07.02.2012 နေ့ဖတ်ရန်သတင်းများ

by Myanmar Journal on Tuesday, February 7, 2012 at 11:21am

 

 
အမေရိကန် ပိတ်ဆို့မှု တခု ဒီနေ့ ရုပ်ပေး

နိုင်ငံတကာ ဘဏ္ဍာရေး အဖွဲ့အစည်းတွေဆီက အကူအညီ ရဖို့ အခွင့်အလမ်းတွေ ပေါ်လာ
မြန်မာနိုင်ငံပေါ် အမေရိကန် ပိတ်ဆို့ အရေးယူ ထားတာ အများအပြား ရှိတဲ့အနက် တခုကို ဒီနေ့ ရုပ်သိမ်း ပေးမယ်လို့ အေပီ သတင်းမှာ ဖော်ပြထားပါတယ်။
အဲဒီ ပိတ်ဆို့ အရေးယူမှု ကတော့ အမေရိကန် အစိုးရရဲ့ လူကုန်ကူးမှု တိုက်ဖျက်ရေး ဥပဒေအရ မြန်မာနိုင်ငံပေါ် အမေရိကန် ထောက်ပံ့မှုရှိတဲ့ အဖွဲ့အစည်း တွေကနေ ငွေကြေး ကူညီ ထောက်ပံ့ ချေးငှားတာတွေ လုပ်လို့ မရအောင် ပိတ်ဆို့ထားတဲ့ ဥပဒေ ဖြစ်ပါတယ်။

ဒီဥပဒေကို ရုပ်သိမ်းခဲ့ရင် မြန်မာနိုင်ငံဟာ ကမ္ဘာ့ဘဏ်နဲ့ နိုင်ငံတကာ ဘဏ္ဍာရေး အဖွဲ့အစည်း တွေဆီက ငွေကြေးအကူအညီ ရယူနိုင်ဖို့ အခွင့်အလမ်းတွေ ပေါ်ထွက်လာမှာ ဖြစ်ပါတယ်။
တခြား ပိတ်ဆို့မှုတွေကတော့ ကျန်ရှိနေဆဲ ဖြစ်ပါတယ်။
ဒီပိတ်ဆို့ အရေးယူမှု ရုပ်သိမ်းချက်ကို ဒီနေ့ပဲ နိုင်ငံခြားရေး ဝန်ကြီး မစ္စစ် ကလင်တန်က လက်မှတ်ထိုး လိမ့်မယ်လို့ အေပီသတင်းမှာ ဖော်ပြထားပါတယ်။

ဆီးရီးယား ကိစ္စ ဗီတို သုံးခဲ့မှု ကို တရုတ် က ခုခံကာကွယ်
ဆီးရီးယား အရေး ကို လျှစ်လျူရှု နေလို့ အတိုက်အခံ တွေ က ပြော
ဆီးရီးယားနဲ့ ပတ်သက်တဲ့ ကုလသမဂ္ဂ ဆုံးဖြတ်ချက်ဟာ မူကြမ်း အပေါ် ကုလသမဂ္ဂ လုံခြုံရေး ကောင်စီ အဖွဲ့ဝင် နိုင်ငံတွေကြား သဘောတူညီမှု မရခင် မဲခွဲခဲ့ကြ တာကြောင့် သူတို့အနေ နဲ့ ဗီတို သုံးခဲ့တာလို့ တရုတ်တို့ က ပြောပါတယ်။
အဲဒီ ဆုံးဖြတ်ချက် ကိုသာ အတည်ပြုခဲ့မယ် ဆိုရင် ဆီးရီးယားရဲ့ အခြေအနေကို ပိုရှုတ်ထွေး စေလိမ့်မယ် လို့ တရုတ် နိုင်ငံခြားရေး ဌာန ပြောခွင့်ရသူက ပြောပါတယ်။
ကုလသမဂ္ဂ ကနေ ဆီးရီးယားသမ္မတ ကို ရာထူး ကဆင်းပေးဖို့ တောင်းဆိုထားတဲ့ ဆုံးဖြတ်ချက်ကို တရုတ်တင်မကပါဘူး ရုရှတို့ကပါမကျေမနပ် တုံ့ပြန်မှုတွေနဲ့ ဗီတို သုံး ပယ်ချ ခဲ့တာပါ။
ဒီလို တရုတ်ရုရှ နှစ်နိုင်ငံ ဗီတိုသုံးခဲ့တာကြောင့် အထူးသဖြင့် အနောက်အုပ်စုနဲ့ ဒီ ၂ နိုင်ငံ အကြား သံတမန်ရေး အဆင်မပြေမှုတွေ ဖြစ်ခဲ့ ရပါတယ်။
အခုတော့ တရုတ်တို့ က သူတို့ ဘာကြောင့် ဗီတို သုံးရတယ် ဆိုတာကို ရှင်းပြခဲ့ ပါတယ်။
တရုတ်အစိုးရ အနေနဲ့ ဆီးရီးယားမှာ လက်နက်ကိုင် ပဋိပက္ခတွေ နဲ့ စစ်ပွဲတွေ ဖြစ်လာမှာကို ရှောင်ရှားလို့တဲ့ ဆန္ဒရှိတယ်လို့ တရုတ် နိုင်ငံခြားရေးဌာန ပြောခွင့်ရ ပုဂ္ဂိုလ် က ပြောပါတယ်။
တရုတ်တို့ အနေနဲ့ ဆုံးဖြတ်ချက်မူကြမ်း ရေးဆွဲရာမှာ ပါဝင် ပတ်သက်ခဲ့ပေမယ့် နောက်ဆုံး မှာ လုံခြုံရေး ကောင်စီဝင်တွေ အကြား သဘောထားကွဲလွဲမှု အများအပြား ရှိနေ ခဲ့ကြ တယ် လို့ ဆိုပါတယ်။
ကုလသမဂ္ဂ ဆုံးဖြတ်ချက် အပေါ် တရုတ်တို့ ဗီတိုသုံးပယ်ချခဲ့တာဟာ တာဝန်မဲ့ လုပ်ရာကျ တယ်ဆိုတဲ့ ပြောဆိုမှုတွေကိုလည်း တရုတ်နိုင်ငံခြားရေးဌာန ပြောခွင့်ရ ပုဂ္ဂိုလ်က ခုခံ ပြောဆိုခဲ့ပြီး ဒီလို စွပ်စွဲ ပြောဆိုမှုတွေကို လက်မခံဘူးလို့ ဆိုပါတယ်။
တရုတ်တို့ အနေနဲ့ ကာလ ကြာရှည်စွာ ကတည်းက တခြားနိုင်ငံတွေရဲ့ ပြည်တွင်းရေးကို ဝင်မစွက်ရေး ဆိုတဲ့မူကို ကိုင်စွဲ နေခဲ့တာ ဖြစ်ပါတယ်။
ဒါပေမယ့် တရုတ် တို့ရဲ့ အင်အား နဲ့ သြဇာ ကြီးထွား လာတာ နဲ့အမျှ နိုင်ငံတကာ အသိုင်းအဝိုင်းမှာ သူတို့ အပေါ်ထားတဲ့ မျှော်လင့်ချက်တွေ ပိုများ လာခဲ့တယ်။
ဒါကြောင့်လည်း အခုလို ဆီရီးယားကိစ္စ ကုလသမဂ္ဂ ဆုံးဖြတ်ချက်ကို ဗီတို သုံးခဲ့တာ နဲ့ပတ်သက်လို့ တရုတ်တို့အနေနဲ့ အကြီးအကျယ် ဝေဖန်မှုတွေကို ရင်ဆိုင် နေရတာ ဖြစ်တယ် လို့ ဘီဘီစီ သတင်းထောက် Michael Bristow ဘေဂျင်း ကနေ သတင်း ပေးပို့ထား ပါတယ်။

ဆီးရီးယား တိုက်ပွဲများ ပိုမိုပြင်းထန်
ဆီးရီးယား အစိုးရက လက်နက်ကြီးတွေနဲ့ ပြင်းပြင်းထန်ထန်တိုက်ခိုက်ခဲ့ပါတယ်
ဆီးရီးယား သမ္မတ ဘယ်ရှာအယ်လ် အာဆတ်ဒ် ကို ဆန့်ကျင်ဆန္ဒပြုသူတွေရဲ့ အဓိကနေရာဖြစ်တဲ့ ဟုမ်းစ်မြို့ကို ဆီးရီးယား အစိုးရက ဗုံးကြဲ တိုက်ခိုက်မှု တွေ တိုးမြှင့် လုပ်ဆောင် နေပါတယ်။
ဟုမ်းစ် မြိုခံတဦး ဖြစ်တဲ့ အိုမာ က သေနတ်သံ တွေ ဗုံးသံတွေ ကြားကနေ ကျွန်တော်တို့နဲ့ အခု ဘယ်သူမှမရှိတော့ဘူး။
ကုလသမဂ္ဂ ကလည်း ထားခဲ့ပြီ၊ သမ္မတ ဘယ်ရှာ အာဆတ်ဒ် ကို ကြိုက်သလိုလုပ်ဖို့ အချိန်တွေ ပိုပြီးပေးလိုက်ပြီ လို့ သတင်းပေးပြောပြခဲ့ပါတယ်။
အတည်မပြုနိုင်သေးတဲ့ သတင်း ထုတ်ပြန်ချက်တွေ အရ မြို့တော်အနီး ဘာဘာ အာမာ အရပ်မှာ ရှိတဲ့ ဆေးရုံတခုကို အမြောက်ကျည်တွေ ထိမှန်ခဲ့တယ်လို့ သိရပါတယ်။
အစိုးရဆန်ကျင့်ရေးတက်ကြွလှုပ်ရှားသူတွေက အဲဒီ့နေရာတွေဟာ အစိုးရရဲ့ လက်နက်ကြီး တွေ အဓိကထားတဲ့ ပစ်မှတ် တစ်နေရာ ဖြစ်တယ်လို့ ပြောပါတယ်။
ဟုမ်းစ် မြို့အတွင်းရောက်ရှိနေတဲ့ ဘီဘီစီ သတင်းထောက်ကတော့ တိုက်ခိုက်မှုတွေ ပိုမို ပြင်းထန်လာတယ် လို့ သတင်းပေးပို့ခဲ့ပါတယ်။

သေနတ်ပေးပြီး ကျည်ဆံမပေးတဲ့ ဥပဒေတွေ
တောင်သူလယ်သမား သမဂ္ဂ၊ အလုပ်သမား သမဂ္ဂနဲ့ ကျောင်းသား သမဂ္ဂ အစရှိတဲ့ အသင်းအပင်းတွေ ဖွဲ့စည်းဖို့အတွက်မှာ ဥပဒေတချို့ကို လွှတ်တော်က သတ်မှတ်ပြဌာန်းပြီး ဖြစ်ပေမယ့် နည်းဥပဒေတွေ ထုတ်ပြန်ဖို့ ချန်ထားတာကြောင့် အကောင် အထည် ဖော်ဖို့ ထိရောက်မှု မရှိ ဖြစ်နေတယ်လို့ အမျိုးသား ဒီမိုကရေစီ အဖွဲချုပ် ခေါင်းဆောင်တဦးက ထုတ်ပြောလိုက် ပါတယ်။
သေနတ်ပေးပြီး ကျည်ဆံမပေးတဲ့ ဥပဒေတွေလို့ ဝေဖန်လိုက်တဲ့ ဗိုလ်ချုပ်ကြီးဟောင်း ဦးတင်ဦး
စစ်သားစကားနဲ့ ပြောရရင် သေနတ်ပေးပြီး ကျည်ဆံမပေးသလို ဖြစ်နေတယ်လို့ နည်းဥပဒေတွေ သွက်သွက် မထုတ်တာနဲ့ ပတ်သက်လို့ အမျိုးသား ဒီမိုကရေစီ အဖွဲ့ချုပ် NLD ပါတီ သဘာပတိအဖွဲ့ နာယက ဗိုလ်ချုပ်ကြီးဟောင်း သူရ ဦးတင်ဦးက ဘီဘီစီကို ပြောပါတယ်။
အလုပ်သမားသမဂ္ဂတွေ ဖွဲ့စည်းနိုင်ဖို့အတွက် နိုင်ငံတကာ အလုပ်သမား အဖွဲ့ချုပ် ILO နဲ့ ပူးပေါင်း လုပ်ကိုင်ထားတဲ့ ဥပဒေတွေ ရှိပေမယ့်လို့ နည်းဥပဒေတွေ ထုတ်ပြန်ဖို့ ကျန်နေပါသေးတယ်။
ပြီးခဲ့တဲ့ ဇန်နဝါရီ ၁၃၊ သောကြာနေ့မှာ နိုင်ငံရေးအကျဉ်းသားတွေ ပြန်လွှတ်ပေးခဲ့တာကိုတော့ ဦးတင်ဦးက ကြိုဆိုခဲ့ ပါတယ်။
တိုင်းရင်းသား ခေါင်းဆောင်တွေ၊ ကျောင်းသား ခေါင်းဆောင်တွေနဲ့ NLD က နိုင်ငံရေး အကျဉ်းသားတွေ တော်တော် များများ ပါလာပေမယ့် ၃၀၀ ကျော် ၄၀၀ လောက် ကျန်နေသေးတောကြောင့် NLD အနေနဲ့ ပြည်ထဲရေး ဝန်ကြီးဌာနကို နိုင်ငံရေး အကျဉ်းသားစာရင်း ဆက်လက် တင်ပြလို့ ညှိနှိုင်း ဆောင်ရွက်သွားဖို့ ရှိတယ်လို့လည်း ဦးတင်ဦးက ပြောပါတယ်။
ဒေါ်အောင်ဆန်းစုကြည် မန္တလေးဘက်ကို ပါတီ စည်းရုံးရေး ခရီးထွက်ဖို့ အခုလ ၄ ရက်နဲ့ ၅ ရက်တွေမှာ ကြိုတင် စီစဉ် ထားခဲ့ပေမယ့် နေရာ မရ ဖြစ်ခဲ့တာကိုတော့ အံ့သြမိတယ်လို့ ဗိုလ်ချုပ်ကြီးဟောင်း သူရ ဦးတင်ဦးက ပြောပါတယ်။
တိုးတက်တာတချို့ ရှိခဲ့တယ်၊ နိုင်ငံတော် သမ္မတ ဦးသိန်းစိန်နဲ့ အမျိုးသား ဒီမိုကရေစီ အဖွဲ့ချုပ် ဥက္ကဌ ဒေါ်အောင်ဆန်းစုကြည် တို့ကြား အလုပ်ဖြစ်တဲ့ ဆွေးနွေးမှုတွေ ရှိပေမယ်လို့ အခုလို နိုင်ငံရေး သမားတဦးက ပြည်သူတွေ နဲ့တွေဖို့၊ နိုင်ငံရေး စကားပြောဖို့ နေရာ မရတာကတော့ သူ အံ့သြတယ်လို့ ဦးတင်ဦးက ဘီဘီစီကို ပြောခဲ့ပါတယ်။

လှိုင်သာယာ မှာ မီးလောင်လို့ အိမ်ခြေ ၄၀၀ နီးပါး ဆုံးရှုံး
လှိုင်သာယာ မီးလောင်မှုကြောင့် အိမ်ခြေ ၄၀၀ နီးပါး မီးလောင် ဆုံးရှုံး
ရန်ကုန်တိုင်းဒေသကြီး လှိုင်သာယာမြို့နယ် ပဒုမ္မာလမ်းအလယ်ရွာမှာ မီးလောင်မှုတခု ဖြစ်ပွား ခဲ့ပါတယ်။
အသုတ်စုံရောင်းတဲ့ နေအိမ်ကနေ မီးစတင် လောင်ကျွမ်းခဲ့ပြီး အိမ်ခြေ(၄၀၀) နည်းပါးမီး လောင်ဆုံးရှုံး သွားခဲ့ပါတယ်။
ဒီမီးလောင်မှုကို မြို့နယ်မီးသတ်အဖွဲ့က အတည် ပြုပြောကြားခဲ့ပြီး ဆုံးရှုံးမှု အခြေအနေ တန်ဖိုး ကိုတွက်ချက်နေတုန်းပဲ လို့ သိရပါတယ်။
တနင်္လာနေ့ နေ့လည် ၁၂နာရီကျော်က စတင်လောင်ကျွမ်း ခဲ့တဲ့မီးကို နေ့လည် ၁နာရီ ခွဲအချိန်လောက်မှာ ငြိမ်းနိုင် ခဲ့ကြ ပါတယ်။
မီးလောင်မှု ဖြစ်ပွားခဲ့တဲ့ နေရာအနီးက ဘုန်းကြီးကျောင်းက ကျောင်းထိုင်ဘုန်းကြီးအပါ အဝင် စာသင်သံဃာ အပါး တစ်ထောင်ကျော် နဲ့ မိဘမဲ့ လူငယ်တွေက အနားမှာ ရှိတဲ့ ရေကန် ကြီးထဲက ရေတွေ သယ်ကာ ဝိုင်းပြီးကူညီ ငြိမ်းသတ်ခဲ့လို့ လည်း အတော် သက်သာ ခဲ့တာ ဖြစ်ပါတယ်။
မီးဘေး ဒုက္ခသည်တွေကို အောင်ဇေယျာမင်း ဘုန်းကြီးကျောင်း နဲ့ ဓမ္မာရုံမှာ နေရာချ ထားပေး ပြီး မြို့နယ် အုပ်ချုပ်ရေးမှူး၊ မီးသတ်အဖွဲ့ဝင်တွေ၊ ကြံခိုင်ရေး နဲ့ ဖွံ့ဖြိုးရေး ပါတီ နဲ့ NLD ပါတီ ဝင်တွေက မီးဘေး ကယ်ဆယ်ရေး လုပ်ငန်း တွေမှာ ကူညီ လုပ်ဆောင် ပေးနေတယ် လို့ သိရ ပါတယ်။

လှိုင်သာယာ စက်မှုဇုံ အလုပ်သမား ၂၀၀၀ ကျော် ဆန္ဒပြ
မြန်မာပြည်မှာ အလုပ်သမားအခွင့်အရေးတွေ ဆုံးရှုံးနေတယ်လို့ ဝေဖန်မှုတွေရှိနေ
လှိုင်သာယာ စက်မှုဇုံ (၃) က တိုင်ရီ ဖိနပ် စက်ရုံမှာ အလုပ်သမား (၂၀၀၀) ကျော် တနင်္လာနေ့ မနက် က စက်ရုံအပြင်မှာ ထိုင်ပြီး ဆန္ဒပြခဲ့ကြ ပါတယ်။
ပြီးခဲ့တဲ့ ဇန်နဝါရီလ လုပ်ခလစာထဲက တစ်သောင်းကျော်စီ ဖြတ်တောက်ခံရတာကို မကျေနပ်လို့ အလုပ်သမားတွေက အခုလို ဆန္ဒပြကြတာပါ။
ပြီးခဲ့တဲ့လက တရုတ်နှစ်သစ်ကူးအပါအဝင် အလုပ်ပိတ်ရက် (၁၀) ရက်ကျော် ရှိခဲ့တဲ့အတွက် အခုလိုဖြတ်တောက်ခဲ့တာဖြစ်တယ်လို့ တရုတ်လူမျိုး စက်ရုံပိုင်ရှင်တွေက ပြောကြောင်းသိရပါတယ်။
မြန်မာနိုင်ငံ အလုပ်သမားအက်ဥပဒေ အရ အလုပ်ရှင်ရဲ့ဆန္ဒနဲ့အလုပ်ပိတ်တာကို အလုပ် သမားတွေရဲ့ ခွင့်ရက်အနေနဲ့ သတ်မှတ်လို့မရဘူးလို့ အလုပ်သမား အခွင့်အရေးနဲ့ ရပိုင်ခွင့် တွေကို လှုပ်ရှားဆောင်ရွက် နေတဲ့ လှိုင်သာယာ စက်မှုဇုံက ဦးသန်းက ဘီဘီစီကို ပြောကြား ခဲ့ပါတယ်။
ဒီလိုပဲ တခြား စက်ရုံ တွေမှာ လည်း အလုပ်ရှင်နဲ့ အလုပ်သမားအကြား လုပ်ခလစာနဲ့ ပတ်သက်ပြီး အဆင်မပြေမှု တွေရှိတယ်လို့ ဦးသန်း က ဆက်လက် ပြောကြား ခဲ့ပါတယ်။

ပြည်ထောင်စု ငြိမ်းချမ်းရေးအဖွဲနဲ့ KNPP ဆွေးနွေး
ဆွေးနွေးပွဲ အဖွဲ့ခေါင်းဆောင် မီးရထားဝန်ကြီး ဦးအောင်မင်း
ပြည်ထောင်စုအဆင့် ငြိမ်းချမ်းရေးအဖွဲ့ ခေါင်းဆောင် ရထားဝန်ကြီး ဦးအောင်မင်း နဲ့ KNPP ကရင်နီ တိုးတက်ရေး ပါတီ တို့ ချင်းမိုင် မှာ တွေ့ဆုံပြီး အပစ်အခတ် ရပ်စဲရေးအတွက် နေရာ နဲ့ နေ့ရက်တို့ကို ဆွေးနွေး ကြတယ်လို့ KNPP အတွင်းရေးမှူး ဦးခူးဦးရယ်က ဘီဘီစီကို ပြောပါတယ်။
လာမယ့်မတ်လဆန်းပိုင်းမှာ လွိုင်ကော်မှာ ဆက်လက် ဆွေးနွေးဖို့များတယ်လို့သူက ဆိုပါတယ်။
အဲဒီဆွေးနွေးပွဲမှာ အပစ်ရပ်ရေး လက်မှတ်ရေးထိုးဖို့ အစိုးရဘက်က မျှော်လင့်နေပါတယ်။
အခုအခါ တဖက်နဲ့တဖက် ကြိုးကြား တိုက်ခိုက်မှု အချို့ရှိနေပြီး မြန်မာ အစိုးရ တပ်တွေရဲ့ လှုပ်ရှားမှု ရှိတယ်လို့လည်း သူကဆက်ပြောပါတယ်။
အခုငြိမ်းချမ်းရေး ဆွေးနွေးမယ့် ကိစ္စမှာတော့ KNPP ထဲမှာ တသဘောထဲ ရှိကြတယ် လို့ ပြောပါတယ်။
ဦးအောင်မင်းနဲ့ အဖွဲ့ဟာ NLD LA အမျိုးသားဒီမိုကရေစီ အဖွဲ့ချုပ် လွတ်မြောက်နယ်မြေ နဲ့ FDB မြန်မာနိုင်ငံ ဒီမိုရက်တစ်အင်အားစု တွေ နဲ့ လည်း သီးခြားစီ တွေ့ဆုံ ခဲ့ပါတယ်။
အဲဒီလိုတွေ့ဆုံရာမှာ ပြည်တွင်း က နိုင်ငံရေး ဖြစ်ပေါ်တိုးတက်မှုတွေအတွက် နှစ်ဖက် အမြင်တွေ ဖလှယ်ခဲ့တယ် လို့ NLD LA ဗဟိုအလုပ်အမှုဆောင် ဦးမိုးဇော်ဦး က ပြော ပါတယ်။
ဒါ့အပြင် ပြည်ပအခြေစိုက် သတင်းဌာနတွေဖြစ်ကြတဲ့ ဧရာဝတီ၊ မဇ္ဇျိမ ၊ ဒီဗွီဘီ စတဲ့ သတင်းဌာနက တာဝန်ရှိသူတွေ နဲ့ လည်း ဦးအောင်မင်းက တွေ့ဆုံပြီး လက်ရှိ နိုင်ငံရေး အခြေအနေ တွေကို ပြောပြ ခဲ့ ပါတယ်။

ဖာတာခေါင်းဆောင် မာမွတ်အဘားစ်ဟားမတ်စ်၊ ဖာတာ သဘောတူညီချက် အစ္စရေး မလိုလား
အနောက်ဘက်ကမ်းနဲ့ ဂါဇာမှာ လုပ်မယ့် ရွေးကောက်ပွဲတွေကို စီစဉ်မယ့် ကြားဖြတ်အစိုးရကို ဖာတာ ခေါင်းဆောင် သမ္မတ မာမွတ် အာဘတ်စ်က ခေါင်းဆောင်ဖို့ ဖာတာနဲ့ ဟားမတ်စ် ပါလက်စတိုင်း အုပ်စုကြီး ၂ ခုက သဘောတူလိုက်ကြပြီ ဖြစ်ပါတယ်။
သမ္မတ အာဘတ်စ်နဲ့ ဟားမတ်စ် ခေါင်းဆောင် ခါလတ် မာရှဲတို့ အကြား ညှိနှိုင်း စီစဉ်ခဲ့တာပါ။
အနောက်ဘက်ကမ်းကို ဖာတာက ထိန်းချုပ်ထားပြီး ၂၀၀၇မှာ ၂ ဘက် တိုက်ပွဲ အပြင်းအထန် ဖြစ်ပွားခဲ့ပြီး ကထဲက ဂါဇာကို ဟားမတ်စ်က ထိန်းချုပ်ထားခဲ့တာပါ။
ဟားမတ်စ်နဲ့ သဘောတူညီချက်ရရင် သမ္မတ အာဘတ်စ် ငြိမ်းချမ်းရေးလမ်းက သွေဖီလိမ့်မယ်လို့ အစ္စရေး ဝန်ကြီးချုပ် ဘင်ဂျမင် နေတန်ညာဟုက ဆိုပါတယ်။
အစ္စရေးက ဟားမတ်စ်ကို အကြမ်းဖက် အဖွဲ့လို့ ယူဆထားပါတယ်။

ဟွမ်းစ်မြို့ကို ဆီးရီးယားတပ် ပစ်ခတ်
ဆီးရီးယား စစ်တပ်က ဟွမ်းစ်မြို့ လူထူထပ်ရာကို တနေ့လုံး ပစ်ခတ်
ဆီးရီးယား စစ်တပ်က ဗုံးဆံ မော်တာ ကျည်ဆံတွေနဲ့ ဟွမ်းစ်မြို့ လူထူထပ်ရာ ဒေသတွေပေါ် တနေ့လုံး ပစ်ခတ် သတ်ဖြတ်ခဲ့ပါတယ်။
အုံကြွမှုတွေ ဖြစ်ပြီး တနှစ်လောက် အကြာမှာ အဆိုးဆုံးဖြစ်တဲ့ ပစ်ခတ်မှုပဲလို့ ဟွမ်းစ်မြို့ ခံတွေက ပြောကြောင်း ဒေသခံ ဘီဘီစီ သတင်းထောက်က ဆိုပါတယ်။
အရပ်သားတွေ အများဆုံး သေကြပြီး နိုင်ငံတကာက သူတို့ကို ပစ်ထားသလို မြို့လူထုက ခံစားရတယ်လို့လည်း သူက ဆိုပါတယ်။
ဒမတ်စကပ်က အမေရိကန်သံရုံးကို ပိတ်လိုက်ပြီ ဖြစ်ပါတယ်။
တိုက်ခိုက် ခံရမှာ စိုးရိမ် နေရပြီး ဆီးရီးယား အစိုးရ ဆီကလည်း ဘာမှ တုံ့ပြန်မှု ကောင်းကောင်း မရဘူးလို့ အမေရိကန် နိုင်ငံခြားရေး ဌာနက ဆိုပါတယ်။
တချိန်ထဲမှာပဲ ဆီးရီးယား အစိုးရပေါ် သံတမန် ဖိအားတွေလည်း တိုးလာနေပါတယ်။
သမ္မတ အာဆတ်ကို ထောက်ခံနေတဲ့ ဆီးရီးယား မဟာမိတ်တွေ ဘက်လိုက် မှားနေပြီလို့ အိမ်ဖြူတော် ပြောခွင့်ရ ပုဂ္ဂိုလ်က ဝေဖန်လိုက် ပါတယ်။
ဗြိတိသျှ နိုင်ငံခြားရေး ဝန်ကြီး ဝီလျံဟိတ် ကတော့ သမ္မတ အာဆတ်ဟာ လူသတ် အစိုးရကို ဦးဆောင်နေတယ်လို့ ဆိုပါတယ်။
ရုရှနဲ့ တရုတ်က ကုလသမဂ္ဂမှာ ဆီးရီးယားအရေး ဆုံးဖြတ်ချက် အပေါ် ဗီတိုအာဏာသုံး ပယ်ချခဲ့ တာကိုလည်း သစ္စာမဲ့မှုအဖြစ် မစ္စတာ ဟိတ်က စွပ်စွဲခဲ့ပါတယ်။
ဒမတ်စကပ်ကို အင်္ဂါနေ့ သွားမယ့် ရုရှ နိုင်ငံခြားရေး ဝန်ကြီး ဆာဂေ လဗ်ဗရော့ဗ် ကတော့ ဒီစကားက ဒေါသတကြီး ပြောတာပါပဲလို့ တုံ့ပြန်လိုက်ပါတယ်။

ဗြိတိန်ဘုရင်မကြီး နန်းတက်နှစ် (၆၀) ပြည့်
By ဗွီအိုအေ (မြန်မာဌာန)
ဗြိတိန်ဘုရင်မကြီး အဲလိဇဘက်သ် (Elizabeth) ဟာ နန်းသက် အနှစ် (၆၀) ခဲ့ပြီဖြစ်သလို ဒီလို သမိုင်းဝင် အောင်မြင်မှု အထိမ်းအမှတ် စိန်ရတု အခမ်းအနား ပွဲတော်တွေကို ဒီကနေ့ တနင်္လာနေ့မှာ စတင်ဆင်နွှဲခဲ့ပါတယ်။ အသက် ၈၅ နှစ်ရှိပြီဖြစ်တဲ့ ဘုရင်မကြီးဟာ အင်္ဂလန်နိုင်ငံ အရှေ့ပိုင်းကိုသွားရောက်တဲ့ မထင်မရှား ခရီးစဉ်တစ်ခုနဲ့ သူ့ရဲ့ စိန်ရတုပွဲကို ဒီကနေ့ စတင်လိုက်တာပါ။ နောက်ပိုင်းကျရင်တော့ သိမ်းစ်မြစ်ထဲမှာ သင်္ဘော ၁ ထောင် ရွက်လွှင့်ပြီး ခမ်းနားကြီးကျယ်တဲ့ ပွဲတော်တစ်ရပ် အပါအ၀င် လေးရက်ကြာ အခမ်းအနားကြီးတွေကို ဇွန်လထဲမှာ ဆင်နွှဲရင်း ပွဲတော်ကို အဆုံးသတ်မှာ ဖြစ်ပါတယ်။
တနင်္ဂနွေနေ့ကတော့ ဘုရင်မကြီး အဲလိဇဘက်သ်ဟာ သူ့ရဲ့ ကြင်ယာတော် မင်းသား ဖိလစ် (Philip) နဲ့ ဆီးနှင်းတွေ အများအပြား ကျနေတဲ့ကြားကပဲ ဘုရားကျောင်း အတူတက်ခဲ့ကြပါတယ်။ အသက် ၉၀ ရှိပြီဖြစ်တဲ့ မင်းသားကြီး ဖိလစ် ဟာ ပြီးခဲ့တဲ့ ဒီဇင်ဘာလက နှလုံး ခွဲစိပ် ကုသမှု ခံယူထားသူ ဖြစ်ပါတယ်။
တော်ဝင်မိသားစုဝင်တွေဟာ အင်္ဂလန်အပြင် ဗြိတိသျှ ဓနသဟာရ နိုင်ငံတွေမှာ ပြုလုပ်မယ့် စိန်ရတု အထိမ်းအမှတ် ပွဲတော်တွေကို တက်ရောက်ဖို့ စီစဉ်ထားပါတယ်။ ဘုရင်မကြီး အဲလိဇဘက်သ်ကို သူတို့ရဲ့ ဘုရင်အဖြစ် သတ်မှတ်ထားတဲ့ နိုင်ငံပေါင်း ၁၆ နိုင်ငံ ရှိတာပါ။ ဘုရင်မကြီးနဲ့ မင်းသား ဖိလစ်တို့ကတော့ သူတို့ရဲ့ ခရီးစဉ်တွေကို ဗြိတိန်နိုင်ငံတွင်းမှာပဲ လှည့်လည်သွားလာဖို့ ကန့်သတ်ထားပါတယ်။
ဖခင်ဖြစ်သူ ခြောက်ယောက်မြောက် ဘုရင် ဂျော့ဂ်ျ နှစ်ပေါင်းများစွာ မကျန်းမမာ ဖြစ်ခဲ့ပြီးတဲ့နောက် ၁၉၅၂ ခုနှစ် ဖေဖော်ဝါရီလ ၆ ရက်နေ့မှာ အဲဒီအချိန်က မင်းသမီးငယ် အဲလိဇဘက်သ်ကို ထီးနန်းလွှဲပေးခဲ့တာ ဖြစ်ပါတယ်။

လုံခြုံရေးကြောင့် ဆီးရီးယားရှိ အမေရိကန် သံရုံးပိတ်
By ဗွီအိုအေ (မြန်မာဌာန)
ဆီးရီးယားနိုင်ငံမှာ လုံခြုံရေး အခြေအနေပိုမို ဆိုးရွားလာတဲ့အတွက် ဒမက်စကတ်မြို့မှာ ရှိတဲ့ အမေရိကန် သံရုံးကို ပိတ်ပစ်လိုက်ပြီး ကျန်ရှိနေတဲ့ သံတမန်တွေကို ပြန်လည် ခေါ်ယူလိုက်ပါပြီ။
ဒမက်စကတ်မြို့မှာ ရှိတဲ့ အမေရိကန်သံရုံးက အလုပ်တွေကို ရပ်ဆိုင်းလိုက်ပြီး သံအမတ်ကြီး ရောဘတ်ဖို့ နဲ့ တခြား သံတမန်တွေလည်း ဆီးရီးယား နိုင်ငံက ထွက်ခွာခဲ့ကြပြီလို့ အမေရိကန် နိုင်ငံခြားရေး ဝန်ကြီးဌာနက ယနေ့ သတင်း ထုတ်ပြန်လိုက်ပါတယ်။
ဒမက်စကတ်မြို့မှာ မကြာသေးခင်က ကားဗုံးကွဲမှု ဖြစ်ပွားခဲ့တာကြောင့်နဲ့ သံတမန်တွေရဲ့ လုံခြုံရေး စိတ်မချရတာရယ်၊ ဆီးရီးယား အစိုးရက လုံခြုံရေး စိတ်ချရအောင် မကိုင်တွယ်မချင်း အမေရိကန်သံရုံးကို ပိတ်ပစ်မယ်လို့ သတိပေးထားပြီး ဖြစ်ပါတယ်။ အမေရိကန် ပြည်ထောင်စုက ဒီလို သံရုံးကို ပိတ်ပစ်ခဲ့တာကြောင့်  အစိုးရဆန့်ကျင်ရေး ဆန္ဒပြသူတွေကို သွေးထွက်သံယိုဖြစ်တဲ့အထိ နှိပ်ကွပ်နေတဲ့ သမ္မတ အာဆဒ် အစိုးရအတွက်ကတော့ ပိုပြီး အထီးကျန်စေမှာ ဖြစ်ပါတယ်။
ဆီးရီးယားမြို့ကြီးတွေမှာလည်း ဆန္ဒပြသူတွေကို ဆက်လက် နှိပ်ကွပ်နေဆဲပါ။ အစိုးရ ဆန့်ကျင်ရေး ဆန္ဒပြပွဲတွေကို ဇွဲမလျှော့ဘဲ ဆက်လက် ဆင်နွှဲနေတဲ့ ဟုမ်းစ် (Homs) မှာတော့ လုံခြုံရေးတပ်ဖွဲ့တွေက ဗုံးကျဲ တိုက်ခိုက်ခဲ့လို့ ယနေ့ ၂၄ ထက်မနည်း သေဆုံးခဲ့ရပြီး အများအပြား ဒဏ်ရာရခဲ့ကြတယ်လို့ လှုပ်ရှားသူတွေက ပြောပါတယ်။

Taiyi ဖိနပ်စက်ရုံ လုပ်သား ၂,၀၀၀ ကျော် ဆန္ဒပြ
By မအေးအေးမာ
ရန်ကုန် လှိုင်သာယာ စက်မူဇုန် (၃) တိုင်ယီ ဖိနပ်စက်ရုံက  မြန်မာ အလုပ်သမား ၂,၀၀၀ ကျော်ဟာ ဒီကနေ့ ဆန္ဒပြခဲ့ကြပါတယ်။ အလုပ်သမားတွေ အနေနဲ့ အခြေခံလုပ်အားခ နည်းပါးတာကြောင့်ရော၊ ပြီးခဲ့တဲ့လက လစာ ဖြတ်တောက် ခံရတာတွေအတွက် မကျေနပ်လို့ ဆန္ဒပြခဲ့ကြတာ ဖြစ်ပါတယ်။ ဒီ ဆန္ဒပြပွဲ ပြီးဆုံးသွားပြီလား၊ အလုပ်ရှင်နဲ့ အလုပ်သမားတွေအကြား ဘယ်လို ညှိယူခဲ့ကြသလဲ ဆိုတာကို စုံစမ်းထားတဲ့ မအေးအေးမာက တင်ပြထားပါတယ်။
ဇန်န၀ါရီလအတွင်းမှာ အလုပ်ပိတ်ရက်တွေ များတယ်ဆိုပြီး လုပ်အားခထဲက ကျပ်ငွေ တစ်သောင်းကျော် ဖြတ်တောက်ခံရတာကို အကြောင်းပြုပြီး အလုပ်သမားတွေ ဆန္ဒပြမှုတွေ ဖြစ်ခဲ့ရကြောင်း ဆန္ဒပြ အလုပ်သမားတွေ အရေး ဆောင်ရွက်နေသူ တစ်ဦးက ပြောပြပါတယ်။
“ပြီးခဲ့တဲ့ ဇန်န၀ါရီလက ရုံးပိတ်ရက် ၅ ရက်ရှိတယ်။ လွတ်လပ်ရေးနေ့ အပါအ၀င် ၅ ရက် ရှိတယ်။ တရုတ်နှစ်သစ်ကူး ပွဲတော် ဖြစ်လို့ဆိုပြီး လုပ်ငန်း အလုပ်ရှင်ကနေပြီးတော့ ၅ ရက်ပိတ်တယ်။ အခု ဒီ လကုန်လို့ ငွေရှင်းတဲ့ အခါကျတော့ ငွေရှင်းတယ်ဆိုတာက လကုန်ပြီး ၅ ရက်ကနေ ၇ ရက် အတွင်း ရှင်းတတ်တယ်။ အဲဒီ ငွေရှင်းတဲ့ အခါကျတော့ အလုပ်ပိတ်ရက် များလို့ ဆိုပြီးတော့ တယောက်ကို ၁ သောင်း၊ ၁ သောင်း ၂ ထောင် အဲလို ဖြတ်တယ်။ ဖြတ်ချလိုက်တယ်။ အဲလို ဖြတ်လိုက်တော့ တဘက်က အလုပ်သမားတွေမှာ ဘာပြဿနာတွေ ရှိလဲ ဆိုတော့ သူတို့ လုပ်ခဲ့တဲ့ လစာလေးက စားလို့လောက်ရုံပဲ။ အခု ဒီလထဲမှာ ပြီးခဲ့တဲ့ လကစပြီးတော့ သူတို့နေတဲ့ အဆောင်တွေမှာ အဆောင်စာရိတ်တွေ တက်တယ်၊ ထမင်းစာရိတ်တွေ တက်တယ်။ အဲလို အခက်အခဲတွေ ဖြစ်တယ်။ သူတို့ဒီ ကြွေးယူထားတဲ့ ကိစ္စတွေ ဘာတွေ အဲလို ကိစ္စတွေ အများကြီး ရှိတယ်။ ဒီပိုက်ဆံနဲ့ သူတို့ ဘယ်လိုမှ လှည့်လို့ ပတ်လို့ ရပ်တည်လို့ မရတော့ဘူး။ အဲတော့ ဒီလို ကိစ္စတွေကတော့ လုပ်ခ လစာ ဖြတ်တောက်တိုင်း ဖြတ်တောက်တိုင်း စက်မှုဇုန်မှာ အလုပ်သမား ဆန္ဒပြမှုတွေ ဖြစ်တာ အဓိကကတော့ သူတို့ စားဝတ်နေရေး လုံးဝ ရပ်တည်လို့ မရလို့ ဖြစ်တာ။ ဒီ လုပ်ခလစာ အပေါ်မှာ မကျေနပ်တာပေါ့။ ဒီပေါ်မှာ ညှိနှိုင်းပြီး သွားတာ။ အဓိက ဒီသဘောပဲ။”
ဆန္ဒပြတာကတော့ မနက်ပိုင်း ၇ နာရီကျော် အချိန်လောက်က စပြီး အလုပ်မဆင်းဘဲ စက်ရုံရှေ့မှာ စုရုံးခဲ့တာဖြစ်ကြောင်း၊ အလုပ်သမားတွေ အနေနဲ့ တောင်းဆိုတာက အခြေခံလစာ တိုးပေးဖို့၊ တစ်နာရီကို ၇၅ ကျပ်ကနေ ကျပ်ငွေ ၂၅၀ ထိ တိုးပေးဖို့ တောင်းဆိုခဲ့တယ်လို့လည်း အလုပ်သမား တစ်ဦးက ပြောပြပါတယ်။
“လိုချင်တဲ့ဟာ တောင်းတာလေ။ အခြေခံ လစာတောင်းတာလေ။ အဲဒါ မရသေးဘူး။ တနာရီကို ၇၅ ကျပ် ၂၅၀ တောင်းတာ အခြေခံ လစာ အရမ်းနည်းတယ် ပေါ့နော်။ အလုပ်မလုပ်ဘဲနဲ့ ပြန်လာကြတာ။”
အလုပ်သမားတွေအနေနဲ့ တခြား မကျေနပ်မှုတွေ ရှိနေကြောင်း သူတို့ကို အလုပ်ရှင်က ခြိမ်းခြောက်မူတွေ လုပ်နေတယ်လို့လည်း ခံစားရကြောင်း ဆန္ဒပြ အလုပ်သမားအရေး ဆောင်ရွက်နေသူက  ပြောပြပါတယ်။
“စက်ရုံတွေထဲမှာ ဘာလဲ ဆိုတော့ ထိခိုဒဏ်ရာရတဲ့ ကိစ္စတွေ ဆိုလည်း ထိထိရောက်ရောက် လုပ်ပေးတာ ဘာညာ မရှိဘူး။ ပိုဆိုးတာ အလုပ်သမားတွေ မကျေနပ်တာ ဇန်န၀ါရီလဆန်းပိုင်းမှာ အမေရိကန် နိုင်ငံရဲ့ ကိုယ်စားလှယ်က ဗမာပြည် အလုပ်သမား စက်ရုံတွေ လာမယ်ဆိုပြီး စက်ရုံတွေမှာ သတင်းဖြန့်တယ်။ ဖြန့်ပြီးတော့ အဲဒီ ရက်ပိုင်းမှာ အဲဒီ လာမယ့် တစ်ရက် နှစ်ရက် လောက်မှာ အဲဒီ စက်ရုံထဲမှာ သောက်ရေအိုးတွေ ဘာတွေက အစပေါ့ဗျာ စုတ်ပြတ်နေတဲ့ဟာတွေ အကုန်လုံး အသစ်တွေ အကုန်လဲပေးတယ် စက်ရုံပိုင်ရှင်က။ အဲဒီနေ့မှာပဲ နိုင်ငံခြားသား လူဖြူ တစ်ယောက်လာတယ်ပေါ့ဗျာ။ အမေရိကန် နိုင်ငံကလို့ ပြောတယ်ပေါ့။ စကားပြန်ကတဆင့် အလုပ်သမားတွေကို စကားပြောတယ်။ ပြောတော့ ဘာပြောလဲ ဆိုတော့ အလုပ်သမားတွေ အနေနဲ့ ဆန္ဒပြခွင့် မရှိဘူး။ ဆန္ဒပြမယ် ဆိုလို့ ရှိရင် ဥပဒေအရ အရေးယူလို့ ရတယ်။ အဲတော့ အလုပ်သမားတွေက ကိုယ့်ရဲ့ အခက်အခဲတွေကို လေဘာရုံးကို တင်ပြရမယ် ဆိုပြီး ဒီလူက ပြောတယ်ဆိုပြီး စကားပြန်ကနေ ပြန်ပြောပြတယ်ပေါ့ဗျာ။ အလုပ်သမားတွေက ဒီကိစ္စကို စက်ရုံပိုင်ရှင်ဘက်က အကြံအဖန်လုပ်တယ် ဆိုပြီး ထင်ကြတယ်။ ဒါကိုလည်း မကျေနပ်ကြဘူး။ ခုန အဲဒီလူလာတော့ လဲထားတဲ့ ပစ္စည်းတွေ ဘာတွေက အဲဒီလူပြန်တော့ အကုန်သိမ်းပစ်လိုက်တယ်။ အဲလို မကျေနပ်ချက်တွေလည်း ရှိတယ်။ တကယ်ဆို အဲဒီလူပြောတဲ့ အတိုင်းလည်း ဟုတ်ချင်မှ ဟုတ်မှာ ပေါ့ဗျာ။ စကားပြန်က သူပြန်ချင်သလို ပြန်နေတာလည်း ဖြစ်နိုင်တာပေါ့။ အလုပ်သမားတွေက ဒါကို မယုံဘူး။ ပြီးတော့ အသားလွတ်ကြီးလာပြီးတော့ ခြိမ်းခြောက်သလို ဖြစ်တော့ လက်မခံဘူး။ မကျေနပ်ကြဘူးပေါ့ဗျာ။ ဒါတွေလည်း ရှိနေတယ်။ ”
တိုင်ယီ ဖိနပ်စက်ရုံဟာ ပြီးခဲ့တဲ့နှစ်ကလည်း ဆန္ဒပြမှုတွေ ဖြစ်ခဲ့ပြီး အခြေခံလစာ တိုးပေးဖို့ တောင်းဆို ခဲ့ရာမှာ အလုပ်သမားတွေ တောင်းဆိုတဲ့အတိုင်း မရရှိဘဲ အနည်းငယ် တိုးပေးရုံနဲ့ ကျေနပ်ခဲ့ရကြောင်း၊ လက်ရှိမှာတော့ အလုပ်သမားတွေဟာ အခြေခံလစာ အပါအ၀င် မနက် ၇ နာရီကျော် ကနေ ည ၉ နာရီကျော်အထိ အလုပ်လုပ်ရပေမဲ့ တစ်လလုံးမှ ကျပ်ငွေ  ၅ သောင်းကနေ ၆ သောင်း ထိသာ ရပြီး လစာငွေ ဖြတ်တောက်ခံရတာတွေဟာ အဆင်မပြေ ဖြစ်ရကြောင်းတွေကိုလည်း ပြောသွားပါတယ်။ ဒီကိစ္စနဲ့ ပတ်သက်ပြီး တိုင်ယီ ဖိနပ်စက်ရုံကို ဆက်သွယ်တဲ့အခါမှာဆက်သွယ်လို့ မရခဲ့ပါဘူး။

လူ့အခွင့်အရေးကော်မရှင် သီးခြားရပ်တည်ဖို့ ကင်တားနား တိုက်တွန်း
By မသင်းသီရိ
မြန်မာနိုင်ငံမှာ မထွက်ခွာမီ ရန်ကုန်လေဆိပ်တွင် သတင်းထောက်များနဲ့ မစ္စတာ ကင်တားနား တွေ့ဆုံနေစဉ် (ဖေဖော်ဝါရီလ ၅၊ ၂၀၁၂)
မြန်မာနိုင်ငံ အမျိုးသား လူ့အခွင့်အရေး ကော်မရှင်ဟာ လွတ်လပ်စွာ လူ့အခွင့်အရေး ကိစ္စတွေကို ဆောင်ရွက်လျက်ရှိပေမဲ့ နိုင်ငံတစ်ခုရဲ့ အတိုင်းအတာအရ လုပ်ကိုင်ရတဲ့ နေရာမှာ ကွာခြားမှုတွေတော့ ရှိတယ်လို့ မြန်မာနိုင်ငံ အမျိုးသား လူ့အခွင့်အရေး ကော်မရှင်က ပြောဆိုလိုက်ပါတယ်။ မြန်မာနိုင်ငံ လူ့အခွင့်အရေး ကော်မရှင်ဟာ လွတ်လပ်တဲ့ အဖွဲ့အစည်းအဖြစ် ရပ်တည်နိုင်ခြင်း မရှိသေးဘူးဆိုတဲ့ ကုလသမဂ္ဂ လူ့အခွင့်အရေး ကိုယ်စားလှယ် မစ္စတာ တောမတ်စ်အိုဟေး ကင်တားနားရဲ့ ထောက်ပြချက်အပေါ် အခုလို တုံ့ပြန် ပြောဆိုလိုက်တာ ဖြစ်ပါတယ်။  ဒီအကြောင်း အပြည့်အစုံကို မသင်းသီရိက တင်ပြထားပါတယ်။
မြန်မာနိုင်ငံရဲ့ လူ့အခွင့်အရေး အခြေအနေတွေကို ၆ ရက်ကြာ လာလေ့လာခဲ့တဲ့ မစ္စတာ ကင်တားနား က သူ ပြန်တဲ့ရက် ရန်ကုန်လေဆိပ်မှာ ပြုလုပ်တဲ့ သတင်းစာ ရှင်းလင်းပွဲအတွင်း မြန်မာနိုင်ငံ လူ့အခွင့်အရေး ကော်မရှင်နဲ့ပတ်သက်လို့ ဝေဖန် ထောက်ပြခဲ့တာပါ။ မြန်မာနိုင်ငံမှာ လူ့အခွင့်အရေး ကော်မရှင်ကို ပထမဆုံးအကြိမ် ဖွဲ့စည်းနိုင်တာ ဖြစ်ပေမဲ့ သီးခြား လွတ်လပ်စွာ ရပ်တည်နိုင်ခြင်း မရှိသေးဘူးလို့ ထောက်ပြခဲ့ပါတယ်။ ဒါပေမဲ့ အမျိုးသား လူ့အခွင့်အရေး ကော်မရှင်ကတော့ လူ့အခွင့်အရေး ဆိုင်ရာ ကိစ္စတွေကို မြန်မာနိုင်ငံရဲ့ အတိုင်းအတာအရ လွတ်လပ်စွာ ဆောင်ရွက်လျက် ရှိပြီးတော့ နိုင်ငံတကာရဲ့ စံချိန်စံနှုန်းတွေနဲ့တော့ တိုင်းတာလို့ မရသေးဘူးလို့ မြန်မာနိုင်ငံ လူအခွင့်အရေး ကော်မရှင် ဥက္ကဋ္ဌ ဦးဝင်းမြက ပြောပါတယ်။
“လွတ်လပ်စွာ ဆောင်ရွက်တယ် ဆိုတဲ့နေရာမှာတော့ တစ်နိုင်ငံနဲ့ တစ်နိုင်ငံဟာဆိုရင် အတိုင်းအတာ သဘောအားဖြင့် ကွာခြားမှုလေးတွေ ရှိနိုင်တယ်လို့ ကျနော် ပြောလိုပါတယ်။ အနေအထားတစ်ခု ပြောင်းလဲလာတယ်လို့ ဆိုတဲ့နေရာမှာ အလွန်အကျွံ မဖြစ်အောင်၊ နောက်တခါ တဘက်မှာလည်း လုပ်အားနည်းတဲ့ အတွက်ကြောင့်မိုလို့ ရလဒ်မရှိခြင်း မဖြစ်အောင် ဒီနှစ်ခုကြားထဲမှာ မျှပြီးတော့ လွတ်လပ်မှုကို ကျနော်တို့  ဆောင်ရွက်ဖို့ လိုတယ်ဆိုတာကို ကျနော် ပြောချင်ပါတယ်။”
မစ္စတာ ကင်တားနားက မြန်မာနိုင်ငံ လူ့အခွင့်အရေး ကော်မရှင်ဟာ အကျဉ်းထောင်တွေထဲကို သွားတဲ့ကိစ္စမှာ နိုင်ငံတော် သမ္မတအထိ ခွင့်ပြုချက်တောင်းပြီးမှ သွားရတာမျိုး ရှိတယ်ဆိုတာကိုလည်း ထောက်ပြခဲ့ပါတယ်။
“အမှန်မှာတော့ အသိပေးတဲ့သဘောပဲ ဖြစ်ပါတယ်။ သမ္မတကြီးက ဖွဲ့စည်းပေးလိုက်တဲ့ အဖွဲ့ဖြစ်တဲ့အတွက်ကြောင့် အသိပေးလိုက်တယ်။ ဒါပေမဲ့ တားမြစ်ခြင်း လုံးဝ မရှိဘဲနဲ့ ထောင်ထဲကို သွားတဲ့အခါမှာလည်း လွတ်လွတ်လပ်လပ် ဆောင်ရွက်နိုင်တယ်။ အဲဒီတော့ ထောင်တစ်ခုကို သွားတယ် ဆိုတဲ့နေရာမှာတော့ ဒီအတိုင်း ကောက်ခါငင်ခါ သွားလို့ ဘယ်မှာမှမရပါဘူး။ ဥပမာ တချို့နိုင်ငံတွေ ရှိတယ်။ ဖိလစ်ပိုင်လို နိုင်ငံမျိုးမှာဆိုရင် ကျနော်တို့ သွားလေ့လာတဲ့အခါမှာ သူတို့က သဘောတူညီမှု လုပ်ထားပြီးသား ရှိတယ်။ သူတို့ရဲ့ လူ့အခွင့်အရေး ကော်မရှင်က ထောင်ကို အချိန်မရွေး ၀င်ရောက်ပြီးတော့ သွားရောက် စစ်ဆေးနိုင်တယ်။ ဒါကတော့ သဘောတူညီမှုကို ချမှတ်ထားရတဲ့ အနေအထားမျိုး ရှိပါတယ်။ ဒီမှာကတော့ သွားမယ်ဆိုရင် သမ္မတကြီးကို အသိပေးတယ်။ ဒါမှသာလျှင် သူက ထောင်အာဏာပိုင်တွေကို လူ့အခွင့်အရေး ကော်မရှင်ကလာမယ်။ ဖွင့်ပေးလိုက်ပါ။ ပြလိုက်ပါလို့ ပြောမှာပေါ့။ ဒီအတိုင်းကြီးတော့ ဥဒဟို ၀င်ထွက် သွားလာလို့ရတဲ့ အနေအထား မရှိဘူး။ အဲဒီတော့ ဒီနေရာမှာတော့ အမြင်ချင်း နည်းနည်းကွာတယ်လို့ ထင်ပါတယ်။ လွတ်လပ်မှု ဆိုတဲ့ဟာကို သုံးသပ်တဲ့အခါမှာ အတိုင်းအတာကိုတော့ မတူညီကြတဲ့ စနစ်တွေမှာ လွတ်လပ်မှု၊ ကွာခြားမှု လေးတွေကိုတော့ ကြည့်ပြီးတော့ ပြောဖို့လိုတယ်လို့ ကျနော် မြင်ပါတယ်။”
ဒါပေမဲ့ လူ့အခွင့်အရေး ကော်မရှင်ရဲ့ အသုံးစရိတ်ဟာ အစိုးရ ဘတ်ဂျက်ထဲကနေ သွားနေတာမို့ အစိုးရပိုင်းတွေထဲမှာ လူ့အခွင့်အရေး ချိုးဖောက်မှုတွေ ရှိတာကို လွတ်လွတ်လပ်လပ် စုံစမ်းနိုင်ပါ့မလား ဆိုတဲ့ မေးခွန်းကိုတော့ -
“အမျိုးသား  လူ့အခွင့်အရေး ကော်မရှင်ရဲ့ ဘတ်ဂျက်က ကျနော်တို့ အိမ်နီးနားချင်း နိုင်ငံတွေ၊ တခြားနိုင်ငံတွေကို ကြည့်လို့ရှိရင်လည်း အစိုးရကပဲ ပေးရတယ်။ အစိုးရက မပေးလို့တော့ ဘယ်မှာမှ ကျနော်တို့ အလုပ်လုပ်ဖို့ ရမှာမဟုတ်ပါဘူး။ ဒါပေမဲ့ အစိုးရက ပေးတဲ့အတွက်ကြောင့်မိုလို့ မလွတ်လပ်ဘူးလို့တော့ ပြောလို့မရဘူး။ operation ပေ့ါ။ ဒါကို ကိုင်တွယ် ဆောင်ရွက်တဲ့အခါမှာတော့ ကိုယ့်ဘာသာကိုယ် လွတ်လွတ်လပ်လပ် ဆောင်ရွက်လို့ရတယ်။ သုံးတဲ့အခါမှာတော့ အစိုးရရဲ့ ဘဏ္ဍာငွေ သုံးတဲ့ စည်းမျဉ်းစည်းကမ်းနဲ့အညီပဲ ကျနော်တို့ ဆောင်ရွက်ရတယ်။ ဒါကြောင့်မိုလို့ ထိန်းကွပ်တယ်လို့တော့ ကျနော်တို့ ပြောလို့မရဘူး။ ဘယ်မှမဆို စည်းစနစ်နဲ့တော့ ကျနော်တို့ သုံးရတာပေါ့နော်။ ဒါကို စီမံတဲ့အခါမှာ သော်လည်းကောင်း၊ သုံးတဲ့အခါမှာ သော်လည်းကောင်း ကိုယ့်ဟာနဲ့ကိုယ် လွတ်လွတ်လပ်လပ် သုံးပိုင်ခွင့် ကျနော်တို့ ရှိတယ်။”
မစ္စတာ ကင်တားနားနဲ့ မြန်မာနိုင်ငံ လူ့အခွင့်အရေး ကော်မရှင်တို့ဟာ  ပြီးခဲ့တဲ့သောကြာနေ့ ဖေဖော်ဝါရီလ ၃ ရက်နေ့က ရန်ကုန်က လူ့အခွင့်အရေး ကော်မရှင်မှာ ၂ နာရီ နီးပါးကြာ မြန်မာနိုင်ငံရဲ့ လူ့အခွင့်အရေး အခြေအနေတွေကို ဆွေးနွေးခဲ့ကြတာ ဖြစ်ပါတယ်။
“ပြောတာကတော့ ကျန်နေသေးတဲ့ ယုံကြည်ချက်ကြောင့် ကျနေတဲ့ အကျဉ်းသားတွေ ရှိလို့ရှိရင်လည်း ဒါတွေကို လွှတ်ပေးဖို့ကိစ္စကိုပေါ့။ ဒါကို သူ ပြောပါတယ်။ သူ အင်းစိန်ထောင်ကို သွားတဲ့အခါမှာလည်း ယုံကြည်ချက်ကြောင့် အကျဉ်းကျနေတဲ့ အကျဉ်းသား ၃ ယောက်နဲ့ သူ တွေ့ဆုံ မေးမြန်းခွင့် ရခဲ့တယ် ဆိုတဲ့အကြောင်း ပြောတယ်။ ကျနော်တို့ အင်းစိန်ထောင်ကို သွားတုန်းကလည်း ကျနော်တို့ မေးမြန်း စုံစမ်းတဲ့ ကိစ္စနဲ့ ပတ်သက်လို့ သူမေးလို့ ကျနော်တို့က အသေးစိတ် ပြောပြပါတယ်။ သူ ဘာမှ ပြန်ပြောခြင်း မရှိပါဘူး။ ကချင်ပြည်နယ်ကို ကျနော်တို့ ကိုယ်စားလှယ်အဖွဲ့က သွားခဲ့တဲ့ကိစ္စလေး ဆွေးနွေးတယ်။ အဲဒီမှာ တိုက်ခိုက်မှုတွေနဲ့ ပတ်သက်ပြီးတော့ ထိခိုက် ဒဏ်ရာရမှုတွေနဲ့ ပတ်သက်လို့ ဆွေးနွေးတာ ကောင်းပါတယ်။ ဘာမှ သူတောင် မပြောဘူး။”
ဒါကတော့ မြန်မာနိုင်ငံ အမျိုးသား လူ့အခွင့်အရေး ကော်မရှင် ဥက္ကဋ္ဌ ဦးဝင်းမြကို ဆက်သွယ် မေးမြန်းခဲ့တာ ဖြစ်ပါတယ်။ ကုလသမဂ္ဂရဲ့ မြန်မာနိုင်ငံ လူ့အခွင့်အရေး ဆိုင်ရာ အထူးကိုယ်စားလှယ် မစ္စတာ ကင်တားနားဟာ မြန်မာနိုင်ငံ လူ့အခွင့်အရေး ကော်မရှင်နဲ့ ပတ်သက်လို့ အခုလို ထောက်ပြချက်တွေအပြင် မြန်မာနိုင်ငံထဲက ပြုပြင် ပြောင်းလဲမှုတချို့ကို သူကြိုဆိုပေမဲ့ တဘက်မှာလည်း လူ့အခွင့်အရေး တိုးတက်မှုတွေနဲ့ အတူ တရားဥပဒေ စီရင်ရေးဆိုင်ရာ ကိစ္စတွေမှာ စိန်ခေါ်မှု ရှိနေသေးတယ် ဆိုတာအပြင် ဧပြီလ ၁ ရက်နေ့မှာ လုပ်မယ့် ကြားဖြတ် ရွေးကောက်ပွဲတွေဟာလည်း လွတ်လပ်ပြီး တရားမျှတဖို့ လိုတယ်လို့ သူရဲ့ သတင်းစာ ရှင်းလင်းပွဲအတွင်းမှာ ထည့်သွင်း ပြောဆိုသွားပါတယ်။

ပါလက်စတိုင်း ပြိုင်ဘက်နှစ်ဖွဲ့ ပူးပေါင်း အစိုးရဖွဲ့မည်
By ဗွီအိုအေ (မြန်မာဌာန)
ပါလက်စတိုင်း သမ္မတ မာမွတ်အာဘက်စ် (Mahmoud Abbas)  ဦးဆောင်တဲ့ ညီညွတ်တဲ့ ကြားဖြတ် အစိုးရတစ်ရပ်ကို ဖွဲ့စည်းဖို့ ပါလက်စတိုင်း ပြိုင်ဘက်အဖွဲ့နှစ်ခု ဖြစ်တဲ့ ဖာတာ နဲ့ ဟားမက်စ်အဖွဲ့တွေက ခေါင်းဆောင်တွေက ကြေညာလိုက်ပါတယ်။