အကိုပြောပြတဲ့ အမေ့အကြောင်း
မင်းငယ်ငယ်က
ကျောမှာဘုကြီးတွေ အဆက်မပြတ်ပေါက်လို့
ထိုင်မဟုတ် အိပ်မဟုတ်နဲ့
ကျော်ဖြတ်ခဲ့ရတဲ့ ညပေါင်းများစွာ မင်းမှတ်မိလား …
မင်းကိုမွေးပြီး
နို့မထွက်တော့တဲ့ အမေက
ကုလားခြင်းဆွဲနို့ဆီကို
ဝေးဝေးတစ်ခါ သွားဝယ်ပေးခဲ့ရတာတွေ၊
တစ်လုံး တစ်ကျပ်ဆယ့်ငါးပြားပေမဲ့
ဖြစ်အောင်စီမံခဲ့တဲ့ အမေ့စိတ်ဓါတ်နဲ့ သတ္တိက
တကယ့်စံပြ ညီလေး …
မင်းညဘက် အိပ်ပျော်နေတာကို ကြည့်ပြီး
ကောက်ကြောင်းပန်းချှီဆွဲခဲ့တဲ့
ငါ့ ပန်းချီခတ်ညံ့ညံ့ကို
တူလွန်းလို့ဆိုပြီး
ကြံဖန်ချီးကျူးခဲ့တာ မမေ့ဘူးကွာ။
မင်းက အဖေနဲ့တူတယ်လေကွာ
အမေက အကိုဆွဲတဲ့မင်းပုံဟာ
တို့အဖေနဲ့ တူလွန်းလို့ တဲ့ …
အမေနဲ့အကိုက
လက်တွဲခဲ့ရတယ်လေကွာ …
မင်းတို့ငယ်ငယ်
ကြိုးကြာကွင်း၊ စန်းကလေး
ညောင်လေးပင်ပတ်ပတ်လည်က ရွာတွေမှာ
ဆန်နဲ့ ဟင်းသီဟင်းရွက်
ရောင်းတစ်ဝက်၊ လဲတစ်ဝက်လုပ်ခဲ့တုံးက
အကိုကအမေ့ အရံအင်အား … ။
ပေါ်ထွန်းမြိုင်
0 comments:
Post a Comment