သိမှုနယ်ပယ် (ဆောင်းပါး၊ ရိတ်ခြေ)

Kyaw Ba Thit

ဂျပန်တွေ အင်္ဂလိပ်စကားမတတ်လည်း သိပ်ကိစ္စမရှိဘူး...တဲ့၊ သူတို့ဆီမှာ နိုင်ငံရပ်ခြားပေါင်းစုံက စာအုပ်စာတမ်းမျိုးစုံကို ဂျပန်ဘာသာနဲ့ ပြန်ထားကြပြီးသား...တဲ့၊ ကြားဖူးတယ်။

သိရသလောက် ဒီအနားက ထိုင်းမှာတောင် နယူးယော့ခ်မှာ နာမည်ကြီး စာအုပ်တစ်အုပ် အသစ်ထွက်တာနဲ့ သူတို့မှာလည်း ထိုင်းဘာသာနဲ့ တစ်ခါတည်း ဘာသာပြန်ပြီးသား ရှိကြတယ်။
Siam Paragon အပေါ်ထပ်က Kinokuniya မှာ သွားကြည့်၊ အင်္ဂလိပ်မူရင်း စာအုပ်အသစ်တွေနဲ့ ယှဉ်ပြီး ထိုင်းဘာသာပြန်တွေပါ တစ်ခါတည်း တွေ့ရလိမ့်မယ်။
သူတို့တွေဆီမှာ စာဖတ်သူ ဈေးကွက် ရှိတာလည်း ပါမယ်။ အစိုးရတွေက အရေးကြီးတဲ့ စာအုပ်စာတမ်းတွေ ဘာသာပြန်ဖို့အတွက် အထောက်အကူပေးတာကြောင့်လည်း ဖြစ်နိုင်တယ်။

ကျွန်တော်တို့ဆီမှာတော့ တက်ကျမ်းလိုဟာမျိုးတွေရယ်၊ (ကျွန်တော်သိပ်နားမလည်တဲ့) ဟယ်ရီပေါ်တာ ဝတ္ထုတွဲလိုဟာတွေရယ်က လွဲပြီး... တကယ်အရေးတကြီး ဖတ်ဖို့၊ သိဖို့၊ အသုံးပြုဖို့ သင့်တဲ့ နယ်ပယ်အသီးသီးက စာအုပ်စာပေအသစ်အသစ်တွေ ဘာသာပြန်ထွက်တာ နည်းပါးလာနေသလိုပဲ။
(New York Times Bestseller စာရင်းတွေမှာ သွားကြည့်၊ ကမ္ဘာမှာ ဒီလောက် နာမည်ကြီးခဲ့တဲ့၊ ကြီးနေတဲ့ စာအုပ်တွေ ကိုယ်တွေဆီမှာ တစ်ခါမှ မကြားဖူးဘူး။)
စာပေ၊ ဗဟုသုတ၊ သုတေသန... စတာတွေဟာ လူတွေရဲ့ သိမှုဘောင်ကို ချဲ့ထွင်ပေးတဲ့အရာတွေ...တဲ့။ အသစ်အသစ် တွေ့ရှိမှုတွေနဲ့ ထိတွေ့ခွင့်မရသမျှ လူတွေဟာ ဘောင်အဟောင်းထဲမှာပဲ နေကြရမယ်ဆိုတဲ့ သဘောပါပဲ။
အင်းလေ... ထားပါတော့။
ခေတ်ကာလအခြေအနေတွေက ကိုယ်လိုသလို ဖြစ်မနေတဲ့အခါ တရားနဲ့ ဖြေဖို့ပဲ ရှိပါတယ်။
ထိုင်းမှာနေတော့ စာအုပ်စာပေဆိုတာ အသာထား၊ ဗမာစာတောင် ကောင်းကောင်း မဖတ်တတ်တဲ့ တိုင်းရင်းသားကောင်လေးတွေ အများကြီး တွေ့ဖူးတယ်။ သူတို့လည်း သူတို့ဟာနဲ့သူတို့ ဖြစ်နေတာပါပဲ။
သူတို့ထက်စာရင် ကျွန်တော်ကမှ ဝါးလုံးခေါင်းထဲက လနဲ့ အသာကြီးသာခွင့်ရသေးတယ်။ ။