည်။


ဤဝတ္ထုထဲတွင်
ကျွန်တော်သည်ကမ္ဘာကျော် ပန်းချီဆရာကြီးဗင်းဆင့်ဗင်ဂိုးဖြစ်၏။
မြန်မာကျော်ပန်းချီ့ ဆရာကြီး ဦးဘသက်(မန္တလေး)ဖြစ်၏။
ပန်းချီဆရာ၊ စာရေးဆရာ ဂျီလှမောင်ဖြစ်၏။ မြန်မာပြည်မြောက်ဖျားမှ ]လဂွေ} ရွာသားတစ်ဦးဖြစ်၏။
ထို့အပြင် ဓာတ်ပုံမကပ်၊ အမှတ်တပ်မထားသေးသော မှတ်ပုံတင် အသစ် တစ်ခု လည်းဖြစ်သေး  ကြောင်းတင်ပြလိုပါသည်။


တပ်ဆင်ခြင်း။
ဤဝတ္ထု၌ ၁၉၆၈ခု၊ ဩဂုတ်လတွင် ထုတ်ဝေသည်ဟု ယူဆဖွယ်ရှိ သည့်  ဂျီလှမောင်၏ ]ကမ္ဘာသိပန်းချီ၊ မြန်မာသိပန်းချီ} စာအုပ်ပါ ဦးဘသက်(မန္တလေး) အခန်းခွဲအောက်မှ ဝါကျများအား သင့်တော် သလို နှုတ်ယူသုံးစွဲတပ်ဆင်ပါသည်။

ငြိမ်းအေးအိမ်
၂၀ဝ၂ခုနှစ် မေလ၊ ၂၀ရက်နေ့ (၁၇း၁၀)နာရီ

မှတ်ချက်။     ။ ဦးဘသက်ရဲ့ပန်းချီကားကို Andy Chen-Aung Win Htut ဆီကနေ ဒေါင်းလုဒ်ဆွဲယူဖေါ်ပြထားပါတယ်။