ပုရွက်ဆိတ်နှင့် နှံကောင်

by ကျွန်တော်ဖတ်ချင်သော ပုံပြင်များ on Sunday, October 23, 2011 at 9:21pm

တစ်ခုသော နွေဦးရာသီ၊ ကမ္ဘာမြေပြင်

နှံကောင်ဟာ မြက်ခင်းပေါ်မှာ ကခုန်နေတယ်။ အဲဒီအချိန်မှာ အစာစုဆောင်းရေး လုပ်နေတဲ့ ပုရွက်ဆိတ်နဲ့တွေ့တယ်။

နှံကောင်။ ။ ဟိုင်း၊ ကိုပုရွက်ဆိတ်... ဘယ်သွားမလို့လဲဗျ

ပုရွက်ဆိတ်။ ။ ဟာ... အိမ်ပြန်မလို့ပေါ့ဗျ ကိုနှံကောင်ရ

နှံကောင်။ ။ ခင်ဗျားနှယ် အလေးကြီးတွေ ထမ်းပြီးတော့ဗျာ...။ ပင်ပန်းပါသဘိဗျာ၊

ပုရွက်ဆိတ်။ ။ ဟားဟား... ချွေတာစုဆောင်း သူဌေးလောင်းတဲ့


နှံကောင်။ ။ ဟုတ်ပါပြီဗျာ... ပျော်ပျော်နေ သေခဲ ဆိုတာလည်း မေ့မထားနဲ့နော်ဗျ...။
.......................................................................

တစ်ခုသော မိုးရာသီ၊ ကမ္ဘာမြေပြင်

ဒေါက်၊ ဒေါက်၊ ဒေါက်...

မိုးသံတဖြောက်ဖြောက်ကြားမှာ သစ်ခေါင်း တံခါးကို အတင်းလာခေါက်နေသံကြားတာကြောင့် ပုရွက်ဆိတ်ခမျာ တံခါးကို ထဖွင့်ရတော့တယ်။

ပုရွက်ဆိတ်။ ။ အော်... ဘယ်သူများ မှတ်တယ်။ ကိုနှံကောင်ကိုး...

နှံကောင်။ ။ ဟုတ်ပါတယ်... ကျုပ် အခုစားစရာ ပြတ်နေလို့ နည်းနည်းလောက် ဖြစ်ဖြစ်...

ပုရွက်ဆိတ်။ ။ ဒါကြောင့် ခင်ဗျားကို ကျုပ်မပြောဘူးလား... ချွေတာပါ၊ စုဆောင်းပါ ဆိုတာ။

နှံကောင်။ ။ ဟုတ်၊ ဟုတ်ပါတယ်ဗျာ။ ခု အရမ်းဗိုက်ဆာလို့ စားစရာ နည်းနည်းလောက်ဖြစ်ဖြစ်

ပုရွက်ဆိတ်။ ။ တော်တော်... မပေးနိုင်ဘူး၊ ကိုယ့်ဘာသာ ဆက်ကနေပါလားဗျ...

ပုရွက်ဆိတ်ကမောင်းထုတ်လိုက်သဖြင့် နှံကောင်မှာ ဝမ်းနည်းပက်လက်နှင့် ထွက်ခွာလာရတော့သည်။
.......................................................................

တစ်ခုသော ညနေ၊ ကောင်းကင်ဘုံစစ်ဆေးရေးဌာန

နှံကောင်နဲ့ ပုရွက်ဆိတ်ဟာ တောမီးလောင်တာကြောင့် နှစ်ကောင်လုံး မီးသင့်သေဆုံးပြီး ကောင်းကင်ဘုံရဲ့ စစ်ဆေးရေးဂိတ်ကို ရောက်လာတယ်။ တာဝန်မှူးက သူတို့တွေ ကမ္ဘာမြေပြင်မှာ အသက်ရှင်တုန်းက အဖြစ်အပျက်တွေကို စာအုပ်ထဲမှာ ဖတ်ပြီးစစ်တယ်။

စစ်ဆေးရေးမှူး။ ။ ဟို နှံကောင် ဒီရှေ့လာ

နှံကောင်။ ။ ဟုတ်ကဲ့ပါခင်ဗျာ

စစ်ဆေးရေးမှူး။ ။ သင်ဟာ ကမ္ဘာမြေပြင်မှာ အသက်ရှင်တုန်းက အလုပ်ကို မကြိုးစားဘူး။ အပျော်အပါးပဲ လိုက်စားခဲ့တယ်။ ဒါကြောင့် သင်နဲ့ ကောင်းကင်ဘုံနဲ့ မထိုက်တန်ဘူး။ ငရဲပြည်သွားရမယ်။

နှံကောင်။ ။ ဗျာ...

စစ်ဆေးရေးမှူး။ ။ မဗျာနဲ့၊ မင်း ဟိုမှာပြန်ထိုင်... ဟိုကောင် ပုရွက်ဆိတ် ဒီရှေ့လာခဲ့။

ပုရွက်ဆိတ်။ ။ ဟုတ်ကဲ့

စစ်ဆေးရေးမှူး။ ။ ပုရွက်ဆိတ်... မင်းကတော့ လူ့ပြည်မှာ အလုပ်လုပ်ခဲ့တယ်။ ကြိုးစားခဲ့တယ်။ ရှာဖွေခဲ့တယ်။

ပုရွက်ဆိတ်။ ။ ဟုတ်ပါတယ်။ အမှန်ပါပဲ။

စစ်ဆေးရေးမှူး။ ။ ဒါပေမဲ့လည်း သင်ဟာ လောဘကြီးစွာနဲ့ ရှာဖွေခဲ့တယ်။ သူတပါးကို ပေးကမ်းစွန့်ကြဲဖို့လည်း မေ့ခဲ့တယ်။ အတ္တကြီးခဲ့တယ်။ ဒါကြောင့် သင်လည်းပဲ ကောင်းကင်ဘုံနဲ့ မထိုက်တန်ဘူး။ သွားငရဲပြည်ကို...

ပုရွက်ဆိတ်။ ။ ဗျာ...
......................................................................

ပုံပြင်လေးက ဒါပါပဲ။ ယုံချင်ယုံ၊ မယုံချင်နေပါ။


မေတ္တာဖြင့်
ဟန်သစ်ငြိမ်