UAE နိုင်ငံ၊ ဒူဘိုင်း စာပေဟောပြောပွဲပေါ် ကျွန်တော့်အမြင်

by Lin Oo on Thursday, March 24, 2011 at 12:50pm

UAE နိုင်ငံ၊ ဒူဘိုင်းမြို့မှာ ကန္တာရ၀ဿ လူမှုရှေ့ဆောင်အသင်းမှနေပြီး ကျင်းပတဲ့ ပထမဦးဆုံးအကြိမ် စာပေဟောပြောပွဲကို အဖြူရောင်သံစဉ် ရေဒီယိုကနေ နားထောင်လိုက်ရပြီး အတွေးတွေ၊ စိတ်ဓါတ်ခွန်အားတွေ ဒီလို ဖြစ်ပေါ်လာပါတယ်။  

ဆရာ အော်ပီကျယ်
ဆရာအော်ပီကျယ်အနေနဲ့ ကိုယ့်နိုင်ငံရဲ့ ဖြစ်နေတဲ့ ပေါ့ဆမှုတွေ၊ လိုအပ်မှုတွေကို ထောက်ပြ သွားပါတယ်။

“ပျော်ရာမနေ တော်ရာမှာနေ ဆိုသလို၊ အရင်ခေတ်တုန်းက ရွာတွေ နယ်တွေကနေ မြို့ကြီးပေါ်ကို သွားပြီး အလုပ်လုပ်၊ ရေကြည်ရာ မြက်နုရာရှာ ကြရတယ်။ အခုတော့ ကိုယ့်နိုင်ငံ တွေရဲ့ မြို့ပေါ်မှာ ဘာပညာမှ လည်းမရှိ၊ မတိုးတက်တော့ နိုင်ငံ့အပြင်ဘက် နိုင်ငံခြားကို သွားပြီးတော့ အလုပ်လုပ် ကြရပါတယ်” လို့ ထောက်ပြ ပြန်ပါတယ်။ ကိုယ့်နိုင်ငံမှာဘဲ ရေကြည် မြက်နုဖြစ်ဖို့ ကြိုစားဖို့လည်း တိုက်တွန်းပါတယ်။


“ခေတ်စနစ်ကြောင့်၊ မိဘကြောင့်၊ ရေခံ မြေခံကြောင့် မတိုးတက်ဘူးဆိုတာ ၅၀% နှုန်းပဲရှိပြီး၊ ကျန် ၅၀% ကတော့ ခင်ဗျားတို့ရဲ့ ကိုယ်ပိုင် အရည်အချင်းပေါ်မှာ မူတည်နေပါတယ်” လို့လည်း ထောက်ပြပြန်ပါတယ်။

“ပညာတတ်ဆိုတာ Ph.D လိုမျိုး ရတာကို ပြောတာမဟုတ်ပါဘူး။ ဦးနှောက်ရှိသော စဉ်းစား ဥာဏ်ရှိသော ပုဂ္ဂိုလ်များကို ပြောတာပါ။ မြန်မာပြည် ကိုချစ်ရင် အချင်းချင်း ကူညီဖေးမကြပါ” လို့လည်း မျိုးချစ်စိတ်နဲ့ တိုင်းပြည်လူမျိုးကို မြှင့်တင်ဖို့ တိုက်တွန်း ပြန်ပါတယ်။

ဆရာအနေနဲ့ ဥပမာတွေနဲ့ရော ကိုယ့်နိုင်ငံရဲ့ ပညာရေး၊ စီးပွားရေး၊ ကျန်းမာရေး တွေအပြင် ကိုယ်တိုင် စိတ်ဓါတ်ပြုပြင် သင့်တာတွေကို ထောက်ပြကာ ဟောပြောသွား ပါတယ်။ ဆရာက နှမ်းတစ်စိနဲ့ ဆီမဖြစ်ဘူးဆိုရင် စာရွက် အဖြူ တစ်ရွက်ပေါ်မှာ နှမ်းတစ်စိကို တင်ပြီး ဖိချေကြည့်ပါတဲ့။ ဒီနှမ်းပတ်ပတ် လည်မှာ စာရွက်ပေါ်မှာ ဆီကွက် ဖြစ်သွားတာကို တွေ့ရပါမယ်။ ဒါဟာ နှမ်းတစ်စိက ဆီဖြစ်လို့ပေါ့တဲ့။ နှမ်းစိပေါင်းများစွာက ဆီပိဿာပေါင်းများစွာကို ဖြစ်စေပါတယ်။ နှမ်းတစ်စိနဲ့ ဆီမဖြစ်ဘူး ပြောတဲ့လူတွေကို ကျောက်ခဲ တစ်တောင်း၊ သဲတစ်တောင်းတွေနဲ့ ဆီဖြစ်အောင် လုပ်ကြည့်ပါလားလို့ မှားယွင်းနေတဲ့ အတွေးတွေကို ထောက်ပြပြီး ကိုယ့်နိုင်ငံအတွက် ကြိုးစားကြပါလို့ ဆရာအနေနဲ့ ဟောပြော သွားတာကို တွေ့ရပါတယ်။  

ဆရာ ချစ်ဦးညို

• (၁) စာပေဟောပြောပွဲဆိုတာ နိုင်ငံရေးမဟုတ်ပါ။ သို့သော် ကိုယ့်နိုင်ငံ ကိုယ့်လူမျိုးအတွက် ဟောပြောပေးရမှာဖြစ်တဲ့အတွက် နိုင်ငံရေးဖြစ်တယ်။
• (၂) စာပေဟောပြောပွဲဆိုတာ ဘာသာရေးတရားပွဲမဟုတ်ပါ။ သို့သော် စစ်မှန်သော ဓမ္မရဲ့ အနှစ်သာရတွေ ဒီထဲမှာ ပါကို ပါရပါမယ်။
• (၃) စာပေဟောပြောပွဲဆိုတာ ဂီတသမား၊ မော်ဒယ်၊ သရုပ်ဆောင်များကဲ့သို့ စတိတ်စင်မြင့်ပေါ် တက်ပြီး ဖျော်ဖြေရသော ဖျော်ဖြေရေးပွဲမဟုတ်ပါ။ သို့သော် ပရိတ်သက် မပျင်းရအောင် Entertainment မဟုတ်သော Entertainment ကို ပေးရပါမယ်။
• (၄) စာပေဟောပြောပွဲဆိုတာ လူရွှင်တော်တွေ ပျက်လုံးထုတ်သော ဟာသစင် မဟုတ်ပါ။ သို့သော် အမြီးအမောက်မတည့်သော အရာတွေကို လှောင်သော ကလိသော ဟာသ ပါရပါမယ်။ ဆိုပြီး ဆရာချစ်ဦးညိုမှ သူရဲ့ စာပေဟောပြောပွဲနဲ့ပတ်သက်တဲ့ အယူကို တင်ပြသွားပါတယ်။

ဆရာအနေနဲ့ ရင်ကိုထိသော ကဗျာများကို ရွတ်ဆိုပြီး ဥပမာများနဲ့ ထောက်ပြပြီး စိတ်ဓါတ်ကို မြှင့်တင်ပေးပါတယ်။ “အကျင့်ဆိုး” ဆိုတဲ့ ရွှေတိုင်ညွန့်ရေးသော သီချင်းကို ကိုယ်တိုင်ဆိုပြကာ ဖြစ်ပျက်နေတာတွေကို ထင်ဟပ်အောင် ရှင်းပြဝေဖန် ဟောပြော ထောက်ပြသွားပြန်ပါတယ်။ သီချင်းလေးတွေနဲ့ ဆရာဟာ တိုင်းပြည်အတွက် လူငယ်တွေ တွေးဖို့၊ ကြိုစားဖို့၊ ပြုပြင်ဖို့တွေကို ထောက်ပြ သွားပါတယ်။

ဆရာတို့က ပြောပါတယ်။ ကျွန်တော်တို့ ပြောတာချည်းကို အမှန်လို့မမှတ်ပါနဲ့။ ဒါပေမယ့် တွေးကြပြီး၊ ကျွန်တော်တို့ ပြောတာတွေကို မှတ်သားပြီး ယူသင့်တာယူ၊ မယူသင့်ဘူးထင်ရင် မယူပါနဲ့လို့ ရှင်းရှင်းပင် ပြောကြားသွားပါတယ်။ နိုင်ငံအတွက် တကယ်ကြိုစားရမယ့် ပြုပြင်ရမယ့် စိတ်ဓါတ်တွေ၊ အရည်အချင်းတွေနဲ့ မြှင့်တင်ဖို့ ဆရာတို့ဟာ ဟောကြားခဲ့တာဖြစ်ပါတယ်။

ပွဲကို ကျင်းပပေးတဲ့ ကန္တာရ၀ဿဟာ နိုင်ငံအတွက် တာဝန်တစ်ရပ်ကို ထမ်းဆောင်လိုက်တာ ဖြစ်သလို၊ အဖြူရောင်သံစဉ် ရေဒီယိုအနေနဲ့လည်း တစ်ကမ္ဘာလုံးက မြန်မာတွေ ကြားအောင်၊ အတွေးတွေ ထပ်ဖြန့်ကျက်နိုင်အောင်၊ စိတ်ဓါတ်ခွန်အားတွေ မွေးဖွားဖြစ်ထွန်းလာအောင် လွှင့်ပေးခဲ့တဲ့အတွက် တာဝန်တစ်ရပ်ကို ကျေပွန်လိုက်တာပါပဲ။ ကျန်တဲ့တာဝန်တွေကတော့ ကိုယ်တိုင် နားထောင်လိုက်ပြီး တွေးစရာတွေ ဖြစ်ကျန်ခဲ့တဲ့ ပရိတ်သက် ပြည်သူများပဲ ဖြစ်ကြပါတယ်။ သူတို့ကရော ကျေပွန်ဖို့ဆိုတာ ဆက်လက် တွေးစ အားထုတ်မှုများပေါ်မှာတင် မူတည်နေပါတော့တယ်။

လင်းဦး(စိတ်ပညာ)
အသံဖိုင်အား Download ယူနိုင်ပါတယ်။ (http://linoo.myanmarpress.com/2011/03/uae.html)

• နေ့ရက် >> မြန်မာသက္ကရာဇ် (၁၃၇၂)တန်ပေါင်းလဆုတ် (၀၃)ရက် / (၂၂/၀၃/၂၀၁၁)  အင်္ဂါနေ့
• နေရာ >> ယူအေအီးနိုင်ငံ၊ ဒူဘိုင်းမြို့
• ဟောပြော သူများ >> စာရေးဆရာ ဆရာ ချစ်ဦးညိုနှင့် ဆရာ အော်ပီကျယ်