မြန်မာနိုင်ငံရောက် အမေရိကန်ရုပ်ရှင်အဖွဲ့

သရ၀ဏ် (ပြည်)

        ရုပ်ရှင်အဖွဲ့သည် မန္တလေးတွင် ရိုက်ကူးကြသည်။ သံယာများ ဆွမ်းခံကြွ လာသည်ကို ရုပ်ရှင်ရိုက်ချင်သည်ဆိုသဖြင့် အမရပူရမြှို့ မဟာဂနာရုံကျောင်းသို့ ခေါ်ဆောင်လာခဲ့ပေသည်။ မဟာဂန္ဒာရုံကျောင်းတွင် စာသင်သား သံယာတော် (၈၀၀)မှ (၁၀၀၀)ခန့်် အမြဲရှိတတ်သည့်အပြင် တိုးရစ်(စ်)များ လာရောက် လေ့လာလည်ပတ် ဓာတ်ပုံရိုက်နေကျ ဖြစ်၍ မဟာဂန္ဒာရုံသို့ အမေရိကန်ရုပ်ရှင်သမား (၇)ယောက်ကို ခေါ်ဆောင်လာခဲ့ခြင်း ဖြစ်ပါသည်။ ထို့နေ့မှာ ၂၀၀၈ခု၊ နိုဝင်ဘာ(၈)ရက်နေ့ ဖြစ်သည်။

        မဟာဂန္ဒာရုံကျောင်းတိုက်တွင် နေ့ဆွမ်းအလှူရှင်ရှိ်လျှင် သံယာတော်များ ဆွမ်းစားချိန်မှာ နံနက်(၁၀ါ်၁၅)ဖြစ်၍ ဆွမ်းကျွေးအလှူရှင် မရှိပါက ဆွမ်းစားကျောင်းသို့ကြွလာသော အချိန်မှာ နံနက်(၁၀း၃၀)ဖြစ်သည်။ ဒါကို ဧည့်လမ်းညွှန်တော်တော်များမျာ သိကြသည်။ ကျွန်တော်တို့အဖွဲ့သည် နံနက်(၉)နာရီခန့်တွက် ဘုန်းတောင်ကြီးကျောင်းသို့ ရောက်လာခဲ့ကြ၏။ အတန်ငယ် စောနေသည်ဟု ထင်ရသော်လည်း ရုပ်ရှင်ရိုက်ကူးရသည်မှာ ဓာတ်ပုံရိုက်သလို၊ ဗီဒီယိုရိုက်သလို ချက်ချင် ကောက်ကာငင်ကာ ရိုက်ကူး၍မရ။ ကင်မရာဆင်ခြင်း၊ နေရာရွေးခြင်း၊ ထရော်လီဆင်ခြင်း၊ ligiting ချိန်ခြင်း၊ စသည်ဖြင့် ဗာဟီရများလှသဖြင့် ကြိုတင်လာရောက်ရခြင်းဖြစ်သည်။ ကျောင်းဝင်းအတွင်း နေရာအနေအထားကို ကျွန်တော်က ရှင်းပြရသည်။
         "ဒီလမ်းပေါ်မှာ သံယာတော်တွေ တန်းစီရပ်ပြီး နေရာယူမယ်။ သံချောင်းခေါက်လိုက်တဲ့အခါ ဟောဟိုက ဆွမ်းစားဆောင်ထဲကို တစ်ပါးပြီးတစ်ပါး ကြွသွားမယ်။ အသင့်ပြင်ထားတဲ့ စားပွဲဝိုင်းတွေမှာ သူ့အစီအစဉ်အတိုင်း ၀င်ထိုင်ပြီး ဆွမ်းဘုဉ်းပေးကြမယ်။ တန်းစီတဲ့အခါမှာရော ဆွမ်းဘုဉ်းပေးတ့အခါမှာရော စကားမပြောဘဲ တိတ်တိတ်ဆိတ်ဆိတ် တရားနဲ့အညီ ကြည်ညိုဖွယ်ရာ ဆွမ်းဘုဉ်းပေးကြတယ်"
          "ဒါဆို တိုးရစ် တွေက ဘယ်နေရာမှာ နေကြသလဲ"
          ဒါရိုက်တာ Ronald Fricke က သူသိချင်သော အဓိက မေးခွန်းကိုမေးသည်။ ဖြစ်နိုင်လျှင် သူက ရုပ်ရှင်ထဲတွင်  တိုးရစ်များကို မပါစေလို။ တိုးရစ်များသာ မဟုတ်၊ ဇာတ်လမ်းနှင့်မသက်ဆိုင်သော ဘယ်သူ့ကိုမျှ ကင်မရာဘောင်ထဲမရှိစေချင်။ ဒါကြောင့် ဒီမေးခွန်းကိုမေးခြင်းဖြစ်သည်။
          "တိုးရစ်တွေက ဆွမ်းစားကျောင်းဝင်း အ၀င်ဝကနေ စုံပြုံရပ်နေပြီး သံယာတော်တွေဘက်ကို မျက်နှာမူလို့ ဓာတ်ပုံရိုက်ကြပါတယ်။ တချို့ကလည်း ဆွမ်းစားကျောင်းရှေ့မှာရှိတဲ့ ကျောင်းဆောင်အပေါ်ထပ် ၀ရန်တာကနေ ဓာတ်ပုံတက်ရိုက်ကြတာလည်း ရှိပါတယ်"
         "သံယာတော်တွေ ရပ်နေတဲ့ လမ်းမမှာရော တိုးရစ်တွေ အသွားအလာရှိလား"
         " ရှိတယ်လို့ ပြောရမယ် ဓာတ်ပုံရိုက်ဖို့တော့ မဟုတ်ဘူး။ ဒါပေမဲ့ နောက်ကျမှရောက်လာတဲ့ တိုးရစ်က ခပ် သူတ်သုတ် လျှောက်လာတာ။ ကင်မရာ မေ့ကျန်ခဲ့လို့ ကားထဲကိုပြေးယူတာ စသည်ဖြင့် တိုးရစ် အသွားအလာ ကတော့ ရှိနေမယ် "
          "အဲ့ဒီတော့ ငါတို့ရုပ်ရှင်ရိုက်နေတဲ့ အချိန်မှာ တိုးရစ်တွေ ဖြတ်သွားဖြတ်လာ မလုပ်အောင် မင်းတာဝန်ယူပြီး တားပေးနိုင်မလား"
            " ကြိုးစားပေးပါမယ်၊ ဒါပေမဲ့ အာမတော့မခံနိုင်ပါဘူး"
             "အာမ မခံနိုင်လို့ မဖြစ်ဘူး၊ ၁၀၀ရာခိုင်နှုန်း သေချာချင်တယ်"ဟု အမေရိကန် ရုပ်ရှင်အဖွဲ့တွင် အကြံပေးယောင်ယောင်၊ မြန်မာနိုင်ငံဆိုင်ရာ ကျွမ်းကျင်သူယောင်ယောင်နှင့် ကပ်လိုက်လာသော ဤအဖွဲ့၏ တစ်ဦးတည်းသော အင်္ဂလိပ်လူမျိုး မိုက်ကယ်ဖရီးမန်း က ၀င်၍ ဆရာလုပ်၏။ သူက မြန်မာပြည်သို့ ယခင်တစ်ခေါက် ရောက်ဖူးသည်ဟု ဆိုသည်။
            " ၁၀၀ ရာခိုင်နှုန်း သေချာလို့မရဘူး၊ ဒါက ဘုန်းကြီးကျောင်း၊ ရုပ်ရှင်စတူဒီယိုမဟုတ်ဘူး တိုးရစ်တွေကို ဒီလမ်းက ဖြတ်မလျှောက်ပါနဲ့လို့ ငါတားလို့မရဘူး" ဟု ကျွန်တော်က ပြောလိုက်သည်။
               "ဒါဆို ဘယ်လိုလုပ်ကြမလဲ"
           ဟု ဒါရိုက်တာ ရော်နယ်က ပြေပြေလည်လည် မေးသည်။
                "အပြင်မှာကတော့ လူအုပ်က ရှုပ်ယှက်ခတ်နေတော့ ထိန်းရတာခက်တယ်၊ ဆွမ်းစားဆောင်ထဲကိုဝင်ပြီး သံယာတွေ ဆွမ်းဘုဉ်းပေးတာကို အင်ဒိုး(indoor) အေးဆေး ရိုက်ချင်ရင်တော့ ဆရာတော်ကို သွားလျှောက်ပြီး အပြင်လူမ၀င်အောင် ငါထိန်းပေးမယ်"
                 "အေး... အဲ့ဒါကောင်းတယ်၊ ကဲ ပစ္စည်းတွေ အားလုံးချဟေ့၊ အင်ဒိုးရိုက်မယ်" ဒါရိုက်တာ၏ စကားအဆုံးတွင် ရုပ်ရှင်အဖွဲ့သားများ လှုပ်လှုပ်ရှားရှား ဖြစ်သွားကြသည်။ ဟိုက်အေ(စ်) ကားနှစ်စီး အပြည့်ပါလာသော ရုပ်ရှင်ပစ္စည်းများကို ကားပေါ်မှ လိုရာရွေး၍ ခေါက်တို့ခေါက်ပြန် သယ်ကြ၏။ ထရိုင်ပေါ့ဒ်  ခေါ် သုံးချောင်းထောက် ကင်မရာ ခြေထောက်ကြီးကို ပခုံးပေါ်သို့ ထမ်းကာ သယ်သူက သယ်ကြ၏။ ဘတ်ထရီအိုးများကျု မ. သူ က မ ၊ ထရော်လီသံချောင်းကို ယူသူ ကယူဖြင့် အလုပ်များသွားကြသည်။
             ဒါရိုက်တာက ကျွန်တော်နှင့်အတူ ဆွမ်းစားကျောင်းဆောင်ထဲသို့ လိုက်လာ၏။ ဆွမ်းစားကျောင်းဆောင်အတွင်း အလင်းရောင်နည်းသဖြင့် ကျေနပ်ဟန်မတူ။ သူ့လက်ထဲတွက် ကိုင်ထားသော အလင်းရောင်တိုင်း ကိရိယာလေးကို တဖျပ်ဖျပ်နှိပ်၍ အလင်းရောင် အနည်းအများကို တိတိကျကျ တိုင်းတာနေသည်။ သံယာတော်များ ဆွမ်းစားရန် ပြင်ဆင်ထားသော အဆောင်မှာ သာမာန်အချိန်တွင် အလင်းရောင် လုံလောက်မျှတသော်လည်း ရုပ်ရှင်ရိုက်ကူးရန်အတွက်မူ (သူတို့က မီးမထိုး၊ မှန်မထိုးဘဲ ရိုက်ကူးကြခြင်းဖြစ်သည်။) အနည်းငယ် မှောင်နေသည်ကား အမှန်ပင်ဖြစ်သည်။ ဒါရိုက်တာက လေသံပျော့ပျောဖြင့်...
             " ငါ တစ်ခုလောက် တောင်းပန်ပါရစေ။ ဒီဆွမ်းစားဆောင်က အလင်းရောင်နည်းတယ်၊ ရုပ်ရှင်မှာဆို ပုံကောင်းထွက်မှာ မဟုတ်ဘူး။ မည်းနေလိမ့်မယ်။ ဟိုဘက် က အဆောင် က အလင်းရောင်  ပိုကောင်းတယ်။ အဲ့ဒီမှာ ပြောင်းပြီးဆွမ်းစားလို့များ ရမလား၊ ကူညီပြီးပြောပေးပါဦး၊ ဒီမြင်ကွင်းကို ငါ လက်မလွတ်ဘဲ ရိုက်ချင်လို့ပါ"
           ထုံးစံအတိုင်း ပြောပေးပါ့မယ်၊ ဒါပေမဲ့ ရမရ အာမမခံပါဘူး ဟူသော စကားခံဖြင့် ထိုအလုပ်ကို လက်ခံကာ ဆရာတော်ကို သွားဖူးရ၏။ ကံကောင်းထောက်မစွာပင် ကျွန်တော်နှင့် ရင်းနှီးကျွမ်းဝင်သော တိုက်အုပ်ဆရာတော်  အရှင် ကေလာသ နှင့် သွားတွေ့၏။ ထိုဆရာတော်က စာပေ၀ါသနာပါသည်။ အရှင်ကေလာသ ( Ashin Kelasa) အမည်ဖြင့် ဗုဒ္ဓတရားတော်ကို အင်္ဂလိပ်၊ မြန်မာ ဘာသာများဖြင့် ရေးသားပြုစုနေသူ ဖြစ်သည်။ သူရေးသော "Buddhist Thought In World Situations Today" စာအုပ်မှာ ထင်ရှားသည်။
             ဆရာတော်က ကျွန်တော်တို့၏ ဖြစ်အင်ကို ကြားတော့ "ကောင်းပြီ ဒါကာကြီး၊ သံယာတော်တွေကို ဟိုဘက် ဆွမ်းစားဆောင်ကို ပြောင်းပြီး ဆွမ်းဘုဉ်းခိုင်းလိုက်ပါ့မယ်။ ဒါပေမဲ့ ဒါကာကြီးတို့အဖွဲ့က တရားဝင်ခွင့်ပြုချက်နဲ့ ဟုတ်ရဲ့လား၊ မဟုတ်ရင်တော့ ဘုန်းဘုန်းတို့ လက်မခံပါဘူး"
           " တရားဝင် လာရောက်ရိုက်ကူးတဲ့ ရုပ်ရှင်အဖွဲ့ပါဘုရား၊ ဟောဒီမှာ သက်ဆိုင်ရာက ပေးလိုက်တဲ့ ခွင့်ပြုမိန့်စာပါ ဘုရား၊ ပြန်ကြားရေးဝန်ကြီးဌာန ရုပ်ရှင်လုပ်ငန်းက ဒုညွှန်မှူး ဦးကျော်အုန်းသန်း ကိုယ်တိုင် တပည့်တော်တို့နဲ့ အတူ ပါလာပါတယ်"
          "အိမ်း ဒါဆို လွတ်လွတ်လတ်လတ် ရိုက်ကူးကြကွဲ့၊ တိုးရစ်တွေ ဆွမ်းစားဆောင်ထဲ မ၀င်အောင်တော့ ဘုန်းဘုန်းတို့ မေတ္တာရပ်ခံပေးပါ့မယ်"
         ဤသို့ဖြင့် ကမ္ဘာပေါ်တွင် ဤသို့ တစ်စု တစ်ဝေး ဖူးမြော်ခွင့်ရရန် အလွန်မြင်ရခဲသွားပြီဖြစ်သော ထေရ၀ါဒ၊့် ဗုဒ္ဓဘာသာ ရဟန်းတော်များ ထောင်နှင့်ချီ၍ ကြည်ညိုဖွယ် ဆွမ်းဘုဉ်းပေးနေကြပုံကို ရုပ်ရှင်အဖွဲ့မှ အစအဆုံး တစ်နာရီခန့်ကြာအောင် ဆက်တိုက်ရိုက်ကူးပါသည်။ ရုပ်ရှင်ရိုက်ကူးပြီးတော့ အဖွဲ့ခေါင်းဆောင် ထုတ်လုပ်သူက ဘုန်းကြီးကျောင်းကို ငွေလှူချင်သည် ဆိုသဖြင့် အလှူခံဌာန သို့ လိုက်ပို့ရ၏။ အမေရိကန် ပရိုဂျူဆာက့် ဗုဒ္ဓဘာသာ ဘုန်းကြီးကျောင်းအတွက် ဒေါ်လာ တစ်ရာ လှူဒါန်းသွား၍ သာဓုခေါ်ရ၏။
       နောက်တနေ့နံနက်တွင် ကျွန်တော်က မန္တလေး မဟာမုနိ အနီးရှိ ကျောက်ဆစ်တန်းကို လိုက်ပို့မည်။ ခင်ဗျားတို့ ရုပ်ရှင်ရိုက်၍ အလွန်ကောင်းသည်ဆိုတော့ ထုံးစံအတိုင်း အကြံပေးဆိုသော အင်္ဂလိပ် က ဖျက်သည်။
       ကောင်းပြီ ဒါဆိုဘယ်သွားမလဲဆိုတော့ မဟာဂန္ဒာရုံသို့ ပြန်သွားမည်။ တိုးရစ်ပါချင်ပါ ပစေတော့၊ သံယာတော်များ ဆွမ်းစားဆောင်သို့ ကြွချီလာပုံကို ပြန်ရိုက်ချင်သည်ဟု ဆို လာပြန်သည်။ ထို့ကြောင့် ကားဆရာကို ဂန္ဒာရုံသို့မောင်းခိုင်းရသည်။ သိပ်တော့မကြာလိုက်။
            "ဟိုး ..... ရပ်ပါဦး ၊ ဟိုမှာတွေ့ပြီ"
              စသည်ဖြင့် အော်သံများ ထွက်လာသဖြင့် ကြည့်လိုက်ရာ အခြားမဟုတ်၊ ကျောက်ဆစ်တန်းအလွန် လမ်းဘေးတစ်နေရာတွင် လူတစ်ရပ်သာသာရှိသော ထိုင်တော်မူ စကျင့် ဗုဒ္ဓရုပ်ပွားတော် တစ်ဆူကို အမျိုးသမီးသုံးယောက် က ကျောက်မုန့်များဖြင့် အချောသတ် ပွတ်တိုက်နေကြခြင်းပင်တည်း။
               " အဲ့ဒါကို ရိုက်မယ် အဲ့ဒါကိုရိုက်မယ်"
           ဟု ဒါရိုက်တာ က အငမ်းမရ ပြောကာ ရုပ်ရှင်ပစ္စည်းများကို ချ၍ရိုက်လေတော့သည်။ ကျွန်တော်က ပရိုဂျုဆာကို လက်ကုတ်၍...
             "ကျွန်တော်နှင့် ငါးမိနစ်လောက်ပဲ ခဏလိုက်ခဲ့ပါ ပြစရာ ရှိလို့ပါ" ဟု မရ မက ခေါ်တော ရုပ်ရှင်ထုတ်လုပ်ရေး Mr.Magidson က စိတ်မပါ့တပါဖြင့် လိုက်လာသည်။ ကျွန်တော်တို့ကား ကျောက်ဆစ်တန်းထဲ ကွေ့ဝင်လိုက်သည်နှင့် တွေ့ရသော မြင်ကွင်းကြောင့်  မစ္စတာ မက်ဂစ်ဆင် သည်...
              "အိုး မိုင်း ဂေါဒ်"
            " သွားမယ် သွားမယ် ဒါရိုက်တာကို သွားခေါ်မယ် ဒီမှာရိုက်ရမယ်"  ဟု ပျာယီးပျာယာ ဆို၏။
 အနောက်တိုင်းသားများက မျက်စိဖြင့် မြင်မှယုံတတ်သူ များမို့ လက်တွေ့ပြလိုက်ရခြင်းအတွက် အားရလှပေ၏။
              ကျွန်တော် သွားမည်ဆိုတုန်းက မကြည့်ချင်ဘူးဆိုသော ကျောက်ဆစ်တန်းကို တကယ်ပြလိုက်သောအခါ ဘယ်လောက်တောင် စိတ်ဝင်စားသွားသလဲဆိုလျှင် လက်ထောက်ကင်မရာမင်းနှင့် အထွေထွေလုပ်သားတစ်ယောက်ကို လေယာဉ်လက်မှတ်အဆုံးခံကာ မန္တလေးတွင်ထားခဲ့၍ ကျွန်တော်တို့အားလုံး ထိုနေ့ညနေက ပုဂံသို့ထွက်ခွာလာကြသည်အထိပင် မန္တလေးကျောက်ဆစ်တန်း ဆွဲဆောင်မှုရှိခဲ့လေသည်။ ဒါရိုက်တာက-
             "လေးပေလောက်ရှိတဲ့ ထိုင်တော်မူ့် ဗုဒ္ဓဆင်းတု တစ်ဆူကို ပုံကြမ်းကနေ မျက်နှာတော်ပေါ်လာပြီး အချောသတ်တဲ့အထိ ငါတို့ရိုက်ချင်တယ်။ အဲ့ဒါ ဘယ်လောက်ကြာအောင် ပန်းပုဆရာက ထွင်းထုရမလဲ၊ မျက်နှာကို ထွင်းထုတာ အစအဆုံး ရိုက်ချင်တယ်။ ရိုက်မှာက ရိုးရိုးကင်မရာ မဟုတ်ဘူး။ Time Lapseလို့ ခေါ်တဲ့ ရိုက်နည်းနဲ့ ရိုက်မယ်၊ အဲ့ဒါက တစ်မိနစ်မှ ရှပ်တာ တစ်ခါပဲဖွင့်မယ်၊ ပိတ်ကားပေါ်မှာ ပြန်ပြတော့ ဗီဒီယိုမှာ ရစ်ပြီး ကြည့်သလို အမြန်မြင်ရတာမျိုးပဲ" ဟုပြောသည်။
            ကျွန်တော်တို့ဆီမှ ရုပ်ရှင်သမားများကတော့ ထိုနည်းကို  Jump Motion ဟု ခေါ်သည်။( Slow Motion:
ကို အားကျ၍ ထင်သည်။
            ကျောက်ဆစ်သမားလေးကို ကျွန်တော်က ညှိပေးရသည်။
            "ညီလေး  ကိုယ်လုံးတော်ထွင်းပြီး ထုပြီးသား မျက်နှာချည်းပဲ အချောဖြစ်တဲ့အထိ ထုမယ်ဆိုရင် အချိန် ဘယ်လောက်ယူရမလဲ"
            "သုံးနာရီလောက်တော့ ကြာမယ် အစ်ကို"
              "ထုခ ဘယ်လောက်ယူမလဲ"
              "နှစ်ယောက် ထုရမှာဆိုတော့ ခြောက်သောင်း လောက်ပေးပါအစ်ကို၊ ကျွန်တော်တို့ မီးစက်လဲ ငှားရဦးမယ်"
                "ခြောက်သောင်းမဟုတ်ဘူး၊ ခင်ဗျားတို့ သေချာလုပ်ပေး၊ တစ်သိန်းရအောင် ကျွန်တော် တောင်းပေးမယ်၊ ပြီးသွားရင် အဲ့ဒီ့် ဗုဒ္ဓရုပ်ပွားတော်ကိုလည်း ကျွန်တော်တို့မယူဘူး၊ ထားခဲ့မှာ။ ဒါပေမဲ့ စထု တာက နေပြီးတဲ့အထိ ရုပ်ရှင်ကင်မရာ ထောင်ပြီး ဆက်တိုက်ရိုက်မှာဆိုတော့ ဆက်တိုက်လုပ်ရမယ်။ ကျွန်တော်တို့ကလည်း မနေနိုင်ဘူး၊ အခုပဲ လေဆိပ်ဆင်းရတော့မယ်။ နိုင်ငံခြားသား နှစ်ယောက် ထားခဲ့မယ်။ ပြီးတာနဲ့ သူတို့ ပိုက်ဆံပေးမယ်။ အလင်းရောင်ရှိတုန်း ရိုက်လို့ရအောင် အလုပ် လုပ်ပေးပါ။ အလုပ် လုပ်နေရင်း လက်ဖက်ရည်ဆိုင် သွားထိုင် တာတို့  ကွမ်းယာ ၀ယ်တာတို့မလုပ်ပါနဲ့ ယုတ်စွအဆုံး အိမ်သာ တောင် အပြီးတက်ထားပါ"
              ဤသို့ဖြင့်် ဗုဒ္ဓဆင်းတုတော်၏ မျက်နှာတော်သည် ပုံကြမ်းမှာ ပုံချောဖြစ်လာပုံကို မှတ်တမ်းတင် ရုပ်ရှင်ရိုက်ကြပါသည်။ ထွင်းထုချိန် (ရိုက်ကူးချိန်) သုံးနာရီကြာပြီး ပြသချိန် တစ်မိနစ်ခန့်ပဲ ရှိလေသည်။ တနည်းအားဖြင့် ပိတ်ကားပေါ်တွင် တစ်မိနစ်မျှ မြင်ရမည့် မြင်ကွင်းကို အချိန် သုံးနာရီ (ပြင်ဆင်ချိန် တစ်နာရီ) ပေါင်း အချိန်လေးနာရီ ပေး၍ ၀ယ်ပြီးသား လေယာဉ်လက်မှတ်  (မန္တလေး-ပုဂံ) နှစ်ယောက် အဆုံးခံ၍ အချိန်ကုန်ငွေကုန်ခံကာ ရိုက်ကူးခြင်းအားဖြင့် သူတို့အလုပ်အပေါ် ဖြစ်ကတတ်ဆန်း မလုပ် ဘယ်လောက် အလေးအနက်ထားလဲ ပေါ်လွင်နေပါတော့သည်
                                        ရုပ်ရှင်တေးကဗျာ မဂ္ဂဇင်း ဧပြီလ ။၂၀၀၉ ခုနှစ်
---------------------------------------------------------------------------------------------------------------------------------------------------
ဒီဆောင်းပါလေး ဖတ် ဖူးတာ လွန်ခဲ့တဲ့  ၂၀၀၉ လောက် က ..ခုမှ စာအုပ် ကို ပြန်ရှာတွေ့လို့ ပြန်ရှဲ လို တာနဲ့ အချိန်ပေး စာစီပြီး တင်ဖြစ်ပါတယ်..  အလုပ် တစ်ခု ကို သေချာ စူးစိုက်လုပ်တတ်တဲ့ သူတို့အလုပ် လုပ်ပုံ က ကျွန်မ လို ငပျင်းအတွက် နမူနာယူစရာတွေ အများကြီးရပါတယ်..   ကိုယ်တိုင်တောင် သိပ် မသိတဲ့ တန်ဖိုးထားစရာ ရိုးရာအမွေအနှစ် လက်မှုပညာနဲ့ သူများက လာ တန်ဖိုးထားမှ တန်ဖိုးရှိမှန်း သတိရမိတဲ့ (ကိုယ်တိုင် အပါအ၀င်)  မြန်မာတစ်ယောက် အနေနဲ့ အနည်းငယ်တော့ ရှက်ပါတယ်.. (ဆင်ခြေက တော့ ကျွန်မ မန္တ္တလေးသူ မဟုတ်ပါဘူးပေါ့) မဆိုင်ပါဘူး.နော်. နောက် တစ်ခု က  ၄-၅ ရက်ကိုဗီဒီယို တစ်ကားအ ပြီးရိုက်နိုင်ကြတဲ့ မြန်မာ ဒါရိုက်တာတွေရဲ့ အစွမ်းကို လဲ အံ့သြမိပါရဲ့( ရှက်ရှက်နဲ့ပဲ)  အနုပညာ  ကို ပုံဖော်သူ လား  အနု ပညာကြေးကို ပုံဖော်သူလား... အားလုံးကို မဆိုလိုပါဘူး..မြန်မာပြည်မှာ မင်းသား မင်းသမီး မပါပဲ ကမ္ဘာကျော်အောင် ရိုက်ပြနိုင်တဲ့ အဖိုးတန် ယဉ်ကျေးမှု သဘာဝရှုခင်းနဲ့ နေရာတွေ အများကြီးပါ..ဒါရိုက်တာ အောင် ကိုလတ် ရိုက် ကူးပြီးလက်စ ကယန်းအလှ ဇာတ်ကား လိုမျိုးပေါ့..မင်းသမီး မင်းသား မပါပဲ တိုင်းရင်းသားတွေကို main actor  တည်ပြီး သေချာ ရိုက်တယ်လို့ ဖတ်ရပါတယ်..ဒီဇာတ်ကား ကို ဘယ်တော့ကြည့်ရမလဲတော့  မျှော်လင့်မိပါတယ်.. ။
        စကားမစပ် ဒါရိုက်တာ အောင် ကိုလတ်ကို ကွန်ဂရက်ကျူလေးရှင်း ပါ..