27.06.2012 နေ့ဖတ်ရန်သတင်းများ

by Myanmar Journal on Tuesday, June 26, 2012 at 4:37pm 

တူရကီ လေယာဉ်ကို ပစ်ချခဲ့မှု၊ ဆီးရီးယားကို ရှုတ်ချ

တူရကီ ဂျက်လေယာဉ်ကို ပစ်ချခဲ့တဲ့ အပေါ် ဆီးရီးယားကို ပြစ်တင် ရှုတ်ချ

တူရကီ ဂျက်လေယာဉ် တစင်းကို ဆီးရီးယား တပ်ဖွဲ့တွေ သောကြာနေ့က ပစ်ချလိုက် အပြီးမှာ တူရကီနဲ့ ဆီးရီးယား အကြား ဆက်ဆံရေး အခြေအနေဟာ ပြောင်းလဲသွားခဲ့ ပြီလို့ တူရကီ ဝန်ကြီးချုပ် Recep Tayyip Erdogan က ပါလီမန်မှာ ပြောကြား လိုက်ပါတယ်။

ပါလီမန်မှာ တူရကီ ဝန်ကြီးချုပ် Recep Tayyip Erdogan က သူ့ပါတီကို အားမန် ပါပါနဲ့ ပြောဆို သွားပုံဟာ အတော့်ကို ဂန္တဝင် မြောက်တယ်လို့ ပြောနိုင်ပါတယ်။

အဲဒီ ပါလီမန် မိန့်ခွန်းထဲမှာ ဝန်ကြီးချုပ် အယ်ဒိုဟဲန်က တူရကီ ဂျက်လေယာဉ်ကို ဆီးရီးယား တပ်ဖွဲ့တွေ ပစ်ချခဲ့တဲ့ ကိစ္စနဲ့ ပတ်သက်လို့ ပြစ်တင် ရှုတ်ချခဲ့ သလို ဒေသတွင်း တူရကီ အစိုးရရဲ့ နိုင်ငံခြားရေး ပေါ်လစီနဲ့ ပတ်သက်လို့လည်း ကျယ်ကျယ် ပြန့်ပြန့် ကာကွယ် ပြောဆိုသွားခဲ့ ပါတယ်။

မြေထဲ ပင်လယ် အရှေ့ပိုင်းဟာ တူရကီအတွက် အရေးပါတဲ့ ဒေသဖြစ်တယ်၊ ဒါ့ကြောင့် တူရကီအ စိုးရအနေနဲ့ အဲဒီနေရာမှာ ကင်းထောက် လေယာဉ်တွေ နဲ့ စောင့်ကြည့် ထောက်လှမ်းခွင့် ရှိတယ်လို့ ဝန်ကြီးချုပ် အယ်ဒိုဟဲန်က ပြောသွားပါတယ်။

ပစ်ချခံခဲ့ရတဲ့ F4 ကင်းထောက် လေယာဉ်ဟာ လက်နက် တပ်ဆင်ထားခြင်း မရှိဘူး၊ ဘယ်လေယာဉ်လဲ ဆိုတာ ထင်ထင်ရှားရှား သိနိုင်တယ်၊ ပစ်ချခံရချိန်မှာ ဆီးရီးယား လေပိုင်နက်ထဲမှာ ရှိမနေဘူးလို့ တူရကီ အစိုးရ ပြောခဲ့တဲ့အတိုင်း ဝန်ကြီးချုပ် အယ်ဒိုဟဲန်က ထပ်လောင်း ပြောသွားပါတယ်။

ဆီးရီးယား နိုင်ငံလို တူရကီရဲ့ မိတ်ဆွေ နိုင်ငံတခုက အခုလို လုပ်ခဲ့တာဟာ အတော်လေးကို အရှက်မရှိတဲ့ လုပ်ရပ် ဖြစ်တယ် လို့လည်း သူက ပြောသွားပါတယ်။ ဒါ့အပြင် သမ္မတ အားဆာတ် အစိုးရဟာ သူ့ ဆီးရီးယား ပြည်သူတွေ အတွက် တင်သာမက တူရကီ နိုင်ငံ အတွက်လည်း လုံခြုံရေး အန္တရာယ် ပေးနိုင်တယ် ဆိုတဲ့ အကြောင်း ဝန်ကြီးချုပ် အယ်ဒိုဟဲန်က အသေးစိတ် ပြောသွားပါသေးတယ်။

အခု ဖြစ်ရပ်ကြောင့် တူရကီနဲ့ ဆီးရီးယား နှစ်နိုင်ငံ အကြား ဆက်ဆံရေးဟာ အခြေအနေသစ် အမျိုးကို ပြောင်းလဲ ရောက်ရှိသွားပြီလို့ ဆိုပါတယ်။

နှစ်နိုင်ငံအကြား နယ်စပ်ဒေသ တလျှောက်မှာ ဆီးရီးယား တပ်ဖွဲ့တွေရဲ့ အနာဂတ် လှုပ်ရှားမှု မှန်သမျှကို ရန်လိုတဲ့ အပြုအမူတွေ အဖြစ် မှတ်ယူမှာ ဖြစ်ပြီး ပြင်းပြင်းထန်ထန် တုံ့ပြန်သွားမယ်လို့လည်း ဝန်ကြီးချုပ် အယ်ဒိုဟဲန်က ပြောပါတယ်။

ဒါ့အပြင် တူရကီ ကင်းထောက်လေယာဉ် ဟာ ဆီးရီးယား လေပိုင်နက်နဲ့ ဒီလောက်တောင် နီးနီးကပ်ကပ် ရောက်ရလောက်အောင် ဘာလုပ်နေခဲ့တာလဲ လို့ မေးခွန်းထုတ်ခဲ့တဲ့ တူရကီ သတင်းထောက် နှစ်ယောက်ကိုလည်း ဝန်ကြီးချုပ် အယ်ဒိုဟန်က ပြစ်တင် ရှုတ်ချလိုက်ပြီး သူတို့ဟာ ဆီးရီးယားရဲ့ လုပ်ရပ်ကို တရားဝင် ဖြစ်အောင် လုပ်နေတယ်လို့ စွပ်စွဲ ပြောဆိုသွားပါတယ်။

ဝန်ကြီးဦးအောင်မင်း ABSDFအပါအဝင် တခြားအဖွဲ့တွေကို တွေ့ဆုံ

ဒေါက်တာစင်သီယာမောင် ဦးဆောင်တဲ့ မယ်တော် ဆေးခန်းအဖွဲ့နဲ့ လည်းတွေ့ဆုံခဲ့ပါတယ်

မြန်မာအစိုးရ ငြိမ်ချမ်းရေး ဖေါ်ဆောင်ရေး အဖွဲ့က မီးရထား ပို့ဆောင်ရေး ပြည်ထာင်စု ဝန်ကြီး ဦးအောင်မင်း ဦးဆောင်တဲ့ အဖွဲ့ဟာ အင်္ဂါနေ့က ထိုင်းနိုင်ငံ မဲဆောက်မြို့မှာ ကရင်အမျိုးသား အစည်းအရုံး KNU အပါအဝင်၊ တခြား စစ်ရေး နိုင်ငံရေး၊ ကျန်းမာရေး အဖွဲ့တွေနဲ့ သီးခြားစီ တွေ့ဆုံ ဆွေးနွေး ခဲ့ပါတယ်။

ဝန်ကြီးဦးအောင်မင်း ဦးဆောင်တဲ့ အဖွဲ့ဟာ အင်္ဂါနေ့ မွန်းလွဲပိုင်းမှာ ဒေါက်တာ စင်သီယာမောင် ဦးဆောင်တဲ့ မယ်တော် ဆေးခန်းအဖွဲ့၊ ABSDF ဒုတိယ ဥက္ကဌ ဦးမျိုးဝင်း ဦးဆောင်တဲ့အဖွဲ့၊ KUN အထွေထွေ အတွင်းရေးမှူး နော်စီဖိုးရာစိန် ဦးဆောင်တဲ့ အဖွဲ့၊ NLD လွတ်မြောက်နယ်မြေ ဒုတိယ ဥက္ကဌ ဒေါက်တာအေးကျော် ဦးဆောင်တဲ့ အဖွဲ့နဲ့ FDB ဥက္ကဌ ဒေါ်ခင်ဥမ္မာ ဦးဆောင်တဲ့ အဖွဲ့တွေနဲ့ သီးခြားစီ တွေ့ဆုံ ဆွေးနွေးခဲ့ ပါတယ်။

ဝန်ကြီး ဦးအောင်မင်းက KNU နဲ့ သြဂုတ်လထဲမှာ ပြည်ထောင်စု အဆင့် တရားဝင် ဆွေးနွေးတော့မှာ ဖြစ်ကြောင်းနဲ့၊ ကျန်တဲ့ အဝေးရောက် အဖွဲ့တွေက တတ်သိ ပညာရှင်တွေကို ပြည်တွင်းမှာ ပြန်လာပြီး တရားဝင် လုပ်ဆောင်ကြဖို့ လာခေါ်တာ ဖြစ်ကြောင်းလည်း ပြောပါတယ်။

ပြန်လာချင်သူတွေ အနေနဲ့ သမ္မတ ထံမှာ လျှောက်ထားရမှာ ဖြစ်ပြီး၊ သမ္မတကနေ မတရားအသင်း အက်ဥပဒေ ပုဒ်မ ၁၇/၁ ကို ဖြုတ်ပေး ပြီးတာနဲ့ ပြန်လာလို့ ရပြီဖြစ်ကြောင်း ဝန်ကြီးက ပြောပါတယ်။

ဒေါ်စင်သီယာမောင် ဆေးခန်းအတွက်လည်း လိုအပ်တဲ့ ကူညီမှုတွေ ပေးသွားမှာ ဖြစ်ပြီး၊ တကယ်လို့ သူ့အနေနဲ့ မြန်မာနိုင်ထဲ ပြန်လာပြီး ကျန်းမားရေး လုပ်ငန်းတွေ လုပ်ချင်တယ် ဆိုရင်လည်း အကူအညီ ပေးမယ်လို့ ဦးအောင်မင်းက ပြောပါတယ်။

ထိုင်း မြန်မာနယ်စပ်မှာ စစ်ရေး၊ နိုင်ငံရေး၊ ကျန်းမာရေးနဲ့ လူမှုရေး ဆောင်ရွက်နေတဲ့ မြန်မာ အတိုက်အခံ အဖွဲ့အစည်းတွေ မြန်မာနိုင်ငံကို ပြန်မယ်ဆိုရင်၊ နိုင်ငံရေး ဆက်လုပ်မလား၊ ဒါမှမဟုတ် လူမှုရေးပဲ လုပ်မလား၊ မိသားစုပဲနဲ့ အတူနေထိုင် လုပ်ကိုင်စားသောက်မလား၊ အဲဒီအတွက် အကူအညီ ပေးသွားမယ်လို့ ဝန်ကြီးက ဆက်ပြောပါတယ်။

ဝန်ကြီးနဲ့ တွေ့ဆုံခဲ့တဲ့ NLD လွတ်မြောက် နယ်မြေ ဒုတိယဥက္ကဌ ဒေါက်တာ အေးကျော် ကလည်း ဦးအောင်မင်း အနေနဲ့ စေတနာရှိတာကို တွေ့ရကြောင်း၊ ပြည်တွင်းကို ပြန်ဝင်ချင်တဲ့ အဖွဲ့ဝင် အရေအတွက်ကို အရင် ပြုစုပေးဖို့နဲ့ ဝန်ကြီးက အဲဒီစာရင်းတွေကို သမ္မတ ထံ တင်ပြပေးမယ်လို့ ပြောကြောင်း ဘီဘီစီကို ရှင်းပြပါတယ်။

မနက်ဖြန် ဗုဒ္ဓဟူးနေ့ မနက်မှာတော့ ဝန်ကြီးနဲ့ အဖွဲ့ဟာ ဒေါက်တာစင်သီယာမောင်ရဲ့ မယ်တော်ဆေးခန်းကို သွားပြီး အလှူငွေ ပေးအပ်မယ်လို့ သိရပါတယ်။

တနင်္လာနေ့ကလည်း ဝန်ကြီး ဦးအောင်မင်းနဲ့ အဖွဲ့ဟာ လူ့ဘောင်သစ် ဒီမိုကရက်တစ် ပါတီ DPNS နဲ့၊ FTUB မြန်မာနိုင်ငံ အလုပ်သမားအဖွဲ့ချုပ်တို့ကို သီးခြားစီ တွေ့ဆုံခဲ့ပါတယ်။

ဆီးရီးယားမှာ တိုက်ပွဲတွေ ပြန်ဖြစ်

ဟုမ်းစ်မြို့ အပါအဝင် တခြား နေရာတွေမှာ တိုက်ခိုက်မှုတွေ ထပ်မံ ဖြစ်ပေါ်နေပါတယ်။

ဆီးရီးယား နိုင်ငံမှာ အစိုးရ တပ်ဖွဲ့တွေနဲ့ သူပုန်တွေ အကြား မြို့တော် ဒမာစကပ်စ် ဆင်ခြေဖုံးပိုင်းမှာ အသစ်တဖန် တိုက်ခိုက်မှုတွေ ပြန်ဖြစ် နေတယ်လို့ အတိုက်အခံ တက်ကြွ လှုပ်ရှားသူတွေက ပြောပါတယ်။

ဆီးရီးယား လူ့အခွင့်အရေးကို စောင့်ကြည့်လေ့လာ နေတဲ့ အဖွဲ့ SOHR က ပြောတာက အစိုးရရဲ့ Republican Guard တပ်ဖွဲ့ဝင်တွေဟာ ဆင်ခြေဖုံး နေရာ အတော် များများမှာ တိုက်ခိုက်တဲ့ အခါ လက်နက်ကြီးတွေ အသုံးပြုခဲ့တယ်လို့ ဆိုပါတယ်။ထိခိုက် ဒဏ်ရာရတဲ့ သတင်းကိုတော့ မသိရသေးပါ။

အစိုးရ မီဒီယာက ပြောတာ ကတော့ သူတို့ အဆို အကြမ်းဖက်သမား လေးငါး ဆယ်လောက်ကို သတ်ဖြတ် နိုင်လိုက်တယ်လို့ ကြေညာ သွားပါတယ်။

နိုင်ငံအလယ်ပိုင်း ဟုမ်းစ်မြို့ အပါအဝင် တခြား နေရာတွေမှာ တိုက်ခိုက်မှုတွေ ထပ်မံ ဖြစ်ပေါ်နေပါတယ်။

နိုင်ငံတကာ ကြက်ခြေနီအဖွဲ့ ကလည်း တိုက်ခိုက်မှုတွေ ကြောင့် ပိတ်မိနေကြတဲ့ အရပ်သားတွေကို ဘေးကင်းရာကို ကယ်ထုတ် ပေးရေး အစီအစဉ်တွေ လုပ်ဖို့ ဟုမ်းစ်မြို့ကို ပြန်သွားနေပြီ ဖြစ်ပါတယ်။

ဆိုက်ပရပ်စ်လဲ ဘဏ္ဍာရေး အကျပ်ရိုက်

ဆိုက်ပရပ်စ် ကျွန်း ပေါ်က ဘဏ်တွေ ဒုက္ခ ရောက်

ဘဏ္ဍာရေး ကယ်ဆယ်မှု ပေးဖို့ ဆိုက်ပရပ်စ် နိုင်ငံကလဲ ဥရောပ သမဂ္ဂကို တောင်းဆို ခဲ့ပါတယ်။

အကြွေး လည်ပင်းဆိုက် နေတဲ့ ဂရိ နိုင်ငံကြောင့် ဆိုက်ပရပ်စ် ကျွန်း ပေါ်က ဘဏ်တွေလဲ ဒုက္ခ ရောက်ကုန်ပြီလို့ ဆိုက်ပရပ်စ် အစိုးရက ဆိုပါတယ်။

ဆိုက်ပရပ်စ် ဒုတိယ အကြီးဆုံး ဘဏ်ကို အမြန်ဆုံး ကယ်တင် ရတော့မယ် လို့ ယူဆ နေကြပါတယ်။

အိုင်ယာလန်၊ ပေါ်တူဂီ၊ ဂရိနဲ့ စပိန် တို့ပြီးရင် ဆိုက်ပရပ်စ်ဟာ ပဉ္စမ မြောက် ကယ်ဆယ်ရေး အကူ ငွေ ထုတ်ချေးဖို့ တောင်းဆို ရတဲ့ နိုင်ငံ ဖြစ်လာပါတယ်။

ဂရိ ဘဏ္ဍာရေး ဝန်ကြီးသစ် ဗက်ဆီလီ ရာပါနော့စ် ကျန်းမာရေး မကောင်းလို့ နှုတ်ထွက် သွားပါတယ်။

ဂရိ စီးပွားရေး နလံထ လာဖို့ အရင်ပတ်က သူ့ကို ခန့်ပြီး ကာစမှာပဲ ဆေးရုံ တက်ခဲ့ရတာပါ။

တာဝန် တွေ အပြည့် မထမ်းဆောင် နိုင်တော့တဲ့ အထိ ကျန်းမာရေး ဆိုးရွား နေတယ်လို့ သူက ကြေညာ ချက် ထုတ်ပြန် ခဲ့ပါတယ်။

ဘာရောဂါလဲ ဆိုတာတော့ မဖော်ပြ ပါဘူး။

အစိုးရသစ် ဖွဲ့စည်းပုံကို မစ္စတာ ရာပါနော့ မကြိုက်တာ အပြင် ဒီ နှုတ်ထွက်မှု အတွက် တခြား နောက်ခံ အကြောင်းတွေလဲ ရှိနိုင်တယ်လို့ အေသင်က ဘီဘီစီ သတင်းထောက်က ဆိုပါတယ်။

ဒီတပတ် ဥရောပ သမဂ္ဂ ထိပ်သီး ဆွေးနွေးပွဲက ယူရိုဇုန် အကြွေး ပြဿနာကို ဖြေရှင်း ပေးနိုင်ပါ့မလားပူပန် ကြောင့်ကြ နေကြတဲ့အတွက် ဥရောပ နဲ့ အမေရိကန် စတော့ ရှယ်ယာ ဈေးကွက်တွေ ကျဆင်း ကုန်ပါတယ်။

ဖရန့်ဖွတ်နဲ့ ပါရီက ရှယ်ယာ ဈေးကွက်ကြီးတွေ ၂ ရာခိုင်နှုန်း ကျော် ကျဆင်း သွားပါတယ်။

လန်ဒန်မှာ ၁ ရာခိုင်နှုန်း ကျော်ကျော် ကျပြီး ဈေးပိတ် သွားပါတယ်။

နယူးယောက် ရှယ်ယာဈေး တွေလဲ တရာခိုင်နှုန်း ကျော် ကျဆင်း ခဲ့ပါတယ်။

မူဒီ အဆင့် သတ်မှတ်ရေး အေဂျင်စီ ကလဲ စပိန် ဘဏ် ၂၈ ခုရဲ့ ချေးငွေ အဆင့်ကို လျှော့ချ ခဲ့ပါတယ်။

တရုတ် နယ်စပ်ရောက် ကချင် ဒုက္ခသည်တွေ အကူအညီ လိုအပ်နေ

ယူနန် ပြည်နယ်ရောက် ကချင် ဒုက္ခသည်တွေ စားစရာနဲ့ ကျန်းမာရေး အကူအညီ လိုအပ်နေ

ကချင် ပြည်နယ်မှာ ၂၀၁၁ ခု ဇွန်လ ကတည်းက စတင်ခဲ့တဲ့ ကေအိုင်အေ ကချင် လွတ်လပ်ရေး တပ်မတော်နဲ့ အစိုးရ စစ်တပ်ကြား ဖြစ်ပွား နေတဲ့ စစ်ပွဲတွေကြောင့် တရုတ်နိုင်ငံ ယူနန် ပြည်နယ် ထဲကို ထွက်ပြေး ခဲ့ကြတဲ့ ကချင် စစ်ပြေး ဒုက္ခသည်တွေ ဟာ အခုချိန်ထိ စားနပ်ရိက္ခာ ဆေးဝါးနဲ့ နေစရာ အလုံ အလောက် မရကြဘူးလို့ လူ့အခွင့်အရေး စောင်ကြည့်ရေးအဖွဲ့ Human Right Watch( HRW) က ပြောပါတယ်။

တရုတ်နိုင်ငံ ယူနန်ပြည်နယ် အတွင်း အထီးကျန် ဖြစ်နေတဲ့ ကချင် ဒုက္ခသည်များ ဆိုတဲ့ ခေါင်းစဉ်နဲ့ ဇွန်လ ၂၆ ရက် နေ့က ထုတ်ပြန်တဲ့ HRW ရဲ့ အစီရင်ခံစာမှာ ကချင် ပြည်နယ်က တိုင်ပွဲတွေကြောင့် ယူနန် ပြည်နယ်ထဲကို ထွက်ပြေး လာတဲ့ ကချင် ဒုက္ခသည် ၇ ထောင်ကနေ တသောင်း လောက်ရှိတယ်လို့ ဖေါ်ပြထား ပါတယ်။

သူတို့ကို တရုတ် အစိုးရက ဒုက္ခသည်အဖြစ် အသိအမှတ် မပြုတဲ့ အပြင် ဘာ အကူအညီမှ မပေး တာကြောင့် ဒုက္ခ ပိုရောက် နေကြ ရတယ်လို့ ဆိုပါတယ်။

HRW ရဲ့ အာရှ ဒေသဆိုင်ရာ လက်ထောက် ညွှန်ကြားရေးမှူး ဖေးလ် ရောဘတ်ဆန်က ဒုက္ခသည်တွေရဲ့ အခြေ အနေ အလွန် ဆိုးနေပြီး တရုတ် အစိုးရဆီက စားစရာ နေစရာနဲ့ ကျန်းမာရေး ထောက်ပံ့မှု ဘာမှ မရဘူး လို့ ပြော ပါတယ်။

တစ်နှစ်ကျော်ကြာ ဒုက္ခသည် ဘဝ မှာ နေလာကြရသူတွေဟာ ထွက်ပြေးတုန်းက ပါလာတဲ့ ငွေကြေးတွေ ကုန်သွားပြီး စားစရာ မရှိလို့ အလုပ်လုပ် ကြတဲ့ အခါ တရုတ် အလုပ်ရှင်တွေက အခွင့်ကောင်းယူတာ၊ အာဏာပိုင်တွေက အနိုင်ကျင့်တာတွေ ရှိတယ်လို့ HRW ရဲ့ အာရှ ဒေသဆိုင်ရာ လက်ထောက် ညွှန်ကြားရေးမှူးက ပြောပါတယ်။

အခု အစီရင် ခံစာကို ယူနန်ရောက် ဒုက္ခသည်တွေ မြန်မာနိုင်ငံတွင်း အိုးမဲ့ အိမ်မဲ့ ထွက်ပြေး နေတဲ့ ဒုက္ခသည်တွေနဲ့ မေးမြန်းမှု ၁၀၀ ကျော် လုပ်ပြီး ရေးတာလို့ ပြော ပါတယ်။

တရုတ် အစိုးရ အနေနဲ့ ဒုက္ခသည် အဖြစ် အသိ အမှတ်ပြုပြီး အကူအညီ ပေးသင့်တဲ့ အပြင် UNHCR နဲ့တခြား အကူအညီ ပေးရေး အဖွဲ့တွေ ယူနန် နယ်ထဲကို ဝင်ခွင့်ပေးဖို့ HRW က တိုက်တွန်းခဲ့ ပါတယ်။

မြန်မာအစိုးရ အနေနဲ့ လည်း မြန်မာ နိုင်ငံတွင်း အိုးမဲ့ အိမ်မဲ့ ထွက်ပြေး နေတဲ့ ဒုက္ခသည်တွေကို ကူညီခွင့်ရအောင် အဲဒီလို အဖွဲ့တွေကို ဝင်ခွင့် ပေးဖို့လည်း တိုက်တွန်းလိုက် ပါတယ်။

ယူနန် ပြည်နယ် နောင်တောင်း မြို့နယ် အတွင်းက ရန်လု လောဖိုင့်၊ နားကောင်းကောင့်၊ ငါနောင်ပါ၊ ခါ့ဒေါင်းပါ၊ လုံကောက် စတဲ့ ဒုက္ခသည် စခန်း ၆ ခုမှာ အိမ်ထောင်စုပေါင်း တစ်ထောင်လောက်၊ လူဦးရေ အားဖြင့် ငါးထောင်လောက် ကို အကူအညီ ပေးနေသူ တွေထဲက တစ်ယောက် ဖြစ်တဲ့ ဒေါ် မရမ် လုလု ကတော့ စောစောပိုင်းက တရုတ်အစိုးရက ဒုက္ခသည်တွေကို မောင်းထုတ်ခဲ့ပေမဲ့ နောက်ပိုင်းမှာ သူတို့ ချမှတ်ထားတဲ့ စည်းကမ်း အတိုင်း လိုက်နာရင် နားလည်မှုနဲ့ နေထိုင်ခွင့် ပြုလာတယ်လို့ ပြောပါတယ်။

စားနပ် ရိက္ခာနဲ့ နေစရာ ပံ့ပိုးတာ မရှိပေမဲ့ နောင်တောင်း မြို့နယ် တဝိုက်မှာ နေထိုင်ကြသူတွေကို ကျန်းမာရေး စောင့်ရှောက်မှု၊ ပတ်ဝန်းကျင် သန့်ရှင်းရေးတို့ကို တရုတ် အစိုးရ ဘက်က လုပ်ဆောင် ပေးတယ်လို့ ဒေါ် မရမ် လုလုက ပြော ပါတယ်။

ဒါပေမဲ့ မိုးတွင်း အခါ ရောက်လာပြီဖြစ်လို့ ကျန်းမာရေး စောင့်ရှောက်မှု၊ ကလေးတွေ ပညာရေးနဲ့ စားစရာ ကတော့ အရေး တကြီး လိုအပ် နေတယ်လို့ သူက ပြောပါတယ်။

နယ်စပ်လူထုအကျိုး မယ်တော်ဆေးခန်း ပြည်တွင်းနဲ့ ပူးပေါင်း ဆောင်ရွက်လို

By မအေးအေးမာ

ဓာတ်ပုံ ASSOCIATED PRESS

နှစ်ပေါင်း ၂၀ကျော် ကာလအတွင်း ပြည်ပခရီးစဉ်တွေ သွားလာနိုင်ပြီးတော့ လွှတ်တော် နိုင်ငံရေး မှာလည်း ဒေါ်အောင်ဆန်းစုကြည် ပါဝင်လာနိုင်တဲ့အထိ အပြောင်းအလဲတွေ ရှိလာနေတဲ့ မြန်မာနိုင်ငံမှာ တိုင်းရင်းသားတွေ အတိုက်အခံနိုင်ငံရေးအဖွဲ့တွေနဲ့လည်း အစိုးရက ငြိမ်းချမ်းရေးရဖို့ ကြိုးပမ်းနေတာပါ။ ဒီကနေ့မှာဆိုရင်တော့ ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်း  ကော်မတီ ဒု-ဥက္ကဋ္ဌ မီးရထား ဝန်ကြီး ဦးအောင်မင်း ဦးဆောင်တဲ့ အဖွဲ့ဟာ မယ်တော်ဆေးခန်းအပါအ၀င် အဖွဲ့ ၅ဖွဲ့နဲ့ တွေ့ဆုံခဲ့ပါတယ်။

ဒီလို တွေ့ဆုံချိန်မှာ ဦးအောင်မင်းက အစိုးရ မလုပ်နိုင်တဲ့ ကျန်းမာရေး ကိစ္စ တွေကို ဆောင်ရွက်နေတဲ့ အတွက် မယ်တော်ဆေးခန်းကို လိုအပ်တဲ့ အကူအညီတွေ ပေးအပ် မယ်ဆိုတဲ့ အကြောင်းနဲ့ မယ်တော် ဆေးခန်း ဘက်ကလည်း ကျန်းမာရေး ပညာရေး လူမှုရေး လုပ်ငန်း တွေကို ပြည်တွင်းမှာ ရှိတဲ့ အဖွဲ့တွေနဲ့ ပူးပေါင်းလုပ်ဆောင်သွားဖို့ ဆက်ဆွေးနွေးမယ်ဆိုတဲ့အကြောင်း ပြောသွားခဲ့သလို နယ်စပ် မှာတော့  မယ်တော်ဆေးခန်းဘက်က ရွှေ့ပြောင်း မြန်မာအလုပ်သမားတွေ အတွက် ၀န်ဆောင်မှုတွေ ဆက်ပြီး ပေးသွားဖို့ ရှိနေတယ်လို့ ဆိုပါတယ်။ ဒီအခြေနေကို ထိုင်းနယ်စပ်ကနေ မအေးအေးမာက သတင်းပေးပို့ထားပါတယ်။

ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်း  ကော်မတီ ဒု-ဥက္ကဋ္ဌ မီးရထားဝန်ကြီး ဦးအောင်မင်း ဦးဆောင်တဲ့ အဖွဲ့ဟာ ထိုင်းမြန်မာနယ်စပ်မှာ ဖွန်လ ၂၆ ရက်နေ့က ပညာရေး ကျန်းမာရေး လူမှုရေး လုပ်ငန်းတွေကို ဦးစီးဆောင်ရွက်နေတဲ့ မယ်တော်ဆေးခန်းအပါအ၀င် တိုင်းရင်းသား လက်နက်ကိုင် အဖွဲ့  ဖြစ်တဲ့ ကေအန်ယူ မြန်မာနိုင်ငံလုံးဆိုင်ရာ ကျောင်သားများ ဒီမိုကရက်တစ် တပ်ဦး ကျောင်းသား တပ်မတော် ၊  ဒီမိုကရက်တစ် အင်အားစု တွေနဲ့ တွေဆုံခဲ့တာပါ။ ဒီလိုတွေ့ဆုံချိန်မှာ နယ်စပ်က အခြေ အနေတွေ ကို ပြောပြဖြစ်ခဲ့သလို ပြည်တွင်းနဲ့ ဆက်စပ်လုပ်ဆောင်မယ့် ကိစ္စတွေကို ဆက်ပြီး ဆွေးနွေးဖို့တွေ ရှိနေတယ်လို့ မယ်တော်ဆေးခန်းက ဒေါက်တာစင်သီယာမောင် က ပြောပါတယ်။

“ အဓိကကတော့ ဒီကျမတို့ နယ်စပ်မှာ ရှိနေတဲ့ ကျန်းမာရေး ပညာရေးနဲ့ ဒီကလေးအခွင့်အရေး အဖွဲ့အစည်းတွေ ရဲ့ လက်ရှိလုပ်ငန်းတွေကို ကျမတို့ တင်ပြပေးတယ်၊ ပြီးတော့ လာမယ့်အချိန်တွေမှာ ထိုင်းနိုင်ငံထဲမှာ ရှိနေတဲ့ ကျန်းမာရေး ပညာရေး လူမှုရေး အခြေခံအဖွဲ့တွေနဲ့ ပြည်တွင်းထဲမှာ ရှိတဲ့ အဖွဲ့တွေ ပိုပြီးတော့ ပူးပေါင်းဆောင်ရွက်မှုတွေ လုပ်နိုင်အောင်အတွက်ကို ဆက်လက်ပြီးတော့ ဆွေးနွေးသွားမယ်ပေါ့”

ဝန်ကြီး ဦးအောင်မင်းဟာ ကျန်းမာရေးကိစ္စတွေနဲ့ ပတ်သက်လို့ ပူးပေါင်းဆောင်ရွက်မှုတွေ လုပ်မယ် ဆိုတဲ့ အကြောင်းကိုလည်း ဒေါက်တာစင်သီယာမောင် ကို  အခုလို ပြောသွားပါတယ်။

“အစိုးရက မလုပ်ပေးဘူး၊ ဒါကြောင့်မို့လို့ ဆရာမကြီးက လုပ်ပေးတယ်၊ အစိုးရကိုယ်စားလည်း ဆရာမကြီး ကို ကျေးဇူးတင်တဲ့အကြောင်း၊ သမ္မတကြီးကိုယ်စားလည်း ကျေးဇူးတင်တဲ့အကြောင်း၊ ကျနော် ပြောပြတာပါ၊ ဒီတော့ ဆရာမကြီးတို့ ဖြစ်စေချင်တာ အရင်တုန်းက စနစ်က ခွင့်မပြုလို့ လုပ်မပေး နိုင်ပေမဲ့ အခု စနစ်က ခွင့်ပြုတယ်၊ ဆရာမကြီးက ဒီဘက်မှာလာပြီးတော့ မြန်မာနိုင်ငံက တိုင်းရင်းသားတွေ ကို လာလုပ်ပေးနေ တဲ့အတွက် ဆရာမကြီးကို ကျေးဇူးတင်ရမယ်၊ ဆရာမကြီးလုပ်တဲ့အလုပ်က တကယ်တော့ ကျနော်တို့ နိုင်ငံ မှာဆိုရင် တော်ရုံတန်ရုံလူ မလုပ်နိုင်ပါဘူး။ ဒါကြောင့်မို့ ကျနော်တို့က အားပေးတယ်၊ ၀ိုင်းကူပေးမယ်၊ လိုအပ် တာတွေ အကုန်လုံးပေါ့၊ ဖြည့်ဆည်းပေးမယ်၊ အဲဒါလေးကို ကျနော်က တွေ့ရင်ပြောမယ်ဆိုပြီးတော့ လာတာ ပါပဲ။ အဲဒီတော့ ဆရာမကြီးတို့ ကျောပိုးအိတ်အဖွဲ့ ဆိုတာကလည်း သိပ်လိုအပ်တာပဲ၊ ဒီကိစ္စက Primary Health Care ပဲ”

ပြည်တွင်းမှာ ရှိနေတဲ့ နယ်လှည့် ကျောပိုးအိတ် အဖွဲ့လိုမျိုး တိုင်းရင်သားဒေသတွေမှာ ဆေးဝါး ကုသမှု တွေ ကို မြန်မာအစိုးရဘက်က လက်ခံသွားမယ်ဆိုရင် နောက်ပိုင်းမှာ ကျန်းမာရေး ကိစ္စတွေ ပူးပေါင်း လုပ်ဆောင် သွားမှာ ဖြစ်သလို မယ်တော်ဆေးခန်းအနေနဲ့ကတော့  ထိုင်းမြန်မာနယ်စပ်မှာပဲ ရွှေ့ပြောင်း အလုပ်သမား တွေအတွက် ၀န်ဆောင်မူတွေ ဆက်ပေးသွားမှာဖြစ်တယ်လို့ ဒေါက်တာ စင်သီယာမောင် က ဆိုပါတယ်။

“လက်ရှိ တိုင်းရင်းသားဒေသအလိုက် ကျန်းမာရေးလုပ်ငန်းတွေ အဖွဲ့အစည်းတွေ အများကြီး ရှိတယ်၊ အဓိက လက်ရှိ ပြည်တွင်းထဲမှာ ရှိနေတဲ့ နယ်လှည့် ကျောပိုးအိတ် ကျန်းမာရေး လုပ်သား အဖွဲ့တွေ၊ ပြီးတော့ ကျမတို့ ကျန်းမာရေး ၀န်ထမ်းတွေကို တရားဝင် အသိအမှတ်ပြုတဲ့အဆင့် ရှိသွားပြီဆိုရင် ကျမတို့ နယ်စပ်မှာ ရှိနေတဲ့ တခြားသော အဖွဲ့အစည်းတွေကလည်း ဒီကျန်းမာရေးကိစ္စကို ပူးပေါင်း ဆောင်ရွက်မှုထဲမှာ တဆက်တည်း ပါသွားမှာပေါ့၊ ထိုင်းနိုင်ငံထဲမှာ ရှိတဲ့ လုပ်ငန်းအစီအစဉ်ကတော့ လက်ရှိ မြန်မာပြည်သားတွေ နယ်စပ်ဖြတ်ကျော်ပြီး ဒီမှာ ဆေးလာကုရတဲ့အခြေနေ ရှိတာတို့၊ နောက် ရွှေ့ပြောင်းလူထုတွေရဲ့ လိုအပ်ချက်ရှိတာတို့မှာတော့ ကျမတို့ ဆေးခန်းအနေနဲ့ ၀န်ဆောင်မှုတွေ ဆက်ဆောင်ရွက်ပေးသွားမှာပါ”

ဇွန်လ ၂၆ရက်နေ့ ဆွေးနွေးပွဲကို ဒီမိုကရက်တစ်အင်အားစုတွေ ပါဝင်တဲ့ တပ်ပါင်းစုတခုဖြစ်တဲ့ မြန်မာ နိုင်ငံ ဒီမိုကရက်တစ်အင်အားစု  နဲ့ ကရင်အမျိုးသားအစည်းအရုံး KNU ၊ NLD လွတ်မြောက်နယ်မြေ၊ မယ်တော် ဆေးခန်း နဲ့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ကျောင်းသား တပ်မတော် တိုနဲ့ လည်း ဆွေးနွေးခဲ့ကြပါတယ်။ ကျောင်းသားတပ်မတော် ABSDF ကတော့ ဧပြီလ အတွင်း ၀န်းကြီးဦးအောင်သောင်း နဲ့ အပစ်ရပ်ရေး၊ ဆွေးနွေးဖို့ ရှိပေမဲ့ အစီအစဉ် ပျက်ခဲ့တာကြောင့် အခုမှ ပြန် ဆွေးနွေးခဲ့တာလို့ ဆိုပါတယ်။

ABSDF ဒု-ဥက္ကဋ္ဌ ကိုမျိုးဝင်း ပြောပြတာကတော့

"ပြီးခဲ့တဲ့ကာလမှာ ကျနော်တို့နဲ့ ဦးအောင်သောင်း ဦးဆောင်တဲ့ ငြိမ်းချမ်းရေး ဆွေးနွေးရေး အဖွဲ့တို့ လုပ်ငန်း စဉ်တွေ တွေ့ဆုံ ဆွေးနွေး အဖြေရှာနိုင်ဖို့အတွက် သီးသန့် ဆောင်ရွက် ဖြစ်ခဲ့တာပါ။ အခု ကာလ မှာတော့ အဖွဲ့မှူးပြောင်းပြီးတဲ့နောက်မှာ ဦးအောင်မင်းကလည်းပဲ ဆွေးနွေးရေးအဖွဲ့မှာ ဒု-ဥက္ကဋ္ဌတယောက်အနေနဲ့ တာဝန်ယူလာတယ်ဆိုတဲ့ အခြေခံအပေါ်မှာ တဖွဲ့တည်း ဖြစ်သွားတယ် ဆိုတဲ့ အနေအထားပေါ်မှာ မူတည်ပြီးတော့မှ ပြီးခဲ့တဲ့ကာလ ဆောင်ရွက်မှုတွေအပေါ် အခြေခံပြီး ရှေ့ဆက် ဆောင်ရွက်နိုင်မယ့် နည်းလမ်းတွေကို အမြင်တွေ ဖလှယ်တဲ့ အနေအထားပါ။ သူကတော့ ဒီကနေ့ကာလ တိုင်းပြည်မှာ ဖြစ်နေ တဲ့ ပြဿနာတွေကို ဘယ်လို အဖြေရှာမလဲ၊ ပြီးတော့ အဓိက အခြေခံအားဖြင့်တော့ ကျနော်တို့ ကျောင်းသား တပ်မတော် ABSDF နဲ့ ပတ်သက်ပြီးတော့မှ လက်ရှိ ပြန်လည် အသစ် ဖွဲ့စည်း လိုက်တဲ့ အဖွဲ့အစည်းရဲ့ သဘောထားက ဘယ်လို ရှိလဲ၊ အဲဒီအပေါ်မှာ ပြီးခဲ့တဲ့ ကာလ ဆောင်ရွက်ထား တဲ့ ဆောင်ရွက်မှုတွေကို ဘယ်လို ပုံသဏ္ဍန်နဲ့ ဆက်လက်ပြီး ဘယ်လို ဖော်ဆောင်သွားမလဲ ဆိုတာကို၊ အဓိက နည်းလမ်းပိုင်းဆိုင်ရာတွေ ကျနော်တို့ တင်ပြခဲ့ပါတယ်”

ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒု-ဥက္ကဋ္ဌ မီးရထားဝန်ကြီး ဦးအောင်မင်း ဦးဆောင်တဲ့ အဖွဲ့ဟာ ဇွန်လ ၂၇ ရက်နေ့မှာလည်း မဲတော်ဆေးခန်းကို သွားရောက် လည်ပတ်ဖို့ ရှိတယ် လို့ သိရပြီး ညနေပိုင်းမှာတော့ NLD လွတ်မြောက်နယ်မြေ ၊ KNU တို့ နဲ့ ဆက်လက်ပြီး ဆွေးနွေးမှုတွေ လုပ်နေ ဆဲ ဖြစ်ပါတယ်။

ကချင်ဒုက္ခသည်အရေး တရုတ်ကို HRW ဝေဖန်

By ကျော်ကျော်သိန်း

ဓာတ်ပုံ ဗွီအိုအေ (မြန်မာဌာန)

တိုက်ပွဲများကြောင့် ထွက်ပြေးတိမ်းရှောင်နေကြရသည့် ကချင် စစ်ပြေးဒုက္ခသည်အချို့။

မြန်မာနိုင်ငံ၊ ကချင်ပြည်နယ်ကနေ စစ်ဘေးဒဏ်ကြောင့် ထွက်ပြေးလာကြရတဲ့ ကချင်တိုင်းရင်းသား ဒုက္ခသည် တွေကို တရုတ်အစိုးရက အကာအကွယ်ပေးဖို့နဲ့ သူတို့အတွက် နိုင်ငံတကာ အကူအညီတွေ ပေး ခွင့်ပြုဖို့ နိုင်ငံတကာ လူ့အခွင့် အရေးအဖွဲ့တခုက တရုတ်အစိုးရကို တိုက်တွန်းလိုက်ပါ တယ်။ ဒုက္ခသည်တွေအပေါ် တရုတ်အစိုးရရဲ့ ပြုမူဆက်ဆံပုံဟာ ဒုက္ခသည်များဆိုင်ရာ နိုင်ငံတကာ သဘောတူညီ ချက်ကို ချိုးဖောက်နေတာဖြစ်တယ်လို့လည်း ပြောပါတယ်။ တရုတ်နိုင်ငံက တော့ ဒီစွပ်စွဲချက်တွေ ကို ငြင်းဆန်ပါတယ်။ အပြည့်အစုံကို ကိုကျော်ကျော်သိန်းက ဆက်ပြောပြပါမယ်။

ကချင်ပြည်နယ်ဘက်မှာ ကချင်လွတ်မြောက်ရေးအဖွဲ့ KIA နဲ့ မြန်မာအစိုးရအကြား လွန်ခဲ့တဲ့ တနှစ်ကျော်မှာ တိုက်ပွဲတွေ ပြန်ဖြစ်ခဲ့ကတည်းက ဒေသခံကချင်တိုင်းရင်းသားတွေ အိုးအိမ်စွန့်ခွာ ထွက်ပြေးကြရတာ၊ တရုတ်-မြန်မာ နယ်စပ်ဒေသဘက် ထွက်ပြေး ခိုလှုံကြရတာတွေ ဖြစ်နေတာပါ။ အခုဆိုရင် မြန်မာနိုင်ငံ ထဲမှာတင် ထွက်ပြေးနေကြရသူတွေသာမက တရုတ်နိုင်ငံ၊ ယူနန်ပြည်နယ်ထဲက ဒုက္ခသည်စခန်းတွေမှာ ကချင်ဒုက္ခသည် ၇,၀၀၀ ကနေ ၁၀,၀၀၀ လောက်အထိ ရှိနေပြီး သူတို့ဟာ တကယ့်ကိုဆိုးရွားတဲ့ အခြေအနေ နဲ့ ရင်ဆိုင်နေကြ ရတယ်လို့ လူ့အခွင့်အရေး စောင့်ကြည့်လေ့လာရေးအဖွဲ့ HRW က အာရှဒေသ ဌာနခွဲ၊ ဒုတိယညွှန်ကြားရေးမှူး ဖီလ် ရောဘတ်ဆန် (Phil Robertson) က ဗွီအိုအေကို ပြောပါတယ်။

Phil Robertson ; “သူတို့တွေမှာ အစားအစာက မလုံလောက်၊ သောက်ရေကမပြည့်စုံ၊ သန့်ရှင်းရေးက မကောင်း၊ နေစရာအမိုးအကာတွေလည်း အလုံအလောက်မရှိကြပါဘူး။ သူတို့ဟာ နယ်စပ်တလျှောက် လက်လုပ် ရွက်ဖျင်တဲတွေနဲ့ ဖြစ်သလို နေနေကြရပါတယ်။ ကံမကောင်းစွာပဲ သူတို့အတွက် နိုင်ငံတကာ အသိုင်းအ၀ိုင်းက အကူအညီတွေ ပေးခွင့် မရပါဘူး။ ကုလသမဂ္ဂ ဒုက္ခသည်များ ဆိုင်ရာ မဟာမင်းကြီးရုံး UNHCR နဲ့ နိုင်ငံတကာက အစိုးရမဟုတ်တဲ့ အဖွဲ့အစည်းတွေက ဒုက္ခသည်တွေကို အကူအညီပေးဖို့ တရုတ်အစိုးရက ခွင့်မပြုပါဘူး။ ဒါဟာ တရုတ်အစိုးရက သဘောတူ လက်မှတ်ရေးထိုး ထားတဲ့ ၁၉၅၁ ခုနှစ်၊ ဒုက္ခသည်များ ဆိုင်ရာ သဘောတူညီချက်မှာ ပါတဲ့ ပြဋ္ဌာန်းချက်တွေကို သိသိသာသာ ချိုးဖောက်တာပါပဲ။”

ဒုက္ခသည်တချို့ဆိုရင် အဖမ်းခံရတာ၊ တရုတ်နိုင်ငံထဲ ၀င်ရောက် ခိုလှုံခွင့်မပြုတာ ဒါမှမဟုတ် မြန်မာနိုင်ငံ ထဲက ပဋိပက္ခ ဖြစ်နေတဲ့ ဒေသတွေဆီ အတင်းအကျပ် ပြန်မောင်းထုတ် တာတွေတောင်မှ ခံရတယ်လို့ HRW ရဲ့ အစီရင်ခံစာအသစ်ထဲမှာ ဖော်ပြထားပါတယ်။ HRW အဖွဲ့ရဲ့ ဒီစွပ်စွဲချက်တွေကို တရုတ် နိုင်ငံခြားရေး ၀န်ကြီးဌာနက ငြင်းဆန်ပြီး ဒီလူတွေဟာ ဒုက္ခသည်တွေ မဟုတ်ဘူးလို့ ဆိုပါတယ်။

Hong Lei; “ဒီလို ပြောဆိုတာတွေဟာ မမှန်ပါဘူး။ ဒီနှစ်အတွင်း မြန်မာအစိုးရ စစ်တပ်ဟာ လူနည်းစု လက်နက် ကိုင်အဖွဲ့တွေနဲ့ ကြိုးကြား တိုက်ပွဲတွေ ပုံမှန်လိုဖြစ်ခဲ့ပါတယ်။ လုံခြုံရေးအတွက် မြန်မာနိုင်ငံက တချို့လူတွေဟာ တရုတ်နိုင်ငံထဲ ၀င်လာပြီး မိတ်ဆွေတွေ၊ ဆွေမျိုးသားချင်းတွေဆီမှာ ခိုလှုံ နေထိုင် ခဲ့ကြ ပါတယ်။ အဲဒီလူတွေဟာ ဒုက္ခသည်တွေ မဟုတ်ပါဘူး။ တိုက်ပွဲတွေပြီးတဲ့အခါ သူတို့ဟာ မြန်မာနိုင်ငံထဲ ပြန် သွားကြပါတယ်။ တရုတ်နိုင်ငံထဲမှာ ရှိနေတဲ့အချိန်အတွင်း လူသားချင်း စာနာမှုနဲ့ တရုတ်အစိုးရက သူတို့ကို အကူအညီပေးခဲ့ပါတယ်။”

တရုတ်အစိုးရက လောလောဆည်မှာ ဒုက္ခသည်အတော်များများကို ခိုလှုံခွင့် ပြုထားတဲ့အတွက်တော့ HRW က အသိအမှတ် ပြုပါတယ်။ ဒါပေမဲ့လည်း ဒုက္ခသည်တွေကို ဘာ အကူအညီ အထောက်အပံ့မှ မပေးတဲ့ အတွက်တော့ ဝေဖန် ပြစ်တင်ပါတယ်။

ဒုက္ခသည်တွေဟာ တခါတလေ နိုင်ငံတကာ အကူအညီ အနည်းအကျဉ်းနဲ့ ဒေသတွင်း ကချင် ခရစ်ယာန် ဘုရားကျောင်းတွေရဲ့ အကူအညီတွေကို ကချင် လူမှုအဖွဲ့အစည်းတွေ ကနေတဆင့် ရနေတယ်လို့ ဖီလ် ရောဘတ်ဆန်က ပြောပါတယ်။ ဒါပေမဲ့လည်း နည်းနည်းချင်းပဲ ရနေတာဖြစ်ပြီး ဒုက္ခသည်တွေ လိုအပ်နေသလောက် မရဘူးလို့ ပြောပါတယ်။ အဲဒါကြောင့်လည်း ဒုက္ခသည်တွေကို ထိထိရောက်ရောက် အကူအညီ ပေးနိုင်ဖို့အတွက် တရုတ်အစိုးရကို တိုက်တွန်း တောင်းဆိုတာပါ။

Phil Robertson ; “တရုတ်နိုင်ငံအနေနဲ့ ဒုက္ခသည်တွေကို တိုးချဲ့ပြီးတော့ အကာအကွယ် ပေးသင့်ပါတယ်။ ဒုက္ခသည်တွေဆီ UNHCR ကို သွားခွင့် ပြုသင့်ပါတယ်။ ဒုက္ခသည်တွေကို အကူအညီပေးဖို့ ပြင်ဆင် သင့် ပါတယ်။ ဒုက္ခသည် တွေအပေါ် မတရား သဖြင့် လုပ်နေတာတွေ ရပ်တန့်သွားအောင် လုပ်ဆောင် သင့်ပါ တယ်။”

အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ HRW က အာရှဒေသ ဌာနခွဲ၊ ဒုတိယ ညွှန်ကြားရေးမှူး ဖီလ် ရောဘတ်ဆန် ပါ။

၁၇ နှစ်ကြာ အပစ်အခတ် ရပ်စဲခဲ့ပြီးကာမှ နယ်ခြားစောင့် တပ်ဖွဲ့အဖြစ် အသွင်ပြောင်းရေးအပေါ် သဘော မတူ ခဲ့တာကြောင့် KIA နဲ့ မြန်မာ အစိုးရ စစ်တပ်အကြား တိုက်ပွဲတွေ ပြန်ဖြစ်ခဲ့တာပါ။ တနှစ်ကျော်ကြာ တိုက်ပွဲတွေဖြစ်နေခဲ့တဲ့ အချိန်အတွင်း စစ်ဘေး ဒဏ်သင့် ကချင်တိုင်းရင်းသား ၆၀,၀၀၀ လောက် အထိ ရှိနေပြီ လို့ဆိုပါတယ်။ မြန်မာအစိုးရရဲ့ ငြိမ်းချမ်းရေး ဖော်ဆောင်ရေးအဖွဲ့နဲ့ ကချင်အဖွဲ့တို့ အကြား တွေ့ဆုံ ဆွေးနွေး တာတွေ ရှိခဲ့ပေမဲ့လည်း ခုချိန်ထိတော့ ခိုင်မာတဲ့ သဘောတူညီချက် တခုမှ မရသေးပါဘူး ခင်ဗျား။

ဝန်ကြီး ဦးအောင်မင်း တရက်တည်းနှင့် တွေ့ဆုံဆွေးနွေးမှု ငါးခုလုပ်

ဟင်္သာနီ (မွန်မြေ) | အင်္ဂါနေ့၊ ဇွန်လ ၂၆ ရက် ၂၀၁၂ ခုနှစ် ၂၂ နာရီ ၃၃ မိနစ်

စံခလပူရီ (မဇ္ဈိမ) ။        ။ ပြည်ထောင်စု ငြိမ်းချမ်းရေး ဖော်ဆောင်မှု လုပ်ငန်းကော်မတီ ဒု-ဥက္ကဋ္ဌ မီးရထားဝန်ကြီး ဦးအောင်မင်း ဦးဆောင်သော ကိုယ်စားလှယ်အဖွဲ့သည် ထိုင်းနိုင်ငံ၊ မဲဆောက်မြို့တွင် ဒေါက်တာစင်သီယာမောင်၏ မယ်တော်ဆေးခန်း အပါအဝင် အဖွဲ့အစည်း ငါးခုနှင့် အင်္ဂါနေ့က သီးခြားစီ တွေ့ဆုံဆွေးနွေးခဲ့သည်။

မဲဆောက်မြို့ပြင်ရှိ မယ်တော်ဆေးခန်းသို့ သွားရောက်ကြည့်ရှုခဲ့ပြီးနောက် ဝန်ကြီး ဦးအောင်မင်းနှင့် ဝန်ကြီး ဦးခင်ရီတို့ ဦးဆောင်သည့် ၇ ဦးပါ ကိုယ်စားလှယ်အဖွဲ့သည် Wattana Village Resort တွင် ထိုင်း-မြန်မာ နယ်စပ်ရှိ အတိုက်အခံ အဖွဲ့ လေးခုအား သီးခြားစီ တွေ့ဆုံခဲ့ခြင်း ဖြစ်သည်။ တွေ့ဆုံမှုအများစုမှာ အလွတ်သဘော တွေ့ဆုံခြင်း ဖြစ်ကြောင်း သိရသည်။

ဒေါက်တာနိုင်အောင် ဦးဆောင်သည့် မြန်မာပြည်ဒီမိုကရေစီအဖွဲ့ချုပ် FDB ကိုယ်စားလှယ် အဖွဲ့နှင့် ဦးအောင်မင်းတို့တွေ့ဆုံစဉ် နိုင်ငံရေး တွေ့ဆုံ ဆွေးနွေးရေး ဖြစ်စဉ် ဖြစ်မြောက်ရေး၊ နိုင်ငံရေး အကျဉ်းသား လွတ်မြောက်ရေးနှင့်ပြည်တွင်း ငြိမ်းချမ်းရေး ဖော်ဆောင်ရေး လုပ်ငန်းစဉ်များနှင့် ပတ်သက်၍ အဓိကထား ဆွေးနွေးခဲ့ကြသည်ဟု ဆိုသည်။

“ဒီအချက်တွေက အရင်တခေါက် ဖေဖော်ဝါရီလမှာ ချင်းမိုင်မြို့မှာ တွေ့တုန်းကလည်း ကျနော်တို့ တင်ပြဖူးပါတယ်။ လွှတ်တော်ပြင်ပ တွေ့ဆုံဆွေးနွေးမှုက တဆင့် အခြေခံ ဥပဒေအရ ခွင့်ပြုထားတဲ့ သဘောတူနိုင်တဲ့ အချက်တွေကိုဆွေးနွေးကြဖို့၊ ကျန်တဲ့ အချက်တွေကို လွှတ်တော်မှာ ဆက်လက် တင်ပြဖို့ အဲဒီလုပ်ငန်းစဉ်တွေကို လုပ်ဆောင် နိုင်ဖို့ဆွေးနွေးကြတယ်” ဟု ဒေါက်တာနိုင်အောင် က မဇ္ဈိမကို ပြောသည်။

ပြည်ပရောက် အင်အားစုများအား တိုင်းပြည် ထူထောင်ရေး ကိစ္စရပ်များအား ပြည်တွင်းသို့ ပြန်လာ၍ လုပ်ဆောင်ရန် သမ္မတကြီး ဦးသိန်းစိန်က ဖိတ်ခေါ်ကြောင်း ဦးအောင်မင်းမှ တဆင့် ပြောကြားခဲ့သည်။

မတရားအသင်း ကြေညာခြင်း ခံထားရသည့် အဖွဲ့အစည်းများအား ပြန်လည် လက်ခံဖွယ်ရှိပြီး ရာဇဝတ်ပြစ်မှု ကျူးလွန်သူများ ထိုက်သင့်သည့် ပြစ်ဒဏ် ကျခံစေရန်မှ အခြားသူများအား ကင်းလွတ်ခွင့် ပေးနိုင်မည့် အနေအထား ရှိကြောင်း ဝန်ကြီးအဖွဲ့မှ ဆွေးနွေးခဲ့သည်ဟု ဆိုသည်။

သို့သော် ပြည်တွင်း၌ နိုင်ငံရေး လွတ်လပ်ခွင့် မရှိသေးခြင်း၊ လွှတ်တော်၌ စစ်တပ်မှ ၂၅ ရာခိုင်နှုန်း ရယူထားခြင်း ကိစ္စရပ်၊ ကျန်ရှိနေသည့် နိုင်ငံရေး အကျဉ်းသားများ ကိစ္စရပ်များမှာ ပြည်တွင်းသို့ ပြန်လည်၍ လုပ်ကိုင်ရန်အတွက် အတားအဆီးကြီးအဖြစ် ရှိနေဆဲဖြစ်ကြောင်း FDB မှ တင်ပြခဲ့သည်။

ဆွေးနွေးပွဲတွင် ဦးအောင်မင်းက “ဒေါ်အောင်ဆန်းစုကြည်က ဦးဆောင်ပြီးတော့ ပြောင်းလဲသင့်တဲ့ အပြောင်းအလဲကို လွှတ်တော်ထဲမှာ တင်ပြလာလို့ရှိရင် တပ်မတော်အနေနဲ့ ဖြစ်သင့်ဖြစ်ထိုက်တဲ့ အချက်တွေဆိုရင် ပူးပေါင်း လုပ်ဆောင် သွားမှာပဲပေါ့။ ပြီးခဲ့တဲ့ ကြားဖြတ် ရွေးကောက်ပွဲ တုန်းကလည်း NLD ရွေးကောက်ပွဲ ဝင်နိုင်ဖို့ ဥပဒေတွေကို ပြင်ဆင်တဲ့နေရာမှာလည်း တပ်မတော်က မဲပေးပြီး ထောက်ခံခဲ့တာပဲ” ဟု ပြောကြောင်း ဒေါက်တာနိုင်အောင်က ပြန်လည် ရှင်းပြသည်။

ထို့အတူ NLD-LA မှ ဒေါက်တာအေးကျော် ဦးဆောင်သည့် ငါးဦးပါ ကိုယ်စားလှယ် အဖွဲ့ကလည်း ပြည်တွင်း၌ ဒီမိုကရေစီ လုပ်ငန်းစဉ်များ ပြန်လည် လုပ်ကိုင် နိုင်ရေးနှင့် ပြည်တော် ပြန်နိုင်ရေး ကိစ္စရပ်များအတွက် ညနေ ၄ နာရီ ခွဲခန့်တွင် ဦးအောင်မင်း တို့နှင့် ဆွေးနွေးခဲ့ပြီး NLD-LA အား မတရားအသင်းအဖြစ် ကြေညာထားခြင်း ခံရမှုအား ဖျက်သိမ်းပေးရန် တောင်းဆို တင်ပြခဲ့သည်။

“ဝန်ကြီးတို့ ဘက်ကတော့ အထဲကို ပြန်လာပြီး အထဲမှာ ပြန်လုပ်ဖို့ ပြောပါတယ်။ ကျနော်တို့က ၁၇(၁) တွေ ရှိနေသေး တယ် ဆိုတဲ့အချက်ကို ထောက်ပြပါတယ်။ ဒါကို ဘယ်လို ကျော်ဖြတ်ကြမလဲပေါ့။ သူတို့ဘက်က ပြန်လည် ဖြေကြားတဲ့ အနေအထား ကလည်း အားရစရာ ကောင်းပါတယ်။ ဒီကိစ္စတွေကို ဥပဒေနဲ့အညီ ရှင်းလင်း ဆောင်ရွက် သွားမယ်၊နောက်ဆုံး သမ္မတကြီးဆီ တင်ပြသွားပြီးတော့မှ ပြန်လာလို့ ရအောင် စီစဉ် ဆောင်ရွက်ပေးမယ်လို့ ပြောသွားတယ်” ဟု NLD-LA ခေါင်းဆောင် ဦးမြင့်သိန်း က မဇ္ဈိမကို ပြောသည်။

ထို့ပြင် ကချင်စစ်ပွဲ ရပ်ဆိုင်းရေးနှင့် တိုင်းရင်းသားရေးရာ ကိစ္စရပ်များ၊ အမျိုးသား ပြန်လည် ရင်ကြားစေ့ရေး၊ ငြိမ်းချမ်းရေးနှင့် ဒီမိုကရေစီ လုပ်ငန်းစဉ်များ နှစ်ဦးနှစ်ဖက် ပူးပေါင်း ဆောင်ရွက်နိုင်ရေး ဆွေးနွေးခဲ့ကြသည်။

ABSDF အဖွဲ့နှင့် ဦးအောင်မင်းတို့ တွေ့ဆုံပွဲမှာမူ အမြင်ဖလှယ်သည့် အလွတ်သဘော တွေ့ဆုံမှုသာ ဖြစ်ကြောင်းနှင့် တင်ပြတောင်းဆိုမှု မရှိကြောင်း ABSDF ၏ ဒုဥက္ကဋ္ဌ ရဲဘော်မျိုးဝင်း က ပြောသည်။

“ကျနော်တို့ ဝန်ကြီးကို နှုတ်ဆက်တယ်။ အမြင်ချင်း ဖလှယ်ကြတဲ့ အဆင့်လောက်ပါပဲ။ ထွေထွေထူးထူး တင်ပြပြီး ဆုံးဖြတ် သဘောတူကြတာတော့ မရှိပါဘူး” ဟု မဇ္ဈိမကို ပြောသည်။