~ ဖြစ်လျှင် ဖြစ်ကာမျှ၌ ~

by Zay Ya on Tuesday, June 19, 2012 at 5:42am 

ဒိဋ္ဌေ ဒိဋ္ဌမတ္တံ ဆိုတဲ့ အမည် နဲ့ ရွှေဥဒေါင်းရဲ့ စာအုပ် ကို ငယ်စဉ်က ဖတ်ရဖူးတယ်။ အဲ့တုန်းက အဲ့ဒီ ကျမ်းကို အတော်အတန် သဘော ကျခဲ့သလို၊ လက်တွေ့လည်း လိုက်လုပ် ကြည့်ခဲ့ ဖူးတယ်။ ဘဝင်ကျတာ လည်း ရှိသလို၊ မကျတာလည်း ရှိတယ်။ နောက်ပိုင်း အဲ့ဒီ နည်းနာ ကို ထားရစ်ပြီး - နေထိုင်မိသရွေ့အများဆုံးဟာ မိမိ စိတ်ကိုသာ ခဏမလပ် စောင့်ကြည့်နေတဲ့ အကျင့် တစ်ခုတည်းပဲ။ ကျမ်းစာ တို့အရ ဒါကို စိတ္တာနုပဿနာ လို့ ခေါ်ဆိုမယ် ထင်ပါတယ်။

အထူး သဖြင့် မဟာစည် ဆရာတော် ကျမ်းစာ များ ဖတ်ရှုရင်း - နေထိုင်ကြည့် လာတဲ့ အခါ - ဒီနောက် နှစ်များ အတွင်း ကျနော် အနှစ်သက်ဆုံး ဝိပဿနာ နည်းနာ ပုံစံ ဟာ စိတ္တာနုပဿနာ အဝင်အပါ ဖြစ်တဲ့ ဒီ နည်းနာ သာ ဖြစ်လာပြန် တယ်။ သာမာန် ရိုးရိုးအားဖြင့် စိတ်ကို စိတ်အတိုင်း လိုက်ကြည့်နေ တဲ့ အဖြစ်ဟာ ဒိဋ္ဌေ ဒိဋ္ဌမတ္တံ ဒီနည်းနာလောက် အနုမစိတ် ဘူး။ သာသာလေး ပဲ လို့ ပြောရမယ် ထင်တယ်။ ဒါပေတဲ့ သတိ စိတ်ပါ များရင် - စိတ္တာနုပဿနာ ဖြစ်စေ၊ အခြား သတိပဌာန် အဘယ်နည်း ဖြစ်ပါစေ - ဒီနည်း ကိုသာ ဆိုက်ရောက် တယ်လို့ ဆိုရမှာပဲ။

ပိဋကတ်၊ ပါဠိ စသည် မကျွမ်းကျင်မှုကြောင့် အခြား ဘယ်နေရာ မှာ ထပ်မံ ညွှန်ပြထားမှု ရှိမရှိ ကျနော် မသိဘူး။ အကြမ်းအားဖြင့်- ဒီ- ဒိဋ္ဌေ ဒိဋ္ဌမတ္တံ နည်း ကို ဂေါတမမြတ်စွာ - ဒေသနာ နှစ်ခု မှာ ဟောထားတယ် လို့ မှတ်သား မိပါတယ်။ တစ်ခုက မာလုကျ ပုတ္တ သုတ် ဖြစ် ပြီး၊ တစ်ခုက ဗာဟိယသုတ် ဖြစ်တယ်။ အခု ဒီ ဗာဟိယသုတ် ရဲ့ အကျဉ်းလောက်ကို မဟာစည်ဆရာတော် ဘုရားရဲ့ နိဗ္ဗာန ပဋိ သံယုတ္တ ကထာ တတိယပိုင်း က ကောက်နုတ် ယူပါတယ်။

ဇာတ်သွား၊ ဇာတ်လမ်း ကို အရှည်ရေးဖို့ မလိုအပ်တဲ့ အတွက် ထားရစ် ခဲ့တယ်။ လိုရင်းက - ဗာဟိယ အမည်ရှိတဲ့ ပုဂ္ဂိုလ် ဟာ တရားနာဖို့ -မြတ်စွာ ဘုရား ရှိရာ ခရီးပြင်းနှင်လာတယ်။ တွေ့တွေ့ချင်း - ဘုရား ဆွမ်းခံကြွနေရာ ခရီးတစ်ဝက်မှာတင် တရား တောင်းတယ်။ ကျမ်းစာ တို့ အရ - မြတ်စွာဘုရားဟာ ဗာဟိယ သုံးကြိမ် သုံးခါ လျောက်ထားပြီးမှ ဒီတရားကို ဟောတာ ဖြစ်တယ်လို့ ဆိုပါတယ်။ ဟော မယ့် ဟောတော့ လည်း- ဝိပဿနာ - ဒီနည်းနာ ကိုသာ တိုက်ရိုက် ဟောထားတာ ဖြစ်ပါတယ်။

ဇေယျ

........................

                                                    မဟာစည် ဆရာတော် - နိဗ္ဗာနပဋိသံယုတ္တကထာ 

တသ္မာတိဟ တေ ဗာဟိယ ဧဝံ သိက္ခိတဗ္ဗံ "ဒိဋ္ဌေ ဒိဋ္ဌမတ္တံ ဘဝိဿတိ၊ သုတေ သုတမတ္တံ ဘဝိဿတိ၊ မုတေ မုတမတ္တံ ဘဝိဿတိ၊ ဝိညာတေ ဝိညာတမတ္တံ ဘဝိဿတီ" တိ၊ ဧဝဥှိတေ ဗာဟိယ သိက္ခိတဗ္ဗံ။

ဗာဟိယ၊ ဗာဟိယ။ တသ္မာ၊ ထိုသို့ တရားဟောရန် တောင်းပန်သောကြောင့်။ ဣဟ၊ ငါဘုရား၏ အဆုံးအမ ဤသာသနာ၌။ တေ၊ သင်သည်။ ဧဝံ သိက္ခိတဗ္ဗံ၊ ဤဆိုလတ္တံ့အတိုင်း ကျင့်ရမည်။ ဒိဋ္ဌေ၊ မြင်သည်၌။ ဒိဋ္ဌမတ္တံ၊ မြင်ရုံမျှသည်။ ဘဝိဿတိ၊ ဖြစ်လတ္တံ့။ သုတေ သုတမတ္တံ ဘဝိဿတိ၊ ကြားသည်၌ ကြားရုံမျှ ဖြစ်လတ္တံ့။ မုတေ မုတမတ္တံ ဘဝိဿတိ၊ နံသိ စားသိ ထိသိ လျက် ရောက်သည် ၌ ရောက်ရုံ မျှ ဖြစ်လတ္တံ့။ ဝိညာတေ ဝိညာတမတ္တံ ဘဝိဿတီ တိ၊ ကြံသိသည်၌ ကြံသိရုံမျှ ဖြစ်လတ္တံ့ ဟူ၍။ ဧဝဥှိ၊ ဤသို့လျှင်။ တေ၊ သင်သည်။ သိက္ခိတဗ္ဗံ၊ ကျင့်ရမည်။

ဒါဟာ ဗာဟိယကို မြတ်စွာဘုရားက အကျဉ်းချုပ် ဟောတဲ့ ဝိပဿနာ တရား ဖြစ်ပါတယ်။ ဝိညာဏ် ၆ ပါး အပြားအားဖြင့် သိပုံကို အကျဉ်းချုံးပြီး လေးပိုင်းမျှနဲ့ ဟောထားတယ်။ ရှင်းလဲ ရှင်းတယ်။

ပကတိ လူတွေမှာ မျက်စိဖြင့် အဆင်းကို မြင်တဲ့ အခါ မြင်သိရုံတင် မရပ်ဘူး။ အဲ့ဒီ မြင်ရတဲ့ အဆင်း မြင်သိမှု ၊ မြင်တွေ့မှု၊ မြင် လို့ ကောင်း မကောင်း ခံစားမှုတွေကို နှစ်သက်သာယာ မှုလည် ဖြစ်တယ်။ စိတ်ဆိုးပြစ်မှား မှု လည်း ဖြစ်တယ်။ ငါကောင် အနေနဲ့ အထင် မှားမှု လည်း ဖြစ်တယ်။ အဲ့ဒီလို မဖြစ်စေဘဲ မြင်သိရုံမျှတင်ပဲ တည်အောင် ကျင့်ပါ လို့ ဆိုလိုတယ်။ ဒါဟာ "မြင်သည် ၌ မြင်ရုံ မျှ ဖြစ် လတ္တံ့" ဆိုတဲ့ အပိုဒ်ရဲ့ ဆိုလိုတဲ့ အနက် အဓိပ္ပာယ် အကျဉ်း ပဲ ဖြစ်ပါတယ်။

အဲ့ဒီလို မြင်ရုံမျှ တည်စေရမယ် ဆိုတာဟာ ပြောရုံတော့ဖြင့် လွယ်ပါတယ်။ ဒါပေမယ့် တကယ့် လက်တွေ့ လုပ်ဖို့ကတော့ ခက်တယ်။ မရှုမမှတ်ဘဲ ပကတိ အတိုင်း နေရုံမျှနဲ့တော့ - အဲ့ဒီ အတိုင်း မတည်နိုင်ဘူး။ မြင်ပြီးတာနဲ့ ဘယ်သူ ဘယ်ဝါ စသဖြင့် သိပြီး၊ နှစ်သက်ဖွယ် ဆိုရင် နှစ်သက် သွားတော့တာပဲ။ မုန်းဖွယ် ဆိုရင်လည်း စိတ်ဆိုး၊ ပြစ်မှား၊ ရွံမုန်းသွားတော့တာပဲ။ သာမန် အာရုံဖြစ်ရင်လည်း မြဲတဲ့ အနေ ပုဂ္ဂိုလ် သတ္တဝါ အနေနဲ့ ထင်မှားသွားတော့တာပဲ။ အဲ့ဒီလို မဖြစ်အောင် တားမြစ်ဖို့ ခက်ပါတယ်။

အလားတူ။ ကြားရုံမျှ၊ နံသိရုံမျှ၊ အရသာ သိရုံမျှ၊ ထိသိရုံမျှ တွင် ရပ်တည်အောင် ထားဖို့ ဆိုတာတွေကလည်း ဝိပဿနာ မရှိဘဲ ထားနိုင်ဖို့ ခက်ပါတယ်။ ကြံသိမှုကို ကြံသိရုံမျှတင် တည်အောင် ထားဖို့ သာပြီး ခက်ပါတယ်။ ဒါ့ကြောင့် မြင်တိုင်း ကြားတိုင်း တွေ့တိုင်း သိတိုင်း မြင် တယ် မြင်တယ် ကြားတယ် ကြားတယ် စသဖြင့် မပြတ် ရှုမှတ် နေရတယ်။ အဲ့ဒီလို ရှုမှတ်နေရာမှာလည်း အားထုတ်ခါစ မှာတော့ မြင်ရာ ကြားရာ က စပြီး ရှုမှတ်လို့ အများအားဖြင့် မဖြစ်ဘဲ ရှိတတ်တယ်။ ဒါ့ကြောင့် ထင်ရှားတဲ့ အတွေ့အထိ တစ်ခုခု က စပြီး ရှုမှတ်ရတယ်။ သတိပဋ္ဌာန် ဒေသနာတော် အရ သွားဆဲမှာ သွားတာကို ရှုမှတ် ရတယ်။ အဲ့ဒါဟာ ခြေထဲ ကိုယ်ထဲက တောင့်တင်း တွန်းကန် လှုပ်ရှားတဲ့ ဝါယောဓာတ် အတွေ့အထိ ရှုမှတ်ရတာပါပဲ။ ရပ်ဆဲမှာ ရပ်တာကို ရှုရတယ်။ ထိုင်ဆဲမှာ ထိုင်တာကို ရှုရတယ်။ တစ်နေရာရာက အထူး ထင်ရှားတဲ့ အတွေ့အထိ တစ်ခုခုကို ရင်လည်း ရှုမှတ် နေရတယ်။

ဘုန်းကြီးတို့ကတော့ ဝမ်းဗိုက်က ဖောင်းတက်လာလိုက် ပိန်ကျ သွားလိုက်နဲ့ အဲ့ဒီ တောင့်တင်း လှုပ်ရှားမှု ကစပြီး ရှုမှတ်ဖို့ ညွှန်ကြား ပါတယ်။ ဒါပေမယ့် အဲ့ဒီ ဖောင်းတာ နဲ့ ပိန်တာ နှစ်ခုထဲတော့ မဟုတ်ဘူး။ ဖောင်းတယ် ပိန်တယ်လို့ ရှုမှတ် နေဆဲမှာ စိတ်ကူး ကြံစည် မှု ဖြစ်လာရင် အဲ့ဒီ ကြံသိမှုကိုလည်း ရှုမှတ် နေရတယ်။ ကိုယ်ထဲက ညောင်းမှု၊ ပူမှု နာကျင်မှု စတဲ့ မခံသာတဲ့ သဘော တစ်ခုခု ဖြစ် လာရင် အဲ့ဒါကိုလည်း ရှုမှတ်ရတယ်။ လက် ခြေ ကိုယ်အင်္ဂါ လှုပ်ရှား ပြုပြင်မှု ရှိရင် အဲ့ဒီ လှုပ်ရှား ပြုပြင်တာကိုလည်း ရှုမှတ်ရတယ်။ အသံ ကြား တာ ကြည့်တာ မြင်တာတွေ ရှိရင် အဲ့ဒါတွေကိုလည်း ရှုမှတ်ရတယ်။

အတိုချုပ် ပြောရရင်တော့ ကိုယ်အမူအရာ အထူး၊ စိတ်အမူအရာ အထူး၊ ခံစားမှု ဝေဒနာ အထူးများ ထင်ရှား ပေါ်လာရင် အဲ့ဒါတွေကို လည်း ရှုမှတ်ရတယ်။ ဘာမှ အထူး မှတ်စရာ မရှိတဲ့ အခါ ဖောင်းတာ ပိန်တာကို မပြတ် ရှုမှတ်နေရတယ်။ ဒါက ရှုမှတ်ပုံ အကျဉ်းချုပ်ပဲ။

အဲ့ဒီလို ရှုမှတ် နေရင် သမာဓိဉာဏ် ရင့်လာတဲ့ အခါကျတော့ မြင်သည်၌ မြင်ရုံမျှ တည်တာကို ကိုယ်တိုင် တွေ့ရပါလိမ့်မယ်။ ထို့အတူ ကြားသည်၌ ကြားရုံမျှ၊ တွေ့သည်၌ တွေ့ရုံမျှ၊ ကြံသိသည်၌ ကြံသိရုံမျှ တည်တာကိုလည်း ကိုယ်တိုင် တွေ့ရပါလိမ့်မယ်။

အဲ့ဒီလို အခါမှာ ကြားတယ်လို့ မှတ်တဲ့အခါ ကြားတာရော၊ သိတာရော ချက်ချင်း ပျောက်သွားတာကို တွေ့လိမ့်မယ်။ သိတယ်လို့ မှတ်တဲ့ အခါ သိတာရော၊ မှတ်တာရော ချက်ချင်း ပျောက်သွားတာကို တွေ့လိမ့်မယ်။ နာတယ် နာတယ် စသဖြင့် မှတ်တဲ့ အခါ များမှာလည်း နာမှု အစရှိတဲ့ ဝေဒနာရော၊ မှတ်သိတာရော၊ ချက်ချင်း ပျောက် ပျောက်သွား တာကို တွေ့လိမ့်မယ်။ မြင်တယ် မြင်တယ်လို့ စူးစိုက်ပြီး ရှုမှတ် နေ ရင်း မြင် တာရော မှတ်သိတာရော ချက်ချင်း ပျောက်ပျက် သွားတာကို တွေ့လိမ့်မယ်။ အဲ့ဒီလို တွေ့ရတဲ့ အခါ- "ဖြစ်ပြီး ပျောက် သွား တာကြောင့် မမြဲဘူး" လို့ သိတဲ့ အနိစ္စာနုပဿနာ ဉာဏ်လည်း ဖြစ်တယ်။ "ဖြစ်ချည် ပျက်ချည် မို့ ဆင်းရဲချည်းပဲ" လို့ သိတဲ့ ဒုက္ခာ နုပဿနာ ဉာဏ်လည်း ဖြစ်တယ်။ "သူ့သဘော အတိုင် သူ ဖြစ်ပျက် နေတဲ့ သဘောတရားမျှပဲ" လို့ သိတဲ့ အနတ္တာနုပဿနာ ဉာဏ် လည်း ဖြစ်တယ်။ အဲ့ဒီလို သိမြင်တော့ ရှုမှတ်တိုင် ရှုမှတ်တိုင်း နိစ္စ၊ သုခ၊ အတ္တ အစွဲအလမ်းတွေ ကင်းတယ်။

ဒီနေရာမှာ ဗာဟိယက ပါရမီ ထူးသူဖြစ်တာကြောင့် အဲ့ဒီ တရား နာနေစဉ်မှာပဲ မြင်မှု၊ကြားမှု၊ သိမှု စသည်ကို ရှုပြီး ထူးခြားတဲ့ ဝိပဿနာ ဉာဏ် တွေ သူ့မှာ ဖြစ်တယ်။ အဲ့ဒီ ဖြစ်ပုံကို -

တတော တွံ ဗာဟိယ နေဝိဓ န ဟုရံ န ဥဘယမန္တရေန၊ ဧသေဝန္တော ဒုက္ခဿ။ ~ လို့ ဟောပါတယ်။

ဗာဟိယ၊ အသင် ဗာဟိယ။ တတော၊ ထိုသို့ မြင်မှု၊ ကြားမှု စသည်တို့တွင် ငြိတွယ်လျက် မတည်သော အခါ ၌။ တွံ၊ သင်သည်။ နေဝ ဣဓ၊ ဤလောက ၌လည်း မရှိတော့။ နဟုရံ၊ အခြားလောက ၌ လည်း မရှိတော့။ န ဥဘယ မန္တ ရေန၊ ဤလောက အခြားလောက၊ နှစ်ပါးလုံး၌ လည်း မရှိတော့။ ဧသေဝ၊ ဤလောက အခြားလောက တို့၌ သင် မရှိတော့ခြင်း ဟူသော ဤ သဘော သည်ပင်လျှင်။ ဒုက္ခဿ၊ ကိလေသာ ဝဋ် ဆင်းရဲ၏။ အန္တော၊ အဆုံး အပိုင်းအခြား နိဗ္ဗာန် ဖြစ် ၏။

မြင်မှု၊ ကြားမှု စသည်တို့မှာ တဏှာ၊ မာန၊ ဒိဋ္ဌိ တို့နဲ့ ငြိတွယ်ခြင်း မရှိတော့တဲ့ အခါ - အဲ့အခိုက် ကို ကိလေသာ ငြိမ်းတယ်လို့ ခေါ်ပါမယ်။ ကိလေသာ ကင်းရင် - "ဤလောက၊ အခြားလောက" ဘယ်လောက မှာမှ တည်ရှိ မနေဘူးလို့ ဆိုလိုတယ်။ ဒါဟာ ပရိနိဗ္ဗာန် မပြုခင် (ဤ ခန္ဓာ ဤ ရုပ်နာမ် မချုပ်ငြိမ်းခင်) လတ်တလော ချုပ်ငြိမ်းမှု - သဥပါဒိသေသ နိဗ္ဗာန် ဖြစ်ပါတယ်။

ကိလေသာ ကင်းခြင်းကြောင့် ကံဟာ ဘဝသစ် အကျိုး မပေးနိုင် ဘူး။ ဒါ့ကြောင့် ပရိနိဗ္ဗာန် စုတိ ရဲ့ နောက် ကာလ အတွင်း - ဤလောက မှာလည်း မဖြစ်၊ အခြားလောက မှာလည်း မဖြစ်၊ ဘယ်လောကမှာမှ မဖြစ်၊ မရှိဘူး။ အဲ့ဒီ မဖြစ်- မရှိတော့ခြင်း ဟာ အနုပါဒိသေသ နိဗ္ဗာန် ဖြစ် ပါတယ်။ တစ်နည်း - ဆင်းရဲ ရဲ့ အဆုံးသတ် ပဲ လို့ ဆိုလို တယ်။

~ မဟာစည် ဆရာတော်၊ နိဗ္ဗာန ပဋိသံယုတ္တကထာ (နှာ -၁၃၃ - ၁၃၈)

......................

June 17th 2012 at 10:45 PM

.......................

http://zayya.wordpress.com/

http://zayya.blog.com/

http://zayyah.blogspot.com/