19.07.2012 နေ့ဖတ်ရန်သတင်းများ

by Myanmar Journal on Wednesday, July 18, 2012 at 5:25pm ·

ကင်ဂျုံအီ စစ်ဦးချုပ် တာဝန်ယူ

မြောက်ကိုရီးယား နိုင်ငံရဲ့ ခေါင်းဆောင် ကင်ဂျုံအွန်းဟာ စစ်တပ် ရဲ့ စစ်ဦးစီးချုပ် ဗိုလ်ချုပ်ကြီး တာဝန် ရယူ လိုက်ပြီလို့ နိုင်ငံပိုင် ရေဒီယိုက ကြေညာလိုက်ပါတယ်။

ပြီးခဲ့တဲ့ ရက်ပိုင်းကပဲ စစ်ခေါင်းဆောင် ပိုင်း အပြောင်း အလဲ လုပ်ခဲ့

ထိပ်တန်း စစ်ဗိုလ်ချုပ်ကြီးကို ရာထူး ကနေ ထုတ်ပစ် ခဲ့တဲ့ စစ်တပ် ခေါင်းဆောင်ပိုင်း အပြောင်း အလဲ ပြုလုပ်ခဲ့ ပြီး တဲ့နောက် မနှစ်က ကွယ်လွန် ခဲ့သူ မြောက်ကိုရီးယား ခေါင်းဆောင် ကင်ဂျုံအီလ်ရဲ့ သား ခေါင်းဆောင်သစ် ကင် ဂျုံအွန်းက ဒီရာထူးကို ရယူလိုက် တာပါ။

ခေါင်းဆောင်ဟောင်း ကင်ဂျုံအီလ်နဲ့ ရင်းနီးသူ လို့ ယူဆကြတဲ့ ဗိုလ်ချုပ်ကြီး ရီယောင်ဟို Ri Yong-ho ကို တနင်္ဂနွေ နေ့က ရာထူး ကနေ ဖယ်ရှား ပစ်ခဲ့ ပါတယ်။

အခု အပြောင်း အလဲ တွေဟာ ဖခင် ရဲ့ အရိုက် အရာကို ရယူခဲ့သူ မြောက်ကိုရီးယား ခေါင်းဆောင်သစ် အနေနဲ့ အစိုးရ အဖွဲ့မှာ သြဇာ အာဏာ ရှိမှုကို ပြသတဲ့ လက္ခဏာပဲလို့ ကျယ်ကျယ် ပြန့်ပြန့် ရှုမြင် နေကြပါတယ်။

သမ္မတ ဦးသိန်းစိန္နဲ့ ၁၀ ပါတီ တြေ့ဆုံ

သမ္မတက ပါတီ ၁၀ ပါတီက ကိုယ်စားလှယ် တွေနဲ့ ဆွေးနွေး (သမ္မတရုံး ဝက်ဆိုက် ဓါတ်ပုံ)

သမ္မတ ဦးသိန်းစိန်က ဒီမိုကရေစီ မိတ်ဆွေ ၁၀ ပါတီကို ဖိတ်ခေါ်ပြီးဗုဒ္ဓဟူး နေ့က တွေ့ဆုံခဲ့ ပါတယ်။

အဲဒီ တွေ့ဆုံ ပွဲမှာ သမ္မတနဲ့ အတူ ပြည်ထောင်စု ဝန်ကြီးဦးအောင်မင်း နဲ့ ဦးစိုးသိမ်းတို့ လည်း တက်ရောက်ခဲ့ကြ ပါတယ်။

သမ္မတက လက်ရှိ သူတို့ လုပ်ဆောင် နေတာတွေ စိန်ခေါ်မှု တွေကို ပြောပြပြီး နိုင်ငံ တည်ဆောက်ရေးနဲ့ ပြည်ပက ရင်းနှီး မြှုပ်နှံမှုတွေ လုပ်လာအောင် ဝိုင်းဝန်း တိုက်တွန်း ကြဖို့ နိုင်ငံရေး ပါတီတွေကို ပြောခဲ့ ပါတယ်။

ပါတီ တခုချင်းစီ ဘက်ကလည်း နိုင်ငံ တည်ဆောက် ရာမှာ အားမလို အားမရ ဖြစ်နေတဲ့ ကိစ္စတွေနဲ့ သူတို့ ဖြစ်စေ လိုတဲ့ ကိစ္စရပ် တွေကို တင်ပြဆွေးနွေးခဲ့ ပါတယ်။

တိုင်းရင်းသား ပါတီတွေ က သူတို့ ဒေသ တွေမှာ ကြုံတွေ့ နေရတဲ့ စိန်ခေါ်မှုတွေကို ဆွေးနွေး ခဲ့ကြ ရာမှာ ရခိုင် ပြည်နယ်မှာ ဖြစ်ခဲ့တဲ့ ပဋိပက္ခနဲ့ ပတ်သက်လို့ ဘင်္ဂါလီ ရိုဟင်ဂျာ သမိုင်းကြောင်းကို သိအောင် အလုပ်ရုံ ဆွေးနွေးပွဲ တခု လုပ်သင့်ကြောင်း အကြံပြုခဲ့တယ်လို့ ရခိုင်တိုင်းရင်းသားများ တိုးတက်ရေးပါတီက အတွင်းရေးမှူး ဦးဦးစောလှက ပြောပါတယ်။

ချင်းအမျိုးသား ပါတီဥက္ကဌ ဦးဇိုဇမ်း က တော့ ထာဝရ ငြိမ်းချမ်းရေးနဲ့ ပတ်သက် ပြီး လက်နက်ကိုင် နေတဲ့ တိုင်းရင်းသား တွေရဲ့ လိုအင် ဆန္ဒ အစစ် အမှန်ကို သိရအောင် ညီလာခံ တရပ် ခေါ်ယူ ဖေါ်ထုတ်ဖို့ ဆွေးနွေး ခဲ့တဲ့ အပြင် ဖက်ဒရယ် ကိစ္စနဲ့ ပတ်သက်လို့ လည်း ပြောဆို ဆွေးနွေးခဲ့ ပါတယ်။

သမ္မတ ဦးသိန်းစိန်က သူတို့ရဲ့ ငြိမ်းချမ်းရေးဖေါ်ဆောင်ရေး အစီ အစဉ်ကို ရှင်းပြခဲ့ ပါတယ်။

ပြည်ထောင်စု ဝန်ကြီး ဦးအောင်မင်းက လည်း သူတို့ ဆောင်ရွက် နေတာတွေကို ပြောပြ ခဲ့ပြီး ထာဝရ ငြိမ်းချမ်းရေး ရဖို့ မျှော်လင့်ချက် ထားတယ်လို့ ပြောခဲ့ကြောင်း ဦးဇိုဇမ်းက ရှင်းပြ ပါတယ်။

နောက်ထပ် ဆွေးနွေး ခဲ့ကြတဲ့ ကိစ္စတွေ ထဲမှာ ၂၀၁၅ ရွေးကောက်ပွဲ နည်းစနစ် ပြောင်းလဲရေး၊ ရခိုင် ပြည်နယ်က ရေနံ ပိုက်လိုင်း ကိစ္စ၊ လယ်ယာမြေ ကိစ္စ တိုင်းရင်းသား ဘာသာစကား သင်ကြားရေး ကိစ္စ စတာတွေ ပါဝင် တယ်လို့ သိရ ပါတယ်။

ဆီးရီးယား ဗုံးခွဲတိုက်ခိုက်မှုတွင်း ကာကွယ်ရေးဝန်ကြီး သေဆုံး

အမျိုးသားလုံခြုံရေး ဌာန ကို အသေခံဗုံးခွဲ တိုက်ခိုက်

ဆီးရီးယား နိုင်ငံမှာ အသေခံ ဗုံးခွဲ သမား တစ်ယောက်ရဲ့ တိုက်ခိုက်မှုကြောင့် သမ္မတ အာဆတ် အစိုးရ အဖွဲ့က ထိပ်တန်း အရာရှိကြီးတွေ အတော်များများ သေဆုံးတာ၊ ဒဏ်ရာ ရတာတွေ ရှိခဲ့တယ်လို့ ဆီးရီးယား နိုင်ငံပိုင် ရုပ်မြင်သံကြားက ကြေညာ ခဲ့ ပါတယ်။

ဒမားစကပ်စ် မြို့တော်က အမျိုးသား လုံခြုံရေး ဌာနချုပ်ကို အသေခံ ဗုံးခွဲ ခဲ့တဲ့ အတွက် သေဆုံးသူ တွေ ထဲမှာ ကာကွယ်ရေး ဝန်ကြီး Daoud Rajiha ပါဝင်ပါတယ်။

ဒါ့အပြင် သေဆုံးသူတွေထဲမှာ ဆီးရီးယား နိုင်ငံရဲ့ လုံခြုံရေးနဲ့ ပတ်သက်လို့ အလွန် သြဇာ တိက္ကမ ကြီးမား ခဲ့တဲ့ သမ္မတ အာဆတ်ရဲ့ ယောက်ဖ တော်စပ်သူ Assef Shawkat လည်း ပါဝင် ပါတယ်။

ဆီးရီးယား ထောက်လှမ်းရေး အကြီးအကဲ Hisham Ikhtiar နဲ့ ပြည်ထဲရေး ဝန်ကြီး Mohammad Ibrahim al-Shaar တို့ လည်း ထိခိုက်ဒဏ်ရာ ရခဲ့ကြ ပါတယ်။

အစိုးရ အဖွဲ့ဝင် ဝန်ကြီးတွေနဲ့ ထိပ်တန်း လုံခြုံရေး အရာရှိတွေ အစည်း အဝေး ပြုလုပ်နေစဉ် အသေခံ ဗုံးခွဲ သမားက တိုက်ခိုက်ခဲ့တာပါ။

ဒီဖြစ်ရပ်ဟာ ဆီးရီးယား အစိုးရ အတွက် အတော့်ကို အထိနာစရာ ဖြစ်ရပ် ပါ။

ပြည်ပက အကွက်ချ ခိုင်းစေမှု အတိုင်း ကြေးစား ရာဇဝတ် သမားတွေ လိုက်လုပ်တဲ့ အဲဒီဗုံးခွဲ တိုက်ခိုက်မှု အတွင်းမှာ တခြား အစိုးရ တာဝန်ရှိ ပုဂ္ဂိုလ်တွေလည်း ဒဏ်ရာရခဲ့တယ်လို့ ကာကွယ်ရေး ဝန်ကြီးဌာနရဲ့ ကြေညာချက် ထဲမှာ ဖေါ်ပြထားပါတယ်။

လက်နက်ကိုင် အကြမ်းဖက်သမားတွေကို အမြစ်ဖြုတ် ချေမှုန်းဖို့ ဆီးရီးယား အစိုးရက စိတ်ပိုင်းဖြတ်ထားမှုဟာ အခုလို ကာကွယ်ရေး ဝန်ကြီးနဲ့ သူ့ လက်ထောက်တို့ သေဆုံးခဲ့မှုကြောင့် ပိုတိုးလုပ်သွားဖို့ပဲ ရှိတယ် လို့လည်း အဲဒီ ကြေညာချက် ထဲမှာ ဖေါ်ပြထားပါတယ်။

အင်အားကြီး နိုင်ငံတွေအကြား သဘောထား ကွဲလွဲနေမှု တွေကြောင့် နိုင်ငံတကာ သံတမန်ရေး ကြိုးပမ်းမှုတွေ သိသိသာသာ ပျက်ယွင်းသွားပြီ၊ ဆီးရီးယား နိုင်ငံတွင်းက ပဋိပက္ခတွေဟာ အတိုင်းအတာတခုကို တိုးမြင့် ရောက်ရှိသွားပြီ လို့ ယူဆနေမှုတွေဟာ အခုနောက်ဆုံး ဖြစ်ခဲ့တဲ့ ဒီဖြစ်ရပ်တွေကြောင့် ပိုခိုင်မာ သွားစေပါတယ်။

ဒမားစကပ်စ်မြို့တော်ကို သူပုန်တွေက အကြီးအကျယ် ထိုးစစ်ဆင် တိုက်ခိုက်နေတယ်ဆိုတဲ့ ပြောဆိုချက်တွေ ပေါ်ထွက်နေချိန်မှာပဲ ဒီတိုက်ခိုက်မှု ဖြစ်ပွားခဲ့တာပါ။

Operation Damascus Volcano ဒမားစကပ်စ် မီးတောင် စစ်ဆင်ရေး လို့ အမည်ပေးထားတဲ့ ထိုးစစ်ဆင် လှုပ်ရှားမှုတွေကို သူပုန်တွေ ဘက်က တိုးလုပ် လာနေချိန်မှာပဲ ဒမားစကပ်စ် မြို့တော်ရဲ့ နေရာ အတော်များများမှာ ထိပ်တိုက် ရင်ဆိုင် တိုက်ခိုက်မှုတွေ ဆက် ဖြစ်ပွားနေပါတယ်။

သူပုန်တွေအနေ နဲ့ အောင်ပွဲက လက်တကမ်းအကွာမှာ ရောက်နေပြီလို့ ထင်ထင်ရှားရှား ယူဆနေကြချိန်မှာ အခုလို ထိပ်တန်း အစိုးရ လုံခြုံရေး တာဝန်ရှိ ပုဂ္ဂိုလ် နှစ်ဦး သေဆုံးသွားတာဟာ သူပုန်တွေ အတွက်တော့ ပိုအားတက် စရာ ဖြစ်သွား လိမ့်မယ် လို့ ဘေရွတ်မြို့မှာ ရှိတဲ့ ဘီဘီစီ သတင်းထောက် Jim Muir က သတင်းပေးပို့ပါတယ်။

ပိတ်ဆို့မှု ရုပ်သိမ်းရေးနဲ့ ဦးဌေးဦး အမြင်

ဒေါ်စုက လုပ်နိုင်မယ် ဆိုရင် ပိတ်ဆို့မှု အားလုံး ရုပ်သိမ်း အောင်လုပ်စေချင်တယ်လို့ ဦးဌေးဦးကဆို

မြန်မာနိုင်ငံ အပေါ် ပိတ်ဆို့ အရေးယူ မှုတွေ ရုပ်သိမ်းအောင် တောင်းဆိုဖို့ အတွက် သင့်တော်တဲ့သူ တဦးကို လွှတ်တော်က ရွေးချယ်ဖို့ သဘောတူ ခဲ့ပြီး တဲ့နောက် ဒေါ်အောင်ဆန်း စုကြည်ကို တာဝန် ပေးလိမ့်မယ် ဆိုတဲ့ ပြောဆိုချက်တွေ ရှိသလို အဲဒီ နောက်ပိုင်းမှာ ပြည်သူ့ လွှတ်တော် ဥက္ကဌ သူရ ဦးရွှေမန်းနဲ့ ဒေါ်အောင်ဆန်း စုကြည်တို့ ဒုတိယ အကြိမ် တွေ့ဆုံခဲ့ ပါတယ်။

ဒီတော့ အစိုးရ အနေနဲ့ရော လွှတ်တော် အနေနဲ့ ပါ။ ဒေါ်အောင်ဆန်း စုကြည်ကို ဘာတွေ လုပ်ပေး စေချင် တာလဲ။

အာဏာရ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေး ပါတီရဲ့ အထွေထွေ အတွင်းရေးမှူး ဦးဌေးဦး ကို ဆက်သွယ် မေးကြည့်တော့၊ ဦးရွှေမန်းနဲ့ ဒေါ်အောင်ဆန်း စုကြည် တို့ ဘာတွေ ဆွေးနွေးလဲ သူမသိကြောင်း ပြောပြီး ပိတ်ဆို့ အရေးယူမှု တွေနဲ့ ပတ်သက်လို့ သူတို့ ဖက်က အမြင်ကို ခုလို ဆိုခဲ့ ပါတယ်။

ဦးဌေးဦး။ ဆန်ရှင်နဲ့ ပတ်သက်လို့ ကတော့ ကျွန်တော်တို့ သဘောထား ရှိပါတယ်။ မြန်မာ နိုင်ငံနဲ့ ပတ်သက်လို့ စီးပွားရေး တခုလုံး ကိုတော့ ထိခိုက် တာတော့ မဟုတ်ဘူး။ သို့သော်လည်းဘဲ အလုပ်အကိုင် ရရှိ ရေးတို့ ၊ အချို့သော စီးပွားရေး လုပ်ငန်း တွေတော့ ထိခိုက်တာပေါ့။ ဒါကြောင့် ကျွန်တော်တို့ ကတော့ မလိုလားဘူး။ နဂိုထဲကလည်း ဒီသဘောထား ရှိပါတယ်။ အခုလည်း ဒီသဘောထား ရှိပါတယ်။ ဖြေလျှော့ ပေးတာ တွေနဲ့ ပတ်သက် လို့လည်း ကျေးဇူး တင်ပါတယ်။ အဲဒီ အထဲမှာ အဓိက ကျတာကတော့ ငွေကြေး၊ ငွေပို့တဲ့ ဥစ္စာပေါ့။ အဲဒီဥစ္စာ တွေနဲ့ ပတ်သက် လို့က ဖြေလျှော့မှု ထဲမှာ မပါသေးဘူး။ ဒါလေးတွေလည်း အဆင်ပြေ သွားရင်း ကောင်းတာပေါ့ဗျာ။

ဘီဘီစီ။ ဒီကြားထဲမှာ ဒေါ်နန်းဝါနု ကနေ လွှတ်တော်မှာတင်တာ ရှိပါတယ်။ မြန်မာ နိုင်ငံအပေါ် ပိတ်ဆို့ အရေးယူမှုနဲ့ ပတ်သက်ပြီး တစုံတယောက် ကိုတာဝန်ပေးပြီး လုပ်သင့်တယ်လို့ပြောပါတယ်။ ဒါနဲ့ပတ်သက်ပြီး လွှတ်တော် အနေနဲ့ ဒေါ်အောင်ဆန်းစုကြည်ကို တာဝန် ပေးချင်တယ် ဆိုတဲ့ယူဆချက်တွေ တော်တော်လေး များပါတယ်။ သူလည်း လက်ခံတယ်လို့ ပြောတာတွေ ရှိပါတယ်။ သူ့အနေနဲ့ ဘာလုပ်ပေး စေချင်တယ် ဆိုတာကိုပြောပြပါလား ခင်ဗျ။

ဦးဌေးဦး။ မဟုတ်ဘူး။ ကျွန်တော်တို့က တစုံတယောက် ဆိုတဲ့ဥစ္စာ အားလုံးပါဘဲ။ ကျွန်တော်တို့လည်း လုပ်နေတာဘဲ၊ နိုင်ငံတော် သမ္မတကြီးလည်း လုပ်နေတာဘဲလေ။ နိုင်ငံတော်သမ္မတကြီးဆိုရင် ကမ္ဘောဒီးယား မှာတောင်မှ ကလင်တန်နဲ့ ဆွေးနွေးနေတာတွေ ရှိတာဘဲ။ ဒီစီးပွားရေး လုပ်ငန်း တွေနဲ့ ပတ်သက်လို့ ပါမှာဘဲလေ။

ဘီဘီစီ။ ဒါပေမယ့် အခုက တယောက်ကို တာဝန်ပေးသင့် တယ်လို့ ပြောတာကို။

ဦးဌေးဦး။ မှန်တယ်၊ မှန်တယ်။ လုပ်ပေးနိုင်တဲ့ လူတယောက် ဆိုတဲ့အထဲမှာ သမ္မတလည်း ပါတယ်။ ကျန်တဲ့လူတွေ လည်းပါတယ်။ လုပ်ပေး နိုင်တဲ့ လူ အားလုံးဘဲ ဆိုလိုပါတယ်။

ဘီဘီစီ။ ဒီတော့ ဒေါ်အောင်ဆန်းစုကြည်ကို ဒီကိစ္စ အတွက် တာဝန်ပေးမယ်လို့ မဆုံးဖြတ်ရ သေးဘူးလို့ ဆိုလိုတဲ့ သဘောလား ခင်ဗျ။

ဦးဌေးဦး။ မဟုတ်ဘူးလေ။ တာဝန်ပေးရ အောင်လည်း၊ ဆန်ရှင်တခုလုံးကို သူကနေ လွတ်အောင် လုပ်ပေး နိုင်သလား၊ မလုပ်ပေး နိုင်သလား လည်း ကျွန်တော် မသိပါဘူး။ အဲဒီတော့ လုပ်ပေး နိုင်တဲ့လူ အားလုံးကို ဝိုင်းလုပ်ပါလို့ ပြောတဲ့ သဘောလို့ဘဲ ကျွန်တော် ယူဆပါတယ်။

ဘီဘီစီ။ ဒါပေမယ့် အဲဒီအဆို တင်တဲ့ အချိန် တုန်းကတော့ တယောက်ကို တာဝန်ပေးသင့်တယ် ဆိုတာမျိုး ပြောတယ်။ နောက် ဒီနောက်ပိုင်းမှာ ဒေါ်အောင်ဆန်းစုကြည် နဲ့ လွှတ်တော် ဥက္ကဌ သူရဦးရွှေမန်းနဲ့ တွေ့တာ ဒီကနေ့လည်း တွေ့တယ်လို့ ကြားပါတယ်။ နောက် ဒေါ်အောင်ဆန်းစုကြည်နဲ့ အမေရိကန် လွှတ်တော် အမတ်၊ အထူး သဖြင့် ဒီဆန်ရှင်နဲ့ ပတ်သက်ပြီး အရေးကြီးတယ်လို့ ပြောကြတဲ့ မစ်ခ်ျ မက်ကော်နယ် နဲ့ တွေ့တာလည်း ရှိပါတယ်။ ဆိုတော့ ဒီကိစ္စမှာ ဒေါ်အောင်ဆန်းစုကြည် အနေနဲ့ တစုံတရာ ဆောင်ရွက်ပေးမယ် ဆိုရင် ဘယ်လို ဆောင်ရွက် ပေးစေချင်တယ် ဆိုတာကို သိချင်ပါတယ်။

ဦးဌေးဦး။ ဒါနဲ့ ပတ်သက်လို့လား။ သူလုပ်ပေးချင်တယ်ဆိုရင်တော့ ဆန်ရှင်နဲ့ပတ်သက်လို့ ကျွန်တော်တို့ မကြိုက်ဘူးပေါ့။ ဆန်ရှင်နဲ့ ပတ်သက်လို့ အားလုံး ဆန်ရှင်မရှိအောင် လုပ်ပေးပေါ့ဗျာ။ ဒီလိုဘဲကျွန်တော်တို့ မြင်ပါတယ်။ခုန တစုံတယောက် ဆိုတဲ့ဥစ္စာမှာလည်း အားလုံးကို ဆိုလိုတာပါ။

ဘီဘီစီ။ နောက်တပိုင်းက အမေရိကန် အစိုးရ အနေနဲ့က မြန်မာနိုင်ငံရဲ့ လူ့အခွင့်အရေး နဲ့ပတ်သက်လို့ စိုးရိမ်မှုတွေကြောင့် သူတို့ ပိတ်ဆို့ တာပါလို့ ပြောခဲ့တာရှိပါတယ်။ ဆိုတော့ သူတို့ ဘက်က တောင်းဆိုတာ တွေကို မြန်မာအစိုးရက လုပ်လာအောင်၊ ဒါမှမဟုတ် လုပ်ပေးမယ် ဆိုတဲ့ အချက်တွေ ကရော ဘယ်လိုအနေ အထား ရှိပါလဲ။

ဦးဌေးဦး။ ကျွန်တော်တို့ ကိုယ့်နိုင်ငံရဲ့ ဖွံ့ဖြိုး တိုးတက်ရေး လမ်းကြောင်းကို ဘယ်လမ်းကြောင်းနဲ့ သွားမယ် ဆိုတာကို ကိုယ်တိုင် ဆုံးဖြတ် ပြီးတော့မှ ဒီလမ်းကြောင်း အတိုင်းဘဲ အောင်မြင်အောင် ကျွန်တော်တို့ လုပ်ပါတယ်။ အဲဒီအပေါ်မှာ နိုင်ငံ အသီးသီးရဲ့ သဘောထား တွေကတော့ တူချင်မှ တူပါ လိမ့်မယ်။ အဲဒီ သဘောထား တွေ အပေါ် မူတည်ပြီး နိုင်ငံရေး လမ်းကြောင်းကလည်း မှန်နေပြီလို့ ပြောတာတွေ ကြားလိုက်တော့ ဝမ်းသာပါတယ်။ ဆုံးဖြတ်တာကတော့ သူတို့ရဲ့ အဆုံးအဖြတ်ဘဲ ဖြစ်ပါလိမ့်မယ်။ အမှန်ကန် ဆုံးနဲ့ အသင့်တော်ဆုံး၊ ဆုံးဖြတ် နိုင်လိမ့်မယ် လို့ဘဲ ကျွန်တော် ယုံပါတယ်။

 အာဇာနည်နေ့ စုဝေးမှုတွေ ပိတ်ပင်

အာဇာနည် ခေါင်းဆောင် ဗိုလ်ချုပ်အောင်ဆန်း

အာဇာနည် နေ့ အခမ်းအနား ကျင်းပ လိုသူတွေကို ဟန့်တား ကန့်သတ်မှုတွေ ရှိနေပါတယ်။

မန္တလေး ရတနာပုံ တက္ကသိုလ် ကျောင်းသား တွေက အောက်မေ့ဖွယ် အခမ်းအနား ကျင်းပ ချင်တာကို ကျောင်းဝင်းတွင်း ကျင်းပခွင့် မပေးဘူး၊ နိုင်ငံတော် သီချင်း မဆိုရဘူး လို့ ပါမောက္ခချုပ်က တားမြစ် ခဲ့တယ်လို့ သိရပါတယ်။

လူစုလူဝေး ဖြစ်မှာ စိုးလို့ ပိတ်ပင်တာလို့ ဆိုပါတယ်။

ရှမ်းပြည် အောင်ပန်းမှာ အဆောက်အအုံထဲ ဆွမ်းကျွေး ကျင်းပခွင့် ပြုပေမယ့် ဗိုလ်ဗထူး ကျောက်တိုင်မှာ လွမ်းသူ့ပန်းခွေ ချတာကိုတော့ ခွင့်မပေးဘူးလို့ သိရပါတယ်။

ပဲခူး၊ မကွေး ၊ ပြည် စတဲ့ ပြည်မ မြို့တွေမှာလဲ ဗိုလ်ချုပ် အောင်ဆန်း ကြေးရုပ်တွေ မှာ မစုရုံးရလို့ စီစဉ်သူ တွေကို ဒေသ အာဏာပိုင် တွေက အသိပေး ထားပါတယ်။

၁၉၄၇ ခုနှစ်က လုပ်ကြံ သတ်ဖြတ် ခံရတဲ့ အစိုးရ အဖွဲ့ ခေါင်းဆောင် ဦးအောင်ဆန်း ဇာတိ နတ်မောက် မြို့မှာလဲ ဗိုလ်ချုပ် ကျောက်ရုပ်မှာ မလုပ်ပါနဲ့လို့ အလားတူ ကန့်သတ် ခဲ့ပါတယ်။

ကန့်သတ်မှု တွေရဲ့ အဓိက အကြောင်းပြချက် ကတော့ အာဇာနည် နေ့ဟာ ဗိုလ်ချုပ် အောင်ဆန်း တယောက်ထဲ နဲ့ ဆိုင်တာ မဟုတ်လို့ အာဇာနည် အမှတ်တရ ကျောက်တိုင် အဆောက်အဦ ရှိတဲ့ဆီမှာပဲ လုပ်ပါလို့ ကန်သတ် တာပဲ ဖြစ်ပါတယ်။

နှစ် ၂ဝ ကျော် ပိတ်ပင် ခံခဲ့ရတဲ့ အာဇာနည် နေ့ ကို ကန့်သတ်မှု တွေကြားက ကျင်းပဖို့ တက်ကြွတဲ့ ဒေသခံ အရပ်သားတွေက စီစဉ် နေကြပါတယ်။

တောင်အာဖရိက ခေါင်းဆောင်ဟောင်း မန်ဒဲလား ၉၄ နှစ်ပြည့်

By ဗွီအိုအေ(မြန်မာဌာန)

• ဒီကနေ့ကျရောက်တဲ့ တောင်အာဖရိက နိုင်ငံ့ခေါင်းဆောင်ဟောင်း Nelson Mandela ရဲ့ အသက် ၉၄ နှစ်ပြည့် မွေးနေ့အတွက် တောင်အာဖရိက ကျောင်းသားကျောင်းသူပေါင်း ၁၂ သန်းက မွေးနေ့သီချင်း ကို သီဆိုပေးခဲ့ကြပါတယ်။

အများပြည်သူနဲ့သက်ဆိုင်တဲ့ ပွဲလမ်းတွေကနေ အနားယူထားတဲ့ Mr. Mandela ကတော့ သူ့ရဲ့ မွေးနေ့ကို အရှေ့တောင်ပိုင်း Qunu မြို့မှာရှိတဲ့ နေအိမ်မှာ မိသားစုနဲ့ပဲ အချိန်ကုန်ဆုံးပါတယ်။ တောင်အာဖရိကမှာ ၆၇ နှစ်ကြာနိုင်ငံရေးလုပ်ခဲ့တဲ့ Mr. Mandela ကို ဂုဏ်ပြုတဲ့အနေနဲ့ ကမ္ဘာတဝန်း က လူတွေဟာ ၆၇ မိနစ်စီ ပရဟိတအလုပ်တွေမှာ လုပ်အားပေးနေကြပါတယ်။

ကမ္ဘာတဝန်းကနေလည်း မွေးနေ့ဆုတောင်းတွေ ပေးပို့နေကြတဲ့အထဲမှာ တချိန်တုန်းက Robin ကျွန်း အကျဉ်းထောင်မှာ Mr. Mandela နဲ့ ထောင်ကျဖော်ဖြစ်ခဲ့တဲ့ Ahmed Kathrada က Mr. Mandela ဟာ တကယ့်အထင်ကရ နမူနာယူသင့်တဲ့ ခေါင်းဆောင်ကောင်းတယောက်ဖြစ်တယ်လို့ ပြောကြား ခဲ့ပါတယ်။

တောင်အာဖရိနိုင်ငံမှာ လူဖြူလူမည်း အသားအရောင်ခွဲခြားမှုကို ဦးဆောင်တိုက်ခိုက်ခဲ့သူ Mr. Mandela ဟာ ၂၇ နှစ်ကြာ ထောင်ကျခဲ့ပြီးနောက် ၁၉၉၄ ခုနှစ်မှာ တောင်အာဖရိကနိုင်ငံရဲ့ ပထမဆုံး လူမည်းသမ္မတ ဖြစ်လာခဲ့ပါတယ်။ Nelson Mandela ရဲ့ ဆောင်ရွက်မှုတွေကို အားကျ အတုယူပြီး ပိုမိုကောင်းမွန်တဲ့ ကမ္ဘာကြီးတည်ဆောက်ကြဖို့ သူ့ရဲ့ မွေးနေ့ ဂျူလိုင်လ ၁၈ ရက်နေ့တိုင်းကို တောင်အာဖရိကမှာ Mandela နေ့အဖြစ်သတ်မှတ်ထားပါတယ်။

စစ်ဘက် ထိပ်တန်းရာထူး ကင်မ်ဂျုံအွန်း ရရှိ

By ဗွီအိုအေ(မြန်မာဌာန)

• မြောက်ကိုရီးယားနိုင်ငံရဲ့ ခေါင်းဆောင် Kim Jong Un ကို နိုင်ငံရဲ့အဆင့်အမြင့်ဆုံး စစ်ရာထူးဖြစ်တဲ့ ဗိုလ်ချုပ်မှူးကြီး အဖြစ် ရာထူးတိုးပေးလိုက်တယ်လို့ မြောက်ကိုရီးယားက ပြောလိုက်ပါတယ်။

အခုလို ရာထူးတိုးလိုက်တဲ့သတင်းကို အထူးသတင်းအဖြစ်နဲ့ အစိုးရပိုင် သတင်းမီဒီယာကနေ ဒီကနေ့ ဗုဒ္ဓဟူးနေ့မှာ သတင်းတို ထုတ်ပြန်ခဲ့တာပါ၊ မြောက်ကိုရီးယားရဲ့ထိပ်တန်း စစ်ခေါင်းဆောင်တယောက်လည်း ဖြစ် Kim Jong Un ရဲ့ အကြံပေးတယောက်လည်းဖြစ်တဲ့ Ri Yong Ho ကိုရာထူးကနေ ဖယ်ရှားခဲ့ပြီးနောက်မှာ အခုလို အပြောင်းအလဲသတင်းကို ထုတ်ပြန်လိုက်တာဖြစ်ပါတယ်။

နာမကျန်းဖြစ်နေတဲ့အတွက် Ri Yong Ho ကို ရာထူးတာဝန်အားလုံးကနေ ဖယ်ရှားလိုက်တာဖြစ်တယ်လို့ မြောက်ကိုရီးယားက ပြောပါတယ်။ Kim Jong Un ကို တိုးပေးလိုက်တဲ့ ဗိုလ်ချုပ်မှူးကြီး ရာထူးဟာ ပြီးခဲ့တဲ့ ဒီဇင်ဘာမှာ သေဆုံးသွားသူ သူ့ဖခင် Kim Jong Il ယူခဲ့တဲ့ စစ်ရာထူးလည်း ဖြစ်ပါတယ်ရှင်။

ဆီးရီးယား ကာကွယ်ရေးဝန်ကြီး လုပ်ကြံခံရ

By ဗွီအိုအေ(မြန်မာဌာန)

• ဆီးရီးယားနိုင်ငံ Damascus မြို့တော်မှာရှိတဲ့ အမျိုးသားလုံခြုံရေးဌာနအဆောက်အဦးမှာ ဗုံးခွဲမှုတခုကြောင့် ကာကွယ်ရေးဝန်ကြီး Daoud Rajha နဲ့ ဒုတိယကာကွယ်ရေးဝန်ကြီး Assef Shawkat တို့ သေဆုံးသွား တယ်လို့ ဆီးရီးယားအစိုးရ ရုပ်မြင်သံကြားက သတင်းထုတ်ပြန်ပါတယ်။

Shawkatဟာ သမ္မတ Bashar al Assad ရဲ့ ယောက်ဖတော်စပ်သူဖြစ်ပါတယ်။ ဒီကနေ့ ဗုဒ္ဓဟူးနေ့ ဗုံးကွဲမှုအတွင်း ကာကွယ်ရေး ဝန်ကြီးဟောင်းဗိုလ်ချုပ်ကြီး Hassan Turkmani လည်း ပါဝင်တယ်လို့ သတင်းတွေကပြောပါတယ်။ အဆင့်မြင့် အရာရှိကြီးတွေ အစည်းအဝေးလုပ်နေချိန်မှာ အသေခံဗုံးခွဲမှုကြောင့် အရာရှိတော်တော်များများလည်း အပြင်းအထန် ဒဏ်ရာရသွားကြပါတယ်။ ဒီဗုံးကွဲမှုဖြစ်ပွားခဲ့ပြီးနောက် Damascus မြို့ပေါ်မှာ အစိုးရတပ်တွေနဲ့ လက်နက်ကိုင်တော်လှန်ရေးအဖွဲ့တွေကြားမှာ တိုက်ပွဲတွေ ပြင်းထန်နေပါတယ်။

အခုလိုဖြစ်ပွားခဲ့တဲ့ ဗုံးခွဲတိုက်ခိုက်မှုကို ကြည့်ရင် ဆီးရီးယားရဲ့ အခြေအနေဟာ ထိန်းမနိုင် သိမ်းမရ အခြေအနေဖြစ်နေပြီလို့ အမေရိကန် ကာကွယ်ရေးဝန်ကြီး Leon Panetta ကပြောပါတယ်၊ Bashar al-Assad အစိုးရဆင်းသွားအောင် နိုင်ငံတကာအသိုင်းအဝိုင်းက အပြင်းထန်ဆုံး ဖိအားအေးကြဖို့လည်း သူက တောင်းဆိုခဲ့ပါတယ်။ Russia နိုင်ငံခြားရေးဝန်ကြီး Sergei Lavrov  ကတော့ ဆီးရီးယားအပေါ် အရေးယူဒဏ်ခတ်တဲ့ ကုလသမဂ္ဂဆုံးဖြတ်ချက်ကို ထောက်ခံခဲ့ရင် တော်လှန်ရေးကို အားပေးရာ ရောက်သွားမှာဖြစ်လို့ ဒီဆုံးဖြတ်ချက်ကို Russia အစိုးရက လက်မခံနိုင်ဘူးလို့ ပြောပါတယ်။

သမ္မတနဲ့ နိုင်ငံရေးဆယ်ပါတီ တွေ့ဆုံမည်

By ဗွီအိုအေ(မြန်မာဌာန)

• ဒီမိုကရေစီ မိတ်ဆွေပါတီများ ဆယ်ပါတီအဖွဲ့နဲ့ သမ္မတဦးသိန်းစိန်တို့ဟာ ဒီကနေ့ နေပြည်တော်မှာ တွေ့ဆုံကြဖို့ ရှိနေပါတယ်။

သမ္မတနဲ့ အတိုက်အခံနိုင်ငံရေးပါတီတွေ ပထမဆုံးအကြိမ်တွေ့ဆုံကြမယ့် ဒီတွေ့ဆုံမှုမှာ စီးပွားရေး၊ နိုင်ငံရေး နဲ့ ပြည်တွင်းငြိမ်းချမ်းရေး ကိစ္စရပ်တွေကို တင်ပြသွားမယ်လို့ တွေ့ဆုံမယ့်အထဲမှာ ပါဝင်တဲ့ ဒီမိုကရက်တစ်ပါတီ ဥက္ကဋ္ဌ ဦးသုဝေက ပြောပြပါတယ်။

“ဆယ်ပါတီအစည်းအဝေးမှာတော့ မူအားဖြင့်ကတော့ ခေါင်းစဉ်တမျိုးစီ၊ တပါတီ တမျိုးစီ တင်ပြမယ်ပေါ့နော်။ နားလည်မှုရအောင်ပေါ့။ ကျနော်တို့က ပြီးခဲ့တဲ့ ၈ ရက်နေ့က ဝန်ကြီး ဦးအောင်မင်းရယ်၊ ဦးစိုးသိမ်းရယ်နဲ့တွေ့ တယ်လေ။ တွေ့ပြီးတော့မှ သူတို့က စီစဉ်ပေးတာပါ။ လိုအပ်တာလေးတွေ တင်ပြမှာပေါ့။ အများအားဖြင့် ကတော့ ကျနော်တို့က သမ္မတကြီးပြောတာကို နားထောင်မှာပေါ့ဗျာ။”

ဒီတွေ့ဆုံပွဲကိုတက်ရောက်မယ့် ဒီမိုကရေစီနဲ့ငြိမ်းချမ်းရေးပါတီကတော့ ပြည်တွင်း ငြိမ်းချမ်းရေး ဖော်ဆောင်ရေး လုပ်ငန်းစဉ်တွေအတွက် အကြံပြု တင်ပြဖို့ စီစဉ်ထားသလို စီးပွားရေးနဲ့ ဆက်စပ်နေတဲ့ အလုပ်သမား၊ လယ်သမား ပြဿနာတွေကိုလည်း ကဏ္ဍအလိုက် တင်ပြကြမှာဖြစ်တယ်လို့ ဒီမိုကရေစီနဲ့ ငြိမ်းချမ်းရေးပါတီ က အထွေထွေ အတွင်းရေးမှူး ဦးမျိုးညွန့်က ပြောပါတယ်။

“ကျနော်တို့တင်ပြမယ့်ဟာက ဆယ်မျိုးလောက်ရှိတာပေါ့လေ။ ဒါပေမဲ့လို့ အရေးကြီးတာလေးပြောရရင်တော့ စီးပွားရေးနဲ့ပတ်သက်လာလို့ရှိရင် ဒီမိုကရေစီ ပြုပြင်ပြောင်းလဲရေးများကဖြင့်ရင် ဦးသိန်းစိန်တို့ ဗဟိုအစိုးရ ကဖြင့် အားကျိုးမာန်တက်နဲ့ ဆောင်ရွက်နေတာတော့ ရှိတယ်။ သို့သော် စီးပွားရေးမှာ Monopoly economy က ရှိနေတုန်းပဲ။ အဲဒီလို မိုနိုပိုလီ အီကော်နော်မီက ရှိနေတဲ့အတွက်ကြောင့် အဲဒါကို ဖယ်ရှားနိုင်ဖို့အတွက် ကျနော်တို့ ဟောဒါ-ဟောဒါတွေတော့ အကြံပြုလိုပါတယ်။ ဒီလို တင်ပြဖို့ အကြောင်းတွေရှိပါတယ်။”

ဒီမိုကရေစီမိတ်ဆွေ ပါတီများ ဆယ်ပါတီအဖွဲ့ဟာ ပြီးခဲ့တဲ့ ၂၀၁၀ ခုနှစ် ရွေးကောက်ပွဲမှာ ၀င်ရောက်ယှဉ်ပြိုင် ခဲ့ကြတဲ့ နိုင်ငံရေးပါတီတွေဖြစ်ပြီး ဒီအဖွဲ့မှာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် ဦးဆောင်တဲ့ NLD အမျိုးသား ဒီမိုရေစီအဖွဲ့ချုပ် ပါတီတော့ မပါဝင်ပါဘူး။