ရှုံးသူ
|
7:46 AM |
No မှတ်ချက် |
- Published on Sunday, 08 September 2013 11:20
- Written by အောင်စံဖြိုး
(၁)
"မိစု လောကမှာ အမှားမရှိတဲ့သူ၊ အရှုံးနဲ့ရင်မဆိုင်ရတဲ့လူရှိမယ်လို့ ညည်းထင်သလားဟင်"
"မှတ်ထား"
"အမှတ်မရှိတဲ့လူဟာ အမှန်လည်းမရှိနိုင်ဘူး။
အရှုံးမရှိဘူးဆိုတဲ့လူဟာ အောင်မြင်မှုလည်း မရှိနိုင်ဘူး"
"ခု အရေးကြီးတာက မှားပြီးရင်းထပ်မမှားဖို့၊ ရှုံးနိမ့်ပြီးရင်း အောင်မြင်မှုလမ်းကို တွေ့အောင်ရှာဖို့ပဲ မဟုတ်လား သမီးရယ်"
* * * * *
"ပြဿနာတော့ပေါ်နေပြီ ဆရာရေ့"
ကျောင်းရောက်မှ ထိုင်မည်မကြံရသေး၊ ဒသမတန်း အတန်းပိုင်ဆရာမတစ်ဦးက ဆီးပြောလေသည်။
ကျောင်းဆိုသည်က
ပြဿနာတစ်ခုမဟုတ် တစ်ခုကတော့ တစ်နေရာရာက ပေါ်လာစမြဲ ဖြစ်သည်။ ထို့ကြောင့်
"ပြဿနာ" ဟူသော အသံကြားရုံမျှနှင့် ငယ်စဉ်ကလို ထိတ်ထိတ်ပျာပျာ မဖြစ်တော့။
"ဆိုပါဦး၊ ဘာများပါလိမ့်"
"ဆရာ့တပည့်လေ၊ ဆရာတပည့်"
"ဘယ်သူလဲ"
"စုစုလေ"
စုစုသည် ကျွန်တော့်
နဝမတန်း (က) မှ နှစ်ကျကျောင်းသူတစ်ဦး ဖြစ်သည်။ စုစုသည် အေးလွန်း၍
အတန်းထဲတွင် သူရှိလို့ ရှိမှန်းတောင်မသိရသူတစ်ဦး။ စုစုက ဘာပြဿနာပေါ်ရသနည်း။
"စုစု ဘာဖြစ်လို့လဲ"
"စုစုနှစ်ကျတယ်မဟုတ်လား"
"အင်း"
"အဲဒါ ကျွန်မကိုင်တဲ့ ဆယ်တန်းအေမှာ လာထိုင်နေတယ် ဆရာရဲ့။ ကျွန်မက သူ့အတန်းကိုပြန်ဖို့ပြော တော့ ဘာပြောတယ်မှတ်လဲ"
"အင်း"
"သူအောင်တယ်တဲ့။ ဒါသူ့အတန်းတဲ့။ စိတ်မကောင်းဘူးလားမသိဘူး။"
"ဟောဗျ"
ကျွန်တော်ခေါင်းကုတ်မိသည်။ ဘာပြောရမှန်း၊ ဘာလုပ်ရမှန်းမသိ။
ဟုတ်သည်။ ပြဿနာပေါ်ပြီ။ မထင်မှတ်သောနေရာမှ ထင်မှတ်မထားသည့် ပုံသဏ္ဌာန်ဖြင့် ပေါ်လာ သော ပြဿနာ။
စုစုဘာကြောင့် ဤသို့ဖြစ်ရသနည်း။
စုစုသည်
သာမန်အားဖြင့် ပုံမှန်ပင်ဖြစ်သည်။ သို့သော် တစ်ခုထူးခြားသည်မှာ
အမှားမကြိုက်ခြင်း ဖြစ် လေသည်။ လေ့ကျင့်ခန်းလုပ်ခိုင်းလျှင် စုစုသည်
ခဲတံနှင့်ရေးလာတတ်သည်။
"ဘာလို့ ဖောင်တိန်နှင့် မရေးသလဲ" မေးသောအခါ စုစုသည် ခေါင်းလေးငုံ့၍
"မှားမှာစိုးလို့" ဟု မပွင့်တပွင့် ဖြေတတ်သည်။
"မှားတော့ ဘာဖြစ်သလဲ။ ကျောင်းသားပဲ မှားမှာပေါ့" မင်းနဲ့
ခပ်တင်းတင်း ခပ်ထန်ထန် သုံးလေးခါလောက် ပြောတော့မှ ခဲတံနှင့်ရေးတတ်သည့် မရွှေစု၏ အကျင့် ပျောက်လေသည်။
သူ့လေ့ကျင့်စာအုပ်တွင် အမှားတွေ့၍ ကြက်ခြေခတ်မည်ပြုလျှင် ပျာပျာသလဲ တောင်းပန်တတ်သည်။
"မလုပ်ပါနဲ့ ဆရာရယ်။ သမီးပြန်ရေးပါ့မယ်။ အမှားမခြစ်ပါနဲ့"
"မိစု၊ နင်တယ်ခက်ပါလား။ အမှားခြစ်တယ်ဆိုတာ အမှားကိုပြင်ဖို့၊ အမှန်ကိုမြင်ဖို့ဟ"
"သမီးသိပါတယ် ဆရာရယ်။ ဒါပေမယ့် သမီးကြက်ခြေခတ်ကို မကြည့်ရဲဘူး။"
သူ့စာအုပ်တွင်အမှားတွေ့၍ အမှတ်တမဲ့ကြက်ခြေခတ်လိုက်မိလျှင် စုစုသည် ခဲဖျက်ဖြင့် မင်နီကြက် ခြေခတ်ကို မရရအောင် ဖျက်လေသည်။
သည်ကတည်းက စုစုကို တစ်မျိုးပဲဟု ထင်မိသား။
အတန်းထဲမှာ
ဆရာလုပ်သူက စာမေးလျှင်လည်း စုစုသည်ရသည်ဖြစ်စေ၊ မရသည်ဖြစ်စေ၊ ဘယ်တော့ မှ
ထဖြေလေ့မရှိ။ မလွှဲသာ၍ ဖြေရလျှင်လည်း မပွင့်တပွင့်ဖြင့် ဘာပြန်ပြောမှန်းမသိ။
တစ်ခါတစ်ခါ စိတ်ကမရှည်ချင်။
"ကျယ်ကျယ်ပြောပါဟဲ့"
ဟု ပြောပြောဆိုဆု သူ့ခေါင်းကို ခေါက်တတ်သည်။ ထိုအခါမျိုးတွင် စုစုသည်
မျက်လွှာချ၍ ခေါင်းငုံလျက်သာနေတတ်သည်။ ဘာမှမပြောနိုင်။
အမှားကြောက်သော စုစု၊
မင်နီကိုမကြည့်ရဲသောစုစု၊ အရှုံးကို ရင်မဆိုင်လိုသောစုစုသည် စာမေးပွဲကြီး
တွင် သူမတွေ့ချင်သော အရှုံးနှင့်နဖူးတွေ့ ဒူးတွေ့တွေ့လိုက်ရလေသည်။
စုစုတော့ စိတ်ထိခိုက်မှာပဲဟုကျွန်တော်တွေးမိသော်လည်း ရှုံးထိုက်၍ ရှုံးသွားရသူ စုစုအတွက် ကျွန်တော် ဘယ်လိုမှ မတတ်နိုင်။
အရှုံး၏ဒဏ်ကို စုစုဤမျှအထိခံရလိမ့်မည်ဟူ၍လည်း ကျွန်တော်မထင်မိ။
ကျွန်တော် ဒသမတန်းဘက်သို့ လျှောက်လာခဲ့သည်။
မိန်းကလေးခုံတန်း နောက်ဆုံးခုံတွင် လွယ်အိတ်ကိုပိုက်လျက် ခပ်ငိုင်ငိုင်ထိုင်နေသော စုစုကိုတွေ့ရ သည်။
စုစု၏ မျက်လုံးများမှာ ရီဝေဝေမှိုင်းပျပျ။
"သမီး လာလေ"
စုစုကျွန်တော့်ကို လှည့်ကြည့်သည်။ ခေါင်းခါသည်။
"စုစုအောင်တယ်လေ ဆရာရဲ့။ ဆရာ့အတန်းမှာ ဘယ်နေရတော့မလဲ"
ကျွန်တော် ဘာပြောရမှန်း မသိ။ "ဘယ်မှာအောင်လို့လဲ၊ လာလိုက်ခဲ့" ဟု အတင်းဆွဲခေါ်၍တော့ မဖြစ်။
ဘေးနားက ကျောင်းသားများကလည်း အကဲခတ်နေကြရာ သူရှက်သွားမှာလည်း စိုးရိမ်သေးသည်။
ဆရာမက ဘယ့်နှယ့်လုပ်မလဲဟူသော သဘောဖြင့်မေးဆတ်ပြသည်။
"ဆရာခုနှစ် ဆယ်တန်းကိုင်တယ် သမီးရဲ့။ ဆရာ့အတန်းမှာလာနေပါ"
ကျွန်တော့်ပါးစပ်က ပြောမိပြောရာ ပြောလိုက်မိသည်။
"ဆရာ ညာတာ သမီးသိတယ်။ ဆရာက ကိုးတန်းကိုင်တာများ" စုစုရယ်သည် ကျွန်တော်လည်း
"လူကြီးရှက်တော့ သွားဖြဲ" လိုက်ရသည်။
ကျွန်တော် လှည့်ထွက်လာရ၏။
"နှစ်ရက်
သုံးရက်လောက်တော့ ဒီလိုပဲထားလိုက်ပါဦး ဆရာရယ်။ ကျွန်တော်ကြိုးစား
ကြည့်ပါ့မယ်။ ကလေးတွေကိုတော့ သူ့ကိုမစကြ မနောက်ကြအောင် ထိန်းပေးထားလိုက်ပါ"
"ပြဿနာကတော့ သိပ်မသေးဘူး ဆရာမရယ်။ ဘဝတစ်ခုနစ်မွန်းအောင် ကျွန်တော်တို့ ကြိုးစားပြီး ကယ်ရအောင်"
(၃)
"အဖြစ်ကတော့ ဒီအတိုင်းပဲ ဦးရေ"
ကျောင်းဆင်းပြီးလျှင်
ကျောင်းဆင်းချင်းစုစု၏အိမ်သို့ ကျွန်တော်ကိုယ်တိုင် ဝင်ပြောရလေသည်။
စုစုအိမ်ပေါ်ထပ်မှာ ရှိသည်ဆို၍ တိုးတိုးတိတ်တိတ် ဇာတ်ကြောင်းလှန်ရ၏။
စုစုအဖေရော အမေပါ မျက်စိ မျက်နှာမကောင်းကြ။
"သူတစ်ခါမှ
စာမေးပွဲမရှုံးဖူးဘူး ဆရာ။ အောင်စာရင်းထွက်ပြီး ၂ ရက် ၃ ရက်
အခန်းထဲမထွက်ဘူး၊ ငိုချည်းနေတာပဲ။ အငိုတိတ်သွားပြန်တော့ ငိုင်နေပြန်ရော။
သူ့အဖေတစ်လှည့် ကျွန်မတစ်လှည့်သွား ချော့ရင် စိန်းစိန်းကြီး
ပြန်ကြည့်လိုက်တာများ ကြောက်ဖို့တောင်ကောင်းသေးတယ်။ ဘာစကားမှ မ
ပြောဘဲနေလိုက်တာ။ ပြောမယ့်ပြောတော့ သူအောင်တယ်လို့ ပြောတာပဲ ကျွန်မသမီးလေး
ပြန်မှ ကောင်းပါ့ဦးမလား မသိဘူး"
အဒေါ်ကြီးမျက်ရည်စို့လာသည်။
"ဟုတ်တယ်ဆရာရယ်၊ ကျွန်တော်တို့လည်း ဘယ်လိုလုပ်ရမှန်းမသိ ဖြစ်နေတယ်။"
"စိတ်
ဆရာဝန်တစ်ယောက်ယောက်နဲ့တော့ ပြသင့်တယ် ခင်ဗျ။ ဘာကြောင့် သူ့ကို ဆရာဝန်ဆီခေါ်
တယ်ဆိုတာတော့ သူမသိစေနဲ့ပေါ့။ အိပ်ရေးဝဝ အိပ်ခိုင်း။ တတ်နိုင်သမျှ
ပျော်အောင်ထားပေါ့ခင်ဗျာ။ ကျောင်းကိုလည်း ခါတိုင်းလိုပဲ လွှတ်ပေးပါ။
ကျွန်တော်တို့လည်း ဖျောင်းဖျပေးပါမယ်"
"ကျွန်တော်ပြန်မည်ဟု နှုတ်ဆက်သောအခါ စုစုအိမ်ပေါ်ထပ်က ဆင်းလာသည်နှင့်တိုးလေသည်။"
"ဟင် ဆရာပါလား။ ဘယ်တုန်းကရောက်နေတာလဲ"
"ကြာပြီ မိစု၊ အခုပြန်တော့မလို့"
"ဖေဖေတို့ကို ပြောသွားပါဦးဆရာရယ်။ သမီးကို စာမေးပွဲကျတယ်ချည်းပဲ ပြောနေတယ်"
သူ့အဖေရော အမေပါမဲ့သွားသည်။
"အေး … အေး ဆရာပြောထားပါတယ်။ သွားမယ်နော်"
စုစု၏မျက်လုံးများသည် ရီဝေနေသည်တကား။
* * * *
"မိစု"
"ဆရာ"
"ခု သမီးတို့ စာသင်နေတယ်။ ဆရာတို့က သမီးတို့ကို စာသင်ပေးနေတယ်။ ဘာကြောင့်လဲသိလား"
စုစုတွေဝေသွားသည်။
စုစု ဒသမတန်းမှာ
သွားထိုင်နေသည်မှာ တစ်ပတ်ကျော်သွားပြီ။ စာတွေကို လိုက်ရေးခြင်း မှတ်ခြင်း
တော့မရှိ။ ငုတ်တုတ်ထိုင်နေတာပဲလို့ အတန်းပိုင်ဆရာမ သတင်းပုိ့သည်။
ကျွန်တော်အသာပဲလွှတ် ထားလိုက်သည်။ သို့သော်စုစုအား ကျောင်းဆင်းတိုင်း
ကျွန်တော်အိမ်သို့ လေ့ကျင့်ခန်းစာအုပ်များ သယ်ပေးရမည်ဟု ခိုင်းသည်။
ကျွန်တော့်အိမ်မှာ သူ့အိမ်သို့သွားသောလမ်းတွင် ရှိလေရာလမ်းကြုံသည်ဟု ဆိုနိုင်လေသည်။
ကျောင်းဆင်းလျှင်
စုစုကျွန်တော့်ထံရောက်လာသည်။ လေ့ကျင့်ခန်းစာအုပ်တွေ သယ်ပေးသည်။
ဆရာတပည့်နှစ်ယောက် စကားတပြောပြောနှင့် လမ်းလျှောက်ကြသည်။
စကားတပြောပြော ဆိုသော်လည်း စုစုကိုအများဆုံးပြောခိုင်းသည်၊ သူပြောသမျှကို စိတ်ရှည်လက် ရှည် နားထောင်သည်။
စုစုကို မပွင့်တပွင့်ဟု ကျွန်တော်ဆိုခဲ့သော်လည်း လွတ်လွတ်လပ်လပ် ပြောချင်တာပြောခွင့်ရသော အခါများတွင် သူလည်းစကားအိုးမလေးပင်။
မိဘက
ပစ္စည်းအတော်အသင့် ရှိသည်။ တစ်ဦးတည်းသော သမီး။ အချစ်တွေသူ့ထံမှာ
စုသောကြောင့် "စုစု" ဟု မှည့်ခေါ်ပါသတဲ့။ ကြံတိုင်းအောင်
ဆောင်တိုင်းမြောက်လိုတိုင်း ရတဲ့ဘဝပိုင်ရှင်မလေး။
မှန်သေတ္တာလေးထဲက အလှမွေးထားတဲ့ ရွှေငါးလေးဆိုပါတော့။ ပိုက်ကွန်နှင့် သူမတိုးဖူးသေး။ မုန်တိုင်းဆိုတာ သူမကြုံဖူးသေး။
သည်နေတော့ သူမသိတာများသိအောင် ပြောရတော့မည်။
"ပြောလေသမီး"
"ပညာတတ်အောင်လို့ပေါ့"
"ပညာဆိုတာ ဘာလဲမိစုရယ်"
စုစုမဖြေတတ်တော့။ "မသိဘူး" ဟုပြောသည်။
"ပညာဆိုတာ ဘဝကို
ရင်ဆိုင်နိုင်တဲ့ အသိတရား၊ လူ့ဘဝမှာအကျိုးရှိရှိ နေထိုင်တတ်တဲ့ အသိတရား
ပေါ့ သမီးရယ်။ ကျောင်းစာဆိုတာ လူ့အသိတရား၊ လူ့စဉ်းစားဉာဏ်ကို ရင့်သန်အောင်
လုပ်ပေးတာ ပေါ့။ သိထားသင့်တဲ့ အခြေခံအချက်တွေကို ကျောင်းစာတွေက ချပေးတယ်။
ဒါတွေကနေပြီး တစ်ဆင့် တစ်ဆင့်ပွားများလာအောင်လုပ်ပြီး ဆရာတို့ဘဝကို
ရင်ဆိုင်ရတာပေါ့"
"ဒါကြောင့် တချို့က ပညာဆိုတာ ကျောင်းစာတွေပျောက်သွားပြီး ကျန်နေတဲ့ အသိလို့ဆိုကြတာပဲ"
စုစုကိုလည်း လှည့်ကြည့်ရသေးသည်။ တော်ပါသေးရဲ့။ စိတ်ဝင်စားပုံတော့အရသား။
"ကျောင်းနေတယ်ဆိုတာ
သင်တန်းတက်တာပဲ သမီးရယ်။ ဘဝ ပြဿနာကို မှန်မှန်ကန်ကန်ရင်ဆိုင်
ဖြေရှင်းနိုင်ဖို့ လေ့ကျင့်တာပဲ။ လက်နက်ကိရိယာ စုဆောင်းတာပဲ"
"လေ့ကျင့်တဲ့နေရာမှာ အဆုံးအရှုံး၊ အမှားအယွင်းဆိုတာ ရှိတာချည်းပဲပေါ့"
"စုစု စာမေးပွဲ ရှုံးဖူးသလား"
ဤ မေးခွန်းကို သတိကြီးစွာထား၍ မေးလိုက်ရသည်။
စုစုသည် မျက်တောင်ကလေး ပုတ်ခတ်ပုတ်ခတ်လုပ်ကာ စဉ်းစားသည်။
ကျွန်တော့်ကို မျက်လုံးပင့်ကြည့်သည်။ 'ဟင့်အင်း' ဟု ဖြေသည်။
ကျွန်တော် သက်ပြင်းချမိသည်။
"ဆရာကတော့ ခဏခဏ ရှုံးဖူးတယ်"
"တကယ်ပေါ့။ ဆရာ ငယ်ငယ်ကစာညံ့တာပဲ။ ဆရာငယ်ငယ်က စာတွေ သမီးကိုပြရဦးမယ်။ ဆရာ အမှတ်တရ သိမ်းထားတယ်။ မင်နီတွေချည်းပဲ"
စုစုရယ်သည်။
ကျွန်တော် ငယ်ငယ်က
စာညံ့ပုံတွေကို ပြောပြသည်။ သင်္ချာဆရာလာလျှင် စာမေးမည်စိုး၍ ရှေ့
ကျောင်းသားကို ကွယ်ကာဇက်ကလေး ပုနေတတ်ပုံ၊ အင်္ဂလိပ်စာမရ၍
ကျောင်းတစ်ပတ်ပြေးရပုံတို့ကို ပြောပြသည်။
"ဒါပေမယ့် ဆရာက
သင်ခန်းစာယူတယ် မိစုရဲ့။ မှားပြီးသားအမှားကို ထပ်မမှားစေရဘူး။ မှားမိရင်
အမှန်ရအောင် လုပ်တာပဲ။ ဆရာ စာမေးပွဲလည်းရှုံးဖူးတာပဲ။ စာအုပ်မှာမင်နီရှိပါစေ
သမီးရယ်။ ဘဝ မှာ မင်နီအတားမခံရဖို့ အရေးကြီးပါတယ်။ အရှုံးဆိုတာလည်း
တကယ်တော့ ဆရာကောင်း တစ်ယောက် ပါပဲ"
စုစုတွေနေသည်။ စုစုတွေးနေသည်။ သူ့မျက်လုံးများသည် ရွှန်းလက်လာလိုက်၊ မှေးမိန်းသွားလိုက်။
ကျွန်တော့်အိမ်နားသို့ ရောက်လာသည်။ စုစုကျွန်တော့်ကို စာအုပ်တွေကမ်းပေးသည်။
"ဆရာ ငယ်ငယ်က စာအုပ်တွေ ကြည့်ဦးမလား"
စုစု သဘောကျစွာ ရယ်သည်။
"နောက်မှကြည့်ပါ့မယ် ဆရာရယ်"
နောက်တစ်နေ့ ကျွန်တော်ကျောင်းသို့အလာတွင် အလွန်ထူးခြားသော မြင်ကွင်းကို မြင်ရလေသည်။
စုစုကျွန်တော့်တပည့်
စုစု။ သနပ်ခါးအဖွေးသားနှင့် ပန်းတွေဝေအောင်ပန်လျက် ကျွန်တော့်အတန်းမှာ
သူထိုင်နေကျနေရာတွင် ကြည်လင်ရွှင်ပြစွာ ထိုင်နေလေသည်တကား။
"ဟယ် သမီးပြန်လာပြီ"
စုစုပြုံးသည်။
"ဟုတ်တယ်ဆရာ၊ သမီးပြန်လာပြီ"
စုစု၏ အသံသည် တည်ငြိမ်ရင့်ကျက်သောအသံ။
ကျွန်တော့်ရင်သည် ပီတိဖြင့် လွှမ်းခြုံသွားသည်။
"ဝမ်းသာလိုက်တာ မိစုရယ်"
မိုးသားတွေ ကင်းစင်လျှင် ကောင်းကင်သည် ကြည်လင်မြဲမဟုတ်ပါလား။
မိစု …. အရှိတရားကို လက်ခံရမယ် သမီး၊ တရားသဖြင့် ရှုံးတာကိုဂုဏ်ယူတတ်ရမယ်။ ဒါပေမယ့် အရှုံးကို ဦးမညွတ်ရဘူးသမီး။
ဆရာတို့ မိစုတို့ဘဝမှာ အကြိမ်ကြိမ် လိမ့်လိမ့်လဲလဲဖြစ်မှာပဲ။ အေး …. လဲသွားတဲ့အခါ ပြန်ထပါသမီး။
အောင်စံဖြိုး
(၁၉၈၃ ခု ဇန်နဝါရီလထုတ်၊ ပညာတန်ဆောင်မဂ္ဂဇင်းမှ) *
ပညာတန်ဆောင် ဝတ္ထုတိုလက်ရွေးစင်(၄)
0 comments:
Post a Comment