အက္ခရာမဲ့ မြို့တော်

September 23, 2013 at 11:19am

 ၁။
ကျွန်တော့်နှလုံးသွေးထဲမှာ ဗုံသံတွေ ကြားနေရတယ်။ ကျွန်တော် ရင်ခုန်သံတိုင်းမှာ စက္ကန့်သံ တစ်ချက်ချက်နဲ့ပါလား။ ဒါဘာသံတွေလဲ။ အဲဒီ အသံတွေ ဘယ်က လာနေတာလဲ။ ကျွန်တော်ကြားနေရတယ်။ ဟုတ်တယ်။ အဲဒီအသံတွေက ကျွန်တော့် ရင်ထဲမှာ။

ကျွန်တော်ဟာ တဖြည်းဖြည်း လေထဲမှာ မျှောလွှင့်နေသူကဲ့သို့။ ကျွန်တော်ဟာ တဖြည်းဖြည်း ရွေ့လျားလာ။ ဒါဟာ အိပ်မက်ဆန်ချင် ဆန်နေမယ်။ ဒါဟာ စိတ်ကူးယဉ် ဇာတ်ကားထဲက ထူးဆန်းအံဖွယ် ဇာတ်ကွက်တစ်ခုလို ဖြစ်ချင်ဖြစ်နေမယ်။
ဝေါ……………..
ဟော .. အသံတွေ။ ကျွန်တော့် ရင်ခုန်သံတွေ ဆူညံလာပြီပဲ။ ကျွန်တော်ဟာ မြို့တစ်မြို့ကနေ မြို့တစ်မြို့ဆီကိုသွားနေတဲ့ အဝေးပြေးလမ်းမပေါ် ရောက်လို့နေပေါ့။ ကျွန်တော်ဘယ်ကိုသွားနေတာလဲ။ ကျွန်တော် တစ်နေရာရာကို စွန့်ခွာခဲ့ပြီးမှ တစ်နေရာရာကို ထွက်သွားလို့နေပေါ့။ ကျွန်တော် ဘယ်နေရာကို စွန့်ခွာခဲ့တာလဲ။ အပြီးအပိုင် သဘောမျိုးနဲ့ စွန့်ခွာပြီးမှ လာခဲ့တာလား။ ဒါမှမဟုတ် ခဏတာ စွန့်ခွာလာခဲ့တာလား။ ယုတ်စွ အဆုံး ထောင်ဖေါက်ပြီး ပြေးလာတဲ့ သဘောမျိုးနဲ့ ခိုးထွက်လာခဲ့တာလား။ ကျွန်တော် မသေချာဘူး။
ကျွန်တော် တစ်နေရာရာကနေ၊ တစ်နေရာရာကို….။
ထွက်သွားနေတယ်။

၂။
လယ်ကွင်းတွေ…။ အဝေးက မှောင်ပြပြ အရိပ်တွေ။ အဲဒီအရိပ်တွေ အဆုံးက အရိပ်မည်းမည်းကြီးများ။ အဲဒါဘာ အရိပ်ကြီးလဲ။ တောင်တန်းကြီးတွေလည်း ဖြစ်နိုင်တာပဲ။ တိုက်အိမ်တွေလည်း ဖြစ်နိုင်တာပဲ။ ဟိုး…အဝေးက မီးရောင် ခပ်လဲ့လဲ့လေးတွေ။ တောမီးလောင်နေတာ များလား။ လျှပ်စစ်မီးတွေ လင်းနေတာများလား။ ကျွန်တော့်သွေးထဲမှာ သီချင်းတစ်ပုဒ် လွှင့်မျှောနေတယ်။ တုန်ခါနေတယ်။ အဲဒီ သီချင်းရဲ့ ဒရမ်စည်းချက်တွေတိုင်းမှာ ကျွန်တော် ရင်တွေ တစ်ထစ်ချင်း ခုန်နေတယ်။ ကျွန်တော် ဘယ်ဆီကိုလဲ။ ဘယ်နေရာကလဲ။ ဘာတွေဖြစ်နေတာလဲ။
ကျွန်တော်ဟာ လေထုဆန်နေတယ်။
ကျွန်တော်ဟာ အသွေးအသားနဲ့ တည်ဆောက်ထားတဲ့ ခန္ဓာကိုယ်တစ်ခုနဲ့ ကင်းလွတ်နေတယ်။
ကျွန်တော် ….
ဘယ်ဆီကိုလဲ။
သေချာတာက ကျွန်တော် လွှင့်မျှောနေတယ်။ မျှောလွှင့်နေတယ်။
အဝေးက သီချင်းသံသဲ့သဲ့လား။ ကျွန်တော် စီးနင်းလိုက်ပါလာတဲ့ ယာဉ်တစ်ခုက ကျွန်တော့်ကို ခေါ်ဆောင်လာတာလား။ ဒါမှ မဟုတ် ကျွန်တော်ကိုယ်တိုင် အဲဒီယာဉ်တစ်ခုကို မောင်းနှင်နေတာမျိုးလား။ ကျွန်တော် အနည်းငယ် အေးစိမ့်လာပြီပဲ။ ဘေးနားမှာ ဘာရှိလဲ။ ဘာရှိသလဲ။ ကျွန်တော် အေးလို့နေပြီ။ ဘေးနားမှာ ဖျင်ထည် တစ်ခု ကျွန်တော်တွေ့တယ်။ ကျွန်တော် ၀တ်ဆင်လိုက်တယ်။
ကျွန်တော့်ရင်ထဲက သီချင်းတွေ…။

၃။
ဟော……
ကျွန်တော် အခု လက်ဖက်ရည်ဆိုင်ထဲ ရောက်သွားပြီ။ ကြည့်စမ်း… ဘေးနားမှာ အောင်ဝင်းထွန်းကြီးပါလား။
“ဟေ့ကောင် .. မင်းက ဘယ်လိုလုပ် ဒီရောက်နေတာလဲ”
သူက .. ကျွန်တော့်ကို ဘုကြည့်ကြည့်နေတယ်။ ဒါဘာ သဘောလဲ။ ကျွန်တော့်ကို လက်ဖက်ရည်တိုက်ရမှာ စိုးလို့များလား။ ပြီးတော့ သူ ၀တ်ရမယ့် ဂျူတီကုတ်လဲ မပါပါ့လား။ သူ့ပုံစံက ဟိုးလွန်ခဲ့တဲ့ တစ်ဆယ့်ငါးနှစ်လောက်က ကလေးဝတ်ကြီးနဲ့ပါလား။ သူ့ဘေးမှာ ဝေလွင်ဦးက ခပ်တည်တည်နဲ့ ကွမ်းဝါးနေတယ်။ ကျွန်တော် ဘယ်လိုလုပ် လက်ဖက်ရည်ဆိုင်ထဲ ညကြီးမင်းကြီး ရောက်လို့နေတာလဲ။
“ဟေ့ကောင် .. ဆရာလေး .. ဘာတွေ လျှောက်ကြည့်နေတာလဲ
ဟိုမှာ … ရွန်းနီ ပီနယ်တီ ကန်တော့မယ်ကွ”
ဟင်..။ ပင်နယ်တီ……..။ ရွန်နီ…………။ အော်… ဒီညဟာ မန်ယူပွဲပေါ့ ဒါဆို။ အော်.. ငါ ဘောလုံးပွဲကြည့်နေတာလား။ ဟင်… ငါ့ကို ပြောတာ ဘယ်သူလဲ။ သော်တာကိုကိုပါလား။
“ဟေ့ကောင် … သော်တာ … မင်းက ဒီမှာ ဘာလုပ်နေတာလဲ
မင်းက မြိတ်မှာ မဟုတ်ဘူးလား”
“ဂိုး…………………………………………………………
……………..ဟေး…………… ဂိုး…………..ကွ
မန်ယူကွ…………………………………………”
လက်ဖက်ရည်ဆိုင်ထဲ ဆူညံသွားတယ်။

၎။
ကျွန်တော့် သွေးထဲမှာ ပန်းချီကား တစ်ချပ်ရှိတယ်။ အဲဒီ ပန်းချီကားကို ကျွန်တော် အိပ်ဆေးခပ်ထားတယ်။ ခုတော့ အဲဒီ ပန်းချီကားဟာ ဆေးပျယ်သွားပြီထင့်။ ပန်းချီကားဟာ ခါတိုင်းနဲ့ မတူတော့။ အရောင်တွေ ဖျော့လို့။ ပန်းချီကားထဲမှာ ကျွန်တော်ရှိတယ်။ ကျွန်တော်ဟာ ဆေးလိပ်ဖွာနေတယ်။ ကျွန်တော်ဟာ တစ်ခုခုကို တွေးနေတယ်။ ကျွန်တော်ဟာ တစ်စုံတစ်ခုကို မေ့လျော့နေတဲ့ ပုံမျိုး။ ဒါပေမယ့် ပန်းချီကားထဲမှာ ခု ဆေးရောင်တွေ ဖျော့ပြီး ကျွန်တော် မရှိတော့သလိုမျိုး။
ကျွန်တော်ဘယ်ကို ရောက်သွားတာလဲ။
တခြားသော ပန်းချီကားဆီ ရောက်သွားတာမျိုးလား။
တစ်စုံတစ်ရောက်က ပန်းချီကားကို ဖျက်ဆီးသွားတာမျိုးလား။
ပန်းချီကားထဲမှာ စက်ဘီးတစ်စင်းကို ဟန်ကျပန်ကျ နင်းနေတဲ့ လူတစ်ဦးရှိတယ်။ ကြည့်စမ်း ကျွန်တော် ခု စက်ဘီးတစ်စင်းပေါ်မှာ။ ကျွန်တော် ဘာလုပ်ရမလဲ။ မနင်းရင် စက်ဘီးဟာ အရှိန်သေသွားလိမ့်မယ်။ ဟုတ်တယ်။ နင်းစမ်း…။ နင်းထားစမ်း။ အားကုန်သာနင်း။ ဟိုဘက်ကို ကွေ့လိုက်။ ဟုတ်ပြီ။ ဒီဘက်ကို ကွေ့လိုက်။ ဟုတ်ပြီ။ ဟော.. ရှေ့တစ်ပြဆို ငါရောက်ပါပြီ။ နင်းထား။ နင်းထားစမ်း။
“ကလေးလေး တစ်ယောက်ရဲ့ ဘ၀မှာ ……….
စိတ္တဇလို ရောဂါ .. ရင့်စေတယ်………..
ချစ်တတ်တဲ့ စိတ်လည်း ….. မရှိသေးဘူး…
မုန်းတတ်တဲ့ စိတ်လည်း………….မရှိ …………..”
ကျွန်တော် မမောပါဘူး။ ကျွန်တော် ပန်းချီကားထဲကို ပြန်ရောက်ဖို့ စက်ဘီးနင်းရမယ်။ နင်းနိုင်သလောက်မြန်မြန်ကြီး။ ကျွန်တော် .. နင်းတယ်။ စက်ဘီး။

၅။
ဆေးလိပ် တစ်လိပ်ကို ဖွာမယ် အလုပ်မှာ ကျွန်တော် ရုတ်တရက် မီးမညှိတော့ဘဲ လွှင့်ပစ်လိုက်တယ်။ ဟော.. ကျွန်တော် ခု ဇာတ်ခုံပေါ်မှာပါလား။ ကျွန်တော်ဟာ ဇာတ်မင်းသားလား။ ကျွန်တော် ဘာလုပ်နေတာလဲ။ ကျွန်တော် တစ်ခါမှာ ဇာတ်မင်းသား မလုပ်ဖူးပါဘူး။ ကျွန်တော် ဘာလုပ်နေတာလဲ။
ဘေးနားက ဝေလွင်ဦးက ပြောတယ်။
“ဟုတ်တယ် …
လူငယ်ဆိုတာ .. ဆေးလိပ်နဲ့ မဆိုင်ဘူး…
ဆေးလိပ်ကြောင့် ဆိုးကျိုးတွေ အများကြီးပဲ
ငါလည်း မသောက်တော့ဘူး သူငယ်ချင်း..
ကဲသွားကြစို့”
သွားကြစို့ဆိုပြီး သူက ကျွန်တော့်လက်ကို တွဲခေါ်တယ်။ ကျွန်တော် သူ့နောက်ပါသွားတယ်။ လွှင့်ပစ်လိုက်တဲ့ ဆေးလိပ်ကို ကျွန်တော် မနှမျောတော့ပါဘူး။ ကျွန်တော့်နောက်မှာ လက်ခုပ်သံတွေ။ ကျွန်တော်ဟာ ကျောင်းဝတ်စုံ အဖြူ၊ အစိမ်းကြီးနဲ့။ ကျောင်းကပွဲတစ်ခုရဲ့ ပွဲတော်ဟာ ကျွန်တော် ရင်ကို နွေးထွေးလာတယ်။ ရုတ်တရက် တိမ်မည်းထုကြီးတစ်ခုပါလား။ ရွာလာပြီ။ မိုးသံတွေ။
မိုး……… သံ…………….တွေ ……
ကျွန်တော် မိုးမိတော့မယ်။ ကျွန်တော့်ကို ဘယ်သူလာကြိုမှာလဲ။ မေမေလား။ ဖေဖေလား။ ကျွန်တော့် အဒေါ် အပျိုကြီးလား။ ကျွန်တော် မသိဘူး။ မိုးသံတွေ ဆူညံလာပြီ။

၆။
“ချီးယား………”
ဟော.. ကျွန်တော်ခု ဘီယာဆိုင်ထဲမှာပေါ့။ ဟန်ကျ.. ပန်ကျ.. ဘီယာခွက်ကို မနိုင်မနင်း ကိုင်မြှောက်ထားတယ်။ ဘယ်သူတွေလဲ။ ကျွန်တော် ဘယ်သူတွေနဲ့ သောက်မိနေတာလဲ။
“ဟေ့ကောင်… ငါနာ့မည် ပိုက်ကြီးကွ”
ဟင်.. ဂျပု။ ပိုက်ကြီး.. လူမိုက်။ ဒီကောင် ဘာပြဿနာ ရှာမလို့လဲ။ သူ့ဘေးမှာ ဆရာဝန်တွေပါလား။ ဂျူတီကုတ်တွေနဲ့ တန်းစီပြီး ဘီယာကို မသောက်မဖြစ်သောက်ရတော့မယ့် အနေအထားနဲ့။ ကြားထဲမှာ ဘယ်သူလဲ။ လွှမ်းမိုးအောင်ပဲ။ ဒီကောင် ဂျပန်မသွားဖြစ်တာများလား။
ကျွန်တော် လက်ဖျံရိုးထဲမှာ သီချင်းတစ်ပုဒ် ရှိတယ်။ အဲဒီ သီချင်း နာမည်က အသုံးမကျတဲ့ နှင်းဆီတဲ့။ ကျွန်တော် အော်တယ်။ လည်ချောင်းထဲက ညှစ်အော်တယ်။ ရို… ရိုး… ရို… ရိုစီ … ရိုစီ ..။ ကျွန်တော် အော်နေတယ်။ ကျွန်တော် အသက်ကို ၀အောင်ရှူတယ်။ ပြီးတော့ ညစ်တယ်။ အော်တယ်။ လည်ချောင်ရိုးတွေ ထောင်လာတယ်။ ကျွန်တော် အော်တယ်။ ကျွန်တော်ဟာ အသံမထွက်ဘူး။
ထွက်လာတဲ့ အသံက တစ်မျိုးဖြစ်သွားတယ်။
ကျွန်တော့်သီချင်းပါ ပြောင်းသွားတယ်။
သာ..ယာတဲ့ ပင်လယ် ပြင်ကြီးနဲ့ …………..မျက်နှာချင်းဆိုင်…..
ငါမျှော်ကြည့်ရင်း… ရေပြင်မှာ …
သီချင်းသံဟာ ဘယ်ကလာနေတာလဲ။ အစ်ပေ့။ ဒါဟာ အစ်ပေ့ရဲ့ အသံပေါ့။ ဟုတ်ရဲ့လား။ ကျွန်တော် မသေချာဘူး။ ကျွန်တော့် မျက်လုံးတွေ ဖွင့်ထားပါလျက် မမြင်ရတော့ဘူး။ ကျွန်တော် ကြည့်တယ်။ ကြိုးစားနေတယ်။ မမြင်ရဘူး။ ကျွန်တော်… မြင်နေရတာက။

၇။
မြို့အ၀င် ဆိုင်းဘုတ်တစ်ခု။ မသဲကွဲဘူး။ နှင်းတွေ ပိတ်နေတယ်။ မြူတွေ စိုင်းနေတယ်။ ကျွန်တော့် ရင်တွေ တဒိန်းဒိန်းခုန်နေပြီ။
ချဲလ်ဆီးက တစ်ဂိုးပြန်ရှူးလိုက်ပြီတဲ့။ နောက်ရက် လွှမ်းမိုးအောင် ဂျပန်သွားတော့မယ်။
ဝေကြီး မိန်းမရသွားပြီ။ အစ်ပေ့ ဆိုင်ကယ်မှောက်တယ်။
သော်တာ မိန်းမနောက်လိုက်ပြီး မြိတ်ကို လိုက်သွားပြီ။ ကေအေတီ သေပြီ။
မျိုးကြီး သီချင်းတွေ အရင်လောက် မထိတော့ဘူး။ ဖာဂူဆန်က နားပြီဆို။
ကျွန်တော့်ရင်ခုန်သံတွေ ဆူလာပြီ။ ဟုတ်ရဲ့လား။ ကျွန်တော် တစ်နေရာရာကနေ တစ်နေရာရာကို သွားနေပြီ။ ဟုတ်ရဲ့လား။ ကျွန်တော်သွားနေတာ ဟုတ်ရဲ့လား။ ဖြစ်နိုင်ရဲ့လား။
အောင်ဝင်းထွန်းက တောဆရာဝန်ဖြစ်နေပြီ။ မြို့သစ်က အိမ်လေး ရောင်းထွက်သွားပြီ။
ရွှေမြို့တော် လက်ဖက်ရည်ဆိုင်လေး နေရာပြောင်းသွားပြီ။
ငါတို့ သောက်ဖူးတဲ့ Date လက်ဖက်ရည်ဆိုင်လေးကရော။
ရွှေကျောင်းကြီးထဲ တူတူပုန်းရအောင်လေ။ ကျုံးကြီးထဲမှာ ဖွက်ထားတဲ့ သီချင်းကို ပြန်ဖေါ်မလား။
3 Colors မှာထိုင်မှာလား။ Top Choice လား။
စနူကာ မထိုးချင်ဘူး … ရာရှင်ဘဲ ချမယ်။
လာပါကွာ … ကန်တော်ကြီးဘက်မှာ ရှေ့ဘီးထောင်ပြိုင်ကြမယ်။
မောင်းတော့ရံလိုက်ပါကွာ.. ဘော်ဒီက ဒီည စိတ်မချရဘူး အစ်ပေ့ရ။
ဘာတွေလဲ။ ဘာတွေလဲ။ ကျွန်တော် မသိတော့ဘူး။ ကျွန်တော် တစ်နေရာရာကနေ တစ်နေရာရာကို သွားနေတယ်။ ဘယ်ကိုလဲ။ မြို့အ၀င်ဆိုင်းဘုတ်လေး။
ကျွန်တော့်မှာ မသေချာတဲ့ အက္ခရာတွေ ရှိတယ်။ ကျွန်တော် ပန်းချီကားထဲ ပြန်ဝင်ထိုင်နေရမလား။ ဟောကြည့်စမ်း။ ကျွန်တော့် စက်ဘီးလေးကို အမေက ရောင်းပစ်လိုက်ပြီ။ အသုံးမလိုတော့ဘူး ငါ့သား။ ဆိုင်ကယ်တွေ ပေါပါတယ်တဲ့။ ဟော..။ ကျွန်တော် ဆိုင်ကယ်ပေါ်မှာလည်း မဟုတ်ဘူး။ ကျွန်တော် ယာဉ်တစ်ခုခုပေါ်မှာပဲ။ ကျွန်တော် ဘယ်ကို သွားနေတာလဲ။ ကျွန်တော်နားက ပန်းချီကားတွေအားလုံးကတော့ စိန်ပန်းပင်တွေကိုယ်စီနဲ့။

ရင်နင့်အောင်
၂၄-၉-၂၀၁၃
မနက် ၀၀:၅၀