နေ့ခင်းကြောင်တောင် အခိုးခံရသော ရွှေအိုးများ

by ယဉ်ကျေးသော လူ့အဖွဲ့အစည်း တစ်ရပ်ဆီသို့ on Tuesday, June 26, 2012 at 6:49pm ·

တစ်နေ့မှာ ကျွန်တော် အွန်းလိုင်းပေါ်မှာ ဟိုယောင်ယောင်ဒီယောင်ယောင်လုပ်နေတုန်း သူငယ်ချင်း တစ်ယောက်ဆီက Message တစ်ခု ၀င်လာပါတယ်။ သူက ကြီးကြီးကျယ်ကျယ်တစ်ခု မေးထားပါတယ်။ Nature နဲ့ Nurture ကွဲပြားပုံကို Layman တွေကို သင်ချင်လို့ Easiest Resource တွေ ဘယ်မှာရနိုင်မလဲတဲ့။ ကျွန်တော် မျက်လုံးတွေပြာသွားတယ်။ ငနဲသားက အီးမေဂျာဆိုတော့ လက်နက်ကြီးနဲ့ ပစ်ချင်ပုံရတယ်။

Nurture ဆိုတာ မြင်ဖူးသလိုလိုတော့ ရှိပါရဲ့။ ကွမ်းယာဆိုင်မှာလိုလို ကားဂိတ်မှာလိုလို..။ Layman နဲ့လည်း အရက်အတူတူသောက်ခဲ့ဖူးသလိုလို…။ ဒါပေမဲ့ အဓိပ္ပာယ်ကိုချွေးပျံအောင် စဉ်းစားကြည့်လည်း ထွက်မလာပါဘူး။ ဒါနဲ့ပဲ အပြေးအလွှား Online Dictionary (www.ldoceonline.com) ကနေ ရှာဖွေရပါတယ်။ သူ့ကိုလည်း အမှန်အတိုင်း ပြောပြလိုက်တယ်။ ကျွန်တော် ခင်ဗျားမေးခွန်းကို နားမလည်ဘူးလို့။

အဲဒီမှာ ပြဿနာကစရော။ သူက မယုံဘူးလို့ပြောတယ်။ မနောက်ပါနဲ့တဲ့။ တကယ်မသိတာပါလို့ ပြောလိုက်တော့ Psychology နဲ့ ကျောင်းပြီးထားတဲ့လူတစ်ယောက်ဟာ Nurture ကို မသိဘူးဆိုတာ ယုံကြည်နိုင်စရာမရှိဘူးတဲ့။ သူ့အမြင်မှာ ကျွန်တော်ဟာ English စာအုပ်လေး တစ်အုပ်စနှစ်စ ဟိုလျှောက်ဖတ်ဒီလျှောက်ဖတ်၊ စာတိုပေစလေး ကဘောက်တိကဘောက်ချာ ဘာသာပြန်နေတာကို အထင်ကြီး (အထင်ကြီးချင်ယောင်ဆောင်) နေပုံပဲ။ ဒါမှမဟုတ်လည်း ခွေးကလေးလို သဘောထားပြီး အပျင်းပြေ ချောင်ပိတ်ရိုက်ချင်တာလား၊ မပြောတတ်ဘူး။ ဒါနဲ့ ကျွန်တော်လည်း အမှန်အတိုင်းရှင်းပြရတယ်။ ကျွန်တော် Psychology နဲ့ပတ်သက်ပြီး ဘာမှ ထိထိရောက်ရောက်မသိလှကြောင်း၊ ဘာသာပြန်တွေကလည်း Dictionary ခေါင်းအုံးပြီး လျှောက်ရေးထားခြင်းသာဖြစ်ကြောင်းပေါ့။ ဆိုက်ကိုနဲ့ပတ်သက်လို့ ကျွန်တော် လျှောက်ဖတ်ထားသလောက်သာ ကျွန်တော်သိတယ် တက္ကသိုလ်တက်လို့ ကျွန်တော်သိခဲ့တာ ဘာမှ ခေါင်းထဲမကျန်တော့ဘူးလို့ ပြောလိုက် မိတယ်။

ကျွန်တော်က ဒဂုံတက္ကသိုလ်မှာ အဝေးသင်တက်ပြီး ကျောင်းပြီးခဲ့တာ။ တစ်နှစ်မှာ ဆယ်ရက်လောက်သာ အနီးကပ်ဆိုပြီး ကျောင်းတက်ရတဲ့ရက် ရှိတယ်။ အဲဒီဆယ်ရက်မှာလည်း သူငယ်ချင်းအသစ်တွေ မိတ်ဖွဲ့ရတာနဲ့၊ ကျောင်းသားကပ်ထုတ်ရတာနဲ့၊ စာအုပ်ထုတ်ရတာနဲ့ ပြေးလွှားနေရတော့ စာသင်ချိန်ဆိုတာ အားလုံးပေါင်းမှ ၂၄ နာရီ မပြည့်တာ တက်ဖူးသူတိုင်း သိကြမှာပဲ။ ကျူရှင်မတက် (မတက်နိုင်) တဲ့ ကျွန်တော်တို့လိုငတိတွေအဖို့တော့ ပိုဆိုးတာပေါ့။ ပညာဟာ တန်ဖိုးကြီးတယ်ဆိုတာ သွေးထွက်အောင်မှန်ကြောင်း သိရတော့တယ်။ ကျူရှင်တက်ထားတဲ့ လူတွေဆီ ချဉ်းကပ်၊ Spot လေးရလိုရငြား မျက်နှာချိုသွေးရတာလည်း အလုပ်တစ်ခုပဲ။ ဒီလောက်စာသင်ချိန်ဟာ ဘွဲ့လို့ခေါ်တဲ့အရာတစ်ခု ရယူနိုင်လောက်အောင် မလုံလောက်တာ သံသယရှိစရာ မလိုဘူး ထင်တယ်။

အဝေးသင်ဆိုကတည်းက အိမ်မှာတင် လေ့လာနိုင်ဖို့ရည်ရွယ်ထားတာဖြစ်ကြောင်း၊ အနီးကပ်ဆိုတာ ဖတ်ပြီးသားစာတွေကို စာမေးပွဲဖြေနိုင်ဖို့အတွက် ပြန်နွှေးပေးတဲ့သဘောသာဖြစ်ကြောင်း ယုတ္တိရှိသလိုလို ပြောနိုင်ပါလိမ့်မယ်။ ကျွန်တော့်အနေနဲ့ စိတ်ပညာမေဂျာကို ၀ါသနာအရ ယူထားတာဖြစ်လို့ အိမ်မှာလည်း အားတဲ့အချိန်မှာ အနည်းအကျဉ်းတော့ ဖတ်ဖြစ်ပါတယ်။ အလုပ်တစ်ဖက်နဲ့ဆိုတော့လည်း တေဇာ(စိတ်ပညာ)ရယ်လို့ နာမည်မှာအမြီးတပ်လို့ရတဲ့ ဘွဲ့တစ်ခုရဖို့ ထိုက်တန်လောက်အောင် မဖတ်မိတာ အသေအချာပါပဲ။ (မင်္ဂလာဆောင်ဖိတ်စာလည်း ရိုက်ဖို့အစီအစဉ်မရှိတာကြောင့် သိပ်ရှော့မရှိဘူးပဲ ဆိုရမယ်) တခြားသူများလည်း ထိုနည်းလည်းကောင်း ရှိမှာပါပဲ။ ဒါကြောင့်လည်း ကျောင်းသာပြီးသွားရော ဘွဲ့လက်မှတ်ကို တက်ရောက်/အဝေးရောက်စသည်ဖြင့် သွားမယူဖြစ်ခဲ့ဘူး။ ပညာရပ်တစ်ခု ဆုံးခန်းတိုင်ခဲ့ကြောင်း ကိုယ့်ကိုယ်ကိုယ်တောင် အသိအမှတ်မပြုနိုင်သေးဘဲနဲ့ သူတစ်ပါး အသိအမှတ်ပြုထားတဲ့ စာရွက်တစ်ရွက်ကို ကျွန်တော် သိမ်းမထားချင်ဘူး။

ဒါကို ကျွန်တော့်သူငယ်ချင်းကတော့ သိပ်ဘ၀င်မကျပုံမရဘူး။ ကျေးဇူးတရားဆိုတာဆိုတာဟာ အသိအမှတ် ပြုရမှာပဲ ဆိုတာတွေ ပြောနေပါတယ်။ အာဂေါင်လှံဆူးမှာ စိုးရိမ်ပုံပဲ။ သူက ဘယ်သူ့ကို ကျေးဇူးတင်ခိုင်းနေတယ် ဆိုတာကတော့ ကျွန်တော်သဘောမပေါက်ပါဘူး။ တတ်နိုင်သမျှ ရှာကြံကြည့်ရတာတော့ ကျောင်းတက် နေတုန်းက အလုပ်ခွင့်ရလို့ နည်းနည်းပါးပါး နားရတယ်။ အရက်သောက်ဖော်သောက်ဖက် သူငယ်ချင်းတချို့ ရခဲ့တယ်။ အသည်းကွဲခဲ့လို့ အချစ်သီချင်းလေးတွေနားထောင်ရတာ ပိုပြီးပြီးပြည့်စုံလာသလို ခံစားရတယ်။ ကျွန်တော့်အနေနဲ့ ဒါလောက်ပဲ ကျေးဇူးတင်စရာ ရှာတွေ့တယ်။ အင်း . . . ပြန်စဉ်းစားကြည့်တော့ ကျွန်တော်တို့ကိုယ်တိုင်ဟာ Layman တွေဖြစ်ပြီး၊ Nature အတိုင်းမသွားနိုင်အောင် Nurture အလုပ်ခံခဲ့ရတာလားဆိုတာတော့…။

ပညာရွှေအိုး လူမခိုးပါ။ သို့သော် လူတိုင်း (ကြိုးစားသူတိုင်း) လက်ဝယ်ပိုင်ဆိုင်ခွင့်ရနိုင်သော အခြေအနေတစ်ရပ်တော့ ရှိသင့်သည်ဟု ယူဆပါကြောင်း…

>>

http://www.tazar.in/?cat=3&paged=4