10.06.2012 နေ့ဖတ်ရန်သတင်းများ

by Myanmar Journal on Saturday, June 9, 2012 at 4:38pm ·

တရုတ်နိုင်ငံ စီးပွားရေး အားနည်းလာ

ဥရောပက ဝယ်လိုအား ကျဆင်းတာလည်း ပါတယ် လို့ ဘီဘီစီ သတင်းထောက်ကပြောပါတယ်

တရုတ်နိုင်ငံမှာ အခု အသစ် ထုတ်ပြန်လိုက်တဲ့ စီးပွားရေး ကိန်းဂဏန်းတွေဟာ တရုတ် စီးပွားရေး အားနည်းလာနေတယ် ဆိုတဲ့ နောက်ထပ် လက္ခဏာသစ်တွေကို ပြသနေပါတယ်။

တရုတ်ကုန်ထုတ်လုပ်မှု ဈေးနှုန်းတွေဟာ ပြီးခဲ့တဲ့နှစ်က ဈေးနှုန်းထက် တစ်ရာခိုင်နှုန်းကျော် ကျဆင်းသွား တာကို တွေ့ရပါတယ်။

လူတွေရဲ့ အသုံးစရိတ်တွေဟာလည်း ကျဆင်းသွားခဲ့တာ ဖြစ်ပါတယ်။

အခုလို တရုတ် စီးပွားရေး နှေးကွေးလာရတာဟာ တရုတ်ရဲ့ အဓိကပြည်ပပို့ကုန် အကြီးဆုံး ဈေးကွက်ဖြစ်တဲ့ ဥရောပရဲ့ ဝယ်လိုအား ကျဆင်းတာလည်း ပါတယ်လို့ ဘေဂျင်းမှာ ရှိတဲ့ ဘီဘီစီ သတင်းထောက်က ပြောပါတယ်။

ဥရောပမှာ ကလည်း အိမ်ယာဈေးကွက်မှာ ဈေးနှုန်းတွေ ကျဆင်း နေတာ ဖြစ်ပါတယ်။

အခုလို တရုတ်စီးပွားရေး နှေးကွေး လာနေတာကို ကိုင်တွယ်ဖို့လို့ ယူဆရတဲ့ ငွေချေးနှုန်း လျှော့ချမှုတွေကို တရုတ် ဗဟိုဘဏ်က ဇွန်လ ၈ ရက် သောကြာနေ့မှာ စတင်ခဲ့ပါတယ်။

ဒါဟာ တရုတ်ဗဟိုဘဏ် အနေနဲ့ ငွေချေးနှုန်းတွေကို လေးနှစ်အတွင်း ပထမဆုံးအကြိမ် လျော့ချလိုက်တာဖြစ်ပြီး၊ သုည ဒသမ နှစ်ငါး ရာခိုင်နှုန်း လျှော့ချလိုက်တာ ဖြစ်ပါတယ်။

စတော့ ဈေးကွက်တွေမှာလဲ ဒီသတင်းကို အကောင်းဖက်က တုံ့ပြန်ကျလိမ့်မယ်လို့ ကျွမ်းကျင်သူတွေက မှန်းဆနေပါတယ်။

အခုတော့ မြို့ထဲမှာ ညမထွက်ရ အမိန့်ထုတ်ပြန်ထားရပြီမောင်တောမှာ ညမထွက်ရ အမိန့်ထုတ်

ရခိုင်ပြည်နယ် ဘင်္ဂလားဒေ့ရ်ှနဲ့ နယ်စပ် မောင်တောမြို့မှာ သောကြာနေ့က ဗလီတက်ပြီး ပြန်ထွက်လာလို့ စုဝေးမိတဲ့ မူဆလင်တွေက ပြီးခဲ့တဲ့ တနင်္ဂနွေနေ့က တောင်ကုတ်မှာ အသတ်ခံရတဲ့ မူဆလင် ဆယ်ဦးကိစ္စကို ကန့်ကွက်ဆန္ဒပြကြရင်းနဲ့ ပတ်ဝန်းကျင်မှာ ရှိတဲ့ ရခိုင်လူမျိုးတွေရဲ့ တည်းခိုခန်းတွေ လူနေအိမ်တွေ တိုက်ခိုက် မီးရှို့ ဖျက်ဆီးခဲ့ကြပါတယ်။

အနားက ရခိုင်ရွာတွေကိုလည်း ဆက်ပြီး မီးရှို့တိုက်ခိုက်ခဲ့ကြပါတယ်။ ရဲက လာပြီး လူစုခွဲဖို့ ကြိုးစားပေမဲ့ မရလို့ စစ်တပ်ရောက်လာပြီး သေနတ်ဖောက် လူခွဲခဲ့ရပါတယ်။

ည ကိုးနာရီလောက် အထိ ရပ်ကွက် ၄ ဖက်မှာ မီးရှို့မှုတွေ ရှိနေလို့ မြို့နယ် အထွေထွေ အုပ်ချုပ်ရေးမှုးက မောင်တောမှာ ပုဒ်မ ၁၄၄ ကြေငြာပြီး ည ၆နာရီက မနက် ၆နာရီ အပြင်မထွက်ရအမိန့် ကြေငြာထားလိုက်ပါတယ်။

မြို့ထဲမှာ ငါးယောက်ထက် ပိုပြီး လူမစုဝေးရဘူးလို့လဲ ကန့်သတ်ထားလိုက်ပါတယ်။

ကာဖြူးထုတ်ပြီးတဲ့ နောက်မှာလဲ မြို့အရှေ့ပိုင်းမှာ ပစ်ခတ်သံတွေ ကြားခဲ့ရတယ်လို့ မြို့ခံ တယောက်က ဘီဘီစီကို ပြောပါတယ်။

ညပိုင်းမှာ စစ်ကားတွေ မြို့ထဲက လမ်းတွေမှာ ကင်းလှည့်နေလို့ မြို့အတွင်းဖက်မှာ အခြေအနေတွေ အေးဆေးသွားပေမဲ့ မောင်တောမြို့တောင်ပိုင်းက မီးရှို့ခံခဲ့ရတဲ့ ရွာတွေမှာတော့ မိသားစုတွေဟာ သွားစရာနေရာမရှိပဲ တညလုံး ဒီအတိုင်း စိုးရိမ်ထိတ်လန့်စွာ ထိုင်နေကြရတယ်လို့ မောင်တောမြို့က သံဃာတပါးက ဘီဘီစီကို စနေနေ့မနက်မှာ မိန့်ပါတယ်။

တဖက်မှာတော့ အခုနောက်ဆုံး အကြမ်းဖက်မှုတွေ စတင်ဖြစ်စေခဲ့တဲ့ အကြောင်းတရပ်ဖြစ်တဲ့ ရမ်းဗြဲမြို့နယ် ကျောက်နီမော်ကျေးရွာက ရခိုင်အမျိုးသမီးကလေးကို အဓမ္မပြုကျင့်၊ သတ်ဖြတ်ခဲ့မှု ကျူးလွန်ခဲ့တယ်လို့ စွပ်စွဲခံထားရတဲ့ တရားခံ သုံးဦးကို ကျောက်ဖြူခရိုင် တရားရုံးမှာ မနေ့ကစလို့ ရုံးတင်ခဲ့ကြောင်း သိရပါတယ်။

ပြဿနာ အမြန် ဖြေရှင်းဖို့ ဥရောပ ခေါင်းဆောင်တွေကို အိုဘားမား တိုက်တွန်းယူရိုဇုန် ပြဿနာ အမြန် အဖြေရှာဖို့ အိုဘားမား ပြောပြီ

ဥရောပ နိုင်ငံတွေ အနေနဲ့ ကြုံတွေ့နေရတဲ့ ဘဏ္ဍာရေး အကြပ်အတည်းကို အမြန်ဆုံးနည်းနဲ့ ဖြေရှင်းကြပါလို့ အမေရိကန် သမ္မတ အိုဘားမားက ဥရောပ ခေါင်းဆောင်တွေကို တိုက်တွန်းလိုက်ပါတယ်။

ဒီပြဿနာကို ဖြေရှင်း နိုင်ဖို့ ခက်ခဲကောင်း ခက်ခဲမှာ ဖြစ်ပေမယ့် နည်းလမ်း ရှာတွေ့နိုင်မှာပါလို့ သူက သတိပေးခဲ့သလို ဥရောပ ခေါင်းဆောင်တွေဟာ ဆိုးရွားနေတဲ့ အခြေအနေကို နားလည်သင့်ပြီး ချက်ချင်း ကိုင်တွယ် ဖြေရှင်းဖို့ လိုနေပြီလို့ သူက အလေးအနက်ထား ပြောသွားခဲ့ ပါတယ်။

ဘဏ္ဍာရေး ယိမ်းယိုင်နေတဲ့ ဘဏ်တွေကို ငွေရင်းနှီး ပံ့ပိုးပေးဖို့ လိုတယ်လို့ မစ္စတာ အိုဘားမားက အထူးတလည် ထောက်ပြ ပြောသွားခဲ့ ပေမယ့် အလုပ်အကိုင်သစ် ဖန်တီးနိုင်ဖို့ကိုလည်း အဓိက ဉီးစားပေးသင့်တယ်လို့ ဆိုပါတယ်။

ဥရောပ စီးပွားရေး ပြဿနာက ဒီနှစ်မှာ ရွေးကောက်ပွဲ ကျင်းပမယ့် အမေရိကန် စီးပွားရေး တိုးတက်မှုကို ရိုက်ခတ်လာနေတာကို သမ္မတ အိုဘားမား စိုးရိမ်နေတယ်လို့ သတင်းထောက်တွေက ပြောပါတယ်။

Horms မြို့က အခြေအနေဆီးရီးယား ကူဘဲရွာ ကုလသမဂ္ဂ စုံစမ်းရေးမှူးတွေ ဝင်ခွင့်ရပြီ

ဆီးရီးယား နိုင်ငံမှာ ပြီးခဲ့တဲ့ ဗုဒ္ဓဟူးနေ့တုန်းက အစိုးရဖက် ဘက်တော်သား လက်နက်ကိုင် အဖွဲ့တွေက ရွာသားတွေကို အစုလိုက် အပြုံလိုက် သတ်ဖြတ်မှု ဖြစ်ခဲ့တယ်လို့ ပြောဆိုနေတဲ့ ကူဘဲရွာကို ကုလသမဂ္ဂ စောင့်ကြည့် လေ့လာရေး အဖွဲ့တွေ ဝင်ရောက်ခွင့် ရသွားခဲ့ပါပြီ။

မြင်ရတဲ့ မြင်ကွင်းက တုန်လှုပ်စရာဘဲလို့ အဲဒီ အဖွဲ့တွေနဲ့ အတူ လိုက်ပါသွားတဲ့ ဘီဘီစီ သတင်းထောက် တယောက်က ပြောပြီး အိမ်တအိမ်မှာ ဆိုရင် လူဦးနှောက်တွေ ပွင့်ထွက်နေတာနဲ့ ၊ သွေးကွက် သွေးခဲတွေ တွေ့ရသလို တချို့ နေရာမှာတော့ အလောင်း မီးရှို့ထားတဲ့ ညှော်နံ့တွေ လေထဲမှာ ရနေပေမယ့် လူသေလောင်း တစုံတရာ မတွေ့ရဘူးလို့ ပြောပါတယ်။

ဖြစ်ပျက်ခဲ့ သမျှတွေကို အစီရင်ခံစာရေးဖို့ ကျွမ်းကျင်သူတွေ ပါတဲ့ အဖွဲ့ငယ် တဖွဲ့ အဲဒီမှာ ရှိနေပြီး အစိုးရ စစ်တပ်ကသာ သုံးတဲ့ ယာဉ်တွေ အဲဒီရွာထဲ ဝင်သွားတဲ့ လက္ခဏာတွေ တွေ့ရတယ်လို့ သတင်း ရရှိပါတယ်။

ဆီးရီးယား ဘဏ်တွေ နိုင်ငံတကာရဲ့ စီးပွားရေး ပိတ်ဆို့မှုက ရှောင်လွှဲနိုင်အောင် ရုရှားက ကူညီကောင်း ကူညီနေနိုင်တယ် ဆိုတဲ့ သတင်းတွေ အပေါ် စိုးရိမ် ပူပန်မိတယ်လို့ အမေရိကန် အစိုးရက ထုတ်ဖော် ပြောကြားလိုက်ပါတယ်။

ဆီးရီးယား ဗဟိုဘဏ်ကို ရုရှားဘဏ်တွေက ထောက်ပံ့ ကူညီမှု ပေးနေတယ် ဆိုတဲ့ သတင်းတွေနဲ့ ပတ်သက်လို့ ပူပန်ကြောင်း မော်စကိုမြို့မှာ ရောက်နေတဲ့ အမေရိကန် ဘဏ္ဍာရေး အရာရှိ David Cohen က ပြောပါတယ်။

ပိတ်ဆို့ အရေးယူတွေက ဆီးရီးယား စီးပွားရေးကို ထိခိုက်စေတဲ့ အထောက်အထားတွေ တွေ့ရပေမယ့် ရုရှားနဲ့ ဆီးရီးယား တို့ရဲ့ ရင်းနှီးတဲ့ စီးပွားရေး ဆက်ဆံမှုကြောင့် နိုင်ငံတကာရဲ့ ပိတ်ဆို့ အရေးယူမှု အစီအစဉ် ထင်သလောက် ထိရောက်မှု မရှိခဲ့ဘူးလို့ သူက ဆိုပါတယ်။                      

ဆီးရီးယား အစိုးရတပ်တွေက ဒဲရာမြို့ကို တိုက်ခိုက်

လုံခြုံရေး တပ်တွေက သောကြာနေ့ည တညလုံး ဒဲရာမြို့ကို အမြောက်တွေနဲ့ ပစ်တာလို့ ဆိုပါတယ်

ဆီးရီးယားနိုင်ငံ တောင်ပိုင်း ဒဲရာမြို့ကို အစိုးရ လုံခြုံရေးတပ်ဖွဲ့တွေက အမြောက်တွေနဲ့ မနေ့ညက ပစ်ခတ်ခဲ့လို့ လူပေါင်း အနည်းဆုံး ၁၇ ဦး သေဆုံးသွားတယ် လို့ ဆီးရီးယား အတိုက်အခံ တက်ကြွလှုပ်ရှား သူတွေက ပြောပါတယ်။

အတိုက်အခံတွေ ပြောတာက မနေ့ညက တညလုံး အဲဒီ ဒဲရာ မြို့ကို အမြောက်တွေနဲ့ ပစ်တာလို့ ဆိုပါ တယ်။

ဒဲရာမြို့ဆိုတာကလည်း ပြီးခဲ့နှစ်က စတင်ခဲ့တဲ့ သမ္မတ ဘာရှာအဲလ် အဆတ်ကို ဆန့်ကျင်တဲ့ အုံကြွမှုတွေ စတင်ခဲ့တဲ့ မြို့ဖြစ်ပြီး အစိုးရ တပ်တွေနဲ့ သူပုန်တွေဟာ အဲဒီမှာ တိုက်ခိုက်မှုတွေ မကြာခဏ ဖြစ်ပွားနေတာပါ။

အခုအခြေအနေမှာ ကုလသမဂ္ဂ ငြိမ်းချမ်းရေး စောင့်ကြည့်ရေး အဖွဲ့ ကလည်း ကုဘဲလ်မြို့မှာ ဖြစ်ပွားခဲ့တဲ့ အစုလိုက် အပြုံလိုက် သတ်ဖြတ်မှုကို စုံစမ်းနေတဲ့ အချိန်လည်း ဖြစ်ပါတယ်။

ဟာမားမြို့ အနီးမှာ ရှိတဲ့ အဲဒီကုဘဲလ်ရွာ ဒေသဘက်က လူတွ ပြောဆိုချက်အရ ဆိုရင်တော့ ရွာထဲမှာ လူအနည်းအကျဉ်း လောက်ကလွဲပြီး ကျန်တဲ့ လူတွေ အကုန် နီးပါးလောက် သတ်ဖြတ် ခံခဲ့ရတယ်လို့ ဆိုပါတယ်။

ဂျော်ဒန်နိုင်ငံ နယ်ခြားနဲ့ နီးတဲ့ နိုင်ငံတောင်ပိုင်း ဒဲရာမြို့ကို သောကြာနေ့ ညဖက် ဝတ်ပြုဆုတောင်းချိန် အပြီး သိပ်မကြာခင်မှာပဲ အမြောက်တွေနဲ့ စတင် ပစ်ခတ်ခဲ့တာ လို့ အတိုက်အခံ တက်ကြွ လှုပ်ရှားသူတွေက ပြောပါတယ်။

အစိုးရ တပ်ဖွဲ့တွေဟာ မြို့ရဲ့ အနောက်ဖက် ရပ်ကွက်တခုကို အဓိကထား ပစ်ခတ်ခဲ့တာ ဖြစ်ပြီး၊ အမြောက်နဲ့ ပစ်ခတ်တဲ့ ပုံစံဟာ စိတ်ချောက်ခြားစရာ ကောင်းလောက်အောင် ကြောက်စရာ ကောင်းတယ်လို့ သူတို့က ပြောပါတယ်။

ဗြိတိန်အခြေစိုက် ဆီးရီးယား စောင့်ကြည့် လေ့လာရေး အဖွဲ့ကတော့ အဲဒီ တိုက်ခိုက်မှုတွေ ကြောင့် သေဆုံးရသူတွေဟာ အမျိုးသမီး အများစု ဖြစ်တယ်လို့ ပြောပါတယ်။

အခုလို အစိုးရတပ်ဖွဲ့တွေ ကနေ ဒဲရာမြို့ကို မကြာခဏ တိုက်ခိုက် နှိမ်းနင်း ပေမယ့်လည်း အစိုးရ တပ်ဖွဲ့တွေဟာ မြို့ကို လုံးဝ ထိန်းချုပ် ထားနိုင်မှုတော့ မရှိခဲ့ဘူးလို့ အိမ်နီးချင်း လက်ဘနွန်နိုင်ငံမှာရှိတဲ့ ဘီဘီစီ သတင်းထောက်က ပြောပါတယ်။

သူပုန်တွေရဲ့ FREE SYRIAN ARMY ဆီးရီးယား လွတ်မြောက်ရေး တပ်ဖွဲ့ ကလည်း မြို့ထဲနဲ့ အနီးအနား တဝိုက်မှာ လှုပ်ရှား နေကြတာ ဖြစ်ပါတယ်။

လေ့လာစောင့်ကြည့် သူတွေရဲ့ အဆိုအရ ကတော့ ဆီးရီးယား နိုင်ငံတလွှား သောကြာနေ့က ဖြစ်ပွားခဲ့တဲ့ တိုက်ခိုက်မှုတွေမှာ အရပ်သား ၄၄ ယောက်လောက် သေဆုံးသွားတယ်လို့ ဆိုပါတယ်။ သေဆုံးသွားသူ တဝက် ကျော်ကျော် ကတော့ ဟုမ်းစ်ပြည်နယ်ထဲနဲ့ ဒမားစကပ်စ်မြို့ ရပ်ကွက်တွေ ထဲက ဖြစ်တယ်လို့ ဆိုပါတယ်။

ပြည်နယ် ၅ ခုမှာ စစ်သား ၂၅ ဦးလောက်လည်း သေဆုံးသွားတယ်လို့ ဆိုပါတယ်။

ပြီးခဲ့တဲ့နှစ် မတ်လက စတင်ခဲ့တဲ့ ဆီးရီးယားက ဒီမိုကရေစီရေး လူထု အုံကြွ ဆန္ဒပြမှုတွေမှာ အခု အချိန်အထိ လူပေါင်း အနည်းဆုံး ၉၀၀၀ လောက် သေဆုံးခဲ့ရပြီလို့ ကုလသမဂ္ဂက ပြောပါတယ်။

ဆီးရီးယား အစိုးရကတော့ နိုင်ငံတကာ ဆီးရီးယား ကိုယ်စားလှယ် ကိုဖီအာနန်ရဲ့ အချက် ၆ ချက်ပါ ငြိမ်းချမ်းရေး အစီအစဉ်ကို သဘောတူ လက်မှတ်ရေးထိုးခဲ့ ပေမယ့်လို့၊ အစိုးရ တပ်တွေဟာ နိုင်ငံခြားက ထောက်ခံမှုပေးထားတဲ့ သူပုန်တွေ ကိုတော့ ဆက်လက် တိုက်ခိုက်နေတယ်လို့ ပြောပါတယ်။

ရခိုင်ရွာတွေ မီးရှို့ဖျက်ဆီးခံရတာကို ကန့်ကွက်ကြောင်း ဆန္ဒဖေါ်ထုတ်

တရားဥပဒေ စိုးမိုးမှုမရှိ ဖြစ်နေတာကြောင့် နိုင်ငံတော် အစိုးရက အဖြစ်နိုင်ဆုံး တာဝန်ယူ ပေးဖို့ တောင်းဆို

ရခိုင်ပြည်နယ် မောင်တောမှာ အကြမ်းဖက် ဖျက်စီးခံရတာတွေကို ခံစားနေရတဲ့ ရခိုင် တိုင်းရင်းသားတွေ အတွက် ရန်ကုန်မှာ ရှိနေတဲ့ ရခိုင် တိုင်းရင်းသား ၃၀ဝ ကျော်က ရွှေတိဂုံဘုရား ရင်ပြင်တော် တက်ပြီး ဆန္ဒထုတ်ဖေါ်ပွဲ တရပ် လုပ်ခဲ့ပါတယ်။

အခု အခြေအနေဟာ တရားဥပဒေ စိုးမိုးမှု မရှိ ဖြစ်နေကြောင်း၊ အဲဒီအတွက် ရခိုင်အမျိုးသားတွေရဲ့ အသက်အိုးအိမ် စည်းစိမ်ကို နိုင်ငံတော် အစိုးရက နေပြီး၊ အဖြစ်နိုင်ဆုံး တာဝန်ယူပေးဖို့ တောင်းဆိုထားကြောင်း ဒီပွဲမှာ ပါဝင်ခဲ့တဲ့ ရခိုင်အမျိုးသား ကွန်ယက်က ဒုဥက္ကဋ္ဌ ကိုကျော်ဝင်းချေက ဘီဘီစီကိုပြောပါတယ်။

အခုကိစ္စဟာ ရခိုင်ပြည်နယ်တခု တည်းရဲ့ အရေးမဟုတ်ဘဲ မြန်မာနိုင်ငံ တနိုင်ငံလုံးနဲ့ ဆိုင်တယ်လို့ ယူဆကြောင်း၊ ဒီအတွက် တနိုင်ငံလုံးက တိုင်းရင်းသားတွေ ပူပေါင်းဆောင်ရွက်ဖို့ နိုးဆော်ထားကြောင်း လည်း သူက ပြောပါတယ်။

ရခိုင်တိုင်းရင်းသားတွေဟာ ဒညဝတီဘုန်းကြီးကြောင်းမှာ လူစုပြီး ရွှေတိဂုံဘုရားပေါ်ကို တက်ခဲ့တာ ဖြစ်ပြီး၊ ဒီပွဲမှာ ဘုန်းကြီးအပါး ၅၀ လောက်လည်း ပါဝင်ကြောင်း သိရပါတယ်။

အမျိုးသား ဒီမိုကရေစီအဖွဲ့ချုပ်နဲ့ တိုင်းရင်းသား မဟာမိတ်တွေကလည်း ရခိုင်ပြည်နယ်မှာ ဖြစ်ပွားနေတဲ့ အကြမ်းဖက် ပဋိပက္ခတွေ အတွက် ဝမ်းနည်းကြောင်းနဲ့ သက်ဆိုင်ရာ အနေနဲ့ ဒီအကြမ်းဖက်မှု တွေကို အမြန်ဆုံး အရေးယူ ဆောက်ရွက်ပေးဖို့ ပူးတွဲကြေညာချက် ထုတ်ပြန်လိုက်ပါတယ်။

ထုတ်ပြန်ချက်ထဲမှာ တိုက်ခိုက်မှုတွေဖြစ်အောင် လှုံ့ဆော်နေတာတွေကို ရပ်ဖို့နဲ့ ဘာသာရေး၊ လူမှုရေး အဖွဲ့အစည်းတွေက ကြားဝင်ဆောင်ရွက်ပေးဖို့လည်း တိုက်တွန်းထားပါတယ်။

 စစ်တွေမြို့မှာ ရခိုင်နဲ့ မွတ်ဆလင်တွေ အကြား အခြေအနေ တင်းမာနေ

စစ်တွေမြို့မှာ အစ္စလာမ် ဘာသာဝင်တွေနဲ့ ရခိုင်တွေ အကြား တင်းမာမှုတွေ ကြီးထွား

ရခိုင်ပြည်နယ်တွင်းက မြို့တွေမှာ ရခိုင် တိုင်းရင်းသားတွေနဲ့ အစ္စလာမ် ဘာသာဝင်တွေ အကြား ပဋိပက္ခတွေ ဖြစ်ပွားနေရာမှာ စစ်တွေမြို့ မှာတော့ ရဲတွေက သေနတ် ပစ်ဖေါက်ပြီး လူစုခွဲခဲ့ရတယ်လို့ စစ်တွေ မြို့ခံတဦးက ပြောပါတယ်။

မွန်းလွဲပိုင်းတုန်းက အသက်၆၀အရွယ် မွတ်ဆလင် အဘွားအို တဦးသေဆုံး နေတာ တွေ့ခဲ့ရာကနေ အဲဒီ အဘွားအို သေဆုံးရမှုဟာ ရခိုင်တွေရဲ့ လက်ချက်ကြောင့်ဆိုတဲ့ စွပ်စွဲ ပြောဆိုချက် တွေ ပေါ်ထွက်လာခဲ့ကြောင်း၊ လောလောဆယ် အဘွားအို ဘာ့ကြောင့် သေဆုံးခဲ့ တာလဲဆိုတာ အကြောင်းရင်း မဖေါ်ထုတ်နိုင်သေးချိန်မှာ အခုလို မွတ်ဆလင်တွေ နဲ့ ရခိုင်တွေ အကြား တင်းမာမှုတွေ ပိုကြီးထွားလာခဲ့တာ ဖြစ်ကြောင်း စစ်တွေ မြို့ခံ ရခိုင် အမျိုးသား တဦးက ဘီဘီစီကို ပြောပြပါတယ်။

ညနေပိုင်းအထိ အခြေအနေက ရှေ့မတိုး နောက်မဆုတ်သာ ဖြစ်နေ ဆဲပဲလို့ ဆိုပါတယ်။

သောကြာနေ့တုန်းက ရခိုင်တိုင်းရင်းသားတွေရဲ့ ရွာတွေ မီးရှို့ ဖျက်ဆီး ခံခဲ့ရတဲ့ မောင်တောမြို့မှာတော့ စနေနေ့မှာ အခြေအနေတွေ တည်ငြိမ် နေတယ်လို့ မောင်တော မြို့ခံတဦးက ပြောပါတယ်။

ဒါပေမယ့် ဒီကနေ့အထိ ရွာတွေ မီးလောင်နေတာကို တွေ့နေရဆဲပဲလို့ ဆိုပါတယ်။

မောင်တောမြို့မှာ ဖြစ်ပွားခဲ့တဲ့ ပဋိပက္ခတွေအတွင်း လူတဦး သေဆုံးခဲ့ပြီး လူဦး ဒဏ်ရာရခဲ့တယ်လို့ စနေနေ့ထုတ် အစိုးရ သတင်းစာထဲမှာ ဖေါ်ပြထားပါတယ်။

ထိခိုက်သေဆုံးသူ အရေအတွက် စာရင်းကို အတည်ပြုနိုင်ဖို့ မောင်တော ရဲစခန်းကို ဘီဘီစီက ဆက်သွယ်ခဲ့ပေမယ့် ဖြေကြားခဲ့ခြင်း မရှိပါဘူး။

ရခိုင် လူမျိုးအများအပြား နေအိမ်တွေကို စွန့်ခွာ ထွက်ပြေးခဲ့ကြရတယ်လို့ မျက်မြင်သက်သေတွေက ဘီဘီစီကို ပြောပြပါတယ်။

မြန်မာ့ပြုပြင်ပြောင်းလဲရေး မြောက်ကိုရီးယား အတုယူသင့်

By ဗွီအိုအေ (မြန်မာဌာန)

• မြောက်ကိုရီးယားအနေနဲ့ မြန်မာနိုင်ငံက ဖြစ်ပျက်နေတဲ့ နိုင်ငံရေး၊ စီးပွားရေးပြုပြင်ပြောင်းလဲနေတဲ့ အခြေအနေတွေကို အတုယူသင့်တယ်လို့ အမေရိကန်ပြည်ထောင်စုက မြောက်ကိုရီးယား လူ့အခွင့်အရေးဆိုင်ရာသံအမတ်က ပြောဆိုလိုက်ပါတယ်။

မြောက်ကိုရီးယားနိုင်ငံရဲ့ Pyongyang နျူကလီးယားအစီအစဉ်ကို နိုင်ငံတကာ အဏုမြူစွမ်းအင်အေဂျင်စီ IAEA အဖွဲ့ကြီးကို ၀င်ရောက် စစ်ဆေးခွင့်ပြုမယ်ဆိုရင် အပြုသဘောဆောင်တဲ့ ဆောင်ရွက်ချက်ဖြစ်မှာဖြစ်တယ်လို့ သောကြာနေ့က တိုကျိုမြို့မှာ မစ္စတာ Robert King က သတင်းထောက်တွေနဲ့တွေ့ဆုံတဲ့အချိန် ပြောသွားတာပါ။

မြောက်ကိုရီးယားအနေနဲ့ မြန်မာနိုင်ငံကို နမူနာယူပြီး ပြုပြင်ပြောင်းလဲတာမျိုး အမေရိကန်ပြည်ထောင်စု အနေနဲ့ မြင်လိုတယ်လို့ သူက ပြောတာပါ။ မြန်မာနိုင်ငံမှာ အတိုက်အခံပါတီတွေကို  လွှတ်တော်ထဲမှာ ၀င်ခွင့်ပြုပြီး ပြုပြင်ပြောင်းလဲမူလုပ်တဲ့အတွက် မြန်မာနိုင်ငံအပေါ် ပိတ်ဆို့ဒဏ်ခတ်အရေးယူထားတာတွေကို အမေရိကန်က ရုပ်သိမ်းလိုက်ပါတယ်။

ဒီလိုမျိုး အကောင်းဘက်ကိုဦးတည်တဲ့ တိုးတက်မှုမျိုး မြောက်ကိုရီးယားမှာ ဖြစ်လာမယ်လို့ မျော်လင့်တဲ့ အကြောင်း သူကပြောပါတယ်။ စားနပ်ရိက္ခာအကူအညီတွေပေးဖို့အတွက်ကတော့ လောလောဆယ် မဖြစ်နိုင်သေးပေမယ့် အနာဂတ်မှာတော့ ဖြစ်နိုင်ခြေရှိတယ် ဒီ ထောက်ပံ့မှုဟာ တကယ်လိုအပ်တဲ့ ပြည် သူတွေဆီကို ရောက်မရောက်ဆိုတာကို စောင့်ကြည့်နိုင်ခြင်းမရှိသေးဘူးလို့လည်း မစ္စတာ Robert king ကပြောသွားတာပါ။

မြန်မာနိုင်ငံမှာ ဖြစ်ပေါ်နေတဲ့ အကောင်းဘက်ကို ဦးတည်တဲ့ တိုးတက်မှုမျိုး မြောက်ကိုရီးယားမှာ ပေါ်ပေါက် လာမယ်ဆိုရင် အမေရိကန် ပြည်ထောင်စုနဲ့ နိုင်ငံတကာအသိုင်းအ၀ိုင်းက မြန်မာနိုင်ငံကို ကြိုဆိုသလိုမျိုး တုံ့ပြန်မှာဖြစ်တယ်လို့ မစ္စတာ Robert King ကပြောပါတယ်။

မြောက်ကိုရီးယားအနေနဲ့ မြန်မာနိုင်ငံက နိုင်ငံရေးအပြောင်းအလဲတွေကို သင်္ခန်းစာယူပြီး နိုင်ငံတကာ အသိုင်းအ၀ိုင်းမှာ ၀င်ဆန့်လာအောင် လုပ်ဆောင်ဖို့ တောင်ကိုရီးယားသမ္မတ အီမြောင်ဘက်ခ်ကလည်း ပြီးခဲ့တဲ့ရက်ပိုင်းကကျင်းပခဲ့တဲ့ တောင်ကိုရီးယားကျဆုံးသွားတဲ့ စစ်သည်တွေကို ဂုဏ်ပြုတဲ့အခမ်းအနား တစ်ခုမှာ တိုက်တွန်းပြောဆိုခဲ့ပါသေးတယ်။

မြန်မာ့ပြုပြင်ပြောင်းလဲရေး အမေရိကန်ဖေးမကူညီခဲ့

By ဗွီအိုအေ (မြန်မာဌာန)

• အမေရိကန်ပြည်ထောင်စုအနေနဲ့ ကမ္ဘာတ၀န်းနိုင်ငံတွေမှာ လူ့အခွင့်အရေးမြှင့်တင်ရေးနဲ့ ကာကွယ်ရေး အတွက် လူအင်အားနဲ့ ငွေအင်အား ရင်းနှီးမြှုပ်နှံခဲ့တာကြောင့် မြန်မာနိုင်ငံလိုနိုင်ငံတွေမှာ ပြုပြင်ပြောင်းလဲရေး လမ်းမှန်ပေါ်ရောက်အောင် ကြိုးစားဖေးမပေးနိုင်ခဲ့တဲ့အကြောင်း အမေရိကန် နိုင်ငံခြားရေးဝန်ကြီး ဟီလာရီ ကလင်တန်က မနေ့က ပြောဆိုလိုက်ပါတယ်။

အမေရိကန်နိုင်ငံခြားရေး ၀န်ကြီးဌာန ဒီမိုကရေစီနဲ့ လူ့အခွင့်အရေးဌာနရဲ့ သုံးဆယ့်ငါးနှစ်မြောက် နှစ်ပတ် လည် အခမ်းအနားမှာ ၀န်ကြီး ကလင်တန်က မြန်မာနိုင်ငံ ပြုပြင်ပြောင်းလဲရေး လမ်းမှန်ပေါ်ရောက်အောင် ကြိုးစားဖေးမခဲ့တဲ့အကြောင်း၊ အရှေ့ အလယ်ပိုင်းဒေသနဲ့ အာဖရိကမြောက်ပိုင်းမှာ ဒီမိုကရေစီ အသွင် ကူးပြောင်ရေးကို ထောက်ခံပံ့ပိုးပေးခဲ့တာတွေကို အဓိက ထောက်ပြပြီး အမေရိကန်နိုင်ငံခြားရေးဌာန၊ ဒီမိုကရေစီနဲ့ လူ့အခွင့်အရေးဌာနရဲ့ ၃၅ နှစ်မြောက် နှစ်ပတ်လည်အခမ်းအနား မှာ ပြောဆိုသွားခဲ့တာပါ။

လိင်တူစုံမက်သူ အခွင့်အရေး၊ အလုပ်သမားတွေ စွမ်းဆောင်ရည် မြှင့်တင်ရေး၊ နိုင်ငံတကာမှာ အင်တာနက် လွတ်လပ်ခွင့်အတွက် ကျယ်ကျယ်ပြန်ပြန့်ရအောင် ကြိုးပမ်းပေးနိုင်ခဲ့တာတွေကိုလည်း ၀န်ကြီးကလင်တန်က ထည့်သွင်း ပြောဆိုသွားပါတယ်။ ၃၅ နှစ်တာကာလ အတွင်း ဖိနှိပ်တဲ့အစိုးရတွေကို ပြင်းပြင်းထန်ထန်ဝေဖန် ရင်း ဒီမိုကရေစီပြန့်ပွားအောင် ဆောင်ကျဉ်းပေးခဲ့တဲ့ ဒီမိုကရေစီနဲ့ လူ့အခွင့်အရေး ဌာနရဲ့ စွမ်းဆောင်မှုတွေကို ၀န်ကြီးကလင်တန်က ချီးကျူး ပြောဆိုသွားတာဖြစ်ပါတယ်။

မောင်တောမူဆလင် အဓိကရုဏ်း ထိခိုက်မှုတချို့ရှိ

By မသင်းသီရိ

• ရခိုင်ပြည်နယ်အနောက်ဘက် မောင်တောမြို့မှာ အစ္စလာမ်ဘာသာဝင်တချို့ရဲ့ အကြမ်းဘက်ဆူပှုကြောင့် ၁ ယောက်သေဆုံးပြီး ၄ ယောက် ဒဏ်ရာရသွားပါတယ်။ လူနေအိမ်တချို့လည်း ပျက်စီး မီးလောင် သွားခဲ့ပါတယ်။ ပြည်နယ်ကွပ်ကဲရေးရုံးက VOA ကို ပြောပြချက်အရဆိုရင် အခုတော့ အခြေအနေကို ထိန်းထားနိုင်ပြီလို့ ဆိုပါတယ်။ ဒီကနေ့ မောင်တောမြို့မှာ ဖြစ်ခဲ့တဲ့ အခြေအနေနဲ့ နောက်ဆုံးဖြစ်နေတဲ့ အခြေအနေတွေကို စုံစမ်းထားတဲ့ မသင်းသီရိက တင်ပြပေးထားပါတယ်။

ဒီကနေ့ ဇွန်လ ၈ ရက်၊ သောကြာနေ့ နေ့လည်က မောင်တောမှာဖြစ်ခဲ့တဲ့ အကြမ်းဘက်မှုတွေက  ဒီကနေ့ ညနေပိုင်းထိသတင်းကတော့  သေဆုံးတဦး  ဒဏ်ရာရသူ ၄ ဦးအထိ ရှိခဲ့ပါတယ်။ ဒီပြဿနာတွေ အတွင်း နေအိမ်နဲ့တည်းခိုခန်းအပြင် ဗီဒိုယိုရုံတွေအပါအ၀င် ၁၈ အိမ်လောက်  မီးလောင်ပျက်စီးတာတွေ လည်း  ဖြစ်ခဲ့ပါတယ်။ အခု ညနေပိုင်းမှာတော့ နောက်ထပ် ဒီလို ပြဿနာတွေ ထပ် မဖြစ်ရအောင်  ဒေသဆိုင်ရာ လုံခြုံရေးတွေက ထိန်းထားတယ်ဆိုတဲ့ နောက်ဆုံးအခြေအနေကိုတော့ ရခိုင်ပြည်နယ်ကွပ်ကဲရေးရုံးက  ပြန်ကြားရေးတာဝန်ခံ ဦးဝင်းမြိုင်ကပြောပါတယ်။

“အခုနောက်ပိုင်း အခြေအနေကတော့ ကောင်းသွားပြီလို့ သိရပါတယ်။ ကျနော်တို့ဆီမှာ တိုင်းရင်းသားက ဆရာဝန် ဓားထိုးခံရတဲ့သတင်းလောက်ပဲ ရှိပါတယ်ခင်ဗျ။ သူကတော့ ဝမ်းဗိုက်မှာ အထိုးခံရတယ်၊ ဆေးရုံမှာ ဆေးကုသဆဲရှိတယ်။ အဲလောက်ပဲ သိပါတယ်ခင်ဗျ။ လောလောဆယ် သတင်းရတာတော့ ဒေါက်တာခင်မောင်လတ်ရယ်၊ သူ့အမျိုးသမီးရယ်နဲ့ စုစုပေါင်း လေးယောက် ဒဏ်ရာရထားတာတော့ ရှိတယ်။ တိုင်းရင်းသားထဲက ဓားထိုးဒဏ်ရာနဲ့ ဆုံးသွားတာ တယောက်ပဲ ရှိပါသေးတယ်။ အခုတော့ အခြေအနေ ထိန်းထားနိုင်ပါပြီခင်ဗျ။”

ရုန်းရင်းဆန်ခတ်ဖြစ်နေပြီး တိုက်ခိုက်မှုတွေအထိ ဖြစ်နေတဲ့ ဒီအခြေအနေတွေကိုထိန်းနိုင်ဖို့ လုံခြုံရေး အဖွဲ့တွေက သေနတ်ကို မိုးပေါ်ထောင် ပစ်တာနဲ့ မီးသတ်ပိုက်သုံးပြီး လူစုခွဲထားတွေ လုပ်ခဲ့ပေမဲ့ လူစုလူဝေးထဲ သေနတ်နဲ့ပစ်တာမျိုး၊ သေနတ်ဒဏ်ရာရသွားတာမျိုး မရှိဘူးလို့လည်း ပြောပါတယ်။

“ကျနော်တို့ဆီမှာ ပစ်တယ်၊ ခတ်တယ်ဆိုတာတော့ မရှိသေးပါဘူး။ တခုတော့ရှိတာပေါ့။ လူစုကွဲအောင်လို့ မီးသတ်ကားနဲ့ရေပက်တာတို့၊ မိုးပေါ်ထောင်ဖောက်တာတို့ အဲလောက်တော့ ရှိတာပေါ့။ အိမ်မီးလောင် တာတွေ ငြိမ်းတာလေ။ အဲလောက်တော့ ရှိပါတယ်။ လူထုကို တည့်တည့်ပစ်ခတ်တာတော့ မရှိပါဘူးဗျ။ တယောက်နဲ့တယောက် ခုတ်ကြ၊ ဖြတ်ကြတာ ဒဏ်ရာရတဲ့လူလည်း ရှိပါတယ်။ သူတို့ဘက်က ဒဏ်ရာ ရတာတော့ ကျနော်တို့မှာ မသိနိုင်သေးဘူးဗျ။”

ရခိုင်ပြည်နယ်ကွပ်ကဲရေရုံးက  ပြန်ကြားရေးတာဝန်ခံ ဦးဝင်းမြိုင်က မောင်တောက နောက်ဆုံး အခြေအနေတွေ ပြောပြခဲ့တာပါ။ ဒီပြဿနာဟာ ရမ်းဗြဲမြို့နယ်၊ ကျောက်နီမော်ကျေးရွာမှာ ဖြစ်ခဲ့တဲ့ အခြေအနေပေါ် အခြေခံပြီး သောကြာနေ့မို့ ဗလီဘုရားကျောင်းကနေ ၀တ်ပြုပြီး ဆင်းလာကြတဲ့ မူဆလင်တချို့ရဲ့ မကျေနပ်မှုတွေက စခဲ့တာဖြစ်တယ်လို့လည်း ပြောပါတတယ်။

မကျေမနပ်ဖြစ်နေကြတဲ့ မူဆလင်တချို့ဟာ ရခိုင်တိုင်းရင်းသားတွေပိုင်တဲ့ အိမ်တွေ၊ ဆိုင်တွေကို စပြီးတိုက်ခိုက်ခဲ့တာဖြစ်တယ်လို့  တိုက်ခိုက်ဖျက်ဆီးတာခံလိုက်ရတဲ့ မောင်တော United တည်းခိုခန်းပိုင်ရှင် ဦးစံရွှေကလည်း ပြောပြပါတယ်။

“၁၂ နာရီခွဲလောက်မှာ ဆုတောင်းပွဲကအပြန်မှာ သွားဖြစ်တယ်။ လူအုပ်ကြီးကများတော့လည်း သွေးက နည်းနည်းပါးပါး ကြွလာတယ် ထင်ပါတယ်။ အဲဒါနဲ့ လမ်းကနေပြီးတော့မှ ဆီတွေ၊ ခဲတွေနဲ့ ပထမ United တည်းခိုခန်းကို စပြီးတော့ ခဲနဲ့ထုတာပေါ့။ ပြီးတာနဲ့ တည်းခိုခန်း ပိုင်ရှင်အိမ်ကို ထုတယ်။ လူအုပ်က များလာတော့ လမ်းမှာအပြည့်ပေါ့လေ- ကျနော်တို့အိမ်ရော တဆက်တည်းဆိုတော့ အိမ်ရော ပါသွားတာပေါ့။ အဲဒီကမှတဆင့် ဒီဘက် ဗိုလ်မှူးရွာမှာ ဒီဘက်က သဇင်တည်းခိုခန်းကို မီးရှို့တယ်။ ပြီးတာနဲ့ ဘေးနားကအိမ်ကို ဖျက်ဆီးတယ်။

နောက်ပြီးတော့ ဗိုလ်မှူးရွာအတွင်းမှာရှိတဲ့အိမ် ၇ လုံးလောက် မီးရှို့ပစ်တယ်။ ကျနော်ထင်တာ ကတော့ တောင်ကုတ်ကိစ္စနဲ့ ပတ်သက်ပြီးတော့  သူတို့ မကျေမနပ်ဖြစ်တာ ထင်ပါတယ်။ ဒေသခံတွေ ကကျတော့  စိုးရိမ်တာပေါ့။ တိုင်းရင်းသား ဒေသခံတွေက လူနည်းစု ၃၀၀ ကျော်လောက်ပဲ ရှိတာကို။ အခု ရဲတပ်ရင်း (၂) ကနေပြီးတော့မှ လုံခြုံရေးအင်အား ၁၅၀ လောက်နဲ့ နေရာ သုံးနေရာခွဲပြီး နေရာချ ထားတယ်လို့ သိရပါတယ်။

ဒါပေမဲ့ ဖြစ်တဲ့အချိန်ကတော့ သူတို့က မရှိဘူးလေ။ နေရာက လှမ်းနေတော့လည်း အချိန်မမီဘူးပေါ့။ အဲဒါ မီးရှို့တဲ့အချိန်မှာလည်းပဲ ဘာမှတော့ လုပ်လို့ မရဘူးပေါ့လေ။ နောက်တခါ ကျနော်တို့ ဒီဘက်မှာ ညနေ သုံးနာရီကျော်ကျော်လောက်မှာကျတော့ အနားမှာရှိတဲ့ ရခိုင်ရွာမှာလည်း ရခိုင်အိမ် ၄ လုံး ဗွီဒီယို ရုံတရုံ မီးရှို့ပစ်တယ်။”

ဒါကတော့ မောင်တောမြို့ခံ ဦးစံရွှေက ပြောပြခဲ့တာပါ။ အခုညပိုင်း နောက်ဆုံးအထိတော့ အခြေအနေတွေဟာ တည်ငြိမ်နေပြီဖြစ်ပြီး မောင်တော မြို့တ၀ိုက်မှာတော့ လုံခြုံရေးတွေ ချထားတာ တွေ့ရတယ်လို့ မြို့ခံတွေက ပြောပါတယ်။

ရခိုင်ပြည်နယ် ရမ်းဗြဲမြို့၊ ကျောက်နီမော်ရွာမှာ မလ ၂၈ ရက်နေ့က မသီတာထွေးကို လူငယ်သုံးဦးက ပစ္စည်းလုယူ၊ အဓမ္မပြုကျင့်ပြီးတော့ အကြမ်းဘက် သတ်ဖြတ်ခဲ့တဲ့ ဖြစ်ရပ်ကနေ အခုလို ပြဿနာတွေ စခဲ့တာဖြစ်ပါတယ်။ အဲဒီနောက် ဇွန်လ ၃ ရက်နေ့က တောင်ကုတ်မြို့မှာ အစ္စလာမ်ဘာသာဝင်တွေ စီးလာတဲ့ကားကို လူတစုက  အကြမ်းဘက် တားဆီးပြီး ရိုက်နှက်သတ်ဖြတ်ခဲ့တာကြောင့် ကားပေါ် ပါလာတဲ့ လူ ၁၀ ဦး သေဆုံးခဲ့တဲ့အထိ နောက်ဆက်တွဲဖြစ်ခဲ့ပြီးတဲ့နောက် အခုတကြိမ် မောင်တော မှာ ပြဿနာတွေ ထပ်ဖြစ်ခဲ့တာပါ။ အစိုးရကတော့ ရခိုင်ပြည်နယ်ထဲ မှာ ဖြစ်ခဲ့တဲ့ ပြဿနာတွေ ရဲ့ ဖြစ်ရပ်မှန်ကို ဖော်ထုတ်နိုင်ဖို့အတွက် စုံစမ်းစစ်ဆေးရေး အဖွဲ့တဖွဲ့ကို ဇွန်လ ၆ ရက်နေ့က ဖွဲ့စည်းခဲ့ပြီးဖြစ်ပါတယ်။

နောက်ဆုံးရတဲ့ သတင်းအရ မောင်တောနဲ့ ဗူးသီးတောင် မြို့ပေါ်ရပ်ကွက်တွေမှာ ပုဒ်မ ၁၄၄၊ ထုတ်ပြန်ထားတယ်လို့ သိရပါတယ်။

ဥရောပဖလား လူမျိုးရေး ခွဲခြားမှု

By ဗွီအိုအေ (မြန်မာဌာန)

• ပိုလန်နဲ့ ယူကရိန်းနိုင်ငံ ၂ ခု ပူးတွဲအိမ်ရှင်အဖြစ် ကျင်းပနေတဲ့ ဥရောပဖလား ဘောလုံးဗိုလ်လုပွဲ ဒီကနေ့ ပွဲစဉ်တွေကတော့ အုပ်စု B က နယ်သာလန် နဲ့ ဒိန်းမတ် တို့ ၂ သင်းက တပွဲ၊ ဂျာမနီနဲ့ပေါ်တူဂီက တပွဲ ကန်ကြဖို့ရှိပါတယ်။

နယ်သာလန် နဲ့ ဒိန်းမတ် ပွဲကို ယူကရိန်းနိုင်ငံ ဟာကဗ်မြို့က Metalist ဘောလုံးကွင်းမှာ ဒေသစံတော်ချိန် ညနေ ၆ နာရီမှာ စမှာဖြစ်ပြီး၊ ဂျာမနီနဲ့ ပေါ်တူဂီပွဲကိုတော့ ယူကရိန်းမှာပဲ လဗြူးမြို့က လဗြူးကွင်းမှာ ဒေသအချိန် ည ၈ နာရီ ၄၅ မိနစ်မှာ စ ကန်ကြမှာဖြစ်ပါတယ်။

မနေ့ကစခဲ့တဲ့ ဥရောပဖလား ဘောလုံးဗိုလ်လုပွဲ ပွဲဦးထွက် ပိုလန်နဲ့ ဂရိပွဲမှာ ၁ ဂိုးစီ သရေကျပါတယ်။ ရုရှား နဲ့ ချက် နိုင်ငံပွဲမှာတော့ ရုရှား က ၄ ဂိုး၊ ချက်သမ္မတနိုင်ငံက ၁ ဂိုးနဲ့ ရုရှား အသင်း နိုင်သွားပါတယ်။

ခြေစစ်ပွဲအောင်ထားကြတဲ့ ဥရောပ ၁၆ သင်း ဗိုလ်လုကြမယ့် ပွဲတွေ မစတင်ခင်ကတည်းက အိမ်ရှင်အဖြစ် လက်ခံကျင်းကြတဲ့ အိမ်ရှင်နိုင်ငံတွေက ပွဲကြည့် ပရိသတ်ဟာ လူမျိုးရေးနဲ့ အသားအရောင် ခွဲခြားဆက်ဆံမှုတွေ ရှိနေတယ်ဆိုတဲ့ ဝေဖန်မှုတွေ ကျယ်ကျယ်ပြန့်ပြန့် ထွက်ပေါ်နေပါတယ်။

ဗုဒ္ဓဟူးနေ့တုန်းကလည်း ပိုလန်နိုင်ငံ ခရာကောင်းမြို့ကကွင်းမှာ နယ်သာလန် အသင်း လေ့ကျင့်နေစဉ်မှာ လာကြည့်သူတွေက မျောက်တွေအော်သလို အသံတွေပေး လှောင်ပြောင်တာ ခံခဲ့ရပါတယ်။ ဒီလို ဘောလုံးသမားတွေ၊ လာရောက်ပွဲကြည့်သူတွေအပေါ် အသားအရောင် ခွဲခြားဆက်ဆံမှုကို တင်းတင်းကျပ်ကျပ် အရေးယူဖို့ ဥရောပ ဘောလုံးအဖွဲ့ချုပ်ကို ဝိုင်းပြီး ပြောနေကြပါတယ်။

KNPP နဲ့ အစိုးရ သဘောတူညီချက် လက်မှတ်ထိုး

By ဗွီအိုအေ (မြန်မာဌာန)

• အစိုးရရဲ့ ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီ ကိုယ်စားလှယ်တွေနဲ့ ကရင်နီ အမျိုးသား တိုးတက်ရေးပါတီ KNPP ကိုယ်စားလှယ်တို့အကြား လွိုင်ကော်မှာ ဆွေးနွေးပွဲကနေ သဘောတူညီချက် ၁၄ ချက်ကို ဒီကနေ့ သဘောတူ လက်မှတ်ရေးထိုးလိုက်ကြပါတယ်။

သဘောတူညီချက်တွေ ထဲမှာ နှစ်ဘက် ခံစစ်ကလွဲလို့ ထိုးစစ်တွေအားလုံး ဆက်ပြီးတော့ ရပ်ဆိုင်းထားဖို့၊ ပြည်တွင်းမှာ ရွှေ့ပြောင်းနေထိုင်သူ IDP တွေကို ပြန်လည်ပြီးတော့ စနစ်တကျ နေရာချထားနိုင်ရေး အတွက် နှစ်ဘက် ညှိနှိုင်း ဆောင်ရွက်ဖို့၊ ကယားပြည်နယ်ထဲမှာ လူ့အခွင့်အရေး ချိုးဖောက်မှုတွေ မရှိစေဖို့၊ အမျိုးသား လူ့အခွင့်အရေး ကော်မရှင်နဲ့ ပူးပေါင်းဆောင်ရွက်ဖို့၊ KNPP လက်နက်ကိုင် အဖွဲ့ဝင်တွေနဲ့ ဆက်နွယ်နေတဲ့ ဖမ်းဆီးခံ အကျဉ်းသားတွေကို ရာဇ၀တ်မှုမှအပ အမြန်ဆုံး ပြန်ပြီးတော့ လွှတ်ပေးဖို့၊ အပစ်ရပ် သဘောတူထားတဲ့ တိုင်းရင်းသား လက်နက်ကိုင်အဖွဲ့တွေ၊ တခြား တိုင်းရင်းသားအဖွဲ့တွေ၊ နိုင်ငံရေးပါတီတွေ အားလုံး ပါဝင်တဲ့ တနိုင်ငံလုံး အတိုင်းအတာနဲ့ နိုင်ငံရေး ဆွေးနွေးပွဲတွေ လုပ်ဖို့ စတဲ့ အချက်အလက်တွေကို ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီ ဒုတိယ ဥက္ကဋ္ဌ ၀န်ကြီး ဦးအောင်မင်း၊ KNPP ငြိမ်းချမ်းရေး ဖော်ဆောင်ရေးအဖွဲ့ ခေါင်းဆောင် ခူဦးရယ် တို့ ဦးဆောင်ပြီး လက်မှတ်ထိုးခဲ့ကြပါတယ်။

စစ်တွေတင်းမာမှု အလားအလာ

By ကိုဇော်ဝင်းလှိုင်

• ရခိုင်ပြည်နယ်အတွင်း မောင်တော အပါအ၀င် တချို့မြို့တွေမှာ အဓိကရုဏ်းတွေ ဖြစ်နေတာမှာ စစ်တွေမြို့မှာတော့ ဒီကနေ့ ရခိုင် ဗုဒ္ဓဘာသာဝင်တွေနဲ့ မူစလင်တွေအကြား အခု အသံမလွှင့်ခင် အချိန်ထိ ထိပ်တိုက် ရင်ဆိုင်မှုတွေ ဖြစ်ပေါ်နေတယ်လို့ RNDP ရခိုင်တိုင်းရင်းသားများ တိုးတက်ရေးပါတီက ပြည်နယ် လွှတ်တော်အမတ် ဦးအောင်မြတ်ကျော်က ပြောပါတယ်။ အခြေအနေတွေဟာ အတော်လေး တင်းမာနေပြီး မကြာခင်မှာ ပေါက်ကွဲတော့မယ့် အခြေအနေမျိုး ဖြစ်နေတယ်လို့လည်း ဗွီအိုအေ ၀ိုင်းတော်သား ကိုဇော်ဝင်းလှိုင်က ဆက်သွယ် မေးမြန်းတဲ့အခါ ဦးအောင်မြတ်ကျော်က ပြောပါတယ်။

“ဟုတ်ပါတယ်။ အခြေအနေက ဆိုးနေပါတယ်။ အခြေအနေက ဒီဘက် ၏က ကျနော်တို့ ရခိုင်မြို့အထက်ဘက်မှာတော့ ဘာမှ ပြဿနာမရှိဘူး။ အပြင်ဘက် မြို့စွန်မှာတော့ ဘင်္ဂါလီ မူစလင်တွေက အကုန်လုံး စုပြီး တက်လာကြတယ်။ တက်လာကြတော့ ဒီဘက်က ရခိုင်တွေကတော့ ကိုယ့်ဟာကိုယ် ကာကွယ်ဖို့အတွက်ကတော့ လုပ်နေရသလို ဖြစ်နေတာပေါ့။ ရဲတပ်ရင်းတွေကလည်း သေနတ်ပစ်ဖောက်ပြီး သူတို့ကို လူထုခွဲမလို့ လုပ်တယ်။ လုပ်ပေမဲ့လည်း မိုးပေါ်ထောင်ပစ်တဲ့ သဘောမျိုးဆိုတော့ လူက ကွဲမသွားဘူး။ အဲဒီအတိုင်းပဲ တင်းခံနေတယ်။ အခု အခြေအနေက ဘုမေ ကျေးရွာမှာ။ မူစလင်တွေ များတဲ့နေရာပေါ့။ အဲဒီဘုမေ ကျေးရွာမှာလည်း နောက်မဆုတ်တော့ဘဲ အဲဒီနေရာမှာ တင်းခံနေတယ်။ အဲဒီလိုမျိုး ဖြစ်နေတယ်။”

ရိုက်တာ ပုပ်တာ အကြမ်းဖက်တာတွေတော့ မရှိသေးဘူးပေါ့။ နှစ်ဘက် ထိပ်တာ ဖြစ်နေကြတဲ့အဆင့်မှာပဲ ရှိသေးတယ်ပေါ့။

“ဟုတ်ကဲ့။ တင်းမာနေပါတယ်။ အဲဒါကို ထိန်းချုပ်ဖို့ ရဲတပ်ရင်းတွေကတော့ လိုက်ပြီး ထိန်းနေကြပါတယ်။ အခြေအနေကတော့ ဒီဘက်ကလည်း ရခိုင်ဘက်ကလည်း ဒီအတိုင်းဆိုရင် တရက်လောက် ကြာလာရင် ပေါက်ကွဲလာနိုင်တယ်။ အဲဒီလိုမျိုး စိုးရိမ်ရတဲ့ အခြေအနေမှာ ရှိပါတယ်။”

ရဲတပ်ဖွဲ့တွေ ချထားတယ်၊ လုံခြုံရေးတွေ ချထားတယ် ဆိုတော့ တပ်အင်အား ဘယ်လောက်လောက် ရှိလဲခင်ဗျ။

“တပ်အင်အားတော့ အဲဒါတော့ အတိအကျတော့ မပြောတတ်ဘူး။ အဲဒီနေရာမှာတော့ ၂၀-၃၀ လောက်ပဲ ချထားပေးတယ်။ ဟိုဘက်က သဲချောင်းဘက်ကလည်း တက်လာကြတယ်လို့ အခုပဲ သတင်းဝင်လာတယ်။”

သူတို့ဘက်ကရော အင်အား တော်တော်များလားခင်ဗျ။

“များပါတယ်။ သူတို့ဆီက လူအင်အား သောင်းဂဏန်း နီးပါးလောက်ကို စုနေကြပြီ။”

ရခိုင်ဘက်ကရော အခု အင်အား ဘယ်လောက်လောက် စုမိနေကြလဲ။ အခု လောလောဆယ်မှာ။

“ရခိုင်ဘက်ကတော့ အဲဒီဟာနဲ့ ထိပ်တိုက်ရင်ဆိုင်ဖို့တော့ မသွားကြဘူး။ ကိုယ့်ရဲ့ ရပ်ကွက်မှာပဲ ကိုယ့်ရပ်ကွက် လုံခြုံရေးအတွက်ကတော့ ကိုယ့်ဟာကိုယ်စုပြီး နေနေကြတယ်။ အဲဒီလို ရှိနေပါတယ်။ မနက်ပိုင်းနဲ့ နေ့လယ်ပိုင်းလောက်မှာ ဘာမှမဖြစ်ဘဲ ညနေပိုင်းလောက်မှာ တင်းမာလာတဲ့ အခြေအနေဆိုတော့ သွေးထိုးလှုံ့ဆော်တဲ့ အဖွဲ့တဖွဲ့ရှိလို့ အဲဒီလိုဖြစ်တဲ့သဘောမျိုး ဖြစ်နေပါတယ်။”