လူငယ့်အတွေး ငြိမ်းချမ်းရေး

by Myanmar Youth Network on Friday, October 22, 2010 at 1:15pm

‘ငြိမ်းချမ်းရေးကို အတင်းလုပ်ယူ၍မရ၊ အပြန်အလှန်နားလည်မှုဖြင့်သာ တည်ဆောက်နိုင်သည်’ ဟူ၍ ကမ္ဘာကျော်ရူပဗေဒပညာရှင်နှင့် အဏုမြူစွမ်းအင်ဖခင် အိုင်းစတိုင်းကဆိုခဲ့သည်။ ‘ကောင်းသောစစ်နှင့် မကောင်းသောငြိမ်းချမ်းရေးဟူသည် မရှိ’ ဟူသော ဆိုရိုးစကားလည်းရှိသည်။ စာရေးဆရာကြည်မင်းက “စစ်ကြောင့် တိုးတက်မှုတချို့ရှိတာ မငြင်းလိုပါဘူး။ ဒါပေမဲ့ စစ်ကြောင့်သာ တိုးတက်ရမယ်ဆိုရင်တော့ မတိုးတက်ချင်ပါဘူး။ ငြိမ်းချမ်းရေးဟာ အချိန်မရွေးပြိုကွဲနိုင်တယ်။” ဟု စက်တင်ဘာလ ၃၀ ရက်နေ့က ကျင်းပသော လူငယ်နှင့် ငြိမ်းချမ်းရေးခေါင်းစဉ်ဖြင့် ပြုလုပ်သည့် ဟောပြောပွဲတွင် ထည့်သွင်းပြောဆိုသည်။


ထို့အတူ ကမ္ဘာကြီး၏ အနာဂတ်ကို ပုံဖော်ကြမည့် လူငယ်များတွင်လည်း ငြိမ်းချမ်းရေးအပေါ် မတူကွဲပြားသောအမြင်များ ရှိကြသည်။ တစ်ချိန်က မငြိမ်းချမ်းခဲ့သည့် မြို့လေးတစ်မြို့တွင် မွေးဖွားလာခဲ့သော ပြည်တွင်းမီဒီယာတစ်ခုမှ သတင်းထောက်တစ်ဦးဖြစ်သူ အသက် ၂၅ နှစ် အရွယ်ရှိ ကိုအေးခိုင်က “မငြိမ်းချမ်းတဲ့နေရာတွေမှာ ငြိမ်းချမ်းရေးအကြောင်းကို ပိုပြောကြတယ်။ ကျွန်တော်တို့ ငယ်ငယ်က အညိုရောင်နယ်ဖြေထဲမှာ နေခဲ့ရတယ်။ ဒီတော့ သူရဲ့တန်းဖိုးကို ကောင်းကောင်းသိတယ်။ ကျွန်တော်နဲ့ ခေတ်ပြိုင်လူငယ်အချို့တွေနဲ့ ငယ်တဲ့မျိုးဆက်သစ်တွေက ဒီလိုမဖြတ်သန်းခဲ့ရတာတွေရှိတော့ သူတို့ရဲ့အမြင်တွေက ကျွန်တော်တို့နဲ့ ခြားနားကောင်းခြားနားပါလိမ့်မယ်။ ငြိမ်းချမ်းရေးကို တန်ဖိုးထားတာ အလေးအပေါ့လည်း ကွာပါလိမ့်မယ်” ဟု ပြောသည်။ လူငယ်များနှင့် သက်ဆိုင်သည့် ဖွံ့ဖြိုးရေးလုပ်ငန်းများ ဆောင်ရွက်ပေးနေသော မြန်မာလူငယ်ကွန်ရက်အဖွဲ့ဝင်တစ်ဦးဖြစ်သူ အသက် ၂၈ နှစ် အရွယ် ကိုရဲဝင်းက “ငြိမ်းချမ်းရေးဆိုတာ အားလုံးလိုချင်တဲ့အရာပါ။ ဒါပေမဲ့ အမြဲထာဝရဆိုတာတော့မရှိနိုင်ဘူး။ စစ်ပွဲတွေဆိုတာလည်း ရှိနေမှာပဲ။ စစ်ပွဲဆိုတာထက် ပဋိပက္ခဆိုရင် ပိုသင့်တော်မယ် ထင်တယ်။ Conflict (ပဋိပက္ခ) တွေကြောင့် ပိုကောင်းတဲ့ Ideology (အတွေးအခေါ်) အသစ်တွေလည်း ပေါ်ထွက်လာတတ်ပါတယ်” ဟု ၎င်း၏အမြင်ကို ပြောဆိုသည်။


ငြိမ်းချမ်းရေးအပေါ်အမြင်နှင့် ပတ်သက်၍သတင်းနှင့် လူထုဆက်သွယ်ရေးဘာ သာရပ်ကို လေ့လာသင်ယူနေသော ကျောင်းသားတစ်ဦးဖြစ်ပြီး နိုင်ငံတကာရေးရာများကိုလည်း စိတ်ဝင်စားသူ အသက် ၂၄ နှစ်အရွယ်ရှိ ကိုကျော်မိုးဟိန်းက “ကျွန်တော့်နေနဲ့တော့ ငြိမ်းချမ်းရေးဆိုတာ အတွင်း ငြိမ်းချမ်းရေး (အဇ္ဈတ္တ) ပိုအရေးကြီးတယ်ထင်ပါတယ်။ ကိုယ့်ပတ်ဝန်းကျင်မှာ စစ်ဖြစ်နေတယ်ဆိုရင်တောင် ကိုယ့်စိတ်ထဲမှာ ငြိမ်းချမ်းနေရင် ဒုက္ခသုက္ခတွေကြား နေနိုင်သွားပါလိမ့်မယ်။ ကျွန်တော်ကြားဖူးတာတစ်ခုလိုပေါ့။ ငြိမ်းချမ်းရေးကို လိုချင်ရင် စစ်ကိုပြင်ဆင်ရမယ်ဆိုတာမျိုးပေါ့” ဟုဆိုသည်။

အမျိုးသားစီမံခန့်ခွဲမှုကောလိပ်၊ သတင်းစာပညာ တတိယနှစ်ကျောင်းသူတစ်ဦးဖြစ်သူ အသက် ၂၁ နှစ်အရွယ် မအေးသဉ္ဇာအောင်က “ဖြစ်ချင်တာနဲ့ ဖြစ်သင့်တာတစ်တပ်တည်းကျမယ်ဆိုရင် ကိုယ့်အတွက်တော့ ငြိမ်းချမ်းတယ်လို့ ထင်ပါတယ်” ဟု ပြောသည်။

‘နှလုံးသာထဲတွင် သမာသမတ်စိတ်ထားရှိလျှင် စာရိတ္တကောင်းမွန်လှပမည်။ စာရိတ္တကောင်းမွန်လှပလျှင် အိမ်တွင်းညီညွှတ်မှုရှိမည်။ အိမ်တွင်းညီညွှတ်မှုရှိလျှင် တိုင်းပြည်မှာ စည်းကမ်းကျနသေ၀ပ်မှုရှိမည်။ တိုင်းပြည်မှာ စည်းကမ်းကျနသေ၀ပ်မှုရှိလျှင် လောကငြိမ်းချမ်းရေးရရှိပေလိမ့်မည်’ ဆိုသော တရုတ်ဆိုရိုးစကားတစ်ခုရှိသည်။

လူငယ်နှင့် ငြိမ်းချမ်းရေးဟောပြောပွဲတွင် စာရေးဆရာကြည်မင်းက မတရားနှိပ်စက်ညှဉ်းပန်းမှု၊ တရားမမျှတမှု၊ အခွင့်အရေးမညီမျှမှု၊ ခြစားမှု၊ ဥပဒေမဲ့ဆောင်ရွက်နေမှု စသည်တို့ရှိမနေမှသာလျှင် မိမိဝန်းကျင်တွင် ငြိမ်းချမ်းရေးကို တည်ဆောက်ယူ နိုင်သည်ဟုဆိုသည်။

သို့သော် အထက်ပါ ကိစ္စရပ်များ မဖြစ်ပေါ်အောင်၊ ပပျောက်အောင် မဆောင်ရွက်မိ လူငယ်များအနေဖြင့် မိမိကိုယ်ကိုယ်အသိပညာ၊ အတက်ပညာ၊ သတ္တိ၊ ဗျတ္တိနှင့် ပြည့်စုံစေရန် ဦးစွာတည်ဆောက်ရမည်ဟုလည်း ၎င်းကထောက်ပြ ပြောဆိုသည်။

“ရှေ့ခရီးအတွက်ပဲပြင်ဆင်ထားတာ အကောင်းဆုံးပေါ့ တစ်ချိန်ချိန်မှာတော့ တိမ်ရှင်းသွားလိမ့်မယ်လို့ ထင်ပါတယ်။ ငြိမ်းချမ်းရေးဆိုတာ ဘယ်သူမဆို၊ ဘယ်နိုင်ငံမဆို အားလုံးလိုချင်ကြတာချည်းပါပဲ” ဟု လူမှုဖွံ့ဖြိုးရေးလုပ်ငန်းများ၌ ၀င်ရောက်ဆောင်ရွက်ပေးနေသော အသက် ၂၅ နှစ် အရွယ် ကိုစစ်နိုင်ကဆိုသည်။

ဇော်ထွဋ်အောင်
The Voice Weekly
Monday, October 18 – 24, 2010

အောက်တိုဘာ ၁၈ ရက်နေ့ထုတ် The Voice Weekly ၏ အချပ်ပို (B) ၏ Society အခန်းကဏ္ဍတွင်ပါရှိသည့် “လူငယ့်အတွေး ငြိမ်းချမ်းရေး” ခေါင်းစဉ်ဖြင့် ကိုဇော်ထွဋ်အောင်ရေးသားထားသည့် ဆောင်းပါးဖြစ်ပါသည်။