Friday, February 24, 2012

25.02.2012 နေ့ဖတ်ရန်သတင်းများ

by Myanmar Journal on Saturday, February 25, 2012 at 7:19am ·
 

ညီလာခံအတွင်းက အမေရိကန် နိုင်ငံခြားရေး ဝန်ကြီးနဲ့ ဆော်ဒီနိုင်ငံခြားရေးဝန်ကြီးဆီးရီးယားအရေး ဆွေးနွေးပွဲစ
ဆီးရီးယားအရေးနဲ့ပတ်သက်ပြီး တူနီရှားနိုင်ငံ တူးနစ်မြို့မှာ အာရပ်အဖွဲ့ချုပ်က ကြီးမှူးကျင်းပတဲ့ ဆီးရီးယားနိုင်ငံရဲ့ မိတ်ဆွေများညီလာခံကို အမေရိကန် ယူကေ ပြင်သစ်နဲ့ တူရကီနိုင်ငံတွေ အပါအဝင် နိုင်ငံပေါင်း ၇၀ ကျော် တက်ရောက်ကြပါတယ်။

ဒါပေမယ့် ဒီညီလာခံကို ဆီးရီးယားရဲ့ အဓိက မဟာမိတ်နိုင်ငံတွေဖြစ်တဲ့ ရုရှားနဲ့ တရုတ်တို့ကတော့ တက်ရောက်ခြင်း မရှိကြပါဘူး။
ဒီညီလာခံကနေ စစ်ရေးအရ အရေးယူဆောင်ရွက်ဖို့ ဒါမှမဟုတ် အဲဒီလို အလားတူ ဆောင်ရွက်မှုတွေကို လုပ်ဖို့ ဆိုတာတွေကို ဆုံးဖြတ်မှာ မဟုတ်ဘူးလို့
အာရပ် နိုင်ငံများအဖွဲ့ချုပ် ဥက္ကဌ နာဘီ အဲလ် အာရဘီ က ပြောပါတယ်။
အာရပ်အဖွဲ့ချုပ်က အစပြု ဆွေးနွေးခဲ့တဲ့ ငြိမ်းချမ်းစွာ ပြေလည်ရေး အကောင်အထည်ပေါ်လာ နိုင်ဖို့အတွက် ဆွေးနွေးနေကြတာ ဖြစ်တယ်လို့ သူက ပြောပါတယ်။
ကယ်ဆယ်ရေး အကူအညီတွေ ပေးနိုင်အောင် ဆီးရီးယားက တိုက်ခိုက်မှုတွေကို ခေတ္တ ရပ်ဆိုင်းထားဖို့ နိုင်ငံတကာ ကြက်ခြေနီအဖွဲ့ရဲ့ မေတ္တာရပ်ခံချက်ကို ဆီးရီးယားအာဏာပိုင်တွေက ဘာမှ တုံ့ပြန်ပြောကြားခြင်းမရှိသေးဘူးလို့ ဒီညီလာခံကျင်းပနေချိန်မှာပဲ ကြက်ခြေနီအဖွဲ့က ပြောပါတယ်။
တူးနစ်မြို့မှာ တွေ့ဆုံ ဆွေးနွေးနေကြတဲ့ အနောက်နိုင်ငံတွေနဲ့ အာရပ်နိုင်ငံတွေက နိုင်ငံခြားရေးဝန်ကြီတွေဟာ ဆီးရီးယားမှာ ချက်ခြင်းအပစ်ရပ်ဖို့ကို တောင်းဆိုလိမ့်မယ်လို့ မျှော်လင့်ရပါတယ်။
နောက်ပြီး ဆီးရီးယားအစိုးရကို ဘယ်လိုပူးပေါင်းပြီး စီးပွားရေးအရ ဆက်ဖိအားပေးကြမလဲဆိုတာ ဆွေးနွေးကြမှာဖြစ်ပါတယ်။
ဆီးယားယား အစိုးရ ကတော့ ရုပ်မြင်သံကြား သတင်းကနေ ဒီညီလာခံကို ကိုလိုနီလက်သစ်တွေရဲ့ ညီလာခံအဖြစ် ရှုတ်ချ ပြောဆိုသွားပါတယ်။
ဆီရီးယားနိုင်ငံက အစိုးရ ဆန့်ကျင်မှုတွေမှာ ၁၁ လအတွင်း လူ ၇၀၀၀ သေဆုံးခဲ့ပြီး ပြီးခဲ့တဲ့ ကြာသပတေးနေ့တနေ့ထည်းတင် လူ ၉၀ ကျော်သေဆုံးခဲ့တယ်လို့ အစိုးရဆန့်ကျင်လှုပ်ရှားသူတွေက ပြောကြပါတယ်။

ကင်းလှည့် စစ်သားများအဖမ်းခံ ကချင်တိုင်းရင်းသား အမှု
 ကချင်ပြည်နယ်မှာ အစိုးရ စစ်တပ်က ဖမ်းဆီး ထားတယ် ဆိုတဲ့ ဒေသခံ ကချင် အမျိုးသား နှစ်ဦးနဲ့ အမျိုးသမီး တဦး အရေးနဲ့ ပတ်သက်လို့ တရားဥပဒေနဲ့ ညီအောင် တရားလွှတ်တော်ချုပ်မှာ ရှေ့တော်သွင်း စာချွန်လွှာ တင်သွင်းရာမှာ ဒီအမှုကို ကြားနာသင့် မသင့် နှစ်ဘက် လျှောက်လဲချက်တွေ ကြားနာခဲ့ ပါတယ်။
ကချင်အမျိုးသား ဦးဘရန်ဆိုင်းနဲ့ ဦးဇော်ဆိုင်း တို့ကို တလောကြီး ကျေးရွာ မှာ စစ်တပ်က လွန်ခဲ့တဲ့ တလက ဖမ်းဆီးခဲ့ပြီး ကချင် အမျိုး သမီး စွန်လွှတ်ရယ်ဂျာ ကတော့ ပြီးခဲ့တဲ့ အောက်တိုဘာလ ခန့်က ပြောင်းခူး အသွားမှာ စစ်တပ်ရဲ့ ဖမ်းဆီး ခံခဲ့ရတာ ဖြစ်ပါတယ်။
ဦးဘရန်ဆိုင်းနဲ့ ဦးဇော်ဆိုင်းတို့ အမှုအပေါ် လျှောက်လဲ ချက်တွေနဲ့ ပတ်သက်လို့ သူတို့ဖက် က ကူညီဆောင်ရွက်ပေးနေသူ ရှေ့နေ ဦးမာခါးက ဦးဘရန်ဆိုင်း ဆိုရင် ကျေးရွာ ရာအိမ်မှူး ဖြစ်သလို ဦးဇော်ဆိုင်း ဟာလည်း အိမ်ထောင်ဦးစီးသာ ဖြစ်ကြောင်း တရားရုံးမှာ လွှတ်မိန့် ချပေးဖို့ လျှောက်လဲ ခဲ့ပုံ ကို ဘီဘီစီ ကို ရှင်းပြပါတယ်။
ဒီအခါမှာ စစ်တပ်က လုံခြုံရေး အရ ဖမ်းထားတယ်လို့ ချေပလို့ ဖွဲ့စည်းပုံ အခြေခံ ဥပဒေ ပုဒ်မ ၂၁ ခ အရ တရားရုံး ရဲ့ ခွင့်ပြုချက် မရပဲ မည်သူ့ ကိုမှ ၂၄ နာရီ ထက် ပိုပြီး ချုပ်ထားခွင့် မရှိ ဆိုတာ ပြဋ္ဌာန်းပြီး ဖြစ်ကြောင်း ဦးမာခါး က တရားရုံး မှာ ထောက်ပြခဲ့ ပါတယ်။
ဒေါ်စွန်လွှတ်ရယ်ဂျာ ဆိုရင် ခင်ပွန်းဖြစ်သူက ကချင်ပြည်နယ် ဝန်ကြီးချုပ် ထံ အသနားခံစာ တင်ပြီး ဖြစ်ပေမယ့် မြောက်ပိုင်းတိုင်း စစ်ဌာနချုပ်က တိုင်ကြားမှု တစုံတရာ မရှိ၊ မီဒီယာ ကသာ ဒီသတင်း ကြားရကြောင်း နောက်ပိုင်းမှ ခုံရုံးမှာ စစ်ဆေးမယ် လို့ ပြောပုံကို ဦးမာခါး က ဘီဘီစီ ကို ရှင်းပြပါတယ်။

ကချင်မှာ လူ ၇ သောင်းကျော် စစ်ပြေး နေရပြည်နယ်အခြေ မထူးသေး
လူ့အခွင့်အရေး စောင့်ကြည့် HRW အဖွဲ့က မြန်မာနိုင်ငံ ဆိုင်ရာ သုတေသန ပညာရှင် ဒေးဗစ် မက်သီဆင် ရန်ကုန်ကို မကြာခင်က သွားခဲ့ပါတယ်။
ဆယ်နှစ်တွင်း ပထမဆုံး အကြိမ် ပြန်သွား တဲ့အခါ ကချင် ပြည်နယ်မှာ လူ ၇ သောင်းကျော် စစ်ပြေး နေရတာလို အခွင့်အရေး ချိုးဖောက် မှုတွေ အကြောင်း ပွင့်ပွင့် လင်းလင်း ဆွေးနွေး နိုင်ခဲ့တယ်လို့ သူက ဆိုပါတယ်။
ဒါပေမယ့်လည်း မြန်မာ စစ်တပ်ဟာ အရင် အနှစ် ၆၀ မှာ ကျူးလွန်ခဲ့တဲ့ လိင်အရ အကြမ်းဖက်မှု၊ အရပ်သားတွေကို သတ်မှု၊ အဓမ္မ လုပ်အားပေး ခိုင်းမှုတို့လို အမှုတွေ ပြည်နယ်တွေမှာ ဆက်ကျူးလွန် နေဆဲလို့ မစ္စတာ မက်သီဆင်က ပြောပါတယ်။
ဝါရှင်တန်က ဝီလ်ဆင် သုတေသန စင်တာမှာ ပြောကြားခဲ့ တာပါ။
မြန်မာ စစ်တပ်ရဲ့ အမူအကျင့်တွေ လုံးဝ စွန့်မှာ မဟုတ်ဘူး ဆိုတာ သတိထား စရာပါလို့ မစ္စတာ မက်သီဆင်က သုံးသပ် ထားပါတယ်။

တရုတ်-မြန်မာ နယ်စပ် လုံခြုံရေးအတွက် တရုတ်ပြော
 တရုတ်ပြည်သူ့လွှတ်တော်ကော်မတီဥက္ကဌ ဝူဘန်ဂေါ က သူရဦးရွှေမန်းကို ဖိတ်ကြားခဲ့
တရုတ်နိုင်ငံကို အလည်အပတ်ရောက်ရှိ နေတဲ့ မြန်မာနိုင်ငံ ပြည်သူ့လွှတ်တော် ဥက္ကဌ သူရဦးရွှေမန်းဟာ တရုတ်နိုင်ငံ ကွန်မြူနစ်ပါတီရဲ့ ပေါ်လစ်ဗြူရို အရာရှိ လီယူအန်ချောင်းနဲ့ သောကြာနေ့မှာ တွေ့ဆုံခဲ့ပါတယ်။
မစ္စတာလီက တရုတ်နဲ့ မြန်မာတို့ဟာ လွန်ခဲ့တဲ့ နှစ်ပေါင်း ၆၀ ကျော်ကတည်းက နှစ်နိုင်ငံ သံတမန်ရေး ဆက်ဆံမှုတွေ စတင်ခဲ့ပြီး နောက်ပိုင်း နှစ်နိုင်ငံ ဆက်ဆံရေး တိုးတက် ခိုင်မာလာခဲ့တဲ့ အပေါ် ဂုဏ်ယူကြောင်း ပြောပါတယ်။
နောက်ပြီး မြန်မာနိုင်ငံနဲ့ အနာဂတ် ဆက်ဆံရေး ပိုမိုကောင်းမွန်လာစေရေး ရည်ရွယ်ပြီး ပူပေါင်းဆောင်ရွက်မှုတွေကို တိုးမြင့် လုပ်ဆောင်သွားမယ်လို့လည်း ကတိပြု ပြောကြား ပါတယ်။
သူရဦးရွှေမန်းကလည်း မြန်မာနိုင်ငံနဲ့ တရုတ်နိုင်ငံအကြား ဆက်ဆံရေးကို တိုးတက်အောင် ဆောင်ရွက်မှာဖြစ်ပြီး လုပ်ငန်းအများ အပြားအတွက်လည်း ပူပေါင်း ဆောင်ရွက်မှုတွေ တိုးချဲ့ဆောင်ရွက်မယ်လို့ ပြောကြားပါတယ်။
သူရဦးရွှေမန်းဟာ တရုတ်ပြည်သူ့လွှတ်တော်ကော်မတီ ဥက္ကဌ ဝူဘန်ဂေါရဲ့ ဖိတ်ကြားချက် အရ ၅ ရက်ကြာ ခရီးစဉ်အဖြစ် ဗုဒ္ဓဟူးနေ့က တရုတ်နိုင်ငံကို ရောက်ရှိသွားတာ ဖြစ်ပါတယ်။
ဗုဒ္ဓဟူးနေ့ကတော့ တရုတ်နိုင်ငံ နိုင်ငံရေးအကြံပေးကော်မတီ ဥက္ကဌ ဂျာရှင်းလင်နဲ့ သူရဦးရွှေမန်း တွေ့ဆုံခဲ့ရာမှာ မစ္စတာ ဂျာရှင်းလင်က နှစ်နိုင်ငံ နယ်စပ် လုံခြုံရေး ပိုမို ကောင်းမွန်အောင် လုပ်ဖို့ကို ပြောကြားခဲ့တယ်လို့ သိရပါတယ်။
ဒါဟာ တရုတ်-မြန်မာ နယ်စပ်ကုန်သွယ်ရေး မထိခိုက်စေဖို့နဲ့ နယ်စပ် ဒေသမှာ ဒုက္ခသည် ပြဿနာ မဖြစ်ရအောင် ရည်ရွယ် ပြောကြားတာ ဖြစ်တယ်လို့ တရုတ်-မြန်မာ နယ်စပ်က မြန်မာ့အရေး လေ့လာသူ ဦးအောင်ကျော်ဇောက ပြောပါတယ်။

အကျဉ်းသား လွတ်မြောက်ရေး သံဃာ လှုပ်ရှားခဲ့အကျဉ်းသားလွတ်ရေး ဦးဝီရသူ လှုပ်ရှားမယ်
အကျဉ်းကျဆဲ နိုင်ငံရေးသမားများ အတွက် မန္တလေး မစိုးရိမ် တိုက်သစ်က ဆရာတော် ဦးဝိစိတ္တ သာရာဘိဝံသ ခေါ် ဦးဝီရသူက လှုပ်ရှားမှု တခု စတင်မယ်လို့ သိရပါတယ်။
ဆရာတော်ဟာ ဇန်နဝါရီ ၁၃ ရက်ကမှ မြစ်ကြီးနားထောင်က လွတ်လာတာပါ။
အကျဉ်းသားတွေ လွှတ်ပေးရေး အတွက် ပြည်ထဲရေး ဝန်ကြီး ဒုတိယ ဗိုလ်ချုပ်ကြီး ကိုကိုနဲ့ လူ့အခွင့်အရေး ကော်မရှင်နဲ့ တခြား အဖွဲ့တွေဆီ ဆရာတော် စာရေး တောင်းဆိုခဲ့ ပေမယ့်လည်း ပြန်ကြားစာ မရခဲ့ပါဘူး။
ပြည်ထောင်စုနေ့က လွှတ်ပေးမှု တစုံတရာ မရှိခဲ့တဲ့ အတွက် တပေါင်းလပြည့်နေ့ထိ စောင့်ကြည့်သွားမယ်၊ မထူးရင် လှုပ်ရှားမှု စမယ်လို့ ဆိုပါတယ်။
ပထမ အဆင့် အနေနဲ့ လွတ်မြောက်ပြီး နိုင်ငံရေး အကျဉ်းသားဟောင်းများနဲ့ မလွတ်မြောက်သေးသူများ မိသားစုတွေ ပူးပေါင်းပြီး စုပေါင်း ဆန္ဒပြုပွဲ လုပ်မယ်လို့ ဆိုပါတယ်။
ဘုန်းတော်ကြီး ၂ ပါး အပါအဝင် မလွတ်မြောက်သေးတဲ့ နိုင်ငံရေး အကျဉ်းသား ၇၈ ဦး ကျန်သေးတယ် လို့ ဆရာတော်က မိန့်ပါတယ်။

 ဒေါ်အောင်ဆန်းစုကြည်ရဲ့ ကချင်စည်းရုံးရေး ခရီးပြီးဆုံး
နိုင်ငံအေးချမ်းရေးအတွက် တပ်မတော်ဟာ ဒီမိုကရေစီ စိတ်ဓါတ် အပြည့်ရှိဖို့ လိုအပ် တယ်လို့ ဒေါ်အောင်ဆန်းစုကြည်က သူ့ရဲ့ ကချင်ပြည်နယ် စည်းရုံးရေး ခရီးစဉ်မှာ ပြောကြားလိုက်ပါတယ်။
ဒီမိုကရေစီ နိုင်ငံ ထူထောင်ရာမှာ တိုင်းရင်းသား လက်နက်ကိုင် အဖွဲ့အစည်းတွေလည်း ပါဝင်ဖို့ လိုတယ်လို့ ဒေါ်အောင်ဆန်းစုကြည်က ပြောပါ တယ်။
ကချင်ဒေသမှာ ရှိတဲ့ တိုင်းရင်းသား ဒေသခံတွေအနေနဲ့ နယ်မြေ တည်ငြိမ် အေးချမ်းဖို့၊ နယ်မြေ ဖွံ့ဖြိုးဖို့ စိတ်ဆန္ဒရှိကြတယ်ဆိုတာ တွေ့ရတယ်လို့ ဒေါ်အောင်ဆန်းစုကြည်က ပြောသွားပါတယ်။
NLD အမျိုးသား ဒီမိုကရေစီ အဖွဲ့ချုပ် ဥက္ကဌ ဒေါ်အောင်ဆန်းစုကြည်ဟာ သူ့ရဲ့ ကချင် ပြည်နယ် စည်းရုံးရေး ခရီးစဉ်အတွင်း သောကြာနေ့ မနက်က မြစ်ကြီးနားမြို့ စီတာပူ မနောကွင်းမှာ လူထုကို စကားပြောစဉ်မှာ အခုလို ပြောသွားတာပါ။
သူ့ရဲ့ ဟောပြောပွဲကို ပရိသတ် ၃သောင်းလောက် လာရောက်နားဆင်ခဲ့ကြပါတယ်။
နေ့လည်ပိုင်းမှာတော့ ဒေါ်အောင်ဆန်းစုကြည်ဟာ ဗန်းမော်မြို့ မနောကွင်းမှာ လူထုကို စည်းရုံး ဟောပြောခဲ့ရာမှာ လူထု ပရိသတ် သောင်းနဲ့ ချီ တက်ရောက်ခဲ့ပါတယ်။

 ဧပြီ ၁ ကြားဖြတ်ရွေးကောက်ပွဲ အရေးကြီး
မြန်မာနိုင်ငံကို လေးရက်ကြာ သွားရောက်ခဲ့ပြီး နိုင်ငံတော် သမ္မတ ဦးသိန်းစိန်၊ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်တို့နဲ့ တွေ့ဆုံဆွေးနွေးခဲ့တဲ့ အာဆီယံ အတွင်းရေးမှူးချုပ် ဒေါက်တာ စူရင် ပစ်ဆူဝမ်က ဧပြီ ၁ ကြားဖြတ် ရွေးကောက်ပွဲဟာ အရေးကြီးတယ်လို့ ဒီကနေ့ ထုတ်ဖော် ပြောကြားလိုက်ပါတယ်။
ထိုင်းနိုင်ငံ၊ ဘန်ကောက်မြို့က နိုင်ငံခြား သတင်းထောက်များ ကလပ်မှာ မြန်မာခရီးစဉ်နဲ့ ပတ်သက်တဲ့ အကြောင်းတွေကို ရှင်းလင်းခဲ့တာဖြစ်ပြီး မြန်မာနိုင်ငံက လက်ရှိနိုင်ငံရေး ဖြစ်ပေါ် ပြောင်းလဲမှုတွေဟာ စစ်မှန်တယ်လို့ သူက ထောက်ခံ ပြောခဲ့ပါတယ်။
``သမ္မတဦးဆောင်တဲ့ အစိုးရဟာ ပြုပြင်ပြောင်းလဲမှုတွေကို အားစိုက်ထုတ်ပြီး လုပ်နေတာကတော့ စစ်မှန်တယ်လို့ သုံးသပ်ပါတယ်။ သူတို့ဟာ ယုံယုံ ကြည်ကြည်နဲ့ သက်တောင့်သက်သာနဲ့ နောက်မဆုတ်ဘဲ လုပ်ဆောင်နေကြပါတယ်`` အာဆီယံ အတွင်းရေးမှူးချုပ် ဒေါက်တာ စူရင်က ပြောပါတယ်။
``မြန်မာ အာဆီယံ ဥက္ကဌအဖြစ် ဆောင်ရွက်မယ့် ၂၀၁၄ ဟာ အရေးကြီးပြီး အခွင့်အလမ်းတွေရော စိန်ခေါ်မှုတွေပါ ရှိနေတယ် ဆိုတာကိုလည်း သူတို့ သိပါတယ်၊ နိုင်ငံရေးဘက်မှာ ပွင့်လင်းမှုတွေ လိုသလို အခြေခံ အဆောက်အဦ တွေဖြစ်တဲ့ လမ်းတွေ၊ ဟိုတယ်တွေ၊ ဆက်သွယ်ရေးစနစ်တွေ၊ အင်တာနက်၊ ဘဏ်နဲ့ ဘဏ္ဍာရေးစနစ်တွေ အဆင်သင့်ဖြစ်အောင် လုပ်ရမယ်`` လို့ အာဆီယံ အတွင်းရေးမှူးချုပ်က ဆက် ပြောပါတယ်။
တခါ ဒေါ်အောင်ဆန်းစုကြည်ကိုယ်တိုင် NLD ပါတီကို တရားဝင်ပါတီအဖြစ် မှတ်ပုံပြန်တင်လို့ ဒီကနေ့မှာဆို ကချင်ပြည်နယ် မြစ်ကြီးနားမှာတောင် မဲဆွယ်တရား ဟောခဲ့ပါတယ်။ မြန်မာနိုင်ငံရေး ဖြစ်ပေါ်ပြောင်းလဲမှုတွေကနေ မြန်မာဟာ ၁၀ နှစ်အတွင်းမှာ အာဆီယံနိုင်ငံတွေကို ကျော်မယ်လို့ ဒေါ်အောင်ဆန်းစုကြည်က ပြောခဲ့တယ်လို့လည်း အာဆီယံ အတွင်းရေးမှူးချုပ်က ပြောပါတယ်။
``ဒေါ်အောင်ဆန်းစုကြည်က မြန်မာဟာ ၁၀ နှစ်အတွင်း အာဆီယံထက် သာမယ်လို့ ပြောပါတယ်။ ကျွန်တော်ကလည်း ကြိုဆိုပါတယ်လို့ ပြန်ပြောခဲ့ပြီး မြန်မာရဲ့ ဖွံ့ဖြိုးမှု၊ တိုးတက်မှုဟာ အာဆီယံ အရှိန်အဟုန်ထဲမှာ အချိုးညီညီ ပေါင်းစပ်တိုးတက်တာမျိုး ဖြစ်တာကောင်းပါတယ်`` လို့ အာဆီယံ အတွင်းရေးမှူးချုပ်က ပြောပါတယ်။
တခါ လက်ရှိအစိုးရနဲ့လွှတ်တော်ဟာ စစ်ဗိုလ်ချုပ်တွေ ဦးစီးထားတာ ဖြစ်တဲ့ အတွက် ဗိုလ်ချုပ်ကြီးဟောင်းတွေရဲ့ စိတ်ဓာတ်နဲ့ အပြုအမူတွေကို ဒေါ်အောင်ဆန်းစုကြည်တယောက် နားလည် ထားတဲ့ အကြောင်းကိုလည်း အာဆီယံ အတွင်းရေးမှူးချုပ်က ရှင်းပြခဲ့ပါသေးတယ်။
``ဒေါ်အောင်ဆန်းစုကြည် ပြောတာကတော့ စစ်ဗိုလ်ချုပ်ကြီးတွေဟာ ဆယ်စု နှစ်ပေါင်းများစွာ အာဏာကို ချုပ်ကိုင်ထားခဲ့တော့ ဘယ်ဟာက မျှတတဲ့ ယှဉ်ပြိုင်မှု၊ ဘယ်လို ရွေးကောက်ပွဲက လွတ်လပ်ပြီး တရားမျှတတဲ့ ရွေးကောက်ပွဲဆိုတာကို သေချာနားလည်ဖို့ ခက်နေကြတယ်ဆိုပြီး ဥပမာတွေနဲ့ ရှင်းပြခဲ့တယ်`` လို့ ဒေါက်တာစူရင်က ဘန်ကောက် ရှင်းလင်းပွဲမှာ ပြောပါတယ်။
တခါ အာဆီယံဟာ လာမယ့် ဧပြီ ၁ ကြားဖြတ်ရွေးကောက်ပွဲကို လေ့လာ စောင့်ကြည့်ဖို့ သမ္မတ ဦးသိန်းစိန်ကို သူ ဖျောင်းဖြပြောဆိုခဲ့သလို ဒီရွေးကောက်ပွဲဟာ နိုင်ငံတကာက မြန်မာကို တင်းပြည့်ကျပ်ပြည့် ပြန်လက်ခံဖို့ အရေးကြီးတဲ့ ဆုံဖြတ်ချက်တခုလို့ ဒေါက်တာ စူရင်က ပြောပါတယ်။
``ဒေါ်အောင်ဆန်းစုကြည် အပါအဝင် သူ့ပါတီ ပါဝင်ယှဉ်ပြိုင်မယ့် ဒီ ၄၈ နေရာပဲ ရှိတဲ့ ကြားဖြတ် ရွေးကောက်ပွဲဟာ နိုင်ငံတကာက မြန်မာကို အပြည့်အဝ ယုံကြည်သွားဖို့ အင်မတန်မှကို အရေးကြီးပါတယ်။ ဘာကြောင့် အရေးကြီးတယ်လို့ ပြောရသလဲ ဆိုတော့ နိုင်ငံတကာက မြန်မာနိုင်ငံတွင်းက အခြေအနေကို စောင့်ကြည့်နေလို့ပါပဲ`` လို့ သူက ဆိုပါတယ်။
``မြန်မာနိုင်ငံက အပြောင်းအလဲဟာ ရှေ့တိုးပါ့မလား၊ ဒီအပြောင်းအလဲဟာ ပိုပိုပြီး ပွင့်လင်းလာပါ့မလားဆိုတာ သိပ်ကို အရေးကြီးပါတယ်။ ဒါကြောင့် ၂၀၁၀ နိုဝင်ဘာ အခင်းအကျင်းအောက် လျှော့ပြီး ဘာတခုမှ မလုပ်ဖို့ကို သမ္မတ ဦးသိန်းစိန်ကို သူ့အနေ့နဲ့ တိုက်တွန်းခဲ့ပါတယ်`` လို့ အာဆီယံ အတွင်းရေးမှူးချုပ်က ရှင်းခဲ့ပါတယ်။
အတွင်းရေးမှူးချုပ်က မြန်မာခရီးစဉ်တွင်း တွေ့ရှိချက်တွေကို အာဆီယံ သံအမတ်ကြီးတွေကိုတော့ တင်ပြပြီး ဖြစ်ကြောင်းနဲ့ အာဆီယံအဖွဲ့ဝင် အစိုးရတွေနဲ့ ဝန်ကြီးတွေကိုလည်း ဧပြီ ၁ ကြားဖြတ်ရွေးကောက်ပွဲနဲ့ ပတ်သက်လို့ ဆက်ပြီး တင်ပြသွားမယ်လို့လည်း ပြောခဲ့ပါတယ်။
တခါ မြန်မာနိုင်ငံရဲ့ စီးပွားရေးနဲ့ လူမှုရေးဖွံ့ဖြိုးမှုတွေအတွက် ကမ္ဘာ့ဘဏ်နဲ့ နိုင်ငံတကာ ငွေကြေးရန်ပုံငွေ အဖွဲ့တွေကလည်း တဖြည်းဖြည်းနဲ့ တိုးလို့ ကူညီလာနေကြောင်းကိုလည်း သုံးသပ်ပြောကြားခဲ့ပါတယ်။

 အသိမ်းခံရတဲ့ လက်နက်တွေ DKBA ပြန်ရ
DKBA တွေဆီက သေနတ် ၃၂ လက်ကို BGF နယ်ခြားစောင့်တပ်က သိမ်းယူသွားခဲ့တာပါ
အစိုးရလက်အောက်ခံ BGF နယ်ခြားစောင့် တပ်ကနေ DKBA ဆီက သိမ်းယူထားတဲ့ လက်နက်တွေကို အစိုးရက DKBA ကို ပြန်ပေးလိုက်တဲ့ အတွက် တင်းမာမှုတွေ အဆုံးသတ်သွားပြီ ဖြစ်ပါတယ်။
BGF နယ်ခြားစောင့်တပ်က DKBA ဆီကနေ သိမ်းယူသွားတဲ့ သေနတ်တွေကို အစိုးရစစ်တပ် တာဝန်ရှိသူက DKBA ပြည်တွင်း ဆက်သွယ် ရေး တာဝန်ခံ ဒုဗိုလ်မှူးကြီးမောင်လေးကို သောကြားနေ့ မွန်းလွဲပိုင်းက ပြန်ပေးလိုက်တာ ဖြစ်ပါတယ်။
အစိုးရကကြားဝင်ပြီး အခုပြဿနာကို ဖြေရှင်းပေးတဲ့ အပေါ်မှာ DKBA နိုင်ငံခြား ဆက်ဆံ ရေး တာဝန်ခံဗိုလ်မှူးစောလုံ့လုံက အစိုးရအနေနဲ့ မြန်မာပြည်ငြိမ်းချမ်းရေး ဖေါ်ဆောင်ရေး လုပ်ငန်းကို တကယ်ပဲ စိတ်ဆန္ဒ စေတနာရှိရှိနဲ့ အားသွန်ခွန်စိုက် လုပ်ဆောင်နေတယ်လို့ သတ်မှတ်ကြောင်း ပြောပါတယ်။
ပြီးခဲ့တဲ့ သီတင်းပတ်က မြိုင်ကြီးငူဒေသ အခြေစိုက် BGF နယ်ခြားစောင့်တပ်ကနေပြီးတော့ အဲဒီဒေသတဝိုက်မှာ လှုပ်ရှားနေတဲ့ DKBAတွေဆီက သေနတ် ၃၂ လက်ကို သိမ်းယူသွားခဲ့ ပါတယ်။
ဖေဖေါ်ဝါရီလ ၂၁ နေ့တုန်းက အဲဒီကိစ္စကို ဖြေရှင်းပြီး လက်နက်တွေပြန်ပေးမယ်လို့ ပြောပြီး ကာမှ အစိုးရအရာရှိ တယောက်က ပြန်မပေးဘူး ဆိုတဲ့အတွက်၊ DKBA က သူတို့နဲ့ အစိုးရအကြား ချုပ်ဆိုထားတဲ့ စာချုပ် ပျက်ပြယ်သွားပြီလို့ ကြေညာခဲ့ပါတယ်။
ဒါပေမဲ့လို့ အစိုးရစစ်တပ်ကနေ ကြားဝင်ပြီး လက်နက်တွေကို အခုလို ပြန်ပေးလိုက်တဲ့ အတွက် အပစ်အခတ်ရပ်စဲရေး စာချုပ်ဟာ ပုံမှန်အတိုင်း အသက်ဝင်နေသေးတယ် လို့ DKBA က ပြောပါတယ်။

ဆိုမာလီ တည်ငြိမ်ရေး အတွက် အလှည့်အပြောင်းဆိုမာလီ ဆွေးနွေးပွဲပြီး
ဗြိတိသျှ ဝန်ကြီးချုပ် ဒေးဗစ် ကင်မရွန်းက ဆိုမာလီ လုံခြုံရေး ၊ ပင်လယ်ဓားပြ ကိစ္စ၊ လူမှု ကူညီရေးနဲ့ နိုင်ငံရေး ဖြစ်စဉ်လို အရေးကြီးတဲ့ ကိစ္စတွေ အတွက် သဘော တူညီချက်တွေ ရခဲ့တယ်လို့ ဆိုမာလီ အရေး နိုင်ငံတကာ ဆွေးနွေးပွဲကြီး ပိတ်ပွဲမှာ ပြောကြား ခဲ့ပါတယ်။
ဆိုမာလီ တည်ငြိမ်ရေးနဲ့ သာယာ ဝပြောရေး အတွက် အလှည့်အပြောင်းလို့ မစ္စတာ ကင်မရွန်းက လန်ဒန် အစည်း အဝေးမှာ ကြုံးဝါး ခဲ့ပါတယ်။
အမေရိကန် နိုင်ငံခြားရေး ဝန်ကြီး ဟီလာရီ ကလင်တန် ကတော့ ပြုပြင် ပြောင်းလဲရေးကို နှောင့်ယှက်သူ မှန်သမျှကို ပိတ်ဆို့ အရေးယူပြီး ခရီး သွားလာခွင့်တွေ ကန့်သတ်မယ်လို့ ခြိမ်းခြောက် ပါတယ်။
ဆိုမာလီ အသွင် ကူးပြောင်းရေး အစိုးရလည်း တက်ရောက်ပါတယ်။ ဒါပေမယ့် အယ်လ် ရှာဘတ် အစ္စလာမ်မစ် စစ်သွေးကြွ အုပ်စု ကတော့ အစည်းအဝေးကို ရှုတ်ချ ခဲ့ပါတယ်။

မြစ်ဆုံ ကျေးဇူးတင်ချီးမွမ်းပွဲ ၈၈ ခေါင်းဆောင်တွေ တက်ရောက်
By ကိုမိုးဇော်
မြစ်ဆုံဆည်စီမံကိန်း ရပ်တန့်လိုက်တဲ့အတွက် မြစ်ဆုံဒေသက ပြောင်းရွှေ့ခံရတဲ့ ကျေးရွာသားတွေက မြစ်ဆုံအရေးအတွက် ပါဝင် ဆောင်ရွက်ခဲ့သူတွေကို ဖိတ်ကြားပြီး ဒီကနေ့ ဘာသာပေါင်းစုံ ကျေးဇူးတော် ချီးမွမ်းပွဲ ကျင်းပခဲ့ပါတယ်။ ဒီအခမ်းအနားမှာ ဒေသခံတွေက  သူတို့ရဲ့ မူရင်းဒေသကို ပြန်လည် နေထိုင် လုပ်ကိုင်စားသောက်ခွင့် ရလိုကြောင်း  ပြောဆိုခဲ့သလို ဒီအခမ်းအနားကို တက်ရောက်တဲ့ ၈၈ မျိုးဆက် ကျောင်းသားခေါင်းဆောင်တွေ ကလည်း မြစ်ဆုံစီမံကိန်းကို ထပ်မံ အကောင်အထည် မဖော်ဖို့အတွက် တိုက်တွန်းပါတယ်။ ဒီသတင်းကိုတော့ ထိုင်းအခြေစိုက် သတင်းထောက် ကိုမိုးဇော်က တင်ပြထားပါတယ်။

ဧရာဝတီမြစ်ရဲ့အစ မေခနဲ့ မလိခ ပေါင်းဆုံရာဒေသမှာ မြစ်ဆုံဆည် စီမံကိန်း စတင် အကောင်အထည် ဖော်တဲ့ အချိန်မှာ အဲဒီတန်ဖဲ၊ မလိဇွပ်၊ ပဒန်၊ မြစ်ဆုံ စတဲ့ ရွာ လေးရွာက  အိမ်ထောင်စု ၃၀၀ ကျော်ဟာ အဓမ္မ နေရာပြောင်းရွှေ့ စေခိုင်းခံခဲ့ရတာ ဖြစ်ပါတယ်။
ဒီကနေ့မှာတော့ ရေကာတာ စီမံကိန်း ရပ်ဆိုင်းလိုက်တဲ့အတွက် မြစ်ဆုံဒေသခံ ရွာသားတွေက စီမံကိန်း ရပ်တန့်ဖို့အတွက် ပါဝင်ဆောင်ရွက်ခဲ့ကြတဲ့ သဘာဝပတ်ဝန်းကျင်အရေး ဆောင်ရွက်သူတွေ၊ နိုင်ငံရေး အဖွဲ့အစည်းတွေ၊ အနုပညာရှင်တွေ ဖိတ်ခေါ်ပြီး မြစ်ဆုံရွာမှာ ဘာသာပေါင်းစုံ ကျေးဇူးတင် ချီးမွမ်းပွဲ အခမ်းအနား ကျင်းပခဲ့တာ ဖြစ်ပါတယ်။
ဒီအခမ်းအနားကို တက်ရောက်လာတဲ့ တန်ဖဲ ရွာသားတစ်ယောက်က နေခွင့်ရမယ်ဆို သူတို့ မူလကျေးရွာမှာ ပြန်လည် လုပ်ကိုင်စားသောက်ခွင့် ရလိုကြောင်း ပြောပါတယ်။
“ဘာဖြစ်လဲဆိုတော့ ဒီလိုပါဗျာ။ အစိုးရ စီမံကိန်း ဆိုပြီးတော့ ရေကာတာလုပ်ဖို့ ဆိုပြီးတော့မှ ကျနော်တို့ တန်ဖဲရွာသားတွေကို အောင်မြင်သာ စံပြကျေးရွာ ဆိုတဲ့နေရာမှာ ကျနော်တို့ကို ထား ထားပါတယ်။ အိမ်တော့ ရပါတယ်။ မီးလည်းရပါတယ်။ နောက် ရေလည်း ရပါတယ်။ ဒါပေမဲ့ ကျနော်တို့မှာ လုပ်ကိုင်စားသောက်ဖို့ရာ နေရာက မရှိဘူးဗျ။ သူတို့က မြေကွက်နှစ်ကွက်စီ ပေးထားတယ်။ အဲဒါက ဘာဖြစ်လဲဆိုတော့ ကျောက်ဆောင်တွေ ဖြစ်နေတယ်။ အဲဒီမှာ ဘာမှ စိုက်လို့လည်း မရဘူး။ ဒါကြောင့် ကျနော်တို့က အခုက ရေကာတာ မလုပ်တော့ဘူး ဆိုတော့ နေလို့ရတယ် ဆိုရင်တော့ ကျနော်တို့က တန်ဖဲမှာပဲ ပြန်နေချင်ပါတယ်။”
အခုအခါမှာ  တောင်ယာ လုပ်ကိုင်စားသောက် သူတွေဟာ သူတို့ မူရင်းဒေသကို ပြန်လာပြီး တောင်ယာပြန်ခုတ် နေကြပြီ ဖြစ်ပါတယ်။ ပဒန်ကျေးရွာဘက်က လူတွေကတော့ သူတို့ တောင်ယာနဲ့ ဥယျာဉ်ခြံတွေကို ရေကာတာ စီမံကိန်းအတွက် တူးဖြိုလိုက်တဲ့အတွက် တန်ဖဲရွာမှာပဲ လာရောက် လုပ်ကိုင် စားနေကြတယ်လို့ တန်ဖဲရွာသားက ပြောပါတယ်။
ဒီကနေ့ကျင်းပတဲ့ အခမ်းအနားကို ၈၈ မျိုးဆက် ကျောင်းသား ခေါင်းဆောင်တွေလည်း တက်ရောက်ခဲ့ကြပြီး ကိုမင်းကိုနိုင်က ဧရာဝတီမြစ်ဟာ မြန်မာနိုင်ငံရဲ့ အသက်သွေးကြော ဖြစ်တာကြောင့် မြစ်ဆုံဒေသကို ကာကွယ် စောင့်ရှောက်ဖို့ ပြောဆိုပါတယ်။ ဒီအခမ်းအနားကို တက်ရောက်ခဲ့တဲ့ ၈၈ မျိုးဆက် ကျောင်းသား ခေါင်းဆောင် ကိုမြအေးကတော့ မြစ်ဆုံဆည် စီမံကိန်းကို ထာဝရ ရပ်တန့်ဖို့ လိုအပ်ကြောင်း ပြောပါတယ်။
“သမ္မတကြီး ဦးသိန်းစိန်အနေနဲ့ သူ့သက်တမ်းကာလမှာ ရပ်တန့်ထားမယ်လို့ ပြောတာကို သမ္မတကြီးကို အရမ်း ကျေးဇူးတင်ပါတယ် ဆိုတာ အရင်ပြောချင်ပါတယ်။ ဒါဟာ တိုင်းရင်းသားတွေအတွက် အထူးလိုအပ်တဲ့ အချက်တစ်ချက်ကို သမ္မတကြီးက လိုက်လိုက်လျောလျော လုပ်ပေးလိုက်တာလို့ မြင်တယ်။ နောက် နံပတ် (၂) အချက်အနေနဲ့က ထာဝရ မြစ်ဆုံစီမံကိန်း ရပ်ဆိုင်းသွားဖို့ လိုပါတယ်။ အဲတော့ ဒီဒေသမှာရှိတဲ့ လူတွေက သမ္မတကြီးသက်တမ်းမှာ ရပ်ဆိုင်းထားမယ် ဆိုတဲ့အခါကျတော့ နောက် ပြန်များလုပ်မလား ဆိုတဲ့ စိုးရိမ်ပူပင် သောကစိတ်တွေ ရှိနေပါတယ်။ အဲဒါကို အခြေခံပြီး ဒီကနေ့ ဆုတောင်းပွဲက လုပ်ရခြင်းလည်း ဖြစ်ပါတယ်။ မြစ်ဆုံစီမံကိန်း ရပ်ဆိုင်းသွားဖို့၊ ထာဝရပေါ့၊ အမြဲတမ်း ရပ်ဆိုင်းသွားဖို့ အားလုံးက သူတို့ရဲ့ဆန္ဒတွေကို ဖော်ထုတ် ပြောသွားပါတယ်။”
နိုင်ငံတော်သမ္မတ ဦးသိန်းစိန်က မြစ်ဆုံစီမံကိန်း ရပ်ဆိုင်းဖို့အတွက် ပြီးခဲ့တဲ့နှစ် စက်တင်ဘာလကုန်က ညွှန်ကြားခဲ့ပေမဲ့ မေခနဲ့ မလိခမြစ်ပေါ်မှာ လိုင်ဇာ၊ ခေါင်လန်ဖူး၊ ဖီဇော၊ လာကင်၊ ပါရှီနဲ့ ချီဗွေ စတဲ့ စီမံကိန်း ၇ ခုလောက်ကို ဆက်လက် တည်ဆောက်ဖို့ ရည်ရွယ်ထားပြီး အခုအခါမှာ ချီဗွေ ရေကာတာကို ဆက်လက် တည်ဆောက်နေဆဲ ဖြစ်ပါတယ်။
FREDA ခေါ် သယံဇာတ ပတ်ဝန်းကျင် ဖွံဖြိုးတိုးတက်ရေးနဲ့ ထိန်းသိမ်းစောင့်ရှောက်ရေး အသင်းရဲ့ ဒုဥက္ကဋ္ဌ ဦးအုန်းကတော့ ဟိမ၀န္တာက ရေခဲမြစ်တွေ အရည်ပျော်လို့ ရုတ်တရက် ရေကြီးလာလို့ မြစ်ဆုံအထက်ပိုင်းက ဆည်တွေမှာ ကျိုးပျက်ရင် မြစ်ကြီးနားအပါအ၀င် ကချင်ပြည်နယ်မှာ ရေလွှမ်းမိုးနိုင်တယ်လို့ သုံးသပ်ထားပါတယ်။
ထိုင်းနိုင်ငံမှာ အခြေစိုက် လှုပ်ရှားနေတဲ့ မြန်မာမြစ်ကြောင်းများ စောင့်ကြည့်ရေး ကွန်ယက်အဖွဲ့ ကတော့ မေခနဲ့ မလိခမြစ်ပေါ်က ရေကာတာ စီမံကိန်း ၇ ခုကို ရပ်ဆိုင်းဖို့ တောင်းဆိုထားတာ ဖြစ်ပါတယ်။

အာဆီယံ ဥက္ကဋ္ဌ တာဝန်ကျေဖို့ အများကြီး ပြင်ဆင်ရဦးမည်
By ဗွီအိုအေ (မြန်မာဌာန)
မြန်မာနိုင်ငံအနေနဲ့ ၂၀၁၄ ခုနှစ်မှာ အရှေ့တောင်အာရှ နိုင်ငံများ အသင်းကြီး အာဆီယံ (ASEAN) နှစ်ပတ်လည် ညီလာခံကြီး လက်ခံ ကျင်းပနိုင်ဖို့အတွက် ပြင်ဆင်စရာတွေ အများကြီး လိုအပ်နေသေးတယ် လို့ အာဆီယံအဖွဲ့ရဲ့ အတွင်းရေးမှူးချုပ်က ပြောဆိုလိုက်ပါတယ်။
မြန်မာအစိုးရ အနေနဲ့ အာဆီယံ အသင်းကြီးရဲ့ ဥက္ကဋ္ဌရာထူးကို အောင်အောင်မြင်မြင် ထမ်းဆောင်နိုင်ဖို့ အတွက် ဆိုရင် ကြားကာလ ၂ နှစ် အချိန်ကာလအတွင်း လုပ်ဆောင်ပြဖို့ ကိစ္စတွေ အများအပြား လိုအပ်နေသေးတယ်လို့ မြန်မာပြည်ကို ၅ ရက်ခရီး သွားရောက်ပြီး ပြန်လာတဲ့ အာဆီယံ အတွင်းရေးမှူးချုပ် ဆူရင်းပစ်ဆူဝမ်က ဘန်ကောက်မြို့မှာ အခုလို ထုတ်ဖော် ပြောဆိုလိုက်တာပါ။
မြန်မာနိုင်ငံအနေနဲ့ ၁၉၉၇ ခုနှစ်မှာ အာဆီယံအဖွဲ့ဝင် နိုင်ငံ ဖြစ်လာပြီးတဲ့နောက်ပိုင်း ပထမဦးဆုံးအကြိမ် အဖြစ် ၂၀၁၄ ခုနှစ်ကျရင် အသင်းကြီးရဲ့ ဥက္ကဋ္ဌတာဝန်နဲ့ နှစ်ပတ်လည် ညီလာခံတွေ လက်ခံကျင်းပဖို့အတွက် အသင်းကြီးက ပြီးခဲ့တဲ့ နိုဝင်ဘာလမှာ လက်ခံ သဘောတူခဲ့တာ ဖြစ်ပါတယ်။
မြန်မာနိုင်ငံမှာ ၂၀၁၄ ခုနှစ် အာဆီယံညီလာခံ မကျင်းပခင် လမ်းတွေ၊ တယ်လီဖုန်း ဆက်သွယ်ရေးစနစ်၊ ဟိုတယ်တွေ နဲ့ ကောင်းမွန်တဲ့ အင်တာနက်စနစ် စတာတွေမှာ ရင်းနှီးမြှုပ်နှံမှုတွေ လုပ်ဖို့လိုနေတယ်လို့ ပြောပါတယ်။ ဒါတွေရှိမှသာ နိုင်ငံခေါင်းဆောင်တွေ၊ လာရောက်မယ့် ကိုယ်စားလှယ်တွေနဲ့ သတင်းသမားတွေကို အဆင်ပြေအောင် ဆွဲဆောင်နိုင်မှု ရှိလိမ့်မယ်လို့ မစ္စတာ ဆူရင်းက ပြောပါတယ်။
နောက်ပြီး မြန်မာပြည်မှာ ငွေရေးကြေးရေး စနစ်နဲ့ ပတ်သက်တဲ့ ပြုပြင် ပြောင်းလဲမှုတွေလည်း လုပ်ဖို့ လိုနေသေးတယ်လို့ ပြောပါတယ်။ နိုင်ငံတကာဆိုင်ရာ အရေးကြီးတဲ့ ညီလာခံတစ်ခု ဖြစ်မြောက်ဖို့အတွက် လုပ်ဆောင်ရာမှာ ငွေစက္ကူ အသုံးပြုတဲ့စနစ်နဲ့ ကျင်းပဖို့ မရနိုင်ဘူးလို့ မစ္စတာ ဆူရင်းပစ်ဆူဝမ်က သတင်းစာရှင်းလင်းပွဲမှာ ပြောပါတယ်။
စီးပွားရေး အရေးယူပိတ်ဆို့မှုတွေ ရှိနေပြီး အကြွေးဝယ်ကဒ်တွေနဲ့ မြန်မာနိုင်ငံမှာ ဈေးဝယ်ဖို့ ခက်ခဲမှုတွေ ရှိသလို ATM ငွေထုတ်စက် ဆိုတာလည်း မပြောပလောက်အောင်ပဲ ရှိနေသေးတယ်လို့ ပြောပါတယ်။
မြန်မာနိုင်ငံမှာ  စစ်အာဏာရှင်စနစ် အဆုံးသတ်ပြီး သမ္မတဦးသိန်းစိန်ရဲ့ အရပ်သားအစိုးရက ပြုပြင် ပြောင်းလဲမှုတွေ စတင် ပြုလုပ်လာပြီးတဲ့နောက်မှာ အာဆီယံဥက္ကဋ္ဌ တာဝန်ယူနိုင်ဖို့အတွက် အသင်းကြီးက ဆုံးဖြတ်ခဲ့တာ ဖြစ်ပါတယ်။

အုန်းဖြန်စခန်းမီး ဒုက္ခသည် ၄,၄၀၀ ကျော် အိုးအိမ်မဲ့
By မအေးအေးမာ
ထိုင်း-မြန်မာနယ်စပ် တက်ခ် ခရိုင်ထဲက အုန်းဖြန် ဒုက္ခသည်စခန်းမှာ မီးလောင်မှု ဖြစ်ပွားခဲ့တဲ့အတွက် လူဦးရေ ၄,၄၀၀ ကျော် အိုးအိမ်မဲ့ ဘ၀ကို ရောက်သွားကြရပါတယ်။ ဒီအကြောင်း စခန်း တာဝန်ရှိသူတွေကို မေးမြန်းပြီး ထိုင်းအခြေစိုက် သတင်းထောက် မအေးအေးမာက တင်ပြထားပါတယ်။
ထိုင်း-မြန်မာ နယ်စပ်က လူဦးရေ ၂၆,၀၀၀ ကျော်ရှိတဲ့ အုန်းဖြန် ဒုက္ခသည်စခန်းမှာ ဖေဖော်ဝါရီလ ၂၃ ရက်နေ့က မီးလောင်ကျွမ်းမှုကြောင့် အိမ်ခြေ ၅၀၀ ကျော် မီးလောင်ခဲ့ပြီး လူဦးရေ ၄,၄၀၀ ကျော် အိုးအိမ်မဲ့ ဖြစ်ခဲ့ရတယ်လို့ စခန်းကော်မတီ ဥက္ကဋ္ဌ စောဝါးတီးက ပြောပါတယ်။
“အားလုံးပေါင်းက ၅၆၆ လုံး၊ လူဦးရေ ၄,၄၁၀။ ဒဏ်ရာရတာကတော့ အယောက် ၂၀ လောက် ရှိတယ်နော်။ ဒဏ်ရာ ရတာကတော့ ကလေးလည်း ပါတယ်၊ လူကြီးလည်း ပါတယ်၊ လူလတ်လည်း ပါတယ်။ တချို့ကလည်း ပြေးလွှားရင်းနဲ့ မီးဟပ်တာလည်း ရှိတယ်။ ကျနော်တို့ကတော့ စီစဉ်နေတာပဲ။ အခက်အခဲကတော့ အများကြီး ရင်ဆိုင်ရမယ်။ ဘာဖြစ်လို့လဲဆိုတော့ သူတို့က အသက်လွတ်ပြီးတော့ ရုန်းရတာကိုး။ အစစအရာရာ လိုအပ်တာပေါ့။”
အခုဆိုရင် နေထိုင်စရာတွေ ခက်ခဲနေတဲ့အတွက် နီးစပ်ရာ စာသင်ကျောင်း၊ ဗလီ စတဲ့ နေရာတွေမှာ မီးဘေးသင့် ဒုက္ခသည်တွေ ခိုလုံနေကြရတယ်လို့ ဆိုပါတယ်။
“တချို့ကတော့ ဗလီမှာ နေတယ်။ တချို့ကတော့ ရုံးတွေမှာ လိုက်နေတယ်၊ ကျောင်းတွေမှာ လိုက်နေတယ်၊ ဂိုထောင်တွေမှာ လိုက်နေတယ်။ နောက် အသိမိတ်ဆွေ အိမ်တွေမှာ လိုက်နေကြတယ်။”
အုန်းဖြန် ဒုက္ခသည်းစခန်းဟာ နှစ်စဉ်နှစ်တိုင်း မကြာခဏ ဆိုသလို မီးလောင်မှုတွေ ဖြစ်တာကြောင့် မီးသတ်ကားတွေ အဆင်သင့် ထားပေးဖို့ အကူအညီတွေ လိုအပ်နေတယ်လို့လည်း စခန်းကော်မတီ ဥက္ကဋ္ဌက ဆိုပါတယ်။
“ကျနော်တို့နေတဲ့ နေရာဒေသက မီးတွေဘာတွေ လောင်လွယ်တာပေါ့။ ဒီနှစ် လောင်သလိုပဲ နှစ်စဉ်နှစ်တိုင်းလိုလို အနည်းဆုံးတော့ ကိုးကြိမ်ဆယ်ကြိမ်လောက် လောင်တာပဲ။ ဘာဖြစ်လို့လဲ ဆိုတော့ လေကလည်း တိုက်တယ်။ လေကလည်း ကြမ်းတယ်ဆိုတော့။ ကျနော် ပြောချင်တာကတော့ ကျနော်တို့ မီးတွေဘာတွေနဲ့ ပတ်သက်ပြီးတော့ ဖြစ်လာခဲ့သော် ဒီနေရာမှာဆက်နေနိုင်ဖို့ မီးအန္တရာယ်က ကာကွယ်နိုင်ဖို့ မီးသတ်ကားလေး ဘာလေး စုပေါင်းပြီးတော့ လုပ်ပေးနိုင်မယ်ဆိုရင် ကောင်းမလားပေါ့နော်။ အဲဒါက တစ်ချက်ပေါ့နော်။ ပြောလို့မရဘူးလေ ဒီနေရာတွေကလည်း စိုးရိမ်ရတယ်လေ။ နောက်တစ်ခုကတော့ ဘယ်လိုပြောမလဲ ကျနော်တို့ ဒီနေ့ ဒုက္ခကနေ နောက်ထပ် ဒုက္ခထပ်ဖြစ်တဲ့အခါမှာ လူမှုရေး စာနာထောက်ထားပြီးတော့ ကျန်းမာရေး အရသော်လည်းကောင်း၊ ပညာရေးအရ သော်လည်းကောင်းပေါ့။ အထူးသဖြင့် ကျန်းမာရေးနဲ့ ပညာရေးနဲ့ ပတ်သက်ပြီးတော့ မြင့်တင်ပေးဖို့ပေါ့နော်။”
လက်ရှိမှာတော့  စခန်းတွင်းက မီးဘေး သင့်သူတွေအတွက် ကုလသမဂ္ဂ မဟာမင်းကြီးရုံးက တာဝန်ရှိသူတွေ၊ မဲဆောက်က အာဏာပိုင်တွေ၊ လူမှုရေးအသင်းအဖွဲ့တွေ၊ အစိုးရမဟုတ်တဲ့အဖွဲ့တွေ၊ ဘာသာရေးအဖွဲ့တွေက အကူအညီတွေ ပေးနေတယ်လို့လည်း ပြောပါတယ်။  အုန်းဖြန် ဒုက္ခသည် စခန်းတွင်းမှာ လက်ရှိ စာရင်းဝင်ပြီးသား လူဦးရေ ၁၇,၀၀၀ ကျော်ရှိပြီး စာရင်းမ၀င်သူတွေနဲ့ ပေါင်းရင် လူဦးရေ ၂၆,၀၀၀ ကျော် ရှိပါတယ်။

ဆီးရီးယားအရေး ကမ္ဘာ့ခေါင်းဆောင်တွေ တိုင်ပင်
By ဗွီအိုအေ (မြန်မာဌာန)
ဆီးရီးယား အာဏာပိုင်တွေအနေနဲ့ အကြမ်းဖက်မှုတွေ ချက်ချင်း ရပ်ဆိုင်းဖို့နဲ့ နိုင်ငံတကာရဲ့ လူသားချင်း စာနာထောက်ထားမှု အကူအညီတွေ ဖြန့်ဝေခွင့်ပြုရေး တောင်းဆိုမှုတွေ လုပ်ဖို့အတွက် တူနီးရှားနိုင်ငံမှာ စုဝေးနေကြတဲ့ အနောက်နိုင်ငံတွေနဲ့ အာရပ်နိုင်ငံတွေက ဦးဆောင်တဲ့ အဖွဲ့တစ်ခုက ပြင်ဆင်နေပါတယ်။ ဒီကနေ့ ဆီးရီးယား ပြည်သူတွေရဲ့ မိတ်ဆွေများအဖွဲ့ အစည်းအဝေးမှာ တင်ပြဖို့ရှိတဲ့ ကြေညာချက် မူကြမ်းထဲမှာ ဆီးရီးယား သမ္မတ ဘက်ရှာ အယ်လ်အာဆဒ်ကို ၁၁ လကြာ လူထုဆန္ဒပြပွဲတွေအပေါ် အကြမ်းဖက် နှိပ်ကွပ်မှုတွေကို ချက်ချင်းရပ်ဆိုင်းဖို့ သံတမန်တွေက တောင်းဆိုလိမ့်မယ်လို့ မျှော်လင့်ရသလို ဒါမှသာ ၄၈ နာရီအတွင်း ကူညီထောက်ပံ့ရေး ပစ္စည်းတွေ ဖြန့်ဝေခွင့်ရမှာ ဖြစ်ပါတယ်။
အတိုက်အခံ ဆန္ဒပြသူတွေရဲ့အချက်အချာနေရာတွေကို ၀န်းရံထားတဲ့ သမ္မတ အာဆဒ် လိုလားတဲ့ တပ်ဖွဲ့တွေက သီတင်းပတ် သုံးပတ်နီးပါး အဆက်မပြတ် ဗုံးကျဲ တိုက်ခိုက်မှုတွေ လုပ်ခဲ့ပြီးတဲ့နောက် ဆီးရီးယားရဲ့ အချက်အချာကျတဲ့ ဟုမ်းစ် မြို့က ဒေသခံပြည်သူတွေ အတွက် အစားအစာ၊ ရေ နဲ့ ဆေးဝါးထောက်ကူ ပစ္စည်းတွေဟာ စိုးရိမ်ရတဲ့ အခြေအနေအထိ နည်းပါးလာနေတာ ဖြစ်ပါတယ်။ ဆီးရီးယားရဲ့ မိတ်ဆွေများအဖွဲ့ က ဆီးရီးယား အစိုးရအပေါ် အတိအကျ မသတ်မှတ်ရသေးတဲ့ ပိတ်ဆို့ အရေးယူ ဒဏ်ခတ်မှုတွေ ချမှတ်သွားဖို့ သန္နိဌာန် ချထားတယ်လို့ ဆိုပါတယ်။ ဒီအထဲမှာ ဆီးရီးယားကနေ ရေနံဝယ်ယူသူတွေအပေါ် ခရီးသွားလာခွင့် ပိတ်ပင်ကန့်သတ်တာ၊ ဒီလူတွေရဲ့ ပိုင်ဆိုင်မှုတွေကို ထိန်းချုပ်တာတွေ ပါဝင်မှာဖြစ်ပါတယ်။
နိုင်ငံပေါင်း ၇၀ ကျော်က အစိုးရ ကိုယ်စားလှယ်တွေနဲ့ နိုင်ငံတကာ အဖွဲ့အစည်းတွေ တူနီးရှားနိုင်ငံက စုဝေးမှုကို တက်ရောက်ကြမှာဖြစ်ပြီး ဒီအထဲမှာ အမေရိကန် နိုင်ငံခြားရေးဝန်ကြီး ဟီလာရီ ကလင်တန်လည်း ပါဝင်ပါတယ်။ ရုရှားနဲ့ တရုတ်နိုင်ငံတို့ကတော့ ကျူးနစ်မြို့က ဒီ အစည်းအဝေးကို သူတို့ တက်ရောက်မှာ မဟုတ်ဘူးလို့ ပြောဆိုကြပါတယ်။ နိုင်ငံတစ်နိုင်ငံရဲ့ ပြည်တွင်းရေးကို လုံခြုံရေး ကောင်စီအနေနဲ့ ၀င်ရောက် စွက်ဖက်တာ မလုပ်သင့်ဘူးလို့ သူတို့က ဆိုပြီး ဆီးရီးယား အစိုးရအပေါ် ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်တွေကို အကြိမ်ကြိမ် ဟန့်တားခဲ့တဲ့ အင်အားကြီး နိုင်ငံနှစ်ခု ဖြစ်ပါတယ်။


0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...