13.07.202 နေ့ဖတ်ရန်သတင်းများ

by Myanmar Journal on Thursday, July 12, 2012 at 5:06pm ·

အမေရိကန်က ပိတ်ဆို့မှုလျှော့ပြီး ရင်းနှီးမြှပ်နှံမှု စလို

ကိုလာ ကိုလာ ကုမ္ပဏီလည်း မြန်မာပြည် လာဖို့ရှိ

အမေရိကန် ကုမ္ပဏီတွေအနေနဲ့ မြန်မာနိုင်ငံမှာ ရင်းနှီးမြှပ်နှံဖို့ ပိတ်ပင်ခံ ထားရာကနေ အမေရိကန် အစိုးရက ဗုဒ္ဓဟူးနေ့က ပိတ်ဆို့မှုတချို့ ရုတ်သိမ်းပေးခဲ့တာဟာ မြန်မာနိုင်ငံဘက်က ပြုပြင်ပြောင်းလဲမှု တွေကြောင့်လဲ ပါတယ်လို့ အမေရိကန်ဘက်က ပြောပါတယ်။

ဒါပေမယ့် အမေရိကန်အနေနဲ့ တခြား နိုင်ငံကြီးတွေ နည်းတူ မြန်မာပြည်နဲ့ စီးပွားရေး လုပ်ဆောင်လိုတဲ့ အတွက်ကြောင့်လည်း အခုလို ရုပ်သိမ်းပေးလိုက်တာ ဖြစ်တယ်လို့ စီးပွားရေး ပညာရှင် ဒေါက်တာ ဇော်ဦးက ပြောပါတယ်။

မြန်မာပြည်မှာ သယံဇာတ ထုတ်တဲ့ လုပ်ငန်းတွေအပြင် အလုပ်သမားခ သက်သာမှု၊ ဈေးကွက်ကြီးနှစ်ခုဖြစ်တဲ့ အိန္ဒိယ တရုတ်တို့ကြားမှာ တည်ရှိနေမှု စတဲ့ အားသာချက် တွေကြောင့်လည်း အမေရိကန် စီးပွားရေး လုပ်ငန်းတွေက မြန်မာနိုင်ငံကို စိတ်ဝင်စား နေကြတယ်လို့ သူက ပြောပါတယ်။

မြန်မာနိုင်ငံမှာ နိုင်ငံခြားရင်းနှီးမြှပ်နှံမှု လုပ်ငန်းတွေမှာ ပွင့်လင်းမြင်သာမှု၊ တာဝန်သိမှု မရှိတဲ့အတွက် ဒါတွေကို ပြုပြင်ပြောင်းလဲဖို့ တိုက်တွန်းမှုတွေလည်း ရှိနေပါတယ်။

အခုနောက်ပိုင်းလာတဲ့ စီးပွားရေး ရင်းနှီးမြှပ်နှံမှုတွေဟာ အရင် ရှိပြီးသား လုပ်ငန်းတွေထက် တာဝန်ယူမှု၊ ပွင့်လင့်မြင်သာမှုတွေ ပိုရှိတဲ့ လုပ်ငန်းတွေ ဖြစ်လာမယ်လို့ ယူဆကြောင်းလည်း ဒေါက်တာ ဇော်ဦးက ပြောပါတယ်။

အမေရိကန်က ပိတ်ဆို့မှု လျော့ပေါ့ပြီး မြန်မာနိုင်ငံနဲ့ စီးပွားရေးပူးပေါင်း ဆောင်ရွက်မှုတွေ လုပ်လာတာတွေက မြန်မာနိုင်ငံက ပြုပြင်ပြောင်းလဲမှုတွေကို အရှိန်ပိုကောင်းစေလိမ့်မယ်လို့လည်း သူက သုံးသပ်ပါတယ်။

အာဆီယံ-အမေရိကန် စီးပွားရေး

အမေရိကန် စီးပွားရေး ပိတ်ဆို့မှု ရုပ်သိမ်းပြီး ရက်ပိုင်းအတွင်း သောကြာနေ့မှာပဲ အရှေ့တောင်အာရှ နဲ့အမေရိကန် နိုင်ငံတို့ စီးပွားရေးဖွံ့ဖြိုးရေး ပူးပေါင်း ဆောင်ရွက်ရေးအတွက် ထိပ်သီး ဆွေးနွေးပွဲကို ကမ္ဘောဒီးယား နိုင်ငံ စီယမ်ရိမြို့မှာ ကျင်းပဖို့ရှိပါတယ်။

မြန်မာအစိုးရသစ် ဖြစ်လာပြီးနောက်ပိုင်း အမေရိကန်နဲ့ အာဆီယံ ဆက်ဆံရေးရော၊ မြန်မာနဲ့ အမေရိကန်တို့ရဲ့ ဆက်ဆံရေးရော ပိုမိုကောင်းမွန် လာတာကြောင့် ဒေသတွင်း စီးပွားရေး တိုးတက်မှုကို တွန်းအား ပေးနိုင်မယ်လို့ ပြည်တွင်းက စီးပွားရေး သမားတွေက ပြောပါတယ်။

အာဆီယံ ထိပ်သီးခေါင်းဆောင်တွေနဲ့အတူ သမ္မတဦးသိန်းစိန်းလည်း ဆွေးနွေးပွဲ တက်ရောက်မှာ ဖြစ်ပါတယ်။

စနေနေ့မှာတော့ သမ္မတဦးသိန်းစိန်နဲ့ အမေရိကန် နိုင်ငံခြားရေး ဝန်ကြီး ဟီလာရီ ကလင်တန်နဲ့ သီးခြားဆွေးနွေးဖိုရှိတယ်လို့ သမ္မတရုံးက တာဝန်ရှိသူက ဘီဘီစီကိုပြောပါတယ်။

အမေရိကန်က ဦးဆောင်ပြီး အရှေ့တောင်အာရှ စီးပွားရေး ပူးပေါင်းဖို့ ဆွေးနွေးတယ်ဆိုတာဟာ အခုမှ စီးပွားရေးတံခါးဖွင့်တဲ့ မြန်မာအတွက် အရေးပါသလို အမေရိကန်အတွက်လည်း အရှေ့တောင်အာရှဒေသတွင်းမှာ သြဇာလွှမ်းမိုးမှုအတွက် အရေးပါတယ်လို့ ကုန်သည်များနဲ့ စက်မှုလက်မှုလုပ်ငန်းရှင်များ အသင်းချုပ် ဒုတိယဥက္ကဌ ဒေါက်တာမောင်မောင်လေးက ပြောပါတယ်။

သမ္မတ ဦးသိန်းစိန်နဲ့ UNHCR မဟာမင်းကြီး တွေ့ဆုံ ဆွေးနွေး

UNHCR မဟာမင်းကြီးနဲ့ သမ္မတ ဦးသိန်းစိန်တို့ ဗုဒ္ဓဟူးနေ့က တွေ့ဆုံဆွေးနွေး (ဓာတ်ပုံ သမ္မတရုံး)

မြန်မာသမ္မတ ဦးသိန်းစိန်က ၁၉၄၈ ခုနှစ် မတိုင်ခင် မြန်မာနိုင်ငံထဲ ဝင်ရောက်လာတဲ့ ဘင်္ဂါလီတွေရဲ့ တတိယ မျိုးဆက် မြေးအဆင့်ကိုသာ နိုင်ငံသား အဖြစ် လက်ခံဖို့ ဥပဒေရှိကြောင်း ပြောကြားလိုက်ပါတယ်။

မြန်မာနိုင်ငံကို ရောက်ရှိနေတဲ့ UNHCR ကုလသမဂ္ဂ ဒုက္ခသည်များဆိုင်ရာ မဟာမင်းကြီး Antonio Guterres နဲ့ နေပြည်တော်မှာ ဗုဒ္ဓဟူးနေ့က တွေ့ဆုံ ဆွေးနွေးစဉ် အခုလို ပြောကြားလိုက်တာ ဖြစ်ကြောင်း သမ္မတရုံး သတင်း ပြန်ကြားရေး အင်တာနက် စာမျက်နှာမှာ ဖေါ်ပြထား ပါတယ်။

သမ္မတ ဦးသိန်းစိန်က တိုင်းရင်းသား မဟုတ်ဘဲ မြန်မာ နိုင်ငံထဲ ခိုးဝင်လာကြတဲ့ ရိုဟင်ဂျာတွေကို လက်ခံရန် မဖြစ်နိုင်ကြောင်း ပြောကြားပါတယ်။

အဲဒီ ခိုးဝင်လာသူ ရိုဟင်ဂျာတွေကို UNHCR ထံ အပ်နှံပြီး ဒုက္ခသည် စခန်း အဖြစ် ထားရှိရန်နဲ့ UNHCR က ကျွေးမွေး စောင့်ရှောက်ပေးရန် ကိစ္စရပ်တွေကို ဦးသိန်းစိန်က မစ္စတာ Guterres နဲ့ ဆွေးနွေးခဲ့ပါတယ်။

ကြာသပတေးနေ့မှာတော့ မစ္စတာ Guterres က ရန်ကုန်မြို့မှာ သတင်းစာ ရှင်းလင်းပွဲ ပြုလုပ်ရာမှာ ရခိုင်ပြည်နယ်က ရိုဟင်ဂျာတွေကို ဒုက္ခသည် အဖြစ်လို့ သတ်မှတ်လို့ မရကြောင်း ရှင်းလင်း ပြောကြားသွား ပါတယ်။

ဒီအတွက် မြန်မာအစိုးရနဲ့ တခြား ဖြစ်နိုင်တဲ့ နည်းလမ်းတွေ ရှေ့ဆက် ရှာဖွေ ဆွေးနွေးဖို့ ရှိတယ်လို့ ပြောကြားပါတယ်။

လန်ဒန်အိုလံပစ် လုံခြုံရေး အတွက် စစ်တပ်အင်အား ခေါ်ယူ

အိုလံပစ် အတွက် လုံခြုံရေး စုစုပေါင်း ၁ သောင်း ၇ ထောင် ရှိလာမှာ ဖြစ်ပါတယ်

၂၀၁၂ လန်ဒန် အိုလံပစ် အားကစားပွဲ ကျင်းပဖို့ ၂ ပတ် အလိုသာ ကျန်တော့တဲ့ အချိန်မှာ ဗြိတိန် အစိုးရဟာ အားကစားကွင်း လုံခြုံရေး အတွက် လစ်ဟာမှု မရှိစေရအောင် ထောင်နဲ့ ချီတဲ့ စစ်တပ်ဝန်ထမ်း ကိုခေါ်ယူလိုက်ပါတယ်။

ဗြိတိသျှ ပြည်ထဲရေး ဝန်ကြီး ထရေဇာ မေ က အိုလံပစ် လုံခြုံရေးကို အသေးစိတ် စီစဉ် ဆောက်ရွက်ထားပြီး၊ အားရစရာ ကောင်းတယ်လို့ ပါလီမန်မှာ ကို ပြောကြားခဲ့ ပါတယ်။

ဒါပေမယ့် လုံခြုံရေး အတွက် contract ပေးထားတဲ့ G4S လုံခြုံရေး ကုမ္ပဏီမှာ သင်တန်း ပေးထားတဲ့ လုံခြုံရေး ဝန်ထမ်း လုံလုံ လောက်လောက် ရှိပါ့မလား ဆိုတဲ့ စိုးရိမ်မှုတွေ တိုးများ လာနေတယ်လို့ ပြည်ထဲရေး ဝန်ကြီးက ပြောပါတယ်။

ဒီအတွက် အစိုးရ ကနေ စစ်တပ် အင်အား နောက်ထပ် ၃၅၀၀ ကို ခေါ်ထား လိုက်ပြီ ဖြစ်တဲ့ အတွက် အိုလံပစ် အတွက် လုံခြုံရေး စုစုပေါင်း ၁ သောင်း ၇ ထောင် ရှိလာမှာ ဖြစ်ပါတယ်။

မြန်မာအပေါ် ပိတ်ဆို့မှုတွေ အမေရိကန် လျှော့ပေါ့

မြန်မာနိုင်ငံမှာ ရင်းနှီး မြှုပ်နှံဖို့ နိုင်ငံတကာ စီးပွားရေး လုပ်ငန်းရှင်တွေ စိတ်ဝင်စားနေကြ

မြန်မာနိုင်ငံမှာ ဖြစ်ပေါ်နေတဲ့ ပြုပြင် ပြောင်းလဲမှုတွေကို ထောက်ခံအားပေးကြောင်း ပြသတဲ့ အနေနဲ့ အမေရိကန် အစိုးရက မြန်မာနိုင်ငံအပေါ် ဒဏ်ခတ်ပိတ်ဆို့မှုတွေကို လျှော့ပေါ့ပေးလိုက်ပါတယ်။

မြန်မာနိုင်ငံမှာ ဒီမိုကရေစီရေး ရှေးရှုတဲ့ တိုးတက် ဖြစ်ထွန်းမှုတွေ သိသိသာသာ ရှိလာနေပြီ ဖြစ်ကြောင်းနဲ့ မြန်မာနိုင်ငံမှာ စီးပွားရေး လုပ်ငန်းတွေ လုပ်ဖို့ အမေရိကန် စီးပွားရေးကုမ္ပဏီတွေကို ခွင့်ပြုတော့မယ် ဖြစ်ကြောင်း အမေရိကန် သမ္မတ အိုဘားမားက ပြောပါတယ်။

ဒါပေမယ့်လည်း မြန်မာစစ်တပ်နဲ့တော့ စီးပွားရေး လုပ်ငန်းတွေ လုပ်ခွင့်ပြုမှာ မဟုတ်ဘူးလို့ ဆိုပါတယ်။

ဒါ့အပြင် မြန်မာနိုင်ငံ ပြုပြင်ပြောင်းလဲရေးကို ထိခိုက်အောင် ဒါမှမဟုတ် တိုင်းရင်းသားတွေအကြား သွေးကွဲအောင် လှုံ့ဆော်ပေးသူတွေအပေါ် ဒဏ်ခတ်အရေးယူမှုတွေ တိုးလုပ်မယ်လို့ သမ္မတ အိုဘားမားက သတိပေး ပြောကြားလိုက်ပါတယ်။

တခါ နှစ်ပေါင်း ၂၀ကျော်ကြာအတွင်း ပထမဆုံး မြန်မာနိုင်ငံဆိုင်ရာ သံအမတ် ကြီးအဖြစ် ခန့်အပ်ခံခဲ့ရတဲ့ မစ္စတာ Derek Mitchell မြန်မာနိုင်ငံကို မနေ့က ရောက်ရှိလာခဲ့ပါတယ်။

သမ္မတဦးသိန်းစိန်နဲ့ ဝန်ကြီး Clinton တွေ့ဆုံမည်

By ဗွီအိုအေ (မြန်မာဌာန)

အမေရိကန်ပြည်ထောင်စုက မြန်မာနိုင်ငံအပေါ် စီးပွားရေးအရချမှတ်ထားတဲ့ အရေးယူ တားဆီးပိတ်ဆို့မှုတွေ ကို ပြန်လည် ရုပ်သိမ်းပေးလိုက်ပြီးတဲ့နောက် အမေရိကန်နိုင်ငံခြားရေးဝန်ကြီး ဟီလာရီကလင်တန် ဟာ မြန်မာသမ္မတဦးသိန်းစိန်နဲ့ အခုသတင်းပတ်နှောင်းပိုင်းမှာ တွေ့ဆုံကြဖို့ စီစဉ်ထားပါတယ်။

တွေ့ဆုံမှုကို သောကြာနေ့မှာ ပြုလုပ်ဖို့ စီစဉ်ထားတယ်လို့ အမေရိကန်နိုင်ငံခြားရေးဝန်ကြီးဌာန အကြီးတန်း အရာရှိတဦးက VOA ကိုပြောပါတယ်။ ကမ္ဘောဒီးယားနိုင်ငံမှာ ကျင်းပနေတဲ့ ညီလာခံရဲ့ပြင်ပမှာ အလွတ် သဘော တွေ့ဆုံကြမှာ ဖြစ်တယ်လို့လည်း ဆိုပါတယ်။

ဝန်ကြီးကလင်တန်ဟာ ပြီးခဲ့တဲ့ ဒီဇင်ဘာလအတွင်း မြန်မာနိုင်ငံကို ထူးခြားအရေးပါတဲ့ ခရီးစဉ်တခု အဖြစ် သွားရောက်ခဲ့ပြီး သမ္မတဦးသိန်းစိန်နဲ့ တွေ့ဆုံခဲ့ပါတယ်။

အမေရိကန်ပြည်ထောင်စုက မြန်မာနိုင်ငံအပေါ်ချမှတ်ထားတဲ့ အရေးယူပိတ်ဆို့မှုတွေကို မနေ့က ရုပ်သိမ်းလိုက်ပြီး ၁၅ နှစ်အတွင်း ပထဆုံးအကြိမ်အဖြစ် အမေရိကန် ကုမ္ပဏီတွေကို မြန်မာနိုင်ငံမှာ သွားရောက်ရင်းနှီး မြှုပ်နှံဖို့ ခွင့်ပြုလိုက်ပါတယ်။

ဒါဟာ မြန်မာနိုင်ငံက အရပ်သားအစိုးရရဲ့ အရေးပါတဲ့ နိုင်ငံရေး စီးပွားရေး ပြုပြင်ပြောင်းလဲ မှုတွေ ပြုလုပ်ခဲ့ တဲ့အပေါ်မှာ မူတည်ပြီး ပြန်လည်တုံ့ပြန် လုပ်ဆောင်တာဖြစ်ကြောင်း အမေရိကန်သမ္မတ အိမ်ဖြူတော် က ပြောပါတယ်။

ဥရောပနဲ့အမေရိကန် စီးပွားရေးအကျပ်အတည်း အာရှကိုထိခိုက်နေ

By ဗွီအိုအေ (မြန်မာဌာန)

• တရုတ်နဲ့ အိန္ဒိယနိုင်ငံတွေရဲ့ စီးပွားရေးတိုးတက်မှုနှေးကွေးကျဆင်းနေတာကြောင့်လည်း အာရှဒေသတွင်း စီးပွားဖွံ့ဖြိုးမှု တိုးတက်အောင် ကြိုးပမ်းတဲ့နေရာမှာ အခက်အခဲတွေ ကြုံခဲ့ရတယ်လို့လည်း အစီရင်ခံစာ က ထောက်ပြပါတယ်။

ဒါတွေကြောင့် ဒေသအတွင်း ၂၀၁၂ နဲ့  ၂၀၁၃ ခုနှစ်တွေမှာ ဖွံ့ဖြိုးတိုးတက်မှုဟာ နိမ့်ကျနေအုံးမှာဖြစ်တယ်လို့ အာရှဖွံ့ဖြိုးရေးဘဏ်က ခန့်မှန်းပါတယ်။

ဥရောပတိုက်မှာ ဖြစ်ပွားနေတဲ့ ငွေကြေးဆိုင်ရာပြဿနာတွေနဲ့ အမေရိကန်ပြည်ထောင်စုမှာလည်း စီးပွားရေး ပြန်လည် နလံထလာမှု နှေးကွေး နေတဲ့ဖြစ်ရပ်တွေကြောင့် အာရှဒေသတွင်း နိုင်ငံတွေရဲ့ ဖွံ့ဖြိုးမှုကို ထိခိုက်နေတယ်လို့ အာရှ ဖွံ့ဖြိုးရေးဘဏ် ADB က ထုတ်ဖော် ပြောဆိုလိုက်ပါတယ်။

ဥရောပနဲ့ အမေရိကန်ပြည်ထောင်စုတို့မှာ ဖြစ်ပွားနေတဲ့ အခက်အခဲတွေကြောင့် အာရှတိုက်ကနေ တင်သွင်းတဲ့ ကုန်ပစ္စည်းတွေကို ဖြတ်တောက်မှုတွေ ရှိခဲ့တဲ့အတွက် အာရှရဲ့ အခုနှစ် ပထမနှစ်ဝက် ဖွံ့ဖြိုးတိုးတက် မှုနှေးကွေးသွားကြောင်း ADB အဖွဲ့က ကြာသာပတေးနေ့မှာ ထုတ်ပြန်တဲ့ ကြေညာချက်ထဲမှာ ဖော်ပြထားပါတယ်။

ဝယ်လိုအားတွေကျဆင်းသွားတာကြောင့် ကမ္ဘာအနှံ့မှာ အစားအသောက်နဲ့ လောင်စာဆီဈေးနှုန်းတွေ ကျဆင်းသွားနိုင်ပြီး ငွေဖောင်းပွမှုဖြစ်စေနိုင်တဲ့ အခြေအနေမျိုးက ကင်းဝေးနိုင်ကြောင်းလည်း အစီရင်ခံ စာမှာ ဖေါ်ပြထားပါတယ်ခင်ဗျား။

မြန်မာပြည်မှာရင်းနှီးမြုပ်နှံရေး ပွင်းလင်မြင်သာမှုရှိဖို့လို

By မစုမြတ်မွန်

• မြန်မာနိုင်ငံမှာ ရင်းနှီးမြှုပ်နှံမှုတွေလုပ်ဖို့အတွက် ပွင့်လင်းမြင်သာမှုရှိရေး လိုအပ်နေသေးတယ်လို့ အမျိုးသား ဒီမိုကရေစီအဖွဲ့ချုပ် NLD ကပြောလိုက်ပါတယ်။ အမေရိကန်ဘဏ်လုပ်ငန်းနဲ့ ရင်းနှီးမြှုပ်နှံမှုဆိုင်ရာ အရေးယူ ပိတ်ဆို့မှုတွေကို လျှော့ပေါ့ဖယ်ရှားလိုက်ပြီလို့ အမေရိကန်အစိုးရက ကြေညာခဲ့တဲ့အပေါ်မှာ NLD ကခုလို တုံ့ပြန်တာဖြစ်ပါတယ်။ ခုလို အမေရိကန်ကထပ်ပြီး လျှော့ပေါ့လိုက်တဲ့ အရေးယူမှုတွေက အမေရိကန် စီးပွားရေးလုပ်ငန်းတွေ ပိုပြီး အကျိုးများ စေပေမဲ့ ပြည်တွင်းလုပ်ငန်းတွေအတွက်လည်း သက်ရောက်မှု ရှိလာနိုင်တယ်လို့ စီးပွားရေးလုပ်ငန်းရှင်တယောက်က ပြောပါတယ်။ အပြည့်အစုံကို မစုမြတ်မွန်က တင်ပြပေးထားပါတယ်။

၁၅ နှစ်နီးပါးအတွင်းမှာ အမေရိကန်စီးပွားရေးလုပ်ငန်းတွေ မြန်မာနိုင်ငံမှာ ပြန်ပြီးရင်းနှီးမြှုပ်နှံနိုင်ဖို့ အမေရိကန်အစိုးရက ခွင့်ပြုလိုက်သလို မြန်မာနိုင်ငံမှာ အမေရိကန်ဘဏ္ဍာရေးလုပ်ငန်းတွေ ဝန်ဆောင် မှုပေးနိုင်ရေးအတွက်ကိုလည်း ခွင့်ပြုလိုက်ပါတယ်။ မြန်မာနိုင်ငံက ပြုပြင်ပြောင်းလဲမှုတွေကို အသိအမှတ်ပြုတဲ့ အနေနဲ့ ခုလိုအရေးယူမှုတွေကို ထပ်ပြီး လျှော့ပေါ့တာလို့ အမေရိကန်အစိုးရ ထုတ်ပြန်တဲ့ ကြေညာချက်ထဲ မှာ ဖော်ပြထားပါတယ်။ မြန်မာနိုင်ငံက နိုင်ငံရေးအပြောင်းအလဲတွေအပေါ်မှာ တော်တော်များများက အရမ်းကာရော အကောင်းမြင်လွန်းနေတယ်လို့ အမျိုးသားဒီမိုကရေစီ ဥက္ကဋ္ဌ ဒေါ်အောင်ဆန်းစုကြည် က ပြောနေချိန်မှာ ခုလို အမေရိကန်က ဒဏ်ခတ်ပိတ်ဆို့မှုတွေကို ထပ်ပြီး ဖယ်ရှားပေးလိုက်တာဖြစ်ပါတယ်။

ဒီအပေါ်မှာ NLD ပါတီရဲ့ သဘောထား ဘယ်လိုရှိပါသလဲ၊ NLD ပြောခွင့်ရသူ ဦးအုန်းကြိုင်က လက်ရှိမြန်မာနိုင်ငံ အခြေအနေဟာ ရင်းနှီးမြှုပ်နှံမှုတွေ လုပ်နိုင်ဖို့ ပွင်းလင်းမြင်သာမှုတွေ လိုအပ်နေဆဲဖြစ် တယ်လို့ တုံ့ပြန်ပါတယ်။

“ဒါကတော့ အမေရိကန်အစိုးရက သူ့ရဲ့ဆောင်ရွက်ပိုင်ခွင့်တွေထဲက သူ့ဖာသာသူ ဆောင်ရွက်တာပါ။ ကျနော်တို့အပေါ်မှာ ဒီမိုကရေစီရေးအတွက် အလွန်ထက်သန်တဲ့စေတနာ ထားတယ်ဆိုတာလည်း ကျနော်တို့ သဘောတူပါတယ်။ ဒါပေမဲ့ transparency ရှိဖို့နဲ့ နောက် ဒီမိုကရေစီရေးကို ရှေ့ရှုတဲ့၊ တဘက်မှာလည်း စီးပွားရေးတိုးတက်လာတာနဲ့ တပြိုင်နက်တည်းမှာ ဒီမိုကရေစီရေးကိုပါ ပိုပြီးတော့ရှင်သန်စေမယ့် ပိုပြီးတော့ ဆထက်တပိုး တိုးပြီးတော့ လွတ်လပ်ခွင့်တွေ၊ ပြည်သူလူထုရဲ့လွတ်လပ်ခွင့်တွေ ပိုပြီးတော့ ရလာဖို့အတွက် ဦးတည်ပြီးလုပ်ရင်တော့ ပိုကောင်းမယ်လို့ မြင်ပါတယ်ခင်ဗျာ။”

အမေရိကန်အစိုးရက အခုနောက်ဆုံး လျှော့ပေါ့ပေးလိုက်တဲ့ အရေးယူ ဒဏ်ခတ်မှုတွေဟာ အဓိကအားဖြင့် အမေရိကန် စီးပွားရေးတွေအတွက် အကျိုးပိုရှိနိုင်တယ်လို့ စီးပွားရေးလုပ်ငန်းရှင်တချို့က မြင်ပါတယ်။ အထူးသဖြင့် မြန်မာနိုင်ငံမှာ ရင်းနှီးမြှုပ်နှံလာနိုင်တဲ့ အမေရိကန် လုပ်ငန်းကြီးတွေ အတွက် ငွေအေပြာင်း အရွှေ့လုပ်နိုင်ဖို့ ဘဏ္ဍာရေးလုပ်ငန်းတွေ လိုအပ်လာမှာဖြစ်လို့ပါ။ ဒီတော့ ပြည်တွင်း ဘဏ်လုပ်ငန်းတွေ အတွက်ရော ဘယ်လိုအကျိုးရနိုင်ပါသလဲ။ စီးပွားရေးလုပ်ငန်းရှင်တယောက်ပြောပြတာကတော့-

“ဘဏ်လုပ်ငန်းကတော့ ကျယ်ကျယ်ပြန့်ပြန့်ဆက်သွယ်နိုင်လေ၊ အကျိုးရှိလေပေါ့။ သူတို့တွေ ဝင်လာတဲ့ အခါမှာ အထူးသဖြင့် Insurance တို့လို မျိုးတွေမှာ အဓိက finacial market တွေမှာ အဓိက အခြေ ခံတွေဖြစ် တဲ့ အမေရိကန်ဘက်က ဝင်လာနိုင်မယ်ဆိုရင် ပြည်တွင်းဘက်က နည်းပညာ အရရော ၊ ငွေရေးကြေးရေး အရရော အကျိုး အများကြီးရှိနိုင်ပါတယ်။ ကုမ္ပဏီကြီးတွေ ရောက်လာတာနဲ့အမျှ သူတို့ရဲ့ facility တွေကို service လုပ်ပေးနိုင်တဲ့--- ကတော့ လိုလာမှာပေါ့နော်။ အဲဒီတော့ အနည်းဆုံးတော့ --- ရှိလာ မယ်လို့ ယူဆရတာပေါ့။”

အမေရိကန် ဘဏ်လုပ်ငန်းတွေဘက်က ကန့်သတ်ချက်တွေ လျော့သွားတဲ့အတွက် သွင်းကုန် ထုတ်ကုန် လုပ်ငန်းတွေအတွက် ပိုပြီးတော့  အဆင်ပြေနိုင် သွားမယ်လို့လည်း ဆိုပါတယ်။

“အရင်တုန်းကဆိုရင် ကျနော်တို့က ---- finacing လုပ်ဖို့ဆိုရင် အမျိုးမျိုး လုပ်ရတာတွေ ရှိတယ်။ -- တခြား currency တွေနဲ့ ဖွင့်ရတာရှိတယ်။ ဒါမျိုးတွေထက်တော့ အများကြီး အဆင်ပြေသွား တာပေါ့။  တော်တော်ကြီးကို အဆင်ချောသွားနိုင်ပါတယ်။ အရင်တုန်းကဆိုရင် ကျနော်တို့က ပစ္စည်းဝယ် တာပဲဖြစ်ဖြစ်၊ ဒီ ပစ္စည်းရောင်းတာပဲဖြစ်ဖြစ် နယူးယောက်ကို ထွက်သွားတဲ့အခါမှာ ကျနော်တို့မှာ freeze အလုပ်ခံရမှာစိုးတဲ့အတွက် ရှောင်ကွင်းပြီးတော့ တခြားငွေကြေးနဲ့ဖွင့်ပါတယ်။ နောက်တခါ တခြား third country တခုကို အသုံးပြုတာပဲဖြစ်ဖြစ် လုပ်တော့ မလိုအပ်ဘဲနဲ့ ကျနော်တို့  Trasation Cost တွေ ပိုကုန်တာပေါ့နော်။ တခါတလေ တချို့ဆိုရင် လုပ်ရတဲ့ငွေရင်းထက် ၂ ဆလောက် ပိုကုန်သွားတဲ့ ဟာမျိုးတွေ ရှိတာပေါ့။ အဲဒါမျိုးတွေကို အများကြီး ရှောင်ကွင်းသွားနိုင်တယ်ဆိုရင် trade ကလည်း ပိုပြီး ချောချောမွေ့မွေ့ဖြစ် သွားနိုင်တာပေါ့။ နောက်တခါကျတော့ ကိုယ့်ရဲ့ပစ္စည်းတွေ- အမေရိကန်မှာထက်ကို တချို့ပစ္စည်းတွေ restriction ရှိသေးတယ်လို့ ပြောပါတယ်။ ဒါပေမဲ့လည်း ဝယ်တဲ့နေရာရော ရှောင်ကွင်းပြီး ဝယ်စရာမလိုတဲ့အတွက် မလိုလားအပ်တဲ့ ကုန်ကျစရိတ်တွေကို လျှော့ချသွားနိုင်တာပေါ့။ ကြားထဲက မလိုဘဲနဲ့ ကော်မရှင်တို့၊ ပွဲစားခတို့ နည်းသွားတာပေါ့။ ”

ဦးသိန်းစိန်အစိုးရက စီးပွားရေးနဲ့ ဘဏ်လုပ်ငန်းဆိုင်ရာ လွတ်လပ်ခွင့်တွေ လုပ်လာတာကြောင့် မြန်မာနိုင်ငံမှာ စီးပွားရေးလုပ်ဖို့ မျက်စိကျနေသူတွေ အမြောက်အမြားရှိပါတယ်။ နိုင်ငံခြားတိုက်ရိုက် ရင်းနှီးမြှုပ်နှံမှုဆိုင်ရာ ဥပဒေတွေ မထွက်လာသေးတဲ့အတွက်တော့ လက်တွေ့ လာပြီး ရင်းနှီးမြှုပ်နှံကြတာမျိုး သိပ်မရှိကြသေး ပါဘူး။ မြန်မာနိုင်ငံမှာ တာဝန်သိရင်းနှီးမြှုပ်နှံမှုတွေကို အမေရိကန်လုပ်ငန်းတွေက စံပြလုပ်နိုင်ပါလိမ့်မယ်လို့ အမေရိကန်အစိုးရထုတ်ပြန်တဲ့ ကြေညာချက်ထဲမှာ ဖော်ပြထားပါတယ်။ ဒီအပေါ် NLD ပါတီပြောတာကတော့ -

“ဒါ- အမေရိကန်လုပ်ငန်းရှင်တွေရဲ့ ethic ဆိုရင်တော့ ဘာမှ မဝေဖန်လိုပါဘူး။ အဲလိုဖြစ်ဖို့ကောင်းတယ်လို့သာ ကျနော်တို့က ပြောချင်တာပါ။ နိုင်ငံခြားရေး ဝန်ကြီးဌာနကိုပါ ကြိုပြီးတော့ ပရိုဂရမ်တွေ ဘာတွေ တင်ရမယ် ဆိုရင်တော့ ဒါကတော့ ဆောင်ရွက်ခွင့်တော့ ပေးလိုက်ပြီ၊ သို့သော်လည်း transparence ရှိရဲ့လား ရှိသေး လား၊ ဒီအရင်းအနှီးတွေဟာ ပြည်သူလူထုလက်ထဲကို တကယ်အကျိုးရှိရှိရောက်သွားနိုင်ရဲ့လား၊ ပြီးတော့ ဒီမိုကရေစီအရေးအတွက် အထောက်အကူဖြစ်နိုင်သလားဆိုတာ စိစစ်မယ်ဆိုရင်တော့ စိစစ်နိုင်သေး တယ်လို့ ကျနော်ကတော့ အဲလိုပဲမြင်ပါတယ်ခင်ဗျ။”

မြန်မာနိုင်ငံက လူ့အခွင့်အရေးအခြေအနေ၊ လာဘ်ပေး လာဘ်ယူမှုတွေနဲ့ စီးပွားရေး လုပ်ငန်းတွေအပေါ်မှာ စစ်တပ်ပါဝင်မှု အခန်းကဏ္ဍတွေ အပေါ်မှာလည်း အမေရိကန်အစိုးရက စိုးရိမ်မှုရှိဆဲလို့တော့ ဗုဒ္ဓဟူးနေ့က ထုတ်ပြန်တဲ့ အမေရိကန်အစိုးရရဲ့ ကြေညာချက်ထဲမှာ ဖော်ပြထားပါတယ်ရှင်။

သမ္မတနဲ့ဒုတိယသမ္မတ အရည်အချင်းစိစစ်ရေးအဖွဲ့ ကိုယ်စားလှယ်ရွေးချယ်

By မနန္ဒာချမ်း

• မြန်မာနိုင်ငံမှာ သမ္မတ - ဒုသမ္မတ အရည်အချင်းနဲ့ ပြည့်စုံမှု ရှိ - မရှိ စိစစ်ရေး အဖွဲ့မှာ ပါဝင်ဖို့ အတွက် ပြည်သူ့လွှတ်တော်နဲ့ အမျိုးသား လွှတ်တော်တွေက ကိုယ်စားပြု ကိုယ်စားလှယ်တွေကို ဒီကနေ့ မှာ ရွေးချယ်ခဲ့ကြပါတယ်။ ဒီအဖွဲ့အနေနဲ့ အဆိုပြု တင်သွင်းလာတဲ့ သမ္မတလောင်းတွေကို ၂၀၀၈ ဖွဲ့စည်းပုံ အခြေခံဥပဒေပါ အချက်တွေနဲ့ ကိုက်ညီ မညီဆိုတာကို စိစစ်အတည်ပြုပေးရမှာ ဖြစ်ပါတယ်။ အသေးစိတ်ကို မနန္ဒာချမ်း က စုံစမ်းတင်ပြထားပါတယ်။

အဖွဲ့ဝင် ၇ ဦး ပါဝင်မယ့် သမ္မတနဲ့ ဒုသမ္မတ အရည်အချင်း ပြည့်စုံမှု ရှိ မရှိ စိစစ်ရေးအဖွဲ့ မှာ ပြည်သူ့ လွှတ်တော် ဥက္ကဋ္ဌ၊ ဒုဥက္ကဋ္ဌ၊ အမျိုးသား လွှတ်တော် ဥက္ကဋ္ဌ၊ ဒုဥက္ကဋ္ဌနဲ့ ပြည်သူ့လွှတ်တော် ကိုယ်စားပြု ကိုယ်စားလှယ်တဦး၊ အမျိုးသားလွှတ်တော် ကိုယ်စားပြု ကိုယ်စားလှယ်တဦးနဲ့ တပ်မတော်သား ကိုယ်စားပြု ကိုယ်စားလှယ်တဦးတို့ ပါရှိမှာဖြစ်ပါတယ်။  ဒါကြောင့် ပြည်သူ့လွှတ်တော်ကနေ  ပြည်သူ့လွှတ်တော် ကိုယ်စား ပြု ကိုယ်စားလှယ်အဖြစ် ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ အထွေထွေအတွင်းရေးမှူး ဦးဋ္ဌေးဦးကို ရွေးချယ်ခဲ့ပြီး အမျိုးသားလွှတ်တော် ကတော့ အမျိုးသားလွှတ်တော် ကိုယ်စားပြု ကိုယ်စားလှယ် အဖြစ် ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက ဦးဇော်မြင့်ဖေတို့ကို ကြာသာပတေးနေ့ က ရွေးချယ်ခဲ့ ပါတယ်။ ဒီလို ရွေးချယ်ခဲ့တာနဲ့ပတ်သက်ပြီး ရခိုင်တိုင်းရင်းသားဖွံ့ဖြိုးတိုးတက်ရေး ပါတီ RNDP ပြည်သူ့ လွှတ်တော် ကိုယ်စားလှယ် ဦးဖေသန်း က အခုလို ပြောပြပါတယ်။

“နိုင်ငံတော်သမ္မတနဲ့ ဒုတိယသမ္မတ ရွေးချယ်ရေးဆိုင်ရာ နည်းဥပဒေ ၂၆ အရ စိစစ်ရေးအဖွဲ့ကို ဖွဲ့စည်းရ မည်လို့ ပါတယ်ခင်ဗျ။ အဲဒီတော့ ပြည်သူ့လွှတ်တော်မှာ ဦးဌေးဦးကို သမ္မတများစိစစ်ရေးကော်မတီ အဖွဲ့ဝင်အဖြစ် ပြည်သူ့လွှတ်တော်ကနေ ရွေးချယ်လိုက်ပါတယ်။ မလှိုင်က ဦးအေးမောက်က အဆိုတင်သွင်း တယ်။ လယ်ဝေးက ဦးဌေးဝင်းက ထောက်ခံပြီးတော့ ပြည်သူ့လွှတ်တော်ရဲ့ အတည်ပြုချက်ကို ရယူပါတယ်။ ဦးဌေးဦးကို ပြည်သူ့လွှတ်တော် ရွေးကောက်ခံအစုအဖွဲ့ကနေပြီးတော့ သူ့ကို အဖွဲ့ဝင် အဖြစ် ထောက်ခံပေး လိုက်တယ်။ အမျိုးသား လွှတ်တော်မှာ ဆိုရင်တော့ ဦးဇော်မြင့်ဖေလို့ ကြားပါတယ်ခင်ဗျ။ တပ်မတော်သား ကိုယ်စားလှယ်အဖွဲ့ကလည်း ၂ စုခွဲမှာပါ။ အမျိုးသားရယ်၊ ပြည်သူ့လွှတ်တယ်ရယ်ဆိုပြီးတော့ ၂ စုခွဲပြီး သူတို့ကလည်း တင်ပါလိမ့်မယ်။ အတိအကျတော့ မသိသေးပါဘူး။ ဦးဌေးဦးနဲ့ ဦးဇော်မြင့်ဖေ ၂ ယောက်ပဲ ကျနော်တို့ သိတယ်။”

တပ်မတော်သားကိုယ်စားပြု ကိုယ်စားလှယ်ကတော့ ဘယ်သူဖြစ်မယ်ဆိုတာ အတိအကျ ကြေညာခြင်း မရှိသေးပါဘူး။ ဒါ့အပြင် ဒီ သမ္မတနဲ့ ဒုသမ္မတ အရည်အချင်း ပြည့်စုံမှု ရှိ မရှိ စိစစ်ရေးအဖွဲ့အနေနဲ့ သမ္မတလောင်းတွေကို စိစစ်တဲ့နေရာမှာ ဖွဲ့စည်းပုံအခြေခံဥပဒေ အခန်း ၃ ဖြစ်တဲ့ နိုင်ငံတော်သမ္မတနဲ့ ဒုသမ္မတများအခန်းမှာပါဝင်တဲ့ ပုဒ်မတွေနဲ့ အရည်အချင်း ကိုက်ညီမညီ စိစစ်ပြီးတော့ အတည်ပြုပေးရ မှာ ဖြစ်တယ်လို့ လည်း ဦးဖေသန်း က ဆက်ပြောပြပါတယ်။

“အဲဒါကတော့ နိုင်ငံတော် သမ္မတနဲ့ ဒုတိယသမ္မတရွေးချယ်ရေးဆိုင်ရာအဖွဲ့ - အဲဒါက ဥပဒေအရ ဖွဲ့ပေးရမယ် လို့ ပါတယ်။ ဖွဲ့ပြီးရင်တော့ ဦးမြင့်ဆွေရဲ့ သမ္မတတစ်ယောက်ရဲ့ အရည်အချင်းရှိလား မရှိလားဆိုတာကို သူတို့ စစ်ဆေးမှာပေါ့နော်။ စစ်ဆေးပြီးလို့ အတည်ပြုချက်ရမှ သမ္မတဖြစ်လာမှာပေါ့။ အခြေခံဥပဒေမှာလည်း သမ္မတ တယောက်ရဲ့အရည်အချင်းပေါ့- အဲဒီမှာပါတဲ့ အချက်တွေနဲ့လည်း စစ်ဆေးမယ်လို့ ပြောပါတယ်။”

ဖွဲ့စည်းပုံအခြေခံဥပဒေ အခန်း ၃ ဖြစ်တဲ့ နိုင်ငံတော် သမ္မတနဲ့ ဒုသမ္မတများအခန်းရဲ့ ပုဒ်မ ၅၉ အရဆိုရင် သမ္မတဖြစ်မည့်သူဟာ နိုင်ငံတော်နဲ့ နိုင်ငံသားတွေအပေါ် သစ္စာရှိသူ၊ မြန်မာနိုင်ငံသား မိဘ ၂ ပါး ကနေ မွေးဖွားသူ၊ အသက် အနည်းဆုံး ၄၅ နှစ် ပြည့်ပြီးသူ၊ နိုင်ငံတော် အရေး အရာတွေ ဖြစ်တဲ့ နိုင်ငံရေး၊ အုပ်ချုပ်ရေး၊ စီးပွားရေး၊ စစ်ရေး စသည့် အမြင်တွေ ရှိသူ၊ သမ္မတအဖြစ် ရွေးချယ်တင်မြှောက်ခံရတဲ့ အချိန်အထိ အနည်းဆုံး အနှစ် ၂၀ မြန်မာနိုင်ငံမှာ နေထိုင်ခဲ့ပြီးသားဖြစ်သူ၊ ဒီနေရာမှာ ချွင်းချက် အဖြစ်နဲ့ ပြည်ပကို နိုင်ငံတော်တာဝန်နဲ့သွားသူဟာ မြန်မာ ပြည်မှာ နေထိုင်သူအဖြစ် သတ်မှတ်ရမယ်လို့ ပါရှိပါတယ်။ ပြီးတော့ သမ္မတအဖြစ် အမည်တင်သွင်းခံရသူကိုယ်တိုင် ဒါမှမဟုတ် သူ့မိသားစု ၀င်တွေ ဟာ နိုင်ငံခြားအစိုးရရဲ့ လက်အောက်ခံမဖြစ်ရဘူးလို့ ပါရှိတာပါ။ ပုဒ်မ ၆၀ မှာတော့ သမ္မတကို လွှတ်တော် ၂ ရပ်က ရွေးချယ်ရုံတင် မဟုတ်ဘဲ တပ်မတော်ကပါ လွှတ်တော်လိုမျိုး သမ္မတတဦးကို ရွေးချယ်နိုင် ခွင့် ပေး အပ် ထားတာဖြစ်ပါတယ်။ အခုလို ဒီသမ္မတ အရည်အချင်း စိစစ်ရေးအဖွဲ့ကို ဖွဲ့စည်းဖို့ လုပ်ဆောင်နေ ချိန် ဟာ ဒုသမ္မတ သီဟသူရ ဦးတင်အောင်မြင့်ဦးနေရာ အစားထိုးဖို့ ဦးမြင့်ဆွေကို အမည်တင်သွင်း ထားတဲ့ အချိန်နဲ့ လည်း တိုက်ဆိုင်နေတာပါ။

မြန်မာ့တပ်မတော်မှာ အရေးပါတဲ့ စစ်ရာထူးကြီးတွေကို ထမ်းဆောင်ခဲ့ပြီး လက်ရှိမှာလည်း ရန်ကုန် တိုင်း ဒေသကြီးရဲ့ ဝန်ကြီးချုပ်ဖြစ်တဲ့ အငြိမ်းစား ဒုတိယဗိုလ်ချုပ်ကြီး ဦးမြင့်ဆွေကို လစ်လပ်နေတဲ့ ဒုတိယ သမ္မတ နေရာအတွက် ပြည်ထောင်စုလွှတ်တော်က တပ်မတော်သား လွှတ်တော်ကိုယ်စားလှယ်တွေရဲ့ အစုအဖွဲ့ က အမည်စာရင်းတင်သွင်းလိုက်ပြီလို့ တပ်မတော်သား လွှတ်တော်ကိုယ်စားလှယ်တစ်ဦး ဖြစ်တဲ့ ဗိုလ်မှူးချုပ်ဝေလင်း က သတင်းဋ္ဌာနတွေကို ပြောဆိုခဲ့တာဖြစ်ပါတယ်။ ဒါကို လွှတ်တော်နှစ် ရပ်ပေါင်း ပြည်ထောင်စုလွှတ်တော် ရဲ့ အစည်းအဝေး ပြန်လည်ကျင်းပတဲ့အခါမှာ တရားဝင်ကြေညာဖွယ် ရှိပါတယ်။

ဦးသိန်းစိန်နှင့် ဟီလာရီကလင်တန် ပိတ်ဆို့မှု ရုပ်သိမ်းရေးဆွေးနွေးမည်

မဇ္ဈိမသတင်းဌာန | ကြာသပတေးနေ့၊ ဇူလိုင်လ ၁၂ ရက် ၂၀၁၂ ခုနှစ် ၁၅ နာရီ ၁၃ မိနစ်

မဇ္ဈိမသတင်းဌာန ။        ။ အမေရိကန် နိုင်ငံခြားရေးဝန်ကြီး ဟီလာရီကလင်တန်နှင့် မြန်မာ သမ္မတ ဦးသိန်းစိန်တို့ ကမ္ဘောဒီးယားနိုင်ငံ Siam Reap မြို့၌ သောကြာနေ့တွင် တွေ့ဆုံရန်ရှိပြီး အမေရိကန်၏ စီးပွါးရေးပိတ်ဆို့ အရေးယူမှု များ ဖြေလျှော့ပေးရေး အပါအဝင် အခြားကိစ္စရပ်များ ဆွေးနွေးမည်ဖြစ်ကြောင်း အမေရိကန် အရာရှိတဦးက ကြာသပတေးနေ့တွင် ပြောသည်။

ကမ္ဘောဒီးယားနိုင်ငံ Siem Reap တွင်ကျင်းပသည့် အာရှ အမေရိကန် စီးပွါးရေးလုပ်ငန်းများ အကြီးမားဆုံး စုဝေးမှုဖြစ်သည့် ညီလာခံသို့ အမေရိကန်နိုင်ငံခြားရေးဝန်ကြီး တက်ရောက်ရန်လာသည့် ခရီးစဉ်အတွင်း မြန်မာသမ္မတနှင့်တွေ့ဆုံခြင်း ဖြစ်သည်။ တဆက်တည်းတွင် အမေရိကန် ကုမ္ပဏီများ အနေဖြင့် မြန်မာနိုင်ငံတွင် ရင်းနှီးမြှုပ်နှံမှုများ တရားဝင် လုပ်ကိုင်နိုင်ပြီဖြစ်ကြောင်းလည်း အမေရိကန်က ဗုဒ္ဓဟူးနေ့တွင် ကြေညာခဲ့သည်။

မြန်မာအစိုးရဘက်မှလည်း မြန်မာနိုင်ငံအနေဖြင့် နိုင်ငံ၏ စီးပွါးရေး ပြုပြင်ပြောင်းလဲမှု "ဒုတိယလှိုင်း" သို့ တက်လှမ်းနေချိန်တွင် အနောက်နိုင်ငံများအနေဖြင့် မြန်မာနိုင်ငံအပေါ် ပိတ်ဆို့အရေးယူမှု အားလုံး ရုပ်သိမ်းပေးပါရန် မြန်မာ သမ္မတ ဦးသိန်းစိန်က ကြာသပတေးနေ့တွင် တိုက်တွန်းခဲ့သေးသည်။

အမေရိကန် နိုင်ငံခြားရေးဝန်ကြီး ဟီလာရီ ကလင်တန်နှင့် မြန်မာသမ္မတ ဦးသိန်းစိန်တို့ အင်္ဂါနေ့ ဒီဇင်ဘာ ၁ ရက်၊ ၂ဝ၁၁ ခုနှစ်က တွေ့ရစဉ်။ ဓာတ်ပုံ- မဇ္ဈိမ။

ဦးသိန်းစိန်က ဗြိတိန် အခြေစိုက် Financial Times သတင်းစာသို့ ပြောကြားခဲ့ရာတွင် “အခုအချိန်မှာ နိုင်ငံအနေနဲ့ အရေးတကြီး လိုအပ်နေတဲ့ ကုန်သွယ်ရေးနဲ့ ရင်းနှီးမြှုပ်နှံမှုတွေ ပြုလုပ်ဖော်ဆောင် နိုင်ရေးအတွက် ဘဏ္ဍာရေး ပိတ်ဆို့မှု အပါအဝင် အခြား စီးပွါးရေး ပိတ်ဆို့အရေးယူမှုတွေကို ရုပ်သိမ်းပေးဖို့ အလွန်အရေးကြီးပါတယ်။” ဟု ဆိုခဲ့သည်။

ဟီလာရီကလင်တန်သည် နှစ်ပေါင်း ၅၀ အတွင်း မြန်မာနိုင်ငံသို့ ပထမဆုံးလာရောက်သည့် အမေရိကန် နိုင်ငံခြားရေး ဝန်ကြီးတဦး၏ ခရီးစဉ်အဖြစ် ၂ဝ၁၁ ခုနှစ် ဒီဇင်ဘာလ ပထမပတ်အတွင်းက လာရောက်ခဲ့သေးပြီး မြန်မာသမ္မတ ဦးသိန်းစိန်နှင့် တွေ့ဆုံခဲ့သည်။

တွေ့ဆုံဆွေးနွေးမှုအတွင်း နှစ်နိုင်ငံဆက်ဆံရေးတိုးမြှင့်ရန် ဘဏ်လုပ်ငန်းစနစ်များတွင် အမေရိကန်နိုင်ငံမှ ကူညီရန်၊ကျေးလက်ဒေသဖွံ့ဖြိုးရေး၊ အသေးစားချေးငွေလုပ်ငန်းများ ဖွံ့ဖြိုးရန်အတွက် အမေရိကန်မှ ကူညီမည်ဟု ဟီလာရီ ကလင်တန်က ကတိပေးခဲ့သည်။

ယင်းအပြင် တိုင်းရင်းသား လက်နက်ကိုင်များနှင့် တွေ့ဆုံဆွေးနွေးခြင်း လုပ်ငန်းစဉ်များ၊ အပစ်အခတ် ရပ်စဲခြင်း လုပ်ငန်းစဉ်များတွင် အမေရိကန်ဘက်မှ ကူညီပေးသွားမည်ဖြစ်ပြီး စီးပွားရေး ပိတ်ဆို့မှု၊ ခရီးသွား လုပ်ငန်းများတွင် အမေရိကန်ဘက်မှ ကန့်သတ်ထားမှုများ၊ သွင်းကုန်ထုတ်ကုန် လုပ်ငန်းများတွင် ကန့်သတ်ထားမှုများကိုလည်း လျော့ချ ရုပ်သိမ်းသွားနိုင်အောင် ကူညီသွားမည်ဟု အမေရိကန် နိုင်ငံခြားရေးဝန်ကြီးက သမ္မတနှင့် ဆွေးနွေးမှုတွင် ထည့်သွင်းပြောသွားခဲ့သည်။