အာ ၀ီ ရယ်ဒီ

Myo Tha Htet November 6, 2013 at 9:44am

ဒီကနေ့ ခေတ်ပြောင်းခေတ်လွဲမှာ မြန်မာသတင်းစာဆရာတွေ အင်္ဂလိပ်စာ ကျွမ်းကျင်စွာတတ်ဖို့ အရေးကြီးကြောင်း ပေါ်လွင်စေဖို့ ``ကျွန်တော်တို့ အဆင်သင့် ဖြစ်ပြီလား`` ကို ``အာ ၀ီ ရယ်ဒီ`` လို့ ခေါင်းစဉ် ပေး၊ ရေးရပါတယ်။ တကယ်လည်း ဒီအရေးဟာ အပူတပြင်း အရေးကြီးလာပြီမို့ လက်တွေ့ လောကထဲက လူငယ်သတင်းစာဆရာတွေကို မေတ္တာရှေ့ထားလို့ ဥာဏ်နှိုးလိုက်ရပါတယ်။

တနေ့က မိတ်ဆွေ သတင်းထောက်တယောက်နဲ့ လက်ဖက်ရည်သောက်ရင်း လက်ရှိ နိုင်ငံရေးနဲ့ သတင်းစာလောကအရေးတွေ ဆွေးနွေးဖြစ်တော့ ကျွန်တော့်မှာတောင် မရှိသေးတဲ့ အတွေးမျိုး မိတ်ဆွေမှာ ရှိနေတာကို ထင်းကနဲ တွေ့လိုက်ရတော့ အင်မတန် ၀မ်းမြောက်မိသလို ဒီအရေးဟာ တကယ့်အရေးပေပဲလို့လည်း ရာခိုင်နှုန်းပြည့် ထောက်ခံမိပါတယ်။
သူ့စဉ်းစားချက်တွေက လက်တွေ့ဖြစ်ရပ်တွေနဲ့ ချိန်ထိုးကြည့်တဲ့အခါ လူများများ သိဖို့ ကောင်းတဲ့ ကိစ္စဖြစ်တာမို့ သူ့ကို ရေးပါလားလို့ တိုက်တွန်းပေမယ့် လက်တွန့်နေပုံရလို့ ကျွန်တော်က ရေးရပါတယ်။

ပွင့်သစ်စ မြန်မာနိုင်ငံဟာ လာမယ့်နှစ်နှစ်အတွင်း အာဆီယံတန်းဝင် နိုင်ငံတခုဖြစ်ကြောင်း ထင်ရှားစွာ ပြရပါတော့မယ်။ ၂၀၁၄ နှစ်စကစလို့ အာဆီယံအဖွဲ့ကြီးရဲ့ ဥက္ကဌတာဝန်ယူမယ့် လက်ရှိအစိုးရဟာ အင်မတန်မှကို တာဝန်ကြီးပါတယ်။ ဥက္ကဌတာဝန်အနေနဲ့ ဒေသကြီးတခုလုံး အရေးရော၊ ဒေသနဲ့ ဆက်စပ်နေတဲ့ သူတွေနဲ့ အရေးအတွက်ပါ အစည်းအဝေးတွေကို အရေအတွက် ထောင်နဲ့ချီ ကျင်းပရမှာမို့ တော်ရင်တော်သလို ကျော်မှာဖြစ်သလို ချာရင်ချာသလို အရှက်ကွဲမှာ ဖြစ်ပါတယ်။ ဒီနေရာမှာ အစိုးရကို မကြိုက်တဲ့ (ဆန့်ကျင်တဲ့) အဖွဲ့အစည်းတွေကပါ အစိုးရကို ပိုလို့ အရှက်ရ မျက်နှာပျက်အောင် အိုးမည်းသုတ် ဒုက္ခပေးနိုင်ပါသေးတယ်။

ဒီတာဝန်တွေကို ကျေပွန်စေဖို့ အစိုးရဟာ ရိုးသားပြီး ပွင့်ပွင့်လင်းလင်းနဲ့ တင်ကြိုရှင်းပြရင်းနဲ့ ပြည်သူတရပ်လုံး ပါလာအောင် လုပ်ရမှာပါ။ ဒါက အစိုးရတာဝန်ပါ။ အစိုးရကို ဆန့်ကျင်တဲ့ အဖွဲ့တွေ မဟုတ်ပေမယ့်လို့ အစိုးရကို အမြဲ စောင့်ကြည့်နေကာ လိုရင်လိုသလို ထောက်ပြ ဝေဖန်တဲ့ အလုပ်ကို လုပ်နေကြပြီး၊ ကိုယ်တိုင်လည်း အရည်အချင်း ရှိနေဖို့ပါ လိုအပ်ကြတဲ့ သတင်းစာဆရာတွေကြောင့်လည်း အစိုးရအပါအ၀င် တိုင်းပြည်ပါ အရှက်ရ၊ မျက်နှာပျက်စေနိုင်တာတွေလည်း ရှိလာနိုင်ပါတယ်။ ဒီအရေးဟာ ပူပန်စရာ ကောင်းပေမယ့် ကြိုတင်ပြင်ဆင်လို့တော့ ရပါတယ်။

လွတ်လပ်မှုနဲ့အတူ...

သတင်းစာလွတ်လပ်ခွင့် ရလာတဲ့ တနှစ်ကျော် ကာလအတွင်းမှာ နေ့စဉ်ထုတ် ပုဂ္ဂလိက သတင်းစာတွေ ထွက်လာသလို မျိုးဆက်သစ် သတင်းထောက်တွေလည်း အများကြီး တိုးလာပါတယ်။ ဒါဟာ လူငယ်တွေအတွက် အလုပ်အကိုင် အခွင့်အလမ်း များလာတာဖြစ်သလို သတင်းစာလောကကြီးအတွက်လည်း အလွန့်အလွန်ကောင်းတဲ့ လက္ခဏာရပ်ပဲ ဖြစ်ပါတယ်။ ဒါပေမဲ့ ဖြစ်လာတဲ့ လူငယ်သတင်းထောက် အများစုမှာက သတင်းစာပညာ အသာထားလို့ သတင်းထောက်ပုံစံ ကျနအောင်ကိုပဲ မနည်းပုံသွင်း နေရသလို ဖြစ်နေပါတယ်။

လွတ်လပ်တဲ့ သတင်းစာလောကနဲ့အတူ လွတ်လပ်တဲ့ (ပုံစံတကျ မဟုတ်တဲ့) သတင်းထောက်တွေ ထွက်လာတာမှာလည်း မြန်မာပုံစံနဲ့ဆိုရင် အများကြီး အပြစ်ပြောစရာ မရှိပေမယ့်လို့ အာဆီယံနဲ့ နိုင်ငံတကာသတင်းထောက်တွေနဲ့ ယှဉ်လာရပြီ ဆိုရင်တော့ ရှိရင်းစွဲပုံစံတွေနဲ့က ဘယ်လိုမှ ဖြစ်မှာ မဟုတ်တော့ပါဘူး။ ဆိုခဲ့ပါအတိုင်း အင်္ဂလိပ်စာက စလို့ နေပုံထိုင်ပုံ၊ ပြောပုံဆိုပေါက်၊ မေးဟန်ထောက်ကွက်၊ သုတေသန၊ တင်ကြိုပြင်ဆင် စသဖြင့် အများကြီး လေ့ကျင့်ထား၊ လုပ်ထားရမှာ ဖြစ်ပါတယ်။ အဲဒါတွေကို အနီးကပ်မှ လုပ်ကြမယ်ဆိုရင် အင်မတန်မှ အချိန်နှောင်းပြီး နစ်နာသွားနိုင်သလို အခက်အခဲတွေလည်း အများကြီး တွေ့ရမှာ ဖြစ်ပါတယ်။

ဝတ်စားဆင်ယင် နေထိုင်ပုံ

သတင်းစာဆရာတွေဟာ အများအားဖြင့် ကိုယ် တွေ့ဆုံ မေးမြန်းရမယ့် ကိုယ့်သတင်းရင်းမြစ် အနေအထားကိုလိုက်ပြီး သပ်သပ်ရပ်ရပ် ၀တ်စားဆင်ယင် ပြောဆို ဆက်ဆံတတ်ရပါတယ်။ ယဉ်ယဉ်ကျေးကျေး သပ်သပ်ရပ်ရပ် ၀တ်တာ၊ ဆံပင်နဲ့ မျက်နှာပုံစံကို ပြုပြင်ထားတာ (ခေါင်းကို သပ်သပ်ရပ်ရပ် ဖြီးထားတာ၊ မုတ်ဆိတ် ရိတ်ထားတာ) အပြင် ဆက်ဆံရမယ့်သူက နိုင်ငံ့ခေါင်းဆောင်၊ အစိုးရအဖွဲ့ဝင်၊ အဖွဲ့အစည်းခေါင်းဆောင် စသဖြင့် အလိမ္မာ အယဉ်ကျေးဆုံး ပြောဆို ဆက်ဆံဖို့ လိုပါတယ်။

စကားပြောတာခြင်း၊ မေးခွန်းမေးတာခြင်း၊ သတင်းအချက်အလက်အတွက် နှိုက်ထုတ်လိုက်တာခြင်း အတူတူ မရိုင်းစိုင်း၊ မရင့်သီးဘဲ တဖက်လူက ကိုယ့်ကိုယ်ပါ ခင်မင်လေးစားပြီး (၀ါ) ရှောင်မရဘဲ ဖြေကိုဖြေရမယ့် သဘောဖြစ်သွားအောင် မေးတတ်ဖို့ လိုပါတယ်။ ဒါဟာ ပုံစံကျတဲ့ သတင်းထောက်တယောက် ရှိရမယ့် အနေအထား ဖြစ်ပါတယ်။ သတင်းထောက် တယောက်ဟာ တင်းတင်းရင်းရင်း တိတိကျကျ ပြောဆို ဆက်ဆံတတ်ဖို့ လိုအပ်ပေမယ့် ရိုင်းစိုင်းလို့တော့ မရပါဘူး။

လာမယ့် အာဆီယံ ထိပ်သီးစည်းဝေးပွဲတွေ တက်ပြီး သတင်းယူမယ့် သတင်းထောက်တွေဟာ အဲဒီလိုပုံစံဖြစ်ပြီးတဲ့အပြင် မြန်မာခေါင်းဆောင်တွေကလွဲရင် ကျန်ခေါင်းဆောင်တွေ အားလုံးကို သူတို့ဘာသာစကား သို့မဟုတ် အင်္ဂလိပ်ဘာသာစကားနဲ့သာ ပြောဆို ဆက်ဆံ မေးမြန်းကြရတော့မှာ ဖြစ်ပါတယ်။


လက်ရှိကာလမှာတော့ သတင်းထောက်အချို့ရဲ့ ၀တ်စားမှုပုံစံတွေ၊ မေးမြန်းမှုပုံစံတွေက မြန်မာလိုတောင်မှ သတင်းထောက်တယောက်ရဲ့ ပုံစံမ၀င်သေးပါဘူး။ 

နိုင်ငံရေးခေါင်းဆောင်တွေနဲ့ အစိုးရတာဝန်ရှိသူတွေ ပြုလုပ်တဲ့ သတင်းစာရှင်းလင်းပွဲတွေကို ဘောင်းဘီရှည် မဟုတ်တဲ့ ဘောင်းဘီတွေ ၀တ်စားပြီး တက်ရောက်တာ၊ သတင်းစာသမားပုံစံ မပေါက်ဘဲ သရုပ်ဆောင်တွေလို ပြုပြင် ၀တ်စားထားတာ၊ မြန်မာဝတ်စုံကို သပ်သပ်ရပ်ရပ် ၀တ်တာ မဟုတ်တဲ့အပြင် အမြင်မတော်မတည့်စရာ ၀တ်စားကြတာတွေကို အခါအားလျော်စွာ တွေ့ရတတ်ပါတယ်။ ဒါ့အပြင် ဘာတာဝန်မှ မရှိစေဦးတော့... ကိုယ့်ထက် အသက်နှစ်ဆ (၀ါ) နှစ်ဆမက ကြီးမားတဲ့ သူတွေကို ပြောဆို ဆက်ဆံပုံတချို့က မြင်လို့ကြားလို့မှ အဆင်မပြေဖြစ်နေတာကို အခါအားလျော်စွာ တွေ့ရ၊ ဖတ်ရ၊ မြင်နေရပါတယ်။

အာဆီယံထိပ်သီးအစည်းအဝေးတခုမှာ အ၀တ်အစားဖိုသီဖတ်သီနဲ့ ကွမ်းတမြုံမြုံစားရင်း သတင်းလိုက်နေတဲ့သူတွေ၊ လွှတ်တော်လိုနေရာမှာ သတင်းလိုက်ရင်း အိပ်ပျော်နေတာ၊ မေးမြန်းပြောဆိုပုံတွေက သတင်းထောက်ပုံစံ မ၀င်ဘဲ ရင်းနှီးတဲ့ မိသားစုဝင်လို ဖြစ်နေတာ ဒါမှမဟုတ် လိုတာထက်ပိုပြီး ရိုင်းပြသလို ဖြစ်နေတာ၊ အဲဒီလို လုပ်နေကြသူတချို့ဟာ သတင်းထောက်က လွန်လို့ ဆိုင်ရာသတင်းစာနဲ့ သတင်းဌာနတွေမှာ စီနီယာသတင်းထောက် (၀ါ) အယ်ဒီတာအဖြစ်လည်း လုပ်နေကြတော့ နောက်လူတွေက အတုယူမှားပြီး သူ့ထက်ကဲတွေ ဖြစ်လာကြမယ်ဆိုရင် ပြည်တွင်းသတင်းစာလောကအတွက်လည်း အရုပ်ဆိုးသလို အများကြီး ကြိုတင်ပြင်ဆင် အရည်အချင်း မြှင့်ထားဖို့လိုတဲ့ အာဆီယံနဲ့ ဆက်စပ်အစည်းအဝေးတွေမှာဆိုလည်း အရှက်ရ၊ ဂုဏ်သိက္ခာကျစေမှာ ဖြစ်ပါတယ်။

ကိုယ်က အိမ်ရှင်မို့ဆိုပြီး ကွမ်းတွေ စားချင်သလို စား၊ ထွေးချင်သလို ထွေးနေကြမယ်ဆိုရင်ဖြင့် အော့နှလုံးနာတဲ့မျက်နှာတွေနဲ့ အကြည့်ခံရဖို့ကိုလည်း မျှော်လင့်ထားကြစေလိုပါတယ်။

တကယ်တော့ သတင်းထောက်တွေ ပုံစံကျအောင် ပြောဆို၊ ၀တ်စား၊ နေထိုင်တတ်အောင်က သတင်းစာတိုက်၊ ရုပ်သံဌာန၊ သတင်းအဖွဲ့အစည်းအလိုက်က တာဝန်ရှိတဲ့ အယ်ဒီတာ၊ စီနီယာသတင်းထောက်၊ မန်နေဂျာ စသူတွေက သင်ကြားပြသပေးကြရမှာ ဖြစ်ပါတယ်။ ကိုယ်တိုင်ကလည်း သူတို့ရှေ့မှာ ပုံစံကောင်းနဲ့ နေပြရသလို ထိုက်သင့်သလိုလည်း မျိုးဆက်သစ်တွေကို သင်ပြပေးကြရမှာ ဖြစ်ပါတယ်။

အခုတော့ အဲဒီတာဝန်ကို တိုက်တွေ၊ ဌာနတွေ၊ အဖွဲ့အစည်းတွေထဲက တချို့ကလည်း ကောင်းကောင်း မယူနိုင်ကြသလို သတင်းစာလောကနဲ့ ဆက်စပ်နေတဲ့ ထိန်းကျောင်းရမယ့် အဖွဲ့အစည်းတွေကလည်း ပြောဆို/ ထိန်းကျောင်းတာတွေ မလုပ်နိုင်ကြသေးပါဘူး။ ပွင့်သစ်စ သတင်းစာလောကမှာ မြန်မာဟန်ပန်နဲ့တောင် အထာမကျကြသေးရင် အာဆီယံနဲ့ နိုင်ငံတကာက မီဒီယာတွေနဲ့ အတူယှဉ်ရတဲ့အခါမှာ ကျန်တဲ့ သတင်းလိုက်တာ၊ ရေးသား တင်ဆက်တာတွေ ထားပါဦး၊ အိမ်ရှင်ဖြစ်တဲ့ ကိုယ့်ပုံစံ မမှန်/ မဟန်တာကြောင့်ပဲ တိုင်းပြည်ပါ နှာခေါင်းရှုံ့ ခံရနိုင်ချေ ရှိနေပါတယ်။


အတွေ့အကြုံလည်း လိုသေးတယ်

အာဆီယံ ထိပ်သီးစည်းဝေးကြီးမှာ အိမ်ရှင်တွေ အနေနဲ့ ကိုယ်တိုင် တက်ရောက် သတင်းယူကြမယ့် သတင်းထောက်တွေ အနေနဲ့ ပြင်ဆင်ထားမယ်ဆိုရင် အိမ်ရှင်ဖြစ်တဲ့အတွက် မြန်မာဘာသာစကားကစလို့ အားသာချက်တွေ အများကြီး ရှိနေပါတယ်။ ဒါပေမဲ့လည်း ဒီလိုပွဲမျိုးတွေဆိုတာ သာမန်ပွဲတွေနဲ့ ကွာခြားလှတာမို့ အတွေ့အကြုံ ရှိထားရင်တော့ ပိုကောင်းပါတယ်။ ဒါမှသာ ကမ္ဘာ့ခေါင်းဆောင်တွေ၊ ဒေသတွင်းက ခေါင်းဆောင်တွေ၊ သူတို့နဲ့အတူ ပါလာကြမယ့် အစိုးရအဖွဲ့ဝင်တွေ၊ ဌာနဆိုင်ရာ အရာရှိကြီးတွေကို တွေ့ရ၊ စကားပြောရ၊ မေးမြန်းခွင့်တွေ ရတဲ့အခါမှာ သွက်သွက်လက်လက် ဖော်ဖော်ရွေရွေနဲ့ အကောင်းဆုံး ယှဉ်တွဲ ပြောဆို ဆက်ဆံနိုင်ကြမှာ ဖြစ်ပါတယ်။

ဒီအတွက် ကြိုတင် ပြင်ဆင်မှုတွေက အများကြီး အရေးပါသလို သိကိုသိထားသင့်တဲ့ အာဆီယံအကြောင်း၊ အာဆီယံအဖွဲ့ဝင် နိုင်ငံတွေနဲ့ ခေါင်းဆောင်တွေအကြောင်း၊ အာဆီယံမိတ်ဖက်နိုင်ငံတွေနဲ့ သူတို့တွေရဲ့ နိုင်ငံ့ခေါင်းဆောင်တွေအကြောင်း၊ တခြား ဆက်စပ်လူနဲ့ အဖွဲ့အစည်းတွေအကြောင်း၊ ကျင်းပမယ့် များစွာသော အစည်းအဝေးတွေနဲ့ အစီအစဉ်တွေအကြောင်း ကြိုတင်သိထားရမှာ ဖြစ်ပါတယ်။ တခါ အရင်က ဒီလို အစည်းအဝေးတွေ ကျင်းပပုံနဲ့ သတင်းရယူပုံ၊ အစည်းအဝေးကြီး တခုလုံးနဲ့စပ်ပြီး ကိုယ့်တိုက်နဲ့ဌာနအတွက် အရေးကြီးတာနဲ့ မကြီးတာကို ခွဲခြားပြီး ဦးစားပေး သတ်မှတ်လို့ သတင်းတွေ ဘယ်လို လိုက်ကြမလဲ ဆိုတာတွေမှာ အတွေ့အကြုံ ရှိသူတွေက သာနေမှာ ဖြစ်ပါတယ်။ ဒါ့ကြောင့် အခုကထဲကနေ အတွေ့အကြုံ ရအောင် လုပ်ထားကြတာ၊ အတွေ့အကြုံတွေကို မျှထားကြတာတွေကို လုပ်ထားကြရမှာ ဖြစ်ပါတယ်။

အဲဒီလို ကြိုတင် ပြင်ဆင်မှုတွေ မလုပ်ထားခဲ့ရင် ခမ်းနားတဲ့ အစည်းအဝေးတွေထဲ ရောက်မှ တောသားမြို့ရောက်ဖြစ်သလို ဟိုဘက်ပြေးကြည့်လိုက် ပျော်နေလိုက်၊ ဒီဘက်ပြေးကြည့်လိုက် ရွှင်နေလိုက်၊ ဟိုလူ့နောက်လိုက်ဖို့ စဉ်းစားလိုက် လွတ်သွားလိုက်၊ ဒီဘက်လူကို ကြည့်ထားလိုက် ဘယ်အချိန်က ထွက်သွားမှန်း မသိလိုက်နဲ့ အစည်းအဝေးသာ တက်ပြီး သတင်းယူလိုက်တယ်၊ ဖြစ်ဖြစ်မြောက်မြောက် သတင်းတွေ မရယူနိုင်ဘဲ အချိန်ကုန် လူပင်ပန်းပြီး ကိုယ့်အတွက်ရော ကိုယ့်သတင်းဌာနအတွက်ပါ အကျိုးမဲ့ဖြစ်သွားနိုင်တာကို ကြိုတင် စဉ်းစားသင့်ပါတယ်။

သတင်းထောက်တွေ ပုံစံကျပြီး အရည်အချင်းအပြည့်နဲ့ သတင်းတွေ ရယူနိုင်ဖို့ ကိစ္စမှာ  အစိုးရနဲ့ လက်တွဲ ဆောင်ရွက်လို့ ရနိုင်ပါတယ်။ အစိုးရအတွက်ကလည်း များပြားပြီး ခမ်းနားတဲ့ လုံခြုံရေးအရလည်း အများကြီး တာဝန်တွေ ယူကြရမယ့် ဒီလို အစည်းအဝေးမျိုးတွေကို ပထမဆုံးအကြိမ် လက်ခံ ကျင်းပရမှာဆိုတော့ စိုးရိမ်မှုတွေ ရှိနေမှာပါ။ ဒီတော့ အိမ်ရှင်ဖြစ်တဲ့ အစိုးရနဲ့ ကိုယ့်အတွက်လည်း သက်သောင့်သက်သာနဲ့ အဆင်ပြေအောင်၊ တိုင်းပြည်အတွက်လည်း ဂုဏ်တက်အောင် အိမ်ရှင်ဖြစ်တဲ့ မြန်မာသတင်းထောက်တွေက စည်းကမ်း ပိုလိုက်နာပြီး သတင်းထောက်အားလုံးအတွက် ရှေ့ဆောင် ဖြစ်သင့်ပါတယ်။ တခါ ကိုယ်နဲ့အတူ အာဆီယံနဲ့ နိုင်ငံတကာက သတင်းထောက်တွေ အဆင်ပြေပြေနဲ့ သတင်းတွေ ရယူနိုင်အောင် တဖက်တလမ်းက ကူညီပေးနိုင်ပါတယ်။

ကိုယ်က စကားပေါက်နေသူမို့ ဆိုင်ရာတာဝန်ရှိသူတွေနဲ့ မဖြစ်မနေ ဆက်ဆံရမယ့် ကိစ္စတွေကို ကြားကနေ တခြားသတင်းထောက်တွေ အဆင်ပြေဖို့ကိုလည်း ကူညီဆောင်ရွက်ပေးနိုင်ပါတယ်။ အပြိုင်အဆိုင်များလှတဲ့ သတင်းလောကမို့ အဲဒီအဆင်အထိ မလုပ်ပေးနိုင်ဘူးဆိုရင်တောင် ကိုယ့်ကြောင့် ကိုယ့်မြန်မာသူငယ်ချင်းတွေနဲ့ တိုင်းပြည် ဂုဏ်သိက္ခာမကျစေဖို့ ကြိုတင် ပြင်ဆင်သင့်ပါတယ်။

အချိန်တွေက တရက်ပြီးတရက် ကုန်နေပါတယ်၊ ပြင်ဆင်စရာတွေနဲ့ လုပ်စရာကိစ္စတွေကလည်း များလှပါတယ်။ မြန်မာပီပီ အချိန်တန်တော့လည်း ပြီးသွားမှာပါလို့ စိတ် ထားမယ်ဆိုလည်း ထားနိုင်ပေမယ့် နောက်ဆို ၁၀ နှစ်မှ တကြိမ်လောက် ပြန်ရလာမယ့် အခွင့်အရေးကြီးကို ဒီတကြိမ်တခါ ပထမဆုံးအကြိမ်အဖြစ် ရတောင့်ရခဲမှာ ဧည့်ရှင်ပီပီသသ၊ လှလှပပ ယဉ်ယဉ်ကျေးကျေးနဲ့ အရယူသင့်ကြောင်းနဲ့ မြန်မာသတင်းစာဆရာတွေ အရည်အချင်းရှိပြီး အလွန် သပ်ရပ်ပီပြင်၊
ကျေပွန်စွာ အလုပ်လုပ်နိုင်ကြောင်းကို ကြော်ငြာထိုးဖို့ အကောင်းဆုံးအချိန် ဖြစ်တာမို့ လက်တွေ့မျက်တွေ့ ပြသနိုင်မယ့် ဒီအကွက်ကို အရအမိ ယူနိုင်ရေး ရှေးရှုလို့ ကြိုးစားကြပါမယ့်အကြောင်း...။

၂၀၁၃ နိုဝင်ဘာ ၆၊ ည ၁၁ နာရီ။
ရန်ကုန်။