ပညာရေး ပညာရေး ပညာရေး

Published on Monday, 20 February 2012 09:40

Written by ဇော်မင်း

တိုင်းပြည်တပြည်မှာ နိုင်ငံသားတွေအတွင်း ဒီမိုကရေစီလည်းတည်ဆောက်၊ လွတ်လပ်ခြင်းကိုခံစား၊ တရားဥပဒေ စိုးမိုးမှုလည်း တိုးတက်ဖွံ့ဖြိုးလာဖို့အတွက် လူတိုင်းမှာ ဆန္ဒရှိကြတယ်။ အဲတာတွေအတွက် နိုင်ငံရေး ပြုပြင်ပြောင်းလဲမှုတွေရှိဖို့ကလည်း မဖြစ်မနေ လိုအပ်တယ်။ အဲသလို ပြောင်းလဲလာတာတွေ၊ တည်ဆောက်လာတာတွေ ခိုင်မာလာဖို့၊ ကျင့်သားရလာဖို့ကလည်း တဖက်မှာ လိုလာပြန်တယ်။ တစတစနဲ့ ဒီမိုကရေစီရဲ့ ကျင့်စဉ်၊ လွတ်လပ်မှုတန်ဖိုး၊ တရားဥပေဒ စိုးမိုးမှု အသားကျခြင်းတို့ အကောင်အထည် ပေါ်လာဖို့အတွက် အစပျိုးတဲ့ နေရာ၊ ဂိတ်ဆုံးရတဲ့ နေရာ၊ လက်ညိုးထိုးပြရမယ့် နေရာကတော့ ပညာရေးစနစ်ပါပဲ။

ကလေးဘဝကနေ တက္ကသိုလ် ပညာရေးအထိ ကျောင်းသားတွေ လေ့လာ၊ ဆည်းပူး၊ မှတ်သား၊ မြိုချရမယ့် ပညာရေးစနစ် ကောင်းရင်ကောင်းသလို တိုင်းပြည် တိုးတက်မှု မြန်ဆန်ပါတယ်။ ပညာရေးစနစ်က မူမမှန်ရင် လူ့အဖွဲ့အစည်း တိုးတက်ဖို့လည်း မူမှန်လေ့မရှိဘူး။ လူ့အဖွဲ့အစည်း တိုးတက်တာ မူမမှန်ရင် ကျနော်တို့ ပြောနေတဲ့ ဒီမိုကရေစီ အုတ်မြစ် ခိုင်မာရေးဟာလည်း မူမှန်ဖို့ ခက်ခဲပေလိမ့်မယ်။
အခုအချိန်မှာ မြန်မာပြည်ရဲ့ ပညာရေးစနစ် တည်ရှိမှုဟာ အလွန်ကို စိတ်ပျက်ဖွယ် ကောင်းလောက်အောင် ဖြစ်နေတယ်။ လူငယ် လူရွယ်တွေ ပညာကို အခြေခံပြီး ဘဝရှင်သန် တိုးတက်ဖို့ဆိုတာ ဂျိုနဲ့လားလို့တောင် မေးရမလို ဖြစ်နေတယ်။ တက်လာတဲ့ အစိုးရသစ် ဆိုတာကလည်း နိုင်ငံတကာက ကြည့်ရင် မြင်သာတဲ့ အပေါ်ယံနိုင်ငံရေး အပြောင်းအလဲလောက်ပဲ လုပ်ဖို့ အားသန် နေတာ တွေ့ရတယ်။ ပညာရေးကို ဘယ်နှစ်နှစ်အတွင်းမှာ ဘယ်လိုဘယ်ပုံ တိုးတက်အောင် ဆောင်ရွက်မယ် ဆိုတာမျိုး ခိုင်ခိုင်မာမာ အချက်နဲ့ အလက်နဲ့ ပြောတာကို မတွေ့သေးဘူး။ လွတ်တော်အတွင်းက အမတ်ဆိုတာတွေကလည်း မရောင်ရာ ဆီလူးပြီး မဟုတ်ကဟုတ်က တွေတော့ ငြင်းကြခုံကြတယ်။
ပညာရေးနဲ့ ပတ်သက်လို့ နက်နက်ရှိုင်းရှိုင်း တင်ပြတဲ့သူ အခုအထိ  တယောက်မှ မတွေ့သေးဘူး။ နောက်တချက်ကတော့ လူတွေပြောလွန်းလို့ ထင်ပါရဲ့။ လတ်တလောမှာ လွတ်တော်က ပညာရေးဘတ်ဂျက် တိုးမြှင့်လိုက်တယ်။ ဒါပေမယ့် စစ်အသုံးစရိတ် ဘတ်ဂျက်ချပေးတာနဲ့ ယှဉ်လိုက်ရင် ဘာမှ မဖြစ်လောက်တာကို မြင်ရတယ်။ သမ္မတအပြောအရတော့ အင်အားကြီးတဲ့ နိုင်ငံတွေက ဗိုလ်မကျနိုင်အောင် ခေတ်မီ တပ်မတော်တရပ် ထူထောင်ဖို့ လိုတယ်လို့ တလောလေးက ပြောသေးတယ်။
ဒီနေရာမှာ ထပ်မေးချင်တာက မြန်မာတပ် ခေတ်မီတော့ကော တရုတ်တို့ အိန္ဒိယတို့လို စူပါပါဝါတွေနဲ့ တေ့တေ့ဆိုင်ဆိုင် တိုက်ကြတော့မယ်ဆိုရင် ကိုယ်ဖက်က နိုင်မှာမို့လို့လား။ ကလေးစစ်သားတွေနဲ့ ဖွဲ့ထားတဲ့ စစ်တပ်။ စိတ်ဓာတ်ရေးရာ အောက်ဆုံးမှာ ရောက်နေတဲ့ စစ်တပ်။ အလွန်အကျွံ လာဘ်ပေးလာဘ်ယူမှုနဲ့ အသားကျနေတဲ့ စစ်တပ်ကို ဘယ်လိုများ ခေတ်မီအောင် လုပ်မလဲ။ ပိုးသာကုန် မောင်ပုံစောင်းမတတ် ဆိုတာပဲ ဖြစ်တော့မှာပေါ့။ 
နောက်တချက်ကတော့ ဂျာအေး သူ့အမေရိုက်ပါလို့ ဇာတ်လမ်းကလည်း တဖက်မှာ ရှိနေသေးတယ်။ ဘာဇာတ်လမ်းလဲ ဆိုတော့ ဆင်းရဲနွမ်းပါးမှု ဆိုတဲ့ ဇာတ်လမ်းပါ။ ပညာရေးအသုံးစရိတ် တိုးမြှင့်တာကလည်း မဖြစ်စလောက်။ မိဘတွေကလည်း ဆင်းရဲ ဆိုတဲ့ အခြေအနေမှာ ငယ်ငယ်ရွယ်ရွယ်နဲ့ ကျောင်းထွက်ပြီး အလုပ်လုပ်ရတဲ့ ကျောင်းသားတွေက ဆက်ပြီး များနေဦးမယ်ဆိုတာ မှန်းလို့ရ တယ်။ အစိုးရသစ်ရဲ့ ဖွဲ့စည်းပုံအခြေခံ ဥပဒေထဲမှာ အထက်တန်းအဆင့်အထိ ကလေးတွေဟာ မဖြစ်မနေ (မသင်မနေရ) အခမဲ့ ပညာသင်ကြားခွင့် ရှိရမယ်လို့ ပြဌာန်းထားတာ မတွေ့ရသေးဘူး။ ဒီလိုမျိုး ပြဌာန်းချက်ကို အိန္ဒိယနိုင်ငံရဲ့ ဖွဲ့စည်းပုံအခြေခံ ဥပဒေထဲမှာ တွေ့ရတယ်။ မြန်မာဗိုလ်ချုပ်တွေက သူတို့အိတ်ထဲက ပိုက်ဆံနဲ့ စိုက်သင်ပေးရမှာစိုးလို့ အဲသည့် အချက်ကို ချန်ထားခဲ့တာလားဆိုတာ မေးစရာ ဖြစ်လာတယ်။ ထိုင်းနိုင်ငံမှာဆိုရင်လည်း ကျေးလက် အစွန်အဖျားအထိ မူလတန်း၊ အလယ်တန်း၊ အထက်တန်းကျောင်းတွေ ရှိနေတယ်။ အဲတာအပြင် ကျောင်းသားတွေရဲ့ ကာယဖွံ့ဖြိုးမှုအတွက် နေ့တိုင်းတောင် နေ့လည်စာနဲ့ နွားနို့ အခမဲ့ တိုက်သေးတယ်။
မြန်မာပြည်မှာက မူလတန်းကနေ တက္ကသိုလ်အထိ အစိုးရ ချုပ်ကိုင်ထားတဲ့ ပညာရေးစနစ်သာ ဖြစ်တယ်။ ပညာရေးစနစ်ဟာ မလွတ်လပ်ပါဘူး။ အရည်အသွေးလည်း ညံ့ဖျင်းတယ်။ ဒါကြောင့် ပိုက်ဆံရှိတဲ့ ကြေးရေတတ် မိဘတွေ တချို့က အလယ်တန်း လောက်ကတည်းက သားသမီးတွေကို စင်္ကာပူမှာ ကျောင်းသွားထားတာမျိုး ရှိလာတယ်။ အတော်များများ ကျောင်းသားတွေ ကတော့ မြန်မာပြည်မှာ တက္ကသိုလ်အဆင့်ပြီးရင် ထိုင်း၊ စင်္ကာပူစတဲ့ နိုင်ငံတွေမှာ ဆက်တက်ကြတယ်။ မြန်မာပြည်က ဘွဲ့လွန်၊ ပါရဂူဆိုတဲ့ ဘွဲ့တွေက သုံးစားလို့ မရဘူးဆိုတာ သိနေတာကိုး။ သည့်ထက် ပိုတတ်နိုင်တဲ့ သူတွေကတော့ အနောက်နိုင်ငံတွေမှာ ဆက်ပြီး ပညာသင်ကြတယ်။ မြန်မာနိုင်ငံသား မိဘတွေဟာ အခုလို ခေတ်ပျက်ကြီးထဲမှာတောင် သားသမီးတွေကို စီးပွားရေးထဲ ချက်ခြင်း ဆွဲမသွင်းဘဲ ပညာရေးကို တတ်နိုင်သလောက် အားပေးနေတယ်ဆိုတာ မြင်နိုင်တယ်။ ပြောရရင် ကိုယ့်သားသမီးကို တက္ကသိုလ် အဆင့်မှာ ရှိသမျှ အတန်းကုန်အောင်အထိ ပညာသင်စေလိုတယ်။ ဆိုလိုတာက မြန်မာမိဘတွေဟာ ခေတ်အဆက်ဆက် တိုင်း ပညာရေး အရေးကြီးတယ် ဆိုတာကို နားလည်ခဲ့တယ်။ နားမလည်တာက အုပ်စိုးသူ အစိုးရ အဆက်ဆက် ဖြစ်နေတော့တယ်။
ဒီလို အခြေအနေမျိုးမှာ အုပ်ချုပ်သူတွေဟာ ဒို့တိုင်းပြည်က ပညာရေးစနစ်ကိုလည်း တချိန်တုန်းကလို ပြန်ဦးမော့လာအောင် လုပ်မယ်ဆိုတဲ့ ဒေါင်းတင်မောင်းတင် စိတ်ဓာတ်မျိုး မရှိတာ မြင်ရပြန်တယ်။ မရှိတာကလည်း သူတို့ကိုယ်တိုင်က ပညာ ကောင်းကောင်း မတတ်လို့ ဖြစ်ရတာဆိုတာ မြင်သာတယ်။ အစိုးရအနေနဲ့ နိုင်ငံခြား တိုက်ရိုက် ရင်နှီးမြှုပ်နှံမှုတွေ မြန်မာပြည်ထဲ လာအောင် တတ်နိုင်သလောက် ဆွဲဆောင်နေတယ်။ ဒါပေမယ့် ပညာရေးကို ရင်းနှီးမြှုပ်နှံလိုတဲ့ နိုင်ငံခြား ရင်းနှီးမြှုပ်နှံသူတွေကို ဆွဲဆောင်ဖို့တော့ မေ့နေဟန်ရှိတယ်။ အကယ်၍ ပညာရေးနဲ့ ပတ်သက်လို့ ရင်းနှီးမြုပ်နှံလိုတဲ့ နိုင်ငံခြား ရင်နှီးမြုပ်နှံသူတွေရှိရင် သူတို့ကိုတောင် ပိုပြီး ဦးစားပေးသင့်တယ်။ စီးပွားရေးကုမ္ပဏီတွေ မရနိုင်တဲ့ အခွင့်အရေးမျိုးတွေကိုတောင် ပေးသင့်တယ်၊ နိုင်ငံသား ရင်းနှီးမြုပ်နှံသူ တွေထဲကလည်း ပညာရေးအတွက် လုပ်ဆောင်မယ်ဆိုရင် သူတို့ကိုလည်း အထူးဦးစားပေးရမယ့် စာရင်းထဲမှာ ထည့်ထားသင့်တယ်။
ပညာရေး ဦးမော့လာဖို့ဆိုတာ ပြောတဲ့ နေရာမှာ တိုးတက်ခေတ်မီပြီးသား အနောက်နိုင်ငံတွေကို နမူနာအဖြစ် မပြောလိုပါဘူး။ နီးနီးနားနား ထိုင်းနိုင်ငံကိုပဲ လက်ညိုးထိုးပြီး ဥပမာ ပြလိုတယ်။ ထိုင်းနိုင်ငံမှာ အစိုးရပိုင်ကျောင်းတွေ တက္ကသိုလ်တွေ ရှိသလို၊ အစိုးရမပိုင်တဲ့ ကျောင်းတွေ၊ တက္ကသိုလ်တွေလည်း အများအပြား ရှိတယ်။ အစိုးရက မပိုင်တဲ့ တသီးပုဂ္ဂလကျောင်းတွေ။ တက္ကသိုလ် တွေဟာ သူတို့မူနဲ့ သူတို့ ပြဌာန်းချက်တွေ ရေးဆွဲပြီး ကျောင်းသားတွေကို သင်ကြားတယ်။ အစိုးရက အလွန်အကျွံ ပြဌာန်းတာမျိုးတွေ မဖြစ်အောင် စောင့်ကြည်ကွပ်ကဲတာလောက်ပဲ လုပ်တယ်။ ဟိုဟာ ထည့်မသင်ရ၊ ဒီဟာထည့်မသင်ရ၊ အဲတာ ချန်ထားဆိုတဲ့ အလုပ်မျိုးကို အစိုးရက အားအားယားယား ဝင်စွက်ဖက်တာမျိုး မရှိဘူး။ နောက်တချက်က ပညာရှင်လွတ်လပ်ခွင့် Academic freedom အများကြီးရှိပြန်တယ်။ ဥပမာ ပြောရရင် လွန်ခဲ့တဲ့ အနှစ်နှစ်ဆယ်အတွင်း ထိုင်းနိုင်ငံမှာ အုပ်ချုပ်ခဲ့တဲ့ အစိုးရ အဆက်ဆက် အတွင်းမှာ မူမမှန်တာမျိုး လုပ်တာတွေ့ရင် တက္ကသိုလ်ပညာရှင်တွေက မညှာမတာ ဝေဖန်ထောက်ပြတယ်။ အဲသလို ဝေဖန်လို့ ပညာရှင်တွေ၊ ပါမောက္ခတွေကို ဖမ်းဆီးထောင်ချတာမျိုး တခါမှ မကြားမိဘူး။ အမေရိကန် အပါအဝင် အနောက် ဥရောပနိုင်ငံတွေ လောက် ဒီမိုကရေစီ မရင့်သန်သေးပေမယ့် ထိုင်းနိုင်ငံက ပညာရှင်တွေဟာ အတော်ကြီး လွတ်လွတ်လပ်လပ် ပြောဆို၊ သင်ကြား၊ ရေးသား၊ ဝေဖန်ထောက်ပြခွင့်တွေ ရှိနေတာကို တွေ့ရတယ်။
ဒီလို လွတ်လွတ်လပ်လပ် ဖြစ်လာဖို့အတွက် ပညာရေးကို လွတ်လပ်ခွင့်ပေးထားတာ ထိုင်းနိုင်ငံမှာ အတော်လေးကြာခဲ့ပြီ။ မြန်မာပြည်မှာတော့ ဘယ်ကိုပဲ ကြည့်လိုက် ကြည့်လိုက်၊ အစိုးရနဲ့ကို မလွတ်နိုင်ဘူး။ တကယ့် ရေစက်။ စိုက်ပျိုးရေး တက္ကသိုလ် ဆိုတာလည်း အစိုးရအောက်မှာ။ စက်မှုတက္ကသိုလ်ဆိုတာလည်း အစိုးရအောက်မှာ။ ဆေးတက္ကသိုလ်ဆိုတာလည်း အစိုးရပိုင် ကျောင်း။ တသီးပုဂ္ဂလပိုင်တဲ့ တက္ကသိုလ်အဆင့် ကျောင်းဆိုတာ မြန်မာပြည်မှာ လုံးဝမရှိသေး။ အားလုံးကို အစိုးရက ပိုင်တယ် ဆိုမှတော့ အစိုးရပေါ်လစီ အောက်မှာပဲ နေကြရတော့တာပေါ့။ နောက်ဆုံးတော့ အဲသည့် တက္ကသိုလ်တွေဟာ အဖျင်းအမှော် လေးတွေကိုပဲ မွေးထုတ်တဲ့ ကျောင်းကြီးတွေ ဖြစ်လာတယ်။ သည့်ထက် မပိုဘူး။ မယုံမရှိကြနဲ့။ ဒီမိုကရေစီ ပညာရေးမဟုတ်ဘဲ မူလတန်းအဆင့် ကတည်းက ချုပ်ကိုင် ကွပ်ကဲတဲ့ ပညာရေးစနစ် ဖြစ်တာကြောင့် ဒီမိုကရေစီတန်ဖိုး၊ လွတ်လပ်မှုတန်ဖိုးနဲ့ တရားဥပေဒစိုးမိုးမှု စတာတွေကို တက္ကသိုလ်အဆင့်ရောက်တဲ့အထိ ကျောင်းသားတွေ မသိကြတော့သလို မိမိ အခွင့်အရေးကို မိမိရဖို့ တောင်းဆိုရမယ် ဆိုတဲ့ စိတ်ဓာတ်မျိုးလည်း ငုပ်လျှိုးသွားတယ်။ ဒီလိုမျိုး ဖြစ်လာခဲ့တာ နှစ်ပေါင်း ၅ဝ ရှိခဲ့ပြီ။
လူကြားကောင်းတဲ့ နိုင်ငံရေး အပြောင်းအလဲတွေ ဘယ်လောက်ပဲရှိရှိ ကျနော့် အနေနဲ့ကတော့ ပညာရေးစနစ်နဲ့ ပတ်သက်တဲ့ အပြောင်းအလဲတွေ သေသေချာချာ မမြင်ရသေးဘူးဆိုရင် ဒီအစိုးရဟာ လိမ်နေတယ်လို့ပဲ ပြောလိုတယ်။ ကျနော်တို့ရဲ့ နောက်မျိုးဆက် တွေကို မျက်စေ့ဖွင့်မပေးတဲ့ ပညာရေးစနစ်မှန်သမျှ ကောင်းတယ်လို့ မချီးကျူးနိုင်ဖူး။ ဒါတွေကိုမြင်လို့ စင်္ကာပူမှာနေတဲ့ စီးပွားရေး ပညာရှင်တဦးဖြစ်တဲ့ ဒေါက်တာခင်မောင်ကြည်က မြန်မာနိုင်ငံမှာ အဆင့်မြင့် တသီးပုဂ္ဂလတက္ကသိုလ်တခု ထူထောင်ဖို့ တချိန်က ကြိုးပမ်းခဲ့ဖူးတယ်။ အဲသည်တုန်းက ဗိုလ်ခင်ညွန့်မိုးကောင်းနေတဲ့ ကာလပေါ့။ ဗိုလ်ခင်ညွန့်က နိုင်ငံရေး မပါရင်ပြီးရော၊ ဆရာကြီး လုပ်ချင်တာလုပ်ပါ၊ ကျနော် ကူညီပါ့မယ်လို့ ပြောခဲ့တယ်။ ဆရာဦးခင်မောင်ကြည်က အစိုးရပိုင် မဟုတ်တဲ့ တက္ကသိုလ်တခု ထူထောင် ချင်တယ်လို့ ပြောအပြီး။ နောက်ပိုင်းမှာ ခင်ညွန့်သာ အလုပ်ပြုတ်လို့ အကျယ်ချုပ် ကျသွားတယ်။ အဖြေ ပြန်မလာတော့ဘူး။ စစ်ဗိုလ်တွေဟာ တက္ကသိုလ်ကျောင်းဆိုရင် တီကိုဆားနဲ့ တို့သလိုပဲ။
နောက်တချက်ကတော့ ပညာရေးစနစ်က တလျှောက်လုံး မကောင်းခဲ့တော့ လူငယ်တွေဟာ သူတို့ဆည်းပူးချင်တာ သင်ချင်တာတွေကို မလေ့လာနိုင်ခဲ့ဘူး။ ဒီကွက်လပ်ကို အန်ဂျီအိုတွေ။ အန်ဂျီအိုဆန်တဲ့ ပညာရေးအဖွဲ့တွေက သင်တန်းတွေနဲ့ ဖြည့်ဆီးပေးနေတာ အခု မြန်မာနိုင်ငံထဲမှာ မြင်နေရတယ်။ နယ်စပ်မှာလည်း အလားတူ တွေ့ရတယ်။ ဘာဘဲပြောပြော ပညာရတာပေါ့။ သို့ပေမယ့် ဒါကလည်း မပြည့်စုံသေးဘူး။ နောက်ဆက်တွဲ ဘေးထွက်ပြဿနာတွေကိုလည်း ဆက်ပြီး တွေ့ရတယ်။ သင်တန်းတွေကလည်း အမျိုးအစား စုံလှတယ်။ ဘယ်လို သင်တန်းမျိုးတွေလည်းဆိုတော့ ဂလိုဘယ်လိုက်ဇေးရှင်း၊ ခေါင်းဆောင်မှု အတတ်ပညာ၊ ပဋိပက္ခ ဖြေရှင်းရေး၊ နိုင်ငံခြား ရင်းနှီးမြှုပ်နှံမှုနဲ့ အကျိုးအမြတ်၊ ဒီမိုကရေစီနဲ့ လွတ်လပ်မှု၊ သဘာဝပတ်ဝန်းကျင် ထိန်းသိမ်းရေး၊ သဘာဝဘေး အန္တရာယ် များနဲ့ စီမံခန့်ခွဲမှု၊ စစ်ဘက်-အရပ်ဘက်ဆက်ဆံရေး၊ အမျိုးသမီးအခွင့်အရေး၊ ကလေး အခွင့်အရေး၊ ပြည်တွင်းစစ်နဲ့ တိုင်းရင်းသား အခွင့်အရေး၊ မြေမြှုပ်မိုင်းများအန္တရာယ်၊ ကလေးစစ်သားပြဿနာ၊ လူကုန်ကူးခြင်း တားဆီးရေး၊ ရွှေ့ပြောင်းလုပ်သားများ ကိစ္စ၊ မဲခေါင်မြစ်ဝှမ်းနိုင်ငံများ ဖွံ့ဖြိုးတိုးတက်ရေး၊ ကမ္ဘာလုံးဆိုင်ရာ ငွေကြေးရန်ပုံငွေ အဖွဲ့အစည်းများနဲ့ ပတ်သက်၍ ကောင်းကွက် ဆိုးကွက်၊ စစ်ပြေးဒုက္ခသည်များနှင့် ပြန်လည်ထူထောင်ရေး၊ မိုးခေါင်ရေရှားခြင်းနှင့် နောက်ဆက်တွဲ ပြဿနာများ အစရှိတာတွေ ဖြစ်ပါတယ်။ နောက်ထပ်လည်း ရှိပါသေးတယ်။ များလွန်းလို့ ထည့်မရေးနိုင်တော့ပါ။
ဒီလိုသင်တန်းမျိုးတွေက ကောင်းတယ်။ သို့သော် ရက်တိုသင်တန်းတွေ ဖြစ်တာကြောင့် ဗဟုသုတ နည်းနည်းပါးပါးရတာက လွဲလို့ အမှန်တကယ် ကျွမ်းကျင်သူလည်း ဖြစ်မလာနိုင်ဘူး။ ရေတိုမှတ်ဥာဏ်မှာ ခဏလောက်သာ ရှိပြီး မေ့သွားနိုင်တာမျိုး။ တချို့လူငယ်တွေ ဟာ အထက်က တင်ပြထားတဲ့ သင်တန်း အတော်များများကို တက်ဖူးပြီး ကိစ္စရပ်၊ ပညာအကုန်လုံးကို သိသလိုလို ဖြစ်နေတာကိုလည်း တွေ့ရပြန်တယ်။ ဘာသာရပ်တိုင်းလိုလို သူတို့မသိတာမရှိ ဆိုသလို ဖြစ်နေကြတယ်။ တကယ် ကွင်းဆင်းပြီး လုပ်ခိုင်းတော့ ကျွမ်းကျွမ်း ကျင်ကျင် မလုပ်တတ် မကိုင်တတ် ဖြစ်နေတာကိုလည်း တွေ့ရပြန်တယ်။ ဒါကြောင့် သင်တန်းတွေဟာ ဗဟုသုတတွေနဲ့ အမြင်တချို့ကို ဖြန့်ဝေပေးနိုင်ပေမယ့် တဖက်မှာ ကြည့်ပြန်တော့လည်း Decent Education ကောင်းမွန်စနစ်ကျတဲ့ ပညာရေးမဟုတ်ပြန်ဘူး။ ကြားဖြတ်ပြီးပေးရတဲ့ ဆေးမီးတို ပညာရေးမျိုး ဖြစ်နေတာကိုး။
ဒီတော့ ပြန်ကောက်ရမယ်ဆိုရင် ကျနော့်တို့ တိုင်းပြည်ဟာ ကောင်းမွန် စနစ်ကျတဲ့ ပညာရေးနဲ့ ဝေးနေတာ ကြာလှပါပြီ။ အခုထက်ထိ ကို စနစ်ကျပြီး ကောင်းမွန်တဲ့ ပညာရေးလမ်းကြောင်းပေါ် မရောက်နိုင်သေးဘူး။ မတည်ဆောက်နိုင်သေးဘူးဆိုရင် သူများထက် နောက်ကျနေပါလိမ့်ဦးမယ်။
ပညာရေးကို ဦးစားပေးဖို့ တိုက်တွန်းလိုတယ်။
ဇော်မင်း
၁၄ရက်။ ဖေဖဝါရီလ။ ၂ဝ၁၂ ခုနှစ်     
http://www.maukkha.org/index.php/interview-maukkha/opinion-maukkha/1867-education-myanmar#.T0JSaqABHf4.facebook  မှ