“ဆြာဒင်၊တစ်စစီရိုက်ချိုးပစ်ချင်သောသရဖူ” (မင်းဒင်)

Min Din

(တစ်)
မစ္စတာဒင်မောင်မောင်
အာရှပစိဖတ်ကာယဗလအလှမောင်(၂၀၁၄)
ဆိုးလ်။ဂိုဂူဂေါ။ ။
ဆြာဒင့်အိမ်၊ ဧည့်ခန်းဆောင်၏ တစ်ခုသောဘီဒိုခပ်မြင့်မြင့်ပေါ်ရှိ အထက်ပါစာတမ်းရေးထိုးထားသော သရဖူကိုမြင်လေတိုင်း၊ကြေးမုံပြင် ရှေ့သို့ရောက်နေသည့်ကေးဝဋ်ပုဏ္ဏားကဲ့သို့ဆြာဒင့်ရင်မှာခံစားရချေသည်။
သရဖူဟူ၍သာဆိုရသည်၊ မကိုဋ်ပုံစံကားမဟုတ်ချေ။ ဖလ်သားအကြည်၊ ဓာတုဗေဒစိန်နှင့် အနီရောင်ကျောက်တချို့ စီခြယ်ထားသည့် နှစ်ပဲခြောက်ပြားတန်၊ ကလေးကစားစရာ၊ အရုပ်သာသာသရဖူ ပေတည်း။ ယင်းသရဖူသည်ဆြာဒင့်ရင်ထဲကဒေါသကို ကျလိကျလိဖြစ်စေ၏။
ဆြာဒင်၏စိတ်ကို၊ကောင်းကောင်းကြီးဒုက္ခပေးကာ၊၊ မဟာအရှက်တော်ကို ဒေါင်လိုက်ရော၊ အလျား လိုက်ပါဟက်တက်ကွဲစေခဲ့သည့် သရဖူပေတည်း။ ယခုရက်ပိုင်းအတွင်း ပြည်တွင်းပြည်ပမီဒီယာ စာမျက်နှာများတွင် ပွက်လော ရိုက်နေသည့်သတင်းတို့၏ရှုပါလော့။
“မိုက်ရိုင်းထွားကျိုင်းသောဒင်မောင်မောင်ထံမှ၊ (၂၀၁၄)ခုနှစ်၊အာရှပစိဖိတ်ကာယဗလအလှမောင်သရဖူကိုပြန်လည်ရုတ်သိမ်း”
“သရဖူသူခိုးမောင်မောင်ဒင်၊အာရှကာယဗလအလှမောင်မဟုတ်တော့”
“ဗမာလူလိမ်ငဒင်၊ကာယဗလအလှမောင်ကျင့်ဝတ်နှင့်မညီ”
“ဒေါ်လာတစ်သိန်းတန်သရဖူနှင့်အတူမောင်ဒင်တိမ်းရှောင်”
အောင်မြင်မှု၏ဒဏ်ရာဒဏ်ချက်ကားကြီးမားလှချေ၏။ အဆိုပါနာကျည်းဒေါသဖြစ်ဖွယ်သရဖူ၏နောက်ခံဇာတ်ကြောင်းကား ဤသို့ဖြစ် လေသည်။
(နှစ်)
လွန်ခဲ့သောသုံးလခန့်က၊ဖူးခက်မြို့မရှိတစ်ခုသော၊အားကစားခန်းမကြီးအတွင်းတွင်ဆြာဒင်တယောက်အပေါ်ပိုင်းဗလာ၊ ခါးတွင်လံကွတ် တီတထည်နှင့် ၊ပြုမြဲကာယဗလလေ့ကျင့်ခန်းများကို စိတ်ပါလက်ပါလေ့ကျင့်နေစဉ်၊ အဝတ်အစားသပ်ယပ်ကျော့ရှင်းစွာ ဝတ်ဆင် ထားသည့် အသက်လေးဆယ်ဝန်းကျင်အရွယ်ထိုင်းအမျိုးသမီး၊မိန်းမရွယ်တစ်ဦးရောက်ရှိလာပြီးဆြာဒင့်တစ်ကိုယ်လုံကို နွားပွဲစားပမာ ရွှန်းရွှန်းစား စားကြည့်ရှုရင်းစပ်စုနေခဲ့လေ၏။
“အိုး၊ဘုရားရေ၊သိပ်ကိုကြည့်ကောင်းတဲ့ခန္ဓာကိုယ်အချိုးအဆစ်ပါကလား။ကျမနာမည်လဥကျွမ်းပါ။ရှင့်နာမည်ဘယ်လိုခေါ်သလဲဟင်”
“သြော်၊ဟုတ်ကဲ့၊ကျုပ်နာမည်ဆြာဒင်ပါ”
“စိတ်မရှိပါနဲ့နော်။ရှင့်အသက်လေးသိခွင့်ရှိမလားဟင်”
“ရှိပါ့ဗျာ။ကျုပ်အသက်ငါးဆယ်ကျော်နေပြီဆိုပါတော့”
“အမလေး၊ဘယ်လိုမှယုံနိုင်စရာမရှိပါကလား။ကျမက ဆြာဒင့်ကိုသုံးဆယ်တောင်မပြည့်သေးဘူးထင်နေတာ။ကြည့်လေ။ဆြာဒင့် ကိုယ် ခန္ဒာတည်ဆောက်ပုံကဂရိနတ်ဘုရားတစ်ပါးလိုပါပဲလား”
“ကျေးဇူးတင်ပါတယ်မယ်မင်းကြီးမရယ်။ကျုပ်က ဝါသနာအရငယ်ငယ်ကတည်းကကျန်းမာရေးလိုက်စားလို့ပါ။ဒါနဲ့ကျုပ်ခင်ဗျားကို ဘာ များ ကူညီနိုင်ပါသလဲဗျာ”
“ကျမကမော်ဒယ်အေဂျင်စီဖွင့်ထားတာရှင့်။ထိုင်းတစ်နိုင်ငံလုံးမှာနာမည်အကြီးဆုံးဆိုပါတော့။ရှင်စိတ်ဝင်စားမယ်ဆိုရင်အလုပ်ကိစ္စတစ်ခု တိုင်ပင်ပါရစေလားရှင်”
ဆြာဒင်ခမျာမိန်းမရွယ်တစ်ဦးက တလေးတစားဖော်ရွေစွာဖိတ်မန္တကပြုနေခြင်းအပေါ်ငြင်းဆန်လိုစိတ်မရှိသည့်နှင့်၎င်းချိန်းဆိုသော ညစာ စားပွဲစားပွဲတစ်ခုသို့တက်ရောက်အပြီးတွင်၊၎င်း၏ ဇွတ်အတင်းအဓမ္မတိုက်တွန်း၊ဆက်သွယ်ဆောင်ရွက်ပေးမှုကြောင့်ဆြာဒင်သည် ဂိုဂူဂေါ အေဂျင်စီတစ်ခုနှင့်လိုအပ်သောကတိကဝတ်စာချုပ်စာတမ်းအချို့ကို၊အလုပ်သဘောချုပ်ဆိုခဲ့ရပေ၏။ချုပ်ဆိုရသည့် အကြောင်းရင်းကား၊ဆြာဒင့်အနေဖြင့် ဂိုဂူဂေါရာဇဝင်ထဲက သူရဲကောင်းကြီးလီဆွန်ရှင်းတို့မြေ၊ ဆိုးလ်မြို့တော်တွင်ကျင်းပပြုလုပ် မည့်(၂၀၁၄)ခုနှစ်၊အာရှပစိဖိတ် ကာယဗလအလှမောင်ပြိုင် ပွဲသို့ဝင်ရောက်ယှဉ်ပြိုင်ရန်ပင်တည်း။
(သုံး)
ဇာတ်လမ်းကိုအတိုချုံ့ရသော်၊အဆိုပါပြိုင်ပွဲတွင်ဝင်ရောက်ယှဉ်ပြိုင်သည့်အတိုင်းတိုင်းအပြည်ပြည်မှ၊မြောက်များလှစွာသော ပြိုင်ပွဲဝင်လူ ငယ်အပေါင်းသည်၊ရှေးမြန်မာအမျိုးအနွယ်ဆြာဒင်၏ခြောက်ပေနီးပါးရှိသောအရပ်အမောင်းနှင့်၊ အချိုးအစားကျနလှသောကိုယ်ဟန်အ နေထားကို ဖင်ဖျားမျှပင်မမီကြလေရာ၊ရွှေပွဲလာပရိသတ်၏ဝမ်းစမိုးရောသောသောညံ့သည့်၊၊လက်ခုပ်သံတဖြောင်းဖြောင်းဖြင့်၊၊ တခဲ နက်အားပေးမှုကိုရရှိပြီးသကာလ ချန်ပီယံသရဖူကိုလက်ဝယ်ပိုင်ပိုင်ရရှိခဲ့ချေတော့သည်။
အကဲဖြတ်ဒိုင်တို့၏တညီတညွတ်တည်း ဆုံးဖြတ်ချက်ကား ဆြာဒင်သည်ဂျူမုံနှင့်ဒါရိုက်တာရင်ထက်အပုံကြီးသာသည်ဟူ၏။ဆြာဒင့်စိတ်တွင်မူ ထူးထူးခြားခြားခံစားမှု မရှိလှ သော်ငြား သတင်းမီဒီယာတို့သည် ဆြာဒင့်သတင်းကိုအထူးဇန်းတင်ကာဝေဝေဆာဆာဖော်ပြခဲ့ကြပါ၏။
“အာရှမှာဗမာ၊အနိုင်ယူဗိုလ်စွဲခဲ့ပြီ”
“ဗမာ့သားကောင်း၊အာရှသူရဲကောင်းဆြာဒင်”
“နွားပျိုသန်လှ၊ဆြာဒင်ပေါင်ကျိုး၊ဟိုးဟိုးကျော်သည့်ဗမာ့ငွေကြယ်ပွင့်”
မည်သို့ပင်အမွှမ်းတင်နေကြစေကာမူ ကိုယ့်ဝမ်းနာကိုယ်သာသိ၊အုံ့ပုန်းပူနေသောဆြာဒင်အဖြစ်ကို အတူနေတပည့်များကား ရိပ်စားမိခဲ့ကြ ဟန်တူလေရာ၊ဆိုးလ်မှသည်ဖူးခက်ဆီသို့ပျံသန်းသည့်ဘိုးရင်းဂျက်လေယာဉ်ကြီးပေါ်မှ ချန်ပီယံသရဖူကိုပိုက်လျက်ဆင်းလာစဉ်ကပင် ဂရုဏာစကားဆိုကြပါ၏။
“ဆြာဒင်မျက်နှာကြည့်ရတာ အောင်ပွဲကနေ၊ချန်ပီယံသရဖူရလာတာနဲ့မတူပဲ၊ရည်းစားလင်နောက်သွားတဲ့ပုံပေါက်နေတယ်ဆြာ”
“ဟုတ်ပါရဲ့ဆြာ။ဆြာ့မျက်နှာက ခွေးချေးပုံနားကဖရဲသီးကို ကားတက်ကြိတ်ထားတဲ့ပုံပါကလား”
“ဂိုဂူဂေါနဲ့ဖူးခက်ရာသီဥတုမတူလို့ငတို့ဆြာပန်းနေတယ်ထင်ပါ့။လဒကိုဘိန်းကျွေးထားသလိုဖြစ်နေတယ်”
ရင်ထဲတွင်မကျေမချမ်းစိတ်ကြောင့် တနုံ့နုံခံစားနေရသောဆြာဒင်ကား တပည့်ကျော်တို့ကို တုန့်ပြန်စကားတစ်လုံးတစ်ပါဒမျှမဆိုပဲ၊ လက်ထဲမှသရဖူကိုသာ၊တပည့်ကျော်တို့ထံလှမ်းပေးလိုက်ရင်းငူငူကြီးသာရှိနေခဲ့သည်။သို့နှင့်မကြာမီရက်ပိုင်းအတွင်းမှာပင် ဇာတ်လမ်း အစ၊ အခန်း(တစ်)တွင် ဖော်ပြထားခဲ့သည့်၊ဆြာဒင်အားလူလိမ်သူခိုးစာရင်းသွင်းသော သတင်းများပလူပျံသလို တက်လာခဲ့ခြင်းဖြစ်ချေ သည်တမုံ့။
(လေး)
သတင်းစာမျက်နှာများတွင်ပြူးတူးပြဲတဲဖော်ပြခြင်းခံရသောဒုက္ခကား ကြီးမားလှချေသည်။ထို့ထက်ဆိုးသည့်နောက်ဆက်တွဲပြဿနာကား သတင်းထောက်တို့၏နှိုက်နှိုက်ချွတ်မေးခွန်းများကိုရင်ဆိုင်ဖြေရှင်းရခြင်းပေတည်း။
“ဆြာဒင့်ကိုပြိုင်ပွဲဝင်ဖို့ချိတ်ဆက်ပေးခဲ့တဲ့ ဒေါ်လဥကျွမ်းရဲ့စွတ်စွဲချက်ကို ဆြာဘယ်လိုတုန့်ပြန်ချင်ပါသလဲ”
“ဆြာ့ဒုက္ခကိုမသိပဲ၊သူ့ပွဲစားခမရလို့စွတ်တင်နေတယ်ထင်ပါ့ကွာ”
“ဒါနဲ့ဆြာဒင်ဟာ စကားအပြောအဆို မိုက်ရိုင်းတယ်ဆိုတဲ့ပြစ်တင်ပြောဆိုမှုအပေါ်ဘာများတုန့်ပြန်လိုပါသလဲ”
“ကျုပ်ကအညာသားမို့ စကားပြောရင်တော့ပြတ်တာအမှန်ပဲမောင်၊ကြောင်ချေးလိုပျော့ပျော့လေးနဲ့နံတဲ့စာရင်းမှာကျုပ်မပါဘူး”
“ဂိုဂူဂေါသူနာပြုဆရာမဆီက ဆြာဒင်ပိုက်ဆံတွေချေးခဲ့တယ်ဆိုတာဟုတ်ပါသလား”
“အင်း၊စပ်စပိုင်တာလေးတစ်ထည်၊ကြုံတုန်းဝယ်ဖို့ ခဏချေးခဲ့ဖူးတယ်မောင်။ပြန်ဆပ်ခဲ့ပြီလေ။ဆယ်ဒေါ်လာတည်းပါမောင်”
“နောက်တစ်ချက် ဆြာဒင်ဟာ အသက်ငါးဆယ်ကျော်နေပါလျက်၊အသက်သုံးဆယ်ကျော်လို့လိမ်ပြီး ပြိုင်ပွဲဝင်ခဲ့တယ်ဆိုတဲ့အချက်နဲ့ ပတ် သက်ပြီးရှင်းပြပါအုံးဆြာ”
“အင်း၊စာချုပ်မှာရေးထားတဲ့ဂိုဂူဂေါစာကိုကျုပ်မှမဖတ်တတ်ပဲ။ငါးဆယ်ကျော်က သုံးဆယ်တန်းတွေကြားမှ ချန်ပီယံဖြစ်ခဲ့တော့နောက်ထပ် အပိုဆောင်းဆုတစ်ခုခု တောင်မပေးသင့်ပေဘူးလားမောင်တို့ရယ်”
“ဟုတ်ကဲ့၊ဆြာနဲ့ ဂိုဂူဂေါအေဂျင်စီကိုယ်စားလှယ် မစ္စချန်ဂင်တို့ကြားမှာ၊ကိုယ်ရေးကိုယ်တာ ပြဿနာတစ်စုံတစ်ရာများရှိနေပါသလား ဆြာ”
“မှန်လိုက်လေ၊ကိုရင်ဗေဒင်ဟောစားလို့ရပြီ။အဲဒါအဓိကပြဿနာပဲမောင်”
“ပြည့်ပြည့်စုံစုံလေးသိပါရစေဆြာဒင်”
“ခက်ပါဘိမောင်တို့ရယ်။တချို့စကားတွေဟာ ဘယ်ဘက်ကကြည့်ကြည့်အကျိုးမရှိသမို့ မပြောသင့်ဘူးထင်ပါရဲ့”
“ပြောသာပြောပါဆြာရယ်”
“မောင်တို့အတော်ခက်ပါကလား။မစ္စချန်ဂင်တို့ရဲ့ဂိုဂူဂေါအေဂျင်စီအကြောင်း ဂူဂဲလ်မှာ ဂူးဂလင်းလုပ်လိုက်ရင် အနီးစပ်ဆုံးအဖြေထွက်ပါ တယ်မောင်။ကျုပ်ကိုယ်တိုင်ပြောမထွက်လွန်းလို့ပါ”
“ဒီလိုပါဆြာဒင်၊ဟို..ဟို..”
“ဘာမှဟိုမနေနဲ့။ကျုပ်လိုဗမာ့သွေးစစ်စစ်မဟာဆန်သူကြီးက ဒီအကြောင်းကို ဒိထက်ပိုပြီးရှင်းစရာမရှိဘူးမောင်။သည်းခံပါမောင်တို့ရာ”
“ဒါဆိုဆြာ့သရဖူပြန်တောင်းနေတာကိုကော ဆြာ”
“လိုချင်လာပြန်ယူပေါ့လဟ။ကျုပ်ကတော့ အလုပ်ရှုပ်ခံပြီးပြန်မပို့နိုင်ဘူး။အေး။ဒင်းတို့အမှားဒင်းတို့သိရင်တော့ ကျုပ်ကိုကန်တော့ပွဲ ကြီးကြီးနဲ့တောင်းပန်သင့်တယ်”
“ကျေးဇူးပါဆြာ”
“ရပါတယ်ကွာ”
(ငါး)
သတင်းထောက်တို့ပြန်လည်ထွက်ခွာသွားချိန်တွင်၊ကြုံခဲ့ဖြစ်ခဲ့ရသမျှကို ပြန်လည်တွေးတောမိသောဆြာဒင်၏ခံစားချက်သည် အရှက် တရားမှသည်ဒေါသဆီသို့ကူးပြောင်းလာ၏။မကျေမချမ်းစိတ်ကို မြိုသိပ်ရင်း လောကသဘာဝ၊တက်ကြွားကြွကြွရှိလွန်းကလည်းလျောကျ နောက်ဆုံးရှိချေ၏ဟူသော တရားသံဝေဂကိုနှလုံးသွင်းနေချိန်လိုက်မိချိန်တွင်အလိုက်ကန်းဆိုးမသိသောတပည့်ကျော်တို့တစ်စခန်းထ လာပြန်ချေသည်။
“ဘယ်သူ့ကိုမှဖွင့်မပြောပေမဲ့ တပည့်ရင်းတွေကိုတော့ မထိန်ချန်သင့်ပါဘူးဆြာဒင်”
“ဟုတ်တယ်ဆြာ။ဆြာဒလမှိုင်မှိုင်နေတာ တပည့်တို့မကြည့်ရက်ဘူး”
“ဆြာကဖွင့်မပြောလေ။တပည့်တို့ကသိချင်လေပဲဆြာ။ဆြာနဲ့တပည့်တွေကြားမှာပွင့်လင်းမြင်သာမှုရှိသင့်တာပေါ့ဆြာ”
ဤသို့၊အနှီသို့၊တပည့်ကျော်တို့နည်းမျိုးစုံဖြင့်တွတ်ထိုးကာနားမုဒိန်းကျင့်ကြလေသောကြောင့် ဆြာဒင့်ခမျာ ဆက်လက်မြိုသိပ်ရန်အင်အား မရှိတော့ရ ကား၊အရေးကြီးသောလျှို့ဝှက်ချက်ကို မည်သူ့ကိုမျှမဖွင့်ဟစကောင်းဟူသည့် မဟော်သဓာဇာတ်တော်လာဆုံးမစကားကို လျစ်လျူရှု လျက်၊မခြွင်းမချန်ဖွင့်ဟရန်၊ဟန်ပြင်လိုက်ချိန်တွင် တပည့်ကျော်တို့မှာ မျက်တောင်နှင့်နားရွက်ခတ်ရမည်ပင် မေ့လျော့ကာ နားစိုက်နေကြ ကုန်၏။
“ဒီလောက်တောင်သိနေကြရင်ဖြင့်ဖွင့်ဟရသေးတာပေါ့မောင်တို့ရာ”
“ဒါမှတို့ဆြာ၊ပြောမှသာပြောပါဆြာ”
“ချန်ပီယံသရဖူရတဲ့ညက ကျုပ်ကို မစ္စချန်ဂင်ကခွေးသားနဲ့ဆိုဂျုအရက်ဧည့်ခံတယ်မောင်”
“ဒါလေးများဆြာရယ်”
“နေဦးဟ၊မစ္စချန်ဂင်ဆက်ပြောတာက၊ကျုပ်ဟာအရွယ်ဟိုင်းနေတဲ့၊အသက်ခုနစ်ဆယ်ကျော်ဂိုဂူဂေါသက်ကြားအိုတွေနဲ့ မြိုင်ထရမတဲ့ လဟ”
“သြော်၊၊သြော်”
“မသြော်နဲ့တိတ်တိတ်နေ၊မပြီးသေးဘူး။နောက်ထပ်တောင်းဆိုတာက ကျုပ်ကိုသူ့လင်အဖြစ်သတ်မှတ်ချင်သတဲ့။သူ့အသက်ကဖြင့် ခြောက်ဆယ်ကျော်နေကမင့်ဟာ”
“အာ၊ဆိုးချက်”
“မဆိုးနဲ့။ကျုပ်အရင်ဗင်နီဇွဲလားနဲ့အင်္ဂလန်က လင်နှစ်ကောင်ရှိသေးသဟ။ကျုပ်ကတတိယလင်ဖြစ်မှာ”
“အမလေးဗျာ”
“အမယ်မလေးနဲ့အဆိုးဆုံးတစ်ခုကျန်သေးတယ်။မရိုသေ့စကား၊ကျုပ်ရဲ့အဝှာကို သူ့စိတ်ကြိုက်အရွယ်ဖြစ်အောင်ခွဲစိတ်ရမတဲ့”
“ဘာအဝှာတုန်းဆြာရဲ့။နားမရှင်းလိုက်တာ”
“နားဝေးပါ့ကွာ၊ပြောရမှာရှက်ပါတယ်ဆိုနေမှ။အဝှာဆိုတာ ငယ်ပါကိုပြောတာဟဲ့ငတုံးတွေရဲ့”
“သေပြီဆရာ”
“အေးလဟာ။မင်းတို့စဉ်းစားကြည့်လေ။ခွဲစိတ်မှုတစ်စုံတစ်ခုများချွတ်ချော်ရင်ကျုပ်တစ်သက်လုံးလူညွန့်တုံးပြီ”
“တော်ပါတော့ဆြာရယ်။ငတို့ဆြာလက်မတင်လေးလွတ်လာတာကံကြီးပေလို့”
“တော်ပါပြီကွာ။ပြောနေရင်းတောင်ရှက်လာပြီလဟ”
ဒင်းတို့စပ်စုလွန်း၍သာဆြာဒင်ပြောရသည်။စကားအဆုံးတွင် ဆြာဒင်အရှက်သည်းကာမျက်နှာပူလှသည့်နှင့် ရေခဲရေဖြင့် မျက်နှာကို ဆေးကြောရန် ရေခဲသေတ္တာဆီသို့ခြေလှမ်းပြင်စဉ်ခဏ၌၊ဂိုဂူဂေါမှချီးမြှင့်လိုက်လေသည့် ချန်ပီယံသရဖူသည်ဘီဒိုပေါ်မှနေ၍ ဆြာဒင့်ကို စပ်ဖြဲဖြဲမျက်နှာဖြင့်လှောင်ပြောင်ဟန်ရှိနေပြန်ချေရာ၊ဆြာဒင့်သည်ယင်းသရဖူအားတစ်စစီရိုက်ချိုးချင်စိတ်ကို အံကြိတ်ကာမျိုသိပ်ရပြန်ချေ သည်တကား။ ။

 (မင်းဒင်)

၀၆သြဂုတ်၂၀၁၄နေ့ထုတ်ဆဲဗင်းဒေးနေ့စဉ်သတင်းစာမှ။ ။