07.07.2012 နေ့ဖတ်ရန်သတင်းများ

by Myanmar Journal on Friday, July 6, 2012 at 5:53pm 

ဘောလုံးထဲ ကင်မရာတပ် ကြည့်မယ်

ဂိုးပေါက် စောင့်ကြည့်မယ့် နည်းသစ်

င်ငံတကာ ဘောလုံး စည်းမျဉ်း သတ်မှတ်တဲ့ အဖွဲ့က ဂိုးပေါက် စောင့်ကြည့်တဲ့ နည်းတွေ အတည်ပြု ပေးခဲ့ပါတယ်။

ကင်မရာတွေ သုံးမယ့် နည်းနဲ့ ဘောလုံးမှာ ကင်မရာ ဆင်ဆာ ထည့်တဲ့နည်း ဆိုပြီး ရှေ့ဆက် သုံးမယ့် စနစ် နှစ်မျိုးကို နိုင်ငံတကာ ဘောလုံး အဖွဲ့ ဘုတ်ကော်မတီက သတ်မှတ် ပေးခဲ့ပါတယ်။

၂ဝ၁ဝ ကမ္ဘာ့ ဖလား တုန်းက အင်္ဂလန် အသင်းက သွင်းတဲ့ ဂိုးတလုံး အပယ်ခံ ခဲ့ရပြီး နောက်ပိုင်း ဒီစိတ်ကူး ရခဲ့တာလို့ ကမ္ဘာ့ ဘောလုံး အဖွဲ့ ဥက္ကဋ္ဌ ဆပ် ဘတ္တလာက ဆိုပါတယ်။

ဒီနည်းသစ်ကို ဒီဇင်ဘာ လမှာ ဂျပန်မှာ ကျင်းပမယ့် ကလပ် အသင်းတွေရဲ့ ကမ္ဘာ့ ဖလား ပြိုင်ပွဲတွေမှာ ပထမဆုံး စသုံးမှာ ဖြစ်ပါတယ်။

ဒုက္ခသည်တွေ ဖမ်းဆီးမှု မြစ်ကြီးနားမှာ ဆန္ဒပြ

ဒုက္ခသည် စခန်းတွေမှာ လုံခြုံမှု မရှိဘူးလို့ ဆန္ဒပြသူ တွေကဆို

ကချင်ပြည်နယ် က စစ်ပြေး ဒုက္ခသည် တွေကို ကေအိုင်အေ၊ ကေအိုင်အို လက်နက်ကိုင် အဖွဲ့နဲ့ ဆက်သွယ်တယ် ဆိုပြီး အစိုးရ စစ်တပ်နဲ့ ရဲတွေက ဖမ်းဆီး နှိပ်စက် တာတွေကို ဆန့်ကျင် ဆန္ဒပြမှု တခု မြစ်ကြီးနား မြို့မှာ ဖြစ်ပွား ခဲ့ပါတယ်။

ဒါဟာ လူ့အခွင့်အရေး ချိုးဖောက်မှု နဲ့ ပတ်သက်ပြီး ကချင်ပြည်နယ်မှာ လူစုလူဝေးနဲ့ ပထမဆုံး ဆန္ဒပြ ခဲ့တာ ဖြစ်ပါတယ်။

ခရစ်ယာန် ဘာသာရေး ခေါင်းဆောင် တွေနဲ့ ဒုက္ခသည် စခန်း တာဝန်ခံ တွေက ဦးဆောင်ပြီး ဆရာ ဆရာမတွေ၊ လူငယ်တွေ အများအပြား ပါဝင်တဲ့ လူ ၁၀၀၀ လောက်ဟာ ကချင် တိုင်းရင်းသား ရိုးရာ ဝတ်စုံတွေ ဝတ်ဆင်ပြီး မြို့တွင်းမှာ စီတန်း လှည့်လည် ခဲ့သလို၊ မြစ်ကြီးနား မြို့ တရားရုံးရှေ့မှာ လည်း ဆန္ဒပြ ခဲ့ကြတယ်လို့ အဲဒီ အထဲမှာ ပါဝင်သူ တဦးက ပြောပါတယ်။

"ဂျန်မိုင်ကောင် မှာရှိတဲ့ စစ်ပြေး ဒုက္ခသည်တွေကို စစ်တပ်နဲ့ ရဲ၊ အစိုးရဖက်က ဖမ်းဆီးပြီး ကေအိုင်အို၊ ကေအိုင်အေနဲ့ အဆက်အသွယ် ရှိတယ်၊ သူတို့နဲ့ အလုပ်လုပ်တယ်ဆိုပြီး မတရား၊ ဥပမာ ဂမ်ရှောင်ကိုဆိုရင် မတရားဖြောင့်ချက်တွေ ယူခိုင်း၊ ဝန်ခံခိုင်း၊ ပြီးရင်တချို့တွေ ဆိုရင်လည်း စစ်ပြေးဒုက္ခသည် အသင်းတော် တွေမှာဝင်ဖမ်း အပြစ်တွေ ရှာပြီး ဝန်ခံခိုင်းတဲ့အခါ ကျတော့ အဲဒီကလူတွေရော မြစ်ကြီးနား မှာရှိတဲ့ လူတွေ ဘာသာရေး ခေါင်းဆောင်တွေက မကျေနပ် ကြဘူး။ အဲဒါကြောင့် အစိုးရ ဝန်ကြီးချုပ်ကို အကြောင်းကြားပြီး မကျေနပ် တဲ့ဟာကို ထုတ်ဖော်တာ ဖြစ်တယ်" လို့ ဆန္ဒပြသူ တဦးက ဘီဘီစီကို ပြောပြခဲ့ ပါတယ်။

ဆန္ဒပြမှုဟာ မနက် ၉ နာရီ ကနေ ၁၂ နာရီ အထိ ကြာမြင့် ခဲ့ပြီး အာဏာပိုင်တွေ ဘက်က တစုံတရာ အနှောက်အယှက် ပေးတာ မျိုး မရှိခဲ့ဘူး လို့ ဆိုပါတယ်။

သံအမတ်ကြီး ဦးသက္ထြန်း ဆုံး

နိုင်ငံတကာ စာတမ်းဖတ်ပွဲ တခုမှာ တွေ့ရတဲ့ ဦးသက်ထွန်း

မြန်မာ သမိုင်းဝင် ရုပ်ပုံလွှာ တွေ ရေးရာမှာ ထင်ရှားတဲ့ အငြိမ်းစား သံအမတ်ကြီး ဦးသက်ထွန်း ဟာ ၈၆ နှစ် အရွယ်မှာ ရန်ကုန်မှာ ကွယ်လွန် သွားပါတယ်။

ဝဏ္ဏကျော်ထင် ဦးသက်ထွန်းဟာ မြန်မာ ပညာတတ် အသိုင်းအဝိုင်းမှာ ကြီးပြင်းခဲ့ပြီး ကိုလိုနီ ခေတ်နဲ့ ကိုလိုနီလွန် မြန်မာ လူမှု အထက်လွှာ က ထင်ရှားတဲ့ သူတွေ အကြောင်း ဆောင်းပါးတွေ ရေးပြီး အသိနည်းတဲ့ ဖြစ်ရပ် တွေကို စာဖတ် ပရိသတ်နဲ့ မိတ်ဆက် ပေးတတ်ပါတယ်။

ဂါးဒီးယန်း မဂ္ဂဇင်း နဲ့ လုပ်သား ပြည်သူ့ နေ့စဉ် အင်္ဂလိပ် သတင်းစာ တွေမှာ အင်္ဂလိပ် ဘာသာနဲ့ ဆောင်းပါး တွေ အများကြီး ရေးခဲ့သူ ဖြစ်ပြီး ၁၉၉ဝ နောက်ပိုင်း နှစ်တွေမှာ မြန်မာ စာနယ်ဇင်း တွေမှာ ပြန်ရေး လာတော့လဲ လူငယ် ပရိသတ်တွေ အားပေး စိတ်ဝင်စား ခံရသူပါ။

စစ်တွင်း ဂျပန် ပညာသင် လူငယ် တွေ ထဲမှာ ပါဝင်ပြီး ထင်ရှားတဲ့ စစ် အစိုးရ ခေါင်းဆောင်တွေ၊ အရပ်သား ပညာရှင် ဖြစ်လာမယ့် သူတွေနဲ့ ဂျပန်မှာ ခင်မင် ကျွမ်းဝင် ခဲ့ပါတယ်။

ရန်ကုန်နဲ့ လန်ဒန် တက္ကသိုလ် တွေက စီးပွားရေး ဘွဲ့တွေ ရခဲ့ပြီး ကမ္ဘာ့ဘဏ် နဲ့ မြန်မာ အစိုးရ ဗဟို စာရင်းအင်း အဖွဲ့ ညွှန်ကြား ရေးဝန်၊ ပြင်သစ် နိုင်ငံ မြန်မာ သံအမတ်၊ ယူနက်စကို အမှုဆောင် ညွှန်ကြားရေးမှူး စတဲ့ တာဝန်တွေ ထမ်းဆောင် ခဲ့ပါတယ်။

ဦးသက်ထွန်းဟာ လမ်းစဉ်ပါတီ ခေတ်မှာ ပါတီ မဝင်ဘဲ ကင်းရှင်း အောင် နေခဲ့တဲ့ ပညာရှင် အရာရှိ ဖြစ်ပါတယ်။

ဂျပန် မြန်မာ ချစ်ကြည်ရေး အသင်း၊ ထွန်းဖောင်ဒေးရှင်း စာပေဆုနဲ့ ပန်းချီဆု ရွေးချယ်ရေး ကော်မတီ၊ မြန်မာ သမိုင်း အဖွဲ့ စတဲ့ လူမှုရေး ပညာရေး တာဝန် တွေကို ကွယ်လွန် ချိန်ထိ ထမ်းဆောင် ခဲ့ပါတယ်။

ကင်းဝန် ခြေရာ လိုက်၍သာ စာအုပ်နဲ့ အမျိုးသား စာပေဆု ရခဲ့ပြီး ဗိုလ်ချုပ် အောင်ဆန်းရဲ့ စာပေ လက်ရာ၊ မြန်မာ့ နိုင်ငံရေး သမိုင်း (၁၉၅၈ - ၁၉၆၂) စတဲ့ သမိုင်း အဖွဲ့ ထုတ် စာအုပ် တွေကို တခြား ပညာရှင် တွေနဲ့ အတူ အင်္ဂလိပ် ဘာသာ ပြန်ဆို ခဲ့ပါတယ်။

အတွေးအမြင် မဂ္ဂဇင်းမှာ ကိုယ်ရေး အတ္ထုပ္ပတ္တိ ရေးနေဆဲမှာ ကွယ်လွန် ခဲ့ပြီး ၁၉၅ဝ ပြည့်လွန် နှစ်များက မြန်မာ အစိုးရ ယန္တရား တွေ တိုးချဲ့ချိန်နဲ့ ဗိုလ်ချုပ်ကြီး နေဝင်း ဆိုရှယ်လစ် စီးပွားရေး ထူထောင်ချိန်က အခက်အခဲ တွေကို မှတ်တမ်း တင် ခဲ့ပါတယ်။

တကမ္ဘာ လုံးမှာ စီးပွားရေး နှေးကွေး တဲ့ လက္ခဏာ တွေ တွေ့နေတယ် လို့ Ms Largarde ကဆို

ကမ္ဘာ့စီးပွားရေး နှေးကွေးလာနိုင်

ကမ္ဘာ့ စီးပွားရေး ရဲ့ အနာဂတ် အလားအလာ ဟာ တဖြည်းဖြည်းနဲ့ ပိုဆိုး လာနေတယ် လို့ IMF နိုင်ငံတကာ ငွေကြေး ရန်ပုံငွေ အဖွဲ့ အကြီး အကဲ Christine Lagarde က ပြောပါတယ်။

ပြီးခဲ့တဲ့ လအနည်းငယ် အတွင်း ရင်းနှီးမြှုပ်နှံမှု၊ အလုပ် အကိုင်၊ ဖွံ့ဖြိုးမှု နဲ့ ထုတ်ကုန် ဆိုင်ရာ ညွှန်းကိန်း တွေဟာ ဥရောပနဲ့ အမေရိကန် မှာ သာမက တခြား ဒေသ တွေမှာပါ နှေးကွေး နေတာကို တွေ့ရ တယ်လို့ သူက ဆိုပါတယ်။

အရင်က ဖွံ့ဖြိုးမှုနှုန်း များတဲ့ ဘရာဇီး၊ တရုတ်နဲ့ အိန္ဒိယ လို နိုင်ငံတွေ မှာတောင် စီးပွားရေး နှေးကွေးမှု တွေကို ထင်ထင်ရှားရှား မြင်နေ ရတယ်လို့ လည်း မစ္စ Lagarde က ပြောပါတယ်။

လာမယ့် ဆယ်ရက် အတွင်း ထွက်လာဖို့ ရှိတဲ့ IMF ရဲ့ တရားဝင် ခန့်မှန်းချက် အသစ်နဲ့ ပတ်သက်ပြီး ဂျပန် နိုင်ငံမှာ ပြောကြား ခဲ့ရာမှာ လွန်ခဲ့တဲ့ သုံးလက ထုတ်ပြန် တဲ့ ခန့်မှန်းချက် ထက် ပိုဆိုး လိမ့်မယ်လို့ သူက သတိပေးခဲ့ ပါတယ်။

လူကုန်ကူးသူ ၈၀၀ တရုတ်မှာ ဖမ်းမိ

ယောက်ျားလေး တွေကို ရောင်းဝယ်တဲ့ ဈေးကွက် ဖြစ်နေ တယ်လို့ဆို

တရုတ် နိုင်ငံမှာ ကလေး သူငယ် တွေကို လူကုန်ကူး နေတဲ့ ဂိုဏ်းတခုကို ဖြိုခွင်းတဲ့ စစ်ဆင်ရေး တခု အတွင်း လူ ၈၀၀ ကို ရဲက ဖမ်းဆီး ခဲ့ပြီး ကလေး ၂၀၀ လောက် ကိုလည်း ကယ်ဆယ် ခဲ့တယ်လို့ တရုတ် အစိုးရက ပြောပါတယ်။

လူကုန်ကူး သူတွေကို နိုင်ငံနဲ့ အဝှမ်း လိုက်လံ ဖမ်းဆီး ခဲ့ရာမှာ ရဲတပ်ဖွဲ့ဝင် ၁၀၀၀၀ ပါဝင် ခဲ့တယ်လို့ တရုတ်နိုင်ငံရဲ့ အများ ပြည်သူ လုံခြုံရေး ဆိုင်ရာ ဝန်ကြီး ဌာနက ဆိုပါတယ်။

လူကုန်ကူးမှု တားဆီးရေး အတွက် ဆောင်ရွက် ရာမှာ မနှစ်တုန်းက အမျိုးသမီးနဲ့ ကလေးသူငယ် ၂၀၀၀၀ ကို ကယ်ဆယ် နိုင်ခဲ့တယ် လို့ တရုတ် အစိုးရက ပြောပါတယ်။

တရုတ် နိုင်ငံရဲ့ မိသား တစု ကလေး တယောက်သာ ယူခွင့် ရှိတယ် ဆိုတဲ့ မူကြောင့် ယောက်ျားလေး တွေကို ရောင်းဝယ်တဲ့ ဈေးကွက် ဖြစ်ပေါ် လာနေတယ်လို့ သတင်းထောက် တွေက ပြောပါတယ်။

အမျိုးသမီး နဲ့ မိန်းကလေးငယ် တွေကိုတော့ ဇနီးမယား အဖြစ် ဒါမှ မဟုတ် အလုပ်သမားတွေ အဖြစ် ရောင်းစားဖို့ ဖမ်းခေါ် တာတွေ ရှိတယ်လို့ လည်းဆိုပါတယ်။

ရိုဟင်ဂျာတွေ ကို လုံခြုံရေး တပ်ဖွဲ့ဝင်တွေ က ပို နှိပ်ကွပ်ကြောင်း HRW က အစီရင်ခံစာထုတ်

ဆူပူအကြမ်းဖက်မှု တွေ အတွင်း ပြာကျ ခဲ့ရတဲ့ အိမ်ယာ တွေ

ရခိုင်ပြည်နယ်တွင်းမှာ ဖြစ်ပွားခဲ့တဲ့ ဆူပူ အကြမ်းဖက်မှုတွေ အတွင်း အစိုးရ လုံခြုံရေး အဖွဲ့တွေကနေ လူ အမြောက်အမြား ကို ဖမ်းဆီးမှုတွေ နဲ့ လူ့အခွင့်အရေး ချိုးဖောက်မှုတွေ ရှိနေတယ်၊ နှိမ်နှင်းမှု တွေ လုပ်ရာမှာ ရိုဟင်ဂျာ တွေ ကို တဖက်သတ် ပိုပြီး နှိပ်ကွပ်နေတယ် လို့ နိုင်ငံတကာ လူ့အခွင့်အရေး အဖွဲ့ဖြစ်တဲ့ Human Rights Watch အဖွဲ့ရဲ့ အစီရင်ခံစာ ထုတ်ပြန်လိုက်ပါတယ်။

အထူးသဖြင့် ရခိုင်ပြည်နယ် မြောက်ဖျားပိုင်းက ရိုဟင်ဂျာ မွတ်ဆလင်တွေ ရှိတဲ့နေရာမှာ လူ့အခွင့်အရေး ချိုးဖောက်မှုတွေ အများအပြား တွေ့ရတယ်လို့ ဆိုပါတယ်။

ဥပမာ တစ်ခုအနေနဲ့ ဇွန်လ ၂၃ ရက်နေ့က မောင်းတောမြို့အနီး ရွာတရွာက လယ်ကွင်းတွေနဲ့ တောအုပ်တွေအနီး ပုန်းအောင်းနေတဲ့ ရိုဟင်ဂျာ မွတ်ဆလင်တွေကို လုံခြုံရေးအဖွဲ့တွေက ပစ်ခတ်နှိမ်နင်းမှုတွေ လုပ်ခဲ့တယ်လို့ ထွက်ပြေး လာသူတစ်ဦးကို ကိုးကားပြီး Human Rights Watch အဖွဲ့က ပြောပါတယ်၊ ဒါပေမယ့် သေကြေ ဒဏ်ရာရသူ ဘယ်နှစ်ဦးရှိလဲဆိုတာကိုတော့ မသိရဘူးလို့ ဆိုပါတယ်။

အစိုးရဘက်ကနေ ရခိုင်တိုင်းရင်းသား လူ ၃၀ ကို ဖမ်းဆီးထားတယ်လို့ ဇူလိုင်လ ၁ ရက်နေ့တုန်းက ကြေငြာခဲ့ပေမယ့် ရခိုင်ပြည်နယ် မြောက်ဖျားက ဖမ်းဆီးထားသူတွေနဲ့ပတ်သက်ပြီးတော့ အရေအတွက်၊ နာမည်နဲ့ ဘာ အမှုတွေနဲ့ စွဲချက်တင်ထားလဲဆိုတာကိုတော့ ထုတ်ပြန်တာ မတွေ့ရဘူးလို့ ပြောပါတယ်။

ဒါကြောင့် မြန်မာအစိုးရအနေနဲ့ ဥပဒေမဲ့ ဖမ်းဆီးမှုတွေ ၊ ဥပဒေမဲ့ ထိန်းသိမ်းထားမှုတွေကို ရပ်တန့်ဖို့ Human Rights Watch အဖွဲ့က တိုက်တွန်းထားပါတယ်။

ဖမ်းဆီးထားသူတွေကိုလည်း နာမည်နဲ့တကွ ထုတ်ပြန်ကြေငြာဖို့၊ ဖမ်းဆီး ထိန်းသိမ်းထားတဲ့ နေရာတွေ ဖော်ပြဖို့၊ အပြစ်ရှိ တယ်လို့ ယူဆပြီး ဖမ်းဆီးထားသူတွေကို တရားသူကြီး ရှေ့မှောက်မှာ အမြန် စစ်ဆေးဖို့၊ အပြစ်မရှိရင် လွှတ်ပေးဖို့နဲ့ ဖမ်းဆီးထားစဉ်မှာလည်း မိသားစုဝင် ဆွေမျိုးတွေနဲ့ တွေ့ခွင့်ပေးဖို့ မြန်မာအစိုးရကို တိုက်တွန်း ထားပါတယ်။

ဒါ့အပြင် Human Rights Watch အဖွဲ့ရဲ့ မြန်မာအစိုးရအပေါ် နောက်ထပ် တိုက်တွန်း အကြံပြုချက်တွေထဲမှာ ရခိုင်ပြည်နယ်တွင်း ဖြစ်ပွားခဲ့တဲ့ ပဋိပက္ခတွေ နဲ့ ပတ်သက်ပြီး လွတ်လပ်တဲ့ စုံစမ်းစစ်ဆေးမှုတွေ လုပ်ဖို့၊ ကုလသမဂ္ဂ လူ့အခွင့်အရေးအထူးကိုယ်စားလှယ် တောမတ်စ် အိုဟေး ကင်တားနားကို ရခိုင်ပြည်နယ်ကို သွားရောက်ပြီး စုံစမ်းစေဖို့လည်း တိုက်တွန်းထားပါတယ်။

နိုင်ငံတကာ အနေနဲ့လည်း ရခိုင်ဒေသ ပဋိပက္ခ နဲ့ ပတ်သက်ပြီး လွတ်လပ်တဲ့ စုံစမ်း စစ်ဆေးမှုတွေ ဖြစ်လာအောင် မြန်မာအစိုးရကို ဖိအားပေး လုပ်ဆောင်ဖို့ နဲ့ အိမ်နီးချင်း ဘင်္ဂလားဒေ့ရှ် အစိုးရအနေနဲ့လည်း ထွက်ပြေး လာသူ ဒုက္ခသည်တွေကို ပြန်မောင်းမထုတ်ပဲ ယာယီ ကာကွယ်မှုပေးဖို့ Human Rights Watch အဖွဲ့ ရဲ့ အစီရင်ခံစာမှာ ဖော်ပြ ထားပါတယ်။

ရခိုင်ပြည်နယ် က စစ်တွေ၊ ဘူးသီးတောင်၊ မောင်တော နဲ့ ရသေ့တောင် မြို့ တွေ က အခြေအနေ တွေ ကို ဇွန်လ လကုန်ပိုင်း လောက်မှာ သွားရောက် လေ့လာခဲ့တဲ့ မြန်မာနိုင်ငံ အမျိုးသား လူ့အခွင့်အရေး ကော်မရှင် အတွင်းရေးမှူး ဉီးစစ်မြိုင် က သူတို့ ရခိုင်တိုင်းရင်းသား ဖက် ကော၊ ဘင်္ဂါလီ တွေ ဖက်ကော မေးမြန်းမှု စုံစမ်းမှု တွေ လုပ်ခဲ့ကြောင်း နဲ့ ဘယ်ဘက် ကမှ အခုလို လုံခြုံရေး တပ်ဖွဲ့ဝင်တွေက နှိပ်ကွပ်မှု တွေ လုပ်နေကြောင်း မပြောကြကြောင်း တုန့်ပြန် ပါတယ်။

မောင်တော ဘက်မှာ ဖြစ်ခဲ့တဲ့ အကြမ်းဖက်မှု တွေ အတွင်း ရခိုင်တိုင်းရင်းသား တွေ သေကြေတာပိုများ သလို စစ်တွေဘက်က အကြမ်းဖက် မှု တွေ မှာတော့ ဘင်္ဂါလီ တွေ ပိုသေကြေ ကြတယ် လို့ လည်း သူ က ပြော ပါတယ်။

လွတ်လပ်တဲ့ နိုင်ငံတကာ အဖွဲ့တွေ၊ နိုင်ငံတကာ မီဒီယာ တွေ အဲဒီ ဒေသ ကို သွားရောက် စုံစမ်း လေ့လာခွင့် နဲ့ ပတ်သက်လို့ မေးမြန်း ရာမှာ တော့ အခုအချိန်မှာ ၂ ဘက် အနေနဲ့ စိတ်ခံစားချက် တွေ မြင့်မားနေတာ၊ မကျေနပ်ချက် တွေ မြင့်မား နေတာ ကြောင့် အခြေအနေ က မတည်ငြိမ်သေးတဲ့ အတွက် သွားရောက်ဖို့ မသင့် သေးဖူးလို့ သူ ယူဆ ကြောင်း ပြောပါတယ်၊ သွားခွင့် ပိတ်တာ မဟုတ် ကြောင်းလည်း သူ က ပြောပါတယ်။ 

ဆီးရီးယား ကိုဖေးမမှု ရုရှနဲ့ တရုတ် တာဝန်ရှိ လို့ဆို

ဆီးရီးယားကို ဆက် မထောက်ခံ ဖို့ ကလင်တန်က သတိပေး

ရုရှနဲ့ တရုတ် နိုင်ငံတွေဟာ ဆီးရီးယား သမ္မတ အာဆတ် အပေါ် ဖေးမခဲ့တဲ့ အတွက် ဒါကို ပြန်ပြီး ပေးဆပ် ရလိမ့်မယ်လို့ အမေ ရိကန် နိုင်ငံခြားရေး ဝန်ကြီး ဟီလာရီ ကလင်တန် က ပဲရစ်စ်မြို့မှာ ကျင်းပတဲ့ ဆီးရီးယား နိုင်ငံ ဆိုင်ရာ ညီလာခံမှာ ပြောကြား လိုက်ပါတယ်။

"အပြောင်း အလဲ ဖြစ်ဖို့ တခုတည်းသော နည်းကတော့ တိုးတက်မှု အတွက် ရှေ့ဆက် မသွားနိုင်အောင် တားနေတဲ့ တရုတ်နဲ့ ရုရှနိုင်ငံ တွေ အနေနဲ့ အဲဒီအတွက် တန်ဖိုး ကို ပြန်ပေးဆပ် ရလိမ့်မယ် ဆိုတာကို ညီလာခံ တက်လာတဲ့ နိုင်ငံတိုင်းက ကိုယ်စားလှယ် တွေက ရှင်းရှင်း လင်းလင်း ပြောကြ ရလိမ့်မယ်" လို့ မစ္စစ် ကလင်တန်က ပြောခဲ့ ပါတယ်။

ဆီးရီးယားမှာ ဖြစ်နေတဲ့ အကြမ်းဖက် မှု တွေကို ရပ်ဖို့ ကြိုးပမ်းမှု တွေမှာ ဒီနှစ်နိုင်ငံက ပိတ်ဆို့ နေတာကို ဆက်ပြီး သီးမခံနိုင် တော့ဘူး လို့လည်း သူက ပြောပါတယ်။ ဒီညီလာခံမှာ ရုရှနဲ့ တရုတ် နိုင်ငံတို့ ကတော့ မတက် ရောက်ပါဘူး။

ညီလာခံရဲ့ နောက်ဆုံး ကြေညာချက်မှာ သမ္မတ အာဆတ်ကို ဆင်း ပေးဖို့ နောက်ထပ် တောင်းဆို ထားပြီး သူ့အစိုးရကို ပိုပြင်းပြင်းထန်ထန် ပိတ်ဆို့ အရေးယူ ဖို့နဲ့ အတိုက်အခံ ကို အကူအညီတွေ အများအပြား ထပ်တိုး ပေးဖို့ တိုက်တွန်း ထားပါတယ်။

ဒီအတောအတွင်း သမ္မတ အာဆတ်နဲ့ နီးစပ်တဲ့ မိသားစု တခုက ဗိုလ် ချုပ်ကြီး Manaf Tlass ဟာ ပြင်သစ် နိုင်ငံကို ထွက်ခွာ လာနေပြီလို့ ပြင်သစ် အစိုးရက ဆိုပါတယ်။

ဗိုလ်ချုပ်ကြီး Manaf Tlas ဟာ ဆီးရီးယား စစ်တပ် အတွင်းမှာ ရော နိုင်ငံရေး လောက မှာပါ သြဇာ ကြီးမားသူ တစ်ဦး ဖြစ်ပြီး သမ္မတ အာဆတ် အားကိုးရတဲ့သူ တစ်ဦးလည်း ဖြစ်ပါတယ်။

သမ္မတ အစောင့် တပ်ဖွဲ့က ဗိုလ်ချုပ်ကြီး တစ်ဦး အခုလို တပ်က နေရော၊ နိုင်ငံကနေပါ ထွက်ခွာ လာတာဟာ မစ္စတာ အာဆတ် အတွက် ကြီးမားတဲ့ ဆုံးရှုံးမှု တစ်ခု ဖြစ်ပါတယ်။

သူဟာ အရင်တုန်းက ဆီးရီးယား ကာကွယ်ရေး ဝန်ကြီးရဲ့ သားလည်း ဖြစ်ပြီး သမ္မတ အာဆတ် နဲ့လည်း ပုဂ္ဂိုလ်ရေး အရ ကာလ အတော်ကြာ ကတည်းက ရင်းနှီး ခဲ့သူ ဖြစ်ပါတယ်။

ဒါပေမယ့် ဗိုလ်ချုပ်ကြီး Tlas ဟာ ဆီးရီးယား အရေး အခင်းတွေ ဖြစ်ပြီး နောက်ပိုင်း သမ္မတ အာဆတ်နဲ့ သဘောထား ကွဲလွဲမှု တွေ ရှိတယ်လို့ ယူဆ ရပါတယ်။

7 July အခမ်းအနားများ အကျဉ်းချုံးကျင်းပ

နေမျိုး | သောကြာနေ့၊ ဇူလိုင်လ ၀၆ ရက် ၂၀၁၂ ခုနှစ် ၁၆ နာရီ ၁၉ မိနစ်

နယူးဒေလီ (မဇ္ဈိမ) ။ ။ 7 July အခမ်းအနားများ ကျင်းပခြင်း မပြုရန် အာဏာပိုင်များက တားမြစ်ထားသော်လည်း ခရိုင်အချို့တွင် ကြိုတင်ကျင်းပခဲ့ကြောင်း ဗကသ များအဖွဲ့ချုပ် အထက်ဗမာပြည် သတင်းနှင့် ပြန်ကြားရေး တာဝန်ခံ ကိုရဲရင့်ကျော်က ပြောသည်။

“မန္တလေးက လုပ်ဖြစ်ပါမယ်။ အခုဟာက ဖိအားတွေများလာတယ်ဆိုတော့ မြင်းခြံ၊ မအူပင်၊ ဗန်းမော်၊ ရန်ကုန် ပခုက္ကူ၊ မုံရွာမှာလည်း တားတယ်။ မုံရွာက ၃ ရက်နေ့က ဆွမ်းကပ်တယ်။ အကျဉ်းချုံး ကျင်းပလိုက်တယ်။ ဒီကနေ့မှာတော့ကျောက်ဆည်ခရိုင် မှာလုပ်ပါတယ်။” ဟုဆိုသည်။

ဆဲဗင်းဂျုလိုင် နှစ်ငါးဆယ်ပြည့် အခမ်းအနားကို ကျောက်ဆည်မြို့ရှိ ရေဦးကျောင်းတိုက်တွင် ဗမာ နိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ် ( အထက်ဗမာပြည် လုပ်ငန်းကော်မတီ) နှင့် နည်းပညာတက္ကသိုလ် ကျောင်းသားများ သမဂ္ဂ (ကျောက်ဆည်) တို့မှ ဇူလိုင် ၅ ရက်နေ့က ဦးစီးကျင်းပခဲ့သည် ဟု ကျောက်ဆည်ခရိုင် ဗကသ တာဝန်ရှိသူ တဦးက ပြောသည်။“မနက် ၁၀ နာရီကစတယ်။ သမဂ္ဂအလံ အလေးပြုတယ်၊ ကျဆုံးတဲ့ကျောင်းသူ၊ ကျောင်းသားအပေါင်းကို အလေးပြု တယ်၊ ဝမ်းနည်းခြင်း အထိမ်းအမှတ် တမိနစ်ငြိမ်သက်တယ်။ ပြီးတော့ တရားနာ၊ ရေစက်ချ အမျှဝေတယ်။ တရားနာ ပြီးတဲ့ အချိန်မှာ သံဃာတွေကို ဆွမ်းကပ်တယ်။” ဟု သူကဆိုသည်။

အခမ်းအနားသို့ သံဃာတော် အပါး ၃ဝ ကျော်၊ ကျောက်ဆည်ခရိုင် အမျိုးသားဒီမိုကရေစီအဖွဲ့ချုပ် အဖွဲ့ဝင်များ၊ ရပ်မိရပ်ဖများ၊ ကျောင်းသား၊ ကျောင်းသူ ၁၀၀ နီးပါး တက်ရောက်ခဲ့သည်။

အခမ်းအနား အောင်မြင်စွာ ကျင်းပနိုင်ခဲ့သော်လည်း ဆရာတော်များ ဆွမ်းစားချိန်တွင် အာဏာပိုင်များ လာရောက်မေးမြန်းမှုများ ပြုလုပ်တာကြောင့် သံဃာတော်များ စိတ်အနှောက်အယှက် ဖြစ်ခဲ့ရကြောင်း သူက ဆက်ပြောသည်။

“ဒီပွဲကို ဘယ်သူဦးဆောင်လုပ်တာလဲ၊ ဘယ်သူတွေလုပ်တာလဲ၊ မန္တလေးက ဘယ်သူလာလဲ၊ ဘယ်က လူတွေ လာတက်သလဲ၊ ဘယ်နှစ်ယောက်လာသလဲ ဆိုတာတွေ လာမေးတယ်။ ကျောက်ဆည်က အာဏာပိုင်တွေပါပဲ။ နာမည်စာရင်းတွေ မှတ်သွားပါတယ်။”  ဟု မဇ္စျိမသို့ ပြောသည်။

ဒေသအသီးသီးမှာ တားမြစ်မှုများရှိနေပြီး ကျင်းပမည့်နေရာများအား အာဏာပိုင်များက လက်မခံရန် လိုက်လံ ဖိအားပေးနေသော်လည်း ဗကသ များအဖွဲ့ချုပ်အနေဖြင့် 7 July နှစ် ၅၀ ပြည့် အခမ်းအနားများအား ဆက်လက် ကျင်းပမည် ဖြစ်သည်။

နယ်ချဲ့စံနစ်၊ တပါတီအာဏာရှင်စံနစ် ခေတ်အဆက်ဆက်တွင် ကျောင်းသားများ အသက်ပေးစတေးခဲ့ရပြီးကျောင်းသားသမဂ္ဂသည် တိုင်းပြည်အတွက် အလွန်အရေးကြီးကြောင်း ကိုရဲရင့်ကျော်က ဆက်ပြောသည်။

“အလွန်ထင်ရှားတဲ့ ကျေးဇူးက ဗိုလ်ချုပ်အောင်ဆန်း အပါအဝင် သမဂ္ဂဥက္ကဋ္ဌ ဦးနုတို့၊ ကိုဗဟိန်းတို့၊ ကိုဘဆွေလေးတို့ ဒီပုဂ္ဂိုလ်တွေကြောင့် ကျနော်တို့ မြန်မာနိုင်ငံဟာ လွတ်လပ်ရေးရခဲ့တာပါ။ အချုပ်အခြာအာဏာ ပိုင်ဆိုင်ခဲ့ရတာပါ။ အဲလိုသာ မဟုတ်ရင် ကျနော်တို့ဟာ သူ့ကျွန်ဟာသူ့ကျွန်ပဲ။ ဒါတွေကို ပြန်ကြည့်ရင် နိုင်ငံရဲ့သမိုင်းမှာ သမဂ္ဂကို ဘယ်လိုမှ ချန်ထားလို့မရပါဘူး။ ကျောင်းသား သမဂ္ဂနဲ့ကင်းပြီးတော့ နိုင်ငံရေးပြောင်းလဲမှု လှုပ်ရှားမှု မရှိသလောက် ပါဘဲ” ဟု သူကပြောသည်။

ရန်ကုန်နှင့် မန္တလေးတိုင်း ထွေ/အုပ် ညွှန်မှူးများက ဗကသ များအဖွဲ့ချုပ် ကျောင်းသားခေါင်းဆောင်များအား  မှတ်ပုံတင်မထားသည့် အဖွဲ့မှ ဂေဇက်ဝင်နေ့ မဟုတ်သည့် ကျောင်းသားသမဂ္ဂ အဆောက်အအုံ ဖြိုခွဲခံခဲ့ရသည့် 7 July ရွှေရတုနေ့ ကျင်းပခြင်းကို ခွင့်မပြုကြောင်း ဇွန်လ အတွင်းက သတိပေးထားသည်။

U-22 တွင် သက်ကျော် ကစားသမားမရှိဟု အားကစားအဖွဲ့ချုပ်ငြင်းဆို

မျိုးသန့် | သောကြာနေ့၊ ဇူလိုင်လ ၀၆ ရက် ၂၀၁၂ ခုနှစ် ၁၈ နာရီ ၀၄ မိနစ်

ရန်ကုန် (မဇ္ဈိမ) ။        ။ အသက် ၂၂ နှစ်အောက် အာရှ U-22 ခြေစစ်ပွဲတွင် မြန်မာအားကစားသမားများတွင် အသက်ကျော်လွန်သူများ ရှိနေသည်ဟူသည် ပြောဆိုရေးသားမှုများနှင့် ပတ်သက်၍ မြန်မာနိုင်ငံ အားကစားအဖွဲ့ချုပ်ပြန်ကြားရေးတာဝန်ခံ ဦးစိုးမိုးမှ ငြင်းဆိုလိုက်ပြီး ရင်ဆိုင်ရန် အသင့်ရှိသည်ဟု မဇ္ဈိမကို ပြောသည်။

"ကျနော်တို့ အခုလို အောင်မြင်မှုရလာမှ ကျနော်တို့ကို တနည်းတဖုံနဲ့ ဒီလိုနှောက်ယှက်ဖို့ ကြိုးစားတာကတော့ ကျနော် တို့ အမှန်တရားအတိုင်း ရင်ဆိုင်ဖို့အသင့်ပဲ။ ကျနော်တို့ဘာမှ Twist (လိမ်လည်မှု) လုပ်ထားတာ မရှိဘူး။ အဲဒီအတွက် ကျနော်တို့ ဘာမှ အိပ်မပျော်စရာအကြောင်း မရှိဘူး။" ဟု ဦးစိုးမိုးက ပြောသည်။

မလေးရှားနိုင်ငံ အခြေစိုက် New Straits Times အွန်လိုင်း သတင်းစာမျက်နှာတွင် မလေးရှားဘက်သို့ နှစ်ဂိုး သွင်းယူပေးခဲ့သူ ကောင်းစည်သူ အပါအဝင် မြန်မာအားကစားသမား အနည်းဆုံး ရှစ်ဦးခန့်သည် အသက် ကျော်လွန်နေကြ သူများဟု ယုံကြည်ရကြောင်း ဇူလိုင်လ ၅ ရက်နေ့က ရေးသားထားသည်။

သို့သော် ဦးစိုးမိုးက မိမိတို့ အားကစားသမားများမှာ အသက်ကျော်လွန်ခြင်း မရှိဘဲ အာရှဘောလုံးအဖွဲ့ချုပ် AFC မှ ထုတ်ပေးထားသည့် ကစားသမား မှတ်ပုံတင်ကဒ်များဖြင့် အထောက်အထားပြည့်စုံစွာ ကစားခဲ့ကြသူများ ဖြစ်ခြင်းကြောင့် ထိုစွပ်စွဲမှုများနှင့် ပတ်သက်၍ စိုးရိမ်စရာမရှိဟု မဇ္ဈိမကို ပြောသည်။

"ကျနော်တို့ မှန်ကန်တဲ့ အထောက်အထားနဲ့ မှန်ကန်တဲ့ လမ်းကြောင်းနဲ့ ကျနော်တို့ ဘာမှ ကြောက်စရာ အကြောင်း မရှိဘူး။  AFC က တရားဝင် မှတ်ပုံတင်ထားတဲ့ Player IDCard နဲ့ ကျနော်တို့ ကစားထားတာ။ အဲဒီအတွက် ဘာမှ စိုးရိမ်စရာမရှိဘူး။" ဟု ဦးစိုးမိုးက ပြောသည်။

ဇွန်လ ၃ ရက်နေ့မှစတင်၍ U-22 ခြေစစ်ပွဲကို အိမ်ရှင်အဖြစ် လက်ခံကျင်းပခဲ့သည့် မြန်မာသည် တောင်ကိုရီးယားကို ဂိုးမရှိ သရေ၊ ဖိလစ်ပိုင်၊ ဗီယက်နမ်၊ တရုတ် (တိုင်ပေ)၊ မလေးရှား တို့ကိုအနိုင်ယူပြီး နှစ်ပေါင်း ၄၀ ကျော်အတွင်း ပထမဆုံး အာရှ U-22 ခြေစစ်ပွဲ အောင်မြင်သွားခဲ့သည်။

ခြေစစ်ပွဲအောင်မြင်ခဲ့သည့် မြန်မာ U-22 အသင်းကို မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်မှ ညစာစားပွဲဖြင့် ဂုဏ်ပြုခဲ့ပြီး အသင်းအား အမေရိကန်ဒေါ်လာ နှစ်သိန်း ဆုချမည်ဟု ညစာစားပွဲတွင် ထုတ်ဖေါ်ပြောဆိုခဲ့သည်ဟု သိရသည်။

အသက် ၂၂ အောက် အာရှဖလား ပြိုင်ပွဲကို လာမည့် ၂၀၁၄ ဇန်နဝါရီလတွင် ကျင်းပမည်ဖြစ်ပြီး အိမ်ရှင်အဖြစ် လက်ခံ ကျင်းပနိုင်ရန် ထိုင်းနိုင်ငံနှင့် အိုမန်နိုင်ငံတို့မှ အာရှဖလား အဖွဲ့ချုပ်တို့က လျှောက်ထားပြီး၊ မြန်မာနိုင်ငံကလည်း ကျင်းပခွင့်ရနိုင်ရန် လျှောက်ထားမည်ဟုသိရသည်။

မြောက်ကိုရီးယား စားနပ်ရိက္ခာအခြေအနေ ဆိုးရွား

By ဗွီအိုအေ (မြန်မာဌာန)

• မြောက်ကိုရီးယားနိုင်ငံရဲ့ စားနပ်ရိက္ခာအခြေအနေကို ရှားရှားပါးပါးကြည့်ခွင့်ရလိုက်တဲ့ ဒိန်းမတ်အခြေစိုက် အကူအညီပေးအဖွဲ့ တဖွဲ့က အခြေအနေတွေဟာ ဆိုးဆိုးရွားရွား ဖြစ်နေတယ်လို့ ပြောလိုက်ပါတယ်။

မြောက်ကိုရီးယားနိုင်ငံ၊ တောင်ပိုင်း Hwanhae ပြည်နယ်က Haeju မြို့မှာ စာနပ်ရိက္ခာပို့ဆောင်ပေးခဲ့စဉ် ပြီးခဲ့တဲ့သီတင်းပတ်က ကြီးကြပ်ပေးခဲ့ပြီး အဲဒီလောက် ဆိုးဝါးတဲ့ အာဟာရမပြည့်ဝတဲ့ အခြေအနေမျိုးကို ဘယ်တုန်းကမှ မတွေ့ခဲ့ဖူးဘူးလို့ Mission ဆိုတဲ့အဖွဲ့ရဲ့ အမှုဆောင် ညွှန်ကြားရေးမှူး Kim Hartzner က ဗွီအိုအေ ကိုရီးယားဘာသာစကားဌာနကို ပြောခဲ့ပါတယ်။

နေရာတခုမှာ သူတွေ့ခဲ့ရတဲ့ ကလေးငယ် ၂၁၈ ယောက်ဟာ စားရေရိက္ခာအကူအညီတွေကိုသာ မရဘူးဆိုရင်တော့ သေကုန်ကြလိမ့်မယ်လို့ သူကပြောပါတယ်။

မြောက်ကိုရီးယားက သူရောက်ခဲ့တဲ့နေရာမှာ ဘယ်လို ဆည်မြောင်းစနစ်မျိုးကိုမှ မတွေ့ခဲ့ရဘူးလို့ မစ္စတာဟာ့တ်ဇ်နာက ပြောပါ တယ်။ ရေပုံးတွေနဲ့ လူတန်းရှည်ကြီးဟာ မြစ်ထဲကနေ ရေခပ်ပြီး အနားကပြောင်းခင်းတွေကို ရေလောင်းကြရတယ်လို့ သူက ဆိုပါတယ်။

သူသွားခဲ့တဲ့နေရာအများစုမှာ ဆန်တွေ ရနေတုန်းပဲဖြစ်ပေမဲ့ တချို့နေရာတွေမှာတော့ ဆန်မရှိတော့ဘူးလို့ Kim Hartzner ကပြောပါတယ်။

ပြည်ခိုင်ဖြိုး အမတ်တွေ လေသံ ပြောင်း

By မဆုမွန်

• ဒီတစ်ခေါက်ပြန်လည်ကျင်းပတဲ့ လွှတ်တော်အစည်းအဝေးမှာ ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီက ကိုယ်စားလှယ်တွေအနေနဲ့ ဒေသတွင်း ပြည်သူတွေ တွေ့ကြုံနေရတဲ့ အခက်အခဲအကျပ်အတည်းတွေကို ထူးထူးခြားခြား အဆိုတင်သွင်း တင်ပြမှုရှိနေတယ်လို့ သိရပါတယ်။ ကျန်းမာရေးကြောင့် အနားယူ သွားပြီဖြစ်တဲ့ ဒုတိယသမ္မတ သီဟသူရတင်အောင်မြင့်ဦးရဲ့ ရာထူးနေရာ အစားထိုးခန့်အပ်ဖို့ကိစ္စနဲ့ ပတ် သက်ပြီးလည်း လွှတ်တော်တွင်း ကြိုတင် ခန့်မှန်းချက်တွေရှိနေပါတယ်။  ဒီအကြောင်းကို နေပြည်တော် မှာကျင်းပတဲ့ လွှတ်တော်ကို တက်ရောက်နေတဲ့ ပြည့်သူ့လွှတ်တော်ကိုယ်စားလှယ်တွေကို မဆုမွန်က ဆက်သွယ် မေးမြန်းထားပါတယ်။

ဒီလ ဇူလိုင်လ ၄ ရက်နေ့ကစပြီး ကျင်းပနေတဲ့ ပထမအကြိမ် ပြည်သူ့လွှတ်တော် စတုတ္ထပုံမှန် အစည်း အဝေးတွေမှာ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက အမတ်တွေရဲ့တင်ပြချက်တွေက ဒီ တကြိမ် မှာတော့ ထူးခြားမှုရှိတယ်လို့ တက်ရောက်လာတဲ့ အခြားလွှတ်တော်အမတ်တွေကပြောပါတယ်။ အစည်း အဝေးတွေထဲက တိုင်းပြည်ရဲ့ကဏ္ဍ အသီးသီးနဲ့ နယ်ပယ်အသီးသီးက စံချိန်စံညွန်းဥပဒေတွေ သတ် မှတ်ပေးရေး အဆို စီးပွားရေး ရင်းနှီးမြှုပ်နှံမှုဆိုင်ရာ မှုကြမ်းတွေနဲ့ အုပ်ချုပ်ရေး ဥပဒေပြုရေး တရားစီ ရင်ရေးစတဲ့ ဥပဒေမှုကြမ်းတွေအပါအ၀င် ပြည်သူလူထု ကျမ်းမာရေး၊ ပညာရေး၊ တောင်သူ လယ် သမားရေး၊ အလုပ်သမားရေးနဲ့ ပတ်သက်တဲ့ အဆိုပြုမှုတွေကို ကြံ့ခိုင်ဖွံ့ဖြိုးရေး အမတ်တွေက အများစု တင်သွင်းကြပါတယ်။

ပြည်ထောင်စု ကြံ့ခိုင်ရေးနဲ့ဖွံ့ဖြိုးရေးအမတ်တွေရဲ့ ထူးခြားတဲ့ အဆိုတင်သွင်းမှုကို မန္တလေးတိုင်း၊ တိုင်းဒေသကြီး မိတ္ထီလာမြို့နယ် ကိ်ုယ်စားပြု အမျိုးသားဒီမိုကရေစီအဖွဲ့ချုပ်က လွှတ်တော်ကိုယ်စားလှယ် ဦးဝင်းထိန်က အခုလို သုံးသပ်ပါတယ်။

“အရင်လွှတ်တော်တွေတုန်းက မပြီးပြတ်သေးတဲ့အဆိုတွေ တင်တယ်၊ ဆွေးနွေးတယ်၊ အဆိုသစ်တွေ တင် သွင်းတယ်။ များသောအားဖြင့် ကြံ့ခိုင်ရေးအမတ်တွေက တင်တာပေါ့။ ထင်တာက ပြီးခဲ့တဲ့ရွေးကောက်ပွဲမှာ အပြတ်အသတ် ရှုံးသွားတဲ့ အခါကျတော့ ပြည်သူလူထု အကျိုးကို လျစ်လျူရှုတယ်ဆိုပြီး အမြင်မှန်ရ သလားတော့ မသိဘူး။ လွှတ်တော်ထဲမှာ ထူးခြားတာကတော့  သူတို့တင်တဲ့ အဆိုတွေက ပြည်သူလူထု ဘက်က နစ်နာတဲ့ဟာတွေကို စုစည်းတင်ပြနေတာဟာ တချို့ အန်ကယ်လ်တို့ တင်ပြမယ့်ဟာတွေတောင် တင်လို့မရတော့ဘူး။ သူတို့က ဦးသွားပြီ။”

စတုတ္ထအကြိမ် ပြည်သူ့ လွှတ်တော်ပုံမှန်အစည်းအဝေးမှာ နိုင်ငံတော် ဒုတိယသမ္မတ သီဟသူရ တင်အောင်မြင့်ဦး ရာထူးက နုတ်ထွက်သွားတဲ့ အကြောင်း ပြည်ထောင်စုလွှတ်တော်က ပြည်သူ့ လွှတ်တော် နာယက ဦးခင်အောင်မြင့်က သမ္မတဦးသိန်းစိန် ပေးပို့တဲ့သ၀ဏ်လွှာနဲ့ အတည်ပြုကြေငြာ ခဲ့ပါတယ်။ ၂၀၀၈ အခြေခံ ဥပဒေ အရ လစ်လပ်သွားတဲ့ ဒုတိယသမ္မတသစ်ရာထူးကို တပ်မတော်သား ကိုယ်စားလှယ်အစုအဖွဲ့တွေ က ပြန်လည်ရွေးချယ်ပေးရမှာဖြစ်ပါတယ်။

လတ်တလောမှာတော့ ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီအတွင်းရေးမှူးဦးဌေးဦး၊ ရွေးကောက်ပွဲ ကော်မရှင်ဥက္ကဋ္ဌ ဦးတင်အေးနဲ့ ကာကွယ်ရေးဦးစီးချုပ် ဗိုလ်ချုပ်ကြီး မင်းအောင်လိူင် စတဲ့သူတွေကို ကြိုတင် ခန့်မှန်းနေကြ ပါတယ်။ ပြည်သူ့လွှတ်တော် ကိုယ်စားလှယ်တွေအနေနဲ့ နောက်တက်လာမယ့် ဒုသမ္မတသစ်အနေနဲ့ ဒီမို ကရေစီ အသွင် ကူးပြောင်းရေးမှာ သမ္မတဦးသိန်းစိန် ချမှတ်မယ့် ပြုပြင်ပြောင်းလဲရေး မူဝါဒတွေနဲ့အတူ လက် တွဲဆောင်ရွက်နိုင်မယ့် သဘောထား ပျော့ပြောင်းသူကို တက်လာစေချင်တယ်လို့လည်း လွှတ်တော် ကိုယ်စားလှယ် ဦးဝင်းထိန်ကပြောပါတယ်။

ဒုသမ္မတသစ် ရွေးချယ်မှုနဲ့ပတ်သက်ပြီးလည်း ရခိုင်တိုင်းရင်းသားများ တိုးတက်ရေးပါတီ က ဒေါက်တာအေးမောင်က သမ္မတသစ်ရဲ့ဘေးနားမှာရှိမယ့် ဒုတိယသမ္မသစ်နှစ်ဦးဟာ အတွဲညီဖို့ လိုတယ် လို့  သူ့အမြင်ကို အခုလိုသုံးသပ်ပါတယ်။

“ဒုတိယသမ္မတနှစ်ပါးဆိုတာ သမ္မတကြီးရဲ့ ဘယ် ညာ လက်ရုံးတွေပါပဲ။  ဆိုတော့ အတွဲညီဖို့လိုတယ်။ သမ္မတကြီးသွားမယ့် လမ်းကြောင်း အတူလိုက်ပါနိုင်မယ့် ပုဂ္ဂိုလ်တွေဖြစ်ဖို့လိုတယ်။ အဲ့လိုပဲ၊ အဲဒီ့ ပုဂ္ဂိုလ်တွေဟာ တပ်မတော်သားအစုအဖွဲ့က ရွေးချယ်တာမို့လို့ တပ်မတော်သားတွေအားလုံးရဲ့ ကိုယ်စား လည်း ပြောနိုင် ဆိုနိုင် လေးစားအပ်တဲ့ပုဂ္ဂိုလ်တွေဖြစ်ဖို့လိုသလို လုံခြုံရေးတာဝန်ကို ယူထားတဲ့ တပ်မတော်ဖြစ်လို့ ကျနော်တို့ ပြည်သူပြည်သားတွေက နည်းလည်သဘောပေါက်ပြီး လိုလားတဲ့ ပုဂ္ဂိုလ်ဆိုရင် ပိုကောင်းမယ်လို့ ကျနော်ထင်တယ်။”

တပ်မတော်သားကိုယ်စားလှယ်တွေအနေနဲ့ လာမယ့်ဇူလိုင်လ ၁၂ ရက်နေ့ မတိုင်ခင် ဒုသမ္မတသစ်ရဲ့ အမည်စာရင်းကို တင်သွင်းရမှာဖြစ်ပြီး တင်သွင်းလာတဲ့အထဲက မဲအများဆုံးရတဲ့သူကို လွှတ်တော်က အတည်ပြုရ မှာဖြစ်ပါတယ်။ လွှတ်တော်တွင်းမှာ ၀န်ကြီးအဆင့် အပြောင်းအလဲတွေ ဖြစ်လာနိုင်တဲ့ အပေါ်ကိုလည်း ဒေါက်တာအေးမောင်က သမ္မတ ဦးသိန်းစိန်ရဲ့ ပြုပြင်ပြောင်းလဲရေးလမ်းကြောင်း ဒုတိယအဆင့်ရောက် ရှိနေတဲ့နေရာမှာ မသွားချင်တဲ့သူတွေ ထားခဲ့ရမယ် ဆိုတဲ့ မိန့်ခွန်းပေါ်အခြေခံပြီး အခုလိုသုံးသပ်ပါတယ်။

“လာမယ့်ကိုးရက်နေ့မှာ ကျနော်တို့ကြားနေရတဲ့သတင်း Cabinetအပြောင်းအလဲလုပ်မယ်ဆိုလည်း ၀မ်းသာပါတယ်။ လာမယ့်အစိုးရအဖွဲ့ဟာ အားလုံးပါဝင်တဲ့အစိုးရအဖွဲ့ဖြစ်ရင် သိပ်ကောင်းမှာပဲဗျာ။ နိုင်ငံရေးပြောင်းလဲ ရင် စီးပွားရေး ပြောင်းလဲဖို့လိုမယ်။ အကုန်လုံးပေါ့ အစိုးရအဖွဲ့၊ နောက် လွှတ်တော်၊ ပြည်သူ၊နိုင်ငံတကာ ညီညွတ်နေမယ်ဆိုရင် ကျနော်တို့ အမြန်ဆုံး လိုချင်တဲ့လမ်းကို ရောက် မှာပေါ့။”

လွှတ်တော်တွင်းအစည်းအဝေးပွဲတွေမှာ ရခိုင်ပြည်နယ်တွင်း အကြမ်းဖက်မှုဖြစ်ပွားခဲ့တဲ့ ဒေသတွင်း လက်ရှိ အခြေအနေတွေနဲ့ ပတ်သက်ပြီး တင်ပြဆွေးနွေးဖို့ရှိတယ်လို့လည်း ရခိုင်လွှတ်တော်ကိုယ်စားပြု ကိုယ်စား လှယ် ဒေါက်တာအေးမောင်က ပြောပါတယ်။

စတုတ္ထအကြိမ် လွှတ်တော်အစည်းအဝေးတွေပြန်ကျင်းပနေတာ အခုဆိုရင် သုံးရက်မြောက်နေ့ဖြစ်လာ ပါပြီ။ အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်က သူ့ရဲ့မဲဆန္ဒနယ်မြေဖြစ်တဲ့ ကော့ မှူးမြို့နယ်ကို သွားရောက်ပြီး ဒေသခံပြည်သူတွေရဲ့လိုအပ်ချက်တွေကို တွေ့ဆုံမေးမြန်းပြီး ဇူလိုင်လ ၉ ရက်နေ့မှာ လွှတ်တော်အစည်းအဝေးကို တက်ရောက်မှာဖြစ်ပါတယ်။

မိဘမဲ့ကလေးများ ဂျက်ကီချဲန်းတွေ့ဆုံအားပေး

By မစုမြတ်မွန်

• ကုလကမဂ္ဂရဲ့ ကလေးများအရေးပေါ်ရန်ပုံငွေအဖွဲ့ UNICEF ရဲ့ အကျိုးဆောင် သံအမတ်ကြီးအဖြစ် မန္တလေး မြို့မှာ ရောက်နေတဲ့ HK မင်းသား Jakie Chan ဟာ ဒီကနေ့မှာ မိဘမဲ့ကလေးတွေကို စောင့်ရှောက်ထား တဲ့ဂေဟာတွေ၊ အသက်မွေးအတတ်ပညာသင်ကျောင်းတွေကို သွားခဲ့ပါတယ်။ လူကုန်ကူးမှုတိုက်ဖျက်ရေး အတွက် အဓိက ရည်ရွယ်လာခဲ့တဲ့ Jakie Chan ဟာ လူကုန်ကူးမှုတိုက်ဖျက်ရေး ရဲအထူးတပ်ဖွဲ့ရုံးမှာ လည်း တာဝန်ရှိသူတွေနဲ့ တွေ့ဆုံဆွေးနွေးပါတယ်။ မြန်မာနိုင်ငံက မိဘမဲ့ကလေးတွေ၊ အခွင့်အရေး နည်းပါးတဲ့သူတွေကို ခုလို နာမည်ကြီး ရုပ်ရှင်မင်းသားတယောက်က လာအားပေးတဲ့အတွက် အားတက်နေကြတဲ့အကြောင်းကို မစုမြတ်မွန်က ဆက်ပြောပါမယ်ရှင်။

မန္တလေးမြို့ကို ဒုတိယနေ့အဖြစ်ရောက်နေတဲ့ ဟာသ Action မင်းသား Jakie Chan ဟာ ဒီကနေ့မှာတော့ လူမှုဝန်ထမ်းဦးစီးဌာနရဲ့ အစီအစဉ်နဲ့ ဖွင့်ထားတဲ့ လူငယ်သင်တန်းကျောင်းတွေ၊ အမျိုး သမီးတွေ စောင့်ရှောက်ရေး ဂေဟာတွေတင်မက၊ ပုဂ္ဂလိကစေတနာရှင်တွေ ဘုန်းတော်ကြီးတွေ အစီ အစဉ်နဲ့ ဖွင့်ထားတဲ့ ပရဟိတနေရာတချို့ကိုသွားခဲ့တဲ့အပြင် လူကုန်ကူးမှု တိုက်ဖျက်ရေး ဆောင်ရွက်နေကြ တဲ့ တာဝန်ရှိသူတွေကိုလည်း တွေ့ဆုံခဲ့တဲ့အကြောင်း မန္တလေးမြို့ခံ ကိုငြိမ်းချမ်းက ပြောပြပါတယ်။

“မနက် ၆ နာရီကတည်းက ခရီးစဉ်ရှိတာပဲ၊ လမ်း ၃၀ မှာရှိတဲ့ လူမှုဝန်ထမ်း ဦးစီးဌာနလက်အောက် ကပေါ့လေ၊ မိဘမဲ့ အမျိုးသမီးဂေဟာတွေ ရှိတယ်။ အဲဒီကိုသွားတယ်။ နောက်ပြီးတော့ ရွှေကျင်- မဒရာဘက်အထွက်ပေါ့။ ရွှေကျင်မှာရှိတဲ့ အမျိုးသမီးစောင့်ရှောက်ရေးဂေဟာ၊ ၁၁ နာရီ လောက်မှာ မန္တလေးမှာရှိတဲ့ လူကုန်ကူးမှု တိုက်ဖျက်ရေးအဖွဲ့တွေနဲ့ ဆုံတယ်။ အဲဒါပြီးမှ ၁၂ နာရီ ပတ်ဝန်းကျင်မှာ ၁၂/၇၃ လမ်းမှာရှိတဲ့ လူငယ် သင်တန်းကျောင်းလို့ အရပ်ကခေါ်တဲ့ လူမှုဝန်ထမ်းဦးစီးဌာန ကပဲ- ယောကျာ်းလေးကျောင်းပေါ့။ အဲဒီကိုသွားတယ်။ ၁ နာရီ ပတ်ဝန်းကျင် လောက်မှ ဂျက်ကီချဲန်းတို့ ပြန်လာတယ်။ ပြန်လာပြီးတော့ ၄၅ လမ်းပေါ့။ အဲဒီဘက်က ဆွံ့၊ အ၊ နားမကြားကျောင်းကို သွားတယ်။”