ဗိုက်ထဲမှာ အစာရှိရှိ၊ မရှိရှိ နာ

ပုံမှန် အစာ စားချိန်မှာ အစာ မစား မိလိုက်ဘဲ အဆာ လွန်သွား တဲ့ အတွက် ဗိုက်အောင့် ဝေဒနာ ခံစား ရတာကို လေနာ ထတယ်၊ ဒါမှ မဟုတ် အစာအိမ် ရောဂါထတယ်လို့ပြောဆိုကြလေ့ရှိပါ တယ်။ အစာအိမ်ဆိုတာက ၀မ်းဗိုက် ထဲမှာ ထောင်လိုက်တည် ရှိနေတဲ့ ရှည် မျောမျော ကြွက်သားအိတ်ကြီးကို ခေါ် ဆိုတာ ဖြစ်ပါတယ်။
အထက်ပိုင်းနဲ့ အောက် ပိုင်းမှာ ရှုံ့ထားတဲ့ ပိုက်ဆံ အိတ်တစ်ခုနဲ့ အလားသဏ္ဌာန်တူပါ တယ်။ အရှည် ၁ ပေ နီးပါးရှိပြီး ၆ လက်မ ကျယ်ဝန်း ပါတယ်။ သာမန် အားဖြင့် ၀ါးပြီးသား အစားအစာ ၂ ပေါင်ကျော်ကို သိုလှောင်သိမ်းဆည်း ပေးထားနိုင် ပါတယ်။ အစာအိမ်ဟာ ပြန့်ကားဆွဲဆန့်နိုင်စွမ်းရှိတဲ့အတွက် ရေတစ်ဂါလန်အထိ ၀င်ဆံ့နိုင်ပါသေးတယ်။


ထူထဲပိုးတောင့်တဲ

သဘာဝက အစာအိမ်နံရံကို ပိုးတောင့် တဲတစ်ခုလို ထူထူထဲထဲ တည်ဆောက်ပေးထားတဲ့အတွက် အလွှာလေးလွှာ ပါရှိပြီး ကြံ့ကြံ့ခိုင်နေ ပါတယ်။ အစာချေဖျက်နိုင်ဖို့ အတွင်း ဆုံးအလွှာကနေ ဟိုက်ဒြိုကလိုရစ် အက်စစ်ဓာတ်နဲ့ အစာခြေအင်ဇိုင်းတွေ ကို ထုတ်လွှတ်ပေးရပါတယ်။ သာမန် အားဖြင့် အစာအိမ်အတွင်းနံရံကို အက် စစ်ဓာတ်တွေ မစားသွားနိုင်အောင် အစာအိမ်အချွဲတွေကဖုံးလွှမ်းကာကွယ် ပေးထားကြပါတယ်။
အကြောင်းတစ်ခု ခုကြောင့် အက်စစ်ဓာတ်အထွက်များ တဲ့အခါနဲ့ အစာအိမ်နံရံမှာ အက်စစ် ခံနိုင်ရည်စွမ်းအား လျော့နည်းသွား တဲ့အခါမျိုးမှာ အစာအိမ်အတွင်းလွှာကို အက်စစ်စားပြီး မီးခြစ်ဆံခေါင်းအရွယ် ကနေ လက်သည်း ခွံ အရွယ် ပမာဏ ရှိတဲ့ ချိုင့်ခွက်အနာလေးတွေ ပေါ် ပေါက်လာနိုင်ပါတယ်။ ဒီအနာတွေက ထူထဲတဲ့ အစာအိမ်နံရံ ပိုးတောင့်တဲ လေးလွှာစလုံးကို ထိုးဖောက်နှိုက်စား သွားရင်တော့ အစာအိမ်ပေါက်တယ် လို့ ခေါ်ဆိုကြပါတယ်။

အစာအိမ်နာလား အူသိမ်နာလား

အစာအိမ်နဲ့ အူသိမ်ဦးပိုင်းရဲ့ အတွင်းနံရံတွေမှာ ပေါ်ပေါက်လာတဲ့ ချိုင့်ခွက်အနာတွေကိုရောပြွမ်းပြီး အစာအိမ်နာလို့ အလွယ်တကူ ခေါ် ဆိုနေကြတာ ဖြစ်ပါတယ်။ လူနာတွေ က ဂက်စတြစ် (Gastric) ရောဂါလို့ ခေါ်ဆိုနေကြပေမယ့် ဂက်စတြစ်ဆိုတဲ့ ဝေါဟာရဟာ အစာအိမ်ကိုသာ ရည် ညွှန်းပြီး အူသိမ်ဦးပိုင်း မပါဝင်ပါဘူး။ ဆရာဝန်တွေကတော့ နေရာခွဲခြားပြီး အစာအိမ်နာကို gastric ulcerအတိုကောက် GU နဲ့ အူသိမ်ဦးပိုင်း အနာကို duodenal ulcer- အတို ကောက် DU ဆိုပြီး
သတ်သတ်မှတ် မှတ် ခေါ်ဆိုကြပါတယ်။

သောကကြောင့်လား ပိုးကြောင့်လား

အစာအိမ်ရောဂါကို စိတ်သောက ဖိစီးတာနဲ့ အပူအစပ်စားသုံးတာတွေ ကြောင့် ဖြစ်ရတယ်လို့ အရင်တုန်းက ယူဆခဲ့ကြပေမယ့် နောက်ပိုင်းမှာတော့ အစာအိမ်ထဲကို ၀င်ရောက်လာတဲ့ H pylori လို့ခေါ်တဲ့ ဗက်တီးရီးယား ပိုးမွှားတွေကြောင့်လို့ သိရှိလာကြပါ တယ်။ ဒီမိုးမွှားတွေဟာ အစာအိမ် ထဲက အချွဲလွှာကို ဖျက်ဆီးပစ်ကြပါ တယ်။ အကာအကွယ်မဲ့ သွားတဲ့ အတွင်းလွှာကို နဂိုထွက်ရှိနေတဲ့ အက် စစ်ကစားပြီးချိုင့်ခွက် အနာတွေပေါ်ပေါက် လာရတာဖြစ်ပါတယ်။
ဗက်တီးရီးယားပိုးမွှား တွေ အစာအိမ်ထဲ ကိုဘယ်ပုံဘယ်နည်း နဲ့ဝင်ရောက်လာသလဲ ဆိုတာကို တိတိကျ ကျ မသိရှိကြသေး ပေမယ့်ဝေဒနာသည် ရဲ့ တံတွေးနဲ့ မစင် ထဲမှာလည်း ပိုးမွှား တွေကို တွေ့ရှိနေရတာကြောင့် အစား အစာနဲ့ ရေကနေတစ်ဆင့် ကူးစက် ပျံ့ပွားလာရတယ်လို့ မှတ်ယူထားကြ ပါတယ်။ လူ့ခန္ဓာကိုယ်ထဲကို ငယ်စဉ် ကတည်းက ဗက်တီးရီးယားပိုးမွှားတွေ ၀င်ရောက်နေပြီး အသက်ကြီးလာမှ အစာအိမ်ရောဂါ ဖြစ်လာရသူတွေ လည်း ရှိနိုင်ပါတယ်။

ဗိုက်ထဲမှာ အစာရှိရှိ မရှိရှိနာ

အစာအိမ်နာ ဝေဒနာသည် တစ် ယောက်ဟာ ရင်ညွန့်နဲ့ ၀မ်းဗိုက်ထဲက နေပူလောင်နာကျင်တဲ့ ဝေဒနာကို ခံစားကြရတတ်ပါတယ်။ ရင်ပူတယ် လို့ ပြောကြပါတယ်။ အစာအိမ်ထဲက အနာက အစာစားလိုက်ရင်ပိုမိုနာ ကျင်လာတတ်ပြီး၊ အူသိမ်ဦးပိုင်းထဲက အနာတွေကတော့ အစာစားလိုက်ရင် သက်သာသွားတတ်ပါတယ်။ အစာ စားပြီး ၂ နာရီ၊ ၃ နာရီအကြာမှ ပြန်လည်နာကျင်လာတတ်ကြပါတယ်။ ဝေဒနာထပ်တလဲလဲ ခံစားနေရတဲ့သူ တွေမှာ ဗိုက်အောင့်လွန်းလို့ ၀မ်းဗိုက် ကို ရေနွေးအိတ်နဲ့ကပ်၊ ရေနွေးပုလင်း နဲ့ ကပ်နဲ့ ဗိုက်တစ်ခုလုံး နီရဲပြီး မီးလောင်ဖုတွေ ထွက်လာတာ ကိုတောင် တွေ့မြင်ရဖူးပါတယ်။  

အက်စစ်ဓာတ်ကို ချေဖျက်နိုင်ဖို့

ဗိုက်နာလာရင် ဂျဲလ်မက်ဆေး ပြား ၀ါးစားပြီး သက်သာသွားသူတွေ ရှိပါတယ်။ တချို့လူနာတွေက ဆော် ဒါမှုန့်ကို မျိုချတတ်ကြပါတယ်။ အစာ အိမ်ဆေးလို့ ခေါ်ဆိုနေကြတဲ့ ဆော် ဒါမင့်၊ အလူပင်း၊ ဒိုင်ဂျင်းနဲ့ M.O.M ဆေးပြားတွေနဲ့လည်း သက်သာတတ် ကြပါတယ်။ နွားနို့သောက်ပြီး သက် သာသွားသူတွေရှိသလို နွယ်ချို၊ လျက် ဆား၊ လေနိုင်ဆေးနဲ့ လျှာပွတ်ဆေး တွေလျက်ပြီး သက်သာသွားရသူတွေ လည်းရှိပါသေးတယ်။ နောက်ပိုင်းမှာ ပေါ်လာတဲ့ စီမက်တက်ဒင်း၊ ရာနီ တက်ဒင်း၊ အိုးမက်ဇ် စတဲ့ဆေးဝါးတွေ ကို ယနေ့ခေတ် လူနာတွေ သောက် ရပါ များလွန်းလို့ ဆေးနာမည်တွေကို တောင် အလွတ်ရနေကြပါတယ်။ ဒီ ဆေးဝါးတွေ အကုန်လုံးဟာ အက်စစ် ဓါတ်ကို ပျက်ပြယ်စေပြီး အက်စစ် အထွက်နည်းအောင်လည်း တားဆီး ပေးနိုင်ပါတယ်။ ဗက်တီးရီးယားပိုးမွှား ကို ချေမှုန်းသုတ်သင်တာ မဟုတ်တဲ့ အတွက် အစာအိမ်ရောဂါမကြာခဏ ပြန်ထလာနိုင်ပါတယ်။
အစာအိမ်နာ အမြစ်ပြတ်ရအောင်
အစာအိမ် ရော ဂါ အမြစ်ပြတ် ပျောက်ကင်း အောင် ဗက် တီးရီးယား ပိုးသတ် ဆေးတွေ ကိုပါ ပူးတွဲ တိုက်ကျွေး ဖို့ လို အပ်ပါ တယ်။အစာအိမ် ထဲမှာ ပိုးမွှား တွေရှိ၊ မရှိအစာ အိမ်ထဲကို မှန် ပြောင်းထည့် စစ်ဆေးလို့ရပါတယ်။ အစာအိမ်အချွဲနဲ့ အသားစ ကိုထုတ်ယူပြီး ပိုးမွှားကို ရှာဖွေကြည့် ကြရပါတယ်။ မှန်ပြောင်းမသွင်းဘဲနဲ့ ဆေးတောင့်မျို ချခိုင်းပြီး အာငွေ့ကို တိုင်းထွာကြည့် ရင်လည်း ပိုးရှိ၊ မရှိ သိရှိနိုင်ပါတယ်။ ပိုးတွေ့ပြီဆိုရင်တော့ ပဋိဇီဝပိုးသတ်ဆေးတွေကို ၂ ပတ်က နေ ၄ ပတ်ကြာအောင် တိုက်ကျွေးကြ ရပါ့မယ်။ အက်စစ် အထွက်လျော့ဆေး တွေကိုလည်း ၆ ပတ်ကြာအောင် သောက် သုံးဖို့လိုအပ်ပါတယ်။  

အစာအိမ်နာရဲ့ ဆိုးကျိုးအထွေထွေ

သွေးယိုထွက်နေတဲ့ အစာအိမ် အနာကြောင့် ကော်ဖီရောင်တွေ အန် လာနိုင်ပြီး၊ ၀မ်းမည်းမည်းသွားတာ တွေလည်း ရှိနိုင်ပါတယ်။ နီရဲနေတဲ့ သွေးဟာ အက်စစ်နဲ့ထိတွေ့လိုက်ရင် ကော်ဖီရောင်ကို ပြောင်းသွားပြီး မစင် နဲ့တွေ့တဲ့အခါမှာ ကတ္တရာစေးလို မည်းနက်ပြီး စေးပျစ်သွားတတ်ပါ တယ်။ အနာက အစာအိမ်နံရံတစ်ခု လုံးကို စားသွားရင်တော့ အစာအိမ် ပေါက်ပြီး အစာတွေ ၀မ်းခေါင်းထဲကို ထွက်ကျလာနိုင်ပါတယ်။ ဒီအခါမှာ ၀မ်းဗိုက်တစ်ပြင်လုံး မချိမဆံ့ နာကျင် လာပြီး ပျဉ်ပြားကြီးလိုတင်းရင်းနေ တတ်ပါတယ်။ ဆေးရုံတင်ပြီး အရေး ပေါ်ခွဲစိတ်ကုသဖို့ လိုအပ်ပါတယ်။ အူသ်ိမ်ထဲက အနာတွေက အမာရွတ် ထင်ကျန်ရစ်ပြီး အူကျဉ်းသွားရသူတွေ လည်းရှိတတ်ပါတယ်။ အူကျဉ်းလူနာ ဟာ အစာစားပြီးတိုင်း အန်တတ်ပါ တယ်။ ဆေးရုံတင် ခွဲစိတ်ကုသပေးရပါ တယ်။ အစာအိမ်ရောဂါကနေ အစာအိမ် ကင်ဆာအဖြစ် ပြောင်းလဲသွားရသူ တွေကိုလည်း ရှားရှားပါးပါး တွေ့ရှိရ နိုင်ပါသေးတယ်။

ရှောင်ကြဉ်ရမယ့် အစားအစာတွေ

အစာအိမ်ရောဂါ ဖြစ်လာပြီဆို ရင် ကော်ဖီ၊ လက်ဖက်ရည်၊ သံပရာ ရည်၊ ငရုတ်သီး၊ ချင်း၊ စပါကလင်နဲ့ ဘိလပ်ရည်တွေဟာ အနာကို ပိုမိုဆိုးရွားသွားစေနိုင်တဲ့အတွက် ရှောင်ရှားဖို့လို အပ်ပါတယ်။ ဆေးလိပ်နဲ့ အရက်ကို လုံးဝရှောင်ကြဉ်ကြရပါ့မယ်။ အက်စပရင် ဆေးနဲ့ အက်စစ်ပါတဲ့ အကိုက်အခဲပျောက်ဆေးဝါးတွေကို မသောက်သုံးသင့် တော့ပါဘူး။ သွေးတိုး၊ နှလုံး၊ ကျောက်ကပ်ရောဂါတစ်ခုခုနဲ့ ယှဉ်တွဲဖြစ်ပေါ်နေရင် ဆော်ဒါမျိုတာကိုလည်း ရှောင်ရှားဖို့လိုအပ်ပါတယ်။ ပျော့ပျောင်းတဲ့အစာကို နည်းနည်းချင်း ခဏခဏ တစ်နေ့ကို ၆ ခါလောက် စားပေးဖို့လိုပါတယ်။
အစာအိမ်နာ ထဖူးရင်
အစာအိမ်ရောဂါကို မိသားစု ဆရာဝန်တစ်ယောက်ယောက်နဲ့ တိုင်ပင်ပြီး H.Pylori ဗက်တီးရီးယားပိုး ရှိ၊ မရှိ တိုင်ပင်စစ်ဆေးဖို့လိုအပ်ပါတယ်။ အစာအိမ် မှန်ပြောင်းကြည့်ဖို့နဲ့ ဆေးမျိုပြီး ဓာတ်မှန်ရိုက်ဖို့လိုအပ်ရင် ကျွမ်းကျင်တဲ့ ဆရာတွေ ဆီကို လွှဲပြောင်းပေးပါလိမ့်မယ်။ ရောဂါအမြစ်ပြတ်စေဖို့ ပဋိဇီဝပိုးသတ်ဆေးတွေကို ဆေးပတ်လည်အောင် သောက်သုံးဖို့လိုအပ်ပါကြောင်း အစာအိမ်ရောဂါ သိမှတ် စရာအဖြစ် တင်ဆက်ပေးလိုက်ရပါတယ်။


ဒေါက်တာမြင့်ဦး(ဂျီပီ)