သူ

Win Zaw

ကျွန်တော်ဟာ သူ့ကြောင့် လောကမှာ ရပ်တည်နိုင်ခဲ့တယ်..... သူ့ကြောင့် လောကကြီး သာယာစိုပြေနေတယ်..... သူ့ကို ချစ်တယ်၊မြတ်နိုးတယ်၊တွယ်တာတယ်..... သူကလည်း ကျွန်တော့်ကိုချစ်တယ်၊သည်းခံတယ်..... သူနဲ့ကျွန်တော်က အညမည ပစ္စယောလို တစ်ဦးနဲ့တစ်ဦး အပြန်အလှန်အကျိုးပြုနေတယ်..... သူက ကျွန်တော်တင်မက လူသားအားလုံးကို ချစ်တတ်တယ်၊သနားတတ်တယ်၊သည်းခံတတ်တယ်..... ဒါပေမယ့် လူတွေက သူ့ကို တန်ဖိုးမထားဘူး..... သူ့တန်ဖိုးကို မသိဘူး..... သူ့ရဲ့တန်ဖိုးကို မြင့်မြတ်တဲ့လူတွေလောက်ပဲ သိတာ၊ ခပ်ညံ့ညံ့ အပေါစားလူအများစုက နားမလည်ကြဘူး၊ ငါ့ရဲ့တန်ဖိုးကို တွက်ချက်သတ်မှတ်မှုအပေါ်မူတည်ပြီး အဲဒီလူဟာ သူ့တန်ဖိုးကိုဖော်ပြလိမ့်မယ် လို့ သူ ကျွန်တော့်ကိုပြောဖူးတယ်..... သူ့ကို လူတွေကတန်ဖိုးမထားရုံတင်မက သစ္စာမဲ့စွာ ဆက်ဆံတယ် နိုင်ထက်စီးနင်းဆက်ဆံတယ်..... ဒါပေမယ့်သူက အပြုံးမပျက် သည်းခံလျက်ပဲ.....
သူ့ကြောင့် ကျွန်တော်ဟာ အထိုက်အလျောက် သည်းခံတတ်လာတယ်..... လူသားအားလုံးကို ငါးရာနှစ်ဆယ့်ရှစ်မေတ္တာနဲ့ချစ်နိုင်အောင် ကြိုးစားလာတယ်..... သူ့ကြောင့်ပဲ လောဘ၊ဒေါသ၊မောဟတွေ အထိုက်အလျောက် လျော့နည်းအောင် ကြိုးစားလာတယ်..... ဒါ့ကြောင့်သူဟာ ကျွန်တော့်အတွက် ဝါသနာ၊စေတနာ၊အနစ်နာ နာသုံးနာနဲ့ပြည့်စုံတဲ့ ဆရာတင်မက စံနမူနာပါ ယူထိုက်တဲ့သူဖြစ်တယ်..... ကျွန်တော် စီးပွားရေး၊လူမှုရေး၊ကျန်မာရေး အဆင်ပြေလို့ လက်မထောင်လာလျှင် ကျွန်တော့် အထက်က တောင်တန်းတွေနဲ့တူတဲ့ လူတွေကို ကြည့်ခိုင်းတယ်..... ကျွန်တော်ကျရှုံးခဲ့လို့စိတ်ဓာတ်ကျနေရင်တော့ ကိုယ့်အောက်ကချောက်ကမ်းပါးနဲ့တူတဲ့လူတွေကို ကြည့်ဖို့ ဆုံးမတယ်..... သူ့ရဲ့အဆုံးအမတွေက ရိုးရှင်းပြီး လေးစားလောက်တယ်..... သူက ယူရတာ၊သိမ်းပိုက်ရတာကို မလိုလားမနှစ်သက်ဘူး...... ပေးရတာ၊စွှန့်လွှတ်ရတာကို လိုလားတယ်..... နှစ်သက်တယ်..... ဒါ့ကြောင့် ကျွန်တော်သူ့ကိုပိုချစ်မိတယ်..... အခုလည်း ချစ်တယ်..... နောင်လည်း ချစ်မယ်..... အရမ်းလည်း ချစ်တယ်..... " ကမ္ဘာမြေကြီး " ရယ်။

 ဦးတိုးအောင်