ယဉ်ကျေးမှု၏ သားကောင်များနှင့် ကျနော်ဖတ်မိသော စာအုပ်နှစ်အုပ်
|
6:00 PM |
No မှတ်ချက် |
(တရုတ်-ကနေဒါ
ကပြားဖြစ်တဲ့ ပန်းချီဆရာ လီရိ ရေးဆွဲထားတဲ့ ဘေဂျင်း ၂၀၀၈ ဆိုတဲ့
ပန်းချီကားဟာ အတွေးပေါင်းများစွာကို လှူပ်နှိုးပေးနိုင်စွမ်းလို့
ဆောင်းပါး၏ အတွေး ပန်းချီအဖြစ် တင်ပေးလိုက်ပါတယ်။ )
အမေရိကားကို
ရောက်နေတာ နှစ်နှစ်နီးပါးရှိနေပြီ ဖြစ်တဲ့ ABSDF ရဲဘော်ဟောင်း
မိတ်ဆွေတဦးမှ ဖုန်းဆက် စကားပြောလာသည်။ ကျန်းကြောင်း၊ မာကြောင်း၊
သာစေကြောင်း ပြောဖြစ်ခဲ့ကြသည်။ သားသမီးများ၏ ပညာရေးအခြေအနေကို မေးမြန်းတော့ အားရပုံမပေါ်။ မလွတ်လပ်၊ ခက်ခဲကြမ်းတမ်းသော နယ်စပ် ဒုက္ခသည် စခန်းမှ ဖြတ်သန်းလာခဲ့ကြသော မိဘတဦးမှ သူ့၏ သားသမီးအပါအ၀င်၊ အခြားသော မြန်မာမိသားစု ကလေးများ၏ ပညာရေး၊ လူမှုရေး အခြေအနေကို သိပ်အားရမှု မရှိလှသည်ကို ရင်ဖွင့်ရှာသည်။
လွတ်လပ်မှုနှင့် လူ့အခွင့်အရေးများ ပြည့်နှက်နေသော အမေရိကား လူ့အဖွဲ့အစည်းတွင် ဒုက္ခသည် စခန်းက သွားရောက်ကြသည့် ကလေးငယ်တို့၏ဘ၀က မရေရာ မသေချာသည့် အခြေအနေတွင် ရှိနေဆဲ ဖြစ်နေသည်ကို သွားတွေ့ရသည်ဟု အဆိုပါ မိတ်ဆွေမှ ပြောပြခဲ့သည်။
အဆိုပါ မိတ်ဆွေနဲ့ စကားမပြောဖြစ်မှီ စာအုပ်နှစ်အုပ် ဖတ်မိခဲ့သည်။ တအုပ်က The End Of American Century နှင့် နောက်တအုပ်က Battle Hymn Of The Tiger Mother တို့ဖြစ်သည်။ The end of American Century စာအုပ်သည် (၂၁) ရာစုတွင် အမေရိကန်သည် ကမ္ဘာကြီး၏ ဆူပါပါဝါအဖြစ်က ကျဆင်းပြီး၊ အာရှမှ ဂျပန်နဲ့ တရုတ်တို့က နေရာယူလာလိမ့်မည်ဟု သုံးသတ်ထားသော စာအုပ်ဖြစ်သည်။
အမေရိကန် လူ့အဖွဲ့အစည်းတွင်း ဖြစ်ပျက်နေသော လင်မယားကွာရှင်းမှု မြင့်မားနေခြင်း၊ အရွယ်မရောက်သော ကျောင်းသားကလေးငယ်များ ကိုယ်ဝန်ဆောင်နေမှု၊ မူးယစ်ဆေးဝါးစွဲနေမှု၊ လက်ရှိ အမေရိကန် ပညာရေး စနစ်သည် (၂၁) ရာစုအတွက် မသင့်တော်သော၊ ပညာရေးအတွက် ချပေးလိုက်သော အသုံးစရိတ်၏ ၇၅ ရာခိုင်နှုန်းသည် ကျောင်းသို့မရောက်ဘဲ ဗျိုရိုကရေစီ အုပ်ချုပ်ရေး ယန္တးရားတွင် ပျောက်သွားပုံ စသည့် အမေရိကန် တို့ကျဆုံးခန်း ဖြစ်နိုင်သည့် အချက်အလက်ပေါင်း မြောက်မြားစွာကို ထောက်ပြ ဝေဘန်ထားသော စာအုပ် ဖြစ်ပေသည်။
Battle Hymn of the Tiger Mother စာအုပ်ကား အမေရိကန်ရောက် တရုတ်ပညာတတ် မိခင်တဦးမှ အမေရိကန် လူ့အဖွဲ့အစည်းမှ သတ်မှတ်ထားသည့် ယဉ်ကျေးမှုနဲ့ ဖီလာဆန့်ကျင်ကာ တရုတ်တို့၏ ထုံးတမ်းစဉ်လာအရ ကလေးငယ်များကို ထိမ်းကျောင်းခဲ့ပြီး အောင်မြင်သော မိသားစုတခု တည်ဆောက် ထားပုံကို ရေးဖွဲ့ထားသော စာအုပ်ဖြစ်သည်။ စာရေးသူသည် ပညာရေးပိုင်းတွင်လည်း နာမည်ကျော် ယေးလ်တက္ကသိုလ်တွင် ဥပဒေ ပါမောက္ခ မိခင်တဦးဖြစ်သည်။ မိသားစုဘ၀ ဖြတ်သန်းမှု အခြေခံ သူမ၏ ကိုယ်တိုင်ရေးစာအုပ်သည် အမေရိကန် ပညာရေးလောက၊ လူ့အခွင့်အရေးလောက၊ စာပေလောက တခုလုံး ဆွေးနွေးစရာ၊ အငြင်းပွားစရာ ဖြစ်ခဲ့သည်။ ရောင်းအား အကောင်းဆုံးစာအုပ် အဖြစ် တန်းဝင်ခဲ့သည်။
အဆိုပါ စာအုပ်နှစ်အုပ်ကို ဖတ်ပြီးနောက် နယ်စပ်တွင် ကျန်ရစ်ခဲ့သည် အမျိုးသမီးကို ဖုန်းဆက်လိုက်မိသည်။ အမေရိကားသို့ မလာမှီ မိခင် ရခိုင်ဘာသာစကားနဲ့ အစဉ်အလာ ပညာသင်ကြားမှုကိုပါ ကလေးအား သင်ပေးရန် သတိပေးမိသည်။ အမေရိကားတွင် ကြုံတွေ့နိုင်သည့် သားသမီးသောက အတွက် ကြိုတင်ပြင်ဆင်ရန် သတိပေးမိသည်။
၎င်းစာအုပ်နှစ်အုပ်အား ဖတ်ပြီးသောအခါ အမေရိကန် ပညာရေးကို အထင်ကြီးနေသော စာရေးသူအဖို့ တွေးတောစရာ ဖြစ်လာခဲ့သည်။ အမေရိကန်၏ လူ့အဖွဲ့အစည်း တည်ဆောက်ထားပုံကို စာအုပ်စာပေထဲတွင် ဖတ်ရှုပြီး အဝေးတနေရာက ကြည့်သောအခါ အထင်ကြီး လေးစားစရာအတိပင် ဖြစ်သည်။ သို့ရာတွင် စာရေးသူသည် အမေရိကန် သို့ရောက်ပြီး (၁၀) ခန့်အကြာတွင် လူ့အဖွဲ့အစည်း တည်ဆောက်မှု ပုံသဏ္ဍာန်ကို မျက်မြင် ကိုယ်တွေ့ကြုံရသောအခါ ထိတ်လန့်မိပြန်သည်။ မိတ်ဆွေ၏ ပြောဆိုချက်များသည် မှန်ကန်နေပြီလောဟု စဉ်းစားချင့်ချိန်စရာ ဖြစ်လာသည်။
အမေရိကန် လူ့အဖွဲ့အစည်း ကျဆုံးစရာ အကြောင်းအရာများတွင် မိသားစုပြိုကွဲမှု မြင့်မားလာခြင်းသည်လည်း အကြောင်းအရာတခု အဖြစ်ပါဝင်ကြောင်း ထောက်ပြထားသည်။ လက်ရှိအချိန်တွင် အမေရိကန်တို့၏ မိသားစု ပြိုကွဲမှုသည် အမြင့်ဆုံးတွင် ရှိနေပြီး ၁၈ နှစ်အောက် ကလေးများ၏ ၄၀ ရာခိုင်နှုန်းသည် မိဘနှစ်ပါး ကွာရှင်းမှု အတွေ့အကြုံ ရှိကြောင်း ဖေါ်ပြထားသည်။
မိဘနှစ်ပါးနဲ့ အတူမနေရခြင်းသည် ကလေးငယ်၏ စိတ်ကိုထိခိုက်သည့်အပြင် ကျောင်းစာများတွင် လိုက်နိုင်ခြေ အားနည်းလာခဲ့သည်။ အထူးသဖြင့် မိဘနှစ်ပါးဖြင့် အတူနေရသော ကလေးသည် အိမ်ထောင်ကွဲ မိသားစုမှ လာသည့်ကလေးထက် ပညာရေးတွင် သာကြောင်း ပညာရှင်များ၏ လေ့လာမှုတွင် ဖေါ်ပြထားသည်။ မိဘများနှင့် အတူမနေရသော ကျောင်းနေအရွယ် ကလေးငယ်တို့အဖို့ မူးယစ်ဆေးဝါး သုံးစွဲရန် အလားအလာ တော်တော်များလာသည်ကို တွေ့ရသည်။ ၂၀၁၀ ခုနှစ်အစီရင် ခံစာတခုတွင် အမေရိကန် ကလေးငယ် ခြောက်သန်းကျော်သည် တဦးတည်းသော မိခင်နဲ့ နေထိုင်ရပြီး အဆိုပါ မိခင်မှာ မူးယစ်ဆေးဝါး သုံးစွဲနေသော သူဖြစ်နေသည်ဟု ဖေါ်ပြထားသည်။
အုပ်ထိမ်းမှု ကင်းမဲ့လာခြင်းနှင့် လွတ်လပ်မှု၊ လူ့အခွင့်အရေးရှုထောင့်မှ ထိမ်းကွက်မှုတို့သည် အရွယ်မရောက်မှီ ကိုယ်ဝန်ဆောင်သည့် အရေအတွက် တိုးမြင့်လာစေပြန်သည်။ အမေရိကန် နိုင်ငံ၏ တရားမ၀င် ကလေးမွေးဖွားနှုန်း ငါးဆယ်ရာခိုင်နှုန်းကျော်မှာ အသက်နှစ်ဆယ်အောက် အရွယ်မရောက်မီ မိန်းကလေးတို့မှ မွေးဖွားခြင်း ဖြစ်သည်။ အဆိုပါ ဆိုးကျိုး သံသရာတို့ကို မပြင်နိုင်ပါက အမေရိကားသည် ထိပ်တန်း နိုင်ငံအဖြစ်မှ မကြာမှီလျောကျ နိုင်ဖွယ်ရှိသည်ဟု ထောက်ပြထားခြင်း ဖြစ်သည်။
အထက်ပါစာအုပ်ထဲတွင် အာရှ၏ ပညာရှင် တဆူဖြစ်သော ကွန်ဖြူးရှပ်၏ အတွေးအမြင်များသည် အာရှမှ မိသားစုတခု သိုက်သိုက်ဝန်းဝန်း ဖြစ်စေရန် အထောက်အပံ့ ပေးပုံကို တင်ပြထားသည်။ အနောက်၏ တဦးချင်း လွတ်လပ်မှုနှင့် အာရှ၏ မိသားစုနှောင်ဖွဲ့တို့သည် အရှေ့နဲ့ အနောက်တို့၏ ပြဒါးတလမ်း သံတလမ်းဖြစ်ပုံကို ထောက်ပြထားသည်။
ကွန်ဖြူးရှပ်အယူအဆအရ လူတို့၏ အခြေခံရပ်တည်မှု ဆက်နွယ်ခြင်းကို အချက် (၅)ချက်ဖြင့် ထောက်ပြထားသည်။
(၁) သားနှင့်အဖ ဆက်ဆံရေး (ယုံကြည်မှု)
(၂) ဘုရင်နှင့် ပြည်သူ ( သစ္စာရှိမှု)
(၃) လင်နှင့်မယား ( ထူခြားမှု)
(၄) ကြီးသူနှင့် ငယ်သူ ( နာခံတတ်မှု)
(၅) မိတ်ဆွေ ( အပြန်အလှန် သစ္စာရှိမှု) စသည့်အချက်တို့သည် အရှေ့အနောက်တို့ ကွဲပြားမှုပင် ဖြစ်သည်။
Battle Hymn of The Tiger Mother စာအုပ်တွင် အာရှတိုက်သူ မိခင်၏ သားသမီးအပေါ် ထိမ်းကျောင်းမှုကို ပေါ်လွင်အောင် တင်ပြထားသည်။ အနောက်တိုင်းမိသားစုတို့ လွတ်လပ်မှုကို အခြေခံထားချိန်တွင် အာရှသူ မိခင်များအနေဖြင့် သားသမီးသည် မိဘ၏ လမ်းညွန်ရာကို ကောင်းမွန်စွာ လုပ်ဆောင်တတ်ရမည် ဟူသောအယူ အဆဖြင့် အောင်မြင်သော မိသားစု ဖြစ်လာပုံကို ရေးဖွဲ့ထားပုံသည် တရုတ်လူမျိုးကို အခြေခံရေးသားထားသည် မဟုတ်ဘဲ ကွန်ဖြူးရှပ် အယူအဆ လွမ်းမိုးရာ တရုတ်၊ ကိုးရီးယား၊ ဂျပန် မိခင်တို့၏ အကြောင်း ရေးဖွဲ့ထားဟန် ဖြစ်နေပြန်သည်။
အနောက်တိုင်း လူ့အဖွဲ့အစည်း အနေဖြင့် လွတ်လပ်စွာ ရွှေးချယ်ခွင့်ဖြင့် အကွဲကွဲအပြဲပြဲ ခရီးနှင်နေချိန်တွင် အေမီချွှန်သည်သူမ၏ သမီးနှစ်ဦးအပေါ်တွင် ပြင်းထန်သော ဖိအားပေးမှု အာရှ၏ဓလေ့ဖြင့် မောင်းနှင်ခဲ့ရာ အရာရာတွင် အောင်မြင်သော သမီးနှစ်ဦးဖြစ်လာပုံသည် အနာက်မိခင်များအတွက်၊ လူ့အဖွဲ့အစည်းအတွက် လေ့လာစရာ ဖြစ်လာခဲ့သည်။ အေမီချွန်းသည် သူမ၏ ချစ်လှစွာသော သမီးနှစ်ဦးကို စစ်တပ်ကဲ့သို့ အာဏာရှင် ဆန်ဆန် အမိန့်ပေးခဲ့းသည်။
(၁) အလွန်အကျူး အိပ်ခွင့်မရှိ
(၂) ကစားရက် သီးသန့်မရှိ
(၃) ကျောင်းအားကစားတွင် မပါဝင်ရ
(၄) အားကစားတွင် မပါဝင်ရသည့်အတွက် ဆင်ခြေမတက်ရ
(၅) တီဗီ၊ ကွန်ပျူတာ ဂိမ်းဆော့ခြင်း ခွင့်မပြု
(၆) ကျောင်းပြင်ပ ပါဝင်လှုပ်ရှားမှုကို ခွင့်မပြု
(၇) အတန်းတွင် အဆင့် A ထက် မလျော့ရ
(၉) စန္ဒယားနဲ့တယောမှ လွဲရ်ျ မည်သည့် တူရိယမျှ မတီးရ
(၁၀) မိတ်ဆွေများအိမ်တွင် မအိပ်ရ စသည်တို့သည် အာရှမိခင်တဦး၏ အာဏာရှင်သော သားသမီး ထိမ်းကျောင်းမှု ပင်ဖြစ်သည်။
အာရှ၏ ဓလေ့အရ ငယ်သူသည် ကြီးသူ၏ အမိန့်ကို နာခံရမည် ဆိုသောဓလေ့သည် အနောက်ကမ္ဘာတွင် နေထိုင်သည့် အာရှသား မြန်မာတို့အတွက် လေ့လာစရာ အတူယူစရာ ပင်ဖြစ်သည်။ အမေရိကားတွင် ကြီးပြင်းလာသော ကလေးငယ်အဖို့ လွတ်လပ်မှု အခြေခံ အမေရိကန် ယဉ်ကျေးမှုသည် သရေကျစရာ ကောင်းလှပေသည်။
အနောက်တိုင်း မိဘများသည် သူတို့၏ သားသမီးများအပေါ် အလိုလိုက်မှု များလွန်းခြင်း၊ ကလေး၏ ရွေးချယ်ခွင့်ကို မိဘများက ၀င်ရောက် စွက်ဖက်ပိုင်ခွင့် မရှိခြင်း စသည်တို့သည် အမေရိကန် ကလေးတို့၏ ပညာရေးစွမ်းရည် နိမ်းကျလာမှုတွင် အဓိက ပါဝင်နေသည်ဟု ထောက်ပြထားပြန်သည်။ စိတ်ပညာ အလိုအရ ကလေးများသည် မည်သည့်အရာကိုမှ လေးနက်စွာ လုပ်လိုစိတ် မရှိသည့်အတွက် တိုးတက်ရေးတွင် မိဘများ အရေးကြီးပုံကို စာရေးသူ အေမီချွန်း စောဒက တက်ထားပြန်သည်။
အမေရိကန် နိုင်ငံသားအဖြစ် ခံယူထားသူ ရခိုင်လူမျိုး စာရေးဆရာ ကိုခိုင်လင်းနဲ့ အာရှယဉ်ကျေးမှု၊ မိသားစုတန်ဖိုးကို ပြောဖြစ်ခဲ့သည်။ သူသည် အမေရိကန်နိုင်ငံသား တဦးဖြစ်သော်လည်း ရခိုင်လူမျိုး ဖြစ်သည့်အတွက် ရခိုင်ယဉ်ကျေးမှု အစဉ်အလာကို သားသမီးသုံးဦးအပေါ် အခွင့်သာတိုင်းပြောဖြစ်ခဲ့သည်၊ ယဉ်ကျေးမှု ဓလေ့ကို လေ့ကျင့်ပေးခဲ့သည်ဟု ပြောပြန်သည်။ ဆီနှင့်ရေတို့၏ မတူညီမှုကို ဥပမာပေးကာ ပြောပြခဲ့သည်။
“ပုလင်းတလုံးထဲ ထည့်ထားတဲ့ ဆီနဲ့ရေ ဥပမာလိုဘဲ အနောက်တိုင်း ယဉ်ကျေးမှုနဲ့ ရခိုင်ယဉ်ကျေးမှုက အတူတူ ထင်ရပေမယ့် ကွာပါတယ်၊ ကျနော်တို့က ခြားနားတဲ့ ယဉ်ကျေးမှုသဘောကို မိဘများကိုယ်တိုင်က ခံယူထားပါတယ်” လို့ပြောပြခဲ့သည်။ မိသားစုစည်းနှောင်မှု၊ မိဘများမှ သင်ပြပေးမှု၊ မကောင်းမှုရှောင်၊ ကောင်းမှုဆောင်ကို မိဘများက သင်ပြပေးမှု၊ သားသမီးများမှလည်း မိဘများ၏ ဆိုဆုံးမမှုကို နာခံတတ်အောင် သင်ပြထားခြင်းသည် အနောက်ယဉ်ကျေးမှုကြားတွင် အာရှ၏ တန်ဘိုးများကို အထင်ကြီး လေ့လာစရာ အဖြစ်ထင်ကျန်ရစ်စေပြန်သည်။
အထက်ပါ စာအုပ် နှစ်အုပ်သည် နိုင်ငံရေး၊ လူမှုရေး၊ စီးပွားရေး၊ ပညာရေးကို စိတ်ဝင်စားသူ မြန်မာလူမျိုးတိုင်း အရှေ့နဲ့ အနောက်တို့၏ မတူညီရာ ယဉ်ကျေးမှုကြားက မှတ်သားဖွယ်ရာ၊ နိုင်ငံ့အတွက် အကျိုး ဖြစ်ထွန်းစရာ များများ ပါဝင်သော ယဉ်ကျေးမှုဆိုင်ရာ ထိပ်တိုက်တွေ့မှု၊ ကျဆုံးခြင်းနှင့် တိုးတက်မှုကြားက မျဉ်းဖြောင့် သေးသေးလေးကို မပီဝိုးတ၀ါး မြင်နိုင်မည်ဟု ယူဆ မိသကဲ့သို့ အနောက်တိုင်း ပညာရေးစနစ် Critical Thinking နှင့် ကွန်ဖြူးရှပ်၏ ထပ်ခါတလဲလဲ ကျက်မှတ်သည့် ပညာရေးစနစ်တို့ အားစမ်းသည့် ပွဲနီးကပ်လာပြီလားဟု တွေးချင့်စရာ။
လှရွှေ
(တရုတ်-ကနေဒါ ကပြားဖြစ်တဲ့ ပန်းချီဆရာ လီရိ ရေးဆွဲထားတဲ့ ဘေဂျင်း ၂၀၀၈ ဆိုတဲ့ ပန်းချီကားဟာ အတွေးပေါင်းများစွာကို လှူပ်နှိုးပေးနိုင်စွမ်းလို့ ဆောင်းပါး၏ အတွေး ပန်းချီအဖြစ် တင်ပေးလိုက်ပါတယ်။ )
0 comments:
Post a Comment