ဖေ့စ်ဘွခ်ရဲ့ Privacy Options ပြောင်းပြီ
|
4:26 AM |
No မှတ်ချက် |
Thursday, 25 August 2011 02:50 သုခသခင်
ဖေ့စ်ဘွခ် အသုံးပြုသူတို့ရဲ့ ကိုယ်ပိုင်ဒေတာတွေကို ထိန်းချုပ်တာနဲ့ ပတ်သက်ပြီး စိစစ်သုံးသပ်ရင်း ပိုမိုတိုးတက် ကောင်းမွန်အောင် အဓိကပြောင်းလဲမှုတွေကို လုပ်ဆောင်တော့မယ်လို့ ဖေ့စ်ဘွခ်က ကြေညာလိုက်ပါတယ်။
ဒီပြောင်းလဲမှုတွေထဲမှာ ဖေ့ဘုတ်ပေါ်တင်လိုက်သော အချက်အလက်တစ်ခုချင်းစီကို ဘယ်သူတွေကို တွေ့ခွင့်ပေးမလဲ ဆိုတဲ့ ကိုယ်ပိုင် အချက်အလက်ဝေမျှတဲ့ ဆက်တင်ပုံစံတွေ ရှိလာတော့မှာ ဖြစ်ပါတယ်။
ဖေ့စ်ဘွခ် အသုံးပြုသူတွေက သူတို့ရဲ့ ကိုယ်ပိုင်သတင်းအချက်အလက်တွေကို ပိုမိုကောင်းမွန်စွာ စီမံခန့်ခွဲနိုင်ဖို့ ဒီဇိုင်းရေးဆွဲ တည်ဆောက်ပေးခြင်းဖြစ်တဲ့ ဒီကြိုးပမ်းမှုအတွက် ဖေ့စ်ဘွခ်က အချိန်အတော်ကြာ ယူခဲ့ရပါတယ်။ ဒီလူမှုရေးကွန်ယက်ဟာ သတင်းအချက်ထိန်းချုပ်ရာမှာ အားနည်းချက်တွေရှိလို့ ဝေဖန်ခံနေရပါတယ်။
အခုဆိုရင်တော့ အသုံးပြုသူတွေက ဓာတ်ပုံဖြစ်ဖြစ်၊ ဗီဒီယိုဖြစ်ဖြစ် တင်ထားတဲ့ အချက်အလက်တွေမှာ အမည်မှတ်ခြင်း (tag) ခံရတဲ့ သူဟာ ဒီဓာတ်ပုံ ဗီဒီယိုတွေ သူ့ရဲ့ကိုယ်ပိုင် စာမျက်နှာထဲမှာ ချက်ချင်းပေါ်တော့မှာ မဟုတ်ပါဘူး။ ဒါတွေကို ကိုယ့်စာမျက်နှာပေါ်မှာ ပေါ်မလာမီ တင်ခွင့်ပေးမှာလား မပေးဘူးလားစတာတွေကို ပြုလုပ်ရွေးချယ်နိုင်မယ့် အခွင့်အရေးကို အမည်တပ်ခြင်းခံရသူက ရရှိတော့မှာ ဖြစ်ပါတယ်။
အင်တာနက်ပေါ်မှ လူဆိုးတွေဟာ ဒီအမည်မှတ်ခြင်းပြုလုပ်ပြီး မကောင်းတဲ့ဓာတ်ပုံတွေကို အခြားသူတွေရဲ့ အမည်တပ်လေ့ရှိတာက ပြသနာတစ်ခုပါ။ ဒီလိုကာကွယ်ပေးမှုဟာ အမည်သညာ မှတ်ခြင်းကြောင့် ဖြစ်ပေါ်နေတဲ့ ဒီလိုပြသနာတွေကို ဖြေရှင်းပေးနိုင်မယ်လို့ မျှော်လင့်နေပါတယ်။
အခြားပြောင်းလဲမှုတွေကတော့ သုံးစွဲသူရဲ့ ကိုယ်ပိုင်စာမျက်နှာပေါ်မှာ အချက်အလက် အကြောင်းအရာ တစ်ခုချင်းစီအတွက် ကိုယ်ပိုင်ဒေတာတွေကို လူတိုင်းကို ပေးကြည့်မလား၊ သူငယ်ချင်းတွေကိုပဲလား၊ ဒါမှမဟုတ် ကိုယ်ကြည့်စေချင်သူကိုပဲ ကြည့်ခွင့်ပေးမလားစသည်ဖြင့် ထိန်းချုပ်တဲ့ ပုံစံလေးထည့်ပေးလာတာပါပဲ။
နောက်တစ်ခုကတော့ အမည်မှတ်ခြင်းကို ကိုယ်တိုင်ဖယ်ရှားနိုင်သလို ကိုယ့်ကို အမည်မှတ်တဲ့သူကို ဒီလို လုပ်ခြင်းမှ ရုတ်သိမ်းပေးဖို့ တောင်းဆိုနိုင်ပါတယ်။ ဒါမှမဟုတ် ဒီလို အမည်မှတ်သူကို ပိတ်ဆို့ထားလိုက်လို့လည်း ရပါတယ်။
အသုံးပြုသူတွေဟာ အမည်မှတ်ခြင်းကို ကိုယ်တိုင်ဖယ်ရှားနိုင်သလို အမည်မှတ်သူဆီကို ဒီလိုပြုလုပ်ခြင်းမှ ရပ်တန့်ဖို့၊ အမည်မှတ်ထားတာကို ဖယ်ရှားပစ်ဖို့ တောင်းဆိုနိုင်တော့မှာပါ။
နောက်ပုံစံတစ်ခုက အခြားလူတွေက ကိုယ့်ရဲ့ စာမျက်နှာကိုဘယ်လိုမြင်ရမလဲဆိုတာကို ကြည့်နိုင်မယ့် ပုံစံတစ်ခုကို (news feed) ရဲ့ အပေါ်မှာ ပေါ်လာတော့မှာပါပဲ။
ဖေ့စ်ဘွခ် ရဲ့ ဒုဥက္ကဌဖြစ်သူ ခရစ်စ်ကော့ခ်ဆ်ကတော့ ဒီလို ကိုယ်ပိုင်ဒေတာတွေကို ထိန်းချုပ်တာနဲ့ ပတ်သက်ပြီး ပုံစံအသစ်ပြုလုပ်ရခြင်းဟာ ပုံစံအဟောင်းက မကောင်းလို့ ရှုပ်ထွေးလို့ မဟုတ်ပါဘူးလို့ ပြောပါတယ်။
"ပုံစံအဟောင်းရဲ့ထိန်းချုပ်ပုံဟာ မကောင်းလို့မဆိုပါဘူး ။ ဒါပေမဲ့ ပုံစံအသစ်က ပိုမိုကောင်းမွန်ပါတယ်" လို့ သူက ဘီဘီစီကို ပြောဆိုပါတယ်။ " ဒီလိုပြုလုပ်ရခြင်းရဲ့ ရည်ရွယ်ချက်ကတော့ ကိုယ်ပိုင်စာမျက်နှာထဲမှာ ဆက်တင်ပုံစံတွေကို ပိုမိုတိုးတက်ကောင်းမွန်အောင် ပြုလုပ်ဖို့နဲ့ ပိုမိုမြန်ဆန်လာစေဖို့ ဖြစ်ပါတယ်"
မစ္စတာ ကော့ခ်ဆ်က ဆက်လက်ပြီး ဖေ့စ်ဘွခ်ကို အသက် ၁၃ နှစ်အောက် ကလေးများ သုံးစွဲလို့ ရနိုင်အောင် တိုးချဲ့ခြင်းတွေကို ပြုလုပ်ကောင်း ပြုလုပ်မှာပါလို့ ပြောဆိုသွားပါတယ်။
"အခု ဒီပြောင်းလဲမှုဟာ ယနေ့ ဖေ့စ်ဘွခ်ကို သုံးစွဲနေသူတွေအတွက် ဖြစ်သလို ဒီနေ့မှ ဖေ့စ်ဘွခ်ကို စသုံးသူတွေ အတွက်ကတော့ ဒါတွေကြောင့် အရင်ကထက် ပိုမိုလွယ်ကူလာမှာပါ" လို့ ဆိုပါတယ်။
အခုဒီပြောင်းလဲမှု ဖြစ်စဉ်အတွင်းမှာ ဖေ့စ်ဘွခ်သုံးစွဲနေသူတွေရဲ့ ကိုယ်ပိုင် အချက်အလက်တွေကို ထိန်းချုပ်တဲ့ ပုံစံကို ထိခိုက်မှု မရှိစေပါဘူးလို့လည်း ကတိပြု ပြောကြားခဲ့ပါတယ်။ ဒါတွေဟာ အခုအသုံးပြုနေသူတွေရဲ့ ထိန်းချုပ်မှုပုံစံကို အရင်အတိုင်း ရှိနေစေမယ်လို့ သူကဆိုပါတယ်။
ဖေ့စ်ဘွခ်ကို ပထမဆုံးအသုံးပြုတဲ့အခါ သတင်းအချက်အလက်တွေကို ဝေမျှတဲ့ပုံစံမှာ ဖေ့စ်ဘွခ်က အကြံပေးတာကတော့ အရင်က everyone ဖြစ်ပြီး အခုတော့ public လို့ပြောင်းသွားမှာ ဖြစ်ပါတယ်။ တကယ်လို့ အသုံးပြုသူက အခြားပုံစံတွေကို ရွေးချယ်ခဲ့ရင်လည်း ရွေးချယ်ထားတဲ့အတိုင်းပဲ ရှိနေမှာပါ။
ဒီ ကိုယ်ပိုင်သတင်းအချက်အလက်တွေကို ဝေမျှတဲ့ ပုံစံအသစ်ကို သြဂုတ်လ ၂၅ ရက်နေ့မှာ စတင် စမ်းသပ် အကောင်အထည်ဖော်တော့မှာ ဖြစ်ပါတယ်။
သုခသခင်
0 comments:
Post a Comment