အုတ်ကျင်းမှတ်တိုင်ရဲ့ ဟိုမှာဘက်
|
6:51 AM |
No မှတ်ချက် |
by Nay Myo on Saturday, June 16, 2012 at 1:58am
ဗမာနိုင်ငံလုံးဆိုင်ရာကျာင်းသားသမဂ္ဂများ အဖွဲ့ချုပ် ပန်ကြားချက်
အကြောင်းအရာ။ ။ရန်ကုန်တက္ကသိုလ်တွင် လောလောဆယ်ဖြစ်ပေါ်နေသော အရေးအခင်းနှင့် ပတ်သက်၍ ဗကသများ အဖွဲ့ချုပ်မှ ကျောင်းသား၊ ဆရာနှင့် အစိုးရသို့ ပန်ကြားချက်။
၁။ ၁၉၆၂ ခု၊ ဇူလိုင်လ ၇ ရက်နေ့တွင် ဖြစ်ပွားခဲ့သော အဖြစ်အပျက်ဆိုးကြီးကို အကြောင်းပြု၍ ကျောင်းသား၊ ဆရာနှင့် အစိုးရ ၃ ပွင့်ဆိုင် ဆက်ဆံရေးသည် အဆင်မပြေ တင်းမာလာခဲ့ပါသည်။ တစ်ဘက်နှင့် တစ်ဘက် တအုံနွေးနွေး အခြေအနေသို့ ဆိုက်ရောက်လာခဲ့ပါသည်။ ထိုကဲ့သို့ အခြေအနေမျိုးကို ဆက်လက်ကြာရှည်စွာ ခွင့်ပြုမထားသင့်ဘဲ ပြဿနာအရပ်ရပ်ကို ၃ ပွင့်ဆိုင် အညီအညွတ် ပြေပြေလည်လည် ဆွေးနွေးဖြေရှင်းကြခြင်းဖြင့်သာ အမြန်ဆုံး အဆုံးသတ်ဖို့ လိုပေသည်။
အခြေအနေသစ်များကို ဖန်တီးကာ တက္ကသိုလ်ပညာရေးကို အခြေခံသစ်များဖြင့် ပြန်လည်ထူထောင်ကြရန် လိုအပ်ပေသည်။ ထိုအရေးတွင် ကျောင်းသား၊ ဆရာနှင့် အစိုးရတို့သည် ညီညွတ်စွာ လက်တွဲမဆောင်ရွက်နိုင်စရာအကြောင်း လုံးဝမရှိဟု ယုံကြည်ပေသည်။
၂။ ယခုအခါ ရန်ကုန်တက္ကသိုလ်ကျောင်းသားများက တောင်းဆိုချက် (၅) ချက်ကို တင်ပြ၍ သက်ဆိုင်ရာ အစိုးရအာဏာပိုင်များနှင့် အကြိမ်ကြိမ် ဆွေးနွေးညှိုနှိုင်းနေကြခြင်းကို ဗကသများ အဖွဲ့ချုပ်အနေဖြင့် အနူးအညွတ် ထောက်ခံကြိုဆိုပေသည်။ ကျောင်းသား၊ ဆရာနှင့် အစိုးရ၏ အကြားဝယ် ဆွေးနွေးဖြေရှင်း၍ မရနိုင်သော ပြဿနာဟူ၍ လုံးဝမရှိပေ။ ထို့ကြောင့် ပြဿနာများ ပြီးပြတ်ပြေလည်သည်အထိ ဆွေးနွေးဖြေရှင်းကြရန် ဗကသများ အဖွဲ့ချုပ်မှ သုံးပွင့်ဆိုင်အင်အားစု အားလုံးတို့အား အလေးအနက် ပန်ကြားလိုက်ပေသည်။ ဗကသများ အဖွဲ့ချုပ် အနေဖြင့်လည်း ဆွေးနွေးဖြေရှင်းမှုများအားလုံး ပြေလည်အောင်မြင်စေရန်နှင့် အခြေသစ် အနေသစ်များ ဖန်တီးနိုင်ရန် အဘက်ဘက်မှ အစွမ်းကုန် ကြိုးပမ်းဆောင်ရွက်သွားမည် ဖြစ်ပေသည်။
၃။ ရန်ကုန်တက္ကသိုလ် ကျောင်းသားများ၏ ယနေ့ တင်ပြချက် (၅) ရပ်မှာ ---
(၁) သဟာယနှင့် စာဖတ်အသင်းအဖွဲ့ချုပ် ဖွဲ့စည်းခွင့်ရရှိရေး။
(၂) ကျောင်းဆောင်စည်းကမ်းများကို ကျောင်းသားထုဆန္ဒနှင့် ညှိနှိုင်းသတ်မှတ်ရေး။
(၃) ကျောင်းထုတ်ခံရသူများ စာမေးပွဲဖြေခွင့်ရရှိရေး၊ ကျောင်းနေခွင့်ရရေး။
(၄) ၀ရမ်းထုတ်ထားခြင်းကို ရုပ်သိမ်းရေး။
(၅) အဖမ်းခံနေရသော ကျောင်းသားများ လွှတ်ပေးရေး
ဟူ၍ ဖြစ်ပေသည်။
၎င်းတို့သည် အလွန်တရာမျှတသည့် တောင်းဆိုချက်များဖြစ်သည့်အပြင် သုံးပွင့်ဆိုင် ပြန်လည်ညီညွတ်ရေးနှင့် ပူးပေါင်းဆောင်ရွက်ရေးအတွက် ကောင်းစွာအခြေခံနိုင်သော အချက်များလည်း ဖြစ်ပေသည်။ ထို့ကြောင့် ဗကသများ အဖွဲ့ချုပ်မှ အလေးအနက် ထောက်ခံလိုက်သည့်အပြင် ရန်ကုန်တက္ကသိုလ်နှင့်တကွ အစိုးရနှင့် ကျောင်းသားထု အနာဂတ်ဆက်ဆံမှု ပြန်လည်ထွန်းတောက်နိုင်ရေးအတွက်အစိုးရဘက်မှ ထိုတောင်းဆိုချက်ကို အစွမ်းကုန်လိုက်လျော ဆောင်ရွက်ပေးပါရန်လည်း လေးစားစွာ ပန်ကြားလိုက်ပါသည်။
၎။ ယခုအခါ ကျောင်း၊ ဆရာနှင့် အစိုးရစပ်ကြား ဆက်ဆံရေးတွင် ကျောင်းသားထုကိုယ်စား တရားဝင် ပြောဆိုထိန်းသိမ်းနိုင်သည့် အဖွဲ့အစည်းတစ်ရပ်သည် အလွန်လိုပေသည်။ ၄င်းအတွက် ရန်ကုန်တက္ကသိုလ်သမဂ္ဂ ပြန်လည်ထူထောင်ခွင့်ပေးရေးကို အနာဂတ်တွင်ဦးတည်လျက် ယခုလောလောဆယ်အားဖြင့် သဟာယနှင့် စာဖတ်အသင်း အဖွဲ့ချုပ်တစ်ရပ် ထူထောင်ခွင့်ကို အမြန်ဆုံးလိုက်လျောသင့်သည်ဟု ယူဆပေသည်။ ထိုကိစ္စအတွက် အစိုးရဘက်မှ စိုးရိမ်မှုများ၊ ကျောင်းသားဘက်မှ နစ်နာချက်များကို အပြန်အလှန်ဆွေးနွေးညှိနှိုင်း၍ လိုအပ်သောအစီအစဉ်များနှင့် ပြုလုပ်ဆောင်ရွက်ပါက ထိုကိစ္စသည် မုချအောင်မြင်နိုင်သည်၊ ခွင့်ပြုနိုင်သည်ဟု ယုံကြည်ပေသည်။ သုံးပွင့်ဆိုင်စပ်ကြား မည်သည့်တရားဝင်ဆက်ဆံရေး အဖွဲ့အစည်းမျှ မရှိရဆိုသည်မှာ တက္ကသိုလ်ပညာ အဆင့်အတန်း၊ တက္ကသိုလ်ကျောင်းသားများ၏ အဆင့်အတန်းနှင့်စာလျှင် ဖိနှိပ်လွန်းရာရောက်နေသည်ဟု ယူဆပေသည်။ ထို့ကြောင့် ကြားကာလတွင် သဟာယနှင့် စာဖတ်အသင်း အဖွဲ့ချုပ် ဖွဲ့စည်းခွင့်ပေးပါရန် အစိုးရအား လေးနက်စွာတိုက်တွန်းပေသည်။
၅။ ဤသို့ ကျောင်းသား၊ ဆရာနှင့် အစိုးရတို့သည် ပြဿနာများကို ပြေလည်အောင် ဖြေရှင်းဆွေးနွေးနေကြစဉ် ကျောင်းသားများဘက်မှလည်း အကြမ်းဖက်ဆန္ဒပြခြင်း၊ အစိုးရဘက်ကလည်း အကြမ်းဖက်နှိမ်နှင်းခြင်း မပြုကြဘဲ ဒီမိုကရေစီနည်းဖြင့်သာ အောင်မြင်စွာဖြေရှင်းကြဖို့ အလေးအနက် သတိပေးနှိုးဆော်ပါသည်။ ၁၉၆၂ ခု၊ ဇူလိုင် ၇ ရက် အရေးအခင်းဆိုးမျိုး နောက်ထပ် ဖြစ်ပွားမလာစေရန်၊ အထူး အရေးတယူ ထိန်းသိမ်းကာကွယ်ကြရန်၊ အားလုံးက ၀ိုင်းဝန်းကြိုးပမ်းကြပါရန် အလေးအနက် ပန်ကြားအပ်ပါကြောင်း။
ခင်မောင်အုန်း
(ဥက္ကဌ)
နေ့စွဲ၊ ၁၅-၁၂-၆၂
ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်
ဝန်ခံချက်။ ။ ၁၉၆၃ ခုနှစ်တွင် ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်မှ တည်းဖြတ်ပြုစု
ထုတ်ဝေသော “ကျောင်းသားတိုက်ပွဲနှင့် မြန်မာ့ဆိုရှယ်လစ်လမ်းစဉ်” စာအုပ်၏ နောက်ဆက်တွဲ
ကဏ္ဍမှ ခေတ်ကာလနှင့် မလျော်ညီသော စာလုံးပေါင်းသတ်ပုံများကို ပြုပြင်၍ ကူးယူဖော်ပြခြင်း
ဖြစ်ပါသည်။
0 comments:
Post a Comment