ပွင့်လင်းလူ့အဖွဲ့အစည်းနှင့် ကဗျာရွတ်ဆိုမှုပွဲအတွက် စာတမ်း

by မင်းခက်ရဲ (Min Khet Ye) on Saturday, June 30, 2012 at 11:52pm 

နိုင်ငံရေးခေတ်ရဲ့ နိုင်ငံရေးဆိုင်ရာ ကဗျာ

             ယနေ့ ကာလ နိုင်ငံရေးပုံသဏ္ဌာန်ထဲမှာ အချိုးမကျဆုံး ပုံသဏ္ဌာန်တစ်ခုကို ပြပါဆိုရင် ဒီမိုကရေစီ အသွင်ကူး ပြောင်းရေးနဲ့ အတူ ဖြစ်ပေါ်နေတဲ့ ပြည်တွင်းစစ်ဆိုတဲ့ အရာပါပဲ ။ တိုင်းပြည်တစ်ပြည်မှာ စစ်ကိုကြုံတွေ့ခံစားလာရပြီး ဆိုရင် သက်ဆိုင်ရာ နိုင်ငံရေးအဆောက်အအုံဟာ သံသယရှိခံရတတ်ပါတယ် ။ ပထမကမ္ဘာစစ်အပြီး ကမ္ဘာစစ်နှစ်ခု အကြား စစ်ရိပ်စစ်ငွေ့တွေလောင်ကျွမ်းနေချိန်မှာ အနောက်တိုင်းဥာဏ်အလင်းပွင့်ခေတ်နဲ့ အတူထွက်ပေါ်လာတဲ့ လစ်ဘရယ် ၀ါဒဟာ ကျဆုံးခဲ့တယ် ။ ဒီမိုကရေစီအပေါ် မယုံကြည်မှုနဲ့ လစ်ဘရယ်ဝါဒအပေါ်သံသယတွေဟာ အနောက်တိုင်းမော်ဒန်ဝါဒကို ထင်ဟပ်ခဲ့တယ်။ ဒါပေမယ့် ကျွန်တော်တို့ဆီက နိုင်ငံရေးကဗျာတွေမှာတော့  ဒီမိုကရေစီ ဖော်ဆောင်ရေးနဲ့ ပြည်တွင်းစစ်ဆိုတဲ့ အချိုးမကျမှုရှိနေရက်သားနဲ့  ဒီမိုကရေစီစနစ်အပေါ်ယုံကြည်မှုပျောက်သွား တာမျိုး မရှိခဲ့ဘူး ။ ပြည်တွင်းစစ်ဟာ ယခင်အာဏာရှင်ကာလရဲ့ အကျိုးဆက်ဖြစ်တယ်လို့သာ ပိုမိုယုံကြည်ထားကြတယ် ။

ဒီအတွက် နိုင်ငံရေးဆိုင်ရာကဗျာတစ်ချို့မှာ တွေ့ရတဲ့  လက္ခဏာတွေထဲက တစ်ခုက ယုံကြည်သက်ဝင်မှု(Commitment) နဲ့ အချိုးမကျမှု (irony)နှစ်ခုလုံး တပြိုင်တည်း သက်ဝင်နေတဲ့ ပုံစံပဲ ။ ယခင်က ပုံသဏ္ဌာန်ဆိုင်ရာစမ်းသပ်တီထွင်မှုကို ပိုပြီး အားစိုက်ခဲ့တဲ့ ကဗျာဆရာလူဆန်းရဲ့ အရေးအသားတစ်ခုမှာတောင် အကြောင်းအရာပိုင်း ကိုလှည့်လည် ကိုင်တွယ်လာတယ် ။ ဒါပေမယ့် အကြောင်းအရာ သက်သက်တော့မဟုတ်ဘူး ။ယနေ့ခေတ်ပြိုင်အခြေအနေရယ် ၊ ကဗျာပေါ်မှာ ရေးသားတင်ပြ ထားတဲ့ အကြောင်းအရာနဲ့ ကိုက်ညီမယ့် ပုံသဏ္ဌာန်ဆိုင်ရာရယ်ကိုရှာဖွေဖော်ထုတ်လာတာပဲ ။ ယနေ့ နိုင်ငံရေးပုံသဏ္ဌာန်ထဲ မှာ အချိုးမကျဆုံးပုံသဏ္ဌာန်တစ်ခုဖြစ်တဲ့ ဒီမိုကရေစီကူးပြောင်းရေးနဲ့  ပြည်တွင်းစစ်ဆိုတာ ကနေဖြစ်လာတဲ့ ကဗျာပုံသဏ္ဌာန်တွေထဲ ကတစ်ခုကတော့ ကျွန်တော်အထက်မှာ ဆိုသလိုပဲ ယုံကြည်သက်ဝင်မှုနဲ့ အချိုးမကျမှုပဲ ။ဒီသဘောကို လူဆန်းရဲ့ ကဗျာ့ ပုံသဏ္ဌာန်အဖြစ်တွေ့လာရမယ် ။

                                    လာပြန်ပြီလားလို့ နောက်မပြောတော့ဘူး

                        ပထမတော့ လာပြန်ဘီလားဆိုပြီး တာဝန်မဲ့ ငြင်းပယ် ပစ်လိုက်ဦးမလို့ပဲ။

နိုင်ငံတော် သမ္မတကြီး ဗိုလ်ချုပ်ကြီးဟောင်း ဦးသိန်းစိန် အမှူးပြုသော အရာရှိ အရာခံ အကြပ်တပ်သား ရဲဘော်သစ်တွေ ကနေ ယနေ့ ၀က်စာကျွေး၊ ချဉ်ပေါင်စိုက်၊ ကန်စွန်းရွက် နှုတ်နေရတဲ့၊ အလေးတောင် သေသေ သပ်သပ် မပြုတတ်လို့ နားရင်း ပါးရင်း ခဏခဏ အရိုက်ခံရတဲ့ ရဲဘော်ငယ် ရဲဘော်အသစ် ပေါက်စနတွေ။

လူထု ခေါင်းဆောင် ဒေါ်အောင်ဆန်းစုကြည် အမှူးပြုသော အသိ ပညာရှင် အတတ် ပညာရှင် မြို့နယ်၊ ခရိုင်၊ ရပ်ကွက်၊ ကျေးရွာ၊ အိမ်စု၊ အိမ်တန်း အဆင့်ဆင့် စည်းရုံးရေး မှူးများ၊ လူထု ရေးရာမှူးများ၊ ယုံကြည်ချက်အတွက် အကျဉ်း ကျခံနေရသူများ၊ လူအချင်းချင်း သိက္ခာ သမာဓိရှိရှိ မသိမသာ သိသိသာသာ တောင်းရမ်း စားသောက် နေကြရတဲ့ သူငယ်ချင်း ရဲဘော် ရေးဘော် ကဗျာဆရာများ အရေးသမားများ၊ သမားတော် ပညာရှင်များ။

ဒေသဆိုင်ရာ ရေခဲတောင် တောင်တန်း၊ ပြည်မ၊ နယ်စပ်၊ ဒေါန တနင်္သာရီ တစ်ကြော တိုင်းရင်းသား လူမျိုးကြီးစု လက်နက်ကိုင် တပ်မတော် စစ် အကြီးအကဲ ခေါင်းဆောင် အသီးသီး အကြီးအမှူး ပြုသော သူတို့ရဲ့ စစ်ပုန်း၊ စစ်ရှောင်၊ စစ်ပြေး၊ ရွာပုန်း၊ ရွာရှောင်၊ ရွာပြေး၊ သားသမီး၊ မြေး၊ မြစ်၊ ဆွေမျိုး၊ ညာတိ အသိပညာ မျိုးဆက် အဆင့်ဆင့် စတဲ့ သုံးဦး သုံးစား ရှိတည် နေတာဟာ ယနေ့အခြေအနေပါ။

ငြိမ်းချမ်းရေးဟာ အထိအရှ မခံပါဘူး။ အကိုင်အတွယ် မတတ်ရင် ကျကွဲ လွင့်ပြယ် တတ်တယ်လို့ ဖတ်ခဲ့ မှတ်သား ခဲ့ရဖူးပါတယ်။

အားကြီးသူက အားနည်းသူအပေါ် နည်းမျိုးစုံ ဖိစီး လွှမ်းမိုး ကြီးစိုးပြီးလုပ်တဲ့ ငြိမ်းချမ်းရေး

အားနည်းသူက အားကြီးသူအပေါ် မယုံမကြည် သင်္ကာမကင်းပဲ လက်နက် အသင့် ပြင်ထားရတဲ့ ငြိမ်းချမ်းရေး

စတဲ့ ငြိမ်းချမ်းရေးမှာ သမိုင်းရှိပါတယ်။

လက်နက် မကိုင်ပဲ ခြေညှပ် ဖိနပ်နဲ့ သွားလာနေတဲ့ ကျွန်တော် အပါအ၀င် မြို့နေ၊ တောနေ၊ ပင်လယ် ရပ်ခြား၊ အိမ်နီးချင်း၊ အိမ်ဝေးချင်းနေတွေ တောင်မှ စိတ်ပန်း၊ လူပန်း၊ ခြေကုန် လက်ပန်း ကျနေတာ။

ကိုယ်စီ ကိုယ်စီ လူမျိုး၊ ဘာသာ စကား၊ သာသနာ၊ နယ်မြေ၊ စာပေ အတွက်ဆိုပြီး သုံးပိသာ လောက်လေးတဲ့ လက်နက်တွေကို ကိုင်ဆောင် ထားရတဲ့ ဗမာ့ တပ်မတော်၊ တိုင်းရင်းသား လူမျိုးစု တပ်မတော် အသီးသီးဟာ ဘယ်လောက် စစ်ပန်း၊ စိတ်ပန်း၊ ခြေကုန် လက်ပန်း ကျနေကြမလဲ။ တွေးမိပါတယ်။

ဘယ်လောက်ပဲ ပန်းပန်းပါ၊ ငြိမ်းချမ်းရေးဆိုတာ အသံ ကြားရရုံနဲ့တင် အမောတွေ၊ အပန်းတွေ ပြေလည်ပြီး ကိုယ့်အိမ် ကိုယ့်ယာထဲ ကိုယ့် လယ်ကွက်၊ ကိုယ့် တောင်ယာထဲ လုံလုံခြုံခြုံ စိတ်အေးရတဲ့ အဓိပ္ပါယ်ကို ဆောင်ပါတယ်။ အဲဒီအတွက် အထက် ဖေါ်ပြပါ အမှူး ပြုကြကုန်သော သုံးဦး သုံးဖလှယ်အပြင် လူတိုင်း လူတိုင်းထဲက တစ်ယောက် အပါဝင်ဖြစ်တဲ့ ကျွန်တော်ကလည်း ဇွန်ပန်း ရုံအနီး ဒုတိယကမ္ဘာစစ်ကြီး ပြီးကတည်းက နွံ့နစ် ကျွံဝင်နေတဲ့ လှည်းဘီးကြီးကို တကယ် ရွေ့မယ်၊ တကယ် ရွေ့မယ်ဆိုရင် အတူတူ အခုပဲ ၀ိုင်းကူ တွန်းဖို့ အဆင်သင့်ပါပဲ ခင်ဗျား။ ကျေးဇူးနဲ့မှ ဥပကာယ အရမ်းနဲ့မှ တင်ချင်ပါတယ်။

ရေးသူ – လူဆန်း

စက်တင်ဘာ၊ ၂၀၁၁။

လူဆန်းရဲ့ ကဗျာပထမဆုံးနှစ်ပိုဒ်မှာကတည်းက ယုံကြည်သက်ဝင်မှုနဲ့ အချိုးမကျမှုကို တွေ့ရမယ်။ ပထမပိုဒ်က စစ်တပ် အကြောင်းဖော်ပြချက်ကိုတွေ့ရမယ် ။ စစ်တပ်အကြောင်း ဖော်ပြချက်မှာ လူဆန်းဟာ မုန်းတီးစိတ်နဲ့ ဖော်ပြတာမျိုးမရှိ ဘူး ။  ယနေ့ ဒီမိုကရေစီအပြောင်းအလဲအတွက် အချိုးမကျမှုတွေရှိနေပေမယ့် အပြုသဘောဆောင်တဲ့ စိတ်ထားနဲ့ ပြောဆိုလုပ် ကိုင်နေရတယ်ဆိုတဲ့ သဘောထားကို ကဗျာရဲ့ အကြောင်းအရာအတွင်းမှာတည်ဆောက်သွားတာကိုတွေ့ရမယ် ။ ကဗျာကို ဖတ်တဲ့အခါသမ္မတကြီးဆိုတဲ့ အသုံးအနှုန်းနဲ့ တစ်လေးတစား အသိအမှတ်ပြုဖော်ပြထားတယ် ။ တစ်ဖက်မှာလည်း စစ်သားတွေအပေါ်စာနာနားလည်စိတ်နဲ့ ဖော်ပြထားပုံကို လူဆန်းရဲ့ “ဒီမိုကရေစီအကူးအပြောင်းကာလ အပြုသဘော ဆောင်တဲ့ စိတ်  ၀ါ ဒီမိုကရေစီပြောင်းလဲမှုအပေါ် တတ်သိနားလည်မှုရယ်” လို့ဆိုချင်တယ် ။ တနည်းအားဖြင့် ဒါဟာ ကဗျာမှာတွေ့ရတဲ့ ကဗျာဆရာရဲ့ လစ်ဘရယ်ဒီမိုကရေစီအပေါ် “ယုံကြည်သက်ဝင်မှု” ပါပဲ ။                                                  တစ်ဖက်မှာလည်း ကဗျာဆရာဟာ ယနေ့ နိုင်ငံရေးပုံသဏ္ဌာန်မှာ ဖြစ်ပေါ်နေတဲ့ အချိုးမကျမှုကို လစ်လျူရှုမထား ခဲ့ဘူး ။ ဒါပေမယ့် အချိုးမကျမှုကို ဖော်ပြတဲ့ နေရာမှာတောင် စကားလုံးအရ ၊ ပုံသဏ္ဌာန်အရ သိမ်မွေ့စွာတည်ဆောက် သွားတာကိုတွေ့ရမယ် ။ ကဗျာရဲ့ ပထမပိုဒ်မှာပဲ  နိုင်ငံတော်သမ္မတကြီးဆိုတဲ့ ဝေါဟာရနဲ့ ဗိုလ်ချုပ်ကြီးဟောင်းဆိုတဲ့ အရာ နှစ်ခုကို တွဲဖက်ဖော်ပြတယ် ။ ဒီစကားကိုဖော်ပြတဲ့ နေရာမှာ အချိုးမကျမှုကို ဖော်ပြထားတယ်ဆိုပေမယ့် ခေတ်ပြိုင် နိုင်ငံရေးလောကမှာ အလွှမ်းမိုးဆုံးနိုင်ငံရေးတရားတစ်ခုလို့ဆိုရမယ့်အပြုသဘောဆောင်တဲ့ စိတ်ထားကလေးနဲ့သာလျင် အချိုးမကျမှုကိုဖော်ပြထားတယ်ဆိုတာကိုတွေ့ရမယ် ။ အကြောင်းက နိုင်ငံတော်သမ္မတကြီးဆိုတဲ့ ဝေါဟရနဲ့ ကပ်သုံးတဲ့ နေရာမှာ ဗိုလ်ချုပ်ကြီးဟောင်းနေရာမှာ နဲနဲ အပျက်သဘောဆန်မယ့် ဗိုလ်ချုပ်ကြီး ဒါမှမဟုတ် ဗိုလ်ချုပ်ဟောင်းကြီးလို့ သုံးနှုန်းဖော်ပြ ထားတာကိုမတွေ့ရဘူး ။                                                                                                                  ကဗျာမှာ အချိုးမကျမှုကို အစပိုင်းနှစ်ပိုဒ်မှာတွေ့ရမယ် ။ တနည်းအားဖြင့် ကဗျာနှစ်ပုဒ်မှာ ပထမပိုဒ်က အစိုးရနဲ့ အုပ်ချုပ်ရေးပိုင်းကိုဖော်ပြထားပြီး ဒုတိယပိုင်းက အတိုက်အခံနိုင်ငံရေးခေါင်းဆောင်နဲ့ အအုပ်ချုပ်ခံပြည်သူတွေရဲ့ အကြောင်းကိုဖော်ပြထားတယ် ။ တတိယအပိုဒ်မှာတော့ လူဆန်းဟာ ခေတ်ပြိုင်အခြေအနေကို ထင်ဟပ်နိုင်တဲ့ ယုံကြည် သက်ဝင်မှုကို ဖော်ပြလာတယ် ။ ဒီအပိုဒ်တွေထဲမှာ အဓိကဖော်ပြထားတာက ပြည်တွင်းစစ်ရဲ့ အခြေအနေပဲ ။ လူဆန်းရဲ့ ကဗျာကို ထပ်ရွတ်ကြည့်နိုင်ပါတယ် ။

“ဒေသဆိုင်ရာ ရေခဲတောင် တောင်တန်း၊ ပြည်မ၊ နယ်စပ်၊ ဒေါန တနင်္သာရီ တစ်ကြော တိုင်းရင်းသား လူမျိုးကြီးစု လက်နက်ကိုင် တပ်မတော် စစ် အကြီးအကဲ ခေါင်းဆောင် အသီးသီး အကြီးအမှူး ပြုသော သူတို့ရဲ့ စစ်ပုန်း၊ စစ်ရှောင်၊ စစ်ပြေး၊ ရွာပုန်း၊ ရွာရှောင်၊ ရွာပြေး၊ သားသမီး၊ မြေး၊ မြစ်၊ ဆွေမျိုး၊ ညာတိ အသိပညာ မျိုးဆက် အဆင့်ဆင့် စတဲ့ သုံးဦး သုံးစား ရှိတည် နေတာဟာ ယနေ့အခြေအနေပါ။“

ဒီအပိုဒ်သုံးပုဒ်ကိုကြည့်ရင် လူဆန်းရဲ့ နိုင်ငံရေး ဆိုင်ရာကဗျာမှာ ပထမနှစ်ပုဒ်ဟာ ဒီမိုကရေစီကူးပြောင်းရေးအတွက် အရေးပါတဲ့  နိုင်ငံရေးအက်တာတွေကို ဖော်ပြထားပြီး တတိယအပိုင်းကတော့ ပြည်တွင်းစစ်ရဲ့ အကျိုးသက်ရောက်မှု ကို ဖော်ပြထားတယ် ။ ထပ်ပြီး ဆိုရရင် ကဗျာရဲ့ ပုံသဏ္ဌာန်ပိုင်းမှာလည်း ယုံကြည်သက်ဝင်မှုရဲ့သဘောနဲ့ အချိုးမကျမှုကို ထင်ရှားပေါ်လွင်အောင်ပုံသဏ္ဌာန်ဆိုင်ရာတည်ဆောက်မှုလုပ်ထားတယ်လို့ ဆိုရမယ် ။ ယနေ့ နိုင်ငံရေးရဲ့ပုံသဏ္ဌာန် ဆိုင်ရာ အချိုးမကျမှုပါပဲ ။

ကဗျာဆရာတွေရဲ့ ဒီမိုကရေစီအကူးအပြောင်းကာလအတွင်း နိုင်ငံရေးဆိုင်ရာကဗျာတွေမှာ အချိုးမကျမှု(irony)ရဲ့ သဘောဟာထင်ရှားတဲ့ လက္ခဏာတစ်ခုပါပဲ ။ယနေ့ ခေတ်ပြိုင်စာပေအဘိဓါန်တွေမှာ အချိုးမကျမှု(irony)ရဲ့ သဘောက အဓိပ္ပာယ်တစ်စုံတစ်ရာ ဒါမှမဟုတ် ခံစားချက်နဲ့ ယုံကြည်သက်ဝင်မှုတစ်ခုကို တည်ဆောက်တဲ့ နေရာမှာ မတူညီတဲ့ ကွဲပြားခြားနားနေတဲ့အရာတွေကနေ သူတို့ရဲ့ ယုံကြည်သက်ဝင်မှုနဲ့ အဓိပ္ပာယ်ကို ထွက်ပေါ်လာအေင်လုပ်တာပါပဲ ။ ယနေ့ အကူးအပြောင်းကာလမှာ ဦးသိန်းစိန်အပေါ်အခြေခံတဲ့ အုပ်ချုပ်သူတွေရယ်၊ အတိုက်အခံခေါင်းဆောင်တွေ၊ ပညာတတ်တွေနဲ့ ပြည်သူတွေဟာ ဒီမိုကရေစီ စနစ်ကို သူ့ရဲ့ တန်ဖိုးစံတွေနဲ့ အညီဖော်ဆောင်နိုင်ဖို့အတွက် အပြုသဘောဆောင်တဲ့ အတွေးအခေါ်တွေနဲ့ တတ်နိုင်သမျှ ဖော်ဆောင်ဖို့ကြိုးစားနေတယ်ဆိုတာကိုတော့ မငြင်းနိုင်ပါဘူး ။ တစ်ဖက်မှာလည်း အဲဒီလို ဒီမိုကရေစီအကူအပြောင်းရယ် လို့ ဆိုပြီး ပြည်တွင်းစစ်ဖြစ်နေခြင်းဟာ နိုင်ငံရေးရဲ့ ပုံသဏ္ဌာန်ဆိုင်ရာမညီညွတ်မှုပဲဆိုတဲ့ ခံစားမှုဟာ လူ့အဖွဲ့အစည်းအပေါ် ရိုက်ခတ်နေတယ် ။ ကဗျာဆရာတွေရဲ့ နိုင်ငံရေးဆိုင်ရာ ကဗျာတွေမှာ ဒီလို ပုံသဏ္ဌာန်ဆိုင်ရာ မညီညွတ်မှုကို တုံ့ပြန်တဲ့ ကဗျာဗေဒအမျိုးမျိုးကိုတွေ့ရမှာဖြစ်တယ် ။ တနည်းအားဖြင့် ကျွန်တော့်အနေနဲ့ ဒီသဘောကို လူဆန်းရဲ့ ကဗျာအပြင် ၊ ဇော်လူစိမ်းရဲ့ ကဗျာမှာလည်းတွေ့ရပါတယ် ။                      ကဗျာဆရာဇော်လူစိမ်းရဲ့ ကဗျာဟာလည်း ပြည်တွင်းစစ်အပေါ် တုံ့ပြန်ထားတဲ့ ကဗျာပါပဲ ။ကဗျာ့ခေါင်းစဉ်က တော့ “စစ်ဟာ ကခုန်နေတယ်” ခေါင်းစဉ်ပါပဲ ။

“စစ်ဟာ ကခုန်နေတယ်”

မနက်ခင်း သတင်းတွေထဲကနေ တို့ကိုပါးနားရိုက်လို့

စစ်ဟာ ကခုန်နေတယ်၊

စစ်ပြန်တစ်ယောက်ပြောတာက

စစ်ဟာ ကျောသားရင်သား မခွဲခြားဘူးဆိုပါလား

ဟုတ်တာပေါ့၊

ဒုက္ခသည်တွေရဲ့ကျောတွေရင်တွေတီးပြီး

စစ်ဟာ ကခုန်နေတယ်၊

သူ့ကိုယ်သူပြန်ကောက်လို့ မရတော့ဘူးတဲ့

အ၀တ်တစ်ထည်ကိုယ်တစ်ခုက အော်လိုက်တာ

ဟုတ်တာပေါ့၊

ခြေပြတ်လက်ပြတ်တွေ မြှောက်မြှောက်ပြီး

စစ်ဟာ ကခုန်နေတယ်၊

အပိုင်းပိုင်း အတစ်တစ်တွေကြားထဲမှာ

စစ်ဟာ ကခုန်နေတယ်၊

အိုးပစ်အိမ်ပစ်တွေရဲ့ ပြေးလမ်းကြောင်းနောက်မှာ

စစ်ဟာ ကခုန်နေတယ်၊

တစပြင်ရဲ့မီးတောက်တွေနဲ့အတူ

စစ်ဟာကခုန်နေတယ်၊

ထိုးစစ်ဖြစ်ဖြစ် ခံစစ်ဖြစ်ဖြစ်

စစ်ဟာကခုန်နေတယ်၊

ဗုံတစ်လုံးဖြစ်ဖို့ နွားမည်းတွေရဲ့အရေကို ဘယ်လိုဆုပ်ခဲ့သလဲ

စစ်တစ်ခုအသံထွက်ဖို့များ ဒုက္ခသည်တွေကို ချနင်းရတယ်လို့

စစ်ဟာ ကခုန်နေတယ်၊

စစ်လျော်ကြေးအဖြစ်

ခေတ်အဆက်ဆက် ဒုက္ခသည်တွေရဲ့ခုံရုံးမှာ

စစ်ကို စီရင်ပါ

စစ်ကို ကွပ်မျက်ပါ

ဒုက္ခသည်စခန်းထဲက အမျှဝေသံနဲ့အတူ စစ်ကိုစွဲချက်တင်လိုက်တယ်

ခုထိ့့့ စစ်ဟာ ကခုန်နေတယ်၊

ခင်ဗျားအနားမှာ ၀ိညာဉ်တစ်ခုလို

စစ်ဟာ ကခုန်နေတယ်၊

ခင်ဗျား မျက်စိရှေ့မှာ စုန်းတစ်ကောင်လို

စစ်ဟာ ကခုန်နေတယ်၊

အရိုးထဲအထိ စိမ့်လာအောင်

ခင်ဗျားရဲ့သွေးပြန်ကြောထဲကနေ

စစ်ဟာ ကခုန်နေတယ်၊

ခုထိ့့့ စစ်ဟာ ကခုန်နေတယ်။

                                                                        ဇော်လူစိမ်း

ကဗျာဆရာဇော်လူစိမ်းရဲ့ အရေးအသားမှာ နိုင်ငံရေးပုံသဏ္ဌာန်ဆိုင်ရာအချိုးမကျမှုကို ကဗျာဗေဒတစ်ရပ်နေနဲ့ ထင်ဟပ်တဲ့ အခါ တန်ပြန်အဆို (counter narrative) ကိုသုံးထားတယ် ။   ဒီနေရာမှာ Counter ၀ါ တန်ပြန်ုလို့သုံးရတာက စစ်ဟာ ကခုန်နေတယ်ဆိုတဲ့  သာယာနူးညံ့တဲ့ ဂီတအနုပညာရဲ့ အပြုအမူကိုစစ်နေတွဲဖက်ထားတဲ့ အတွက်ပဲ ။ စစ်ဟာ ကခုန်နေ တယ် ။ဒါပေမယ့် မနက်ခင်သတင်းတွေထဲက သတင်းတွေဟာ တို့ကိုပါးနားရိုက်ပြီး ကခုန်နေတာ ၊ ဒုက္ခသည်တွေရဲ့ ကျောရင်တွေ တီးပြီး ကခုန်နေတာ ၊ ခင်ဗျားမျက်စိရှေ့မှောက်မှာ စစ်ဟာ ကခုန်နေတာ ။ တနည်းအားဖြင့်  စစ်ရဲ့ ကခုန်ချင်းဟာ နူးညံ့ပျောပြောတဲ့ အနုပညာအလုပ်ကို မလုပ်တော့ဘဲ ရက်စက်ကြမ်းကြုပ်မှုအပေါ်မွေ့လျော်တဲ့ အဓိပ္ပာယ် ထွက်လာအောင်လုပ်လိုက်တာဖြစ်တယ် ။ စစ်ဟာကခုန်နေတယ်ဆိုတာကို နောက်ထပ်အဆိုတစ်ခုနဲ့ အဓိပ္ပာယ် ပိုမို ထွက်ပေါ်လာအောင်လုပ်ထားတာပါပဲ ။  ဒါကြောင့် တန်ပြန်အဆိုတွေကို အသုံးချရင်း ပထမအဆို ဖြစ်တဲ့ စစ်ဟာ ကခုန်နေတယ်ဆိုတဲ့ သဘောမှာ အချိုးမကျမှုဖြစ်ပေါ်လာတယ် ။  အနောက်လူ့အဖွဲ့အစည်းအတွင်းက ကဗျာတွေမှာ စစ်ပွဲကို သရုပ်ဖော်တဲ့ အခါအများစုက စစ်ပွဲရဲ့ ရက်စက်ကြမ်းကြုပ်မှုတွေကို ဖော်ပြတယ် ။  ဇော်လူစိမ်းရဲ့ ကဗျာမှာ စစ်ရဲ့ ရက်စက်ကြမ်းကြုပ်မှုအပြင် စစ်ပွဲကို ရပ်တန့်ကြပါလို့ အပြုသဆောင်တဲ့ ဘက်အခြမ်းကိုပါလှမ်းကြည့်ထားတာတွေ့ရမယ် ။ ကဗျာမှာတော့ “

“ထိုးစစ်ဖြစ်ဖြစ် ခံစစ်ဖြစ်ဖြစ်

စစ်ဟာကခုန်နေတယ်၊

ဗုံတစ်လုံးဖြစ်ဖို့ နွားမည်းတွေရဲ့အရေကို ဘယ်လိုဆုပ်ခဲ့သလဲ

စစ်တစ်ခုအသံထွက်ဖို့များ ဒုက္ခသည်တွေကို ချနင်းရတယ်လို့

စစ်ဟာ ကခုန်နေတယ်၊

စစ်လျော်ကြေးအဖြစ်

ခေတ်အဆက်ဆက် ဒုက္ခသည်တွေရဲ့ခုံရုံးမှာ

စစ်ကို စီရင်ပါ

စစ်ကို ကွပ်မျက်ပါ

ဒုက္ခသည်စခန်းထဲက အမျှဝေသံနဲ့အတူ စစ်ကိုစွဲချက်တင်လိုက်တယ်

ခုထိ့့့ စစ်ဟာ ကခုန်နေတယ်၊”

လို့ဆိုတာ ။စစ်ကို ရပ်တန့်ဖို့ သူအနေနဲ့ ဖိအားပေးထားတယ်။ သူ့ရဲ့ လေသံထဲမှာ အဓိကသုံးထားတဲ့ “စစ်ဟာ ကခုန်နေတယ်” ဆိုတာကိုက အချိုးမကျဖြစ်နေတာ ။ ဒါပေမယ့် သူ့ရဲ့ ကဗျာကို သဘောထားကြီးမှု ၊ အပြုသဘောဆောင်မှုတွေနဲ့ တည်ဆောက်ထားတယ် ။စစ်ကြောင့် ဒုက္ခရောက်ရသူတွေရဲ့ အခြေအနေကိုသာဖော်ပြပြီး ဘယ်သူကိုမှ ထူးထူးခြားခြား အပစ်မတင်ထားတာဟာ ဒီမိုကရေစီအပြောင်းအလဲကာလနဲ့ ကိုက်ညီတဲ့ သဘောထားကြီးမှုနဲ့အပြုသဘောဆောင်အခြေအနေတစ်ရပ်ဆီ ခေါ်ဆောင်ချင်မှုရဲ့ သဘောတွေပဲ ။ထပ်ဆိုရရင် ဇော်လူစိမ်းရဲ့ နိုင်ငံရေးဆိုင်ရာ ကဗျာမှာ ဒီမိုကရေစီ အကူအပြောင်းနဲ့ ပြည်တွင်းစစ်ကြောင့် နိုင်ငံရေးဆိုင်ရာ အချိုးမကျမှုကို “စစ်နဲ့ ကခုန်ခြင်းကို တွဲပြတဲ့ အချိုးမကျမှုပုံစံ ”  နောက် “ စစ်ဟာ ကခုန်နေတယ်ဆိုတဲ့ စာသားကို  အိုးပစ်အိမ်ပစ်တွေရဲ့ ပြေးလမ်းကြောင်းမှာ ဆိုတဲ့ စာသားမျိုးတွေနဲ့ တန်ပြန် ထားတဲ့ တန်ပြန်အဆို အတွင်းကနေလုပ်ကိုင်သွားတယ်လို့ဆိုရမယ် ။

 ယနေ့တွေ့ရတဲ့ နိုင်ငံရေးဆိုင်ရာ ကဗျာတွေမှာ နိုင်ငံသားလွတ်လပ်ခွင့်၊ အခြေခံလိုအပ်ချက်တွေနဲ့ သက်ဆိုင်တဲ့ ကဗျာတွေကိုလည်းတွေ့ရမယ် ။ မိုးဝေးရဲ့ သမ္မတကြီးနဲ့ သုံးလေးမှတ်တိုင်ကလည်း သိသားထင်ရှားတဲ့ ကဗျာဗေဒပုံစံသစ် တစ်ရပ်ဆီကို ရွေ့လျားသွားဖို့ ဦးတည်မှုတစ်ခုပဲ ။

                                    သမ္မတကြီးနဲ့ သုံးလေးမှတ်တိုင် 

  

ဘတ်စ်ကားတွေ တင်သွင်းခွင့်ပြုတော့မယ် ဆိုတဲ့ သတင်းကို

သတင်းစာမှာ ဖတ်ခဲ့ရင်း ဘတ်စ်ကား တစ်စီးပေါ်မှာ

ငါရယ် သမ္မတကြီးရယ် ထိုင်ခုံအလွတ်တစ်ခုမှာ နေရာဦးကြရင်း တွေ့ကြ

ငါတို့ကဗျာအကြောင်းပြောမိ၊ ငါကလည်း ကဗျာတွေ စိစစ်ရေး တင်ရဦးမလားမေးမိ

သမ္မတကြီးက ရိုးစင်းလှပါတယ်၊ သူ မသိပါဘူး တဲ့

သူဟာ တိုင်းပြည်ရဲ့ အခြေံခံလိုအပ်ချက်တွေတည်ဆောက်ခြင်းမှာ

အလုပ်များနေပါသတဲ့။ ဒါနဲ့ ငါလည်း ရောက်တတ်ရာရာ

ခု သမ္မတကြီးစီးနေတာ အထူးဘတ်စ်ကားကြီးတွေပေါ့ လို့

စကူပြုတ်၊ထိုင်ခုံနဲ့နေတဲ့ နေရာလွတ်ကို ဦးစားပေးရင်း ပြောရင်း

အင်္ကျင်္ီဟပြဲစပယ်ယာကို ငါးရာတန်တစ်ရွက် ပေးမိ

၂ ယောက်စာ အဲဒီမှာ စပယ်ယာက သမ္မတကြီးရဲ့ ဘေးပြတင်းကနေ

ကွမ်းတံထွေးကို ဗျစ်ကနဲ ထွေးရင်း တစ်ရာတန်ပေးဖို့ ဟောက်လိုက်တာ

ငါခံလိုက်ရ၊ သမ္မတကြီး မြင်သွားတယ်၊ သမ္မတကြီးကိုလည်း ခရီးသည်တွေ မြင်သွားတယ်။

ဒီလိုနဲ့ စံပြ၊ ဒီလိုနဲ့ စိန်ဂျွန်း၊ ဒီလိုနဲ့ ပဲခူးကလပ်

ဒီလိုနဲ့ အဲဒီရှေ့ နိုင်ငံခြားရေးဝန်ကြီးရုံးဟောင်း(ပြုပြင်ဆဲ)ကို ဖျတ်ကနဲ၊

ပြီးတော့မှ အမျိုးသားပြတိုက် မတ်တပ်ရပ်တွေ ပြည့်ကြပ်ညပ်နေတဲ့

ဘတ်စ်ကားပေါ်မှာ ထိုင်ခုံအပြည့်သာ တင်သည် ဆိုတဲ့

စာတန်းလေးကို သမ္မတကြီးက ဘာနဲ့ဆက်စပ် ငေးရင်း အလုံလမ်းမှာ ပွိုင့်မိ

ဒရိုင်ဘာက ရှေ့က တွန့်ဆုတ်နေတဲ့ နံပါတ်မဲ့ယာဉ်တောက်တောက်ကြီးကို ကြိမ်ဆဲ

မိုးကလည်း မေလလယ်မှာ ရွာရင်း

ကားခေါင်မိုးကလည်း ရေတွေ ယိုကျ

ဒီတော့မှ သမ္မတကြီးက သက်ပြင်းချ စကားတစ်ခွန်းပြောတယ်

မောင်ရင်တို့ ရေးတဲ့ကဗျာတွေထဲမှာ ဒါတွေပါလားတဲ့

ဒါဆို ကဗျာကိုလည်း တိုင်းပြည်ရဲ့အခြေခံလိုအပ်ချက်ထဲ ထည့်ရမတဲ့

ဟုတ်ကဲ့ပါ သမ္မတကြီး၊ ကျမ်းမာပါစေလို့ ပြောရင်း

မြေနီကုန်း မြေနီကုန်းမှတ်တိုင် (ပြိုင်တူ)တွန်းချတာ ခံလိုက်ကြရတယ်

သမ္မတကြီးဟာ သစ်လွင် လှပတဲ့ကားမှတ်တိုင်ကို ပွတ်သပ်ကြည့်ရင်း

တို့ဆင်းခဲ့ကြတာ မြေနီကုန်းမှတ်တိုင်လား တဲ့

ဟုတ်ကဲ့ပါ သမ္မတကြီး  ပြည်သူ့ရင်ပြင်ရှေ့မှာ လုပ်ထားတဲ့

မြေနီကုန်းမှတ်တိုင်ပါလို့ ပြန်ဖြေလိုက်ရတယ်

ဒါတွေကော မောင်ရင်တို့ ကဗျာတွေမှာ ပါသလား တဲ့

ဒါဆို ကဗျာကိုလည်း တိုင်းပြည်ရဲ့အခြေခံလိုအပ်ချက်ထဲ ထည့်ရမတဲ့

ဒီလိုနဲ့ ငါနဲ့ သမ္မတကြီး တကယ့်မြေနီကုန်းလည်း ရောက်ရော

မောလို့ ပန်းလို့ ရေရှိရာအရပ်ကို အမြန်ရှာခဲ့ကြ

ခေါင်းဆောင်နဲ့ ပြည်သူ ချွေးပေါက်ချင်း လဲလှယ်ကြ

ဒီလိုနဲ့ နောက်တစ်နေ့မှာ သမ္မတကြီးရဲ့ ကျမ်းမာရေးသတင်းတွေ ပျံ့နှံ့ခဲ့တယ်

ငါတို့ရဲ့ကဗျာတွေဟာလည်း တိုင်းပြည်ရဲ့ အခြေခံလိုအပ်ချက်ထဲ ပါမပါ မှုန်းဝါးခဲ့တယ်။  ။

မိုးဝေး

ကဗျာမှာ ဒီမိုကရေစီအကူးအပြောင်းကာလ သဘောထားကြီးမှု ၊ အချိုးမကျမှုကို ကဗျာဗေဒတစ်ခုအနေနဲ့ တည်ဆောက် ကြည့်နိုင်တယ် ။ သမ္မတကြီး ဘတ်စ်ကားပေါ်ပါလာတာဟာ အချိုးမကျမှု(irony)ပဲ ။ ဒီအချိုးမကျမှုကို ၀န်းရံတည် ဆောက်ထားတာက ဘတ်စကားပေါ်ရောက်လာခြင်းဆိုတာတဲ့ တင်စားပြောဆိုမှု မတ္တဖော်(Metaphor)၊ပြီးရင် သမ္မတနဲ့ တိုင်းပြည်ရဲ့ လက်ရှိအခြေအနေကို ကပ်လျက်ချပြထားတဲ့ မတောန်နမီ(metonymy)ပဲ ။ အချိုးမကျမှုကို နောက်ထပ် ၀န်းရံဖော်ဆောင်ထားတဲ့ ပုံသဏ္ဌာန်က လွယ်ကူချောမွေ့တဲ့ ဘာသာစကားရေးသားဟန်နဲ့ ကဗျာထဲမှာ ပါဝင်တဲ့ လုံးဝထပ်တူ မညီနိုင်တဲ့ အခြေအနေတစ်ရပ်ကပ်လျက်ချထားခြင်း ၀ါ radical parataxis ကို သုံးထားတဲ့ ဟန်ပါပဲ ။ လွယ်ကူပြီး အပြုသဘောဆောင်တဲ့ ဟန် ၊ သဘောထားကြီးတဲ့ ကဗျာဆရာတစ်ယောက်ရဲ့ “သမ္မတကြီးက ရိုးစင်းလှပါတယ်” ဆိုတဲ့ ဖော်ပြချက် ၊ ရိုးစင်းတဲ့ အရေးအသားနဲ့  လုံးဝထပ်တူမညီတဲ့ အခြေအနေအဖြစ်အပျက်က ဒီမိုကရေစီကူးပြောင်းမှုဖြစ်စဉ်နဲ့ နိုင်ငံရေးပုံသဏ္ဌာန်အချိုးမကျမှုတွေကို ဖော်ပြတဲ့ ကဗျာဗေဒတစ်ခုအဖြစ် တည်ဆောက် ကြည့်နိုင်တယ် ။

ဒီဆောင်းပါးဟာ ယနေ့ ခေတ်ပြိုင်အတွင်း ကဗျာမှန်သမျှမတွေမှာလည်း ဒီလို အခြေအနေနဲ့ ကဗျာဗေဒတွေရှိတယ်လို့ အစွန်းရောက်အနက်ပြန်ထားခြင်းမျိုးမဟုတ်ပါဘူး ။  ကျွန်တော်တည်ဆောက်ယူထားတဲ့ ခေတ်ပြိုင်နိုင်ငံရေး အခြေအနေအတွင်းက နမိတ်ပုံတွေဟာ ဒီကဗျာသုံးပုဒ်မှာ ဘယ်လိုယှက်နွယ်နေသလဲဆိုတာကို အနက်ပြန်ဖွင့်ဆို ကြည့်ခြင်းပါပဲ ။ ခေတ်ပေါ်ကဗျာတွေမှာ အများဆုံးတွေ့ရတတ်တဲ့ သီးခြားအမှတ်လက္ခဏာအကြပ်အတည်း ၊ လူသားဘ၀ပျောက်ဆုံးခြင်းဆိုတဲ့ လက္ခဏာမျိုးတွေကိုလည်း ဒီကဗျာသုံးပုဒ်မှာ လုံးဝမတွေ့ရဘူး။ ဒီအစားယနေ့ ဒီမိုကရေစီအပြောင်းအလဲ၊ နိုင်ငံရေးပုံသဏ္ဌာန် အချိုးမကျမှုတွေနဲ့  သက်ဆိုင်တဲ့ သဘောထားကြီးမှု ၊ ယုံကြည်သက်ဝင်မှု ၊ အချိုးမကျမှုတွေကိုသာ ကဗျာဗေဒ အဖြစ်တွေ့ရတယ် ။

အင်္ဂလိပ်နဲ့အမေရိကန်လိုနိုင်ငံမျိုးတွေ၊ အာဏာရှင်နိုင်ငံမျိုးတွေမှာ သူတို့ဟာ စစ်ပွဲတွေနဲ့ ဖိနိုင်တဲ့ နိုင်ငံရေးစနစ်တစ်ခု ၊ ဒါမှမဟုတ် သမိုင်းဆိုင်ရာ အခင်အကျင်းတစ်ခုကို ဖြတ်သန်းပြီးသွားတဲ့ အခါတိုင်းမှာ  အကြောင်းအရာအသစ်တွေပေါ်ပေါက်လာပြီး ပေါ်ပေါက်လာတဲ့ အကြောင်းအရာ အသစ်နဲ့ ကိုက်ညီမယ့် တက်ခနိတွေ၊ ပုံသဏ္ဌာန်တွေကို ရှာဖွေရင်း ကဗျာလှုပ်ရှားမှုအသစ်တွေ၊ ကဗျာဗေဒအသစ်တွေပေါ်ပေါက်လာတတ်တယ် ။ ။အာဏာရှင်စနစ်ကို သာဖျတ်သန်းခဲ့ရတဲ့ ခေတ်ပေါ်ကဗျာနဲ့ ယနေ့ကာလ ပုံသဏ္ဌာန်ဆိုင်ရာ တီထွင်ဖို့ကြိုးပမ်းနေတဲ့ ကဗျာတွေမှာ မကိုင်တွယ်ခဲ့သေးတဲ့ အကြောင်း အရာ အသစ် ပေါင်းများစွာလည်းတိုး လာမှာတော့အမှန်ပဲ ။ ကဗျာဆရာတွေက သူတို့ရဲ့ အာရုံခံစားမှုနဲ့ စမ်းသပ်တီထွင်မှုတွေကို အခြေခံပြီး လူ့အခွင့်အရေး ချိုးဖောက်မှုတွေ၊ စီးပွားရေးဆိုင်ရာမညီမျှမှုတွေ၊  လူမှုရေးဆိုင်ရာ တရားမျှတမှုကင်းမဲ့ နေပုံတွေ၊ ခွဲခြားဆက်ဆံမှုတွေ၊ နိုင်ငံခြားရေးပေါ်လစီအပါအ၀င် ပေါ်လစီမှားယွင်းမှုကြောင့်ဖြစ်လာတဲ့ ဒုက္ခတွေကို လွတ်လွတ် လပ်လပ်ရေးလာတာတွေ့လာရနိုင်တယ် ။ ကျွန်တော်အနေနဲ့တော့ ဒီလိုအကြောင်း အရာအသစ် တွေကိုကိုင်တွယ် ခြင်းဟာ မြန်မာကဗျာအသစ်အသစ် ဖွံ့ဖြိုးမှုတွေဆီ ဆက်လက်ဦးတည်သွားကောင်းသွားနိုင်တယ်လို့ မြင်တယ်။ ဒါပေမယ့်အကြောင်း အရာ အသစ်အောက်ကို ရောက်သွားရင် ကဗျာဟာ လူမှုရေး ၊ နိုင်ငံရေးသက်သက် အောက်ရောက်သွားနိုင်တဲ့ အစွန်းရောက်မှုလည်းရှိနေတယ် ။အဲဒီလို မရောက်ဖို့ လိုအပ်တာက ကိုယ်တင်ပြမယ့် အကြောင်းအရာအသစ်နဲ့ ကိုက်ညီမယ့် ပုံသဏ္ဌာန်အသစ်တွေ ၊တက်ခနိအသစ်တွေရှာ ဖွေတည်ဆောက်နိုင်ဖို့အရေးကြီး တယ်လို့ မြင်ပါတယ်။

                                                                                    မင်းခက်ရဲ