ယဉ်ကျေးမှုဟု ဆိုရာတွင်…( လုံမလေးမွန်မွန် )

သုတ အချစ် ဘ၀ စာတိုပေစ

ဟိုနေ့က “အဖေလား..အမေလား…ဆုံးမပေးပါ” ဆိုတဲ့ ပို့စ်နဲ့ ပို့စ်အောက်က ကွန်မန့်တွေကို ဖတ်အပြီးမှာ ကျွန်မခေါင်းထဲကို “ယဉ်ကျေးမှု” ဆိုတဲ့ စကားလုံးက ၀င်ရောက်လာခဲ့ပါတယ်။ “ယဉ်ကျေးမှု” ရဲ့ အဓိပ္ပာယ်ကို ကျွန်မစသိခဲ့တာ ရှစ်တန်းနှစ်လောက်မှာပါ။ “ယဉ်ကျေးမှုဆိုသည်မှာ အစဉ်အဆက် ထိန်းသိမ်းတည်ရှိခဲ့သော အစဉ်အလာ၊ ဓလေ့ထုံးတမ်း၊ စာပေ၊ ဂီတ၊ အနုပညာ အားလုံးပါဝင်သည်” လို့ သင်ကြားခဲ့ရပါတယ်။
တစ်ဆက်တည်းမှာပဲ ဆယ်တန်းမှာသင်ခဲ့ရတဲ့ ဦးမင်းနိုင်ရဲ့ မြန်မာမှုဆိုတဲ့စာထဲက အကြောင်းအရာတစ်ခုကိုလည်း သတိရမိပါတယ်။ ယဉ်ကျေးမှုဆိုတဲ့နေရာမှာ ထိန်းသိမ်းသင့်တဲ့ယဉ်ကျေးမှုရှိသလို ခေတ်နဲ့လိုက်လျောညီထွေစွာ ပယ်ဖျက်သင့်တဲ့ယဉ်ကျေးမှုလည်း ရှိပါတယ်တဲ့။ ဥပမာအားဖြင့် ဆေးမင်ကြောင်ထိုးခြင်းအလေ့အထဟာ ကျန်းမာရေးရှုထောင့်ကကြည့်ရင် မသင့်လျော်တဲ့အတွက် ဒီအလေ့ကို ပယ်ဖျက်ရမှာဖြစ်ပေမယ့် အသားမှာစွဲအောင်ထိုးတဲ့ ဆေးမင်ကြောင်ဆေးဖော်စပ်နည်းကိုတော့ ဆက်လက်ထိန်းသိမ်းသင့်ပါတယ်တဲ့။

အဲဒီနောက်တော့ ယဉ်ကျေးမှုဆိုတဲ့ အဓိပ္ပာယ်ကို အတိအကျသိချင်တဲ့အတွက် ထပ်ရှာကြည့်လိုက်တဲ့အခါ ဖွင့်ဆိုချက်အမျိုးမျိုးကို တွေ့မိပါတယ်။

မြန်မာအဘိဓာန်ရဲ့ ဖွင့်ဆိုချက်ကို ဖတ်ပြီးတဲ့အခါမှာတော့ ကျွန်မအတွေးထဲကိုရောက်လာတဲ့ ယဉ်ကျေးမှုနဲ့ပတ်သက်တဲ့ ခံယူချက်၊ အမြင်လေးတွေကို ပြောပြချင်ပါတယ်။

ယဉ်ကျေးမှုဆိုတာ နိုင်ငံတစ်နိုင်ငံ၊ လူမျိုးတစ်မျိုးရဲ့အသက် ဖြစ်ပါတယ်။ စာပေပျောက်ရင် လူမျိုးပျောက်တယ်၊ ပျူစာပေကို မထိန်းသိမ်းနိုင်ခဲ့လို့ ပျူလူမျိုးပျောက်ခဲ့တယ်လို့ အဆိုတွေရှိခဲ့ပါတယ်။ တကယ်တော့ စာပေဆိုတာ ယဉ်ကျေးမှုရဲ့ အစိတ်အပိုင်းတစ်ခုပါ။ ဒီတော့ လူမျိုးမပျောက်ဖို့က ယဉ်ကျေးမှုတစ်ခုလုံးကို ထိန်းသိမ်းဖို့ လိုအပ်လှပါတယ်။ နိုင်ငံတစ်နိုင်ငံ၊ လူမျိုးတစ်မျိုးရဲ့ ကိုယ်ပိုင်ယဉ်ကျေးမှုကို ထိန်းသိမ်းစောင့်ရှောက်ဖို့ အဓိက တာဝန်ရှိသူတွေကတော့ အဲဒီ့နိုင်ငံသား၊ အဲဒီ့လူမျိုးပဲ ဖြစ်ပါတယ်။ ပြီးတော့ ယနေ့ခေတ်ဟာ ဂလိုဘယ်လိုက်ဇေးရှင်း လို့ ဆိုတဲ့အတိုင်းပဲ နည်းပညာတိုးတက်မှုတွေရဲ့နောက်မှာ ယဉ်ကျေးမှုတွေ ကူးလူးစီးဝင်ရောနှောလာကြပါတယ်။ ဒီလိုအချိန်မျိုးမှာ ကိုယ့်ယဉ်ကျေးမှုပျောက်ပျက်မသွားအောင်၊ အခြားယဉ်ကျေးမှုတွေနဲ့ ရောနှောမသွားအောင် ထိန်းသိမ်းဖို့က အရေးကြီးလှသလို ကိုယ့်ရဲ့ အစဉ်အလာကြီးမားပြီး ကောင်းမွန်တဲ့ယဉ်ကျေးမှုတွေကို ကမ္ဘာ့အလယ်မှာ ချပြနိုင်ဖို့ အခွင့်အရေးကောင်းလည်း ဖြစ်ပါတယ်။

မြန်မာအဘိဓာန်ရဲ့ ယဉ်ကျေးမှုဖွင့်ဆိုချက်မှာ အချက်သုံးချက်ကို တွေ့နိုင်ပါတယ်။ (၁) သိမ်မွေ့ပြေပြစ်သော တတ်သိမှု၊ (၂) တိုးတက်ထွန်းကားသော လူမှုအဆင့်အတန်း၊ (၃) အစဉ်အလာအားဖြင့် ထိန်းသိမ်းတည်ရှိသော ဓလေ့ထုံးတမ်း။ ယဉ်ကျေးမှုကို ထိန်းသိမ်းတဲ့နေရာမှာ ဒီအချက်သုံးချက်ကို ဟန်ချက်ညီညီလုပ်ဆောင်ဖို့လိုပါတယ်။ ကျွန်မနားလည်သလောက် ပြောကြည့်ရမယ်ဆိုရင် သိမ်မွေ့ပြေပြစ်သော တတ်သိမှုဆိုတာ ယဉ်ကျေးမှုရဲ့ သဘောသဘာဝနဲ့ အနှစ်သာရကို အသေအချာသိရှိခြင်းဖြစ်ပါတယ်။ အဲဒီလိုသိမှသာ တိုးတက်ထွန်းကားလာတဲ့ လူမှုအဆင့်အတန်းကိုလိုက်ပြီး လိုက်လျောညီထွေပြုပြင်ဖို့ လိုအပ်သလို အစဉ်အလာအားဖြင့် ထိန်းသိမ်းတည်ရှိနေတဲ့ ဓလေ့ထုံးတမ်းတွေကိုလည်း အသေအချာနားလည်ပြီး မှန်မှန်ကန်ကန် ထိန်းသိမ်းရမှာဖြစ်ပါတယ်။

ရှေးယခင် ကျွန်မတို့ မြန်မာလူမျိုးတွေဟာ ဆံပင်ကို အလေးအမြတ်ထားပြီး ထိန်းသိမ်းကြပါတယ်။ ယောက်ျားလေးတွေက သျှောင်ကြီးဗွေ၊ မိန်းကလေးတွေက ဆံထုံး စသဖြင့် ထားခဲ့ကြပါတယ်။ တိုးတက်ပြောင်းလဲလာတဲ့ ခေတ်ကာလအောက်မှာ သျှောင်ကြီးဗွေတွေ ပျောက်ကွယ်သွားခဲ့ကြပါတယ်။ နိုင်ငံအတွက် ရှေ့တန်းထွက်ခဲ့ရတဲ့ အမျိုးသားတွေဟာ ဆံပင်ကို ထိန်းသိမ်းဖို့ အချိန်မပေးနိုင်ကြတော့တဲ့အချိန်၊ ကိုလိုနီခေတ်အောက်မှာ ဘိုဆံတောက်တွေ ခေတ်စားလာတဲ့အချိန်မှာ သျှောင်ကြီးဗွေယဉ်ကျေးမှု ပျောက်ကွယ်ခဲ့ပါတယ်။ နောက် မိန်းကလေးတွေရဲ့ ဆံကေသာအရှည်တွေလည်း တဖြည်းဖြည်းတိုလာခဲ့ပါတယ်။ အပြိုင်အဆိုင်ကြိုးစားနေတဲ့ခေတ်ကြီးထဲမှာ မိန်းကလေးတွေအနေနဲ့လည်း ဆံပင်အတွက် အချိန်များစွာမပေးနိုင်တော့တာ အမှန်ပါပဲ။ ဒါကြောင့် ဆံပင်ရှည်နည်းလာတဲ့ဒီခေတ်ကို တိုးတက်ထွန်းကားလာတဲ့ လူမှုအဆင့်အတန်းဆိုတဲ့ ခေါင်းစဉ်အောက်မှာ လက်ခံပေးရပါမယ်။ ဒါပေမယ့် ကျွန်မတို့မှာ မြန်မာဆံထုံးထုံးနည်းပေါင်း (၃၀) ကျော်ရှိပါတယ်။ အသက်အရွယ်အလိုက်၊ နေရာဒေသအလိုက် စသဖြင့်ပေါ့။ ဒီဆံထုံးထုံးနည်းတွေကိုတော့ အစဉ်အလာအားဖြင့် ထိန်းသိမ်းတည်ရှိတဲ့ ဓလေ့ထုံးတမ်းဆိုတဲ့ ခေါင်းစဉ်အောက်မှာ ဆက်လက်ထိန်းသိမ်းဖို့ လိုအပ်ပါတယ်။

ကျွန်မတို့မြန်မာမှာ ဘယ်နိုင်ငံမှာမှ မရှိတဲ့ ထူးခြားတဲ့ တစ်ခုတည်းသော ယဉ်ကျေးမှုတစ်ခုရှိပါတယ်။ သနပ်ခါးယဉ်ကျေးမှုပါ။ အခုခေတ်မှာ နိုင်ငံခြားအလှပြင်ပစ္စည်းတွေ ၀င်လာပြီး သနပ်ခါးလိမ်းခြင်းအလေ့အထ နည်းပါလာပါတယ်။ အထူးသဖြင့် မြို့ပြလူမှုအဖွဲ့အစည်းမှာပါ။ ပွဲလမ်းသွားတဲ့အခါ သနပ်ခါးလိမ်းတာထက် နိုင်ငံခြားအလှပြင်ပစ္စည်းတွေနဲ့ လိမ်းခြယ်လာကြပါတယ်။ ဒါပေမယ့် ကျွန်မတို့ မြန်မာတွေရဲ့ အသားအရေသဘာဝက သနပ်ခါးနဲ့သာ အဆင်ပြေပါတယ်။ နွေရာသီပူအိုက်တဲ့အချိန်မှာ သနပ်ခါးရေကျဲလေး လိမ်းထားလိုက်ပါမှ၊ ၀က်ခြံနဲ့အဖုတွေထွက်လာရင် သနပ်ခါးလေး တို့ထားလိုက်ပါမှ သက်သာပါတယ်။ ဒီတော့ နိုင်ငံခြားအလှပြင်ပစ္စည်းနဲ့ခြယ်သခြင်းကို တိုးတက်ထွန်းကားလာတဲ့ လူမှုအဆင့်အတန်းဆိုတဲ့ ခေါင်းစဉ်အောက်မှာ လက်ခံပေးရသလိုပဲ ထူးခြားလှတဲ့ မြန်မာ့ယဉ်ကျေးမှု သနပ်ခါးကိုတော့ အစဉ်အလာအားဖြင့် ထိန်းသိမ်းတည်ရှိတဲ့ ဓလေ့ထုံးတမ်းဆိုတဲ့ ခေါင်းစဉ်အောက်မှာ ဆက်လက်ထိန်းသိမ်းရပါတယ်။ နိုင်ငံခြားခရီးသွားတွေက ပါးကိုလက်ညှိုးထိုးပြပြီး ဒါဘာလဲလို့ မေးတဲ့အခါ ဒါကတော့ သနပ်ခါးပါ၊ မြန်မာ့ရိုးရာမိတ်ကပ်ပါဆိုပြီး သနပ်ခါးရဲ့ကောင်းကျိုးတွေကို ပြောပြရတာဟာ အလွန်ဂုဏ်ယူဖို့ကောင်းပါတယ်။

နောက် ကျွန်မတို့ရဲ့ ရိုးရာဝတ်စားဆင်ယင်မှုပါ။ မြန်မာ့ရိုးရာဝတ်စုံဟာ မြန်မာနိုင်ငံရဲ့ ဘယ်လိုရာသီဥတုမှာမဆို၊ ဘယ်လိုနေရာဒေသမဆို အဆင်ပြေပြေ၀တ်ဆင်လို့ရပါတယ်။ ဒါပေမယ့် ရုန်းကန်နေရတဲ့ ယနေ့ခေတ်အခါမှာ ရိုးရာလုံချည်ထက် ဘောင်းဘီ၊ စကပ်စသည့်တို့က သွားရလာရ ပေါ့ပါးတာမျိုးတွေ ရှိတတ်ပါတယ်။ ဒီတော့ မျက်စိအမြင်မရိုင်းစေတဲ့၊ ခေတ်နဲ့လျော်ညီတဲ့ အနောက်တိုင်းဝတ်စားဆင်ယင်မှုမျိုးကို လက်ခံပေးရမှာဖြစ်သလို ကျွန်မတို့ရဲ့ ရိုးရာယဉ်ကျေးမှုကိုလည်း မပျောက်ပျက်အောင် ထိန်းသိမ်းဖို့ လိုပါတယ်။ ဧည့်လမ်းညွှန်တွေဟာ နိုင်ငံခြားခရီးသွားတွေကို မြန်မာရိုးရာလုံချည်နဲ့ လုံချည်ဝတ်နည်းတို့ကို ဂုဏ်ယူစွာရှင်းပြကြသလို ခရီးသွားတွေကလည်း မြန်မာဝတ်စုံနဲ့ဝတ်ဆင်နည်းကို အံ့သြသဘောကျကြပါတယ်။ တိုးတက်လာတဲ့ နည်းပညာအောက်မှာ နိုင်ငံခြားဝတ်စားဆင်ယင်မှုတွေဟာ ကျွန်မတို့ဆီကို စီးဝင်လာတဲ့အတွက် အဆင်ပြေတဲ့အနေအထားမှာ လက်ခံပေးရမှာဖြစ်သလို ကျွန်မတို့ရဲ့ မြန်မာ့ရိုးရာဝတ်စုံကိုလည်း နိုင်ငံခြားတိုင်းပြည်တွေကို ထိုးဖောက်နိုင်ဖို့ ကြိုးစားရပါမယ်။ ဒါမြန်မာပါလို့ ဖော်ပြနိုင်ဖို့ အသိသာဆုံးနည်းကတော့ ရိုးရာဝတ်စုံပဲ ဖြစ်ပါတယ်။

နောက် မြန်မာ့ယဉ်ကျေးမှုမှာ ကိုယ်အမူအရာ၊ နှုတ်အမူအရာ စတာတွေကလည်း အကျုံးဝင်ပါတယ်။ လူကြီးသူမတွေရှေ့မှာ ခေါင်းငုံ၊ ခါးကုန်းသွားတာ၊ ပစ္စည်းပေးရင် လက်နှစ်ဖက်နဲ့ပေးတာ၊ အစားစားရင် လူကြီးမိဘတွေကို ဦးချတာ၊ ဆရာဆရာမရှေ့မှာ လက်ပိုက်နာခံတာ စတာတွေဟာ ကျွန်မတို့ရဲ့ ထူးခြားပြီး ချစ်စရာကောင်းတဲ့ ယဉ်ကျေးမှုတွေပါ။ နိုင်ငံခြားမှာ လူကြီးရှေ့ ခေါင်းငုံ့ခါးကုန်းသွားရင် တစ်မျိုးဖြစ်မှာဖြစ်တဲ့အတွက် မလုပ်လို့ရပေမယ့် ကိုယ့်နိုင်ငံမှာနေမယ်ဆိုရင်တော့ ဒီယဉ်ကျေးမှုကို လိုက်နာဖို့လိုပါတယ်။ အနောက်နိုင်ငံယဉ်ကျေးမှု စီးဝင်လာတယ်ဆိုပြီး ဒါတွေကို မလိုက်နာတော့ဘူးဆိုရင် ကျွန်မတို့ယဉ်ကျေးမှုပဲ ပျောက်ကွယ်မှာဖြစ်ပါတယ်။ ရောမရောက်ရင် ရောမလိုကျင့်ဆိုတဲ့ စကားအတိုင်း ကိုယ့်နိုင်ငံမှာတော့ကိုယ့်ယဉ်ကျေးမှုကို လိုက်နာထိန်းသိမ်းရမှာဖြစ်ပါတယ်။ ဒါမှသာ လူမျိုးတာဝန်၊ နိုင်ငံသားတာဝန် ကျေပွန်မှာဖြစ်ပါတယ်။

အခုနောက်ပိုင်း ကျွန်မတို့ကြားမှာ ရေပန်းစားလာတဲ့ ကျားမဆက်ဆံရေးအကြောင်းကို ပြောချင်ပါတယ်။ တကယ်တော့ မြန်မာအမျိုးသမီးဖြစ်ရတာကို ကျွန်မအရမ်းကို ဂုဏ်ယူမိပါတယ်။ မဟာဖိုဝါဒကြီးစိုးတဲ့ နိုင်ငံကြီးနှစ်နိုင်ငံဖြစ်တဲ့ တရုတ်နဲ့အိန္ဒိယကြားမှာရှိတဲ့ ကျွန်မတို့ မြန်မာနိုင်ငံမှာ အမျိုးသမီးတွေဟာ အခွင့်အရေးအပြည့်အ၀ရရှိထားပါတယ်။ ပညာသင်ယူခွင့်၊ မဲပေးခွင့် စသဖြင့်ပေါ့။ မြန်မာ့သမိုင်းမှာ ဘုရင်မကြီး ရှင်စောပုဆိုတာ ရှိခဲ့ပါတယ်။ နန်းမတော်မယ်နု၊ ဆင်ဖြူမရှင်၊ စုဖုရားလတ် စတဲ့ မိဖုရားကြီးတွေကလည်း သမိုင်းရဲ့ အဓိကဇာတ်ဆောင်တွေ ဖြစ်ခဲ့ဖူးပါတယ်။ နောက်ပြီး မြန်မာမိန်းကလေးတွေဟာ တန်ဖိုးထားဆက်ဆံခံရပါတယ်။ မိန်းကလေးကို တင့်တောင့်တင့်တယ် တောင်းရမ်းလက်ထပ်ယူပါတယ်။ ခင်ပွန်းရဲ့ ၀င်ငွေကို စီမံခွင့်၊ အိမ်ထောင်စီမံခွင့် အပြည့်အ၀ရရှိပါတယ်။ ယောက္ခမကို မိဘသဖွယ်သဘောထားပြီး ရိုသေတာပဲရှိပြီး မဖြစ်မနေ ယောက္ခမအိမ်ရဲ့ အစေခံသဖွယ် လုပ်ပေးစရာမလိုပါဘူး။ နှစ်ယောက်သား ကိုယ့်ဘ၀ကိုယ်တည်ထောင်ပြီး အိမ်ခွဲနေခွင့်ရှိပါတယ်။ မြန်မာ့ထုံးတမ်းစဉ်လာဥပဒေမှာလည်း ခင်ပွန်းသေရင် ခင်ပွန်းပစ္စည်းအကုန်လုံးကို ဇနီးက ရပိုင်ခွင့်ရှိပါတယ်။ သားသမီးအုပ်ထိန်းပိုင်ခွင့်ကလည်း မိခင်မှာပဲရှိပါတယ်။ ပြောရရင်တော့ ကျွန်မတို့ မြန်မာမိန်းကလေးတွေဟာ အနှိမ်ခံဘ၀နဲ့ရှိခဲ့ကြတာ မဟုတ်ပါဘူး။

တဖြည်းဖြည်းနဲ့ မိန်းကလေးတွေကို တန်ဖိုးထားမှုလျော့လာတာကို မြင်ရတာ တကယ်စိတ်မကောင်းဖြစ်မိပါတယ်။ အထူးသဖြင့် ချစ်သူရည်းစားထားဖူးတဲ့ မိန်းကလေးတွေကို အပျိုစင်မစစ်တော့သလို ထင်နေကြတာတွေကို ကြားရတိုင်း အသည်းခိုက်အောင် နာမိပါတယ်။ ကျွန်မတို့ အမျိုးသမီးတွေ ယဉ်ကျေးမှုကို ထိန်းသိမ်းဖို့ အရေးကြီးလှပါတယ်။ ခေတ်နဲ့အညီ ပယ်သင့်တာကို ပယ်သလို ထိန်းရမှာကိုလည်း မဖြစ်မနေ ထိန်းသိမ်းသင့်ပါတယ်။ အရင်ခေတ်ကဆိုရင် မိန်းကလေးဆိုတာ ဗိုင်းကောင်းကျောက်ဖိနဲ့ အိမ်ထောင့်တာဝန်ကျေပွန်အောင်လုပ်ရတဲ့ဘ၀ကနေ အခုအချိန်မှာ ယောက်ျားလေးတွေနဲ့ ရင်ပေါင်တန်းပြီး ကြိုးစားနေရတဲ့ဘ၀ကို ရောက်လာပါပြီ။ ဒီလိုအချိန်မျိုးမှာ ခြေတစ်လှမ်း ကုဋေတစ်သန်းဆိုတာတွေ၊ ဗိုင်းကောင်းကျောက်ဖိအိမ်တွင်းပုန်းဆိုတာတွေ၊ မိန်းကလေးအိမ်ပြန်ချိန်ဆိုတာတွေကို ပယ်သင့်လျှော့သင့်ပြီး တိုးတက်ထွန်းကားလာတဲ့ လူမှုအဆင့်အတန်းဆိုတာကို လက်ခံပေးရမှာဖြစ်ပါတယ်။ ဒါပေမယ့် တန်ဖိုးထားခံရတဲ့ အမျိုးသမီးဂုဏ်ပုဒ်ကိုတော့ ထိန်းသိမ်းသင့်ပါတယ်။ မြန်မာမိန်းကလေးဆိုတာ မင်္ဂလာဦးညမတိုင်ခင်အထိ မိမိရဲ့အပျိုစင်ဘ၀ကို ထိန်းသိမ်းရမှာဖြစ်ပါတယ်။ ယောက်ျားလေးတွေနဲ့ ဆက်ဆံတဲ့နေရာမှာလည်း မိမိရဲ့ ထက်မြက်ပွင့်လင်းမှုနဲ့ အိနြေ္ဒသိက္ခာဆိုတာကို ခွဲခြားတတ်ဖို့လိုပါတယ်။ အနောက်တိုင်းယဉ်ကျေးမှုကိုအတုယူပြီး ကိုယ့်ကိုကိုယ်တန်ဖိုးထားမထိန်းသိမ်းရင် မြန်မာမိန်းကလေးဆိုတာ ပျောက်ကွယ်သွားမှာဖြစ်ပါတယ်။ ပြီးတော့ ဒီခေတ်ထဲမှာ ကျားမဆက်ဆံရေးနဲ့ လိင်ပိုင်းဆိုင်ရာကိစ္စတွေကို ကိုယ့်ကိုကိုယ်ကာကွယ်ဖို့ နဲ့ ကျန်းမာရေးဆိုင်ရာဗဟုသုတအနေနဲ့ မိန်းကလေးအားလုံးသိထားသင့်ဖို့လိုပါတယ်။ ဒါပေမယ့် ခေတ်မီတယ်ဆိုတဲ့ခေါင်းစဉ်အောက်မှာ ဒါတွေကို တလွဲအသုံးချမယ်ဆိုရင်တော့ မြန်မာ့ယဉ်ကျေးမှုနဲ့ သွေဖယ်သွားပါလိမ့်မယ်။ ဒါ့ကြောင့် ကျွန်မပြောချင်တာတော့ အားလုံးကို သိအောင်လေ့လာပါ၊ စာများများဖတ်ပါ။ ဒါပေမယ့် ပညာဥာဏ်ကို အသုံးချပြီး မြန်မာ့ယဉ်ကျေးမှုအောက်က မြန်မာအမျိုးသမီးဂုဏ်ပုဒ်ကို ထိန်းသိမ်းကြပါ။ အနောက်တိုင်းယဉ်ကျေးမှုတွေထဲက မြန်မာ့ယဉ်ကျေးမှုနဲ့ကိုက်ညီတာကိုပဲ ယူကြပါ။ မြန်မာဆိုတာ မပျောက်ဖို့ မြန်မာတို့ရဲ့ အစဉ်အလာအားဖြင့် ထိန်းသိမ်းတည်ရှိတဲ့ ဓလေ့ထုံးတမ်းဆိုတာတွေကို အသေအချာထိန်းသိမ်းပေးကြပါလို့ ပြောချင်ပါတယ်။

ဒါတွေဟာ ကျွန်မရဲ့ ဖြုတ်မျက်လုံးဥာဏ်လေးနဲ့ တွေးမိတာတွေဖြစ်တဲ့အတွက် မှားတာတွေရှိရင်လည်း ပြင်ပေးကြဖို့ တောင်းဆိုချင်တဲ့အပြင် လွတ်လပ်စွာကွဲလွဲနိုင်ပါတယ်လို့လည်း ပြောချင်ပါတယ်။

ခင်မင်လျက်
မွန်မွန်