ဗုဒ္ဓဘာသာ ဇစ်မြစ် ( ၁၁ )
|
8:03 AM |
No မှတ်ချက် |
September 18, 2013 at 12:36pm
မြတ်စွာဘုရားရှင်တုို့၏ တရာတော်၌ နှလုံးပျော်ပုိုက်ကာ ကျင့်နုိုင်သူဖြစ်ပြီးလျှင် ဘုန်းတန်ခိုးရှိန်စော် အာနုဘော်ကြီးသူဖြစ်လတံ့။ အရှင်သခင်၏ ဘဏ္ဍာကုိုအစဉ်မပြတ်စောင့်ရှောက်သကဲ့သုို့ ကုသုိုလ်တရားမှန်သမျှတုို့၌လည်း အစဉ်အမြဲစောင့်ရှောက် ထိန်းသိမ်းသူဖြစ်လတံ့။ ဘုရားဖြစ်ရန် ပါရမီတော်ဆယ်ပါးကုိုဖြည့်ကျင့်တော့မည်ဖြစ်သောသင့်အား ဖေါက်ပြန်ခြင်းမရှိဘဲ အစဉ်အမြဲစောင့်ရှောက်လျှက် ပါရမီတုို့ကုို ကူညီဖြည့်ဆည်းပေးသူဖြစ်လတံ့။ ခြင်္သေ့သည် နှောင်အိမ်ချိုင့်ကုိုဖျက်ဆီး၍ လွတ်မြောက်ရာကုိုသွားသကဲ့သုို့ ( သင်ဘုရားဖြစ်သောအခါ ) ကိလေသာတုို့ကုို ဖျက်ဆီး၍ သံသရာမှလွတ်မြောက်ရာ သာဝကဗောဓိဥာဏ်သုို့ ( နိဗ္ဗာန် ) ရောက်လတံ့ဟု များပြားလှသောရမ္မာဝတီပြည်သူပြည်သားတုို့၏ ရှေ့မှောက်၌ တပည့်တော်မအတွက် ဤဗျာဒိတ်စကားကုိုမိန့်ကြားတော်မူခဲ့ပါ၏။
တပည့်တော်မသည် ထုိုဗျာဒိတ်စကားတော်ကုိုကြားရသောအခါ ရှင်တော်မြတ်ဘုရားနှင့်လက်တွဲ၍ ပါရမီလုပ်ငန်းတုို့ကုို အဟုတ်တန်းကျင့်ဆောင်ခွင့် ဖြည့်ဆည်းခွင့်ကုိုရပြီဟု တွေးတောမိ၍လည်း အလွန်အမင်းဝမ်းမြောက်ကြည်နူးခဲ့ရပါ၏။ ထုိုဝမ်းမြောက်ကြည်နူးမှုသည် ယခုအခါဖေါ်ပြ၍မရနုိုင်လောက်အောင် အထွဋ်အထိပ်သုို့ရောက်ခဲ့ပါပြီ။ ထုိုသုို့ဝမ်းမြောက်ခဲ့သည့်အလျောက်လည်း ဒီပင်္ကရာဘုရားရှင်၏ ဗျာဒိတ်စကားတော်အတုိုင်း ကံသုံးရပ်တို့ဖြင့် ဖြည့်ကျင့်ခဲ့ပါသည်ဘုရား။ ဒီပင်္ကရာဘုရားရှင်ကုိုလည်း အလွန်အမင်းကြည်ညုိုခဲ့ပါ၏။ ထုိုကဲ့သုို့ ဘုရားရှင်ကုိုကြည်ညုို၍ သာသနာတော်အဆုံးအမတုိုင်းနေထုိုင်ကျင်လည်ကာ ဖြည့်ဆည်းခဲ့ရသော ကံအစွမ်းတုို့ကြောင့် လူ့ပြည် နတ်ပြည်တုို့၌ မရေမတွက်နုိုင်လောက်အောင် ချမ်းသာသုခကုိုခံစားခဲ့ရပါသည်ဘုရား။ အရှင်ဘုရားနှင့်သံသရာတွင်ပေါင်းဆုံမိသည့်အတွက် ဤကဲ့သုို့သော ချမ်းသာမျိူးကုိုရရှိခဲ့ခြင်းဖြစ်ပါသည်ဘုရား။ ဘဝအဆက်ဆက် ပူးတွဲ၍ဆည်းပူးခဲ့ရသော ကုသုိုလ်ကံအရှိန်တုို့ကြောင့် ဘဝဆက်တုိုင်း ချမ်းသာသုခကုိုခံစားခဲ့ရသော်လည်း လောက၏နိယာမဖြစ်သော လောကဓံတရားတုို့ကိုတော့ ရှောင်လွှဲ၍မရနုိုင်သောကြောင့် အတုိုင်းမသိ အနှိုင်းဆမဲ့သော ဒုက္ခများစွာကုိုလည်း ခံစားခဲ့ရပါ၏။
ထုိုသုို့ခံစားရသော်လည်း ဖေါက်ပြန်ယိမ်းယုိုင်ခြင်း အလျဉ်းမရှိခဲ့ပါ။ ဘဝသံသရာဝယ် ပါရမီတော်တုို့ကုို ကူညီဖြည့်ဆည်းရင်း နောက်ဆုံးဖြစ်သောယခုဘဝတွင် သာကီဝင်မင်းမျိူး၌ ထိပ်တန်းမင်းသမီးဖြစ်ခဲ့ပါ၏။ တပည့်တော်မသည် နောက်ဆုံးဖြစ်သောယခုဘဝဝယ် ရုပ်အဆင်းအားဖြင့်လည်း ရှု၍မငြီး ချစ်၍မဝနုိုင်အောင် တင့်တယ်လှပသူဖြစ်ရပါ၏။ စည်းစိမ်ဥစ္စာအားဖြင့်လည်း လုိုအပ်သည့်အရာဟူ၍ မရှိလောက်အောင်ပင် ပြည့်စုံသူဖြစ်ရပါ၏။ အခြံအရံအလုပ်အကျွေးတုို့လည်း များပြားလှပါ၏။ သီလတရားကုိုလည်း အလေးအမြတ်ထားကာ စောင့်ထိန်းပါ၏။ ကုိုယ်အင်္ဂါအစိတ်အပုိုင်းများလည်း တင့်တယ်စွာပြည့်စုံကြ၍ လူအပေါင်းတုို့၏ လေးစားရုိုသေပူဇော်မှုကုို ခံယူရသူဖြစ်ပါ၏။ လောကဓံဆုိုးများနှင့်ကြုံရသောအခါတွင်လည်း စိတ်ဆင်းရဲခြင်းမဖြစ်ပါ။ လုံခြုံပြည့်ဝ အေးချမ်းသောဘဝဖြင့်နေထုိုင်ရပါသည်ဘုရား။
မိမိတုိုင်းပြည်ဖြစ်သော ကပိလဝတ္တုပြည်သုို့ ရှင်တော်မြတ်ဘုရား ပြန်လည်ကြွရောက်တော်မူစဉ်အခါတုန်းက နန်းတော်တွင်းဝယ် သာကီဝင်မင်းတုို့၏ရှေ့မှောက်၌ တပည့်တော်မ၏ဂုဏ်ကျေးဇူးတုို့ကုို ဤသုို့ဖွင့်ထုတ်မိန့်ကြားတော်မူသည်ကုို ကြားယောင်နေမိပါသေးသည်ဘုရား။ အရှင်မြတ်ဘုရားမိန့်တော်မူသည်မှာ ဤရှု၍မငြီး အံ့ချီးလောက်သည့် ချစ်ဇနီးဖြစ်ခဲ့ဖူးသော ယသောဓရာသည် ကျေးဇူးအထူးကုို ပြုလည်းပြုတတ်၍ သိလည်းသိတတ်သူဖြစ်ပေ၏။ အမျိူးမျိူးသောဆင်းရဲ အမျိူးမျိူးသောချမ်းသာတုို့၌ စိတ်ဖေါက်ပြန်ခြင်း ယိမ်းယုိုင်ခြင်းအလျဉ်းမရှိဘဲ ခုိုင်ကြည်တည့်မတ်သော စိတ်ထားရှိသည့်မိန်းမမြတ်ဖြစ်ပေ၏။ ကုသုိုလ်အကျိူး ပွါးစီးတုိုးပွါးသည့်စကားကုိုသာ ပြောကြားတတ်သူဖြစ်ပေ၏။ ကောင်းမှုကုသုိုလ်မှန်သမျှကုိုလဲ အစဉ်အမြဲစောင့်ရှောက်တတ်သော မိန်းမမြတ်ဖြစ်ပေ၏တကားးး။ ဤသည့်စကားတုို့မှာ ကပိလဝတ္တုနန်းတော်တွင်းဝယ် သာကီဝင်မင်းမျိူးတုို့၏ရှေ့မှောက်၌ တပည့်တော်မသည် သံသရာ၏ကောင်းမှုကုို အစဉ်စောင့်ရှောက် ထိန်းသိမ်းကျင့်ကြံခဲ့သူဖြစ်ကြောင်းကုို ထင်ရှားအောင် ချီးမွမ်းမိန့်ကြားခဲ့သော စကားတော်များဖြစ်ပါသည်ဘုရား။ တပည့်တော်မဆက်လက်၍ လျှောက်ထားသည်တုို့ကုို နာကြားတော်မူစေချင်ပါသည်ဘုရား။
( ဆက်လက်ဖေါ်ပြပါမည် )
Director of Religious Education
0 comments:
Post a Comment