25.05.2012 နေ့ဖတ်ရန်သတင်းများ

by Myanmar Journal on Thursday, May 24, 2012 at 3:40pm 

ဥရောပစီးပွားရေး သုံးနှစ်အတွင်း အနိမ့်ဆုံးကျဆင်း

အဓိကအချက်သုံးချက်နဲ့ ဥရောပ စီးပွားရေး အတွက်လုပ်ဆောင်မယ်လို့ အီးယူ ဥက္ကဌပြော

ဥရောပက စီးပွားရေး လုပ်ငန်းတွေဟာ သုံးနှစ်အတွင်း မေလထဲမှာ အနိမ့်ဆုံးကို ကျဆင်း သွားတယ်လို့ စီးပွားရေး လုပ်ငန်း မန်နေဂျာ တွေရဲ့ လေ့လာ တွေ့ရှိချက်က ဖေါ်ပြနေပါတယ်။

Markit လို့ခေါ်တဲ့ စီးပွားရေး ဆိုင်ရာ သုတေသန ကုမ္ပဏီကနေ လစဉ် စစ်တမ်း ကောက်ပြီး ပြုလုပ်ခဲ့တဲ့ ဒီလေ့လာတွေ့ရှိ ချက်မှာ ဥရောပ စီးပွားရေးဟာ အရှိန်ကောင်းကောင်းနဲ့ ဆက်လက် အားနည်း လာနေ တယ်လို့ ဆိုပါတယ်။

ဂျာမာဏီ နိုင်ငံမှာ ဆိုရင် ကုန်ထုတ်လုပ်မှု အပိုင်းမှာ သုံးနှစ်နီးပါး အတွင်း စီးပွားရေးကျ ဆင်းမှုဟာ အမြန်ဆုံးနှုန်းနဲ့ ကျဆင်းခဲ့တယ်လို့ ကိန်းဂဏန်တွေက ဖေါ်ပြနေပါတယ်။

စီးပွားရေး အားကောင်းလားရေး ဘယ်လို့ ဆောင်ရွက်ကြမယ် ဆိုတာနဲ့ ပတ်သက်ပြီး အီးယူ ဥရောပ သမဂ္ဂ ခေါင်းဆောင်တွေ ဘရပ်ဆဲလ်မြို့မှာ အစည်းအဝေး ပြီးဆုံးသွားပြီး နာရီပိုင်း အကြာမှာပဲ အခုလို ကိန်းဂဏန်း တွေကို ထုတ်ပြန်ခဲ့တာ ဖြစ်ပါတယ်။

အီးယူ ဥက္ကဌ Herman van Rompuy က အီးယူစီးပွားရေးနဲ့ ပတ်သက်ပြီး အဓိက အချက်သုံးချက်ကို အခြေခံ လုပ်ဆောင်သွားမှာ ဖြစ်တယ်လို့ ပြောပါတယ်။

အဲဒါတွေကတော့ ပထမအနေနဲ့ အီးယူမူဝါဒတွေကို အပြည့်အဝ လက်ခံအောင် စည်းရုံးဖို့၊ ဒုတိယကတော့ စီးပွားရေးနဲ့ ရင်းနှီးမြှုပ်နှံမှု အပိုင်းတွေမှာ ပိုမို ကြိုးပမ်း ဆောင်ရွက်ဖို့နဲ့ နောက်ဆုံးအချက်ကတော့ အလုပ်အကိုင် ဖန်တီးပေးရေးဖြစ်တယ်လို့ သူကပြောပါတယ်။

ရန်ကုန်မှာ အဖမ်းအဆီးမရှိပေမယ့် တခြား ဒေသတွေမှာ ခေါ်ယူ စစ်ဆေးမှုတွေရှိလျှပ်စစ်မီး ပုံမှန်ရရေး ဆက်လက် ဆန္ဒပြ

လျှပ်စစ်မီး ပုံမှန်ရရှိရေး အတွက် ရန်ကုန် ဆူးလေဘုရားမှာ လူတရာလောက်ဟာ တတိယမြောက်ည အဖြစ် ဖယောင်းတိုင်တွေ ထွန်းပြီး ဆန္ဒပြဖေါ်ထုတ် ခဲ့ကြပါတယ်။ တာဝန်ရှိသူ လုံခြုံရေး တွေက အရင်ညတွေ လိုပဲ ထိန်းထိန်းသိမ်းသိမ်း နဲ့ တားဆီး ဆောက်ရွက်ခဲ့ သလို၊ မီဒီယာတွေ ကလည်း လာရောက် သတင်း ယူခဲ့ကြပါတယ်။

လျှပ်စစ်မီး ပုံမှန်ရရှိရေး တောင်းဆို ဆန္ဒပြခဲ့တဲ့ ပြည်မြို့က တက်ကြွလှုပ်ရှားသူတွေကိုတော့ ကြာသပတေးနေ့ မနက်မှာ နယ်မြေခံ ရဲတပ်ဖွဲ့က ရိုက်နှက်ပြီး၊ ဆန္ဒပြသူတွေထဲက ၆ ယောက်ကို ဖမ်းဆီးခဲ့ပါတယ်။

ဖမ်းပြီးတဲ့နောက် သူတို့ကို ပြည် ထောင်ကြီးချုပ်ကို တခါတည်း ပို့လိုက်တဲ့အတွက် ဒေသခံ လူ ၁ ထောင်နီးပါးက ပြည် ထောင်ရှေ့မှာ စုဝေးဆန္ဒပြခဲ့ကြပါတယ်။ ဒီလို ဆန္ဒပြတာကြောင့် ဒေသခံအာဏာပိုင်က ဖမ်းထားသူ ၆ယောက်ကို အာမခံပေးပြီး ပြန်လွှတ်လိုက်ပေမယ့် အခွင့် မရှိဘဲ စုဝေးဆန္ဒပြမှုနဲ့ တရားစွဲ လိုက်တယ်လို့သိရပါတယ်။

တရားစွဲခံရတဲ့ ၆ ယောက်ကတော့ ကိုကျော်ဆွေ၊ ကိုဝင်းလှိုင်၊ ကိုဇော်ထွန်း၊ ကိုအောင်မျိုးကျော်၊ ကိုကို နဲ့ မဂျူးဂျူးတို့ ဖြစ်တယ်လို့သိရပါတယ်။

အဖမ်းဆီးခံခဲ့ရတဲ့ ဒီ ၆ ဦးကနေ သူတို့ကို ရိုက်နှက်သူတွေနဲ့ မတရား ဖမ်းဆီးသူတွေကို၊ အရေးယူပေးဖို့ ရဲစခန်းမှာ အမှုဖွင့်တဲ့အခါ ရဲစခန်းက အမှုဖွင့်မပေးဘဲ မှတ်တမ်း အနေနဲ့ပဲ ယူထား လိုက်တာကြောင့် တရားရုံးမှာ ဦးတိုက် လျှောက်ထား တိုင်ကြားရမယ်လို့ ရှေ့နေ ဦးမြင့်အေးက ပြောပါတယ်။

မန္တလေးမှာလည်း လျှပ်စစ်မီးရရှိရေး တောင်းဆိုခဲ့ကြတာနဲ့ ပတ်သက်ပြီး လူ ၂၀ နီးပါးကို ကြာသပတေးနေ့မှာ ခေါ်ယူ စစ်ဆေးခဲ့တယ်လို့ သိရပါတယ်။

ကြာသပတေး မနက်က မန္တလေး လမ်း ၇၀ ၂၆ လမ်းကျုံးထောင့်မှာ ပြည်သူတွေ လက်ရှိ ခံစားနေရတဲ့ လျှပ်စစ်မီး အခြေအနေကို သရုပ်ဖေါ် ပြသခဲ့တဲ့ မလေးရှား ပညာရှင် ၅ ယောက် အပါအဝင် ပညာရှင် ၁၁ ဦးကို အထူးသတင်း တပ်ဖွဲ့က ခေါ်ယူမေးမြန်းပြီးနောက် ပြန်လွှတ် ပေးခဲ့ပါတယ်။

ညပိုင်း ဆန္ဒထုတ်ဖေါ်တဲ့ထဲမှာ ပါဝင်တဲ့ အန်အယ်လ်ဒီ ပါတီဝင် ဦးတင့်ဆွေ အပါအဝင် ၆ ဦးကိုလည်း အထူးသတင်း တပ်ဖွဲ့က ခေါ်ယူ မေးမြန်းခဲ့သေးတယ်လို့ စစ်ဆေးခံရသူတွေက ပြောပါတယ်။

အန္ဒမန် ကျွန်းတွေကို ကျူးကျော် ဝင်ရင် အရေးယူမြန်မာတံငါ တထောင်လောက် အိန္ဒိယဖမ်းထား

အိန္ဒိယ သမုဒ္ဒရာ ထဲက အန္ဒမန် (ကပ္ပလီ) ကျွန်းတွေကို ကျူးကျော် ဝင်လာသူ တွေကို အပြင်းအထန် အရေးယူမယ်လို့ ပြီးခဲ့တဲ့ ရက်ပိုင်းက အိန္ဒိယ-မြန်မာ နယ်စပ် ကော်မတီ အစည်းအဝေးမှာ အိန္ဒိယ ဘက်က သတိပေး လိုက်ပါတယ်။

အဲဒိဘက်က လူမနေတဲ့ ကျွန်းတွေမှာ ဧရာဝတီ တိုင်း ဖျာပုံ ဟိုင်းကြီးကျွန်း ဘက်က သူတွေက ပင်လယ်မျော့နဲ့ ခရု သွားငုပ် ကြပါတယ်။

ပင်လယ်မျှော့ကို မျိုးတုံးမှာ စိုးလို့ အိန္ဒိယက ကာကွယ် စောင့်ရှောက် ထားတဲ့အတွက် မိခဲ့ရင် ပြစ်ဒဏ် ပြင်းပြင်း ချ နိုင်ပါတယ်။

အိန္ဒိယ ရေတပ် ကလဲ ကင်းလှည့် သင်္ဘောတွေ ရဟတ်ယာဉ် တွေနဲ့ အထူး ကြပ်မတ် စောင့်ရှောက် နေပါတယ်။

လောလောဆယ် အန္ဒမန် ကျွန်း ပို့ဘလဲ ထောင်မှာ အဖမ်း ခံနေရသူ တထောင်နီးပါး ရှိတယ် ဆိုပါတယ်။

ဒီကား ပြည်တွင်းမှာ ပြရင် ရန်စတွေ ထပ်ပွားမှာ စိုးပါကစ္စတန်က အက်ဆက် ပက်ခံရသူတွေ ဒုက္ခ

အက်ဆစ် အပက်ခံ ရတဲ့ အမျိုးသမီး တွေ အကြောင်း ရိုက်ကူးတဲ့ အော်စကာ ဆုရ မော်ကွန်းကားမှာ ပါဝင်ခဲ့တဲ့ ပါကစ္စတန်သူ တစုက အဲဒိကား ပါကစ္စတန် မှာ ပြသခွင့် ပိတ်ပေးဖို့ ကြိုးပမ်း နေကြပါတယ်။

ဒီကား ပြည်တွင်းမှာ ပြရင် ရန်စတွေ ထပ်ပွားမှာ စိုးတဲ့ အတွက် အမျိုးသမီး တချို့က မျက်နှာ အဖတ်ဆယ်ခြင်း ရုပ်ရှင်ကား ထုတ်လုပ်သူကို ရှေ့နေ ရှေ့ရပ်နဲ့ နို့တစ် ပေးထားကြောင်း သိရပါတယ်။

ဒီကားကို တကမ္ဘာလုံး ကြိုက်တဲ့ နေရာ ပြခွင့် ပြုကြောင်း ဒီ အမျိုးသမီးတွေ လက်မှတ်ထိုး ထားတယ်လို့ ဒါရိုက်တာ ရှာမန် အိုဘိတ် ချီနွိုင်က ဆိုပါတယ်။

ပါကစ္စတန်မှာ အက်ဆစ် ပက်ခံရမှု တွေ ဖြစ်လေ့ရှိပြီး ယောက်ျား လုပ်သူ ကိုယ်နှိုက်က အမျိုးသမီး တွေကို တိုက်ခိုက်တာ လည်း ရှိတတ်ပါတယ်။

ဥရောပ စတော့ ဈေးကွက်တွေ ထပ်မံကျဆင်းယူရိုအရေး အီးယူ ဆွေးနွေးပြန်

ယူရိုငွေကြေး ပြဿနာ အတွက် ဥရောပ သမဂ္ဂ ခေါင်းဆောင်တွေ ဘရပ်ဆဲမှာ စုဝေး ရောက်ရှိ နေကြပါတယ်။

ပြင်သစ် သမ္မတသစ် ဖရန်ဆွာ အော်လန်း ကတော့ နည်းလမ်းသစ် သုံးဖို့ အားပေး နေပါတယ်။

ဂျာမနီက သတ်မှတ် ထားတဲ့ ချိုးခြံရေး ဆေးခါးကြီးထက် ဖွံ့ဖြိုးရေးဘက် ပို အလေးထားကြဖို့ သူ ဆော်သြလိမ့်မယ် ထင်ပါတယ်။

အချိန် ဖြုန်းနေလို့ မရတော့ဘူးလို့ အလွတ်သဘော ဆွေးနွေးပွဲ မှာ သမ္မတ အောလန်းက ဆိုပါတယ်။

ဥရောပ စတော့ ဈေးကွက်တွေမှာ ၂ ရာခိုင်နှုန်း ထပ်မံကျဆင်း ဈေးပိတ်ခဲ့ပြီး ယူရိုက ဒေါ်လာထက် တန်ဖိုး ပိုလျော့ နေပြီ ဖြစ်ပါတယ်။

ဂျာမနီ ဝန်ကြီးချုပ် အန်ဂလာ မာကဲကတော့ ယူရို ငွေချေးစာချုပ် ထားမယ့် စနစ်ကို ကန့်ကွက်ကြောင်း ထပ်မံ ပြောကြား ခဲ့ပါတယ်။

သမ္မတ ဦးသိန်းစိန်နဲ့ စီးပွားရေး အကြံပေး ပုဂ္ဂိုလ် ဒေါက်တာ ဦးမြင့်ဒေါက်တာ ဦးမြင့်ရဲ့ အိတ်ဖွင့်ပေးစာအပေါ် သတင်းစာရှင်းပွဲလုပ်

ရန်ကုန် တက္ကသိုလ်ရဲ့ အစဉ်အလာ ဂုဏ်သိက္ခာ ပြန်လည် တည်ဆောက်ရေး ပြည်သူသို့ အိတ်ဖွင့် ပေးစာ ဆိုတဲ့ စာတစောင်ကို မေလ ၁၉ရက် နေ့စွဲနဲ့ သမ္မတရဲ့ စီးပွားရေး အကြံပေး ပုဂ္ဂိုလ် ဦးမြင့် ရေးသား တင်ပြခဲ့တာနဲ့ ပတ်သက်လို့ ကြာသပတေးနေ့ မနက်က သမ္မတ အကြံပေး အဖွဲ့က သတင်းစာ ရှင်းလင်းပွဲ လုပ်ခဲ့ပါတယ်။

နိုင်ငံရေး အကြံပေးပုဂ္ဂိုလ်တွေ ဖြစ်တဲ့ ဦးကိုကိုလှိုင်နဲ့ ဒေါက်တာ နေဇင်လတ်တို့က ဒေါက်တာ ဦးမြင့်ရဲ့ အိတ်ဖွင့် ပေးစာပါ အချက်တွေဟာ သမ္မတရုံးရဲ့ သဘောထားတွေ မဟုတ်ကြောင်းကို အချက် ၁၃ချက်ပါ ထုတ်ပြန်ချက်နဲ့ သတင်းထောက်တွေကို ရှင်းလင်း ပြောပြသွားခဲ့ပါတယ်။

ဒါပေမယ့် ရန်ကုန် တက္ကသိုလ်ရဲ့ အစဉ်အလာ ဂုဏ်သိက္ခာ ပြန်လည်ထွန်းပြောင်လာစေရေးကို ဒေါက်တာဦးမြင့်နဲ့ ကျောင်းသား ကျောင်းသူ အဟောင်း အသစ်တွေ၊ ဆရာ ဆရာမ အဟောင်း အသစ်တွေ လိုလားတောင့်တ ကြသလို အစိုးရကလည်း အထူးလိုလား ဆန္ဒရှိကြောင်းနဲ့ ရန်ကုန် တက္ကသိုလ်သာမက တစ်နိုင်ငံလုံးမှာရှိတဲ့ တက္ကသိုလ်အားလုံးကို နိုင်ငံတကာအဆင့်နဲ့ ရင်ဘောင်တန်းနိုင်တဲ့တက္ကသိုလ်တွေ ဖြစ်လာစေလိုတဲ့ ဆန္ဒရှိကြောင်း အဲဒီ ထုတ်ပြန်ချက်ထဲမှာ ဖေါ်ပြထားပါတယ်။

ဒေါက်တာဦးမြင့်ရဲ့ အိတ်ဖွင့်ပေးစာဟာ သူ့ပုဂ္ဂလိက ဆန္ဒအလျောက် ရေးသားခဲ့တာသာ ဖြစ်ပြီး နိုင်ငံတော် သမ္မတရုံးအနေနဲ့ ကြိုတင် သိရှိခြင်း မရှိသလို နိုင်ငံတော်သမ္မတရုံးရဲ့ သဘောထား တစ်စုံတရာ ထင်ဟပ်ခြင်းလည်း မရှိဘူးလို့ ဖော်ပြထားပါတယ်။

အဲဒီ သတင်းစာ ရှင်းလင်းပွဲမှာ ဒေါက်တာ ဦးမြင့်ရဲ့ အိတ်ဖွင့်ပေးစာအကြောင်း အဓိကထား ရှင်းလင်း ပြောသွားတာ ဖြစ်ပေမယ့် ခုရက်ပိုင်းအတွင်း မြန်မာနိုင်ငံတဝှမ်းမှာ ဖြစ်ပွားနေတဲ့ လျှပ်စစ်မီး ရရေး တောင်းဆို ဆန္ဒပြမှုတွေနဲ့ ပတ်သက်လို့ သတင်းထောက်တွေရဲ့ အမေးတွေ ကို ပြန်လည် ဖြေကြားစဉ်မှာ သမ္မတ အကြံပေးပုဂ္ဂိုလ် ဦးကိုကိုလှိုင်က မကြာခင် မိုးစရွာ တော့မှာမို့ လျှပ်စစ်မီးကိစ္စ ပြေလည်သွားတော့မှာ ဖြစ်ကြောင်း၊ လောလောဆယ်မှာ ပြည်သူတွေအနေနဲ့ ဖယောင်းတိုင်ထွန်းပြီး လျှပ်စစ်မီး ခြိုးခြံသင့်သလို ဆန္ဒပြသူတွေအနေနဲ့ လည်း ဥပဒေနဲ့ အညီ ဆန္ဒပြသင့်ကြောင်း ပြောသွားပါတယ်။

အိတ်ဖွင့်ပေးစာ ရေးသားခဲ့သူ ဒေါက်တာဦးမြင့် ကိုယ်တိုင်ကတော့ နေပြည်တော်မှာ ရောက်နေတဲ့အတွက် အဲဒီ သတင်းစာ ရှင်းလင်းပွဲကို မတက်ရောက်နိုင်ခဲ့ဘူးလို့ သိရပါတယ်။

မြန်မာ့ လူ့အခွင့်အရေး အခြေအနေပိုဆိုးနေ

Amnesty International နိုင်ငံတကာ လွတ်ငြိမ်းချမ်းသာခွင့် အဖွဲ့ကြီးက ကမ္ဘာ့နိုင်ငံ တွေရဲ့ လူ့အခွင့် အရေးနဲ့ ပတ်သက်လို့ ၂၀၁၂ ခုနှစ်ထွက် အစီရင် ခံစာထဲမှာ မြန်မာနိုင်ငံနဲ့ အတူ လူ့အခွင့် အရေး ချိုးဖောက်တဲ့ နိုင်ငံတွေ အကြောင်း ကို အသေးစိတ် ထုတ်ဖော်ထား ရာမှာ မြန်မာနိုင်ငံမှာတော့ ချိုးဖောက်မှုတွေက ပိုတောင်ဆိုးလာသေး တယ်လို့ ပြောထား ပါတယ်။

အထူးသဖြင့် သူတို့ ရည်ညွှန်းပြောတာကတော့ ကချင်ပြည်နယ် အပါအဝင် တိုင်းရင်းသား လက်နက်ကိုင်တွေနဲ့ တိုက်ပွဲတွေ ဖြစ်တဲ့နေရာတွေမှာ ရာဇဝတ်မှုတွေကို ကျူးလွန်နေပြီး၊ စစ်သားတွေက အရပ်သားတွေအပေါ် လိင်မှုဆိုင်ရာ မတော်မတရားမှုတွေလုပ်လို့ လူ့အခွင့် အရေးချိုးဖောက်ခဲ့တယ်လို့ စွပ်စွဲထားပါတယ်။

နောက်ပြီး စစ်ဖြစ်လို့ ထွက်ပြေးနေရတဲ့ ဒုက္ခသည်တွေဆီ အထောက်အပံ့ အကူအညီတွေ ပေးသူတွေ ရှိခဲ့ရင်တောင်မှာ အာဏာပိုင်တွေက ပိတ်ဆို့ဟန့်တားမှုတွေ ရှိခဲ့တယ်လို့လည်း ပြောထားပါတယ်။

မြန်မာနိုင်ငံမှာ ပြီးခဲ့တဲ့တနှစ် အတွင်း နိုင်ငံရေးနဲ့ စီးပွားရေးဘက် ပြုပြင်ပြောင်းလဲရေးတွေ ရှိခဲ့ပေမယ့်လို့ လူ့အခွင့် အရေး ချိုးဖောက်မှုတွေနဲ့ နိုင်ငံတကာ လူ့အခွင့်အရေး ဆိုင်ရာ ဥပဒေတွေကို တိုင်းရင်းသားတွေနေတဲ့ အရပ်မှာ ချိုးဖောက်မှုတွေက တိုးလို့လာတယ် လို့လည်း သူတို့က ပြောပါတယ်။

နှစ်ပေါင်းများစွာ ငြိမ်းချမ်းနေခဲ့တဲ့ ကချင်ပြည်နယ်မှာ မနှစ်က စလို့ အစိုးရတပ်တွေနဲ့ ကချင်လွတ်မြောက်ရေးတပ် ကေအိုင်အေ အကြား တိုက်ပွဲတွေ ဖြစ်ပြီးနောက်မှာ တရားမဲ့ သတ်ဖြတ်မှုတွေ၊ ပစ်ခတ် တိုက်မှုတွေကြောင့် ကလေး သူငယ်တွေ သေဆုံးမှုတွေ၊ အတင်း အကျပ် လုပ်အားပေး ခိုင်းစေတာတွေနဲ့ ဒေသခံ တွေရဲ့ အိမ်မြေနဲ့ ပိုင်ဆိုင်မှုတွေကို ဖျက်စီး တာတွေ လုပ်ခဲ့တယ်လို့ Amnesty International က ပြောပါတယ်။

ရှမ်းပြည်နယ်မှာလည်း အလားတူ လူ့အခွင့် အရေး ချိုးဖောက်မှုတွေ လုပ်ခဲ့တယ်လို့ နိုင်ငံ တကာ လွတ်ငြိမ်းချမ်းသာခွင့် အဖွဲ့ကြီးက ဆိုပါတယ်။

အာရှ ပစိဖိတ် လူ့အခွင့်အရေး အခြေအနေဆိုး

By VOA (မြန်မာပိုင်း)

• ၂၀၁၁ ခုနှစ်အတွင်း အာရှ ပစိဖိတ် ဒေသအတွင်း အစိုးရတချို့ဟာသူတို့ရဲ့ အာဏာကို ဆက်လက် ချုပ်ကိုင်ထားနိုင်ဖို့ နိုင်ငံရေး အတိုက်အခံတွေ အပေါ် နှိပ်ကွပ်မှုတွေ ပိုပြီး များလာတယ်လို့ ကမ္ဘာတဝန်း လူ့အခွင့်အရေး အခြေအနေတွေကို လေ့လာထောက်ပြနေတဲ့ Amnesty International အဖွဲ့ကြီးက ပြောလိုက်ပါတယ်။အာရပ်နိုင်ငံတွေမှာ နိုင်ငံရေး ပြုပြင်ပြောင်းလဲရေးနဲ့ အခွင့်အရေးတွေအတွက် ပြည်သူတွေ အုံကြွမှု ဆန္ဒပြ တောင်းဆိုကြတဲ့အပေါ် အာရှဒေသတွေက လူ့အခွင့်အရေး လှုပ်ရှားသူတွေ သတင်းထောက်တွေက အားကျခဲ့ကြတာမို့ အခုလို အစိုးရတွေဖက်က နှိပ်ကွပ်မှုတွေ တိုးလာတာလို့ ဒီကနေ့ ကြာသပတေးနေ့ ထုတ်ပြန်မယ့် AmnestyInternational ရဲ့  နှစ်ပတ်လည် အစီရင်ခံစာထဲမှာ ဖေါ်ပြထားပါတယ်။
• အခွင့်အရေး တောင်းဆိုကြသူတွေအပေါ် အာဏာ ချုပ်ကိုင်ထားချင်တဲ့ အစိုးရတွေက လိုအပ်တာထက်ကို ပြင်းပြင်းထန်ထန် တုံ့ပြန်ခဲ့ကြတယ်လို့ အစီရင်ခံစာက ဆိုပါတယ်။ 

တရုတ်နိုင်ငံမှာ အစိုးရအပေါ် ဝေဖန်သူ ဒါဇင်ပေါင်းများစွာကို ဖမ်းဆီး၊ နှောင့်ယှက်နေတာဟာ ၁၉၈၉ ခုနှစ် တီယန်နင်မင်ရင်ပြင် နှိမ်နှင်းမှုထဲကဆိုရင် အဆိုးဆုံး နိုင်ငံရေး နှိပ်ကွပ်မှုဖြစ်တယ်လို့ Amnesty အဖွဲ့က ဝေဖန်ပါတယ်။

မြောက်ကိုရီးယား နိုင်ငံမှာဆိုရင်လဲ အရင်ထဲက အင်မတန်ကို ဆိုးဝါးနေတဲ့ လူ့အခွင့်အရေး အခြေအနေတွေဟာ သမ္မတ Kim Jong Un တက်လာပြီး နောက်မှာလဲ တိုးတက်မှု ရှိမလာဘူးလို့ အစီရင်ခံစာထဲမှာ ဖေါ်ပြထားပါတယ်။ အစိုးရရဲ့ သဘောထား အတွေးအခေါ်နဲ့ မကိုက်ညီသူတွေဟာ မြောက်ကိုရီးယား နိုင်ငံတဝန်းမှာရှိတဲ့ နိုင်ငံရေး အကျဉ်းစခန်း အများအပြားမှာ အကျဉ်း ချခံရနိုင်တယ် ဆိုတာကို အစီရင်ခံစာက ထောက်ပြထားပါတယ်။

မြန်မာနိုင်ငံနဲ့ ဗီယက်နမ် နိုင်ငံတွေမှာတော့ အစိုးရကို ဝေဖန် ဆန့်ကျင်သူတွေကို ထောက်လှမ်းရေးဌာနက အနောင့်အယှက်ပေးတာ၊ နှုတ်ပိတ်တာမျိုးတွေ လုပ်နေတယ်လို့ ပြောပါတယ်။

ထိုင်းနိုင်ငံမှာ ဘုရင်စနစ်ကိုစော်ကားမှု ဥပဒေအရ အရေးယူမှုတွေ ရပ်သွားအောင် ထိုင်းဝန်ကြီးချုပ်သစ် ယင်းလပ်ခ် ရှင်န၀ပ်ထရာ (Yinluck Shinawatra) က မလုပ်နိုင်တဲ့ အပေါ်မှာလဲ Amnesty International လူ့အခွင့်အရေး အဖွဲ့ကြီးရဲ့ နှစ်ပါတ်လည် အစီရင်ခံစာထဲမှာ ဖေါ်ပြထားပါတယ်။

ပြည်သူတွေ လျှပ်စစ်ခြွေတာဖို့ သမ္မတ အကြံပေး တိုက်တွန်း

By သင်းသီရိ

• မြန်မာနိုင်ငံမှာ အိမ်တွေ ဖယောင်းတိုင်ထွန်းပြီး လျှပ်စစ်မီး ပိတ်ထားရင် ပြဿနာ အဆင်ပြေသွားမယ်လို့ နိုင်ငံတော် သမ္မတအကြံပေး တဦးက ပြောပါတယ်။ အခုရက်ပိုင်းတွေထဲမှာ မြန်မာနိုင်ငံမှာ အလုပ်သမားလစာတိုးရေးနဲ့ လျပ်စစ်မီး အချိန်အပြည့်အ၀ ရရှိရေးတွေအတွက် ဆန္ဒပြ တောင်းဆိုတာတွေနဲ့ ပတ်သက်တဲ့ သတင်းထောက်တွေရဲ့ မေးခွန်းထဲ အခုလို ဖြေခဲ့တာဖြစ်ပြီး ဆန္ဒပြတာတွေ မလုပ်ပဲ သက်ဆိုင်ရာ အဖွဲ့အစည်းတွေနဲ့ အချင်းချင်း ပြေလည်အောင် ညှိနှိုင်းတာဟာအကောင်းဆုံးပဲလို့ သမ္မတ အကြံပေး ဦးကိုကိုလှိုင်က ပြောခဲ့ပါတယ်။ ရန်ကုန်က သမ္မတ အကြံပေးရုံးမှာ ဒီကနေ့ လုပ်ခဲ့တဲ့ သတင်းစာရှင်းလင်းပွဲ အကြောင်းကိုတော့ မသင်းသီရိက တင်ပြပေးထားပါတယ်။

မေလ ၂၄ ရက် ကြာသာပတေးနေ့က ရန်ကုန်မှာရှိတဲ့ သမ္မတအကြံပေးရုံးမှာ နိုင်ငံတော်သမ္မတရုံးရဲ့ ညွှန်ကြားချက်အရ ဆိုပြီး  ဦးကိုကိုလှိုင်နဲ့အတူ နောက်ထပ် သမ္မတ အကြံပေးအဖွဲ့ဝင် တချို့နဲ့ သတင်းစာရှင်းလင်းပွဲ တခု လုပ်ခဲ့တာပါ။ 

အဲဒီမှာ လတ်တလော မြန်မာနိုင်ငံတ၀ှမ်း လျပ်စစ်မီး အချိန်ပြည့်ရရေး ဆန္ဒဖော်ထုတ်ပွဲတွေ ဖြစ်နေတာမို့ နိုင်ငံတော်အနေနဲ့ ဒီပြဿနာကို ဘယ်လို ဖြေရှင်းပေးဖို့ စီစဉ်ထားပါသလဲ ဆိုတဲ့ သတင်းထောက်တွေရဲ့ အမေးကို ဦးကိုကိုလှိုင်ကတော့ လျပ်စစ်မီးတွေပိတ်ကာ ဖယောင်းတိုင်ထွန်းပြီး လျပ်စစ်မီးခြွေတာရင် ပြဿနာအားလုံး ပြေလည်သွားမယ်လို့ အခုလိုဖြေခဲ့ပါတယ်။

"တချို့နေရာတွေကျတော့ အခက်အခဲ ရှိတာတွေ ရှိတယ်။ ဥပမာဆိုပါတော့ - အခု လျှပ်စစ်မီးကိစ္စပဲ ဆိုပါစို့။ ကျနော် ဥပမာလေး တခု ပြောပြမယ်။ ဂျပန်မှာ နြူကလီးယား Facility တွေ ပျက်သွားတယ်။ အဲဒါနဲ့ ကြောက်လန့်ပြီးတော့ နြူကလီးယား Plant တွေ အကုန်လုံး ပိတ်လိုက်ရတယ်။ အခု ၄၀ ကျော်မှာ ၂ ခုပဲ လည်ပတ်နေတယ်။ ဒါပေမယ့် ဂျပန်နိုင်ငံမှာ မီးမပြတ်ဘူး။ ဘာကြောင့်လည်းဆိုတော့ ပြည်သူလူထုက အကုန်လုံး ခြိုးခြံ ခြွေတာတယ်။ အိမ်သာမှာ ဖင်ထိုင်တဲ့နေရာမှာ အပူပေးတဲ့ စံနစ်ကအစ သူတို့ မသုံးဘူး။ အအေးခံပြီးတော့ အိမ်သာ သွားတယ်။ မလိုအပ်တဲ့နေရာက မီးတွေ အကုန်ဖြတ်တယ်။ အကုန်လုံး ခြွေတာတယ်။ အဲဒီအခါကျတော့ Plant ၄၀ မှာ ၂ ခုပဲ လည်ပတ်နေတာတောင်မှ မီးမပြတ်ဘူး။ အဲဒီတော့ ကျနော်တို့ကလည်း၊ ကျနော်ပြောချင်တာက - တကယ့် စေတနာနဲ့ ပြောချင်တာ၊ ဖရောင်းတိုင်တွေကို ကိုယ့်အိမ်မှာ ကိုယ်ထွန်းပြီး မီးလေး ပိတ်ထားလိုက်ကြပါ။ အားလုံး အဆင်ပြေသွားပါမယ်။"

ဒါ့အပြင်လည်း အလုပ်သမားဆန္ဒပြမှုတွေနဲ့ ပတ်သက်လို့ သူအမြင်ကို ရှင်းပြရာမှာတော့ ဆန္ဒပြ တောင်းဆိုတာတွေမလုပ်ပဲ သက်ဆိုင်ရာနဲ့ ညှိနှိုင်းရင် ပိုကောင်းမယ်လို့ မြင်ကြောင်းကိုလည်းပြောပါတယ်။

"ဘာမှ ဆန္ဒမပြပဲနဲ့ အေးအေးချမ်းချမ်း ပြဿနာတွေဟာ အချင်းချင်း၊ သက်ဆိုင်တဲ့ အဖွဲ့အချင်းချင်းထဲမှာ ညှိနှိုင်းပြီးတော့ ပြေလည်သွားရင် အကောင်းဆုံးပေါ့။ ဥပမာဆိုရင် အလုပ်ရှင်နဲ့ အလုပ်သမားကြား၊ အချင်းချင်းညှိပြီးတော့ ဘာမှ မဖြစ်တဲ့အချိန်မှာ ပြေလည်သွားရင် အလုပ်လည်း မပိတ်ရဘူး၊ သူတို့ လစာလည်း မထိခိုက်ဘူးပေါ့။ အဓိကကတော့ ဘာလဲဆိုတော့ တဖက်နဲ့ တဖက်က အပေးအယူမျှဖို့၊ နားလည်မှုရှိဖို့က အရေးကြီးဆုံးပဲ။"

နောက်တခါ ဒုတိယ သမ္မတ သီဟသူရ ဦးတင်အောင်မြင့်ဦး ရာထူးကနေ နှုတ်ဖို့ စာတင်ထားတဲ့ သတင်းနဲ့ပတ်သက်လို့ သမ္မတအကြံပေး တယောက်အနေနဲ့ ဒီသတင်းကို အတည်ပြု နိုင်ပါသလားဆိုတဲ့ အမေးကိုတော့ ဦးကိုကိုလှိုင်က - 

"ကျနော်လည်း အမှန် ပြောရလို့ရှိရင် ရန်ကုန်နဲ့ ဗမာပြည်မှာနေတာထက်၊ အပြင်မှာ ရောက်နေတာက များတယ်။ ဒီတလောအတွင်းမှာ။ ဒီကိစ္စတွေတောင်မှ ကျနော်လည်းပဲ အွန်လိုင်းမှာပဲ သိတဲ့ဘ၀ ဖြစ်နေတယ်။ တမြန်မနေ့က ကျနော် ပြန်ရောက်လာတယ်၊ ဒီကနေ့ ခနနေရင် ကျနော် လေယာဉ်ပျံကွင်း ပြန်ဆင်းရမယ်။ရေရေရာရာ ကျနော် ဘာမှ မသိပါဘူး။ ဒါပေမယ့် ပြောရရင်တော့ ၃ ရက်နေ့က ထွက်လာတဲ့ အမိန့်အရ ဒုသမ္မတကြီးက ငြိမ်းချမ်းရေး အဖွဲ့ထဲမှာ ပါနေတယ် ဆိုလို့ရှိရင် ဒါ တရားဝင် Position အရတော့ ရှိနေဦးမယ်ဆိုတာ ရှင်းပါတယ်။ ဆိုတော့ ဒုသမ္မတ တယောက် နှုတ်ထွက်တယ်ဆိုတာ ပေါ့ပေါ့ သေးသေးကိစ္စ မဟုတ်ပါဘူး။ ဖြစ်လာတာနဲ့ သူ့ဟာသူ တရားဝင် ပေါ်ပေါက်လာမယ့်ကိစ္စဖြစ်မယ်လို့ပဲ ကျနော် ထင်ပါတယ်။ ဒါမျိုးက ပုန်းလျှိုး ကွယ်လျှိုးလည်း လုပ်လို့ရတဲ့ ကိစ္စမျိုးမှ မဟုတ်ပဲ။ ဖြစ်လာတဲ့ အခါကျရင် တရားဝင် လုပ်ထုံးလုပ်နည်းနဲ့ ဖြစ်မှာပေါ့။ မဖြစ်သေးလို့ရှိရင်လည်း မဖြစ်ဘူးပေါ့။"

ဒီကနေ့ သတင်းထောက်တွေကို ခေါ်ယူပြီး ရှင်းပြရတဲ့ အဓိက အကြောင်းအရင်းကတော့ မေလ ၁၉ ရက်နေ့ မှာ သမ္မတရဲ့ စီးပွာရေးအကြံပေးတဦုးဖြစ်တဲ့ ဒေါက်တာဦးမြင့်ရဲ့ "ရန်ကုန်တက္ကသိုလ်ရဲ့အစဉ်အလာ ဂုဏ်သိက္ခာကို ပြန်လည် တည်ဆောက်ရေးအတွက် ပြည်သူသို့ အိတ်ဖွင့်ပေးစာ" ဆိုတာနဲ့ ပတ်သက်ပြီးတော့သတင်းထောက်တွေကို ရှင်းပြကြတာ ဖြစ်ပါတယ်။

ဒေါက်တာ ဦးမြင့်ဟာ သမ္မတရဲ့ အကြံပေးအဖွဲဝင်တဦး ဖြစ်ပေမယ့် ဒီစာဟာ ပုဂ္ဂိုလ်ရေး ခံစားမှုနဲ့ ဆန္ဒအရသာဖြစ်ပြီး သမ္မတ အကြံပေး အဖွဲ့နဲ့ရော နိုင်ငံတော် သမ္မရုံးနဲ့ပါ မပတ်သက်ဘူး ဆိုပြီးတော့ ဦးကိုကိုလှိုင်က ရှင်းပြခဲ့တာ ဖြစ်ပါတယ်။

ဒါ့အပြင် ရန်ကုန်တက္ကသိုလ်ပိုင် တင်းနစ်ကွင်းတွေဟာလည်း ၂၀၁၃ ခုနှစ် မြန်မာနိုင်ငံမှာ ကျင်းပမယ့် အရှေ့တောင်အာရှ အားကစားပြိုင်ပွဲများအတွက် ပုဂ္ဂလိက စီးပွားရေး လုပ်ငန်းရှင်များနဲ့ ပူးတွဲပြီးတော့ အဆင့်မြင့်ကွင်းတွေ အဖြစ်ပြုပြင်ဖို့သာ ဖြစ်ပြီးတော့ ပုဂ္ဂလိက လုပ်ငန်းရှင်တွေကို လွဲပေးလိုက်တာ မဟုတ်ဘူး ဆိုတာကိုလည်း သူ့ရဲ့ သတင်း စာရှင်းလင်းပွဲအတွင်းမှာ ထည့်သွင်း ပြောကြားသွားခဲ့ပါတယ်။

တခါ မြန်မာနိုင်ငံမှာ ပညာရေးနဲ့ ကျန်းမာရေး ကဏ္ဍတွေ မြင့်မားလာဖိူ့အတွက် နည်းပညာတက္ကသိုလ်တွေ အဆင့်အတန်း တိုးတက်လာဖို့ အိန္ဒိယနိုင်ငံနဲ့ ပူးပေါင်း ဆောင်ရွက်ဖို့ စီစဉ်ထားသလို တောင်ကိုရီးယား နိုင်ငံကလည်း ပညာရေးနဲ့ ကျန်းမာရေး ကဏ္ဍတွေမှာ ကူအညီပေးမယ် ဆိုတာတွေကို ပြောထားတယ်လို့လည်း ရှင်းပြသွားပါတယ်။

တခါ နိုင်ငံမှာ တိုင်းရင်းသား ပြဿနာတွေကို အမျိုးသား အဆင့်နဲ့ ဆောင်ရွက်နိုင်ဖို့အတွက် သမ္မတကြီး ကိုယ်တိုင် ဦးဆောင်ကာ နောက်ထပ် အဖွဲ့ဝင်တွေနဲ့ ဖွဲ့စည်း ဆောင်ရွက်နေတယ် ဆိုတာကိုလည်း သတင်းစာ ရှင်းလင်းပွဲအတွင်းမှာ ပြောသွားပါတယ်။

စက်ရုံအလုပ်သမားပြဿနာ မပြေလည်သေး

By ကိုကျော်ကျော်သိန်း

• လှိုင်သာယာစက်မှုဇုံက ဆက်တိုက်ဆန္ဒပြနေတဲ့ အလုပ်သမားတွေအနေနဲ့ တောင်းဆိုချက်တွေ မရသေးသလို နောက်ထပ် ဆန္ဒပြ အလုပ်သမားတွေလည်း တိုးလာနေပါတယ်။ အလုပ်သမားရေးရုံးက ကြားဝင် စေ့စပ်ပြီး ညှိနှိုင်းတာတချို့ ရှိခဲ့ပေမဲ့လည်း နှစ်ဘက်စလုံးက မလိုက်လျောနိုင်ကြသေးပါဘူး။ တချို့စက်ရုံတွေမှာတော့ ညှိနှိုင်းတာတွေ ဆက်လုပ်နေကြဆဲပါ။ အလုပ်သမားတွေရဲ့ ဆန္ဒပြပွဲ ဒီကနေ့ နောက်ဆုံး အခြေအနေတွေကို ဘန်ကောက်ကနေ စုံစမ်း မေးမြန်းထားတဲု ကိုကျော်ကျော်သိန်းက သတင်းပေးပို့ထားပါတယ်။

လွန်ခဲ့တဲ့ ဆယ်ရက်ကျော်ကတည်းကစပြီး ဆန္ဒပြခဲ့ကြတဲ့ စက်ရုံတွေအပါအ၀င် ပြီးခဲ့တဲ့ရက်ပိုင်းတွေက ဆန္ဒပြခဲ့တဲ့ စက်ရုံ ၆ ရုံစလုံးမှာ ဒီကနေ့အချိန်ထိ အလုပ်သမားတွေရဲ့ တောင်းဆိုချက်တွေ မရသေးပါဘူး။ အဲဒီကြားထဲမှာပဲ နောက်ထပ် ဆန္ဒပြ အလုပ်သမားတွေလည်း တိုးလာနေဆဲပါ။ ဗွီအိုအေက စုံစမ်း သိရှိရသလောက် လှိုင်သာယာစက်မှုဇုံတွေမှာ ထပ်တိုးလာတဲ့ ဆန္ဒပြစက်ရုံက အနည်းဆုံး နှစ်ရုံရှိပါတယ်။ အဲဒီထဲမှာတခုကတော့ မစ်စ်စတိုင် (Miss Style) ဆိုတဲ့ ဖိနပ်စက်ရုံဖြစ်ပါတယ်။ အဲဒီက ဆန္ဒပြ အလုပ်သမားတဦး ပြောပြတာက - 

"ကျနော်တို့က တောင်းဆိုတာ ၁၄ ချက် ရှိတယ်။ ၁၄ ချက်မှာ ကျန်တဲ့အချက်တွေက အဆင်ပြေပြီ။ ပိုက်ဆံမှာ အဆင်မပြေဘူး ဖြစ်နေတယ်။ ပိုက်ဆံ လစာတိုးဖို့မှာ အဆင်မပြေဘူး ဖြစ်နေတယ်။ ကျနော်တို့က လစာကို သုံးသောင်းအထိ တောင်းပါတယ်။ အခြေခံ လစာကြေးပဲ။ စက်ရုံဖက်က တပတ်လုံး အိုတီဆင်းမှ ၈,၁၀၀ ပဲတိုးပေးသေးပါတယ်။ အခု ကျနော်တို့ကတော့ လောလောဆယ်ကတော့ ဒီမှာပဲ ခေါင်းဆောင်တွေနဲ့ ညှိပြီးတော့၊ ဒိပြင် စက်ရုံတွေနဲ့ ညှိနေတယ်ပေါ့နော်။ ဘာမှတော့ မလုပ်သေးဘူး။ ဒီမှာ အေးအေးဆေးဆေး ငြိမ်းချမ်းစွာနဲ့ပဲ ဆန္ဒပြနေတယ်။ ကျနော်တို့ရဲ့ တောင်းဆိုချက်ကို ရတဲ့အထိ ကျနော်တို့ ကတော့ တောင်းဆိုသွားမှာပဲ။"

စက်မှုဇုံ ၅ က ငွေကံ့ကော် အထည်ချုပ် စက်ရုံမှာလည်း အလုပ်သမား ၅၀၀ ကျော် စက်ရုံအပြင်ထွက်ပြီး ဆန္ဒပြခဲ့ကြပေမဲ့ နောက်ပိုင်းမှာ အခြေအနေက ပြောင်းလဲသွားခဲ့ပြီး စက်ရုံဝင်းထဲမှာပဲ ဆက်ပြီး ဆန္ဒပြနေကြတယ်လို့ အဲဒီကိုရောက်သွားတဲ့ ၈၈ မျိုးဆက်ကျောင်းသားများအဖွဲ့က မသက်သက်အောင်က ပြောပြပါတယ်။ 

"မနက်ပိုင်းမှာ ဖြစ်သွားတာ။ ရဲတွေအများကြီး ရောက်လာတာဖြစ်တဲ့အတွက် ကလေးတွေက ကြောက်လန့်ပြီးတော့ စက်ရုံအတွင်းထဲ ပြန်ဝင်သွားတာ။ ကျမလာတဲ့ အချိန်မှာတော့ မတွေ့ဘူး တယောက်မှ။ အဓိကကလေ စက်ရုံမှူးက မလိမ့်တပတ်နဲ့ ပြန်ခေါ်သွားတာ။ အပြင်မှာနေပူတယ်၊ အထဲဝင်ပါပေါ့နော်။ နောက်ပြီးတော့ အဲဒီမှာ ရဲတွေရှိနေတာ ဖြစ်တဲ့အတွက်လည်း ကလေးတွေက အဲဒီမှာ ကြောက်လန့်ပြီး ပြန်ဝင်သွားကြတာ။ ဒါပေမယ့် အလုပ်တော့ မလုပ်ကြဘူး၊ စက်ရုံဝင်းရဲ့ စက်ရုံထဲမဟုတ်တဲ့ အပြင်မှာ။"

ဆန္ဒပြလာတာ ၁၁ ရက်ကြာလာပြီဖြစ်တဲ့ စံပယ်ပွင့်စက်ရုံဘက်မှာတော့ အလုပ်ရှင်နဲ့ အလုပ်သမား ကိုယ်စားလှယ်တွေအကြား အလုပ်သမားရေးရုံးက တာဝန်ရှိသူတချို့ ကြားခံပြီး ဆွေးနွေးခဲ့ကြပေမဲ့ ပြေလည်မှုမရသေးပါဘူး။ 

"အလုပ်သမားရုံးက ဦးခင်မောင်ကောင်းဆိုတာ ပါပါတယ်၊ သူနဲ့အတူ နောက်တယောက်လည်း ပါပါတယ်။ သူတို့လာပါတယ် ညီမတို့ဆီကို။ ညီမတို့ ဖုန်းဆက်လိုက်လို့ သူ့အထက်ကနေ ညွှန်ချုပ်က လွှတ်လိုက်လို့တဲ့၊ ဆင်းလာတာပါတဲ့။ သူတို့ညှိပေးတာလည်း ဒီအတိုင်းပဲ။ ညီမတို့ ဒီနေ့ဆို ၁၁ ရက် ရှိသွားပြီ။ ဘယ်သူတွေ ဘယ်လိုပဲလာလာ၊ ဘယ်လိုပဲညှိညှိ သူဌေးမက ညီမတို့ကို တသောင်းခွဲ တိုးပေးထားတယ်၊ အဲဒါပါပဲ။ အဲဒီထက် ဘာမှ အခွင့်အရေး မရပါဘူး။ ညီမတို့ဖက်ကလည်း ညီမတို့ လိုချင်တာကို တောင်းဆိုပါတယ်။ သူတို့က ဒီမှာပြောထားတာ အခြေခံလစာက ၅၆,၈၀၀ ပေါ့။ အဲဒါကို အခြေခံအဖြစ် ဆိုပြီးတော့ညီမတို့ကို သတ်မှတ်ထားတယ်။ ဒါပေမယ့် အဲဒီအထဲမှာ ညီမတို့ကို ချုပ်ပေးမယ့် အထည်ကြေးက ၃၂,၀၀၀ ကျော် ပါပါတယ်။ ၃၂,၀၀၀ က သူတို့ပေးထားတဲ့ သူတို့ပေးထားတဲ့ ရာခိုင်နှုန်း ၄,၈၀၀ ကိုပါ ရောပေါင်းထားတယ်။ အဲဒါကို သူတို့က  ၅၆,၈၀၀ ကို အခြေခံလို့ သတ်မှတ်ပြီးတော့ လူကြီးတွေကို ပြောပါတယ်။"

စံပယ်ပွင့်စက်ရုံ ဆန္ဒပြအလုပ်သမားတွေရဲ့ ကိုယ်စားလှယ်တဦးပါ။

အလုပ်သမားတွေ အနေနဲ့ ဒီကနေ့မှာ အချိန်မရွေး အလုပ်ပြန်ဝင်လာနိုင်ပြီး မနက်ဖြန်ဆိုရင်တော့  အလုပ်သမားတွေက မိမိသဘော ဆန္ဒအလျောက် အလုပ်ကနေ ထွက်သွားပြီလို့ သတ်မှတ်မယ်ဆိုပြီး ညှိနှိုင်းကြချိန်မှာ အလုပ်ရှင်ဘက်က ပြောခဲ့ပါတယ်။ အလုပ်သမားရေးရာရုံး တာဝန်ရှိသူတွေကတောင်မှ အဲဒီစကားဟာ သူတို့နဲ့ မဆိုင်ဘူးဆိုပြီး ပြောကြပါတယ်။ တချိန်ထဲမှာပဲ စက်ရုံက အလုပ်သမား အသစ်ခေါ်တဲ့ ကြေညာချက်ကို ကပ်ထားတယ်လို့ အလုပ်သမားတွေကပြောပါတယ်။

ဆန္ဒပြအလုပ်သမားတွေ ကြားထဲမှာတော့ ရက်ကြာလာတာနဲ့အမျှ မိသားစု စားဝတ်နေရေး အခက်တွေ့လာကြတဲ့အတွက် အတန်ငယ် စိတ်ပျက် အားလျော့တဲ့ လက္ခဏာမျိုးတွေ တွေ့လာနေရပြီလို့လည်း အလုပ်သမား ကိုယ်စားလှယ်က ပြောပါတယ်။

ကိုရီးယားလူမျိုးပိုင် Hi-mo High Art ဆံပင်တု စက်ရုံမှာလည်း မနေ့ကတည်းက နှစ်ဘက်ညှိနှိုင်းနေကြပြီး ဒီကနေ့မှာလည်း ဆက်ပြီး ညှိနှိုင်းဆဲပါ။ 

မေလ ၂၃ ရက် ဗုဒ္ဓဟူးနေ့မှာ စက်ရုံပိုင်ရှင် တိုင်ဝမ် တရုတ်အမျိုးသားက အလုပ်သမလေးတွေကို ကားပေါ်မှာ ရိုက်နှက်တာတွေ ဖြစ်ခဲ့တယ်ဆိုတဲ့ တိုးမြတ်အောင် စက်ရုံမှာတော့ ဒီကနေ့မနက်ပိုင်းမှာ အဲဒီပိုင်ရှင်ကို ရဲက လာခေါ်သွားပြီလို့ စက်ရုံအုပ်ချုပ်ရေးပိုင်းက ပြောပေမဲ့ အလုပ်သမားတွေက ကိုယ်တိုင် မမြင်လိုက်ရတဲ့ အတွက် မယုံကြပါဘူး။ 

"အခု မေးကြည့်တာကတော့ပေါ့နော်၊ သူတို့ မနေ့က ရဲစခန်းကနေပြီးတော့ မနက် ၈ နာရီမှာ ၀ရမ်းနဲ့ လာဖမ်းမယ်ဆိုတဲ့ ကိစ္စကို ဒီကနေ့ ဘာမှ မထူးဘူး။ ဒါပေမယ့် သူတို့ စကားပြန်တွေ လာပြောပုံအရ ဆိုရင်တော့ ဒီလူကို ဖမ်းသွားပြီလို့ ကြားတယ်။ ဒါပေမယ့် မမြင်ရဘူး၊ လုံးဝ မမြင်ရဘူး။ ပြောပုံအရဆိုရင်တော့ လာခေါ်သွားတယ်လို့ ကြားတယ်တဲ့။ ဒါပေမယ့် မမြင်ရတာ ဖြစ်တဲ့အတွက် သူတို့ကတော့ ဒါကို မယုံကြည်ဘူးတဲ့။"

တိုးမြတ်အောင်စက်ရုံက အခြေအနေကို မသက်သက်အောင် ပြောပြသွားတာပါ။

အရိုက်ခံရတဲ့အလုပ်သမလေးတွေ အမှုဖွင့်တာကို စခန်းမှူးက နည်းလမ်းနှစ်ခု ရွေးခိုင်းထားတာ ဘယ်အခြေအနေ ရောက်သွားပြီ ဆိုတာကိုလည်း အတိအကျမသိရသေးပါဘူး။ တရားစွဲတဲ့ နည်းလမ်းနဲ့ လျော်ကြေးယူတဲ့နည်းလမ်းမှာ လျော်ကြေးယူရင် ပိုက်ဆံတွေ အများကြီးရမှာဆိုပြီး အလုပ်သမလေးတွေကို ရဲစခန်းမှူးက မနေ့ကပြောထားတာပါ။

အလုပ်သမားဆန္ဒပြပွဲတွေ ဆက်ပြီးပဲ ကြီးထွားလာမလား၊ ရက်ကြာလာတာနဲ့အမျှ စိတ်ပျက် အားလျော့သူတွေ ပိုများလာပြီး မအောင်မမြင်နဲ့ အဆုံးသတ်သွားမှာလား ဆိုတာကတော့ ကာယကံရှင် အလုပ်သမားတွေပေါ်မှာပဲ အဓိက မူတည်နေကြောင်းပါ။

ဆန္ဒပြမှုတွေ ပြေလည်အောင်ဖြေရှင်းပေးဖို့ အာဏာပိုင်တွေကို ၈၈ မျိုးဆက်တောင်းဆို

By ကိုဇော်ဝင်းလှိုင်

• ရန်ကုန်မြို့တဝိုက်မှာဖြစ်ပေါ်နေတဲ့ အလုပ်သမားဆန္ဒပြမှုတွေ ပြေလည်ဖို့အတွက် သက်ဆိုင်ရာ အာဏာပိုင်တွေ အနေနဲ့ ဖြန်ဖြေရေးကော်မတီတွေဖွဲ့ပြီးတော့ အမြန်ဆုံး ဖြေရှင်းပေးဖို့လိုတယ်လို့ ၈၈ မျိုးဆက် ကျောင်းသားများအဖွဲ့က တိုက်တွန်းလိုက်ပါတယ်။ အလုပ်သမားဆန္ဒပြမှုတွေ အရှိန်မြင့်လာနေပြီး အကြမ်းဖက်မှုတွေ ဖြစ်ပွားတဲ့ အထိပါ အခြေအနေတွေ ပိုပြီးတော့ ဆိုးလာနေတယ်ဆိုတဲ့သတင်းတွေ ထွက်ပေါ်လာတဲ့အချိန်မှာပဲ ၈၈ မျိုးဆက် ကျောင်းသားတွေက အခုလိုမျိုး တိုက်တွန်းလိုက်တာ ဖြစ်ပါတယ်။ ဒီအကြောင်း အပြည့်အစုံကိုတော့ ဆက်သွယ်စုံစမ်းထားတဲ့ ကိုဇော်ဝင်းလှိုင်က တင်ပြပေးထားပါတယ်။

ရန်ကုန်မြို့တဝိုက်က စက်ရုံအလုပ်သမားတွေ လုပ်အားခတိုးမြှင့်ပေးရေးနဲ့ အလုပ်သမားခံစားခွင့်တွေ ပိုမို ရရှိရေးတို့အတွက် ဆန္ဒပြတောင်းဆိုမှုတွေ အရှိမြင့်လာနေချိန်မှာပဲ မနေ့က ၈၈ မျိုးဆက်ကျောင်းသားများ အဖွဲ့က ကြေညာချက်ထုတ်ပြန်ပြီးတော့ အခုလို တောင်းဆိုလိုက်တာပါ။ မနေ့က ဆန္ဒပြမှုတွေ အရှိန်မြင့်လာပြီး အကြမ်းဖက်မှုတွေပါ ဖြစ်ပေါ်လာနေတယ်ဆိုတဲ့ သတင်းတွေ ထွက်ပေါ်လာနေတာကြောင့် ဒီကိစ္စပြေလည်နိုင်အောင် သက်ဆိုင်ရာ အာဏာပိုင်တွေအနေနဲ့ ဖြန်ဖြေရေးကော်မတီလိုမျိုး ဥပဒေအရ လုပ်ပိုင်ခွင့်ရှိတဲ့ ကော်မတီတရပ်ဖွဲ့စည်းပြီး ဒီကိစ္စကို အမြန်ဆုံးဖြေရှင်းပေးဖို့ လိုအပ်တယ်လို့ ၈၈ မျိုးဆက် ကျောင်းသားများအဖွဲ့က ဦးကိုကိုကြီးက ပြောပါတယ်။

"ဥပဒေအရဆိုရင်တော့ ဖြန်ဖြေရေးကော်မတီပေါ့- ကော်မရှင်ပေါ့။ ခုံသမာဓိအဖွဲ့ ဖွဲ့ဖို့- အဲဒါကို ဖွဲ့ပြီးတော့ ဖြေရှင်းပေးဖို့၊ အမြန်ဆုံးပေါ့လေ၊ အရေးယူဆောင်ရွက်ပေးဖို့ ကျနော်တို့ တိုက်တွန်းတာပါ။"

အလုပ်ရှင်၊ အလုပ်သမားဆိုတာဟာ မိသားစုလို ဆက်ဆံကြရမှာဖြစ်တာကြောင့် တဦးနဲ့တဦး ဆက်ဆံရေးမှာ ပြေလည်ဖို့လိုအပ်တယ်လို့လည်း ဦးကိုကိုကြီးက ပြောပါတယ်။ နိုင်ငံခြားကရောက်လာတဲ့ ရင်းနှီးမြှုပ်နှံမှုတွေကို ကြိုဆိုကြရမှာဖြစ်ပေမယ့်လည်း တိုင်းပြည်အတွင်းက အလုပ်သမားတွေရဲ့ အခွင့်အရေးကို မထိခိုက်စေဖို့တော့ သတိထားသင့်တယ်လို့လည်း ကိုကိုကြီးက ထောက်ပြပြောဆိုပါတယ်။

"ကျနော်တို့က ၁၉၈၈ မှာကတည်းက နိုင်ငံက ဖွံ့ဖြိုးမှုအနိမ့်ဆုံးနိုင်ငံဖြစ်သွားတဲ့အပေါ်မှာ၊ တိုင်းပြည်ဆင်းရဲ မွဲတေတဲ့အပေါ်မှာ နိုင်ငံရေး၊ စီးပွားရေးစံနစ်တွေကို ကျနော်တို့ မကျေနပ်လို့ ဆန္ဒပြလာခဲ့တာ၊ အဲဒီတော့ ဖွံ့ဖြိုးရေးနဲ့ပတ်သက်လို့ နိုင်ငံခြားရင်းနှီးမြှုပ်နှံမှုတွေ၊ ပုဂ္ဂလိကလုပ်ငန်းတွေကို ကျနော်တို့က လာလည်း လာစေချင်တယ်။ ရင်းနှီးမြှုပ်နှံမှုတွေလည်း ဖြစ်စေချင်တယ်။ အဲသလိုလာတဲ့အချိန်မှာ ကျနော်တို့ နိုင်ငံ သားတွေရဲ့အခွင့်အရေးကိုလည်း အာမခံချက်ရှိတဲ့- အနိမ့်ဆုံးအဆင့် အိမ်နီးချင်းနိုင်ငံတွေမှာရှိတဲ့ လုပ်ခ လစာတွေနဲ့ နှိုင်းယှဉ်နိုင်တဲ့အခြေအနေမျိုးပေါ့။ အဲဒါမျိုးတော့ ဖြစ်စေချင်တယ်။"

မနေ့က ဆန္ဒပြမှုတွေမှာ အကြမ်းဖက်မှုတွေပါလာတယ်ဆိုတဲ့သတင်းတွေ ထွက်လာနေတာကြောင့် အဲလိုမျိုး အကြမ်းဖက်မှုတွေဖြစ်မလာအောင်နှစ်ဘက်စလုံးက သတိထားကြဖို့လိုအပ်တယ်ဆိုတာကိုလည်း ဦးကိုကိုကြီးက ပြောပါတယ်။