Sunday, February 26, 2012

27.02.2012 နေ့ဖတ်ရန်သတင်းများ

by Myanmar Journal on Monday, February 27, 2012 at 3:56am ·
 
ဘင်လာဒင် ခြံဝင်း ပါကစ္စတန် တပ်တွေ စဖြိုဘင်လာဒင် သေတဲ့ခြံ ရှင်းနေ

အိုစမာ ဘင်လာဒင်ကို မနှစ် မေလက အမေရိကန် တပ်တွေက စီးနင်း သုတ်သင် ခဲ့တဲ့ ခြံဝင်းကို ပါကစ္စတန် လုံခြုံရေး တပ်တွေက စတင် ဖြိုချ ရှင်းလင်း နေပါပြီ။
အဘိုတာဘတ် ခံတပ်မြို့က အဆောက်အဦ အစိတ်အပိုင်း အများစုကို မြေတူးစက်တွေနဲ့ ထိုးပြီး ဖြိုချထား ပါတယ်။ ညလုံးပေါက် ရှင်းလင်း နေကြတာပါ။
ဝင်းနားမှာလည်း လုံခြုံရေးတွေ အထပ်ထပ် ချထားပါတယ်။ ဒီနေရာမှာ အယ်လ်ကေဒါ ခေါင်းဆောင် ဘင်လာဒင် ၅ နှစ် ကျော်ကျော် ပုန်းခို ခဲ့တာပါ။
ဒီနေရာကို ကိုးကွယ်စရာ ဌာနတခု ဖြစ်မလာအောင် ပါကစ္စတန် အာဏာပိုင်တွေက ဟန့်တားချင်တာလို့ ဘီဘီစီ သတင်းထောက်က ဆိုပါတယ်။

ဒီကေဘီအေ စစ်ယူနီဖေါင်းနဲ့ လက်နက်ပါ ယူပြီး သွားခွင့်ရဖို့DKBA နဲ့ အစိုးရ ညှိနှိုင်းနိုင်
ဒီကေဘီအေနဲ့ မြန်မာအစိုးရ ငြိမ်းချမ်းရေး ဖေါ်ဆောင်ရေး အဖွဲ့တွေ သောကြာနေ့က ကရင်ပြည်နယ်၊ ဘားအံမှာ တွေ့ဆုံ ခဲ့ ကြပါတယ်။
ဒီကေဘီအေ ဒုတိယစစ်ဦးစီးချုပ် ဗိုလ်မှူးချုပ် စောမိုရှေးနဲ့ မြန်မာအစိုးရ ပြည်ထောင်စု ဝန်ကြီး ဦးအောင်သောင်းတို့ အဖွဲ့ ဒီကေဘီအေ အတွက် လိုအပ်တဲ့ ကိစ္စတွေ ဆွေးနွေး ခဲ့ကြပါတယ်။
အဲဒီ ဆွေးနွေးပွဲ ကနေ နောက်ထပ် ဆက်ဆံရေး ရုံး ၃ ရုံး ကော့ကရိတ်၊ ဘားအံနဲ့ ကြာအင်းမှာ ဖွင့်ဖို့၊ ဒီကေဘီအေ စစ်သားတွေ တာဝန် အရ ခရီးသွားတဲ့ အခါမှာ စစ်ယူနီဖေါင်း အပြည့်နဲ့ လက်နက်ပါ ယူပြီး သွားခွင့်ရဖို့၊ ဒါပေမဲ့ အစိုးရ ဖက်ကို ကြိုအကြောင်းကြား ရမယ်။ ပြီးတော့ ဒီကေဘီအေ ကုန်သွယ် စီးပွား ဆက်ဆံရေး ရုံး ၂ ရုံး လှိုင်းဘွဲနဲ့ နေပြည်တော်မှာ ဖွင့်ဖို့ နှစ်ဖက် သဘောတူ ကြတယ်လို့ ဒီကေဘီအေ ဗိုလ်မှူးချုပ် စောမိုရှေးက ပြောသွားပါတယ်။
ပြီးတော့ မကြာခင်ကပဲ ဒီကေဘီအေနဲ့ ဘီဂျီအက်ဖ် နယ်ခြားစောင့် တပ်ကြား မပြေလည်မှု တွေ ဖြစ်ခဲ့တာမျိုး နောက်ထပ် မဖြစ်ရအောင် ဘီဂျီအက်ဖ် နယ်ခြားစောင့် တပ်က မြိုင်ကြီးငူ ဒေသမှာ နေဖို့နဲ့ ဗိုလ်မှူးချုပ် စောဘီခို့ ဦးဆောင်တဲ့ ဒီကေဘီအေ ကလို့ထူးလား စစ်ဗျူဟာ က ထိုင်း-မြန်မာ နယ်စပ် မဲသဝေါ မှာ အခြေပြု ကြဖို့လည်း သဘောတူ ခဲ့ကြတယ် လို့ ဆိုပါတယ်။
နောက်ထပ် လက်နက်ကိုင်တပ်တွေကြား ပြဿနာ မဖြစ်ရအောင် အစိုးရတပ်၊ ဘီဂျီအက်ဖ်နဲ့ ဒီကေဘီအေ စစ်သားတွေကို တပ်အသီးသီးက ထိန်းသိမ်းကြဖို့ သဘောတူ ခဲ့ကြတယ်လို့ ဒီကေဘီအေ ဗိုလ်မှူးချုပ် စောမိုရှေးက ပြောပါတယ်။

ဒေါ်နေရီဘဆွေဒီမိုကရက်တစ်ပါတီ မှ NLD သို့ကူးပြောင်း
ပြီးခဲ့တဲ့ ၂ဝ၁ဝ ရွေးကောက်ပွဲ မှာ ပါဝင်ခဲ့တဲ့ ဒီမိုကရက်တစ်ပါတီ မြန်မာ ရဲ့ အထွေထွေ အတွင်းရေးမှူး ဒေါ်နေရီဘဆွေ က ပြီးခဲ့တဲ့ လ က ပါတီ က နှုတ်ထွက်ခဲ့ပြီး အမျိုးသား ဒီမိုကရေစီ အဖွဲ့ချုပ် အဖွဲ့ဝင် အဖြစ် လျှောက်ထားခဲ့ပါတယ်။
အခု လို ပြောင်းလဲ လျှောက်ထားတာ နဲ့ ပတ်သက်ပြီး ဒေါ်နေရီဘဆွေ က ညီညွတ်ရေး နဲ့ အမျိုးသားရေး ဦးတည်မယ် ဆိုရင် စုပေါင်း လုပ်မှ ဖြစ်မှာ ကိုသိတဲ့ အတွက် NLD ကို ပံ့ပိုးယင်း ကိုယ်နိုင်တဲ့ အခန်းကဏ္ဍ က ပါဝင်ဖို့ NLD ကို လျှောက်ထား ခဲ့ပုံ ကို ဘီဘီစီ ကို ရှင်းပြပါတယ်။
ဒီမိုကရက်တစ် ပါတီ အနေနဲ့က ပါတီသက်တမ်း အရ တနှစ်ပဲ ရှိသေး သလို ပါတီ တခု ရပ်တည်နိုင်ရေးဟာ လူထု ထောက်ခံမှု ရှိရမယ်၊ လူအင်အား များရမယ်၊ ရံပုံငွေ တောင့်တင်း ရမယ် ဆိုတဲ့ အချက်တွေ ပါဝင်တဲ့ အကြောင်း၊ NLD ဟာ ဆိုရင် လူထုဘက်ကနေ သစ္စာရှိရှိ ရပ်တည် ခဲ့တဲ့ အတွက် နိုင်ငံရေး ကို ရေရှည် လုပ်နိုင်မယ့် အကြောင်း၊ ဒီအချက်တွေ မူတည်ပြီး NLD ပါတီဝင် လျှောက်ဖို့ ဆုံးဖြတ်ခဲ့တယ် လို့ ဒေါ်နေရီဘဆွေ က ရှင်းပြ ပါတယ်။
NLD ပါတီထဲ ရောက်တဲ့ အခါမှာလည်း ဘယ်တာဝန် ပဲ ပေးပေး လုပ်ကိုင်မယ့် အကြောင်း၊ အခုလို ဒီမိုကရက်တစ် ပါတီ ရဲ့ အထွေထွေ အတွင်းရေးမှူး ကနေ နှုတ်ထွက် လာရခြင်း ကလည်း ပုဂ္ဂိုလ်စွဲ၊ ပါတီစွဲ ထားခြင်း မဟုတ်တဲ့ အကြောင်း လည်း ဒေါ်နေရီဘဆွေ က ပြောပြပါတယ်။

ကိုရန် ကျမ်းစာ မီးရှို့မှု အတွက် လက်စားချေလို့ဆိုအာဖဂန် ပြည်ထဲရေးရုံး သေနတ်ဝင်ပစ်
ကာဘူးလ်က လုံခြုံရေး အထပ်ထပ်ချ ထားတဲ့ အာဖဂန် ပြည်ထဲရေး ဝန်ကြီးရုံး ထဲမှာ သေနတ်သမားက ပစ်ခတ်တဲ့ အတွက် အမေရိကန် ဗိုလ်မှူးကြီးနဲ့ ဗိုလ်မှူး အဆင့်ရှိတဲ့ လူ ၂ ဦး သေဆုံးခဲ့ ပါတယ်။
အမေရိကန် စစ်စခန်းမှာ ကိုရန် ကျမ်းစာ မီးရှို့မှု အတွက် လက်စားချေတဲ့ အနေနဲ့ အမေရိကန် တွေကို ရုံးထဲကလူ အကူအညီနဲ့ ပစ်သတ်ခဲ့ တယ်လို့ တာလီဘန် က ဆိုပါတယ်။
လျှို့ဝှက်နံပါတ် ပင်ကုတ်နဲ့ ဖွင့်မှသာ ဝင်လို့ရတဲ့ အတွင်းခန်း တခန်းမှာ အရာရှိတွေကို အနီးကပ် ပစ်သွားတာလို့ ဘီဘီစီက သတင်း ရရှိပါတယ်။
သေနတ်သမား ကတော့ လွတ်ပြေးသွားတယ်။
အာဖဂန် ကာကွယ်ရေး ဝန်ကြီးက သေဆုံးမှုတွေ အတွက် တောင်းပန် ခဲ့ပါတယ်။
ဒီတိုက်ခိုက်မှု အတွက် အပြင်းထန်ဆုံး ရှုတ်ချ လိုက်တယ်လို့ ပင်တာဂွန် အမေရိကန် စစ်ရုံးချုပ်က ကြေညာချက် ထုတ်ပါတယ်။
နေတိုး အဖွဲ့ ကလည်း နောက်ထပ် သတိပေးချက် မလာသေးခင် ကာဘူးမြို့ အာဖဂန် အစိုးရ ဝန်ကြီးတွေဆီက သူတို့ အကြံပေးတွေကို ပြန်ခေါ် နေပါတယ်။
ဒီကျမ်းစာ မီးရှို့မှုနဲ့ ပတ်သက်ပြီး အာဖဂန်မှာ ၅ ရက်မြောက် ဆက်ပြီး ဆန္ဒပြ နေကြပါတယ်။
ဆန္ဒပြပွဲမှာ ရဲနဲ့ အချင်းများတဲ့ အတွက် အနည်းဆုံး လူ ၇ ယောက် သေဆုံးပြီး ၆၀ လောက် ဒဏ်ရာရသွားပါတယ်။
ဒီ ဆန္ဒပြပွဲတွေမှာ အနည်းဆုံး လူ အစိတ် လောက် သေပြီးပါပြီ။
တမင်ရှို့တာ မဟုတ်ရပါဘူးလို့ အမေရိကန် ဘက်က တောင်းပန် ထားပါတယ်။

နိုက်ဂျီးရီးယားမှာ ဗုံးခွဲတိုက်ခိုက်
နိုက်ဂျီးရီးယားနိုင်ငံ အလယ်ပိုင်း ဂျို့စ်မြို့ က ခရစ်ယာန်ဘုရားကျောင်းတခုမှာ အသေခံ ဗုံးခွဲ တိုက်ခိုက်မှု တခု ဖြစ်ပွားခဲ့တဲ့ အတွက် ဝတ်ပြု ဆုတောင်းသူ ၃ ဦး ထက်မနည်း သေဆုံးသွား ပြီး၊ တခြား လူ ၄၀ နီးပါးလောက် ဒဏ်ရာ ရရှိသွား ပါတယ်။
မနက်ပိုင်း ဝတ်ပြု ဆုတောင်းမှု အတွင်း ကားတွေ လူတွေများပြားလှတဲ့ အချိန်မှာ ဘုရားကျောင်း အပြင်ဘက်မှာ တာဝန်ကျ စစ်သားတဦးကနေ ဗုံးခွဲသမားရဲ့ ကားကို ဘုရားကျောင်း ခြံဝင်းထဲ ဝင်ခွင့်ပြုခဲ့တာ ဖြစ်တယ်လို့ ခရစ်ယာန် ဘုန်းတော်ကြီး တဦးက ဘီဘီစီကို ပြောပါတယ်။
အဲဒီနောက်မှာတော့ ဘုရားကျောင်း အဝင်နဲ့ ခပ်လှမ်းလှမ်းမှာ ရပ်ထားတဲ့ အဲဒီကားဟာ ထပေါက်ကွဲခဲ့တာ ဖြစ်တယ်လို့ ဘုန်းတော်ကြီးက ပြောပါတယ်။
ပြီးခဲ့တဲ့ ခရစ်စမတ်နေ့က မြို့တော် အဘူဂျာမှာ ခရစ်ယာန်ဘုရားကျောင်းအနီး လူပေါင်း ၄၀ ကျော် သေဆုံးခဲ့ရတဲ့ ဗုံးခွဲမှု ဖြစ်ခဲ့ပြီးနောက်ပိုင်း အခုဖြစ်ရပ်ဟာ နောက်ဆုံးတွေ့မြင်ရတဲ့ တိုက်ခိုက်မှု ဖြစ်ပါတယ်။

မြန်မာ့သစ်သီးဝလံ ပြည်ပတင်ပို့မှု အခွန်ကင်းလွတ်
တင်ပို့ရာတာ အဆင်ပြေတဲ့ တရုတ်ကို လောလောဆယ် အဓိကထား တင်ပို့ပါတယ်
မြန်မာနိုင်ငံကနေ သစ်သီးဝလံနဲ့ခြံထွက် သီးနှံတွေကို ပြည်ပတင်ပို့မှု အပေါ် အခွန်ကင်းလွတ်ခွင့်ပေးမယ့် အကြောင်း ဘဏ္ဍာရေးနဲ့ အခွန်ဝန်ကြီးဌာနက အမိန့် ကြော်ငြာစာတရပ် ထုတ်ပြန်လိုက်ပါတယ်။
လာမယ့် မတ်လ ၁ ရက်နေ့ကနေ သြဂုတ်လ ၁၄ ရက်အထိ အကျုံးဝင်မယ့် ဒီကြေညာချက် ကြောင့် တောင်သူတွေ အကျိုးရှိနိုင်မှာ ဖြစ်ကြောင်း မြန်မာနိုင်ငံ သစ်သီးဝလံ ပန်းမန်နဲ့ ဟင်းသီးဟင်းရွက် စိုက်ပျိုးထုတ်လုပ်သူများ အသင်း ဥက္ကဌ ဦးစိုင်းဘဉာဏ်က ပြောပါတယ်။
သီးနှံတွေ ဝယ်ယူတဲ့ ကုန်သည်တွေအနေနဲ့ အခွင့်ကင်းလွတ်ခွင့်ရတာကြောင့် ဈေးပိုပေး ဝယ်ယူမှာ ဖြစ်တဲ့အတွက် တောင်သူတွေ အကျိုးခံစားခွင့်ရမှာ ဖြစ်ကြောင်းနဲ့ အခုလို အခွန်ကင်းလွတ်ခွင့် ပေးတာဟာ တောင်သူတွေ အကျိုးခံစားခွင့်ပိုရအောင် လုပ်တာ ဖြစ်တယ်လို့ သူကပြောပါတယ်။
နိုင်ငံခြားကို တင်ပို့ရာမှာ ရာသီအလိုက် သီးနှံတွေဖြစ်တဲ့ ဖရဲ၊ သခွားမွှေး၊ ငှက်ပျော်တွေကို အဓိကပို့ကြောင်း၊ ရှေ့လာမယ့် သိပ်မကြာခင်မှာ သရက်သီးပေါ်တော့မှာ ဖြစ်တဲ့ အတွက် အဲဒီအချိန်ရောက်ရင် သရက်သီးလည်း တင်ပို့မှာ ဖြစ်တယ်လို့ ဆိုပါတယ်။
တရုတ်ကို တင်ပို့ရာတာ အဆင်ပြေတဲ့အတွက် လောလောဆယ်တရုတ်ကို အများဆုံးတင်ပို့ ကြောင်း၊ နောက်ပိုင်းမှာလည်း အာဆီယံ နိုင်ငံတွေကို တင်ပို့မှာ ဖြစ်ကြောင်း သူကပြောပါ တယ်။
စင်ကာပူနိုင်ငံကိုလည်း လေကြောင်းနဲ့ ရေကြောင်းကနေ အနည်းအကျဉ်း စပြီး တင်ပို့နေပြီ ဖြစ်တယ်လို့ ဆိုပါတယ်။

ဆီးရီးယားနိုင်ငံမှာ ဆန္ဒခံယူပွဲ ကျင်းပ
အတိုက်အခံ အုပ်စုတွေကတော့ ဆန္ဒခံယူပွဲ ဟာ ဘာမှ အဓိပ္ပါယ်မရှိဘူးလို့ ပြောကြား
ဆီးရီးယားနိုင်ငံတလွှား အကြမ်းဖက်မှုတွေ ဆက်လက်ဖြစ်ပွားနေပေမယ့်လည်း အခြေခံဥပဒေ သစ်တခု ပြန်ရေးဆွဲရေးနဲ့ ပတ်သက်ပြီး၊ နိုင်ငံ တလွှား လူထုဆန္ဒ ခံယူပွဲ ကျင်းပနေပါတယ်။
အခုဆန္ဒခံယူပွဲဟာ သမ္မတ ဘာရှားအဲလ် အာဆတ်ရဲ့ ပြုပြင်ပြောင်းလဲရေး အစီအစဉ် တွေထဲက တစိတ်တပိုင်းဖြစ်ပြီး သမ္မတ အာဆတ်ဟာ သူ့အစိုးရကို ဆန့်ကျင်နေကြတဲ့ တနှစ်နီးပါး လူထုအုံကြွမှုတွေ အပေါ် ပြန်လည် တုံ့ပြန် ဆောင်ရွက်ပြလိုက်တာလည်း ဖြစ်ပါတယ်။
အခြေခံဥပဒေအသစ် အတည်ဖြစ်ခဲ့မယ်ဆိုရင်တော့ ဆီးရီးယားနိုင်ငံကို ပါတီစုံ စနစ်နဲ့ တည်ဆောက်မှာ ဖြစ်ပါတယ်။ အတိုက်အခံ အုပ်စုတွေကတော့ အခု ဆန္ဒခံယူပွဲဟာ ဘာမှ အဓိပ္ပါယ်မရှိဘူးလို့ ပြောကြားပြီး၊ သပိတ်မှောက်ကြဖို့ ဆော်သြထားပါတယ်။
အဓိကကျတဲ့ ဟုမ်းစ်မြို့နဲ့ ဟာမား မြို့ တွေ အမြော်ကနဲ့ ပစ်ခံရတဲ့ နောက်ဆုံး အကြမ်းဖက်မှု တွေ အတွင်း လူပေါင်း ၂၀ သေဆုံးသွားတယ်လို့လည်း တက်ကြွလှုပ်ရှားသူတွေက ပြောပါ တယ်။
ဒမားစကပ်စ်နဲ့ အလက်ပိုမြို့တွေက လူတွေ လည်း သမ္မတအာဆတ်ကို ဆန္ဒပြဖို့ တိုက်တွန်း
ဆီးရီးယားက အကြီးဆုံးမြို့ကြီး နှစ်မြို့ဖြစ်တဲ့ ဒမားစကပ်စ်နဲ့ အလက်ပိုမြို့တွေက လူတွေ အနေနဲ့ သမ္မတအာဆတ်ကို စုရုံးဆန့်ကျင် ဆန္ဒပြဖို့ အမေရိကန် နိုင်ငံခြားရေး ဝန်ကြီး ဟီလာရီ ကလင်တန်က ပန်ကြားလိုက်ပါတယ်။
အကြောင်းကတော့ သူ့အဆို ဟုမ်းစ်မြို့မှာ ကြောက်မက်ဖွယ်ရာ အစုလိုက် အပြုံလိုက် သတ်ဖြတ်မှုတွေ ဖြစ်ပွားနေတာကြောင့် အဲဒီမှာရှိတဲ့ လူတွေအနေနဲ့ မိတ်ဆွေ ပြည်သူ အများရဲ့ ထောက်ခံမှုကို လိုအပ်နေတယ်လို့ မစ္စစ်ကလင်တန်က သတင်းထောက်တွေကို ပြောကြားပါတယ်။
ဒါပေမယ်လို့ နိုင်ငံခြားကနေ ကြားဝင်ဆောင်ရွက်မှုတွေလုပ်ရင်တော့ ဆီးရီးယားမှာ ပြည်တွင်းစစ်ကို အရှိန်ရသွားစေလိမ့်မယ်လို့ သူက သတိပေး ပြောကြားပါတယ်။
လစ်ဗျားနိုင်ငံမှာ လုပ်သလို စစ်ဆင်ရေးမျိုး လုပ်ဖို့ဆိုတာ မဖြစ်နိုင်ကြောင်း၊ အကြောင်းက တော့ လစ်ဗျားက ကဒါဖီဆန့်ကျင်တဲ့ တပ်ဖွဲ့တွေလိုမျိုး ဆီးရီးယား အတိုက်အခံ တွေမှာ နယ်မြေပိုင်ဆိုင်မှု မရှိဘူးလို့ သူက ပြောပါတယ်။

ရခိုင်ဒီမိုကရေစီ အဖွဲ့ချုပ် မှတ်ပုံပြန်တင်
ပါတီဝင်တွေ စုပေါင်း ဆုံးဖြတ်ခဲ့တာလို့ ဦးအေးသာအောင် (အလယ်ပုံ) ကဆို
ရခိုင်ဒီမိုကရေစီ အဖွဲ့ချုပ် (ALD) ကို တရားဝင် ပါတီ အဖြစ် ပြန်လည် မှတ်ပုံတင်ဖို့ ဆောင်ရွက် နေပြီလို့ ပါတီ အထွေထွေ အတွင်း ရေးမှူး ဦးအေးသာအောင်က ပြောပါတယ်။
တရားဝင် ပါတီ အဖြစ်မှတ်ပုံတင်မှ နိုင်ငံရေး ဆက်လုပ်လို့ ရမယ်လို့ ပါတီဝင် ဟောင်းများ ရန်ကုန်မြို့မှာ တွေ့ဆုံစဉ် သဘောထား ပေးခဲ့ကြ တယ်လို့ သူက ဆိုပါတယ်။
အခုလို ပါတီ မှတ်ပုံ ပြန်တင်တာဟာ လာမယ့် ရွေးကောက်ပွဲ မှာပါဝင်ဖို့ မဟုတ်ဘဲ ပါတီဝင် တွေ၊ လူငယ် တွေနဲ့ လယ်သမား အရေးကိစ္စနဲ့ ပတ်သက်တာ တွေကို သင်တန်းတွေ ပေးပြီး လေ့ကျင့် သင်ကြား နိုင်အောင် ရည်ရွယ်တယ်လို့ ဦးအေးသာအောင်က ပြောပါတယ်။
ALD ဟာ အမျိုးသား ဒီမိုကရေစီ အဖွဲ့ချုပ် (NLD)၊ တခြား တိုင်းရင်းသား ပါတီ တွေနဲ့အတူ ပြည်သူ့လွှတ်တော် ကိုယ်စားပြု ကော်မီတီ (CRPP) အဖွဲ့ထဲမှာ ပါဝင် ပါတယ်။
ALD ပါတီ ပြန်ပြီး မှတ်ပုံတင်နေ သလို CRPP အဖွဲ့ထဲက ဇိုမီးအမျိုးသား ကွန်ဂရက်၊ ရှမ်းတိုင်းရင်းသားများ ဒီမိုကရေစီ အဖွဲ့ချုပ်၊ မွန်အမျိုးသား ဒီမိုကရေစီ အဖွဲ့ချုပ် တို့ အပါအဝင် တိုင်းရင်းသား ပါတီတွေလည်း မှတ်ပုံတင်ကြဖို့ ရှိနေ ပါတယ်။ CRPP အဖွဲ့ကိုတော့ အခုအချိန်အထိ ဖျက်သိမ်းခြင်း မရှိသေး ပါဘူး။
ကြားဖြတ် ရွေးကောက်ပွဲ ပြီးတဲ့ အခါ မှာတော့ ဒီအဖွဲ့ရဲ့ အနာဂတ်ရေး နဲ့ ပတ်သက်ပြီး ဘယ်လို ဆက်လုပ် ကြမယ် ဆိုတာ ဆုံးဖြတ်ဖို့ ရှိတယ်လို့ ဦးအေးသာအောင် ကပြောပါတယ်။ ဦးအေးသာအောင် ဟာ CRPP ရဲ့ အတွင်းရေးမှူး လည်း ဖြစ်ပါတယ်။

အိန္ဒိယအကျဉ်းထောင်မှ လွတ်မြောက်ခဲ့သော ရခိုင် တော်လှန်ရေးသမားတဦး ကွယ်လွန်
ကိုကျော် | သောကြာနေ့၊ ဖေဖေါ်ဝါရီလ ၂၄ ရက် ၂၀၁၂ ခုနှစ် ၂၁ နာရီ ၁၆ မိနစ်

နယူးဒေလီ (မဇ္ဈိမ) ။         ။ ၂၀၁၁ ခုနှစ် မေလက အိန္ဒိယအကျဉ်းထောင်မှ လွတ်မြောက်လာခဲ့သော ရခိုင် တော်လှန်ရေးသမားတဦးဖြစ်သူ ကိုမင်းသာထွန်း (၃၇ နှစ်)သည် ဖေဖော်ဝါရီလ ၂၃ ရက်နေ့ည ၁၁ နာရီ မိနစ် ၅၀ ခန့်တွင်နှလုံးရောဂါဖြင့် ကွယ်လွန်သွားခဲ့သည်။

ကိုမင်းသာထွန်းမှာ ရခိုင်အမျိုးသားညီညွတ်ရေးပါတီ NUPA မှ ဒုဗိုလ်တဦးဖြစ်ပြီး စစ်အစိုးရအား အခြေစိုက်တော်လှန်ရန် ၁၉၉၈ ခုနှစ်က အိန္ဒိယပိုင် အန္ဒမန်ကျွန်းစုရှိ လန်းဖောကျွန်းပေါ်သို့ အရောက်တွင် အိန္ဒိယစစ်တပ်မှ ဖမ်းဆီးခြင်း ခံခဲ့ရသည့် NUPA နှင့် KNU ရဲဘော် ၃၆ ဦးအနက် တဦးအပါအဝင်ဖြစ်သည်။

ကိုလ်ကတ္တားအကျဉ်းထောင်တွင် ၁၃ နှစ်ကြာ ထိန်းသိမ်းခံရပြီးနောက် ၂ဝ၁၁ ခုနှစ် မေလတွင် အခြားရဲဘော်များနှင့် အတူ ပြန်လည်လွတ်မြောက်လာခဲ့ပြီး နယူးဒေလီမြို့တွင် ဒုက္ခသည်အဖြစ် နေထိုင်လာခဲ့သည်။နယ်သာလန်နိုင်ငံမှ ဒုက္ခသည်အဖြစ် လာရောက်နေထိုင်ရန် လက်ခံထားပြီးဖြစ်၍ ဇွန်လထဲတွင် ပြောင်းရွှေ့ အခြေချနေထိုင်ရန်ရှိစဉ် ယခုကဲ့သို့ ရုတ်တရက် ကွယ်လွန်သွားခြင်း ဖြစ်သည်။

“တော်လှန်ရေးအပေါ်မှာ စိတ်ထား အပြုသဘောဆောင်ပြီး လူကောင်းတယောက် ဆုံးရှုံးရတဲ့အတွက် ကျနော်တို့ ယူကြုံးမရပါဘူး။ ကျနော်တို့တအားခံစားရပါတယ်” ဟု ကိုမင်းသာထွန်းနှင့် ထောင်ကျဖက် ရခိုင်ခေါင်းဆောင်တဦးဖြစ်သူ ကိုဓညလင်းက မဇ္ဈိမကို ပြောသည်။

ကိုမင်းသာထွန်း ကို ရခိုင်ပြည်နယ်၊ ရသေ့တောင်မြို့နယ် မကျေးကျွန်းတွင် အဖ ဦးစံရွှေမောင် အမိ ဒေါ်သောင်းမြစိန် တို့မှ မွေးဖွားသည့် ဒုတိယမြောက် သား ဖြစ်သည်။

၁၉၈၈ ခုနှစ် ဒီမိုကရေစီအရေးတော်ပုံအတွင်းက အဋ္ဌမတန်း ကျောင်းသား အဖြစ် တက်ကြွစွာ ပါဝင်ခဲ့ပြီး စစ်အာဏာ သိမ်းပြီးနောက် ထိုင်း-မြန်မာနယ်စပ်သို့ ထွက်ပြေးတိမ်းရှောင်ခဲ့ပြီး ၁၉၉၄ ခုနှစ်တွင် NUPA တပ်မတော်သို့ ဝင်ရောက် ခဲ့သည်။ ထိုင်းနိုင်ငံ ရနောင်းမြို့တွင် ဆက်သွယ်ရေး-လူထုဆက်ဆံရေးနှင့် စည်းရုံးရေးမှူးအဖြစ် ဆောင်ရွက်ခဲ့သည်။

ကိုမင်းသာထွန်း၏ သရဏဂုံတင်ပွဲနှင့် ဈာပန အခမ်းအနားကို နယူးဒေလီရှိ မြန်မာ့ရိပ်သာ ခန်းမ၌ သောကြာနေ့နေ့လည် ၂ နာရီတွင် ကျင်းပခဲ့ပြီး မြန်မာ့ဒီမိုကရေစီအင်အားစု တရာကျော် တက်ရောက်ခဲ့ကြသည်။

ကိုမင်းသာထွန်း၏ ရုပ်ကလာပ်အား ညနေ ၃ နာရီ ၃ဝ မိနစ်တွင် မီးသင်္ဂြိုလ်ခဲ့သည်။

စီးပွားရေး ပိတ်ဆို့မှုသည် အဓိက ပြဿနာဟု အာဆီယံကို လုပ်ငန်းရှင်များပြော
ညီသစ် | ဗုဒ္ဓဟူးနေ့၊ ဖေဖေါ်ဝါရီလ ၂၂ ရက် ၂၀၁၂ ခုနှစ် ၁၉ နာရီ ၄၈ မိနစ်

ရန်ကုန် (မဇ္ဈိမ) ။         ။ စီးပွားရေး ဖွံ့ဖြိုးမှုများအတွက် နိုင်ငံတကာမှ ပိတ်ဆို့မှုမှာ အဓိကပြဿနာရပ် ဖြစ်နေကြောင်း မြန်မာ စီးပွားရေး လုပ်ငန်းရှင်များက ထောက်ပြ ပြောကြားလိုက်သည်။

အင်္ဂါနေ့က အာဆီယံ အတွင်းရေးမှူးချုပ်နှင့် မြန်မာနိုင်ငံ ကုန်သည်ကြီးများနှင့် စက်မှုလက်မှု လုပ်ငန်းရှင်များ အသင်းစုချုပ် UMFCCI မှ စီးပွားရေး လုပ်ငန်းရှင်များ တွေ့ဆုံစဉ် ပြောကြားလိုက်ခြင်း ဖြစ်သည်။

“မြန်မာနိုင်ငံက ပြေးလမ်းကနေ ပျံတက်တော့မယ့် လေယာဉ်တစီးနဲ့ တူပါတယ်။ အပေါ်ကို ပျံတက်ဖို့ အားယူနေချိန် မှာ ရှေ့မှာ ပြင်းထန်တဲ့ လေတွေက ဆန့်ကျင် တိုက်ခတ်နေတယ်။ ဒါပေမယ့် မြန်မာက ရှေ့ကို ဆက်ပျံသန်းဖို့ပဲ ဆုံးဖြတ်ထားတယ်” ဟု UMFCCI ဒုဥက္ကဋ္ဌ ဒေါက်တာမောင်မောင်လေး က ပြောသည်။

၂ဝ၁၄ ခုနှစ်တွင် မြန်မာနိုင်ငံက လက်ခံကျင်းပမည့် အာဆီယံ ထိပ်သီးညီလာခံသည် မြန်မာနိုင်ငံ၏ စီးပွားရေး ဖွံ့ဖြိုးမှုများ အတွက်လည်း အရေးပါသည့် ကိစ္စတခုဖြစ်ပြီး ယခုအချိန်သည် ပိတ်ဆို့မှုများ ဖယ်ရှားကာ ပြည်သူများ အနေနှင့် ကောင်းမွန်သည့် လူနေမှုဘဝများ ရရှိသင့်သည့် အချိန်ကာလဟု UMFCCI က ပြောသည်။

UMFCCI ဥက္ကဋ္ဌ ဦးဝင်းအောင်က ပြောကြားခဲ့သည်မှာ မြန်မာနိုင်ငံသို့ ဝင်ရောက် ရင်းနှီးမြှပ်နှံပြီး အလုပ်အကိုင် အခွင့်အလမ်းများစွာ ဖန်တီးပေးနိုင်မည့် အလားအလာ အကောင်းဆုံး နိုင်ငံတကာမှ စီးပွားရေး လုပ်ငန်းရှင်များသည် ယခုပိတ်ဆို့မှုများကြောင့် အခက်အခဲများစွာ ဖြစ်ပေါ်ရကြောင်း၊ မြန်မာနိုင်ငံမှ ၉၅ ရာခိုင်နှုန်းသော စီးပွားရေး လုပ်ငန်းများမှာ အလတ်စားနှင့် အသေးစား လုပ်ငန်းများ ဖြစ်ကာ နိုင်ငံတကာမှ ဘဏ္ဍာရေး၊ နည်းပညာ အကူအညီ များစွာ လိုအပ်နေကြောင်း ပြောဆိုခဲ့သည်။

ရွှေလီမှာ မြန်မာအလုပ်သမများ အန္တရာယ်ရှိ အလုပ်များ လုပ်နေရ
ကျော်ခ | သောကြာနေ့၊ ဖေဖေါ်ဝါရီလ ၂၄ ရက် ၂၀၁၂ ခုနှစ် ၁၇ နာရီ ၄၇ မိနစ်

ချင်းမိုင် (မဇ္ဈိမ) ။        ။ တရုတ်-မြန်မာနယ်စပ် ရွှေလီမြို့၌ အန္တရာယ်ရှိသော လုပ်ငန်းများတွင် မြန်မာရွှေ့ပြောင်း အလုပ်သမများ လုပ်ကိုင်နေရသည်ဟု ထိုင်းနိုင်ငံအခြေစိုက် မြန်မာ့အမျိုးသမီး သမဂ္ဂ BWU ၏ ကြာသာပတေးနေ့ ထုတ် အစီရင်ခံစာအရ သိရသည်။

ရွှေလီမြို့ပေါ်မှ မြန်မာရွှေ့ပြောင်း အလုပ်သမ ၃၂ ဦးကို တွေ့ဆုံမေးမြန်းကာ ထုတ်ပြန်ထားသည့် “အသံမဲ့ သို့မဟုတ် ပုန်းကွယ် နေသော အရိပ်များ” အစီရင်ခံစာတွင် လိင်လုပ်ငန်း၊ ကျောက်သွေး လုပ်ငန်းနှင့် ဆောက်လုပ်ရေး လုပ်ငန်း စသည့် ကျန်းမာရေးကို ထိခိုက်စေနိုင်သော လုပ်ငန်းခွင်များတွင် အကာအကွယ်မဲ့ လုပ်ကိုင်နေရသည်ဟု ပါရှိသည်။

“ကျောက်သွေးလုပ်ငန်းမှာဆိုရင် အင်ကြင်းကျောက်တွေကို ပုံဖေါ်ရတဲ့အခါ ဖုံမှုန့် အရမ်းများတယ်။ အဲဒါက မျက်နှာဖုံး တပ်ထားမှပဲ ရမယ်။ ဒီကထွက်တဲ့ အငွေ့တွေ အမှုန့်တွေက ကျန်းမာရေးကို ထိခိုက်စေနိုင်တယ်။ ဆောက်လုပ်ရေးမှာ လုပ်တဲ့လူတွေလည်း ဒီလိုပဲ” ဟု BWU အထွေထွေ အတွင်းရေးမှူး ဒေါ်နိုးနိုးထက်စံ က မဇ္ဈိမကို ပြောသည်။

ရွှေလီမြို့ပေါ်ရှိ ကျောက်သွေးလုပ်ငန်းခွင်တွင် အလုပ်သမတဦး အင်ကြင်းကျောက်ကို ပုံဖေါ်နေသည်ကို တွေ့ရစဉ် (ဓါတ်ပုံ BWU)

ကျောက်သွေးလုပ်ငန်းအများစုသည် မနက် ၆ နာရီမှ ညနေ ၅ နာရီထိ အလုပ်လုပ်ကြရပြီး ကျန်းမာရေး ထိခိုက်မှု၊ အလုပ်ချိန် များလွန်းမှုတို့ကြောင့် ယင်းလုပ်ငန်းများကို တရုတ်လူမျိုးတုိ့က မလုပ်လိုကြဟု ကာယကံရှင် အလုပ်သမများက ပြောသည်။

“ကျမ တင်ပါးဆိုလည်း အမာခုံပေါ်မှာ တနေကုန်လုံးထိုင်ရလို့ အသားမာ တက်နေပြီ။ အလုပ်သမားတွေ အကုန်လုံး လည်း မျောက်တွေလိုပဲ အသားမာ တက်နေပြီ။ ဒီအလုပ်က ပင်ပန်းတယ်။ ဖုန်မှုံ့လည်း များတော့ တရုတ်တွေက မလုပ်ချင်ကြဘူး။ တချို့လူတွေ ဓါတ်မှန် ရိုတ်ကြည့်တော့ အမှုန်တွေကြောင့် အဆုတ်မှာ ဒဏ်ရာတွေ ရတာ တွေ့ရ တယ်။ ပေါလစ်တင်တဲ့ အချိန်မှာ အရမ်းအနံ့ဆိုးတဲ့ ဓါတုဗေဒ ပစ္စည်းတွေ သုံးရတယ်။ အဲဒါတွေ ရှုမိတော့ နှာခေါင်း ပိတ်ရောဂါ၊ ချောင်းဆိုးရောဂါ ခံစားရတယ်” ဟု အလုပ်သမတဦးကို ကိုးကား၍ အစီရင်ခံစာ၌ ဖေါ်ပြထားသည်။

ထို့အတူ ဓါတုဗေဒ ဆိုးဆေးများ အသုံးပြု လုပ်ကိုင်နေကြရသည့် ပရိဘောဂ အရောင်တင် လုပ်ငန်းများတွင်လည်း ကျန်းမာရေး အကာကွယ်မဲ့ လုပ်ကိုင်နေရသူများရှိသလို လိင်လုပ်ငန်းများတွင် လုပ်ကိုင်နေကြသည့် မြန်မာ အမျိုးသမီးများမှာလည်း အကာအကွယ်မဲ့ အနိုင်ကျင့် လိင်ဆက်ဆံခြင်းမျိုး ကြုံတွေ့ရပြီး အမျိုးသမီးအချို့မှာ တရုတ်အမျိုးသားများ၏ ဇနီးသည်အဖြစ် ရောင်းစားခံရခြင်းများ ရှိသည်ဟု အစီရင်ခံစာ၌ ပါရှိသည်။

ရွှေလီမြို့ပေါ်ရှိ ဆေးသုတ်လုပ်ငန်းခွင်အတွင်းမှ မြန်မာအလုပ်သမားများကို တွေ့ရစဉ် (ဓါတ်ပုံ BWU)

မြန်မာနိုင်ငံအတွင်း၊ နိုင်ငံရေး၊ စည်းပွားရေး တည်ငြိမ်မှု မရှိသဖြင့် ပုံမှန် ဝင်ငွေရရှိနိုင်ရန်နှင့် ကျန်ခဲ့သည့် မိသားစု များကို ထောက်ပံ့ပေးနိုင်ရန်အတွက် စီးပွားရေး လည်ပတ်မှု ကောင်းနေသည့် ရွှေလီမြို့ကို အလွယ်တကူ ရွေးချယ်ကြခြင်း ဖြစ်ကြောင်း ဒေါ်နိုးနိုးထက်စံက ပြောသည်။

BWU ၏ စစ်တမ်းကောက်ယူ ဖေါ်ပြချက်အရ ရွှေလီမြို့ပေါ်တွင် မြန်မာရွှေ့ပြောင်း အလုပ်သမား တသိန်းကျော်နေထိုင်ပြီး ထိုအလုပ်သမားများမှာ လုပ်အားခနှင့် ထိုက်သင့်သည့် လစာခံစားခွင့်၊ ကျန်းမာရေး စောင့်ရှောက်ခွင့် အပါအဝင် အလုပ်သမားများ ရသင့်ရထိုက်သော အခွင့်အရေးများ ခံစားခွင့် မရရှိကြဟု ဆိုသည်။

“တရုတ်တွေ ဆိုလို့ရှိရင် တလကို အခြေခံလစာ အမေရိကန်ဒေါ်လာ ၁ ထောင် မကျော်ရင် အလုပ်မလုပ်ဘူး။ အဲဒီမှာမြန်မာတွေက တလကို ဒေါ်လာ ၂ ရာကျော် ၃ ရာနဲ့ လုပ်ကြရတယ်။ အလုပ်ခွင်မှာ ထိခိုက်မှု ဖြစ်ရင်လည်း တော်တော်များများက လျော်ကြေးနဲ့ ကျန်းမာရေးစောင့်လျှောက်ခွင့် မရဘူး” ဟု ဒေါ်နိုးနိုးထက်စံ က ပြောသည်။

တရုတ်-မြန်မာ စကားပြန် လုပ်ငန်း လုပ်ကိုင်နေသူ မမူမူ ကလည်း ရွှေလီမြို့ပေါ်ရှိ မြန်မာအလုပ်သမားများစုမှာ လုပ်ခလစာနှင့် ပတ်သက်၍ တရုတ်လုပ်ငန်းရှင်များ၏ အနိုင်ကျင့် ချယ်လှယ်ခြင်းကို ခံရကြောင်း မဇ္ဈိမကို ပြောသည်။

“ဒီမှာက အခက်ခဲတွေ အမျိုးမျိုးရှိတယ်။ တလပြည့်မှ လခထုတ်ပေးတယ်။ ပေးရင်လည်း ၆ ရာ ရမယ်ဆိုရင် ၄ ရာပဲ ထုတ်ပေးတယ်။ ၂ ရာကို စပေါ်သဘောမျိုး ယူထားမယ်။ အဲဒီ ယူထားတဲ့ ၂ ရာကို ၆ လပြည့်မှ၊ တနှစ်ပြည့်မှ ထုတ်ပေးမယ်ဆိုပြီး အမျိုးမျိုး ညစ်တာပေါ့နော်။ တနှစ်ပြည့်အောင် မလုပ်ဘဲနဲ့ ထွက်သွားရင် အဲဒီစပေါ်ငွေတွေ ရှုံးတာတွေ များတယ်။ ပြီးလို့ရှိရင် လဝက်လောက်ပဲ အလုပ်လုပ်ပြီးထွက်ရင် အဲဒီလဝက်စာ မရကြဘူး။ လောပန်းတွေက အလုပ်ချိန်ကိုလည်း မနက် ၆ နာရီကနေ ညနေ ၅ နာရီမှ အလုပ်သိမ်းတယ်” ဟု မမူမူက မဇ္ဈိမကို ပြောသည်။

ရွှေလီမြို့ပေါ်မှာရှိသည့် မြန်မာအလုပ်သမားများအနေဖြင့် တရုတ်အစိုးရက အလုပ်လုပ်ခွင့် ခွင့်ပြုချက်ပေးထားခြင်း မဟုတ်သည့်အတွက် အစိုးရထံ တိုင်ကြားနိုင်ခြင်း မရှိသလို အခြား အလုပ်သမားအဖွဲ့အစည်းများလည်း မရှိဟု အစီရင်ခံစာက ထောက်ပြသည်။

တရုတ်အစိုးရနှင့် ဒေသခံ ယူနန်အာဏာပိုင်များအနေဖြင့် မြန်မာအလုပ်သမားများကို လုပ်အားခနှင့် တူညီသော တန်ဘိုးကို ပေးဆောင်ရန်၊ နိုင်ငံခြားသား ရွှေ့ပြောင်း အလုပ်သမားများကို တရားဝင် အလုပ်လုပ်ခွင့် ထုတ်ပြန်ပေးရန်၊ အလုပ်သမားအခွင့်အရေး ချိုးဖောက်မှုများ တိုင်ကြားခွင့်ရှိရန်၊ ကျန်းမာရေး စောင့်ရှောက်ခွင့် ပေးရန်နှင့် အလုပ်သမား အဖွဲ့စည်းများ ဖွဲ့စည်းခွင့်ပေးရန် တို့ကို BWU က တောင်းဆိုထားသည်။

တရုတ်နိုင်ငံသား အများအပြား အိုဘားမား ၀က်ဘ်ဆိုက်မှာ စာရေးကြ
By ဗွီအိုအေ (မြန်မာဌာန)
တရုတ်နိုင်ငံက Google အင်တာနက် ၀န်ဆောင်မှုကုမ္ပဏီရဲ့ Google-plus လူမှုကွန်ယက် အင်တာနက် ၀က်ဘ်ဆိုက်ကို ဖွင့်ပေးလိုက်တဲ့အတွက် ရာပေါင်းများစွာသော တရုတ်နိုင်ငံသားတွေ အမေရိကန်သမ္မတ ဘရက်အိုဘားမား (Barack Obama) ရဲ့ အင်တာနက် ၀က်ဘ်ဆိုက်ပေါ်မှာ စာတွေ ရေးသားခဲ့ကြပါတယ်။
Google-plus လူမှုကွန်ယက် အင်တာနက် ၀က်ဘ်ဆိုက်ကို မနှစ်က စတင်ခဲ့တာဖြစ်ပေမဲ့ အင်တာနက် သုံးစွဲမှုကို တင်းကျပ်စွာ ကန့်သတ်လေ့ရှိတဲ့ ကွန်မြူနစ်တရုတ် အစိုးရက အဲဒီဝက်ဘ်ဆိုက်ကို တက်ရောက် အသုံးပြုခွင့် ပိတ်ပင်ထားခဲ့တာပါ။
ဒါပေမဲ့ တရုတ်အစိုးရက ဖွင့်ပေးလိုက်တဲ့အတွက်ကြောင့်လား၊ ဒါမှမဟုတ် အင်တာနက် သုံးစွဲခွင့် ဆင်ဆာလုပ်တဲ့နေရာမှာ ချို့ယွင်းချက် တစ်ခုခု ရှိခဲ့တဲ့အတွက်ကြောင့်လား လွန်ခဲ့တဲ့ ရက်အနည်းငယ်အတွင်း တရုတ်နိုင်ငံသားတွေ Google-plus ၀က်ဘ်ဆိုက်ကို ၀င်ရောက် ကြည့်ရှုခွင့် ရနေကြပါတယ်။
သမ္မတ အိုဘားမားထံ ရေးကြတဲ့ စာတွေထဲမှာတော့ လွတ်လပ်စွာ ပြောဆိုခွင့်၊ လူ့အခွင့်အရေး စတဲ့ အခွင့်အရေးဆိုင်ရာ အကြောင်းအရာတွေ ပါသလို အမေရိကန်နိုင်ငံမှာ တရားဝင် အလုပ်လုပ်ခွင့်ရရေး အတွက် Green Card လို့ခေါ်တဲ့ တရားဝင်နေထိုင်ခွင့် ဘယ်လို လျှောက်ရမလဲ ဆိုတဲ့ သာမန်မေးခွန်းမျိုးတွေလည်း ပါဝင်ပါတယ်။

ဒီမိုကရေစီအရေး လှုပ်ရှားသူတွေအမှု အီဂျစ်မှာ စတင် ကြားနာ
By ဗွီအိုအေ (မြန်မာဌာန)
အီဂျစ်နိုင်ငံမှာ ဖမ်းဆီးခံထားရတဲ့ အမေရိကန်နိုင်ငံသား ၁၆ ယောက် အပါအ၀င် ဒီမိုကရေစီအရေး တက်ကြွလှုပ်ရှားသူတွေရဲ့  အမှုကို ကိုင်ရိုမြို့တော်မှာ ဒီကနေ့ စတင် ကြားနာပါတယ်။
အမေရိကန်နိုင်ငံသားတွေ အပါအ၀င် အဖမ်းခံထားရသူ ၄၃ ယောက်ဟာ နိုင်ငံခြားက တရားမ၀င် ငွေလက်ခံမှုနဲ့ သူတို့လူမှုအဖွဲ့အစည်းတွေ လုပ်ဆောင်ရမယ့် ဘောင်ကိုကျော်ပြီး နိုင်ငံရေး လှုပ်ရှားမှုတွေ လုပ်ဆောင်ခဲ့မှု စတဲ့ စွပ်စွဲချက်တွေနဲ့ ဖမ်းဆီး ခံထားကြရတာပါ။
အဖမ်းခံထားရသူတွေထဲက အနည်းဆုံး ၁၃ ယောက်လောက် ကိုင်ရိုမြို့ တရားရုံးကို ဒီကနေ့ ထုတ်လာတာ တွေ့တဲ့အကြောင်း မျက်မြင် သက်သေတွေက ပြောပေမဲ့ အဲဒီအထဲ အမေရိကန်တွေ ပါမပါ ဆိုတာတော့ ကွဲကွဲပြားပြား မရှိသေးပါဘူး။ စွဲချက်တင်ခံထားရတဲ့ အမေရိကန်တချို့ကတော့ အီဂျစ်နိုင်ငံထဲကနေ ထွက်ခွာသွားကြပြီ ဖြစ်ပြီး တချို့ကတော့ အီဂျစ်မှာရှိတဲ့ အမေရိကန်သံရုံးမှာ ခိုလှုံနေကြတယ်လို့ ဆိုပါတယ်။
အီဂျစ်သမ္မတ ဟိုစနီမူဘာရက် (Hosni Mubarak) မနှစ်က ရာထူးက ဆင်းသွားပေးပြီးနောက် အာဏာရလာတဲ့ စစ်အုပ်ချုပ်ရေးကောင်စီ ဆက်ဆံရေး တိုးတက် ကောင်းမွန်ဖို့ အမေရိကန်ဘက်က ကြိုးစားနေတဲ့ အချိန်မှာ ဒီကိစ္စ ဖြစ်လာတာကြောင့် အီဂျစ်နဲ့ အမေရိကန်အကြား တင်းမာမှုတွေ ပိုမို ကြီးထွားလာနေပါတယ်။
ဒီကိစ္စ ပြေလည်ရေးအတွက် သမ္မတ အိုဘားမား အစိုးရက အီဂျစ်အာဏာပိုင်တွေနဲ့ အပြင်းအထန် ဆွေးနွေးနေတယ်လို့ အမေရိကန်အရာရှိတွေက ပြောပါတယ်။

0 comments:

Post a Comment

စာမရေးဖြစ်တော့တာကြောင့် ကျနော်ကြိုက်ပြီး ဖတ်စေချင်တဲ့ စာလေးတွေကို တင်ထားပါတယ်ဗျာ

Followers

Total Pageviews

အမှာပါးစရာများရှိနေရင်

Pop up my Cbox

Blog Archive

အက်ဒမင်

အခြားကဏ္ဍများကို လေ့လာရန်

ရှာဖွေလေ တွေ့ရှိလေ

စာပေမြတ်နိုးသူများ

free counters
Related Posts Plugin for WordPress, Blogger...